يابو سعد ساقف الليل انطوا=ترا الزمان ابتدا يبرد هواه
عود السلم زان بالضلع وقوا=واشفا بريضه عقب صيفن شواه
والسالفه تاتي بليل العوا=اليا بدا بردها بصفق الجباه

والطير مجلوب من قمة طوا=يا زين بالنايفه ريشة نماه
اليا لقى صيدته طار وهوا=مثل شهابن تهاوا من سماه
متى يجينا رفيع المستوا=الغالي اللي شهى الخاطر بغاه
من غيرهم صار لاصحابه دوا=وجودهم بالحشا واسع مداه
اهل المكارم خفاهم ما غوا=فيه الوفا شامتن باللي نواه
يا ليتنا نقنص البيدا سوا=في جرهديه نما العشب بوطاه
والا ضلوعن بها ذيبن عوا=حطبها وافر غدانا في ذراه
شجرها شاتر ورقها ما ذوا=والعين ملتمتن فيها المياه
اللي عمل دلتن واللي شوا=واللي على المابره كايد عناه
واللي على جرة الارنب نوا=نهاية العرفجه تلسب عصاه
اليا انفجت جاها بالدعب الثوا=بكفوف طيرن نصا الحلق ولواه
خزز خلا لوجس المخلب صوا=مع الحصا بالجبل توحي صداه
والليل لاجانا واستاره ضوا=نسمر على نارنا زاين دفاه
سوالفن من عرف عنها روا=والا القصايد حسينن مستواه