قصة قلـيـــــــل من الحـــــــــــب ..... روووووعة - الصفحة 31

صخر جلمود · 05-31-2008, 02:27 AM

سلطان.. في هالوقت كان في غرفته .. حاس بتوتر كبير لأنه هند في غرفتها.. يعني قريبة منه.. هو وياها في نفس المكان.. بس مب قادر يوصل لها..
حاول سلطان يود عمره .. او يتريى شوي.. بس يوم شاف اخته شما داشة غرفتها.. عرف انه هند بروحها وشل السماعة واتصل بغرفتها..
رن التيلفون رنتين.. وردت عليه هند..
هند: ألو؟
سلطان من سمع صوتها حس بعمره ينتفض.. كان واقف من التوتر بس الحين حس انه فقد توازنه ويلس على شبريته..
هند استغربت وردت تقول: ألو؟؟؟
هالمرة سلطان تشجع وقال: هنادي؟
هند حست انه حد صب عليها سطل ماي وثلج.. سلطان!! سلطان متصل بها.. فديت هالحس يا ربي.. لا اراديا ابتسمت هند ويلست تلعب بشعرها بدلع.. وسكتت..
سلطان كان خايف.. خايف تصده أو تعاتبه.. وكان يدعي ربه انها ما تسأله عن سالفة منايه لأنه ما يبا يخبرها باللي سوته شما..
سلطان: غناتي ردي عليه..
أخيرا لقت هند صوتها وقالت بغرور: انا مب غناتك.. لو سمحت رمسني باحترام..
سلطان (يبتسم): لا.. انتي غناتي
هند: أقول لك انا مب غناتك.. وبعدين ليش متصل..؟ ما تحس انك متأخر شوي؟
سلطان: متاخر؟
هند: هى متأخر.. يعني لو متصل قبل شهر ونص.. يمكن اتنزل وارمسك.. بس الحين.. اسمح لي.. مب متفيجة لك..
قبل لا يرد عليها سلطان.. صكت هند التيلفون في ويهه..

يلست هند على شبريتها وهي متظيجة.. كانت تتريا اللحظة اللي تكلم فيها سلطان من شهور.. بس احساسها بخيانته خلاها تتصرف هالتصرف.. ونزلت دموعها وهي تفكر انه ايد الحين متظايج من اللي سوته.. : يا ربي ليش بندت في ويهه.. ارد ادق له؟ فديت روحه.. لا لا .. ما بدق له.. خله يتأدب ويحس بجيمتيه.. خله يحس بالقهر اللي حسيت به طول هالليالي وانا افكر شو اللي ناقصني عشان يتحلى عني..

سلطان يوم صكت في ويهه حس بعمره سخيف وصج ما عنده سالفة.. عصب وايد وهند تعرف انه ما يداني حد يبند في ويهه.. تأفف سلطان وطلع من الغرفة وشاف هزاع في ويهه.. وابتسم له ووقف يرمسه ..
سلطان: ها هزاع.. شحالك؟
هزاع (يبتسم بتعب): الحمدلله بخير .. انته شحالك؟
سلطان: الحمدلله.. ما سرت الشركة..؟
هزاع: لا.. الحين ساير..
سلطان: هى..
مرت ثواني سكتوا فيها اثنيناتهم.. رغم انهم تصالحوا بس انبنى من بينهم حاجز كبير .. خلاص مستحيل ترد علاقتهم الاولية مثل ماكانت ومهما حاولوا لازم بتم من بينهم تحفظات..
هزاع: سلطان..
سلطان: هلا..
هزاع: لا .. ماشي..
سلطان: هزاع تبا شي؟
هزاع: لا.. بس .. بسير ما فيه اتأخر عن الشغل..
سلطان: خلاص اخويه برايك.. سير..
ابتسم هزاع وسار عنه.. ووقف سلطان شوي يفكر فيه .. كان هزاع غامظنه بس في نفس الوقت ما يروم يساعده .. لأنه هزاع انعزل عنهم وما في مجال يرد لهم مثل قبل..

سار سلطان غرفة شما وشافها يالسة تطلع ثيابها من الشنطة وقال: شمااااااااااااااااااااااااني..
التفتت شما عليه وشافت ملامح الكآبة والحزن كلها مرتسمة على ويهه.. وعلى طول اقتربت منه وقالت: فديت اخويه بلاك جي ويهك معتفس؟
سلطان: هندو زعلانة مني مب راضية ترمسني..
شما: اكيد عشان سالفة الرقم..
سلطان: هى
شما نزلت عيونها وقالت بحزن: خلاص انا العصر بخبرها اني انا السبب..
سلطان: لا !
شما: ليش.؟
سلطان: بس.. ماباها تزعل منج.. ما برتاح جذي.. شو دراج يمكن عمرها ما تنسى لج هالحركة..
شما: بس هندوه ما بتسامحك الا اذا عرفت..
سلطان: يصير خير..

اليوم اللي عقبه.. كانوا كلهم معزومين عند حمدان ع الغدا.. وكان البيت ربشه من الخاطر.. محمد وناعمة وبناتهن ومانع وموزة وعيالهم ما عدا هزاع اللي يلس في البيت.. وطبعا هند واخوانها.. طول الوقت كان سلطان يطالعها.. وشما ملاحظة انه اخوها وايد متظايج.. بس هند كانت مطنشتنه ومتجاهلة وجوده تماما.. وهالشي وايد أثر في نفسية سلطان.. كان متوله عليها من الخاطر.. واليوم اول مرة يشوفها من شهرين.. هنادي كانت محلوة وايد.. صح انها ضعفت بس بعد هالشي ما أثر عليها .. وزاد من جمالها.. كان مستغرب منها.. حتى ما صدت صوبه.. معقولة
حتى ما صدت صوبه.. معقولة ما تولهت عليه مثل ما هو توله عليها؟؟ معقوله ما اشتاقت لابتسامته شرات ما اشتاق هو لابتسامتها؟؟ معقولة يمر هاليوم وما يرمسها؟؟
هند كانت تحاول تخبي مشاعرها وتدعي ربها انه هالحرارة اللي تحس بها في خدودها ما تكون واضحة للكل.. ما تعرف من وين يتها القوة انها تصبر وما تسير له .. كانت بتموت من شوقها له.. اخيرا شافته عقب كل هالايام اللي انتظرته فيهن.. اخيرا سلطان جدامها.. وكبريائها يمنعها انها تكون وياه..
ناصر وراشد استغربوا .. ليش اختهم تعامل سلطان بهالبرود.. بس ما حبوا يتدخلون بينهم وطنشوا السالفة..
وعقب الغدا يلسوا كلهم في الصالة.. وكل مجموعة يلست ترمس بروحها..
ناصر كان يالسو يا سلطان وراشد..
ناصر: عيل هزاع وينه ليش ما يا؟
سلطان: هزاع خلاص تغير.. من الشركة للبيت ومن البيت للشركة.. واذا بغى يطلع يروح العزبة ويا ربيعه مايد..
راشد: تصدق؟ تولهت عليه.. مع انه كان نذل..
ناصر: يتم ولد عمنا.. مهما صار..

راشد: من متى هالحنان؟
سلطان: ناصر طول عمره حنون بس محد مقدرنه..
ابتسم ناصر: فديت ولد عمي اللي خذ الحنان كله مني
سلطان: هى والله ..
راشد: لا والله؟ يعني الحين ناصر هو الحنون وانا الشرير؟
سكت ناصر واطالع سلطان بنظرة عشان يقهر راشد بس راشد طنشه وقال: على العموم سلم على هزاع.. ترى مهما كان ولد عمنا.. وخله يمر علينا في ميلس عمي محمد الليلة.. بنترياه..
ابتسم سلطان لراشد وكان مستانس من الخاطر لأنه هزاع وايد غامظنه.. يحس به وحيد وماله حد.. ويمكن يرضى يسير وياهم الليلة ميلس عمه محمد..
في هاللحظة سلطان يت عينه في عين هند اللي كانت يالسة ويا شما ويسولفن بروحهن واول ما شافته يطالعها .. اطالعته بنظرة احتقار وصدت عنه.. سلطان انقهر منها ورد يسولف ويا عيال عمه..

هند كانت تخبر شما بسوالف الجامعة ووين كانت تروح في البحرين.. ومنو شافت وعن قوم ثريا واحمد.. وندى ونادية..
هند: والله تمنيتج تكونين ويايه.. كنت احس بالوحدة وانا اداوم في محاظراتي..
شما: ما تعرفتي على أي حد هناك؟
حست هند بقلبها يعورها وقالت: تعرفت على وحدة.. بس عمري ما ندمت على شي كثر ما ندمت على معرفتي بها..
شما: ليش؟
هند: بخبرج عقب .. الحين ما ينفع.. احس عمري اذا بديت ارمس بصيح..
شما: فديت روحج شو سوت بج هاذي..؟
هند:انتي العصر تعالي لي وانا بخبرج..
شما: خلاص العصر موعدنا..

موزة كانت يالسة ويا سعاد وناعمة.. بس ناعمة ملت منهن وراحت تيلس ويا بناتها.. وأول ما راحت عنهن..
سعاد: أف. ما بغت تروح..
موزة: هههههه نفسي اعرف انتوا الثنتين لليش ما تطيقون بعض؟
سعاد: والله انا اكثر شي اكرهه انه الوحدة تيلس تخق عليه..
موزة: هاذي طبيعتها يا سعاد .. هي مب متعمدة..
سعاد: المهم خليها عنج.. خبريني باخبارج انتي
موزة: شو اقول لج يا سعاد.. احاتي هزاع .. لو تشوفينه والله بتصيحين..
تجاهلت سعاد رمسة موزة وطاري هزاع وقالت: مدري حمدان وين راح..
تنهدت موزة.. كانت تعرف انه سعاد مستحيل تتغير.. وقالت: أكيد راح الميلس عشان يسولف ويا مانع ومحمد على راحته..
سعاد: يمكن..
موزة: وهند ؟ شو اخبارها وياج.. ؟
سعاد: هنادي فديتها تغيرت.. مدري احس بها ثقلت.. غير عن قبل..
موزة: لازم هالشي كان بيستوي.. الغربة صعبة وهند اكيد تعذبت..
سعاد: تعذبت من دون سبب..
موزة عرفت انه هالنغزة حقها عشان هزاع.. وكان خاطرها ترد عليها وتقول لها انتي اللي عذبتيها ووديتيها البحرين من دون سبب . .بس ليش تييب لعمرها المشاكل ؟ سعاد مستحيل تتغير.. مهما قالت لها موزة..
سعيد كان الوحيد اللي يالس بروحه.. الكل لاهي عنه.. وكان ملان وكل شوي يروح وييلس في حظن حد.. وفي النهاية قرر يسير عند سلطان ، بس ناصر شله ويلس يسوي له حركات بويهه وسعيد تظايج وكان يدز ويه ناصر بعيد عنه وناصر يقهره ويقرب ويهه بزياده..
سعيد: لوح لوح ما ادانيك..
ناصر: ما بروح .. بتم ميودنك لين ما تحبني غصب..
اطالع سعيد سلطان بنظرة تعور القلب وعلى طول انقذه سلطان من ناصر ويلسه في حظنه..
وتم سعيد يالس في حظن اخوه وعينه على ناصر وعقب ربع ساعة رقد من الملل..

------------

العصر.. في بيت حمدان بن ظاحي.. راشد وناصر كانوا رقود.. وسعاد يالسة تسولف ويا ام جمال في الصالة.. وحمدان طلع ويا مانع.. وهند كانت بروحها تتريى شما.. ويوم اطالعت ساعتها شافت انه الساعة بعدها 4 وشما بتي الساعة خمس.. فقررت تاخذ مذكرتها وتسير تشخبط فيها عند الحوض.. لأنها وايد تحب هالبقعة ومن زمان ما يلست فيها..
جلبت هند صفحات مذكرتها وكانت تبتسم كل ما قرت شي من خرابيطها .. وفتحت على صفحة يديده وكتبت..
" سلطان..
انته خيبت ظني فيك.. خلاص ما اظن انه في شي يربطني بك.. تخليت عني .. وكنت أسوأ عن الكل.. للأسف قلبي ما عرف يختار.. راح اعاند احساسي واعاند شوقي لك.. وبتكون في حياتي مجرد ذكرى سيئة .. أو غلطة مستحيل ارد واعيدها.."

في هاللحظة.. شافت هند شما يايتنها ونزلت المذكره حذالها وابتسمت لبنت عمها ..
شما اقتربت منها وباستها ويلست حذالها ..
شما: هندوه الخاتم اللي يبتي لي اياه يجنن.. امايه تخبلت عليه..
هند: والله متلومة فيها ما يبت لها شي ويايه..
شما: عادي هندوه انتي رديتي فجأة معذورة..
هند: زين ييتي من وقت انا كنت ملانة..
شما: انزين نسير داخل شو ميلسنج هني في الحر؟
هند: ياللا .. بخبرج بكل اللي استوى لي هناك..
شما: من الظهر وانا اتريى .. خبريني بكل التفاصيل..
هند: أكيد حبيبتي..

دشت هند ويا شما ونست مذكرتها برى عند الحوض.. وأم جمال كانت ياية من الملحق وتبا تدش الصالة من الباب الزجاجي اللي ورا.. وشافت مذكرة هند. .ام جمال ما كانت تعرف شو يعني مذكرة.. بس تعرف انه هالكراس هو اللي تشخبط فيه هند دوم.. فشلته وكانت بتدش داخل .. وشافت سلطان توه داش الصالة يتريى ناصر عشان يظهر وياه.. وابتسمت له..
سلطان: هلا ام جمال..
ام جمال: اهلين حبيب البي..
سلطان: ناصر وينه؟
ام جمال: ناصر في الميلس مع راشد.. نادي لك اياه؟
سلطان: هى والله اني متعايز اسير له الميلس.. خبريه اني اترياه هني..
ام جمال: طيب حبيبي..
ونزلت ام جمال المذكرة على الطاولة وراحت تنادي ناصر..
سلطان من الملل شل المذكرة يشوف شو فيها.. وما كان يعرف انها مذكرة.. شدراه بخرابيط البنات وسوالفهن.. ويوم بطلها .. انتبه انه الخط خط هند.. وابتسم.. وقال: الله!! بشوف شو كاتبة عني..
كانت هند كاتبة كل شي في مذكرتها .. وكل اللي صادفها في البحرين.. بس الله ستر وما بطل سلطان الا الصفحة الاخيرة.. وشاف اللي كاتبتنه هند حقه.. " سلطان..
انته خيبت ظني فيك.. خلاص ما اظن انه في شي يربطني بك.. تخليت عني .. وكنت أسوأ عن الكل.. للأسف قلبي ما عرف يختار.. راح اعاند احساسي واعاند شوقي لك.. وبتكون في حياتي مجرد ذكرى سيئة .. أو غلطة مستحيل ارد واعيدها.."

ابتسم سلطان وقال.. : أفاااااا ألحين انا غلطة وذكرى سيئة؟؟ فديتها والله يوم تجسى وتعصب..
فكر سلطان وقرر يقهرها.. ويرد عليها.. أكيد بتنحرج وبتعصب وبروحها بتي ترمسه.. وكتب لها :
" استمري في عنادك.. وانا بتحدى العناد ......... وكل ما قلتي تحدي.. قلت انا كلي صمود
البسي ثوب التغلي.. بادلي وصلي عناد......... حاولي تعذيب قلبي بالتجافي والصدود
شتتيني لو قدرتي .. غلّفي عيني سهاد......... يمتلي صدري هموم ويعتلي نفسي شرود
من بدينا في هوانا وانتي بعيونك جهاد............. ودّك تعرفين قدرك عند هالقلب الجحود
ودك تقيسي غرامك في عيوني كم زاد ............ كم وصل مقدار حبك حد علمك ولا زود
إستفزي كبريائي.. موقفي موقف حياد. ........... راس مالي هالكرامة.. مالها عندي حدود
والله ان اليوم قلبي صار لي مثل الجواد .......... امتطيه .. وتحت أمري ... كل ما عنده يجود
لا تملّي من كفاحك ... استمري في العناد ........... خل نشوف اليوم من هو يجبر الثاني يعود" *
بسرعة كتب لها هالابيات ورد المذكرة مكانها.. وفي هاللحظة كانت هند نازلة من الدري بسرعة لأنها تذكرت انها نست مذكرتها عند الحوض.. وحمد سلطان ربه انه نزل المذكرة قبل لا تشوفه.. هند أول ما شافته وقفت.. ويت عينها في عينه وقاومت رغبتها في الابتسام.. وسلطان كان يطالعها بجرأة بس ما رمسها ولا حاول حتى انه يرمسها.. انتبهت هند انه المذكرة موجودة في الصالة واحمرن خدودها.. بس لا.. مستحيل سلطان يكون بطلها وشاف اللي فيها .. شلتها هند وردت تطالع سلطان .. بس للأسف كان منزل عيونه ويلعب بسويتش السيارة اللي في ايده.. ومشت بكآبة على الدري وردت غرفتها..

وهني دش ناصر الصالة وطلع هو وسلطان من البيت..

هند دشت الغرفة ويلست حذال شما وبطلت المذكرة.. كان ويهها احمر وشكلها متوترة..
شما: بلاج؟
هند: أبا اتاكد من شي..
بطلت هند على اخر صفحة وشهقت بصوت عالي وقرت القصيدة.. واطالعت شما بخوف: قراها!!! سلطان قرى المذكرة..
شما: انتي شو كاتبة فيها؟؟؟
هند: وايد شغلات بس ما اعتقد انه لحق يقرى كل شي.. بس قرى اخر صفحة ورد عليه..
شما: كنتي سابتنه؟
هند: اكيد شو تتوقعين مني وانا معصبة.. مالت عليه منو سمح له اصلا يبطل المذكرة.
شما: يحليله اكيد انصدم يوم شاف الرمسة..
هند: يستاهل.. من تدخل فيما لا يعنيه .. لقي ما لا يرضيه..
شما: حرام عليج.. ليش جي تعاملين اخويه..؟
هند: يستاهل هالمعاملة واكثر.. سلطان تخلى عني.. كان الوحيد اللي وثقت انه بيتم ويايه للأخير.. بس للأسف.. أول واحد تخلى عني كان سلطان..
شما عصبت وما قدرت تسكت اكثر.. وما يهمها شو بيقول سلطان عنها بس كان تحط حد لظنون هند..
شما: هنادي... سلطان ماله ذنب..
هند: أكيد اخوج وبتدافعين عنه..
شما: انتي اسمعيني للأخير ممكن؟
هند: شو عندج؟ تكلمي..
شما: هنادي.. سلطان ما وصله الرقم اصلا.. لأنه... منايه يوم دقت بيتنا انا اللي رديت عليها..
تغيرت ملامح هند... وتمت ساكتة تتريا شما تكمل..
شما: وعطتني انا الرقم عشان اوصله لسلطان..
هند: شو؟؟؟؟؟؟ منايه أكدت لي انها عطت الرقم لسلطان!!
شما: لأني انا اكدت لها اني وصلت له الرقم..
هند: كملي..
شما: هنادي انا قصيت الرقم وفريته في الزبالة..
اطالعتها هند بنظرة حادة.. كانت مصدومة في بنت عمها.. ووقفت وقالت: انتي؟؟؟؟ انتي يا شما؟ ليش؟؟؟؟؟؟
شما: كنت معصبة منج وانقهرت انج لجأتي لمنايه وما لجأتي لي انا..
هند: رقم بيتكم كان متغير!! كيف تبيني ادق لج وانا ما اعرف الرقم..
شما: بس كنتي تقدرين تقولين لمناية تعطيني انا الرقم.. صح ولا لأ؟؟
هند (بعصبية): خليتيني اتعذب هناك والافكار تاخذني وتوديني عشان حركات اليهال اللي ما تملين منها؟
شما: انا حركاتي حركات يهال؟؟ وانتي شو تسمين الحركة اللي سويتيها يوم ييتي بيتنا الفير ووهقتي عمرج ووهقتي اخويه وياج.."؟
انصدمت هند من رمستها وشما بنفسها انصدمت من اللي قالته.. بس خلاص دام انها رمست قررت اتكمل للنهاية.. : برايج انصدمي يا هند بس لازم اقول لج اللي في داخلي.. انتي رحتي . .ابتعدتي.. ما تعرفين الجو اللي كنا عايشينه.. سلطان تعذب عذاب يا هند عمرج ما بتحسين به.. وكله عشانج انتي... الكل يحتقره ويعتبره مجرم.. وهو ساكت عشانج.. يالس عند التيلفون اربعة وعشرين ساعة ما يطلع من غرفته ولا ياكل ولا نشوفه .. يترياج تدقين له.. حطي عينج في عيني وقولي انج هناك في البحرين كنتي تمرين بالعذاب نفسه!!!
نزلت هند عيونها ولأول مرة حست انها فعلا انانية ..
شما: حالتنا كانت صعبة.. امايه كله تصيح وابويه يوم يشوف سلطان يطلع من المكان اللي هو فيه.. شو تتوقعين مني اسوي؟ ما كنت ابا هالعذاب يستمر.. ما كنت ابا سلطان يتهور ويسير لج البحرين وتزيد المشاكل اللي نحن عايشين فيها.. لأني متاكدة انه سلطان كان بيسويها.. بيودرنا كلنا وبيسير لج.. !!
يلست هند وحطت ايدها على ويهها وصاحت.. وسارت شما ولوت عليها: هنادي انا ما اباج تشكين ولو للحظة بمعزتج عندي.. ولا تتحريني ما ندمت على اللي سويته.. والله اني ندمت من خاطريه.. كنت اعرف انج تحاتين هناك وما تعرفين شي عن سلطان .. بس بعد فكرت بامايه وكل اللي كان مكن يستوي لو عطيت سلطان رقمج..
هند: فديت روحه.. شماني والله اني احبه ..كنت اتحراه تخلى عني.. غير رايه وابتعد.. ما تعرفين شكثر هالاحساس فظيع وقاسي.. سلطان حياتي وكنت اتحرى اني خسرته.. كان لازم اهيء عمري اني اكون اقوى عن الظروف.. عشان لا انهار او انهزم يوم انصدم انه سلطان خلاص ما يباني..

شما :ومنو قال لج انه ما يباج.؟؟
هند: بس شوفي شو كتب لي في المذكرة.. خلاص عصب ما بيرمسني..
قرت شما القصيدة وضحكت: ما عليج منه. .بس يبا ينرفزج..
هند: شو اسوي الحين.. ؟
شما: يودي هذا رقم غرفت هاليديد.. (وكتبته شما في مذكرتها).. تريى وفليل دقي له.. انا متأكدة انه بيرضى..
ابتسمت هند: الله لا يحرمني منج يا اغلى اخت في الدنيا..
حظنتها شما: ولا يحرمني منج يا رب..

ف انتظاركم ... البارت الواحد والثلاثون والأخير....
__DEFINE_LIKE_SHARE__

بنوتة صغيرونه · 05-31-2008, 11:20 AM

مشكوووووووووووووووووووووووووووووووووووووووووووووره
ولا تتاخرين __DEFINE_LIKE_SHARE__

oo7oo · 05-31-2008, 11:51 AM

يسلمووووووووووو على التكمله __DEFINE_LIKE_SHARE__

عاشقة العين · 05-31-2008, 12:55 PM

نتريا الباقي ومشكورة على التكملة __DEFINE_LIKE_SHARE__

دلوعة العين2008 · 05-31-2008, 02:08 PM

بليييييييييييييييييييييييييييييييييييز اتريا التكملة والله القصة روووووووووووعة........ __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رأي امــــرأه عجــــوز في الحـــــــــــب،،~~ْ~	محروم.كوم	منتدى أخبار المواقع والمنتديات العربية والأجنبية	0	07-23-2010 06:50 PM
لآآآ تنتظــــــــــــــر الحـــــــــــب....!!	على النيآت بسكآت	الإستشارات النفسية والاحتياجات الخاصة وتطوير الذات	7	03-03-2010 05:42 PM
الحـــــــــــب ..... ما هو ؟؟؟	سندرلا	الحوار والنقاش - الرأي والرأي الآخر	10	05-27-2009 07:39 PM
نشيدة روووووعة	محروم.كوم	منتدى أخبار المواقع والمنتديات العربية والأجنبية	0	04-21-2009 03:00 PM
كيك روووووعة ...	ام مهند123	عجائب و غرائب	20	05-16-2008 10:12 PM