| ||||||
| مشاهدة نتائج الإستطلاع: ~»{ڜۈ رآيڱمِـ بآڵقڝـۂ ? .. | |||
| طــڕڕ .. ڱڜــــخـــۂ .. فنتــڱ ~ |     | 57 | 90.48% |
| ڕۈؤۈع‘ـــــۿ .. حڵــۈۿ .. مِـمِــــيزۿ ~ |    | 6 | 9.52% |
| آۈڱــيۿ .. مِـآڜـي حـآڵۿآ .. مِـحــآۈڵـۂ جيڎۿ ~ |    | 0 | 0% |
| المصوتون: 63. أنت لم تصوت في هذا الإستطلاع | |||
 |
| | LinkBack | أدوات الموضوع | انواع عرض الموضوع |
07-28-2011, 01:12 PM
| رقم المشاركة : [ 291 ] | |
| عضو فعال  |  وعلى هالشله سوالف وغياظ مع يدوه... بعد فتره قالت ام مايد لكنه اللي كانت قاعده على طرف وساكته من الصبح حالها حال يوسف اللي يالس من الصوب الثاني...وساكت هو بعد... ام مايد: كنة بنتي...اختج وين؟ كنة: فووق اماية..مثل ماتحيدينها.. ام مايد: انزين قومي فديتج شوفي العشا زهب والا بعده...اذا زهب امريهم يحطون العشا للرياييل في غرفة الطعام مال الميلس.. كنة: ان شاء الله امايه... نشت كنه وطلعت من البيت سايره المطبخ الكبير تنفذ اللي قالته لها امها... وبعد دقيقه نش يوسف بعد... ام محمد: وين فديتك؟ يوسف: اااه..تذكرت اتصل بريال مبوني مواعدنه بقول له اني مابييي... ام محمد: اتصل به من هني انزين....لازم برااا.. يوسف: امايه تحيديني اني مارمس ربعي جدامكم... ام محمد: لالا ماحيد...دوم ترمسهم جدامنا.. يوسف: امايه عاد لا تيسين ادققين...هني حشره وماريده يسمع حسوسكم عيب...برد بعد دقيقه.. نش يوسف وطلع من البيت هو بعد.... نشت منى من مكانها وتقربت وقعدت عدال مهرة اللي يالسه حذالي... قالت الحامل اليديده لمهرة.. منى: لا تيلفون ولا هم يحزنون..ساير ورا كنينه اللص.... ضحكت مهرة بنعومه ذوبت قلبي...وانا اتطالعها بطرف عيني وابتسم... مهرة: ههههههههه الله يهنيهم ..خليهم برايهم..شو حارنج انتي ..!!عرستي وخلصتي... منى: أي يتهنون الله يخليج هذيلا اثنينه حاسدين عمارهم عالنعمه اللي هم فيها... ناصر : ليش تقولين جي؟!.. منى: متزاعلين... واظني يوسف ساير يكلمها ... مهرة: ليش متزاعلين ..!!.. منى: اسباب تااااااااافهه والله اقولج حاسدين عمارهم عالنعمه من الفظاوة اللي هم فيها يبون يتظاربون وهب عارفين..قاموا يخترعون اسباب...!! مهرة : ان شاء الله يتراظون... الا تعالي شخبار الحمل..؟ منى: ملعوزني شويه لكن والله مثل العسل على قلبي....عقبالج يا حرمة اخوي... راقبت ويه مهرة والحمره تزحف على ويهها وتحتله كله...ابتسمت مهرة .. مهرة: ان شاء الله... بشكل لا ارادي تنهدت انا بارتياح.... مادري ليش كنت خايف من ردة فعلها...لكن دام انها قالت ان شاء الله اكيد عندها تقبل للفكره.. صدق اني ملقوف... احين نحنا خل نكمل زواجنا اول عقب نفكر بالعيال...!!!!. -------------------------------------------- اليوم: الاربعاء.. المكان: بيت ام سلطان.. الوقت: التاسعة مساءا... ------------------------------------------ (كنة)... كنت في المطبخ وفي قلبي ظيج... اشرف على تجهيزات العشا.... ظيج هب لاني في المطبخ...وثيابي بتخيس ريحتهن طبخ.... لكن ظيج لانه يوسف ماقال لي غير كلمه شحالج طول اليوم..!!!.. بعدنا متزاعليين.... ندخل النت صح بس مانتلاقى اون لاين...ولا هو طرش لي راسله او مسج ولا انا طرشت له... كل واحد منا يعاند بالثاني... اوففف ..بس عاد مر عالسالفه ايااام...كفايه...!!..الشوق ذبحني...خصوصا يوم اشوفه يالس مجابلني وعلى ويهه ملامح الظيج هو بعد لانه متزاعل معاي... مايهون علي ... مع انه هو بعد سبب لي نفس الظيج والغصه وزعلني... لكن هذا يوسف... ماظني حد في الدنيا يعرف شو يوسف بالنسبه لي...!!.. يوسف: كنــــووه...!!... بطلت عيوني وسكرت باب الثلاجه ببطئ... هذا صوت يوسف... تلفت بسرعه اذا كان حد من اهل البيت في المطبخ..وماحصلت حد... الحمد لله... شو يبا يوسف يايني لين هني..!!! ين هذا..!!!.. صديت صوب الباب وحصلته واقف برا المطبخ... قلت له من مكاني..ماتحركت...ايدي الوحيده هي اللي تحركت بتوتر اثناء الكلام... كنه: يوسف شو تسوي هني..!!! يوسف: تعالي اباج فسالفه... كنه: مش وقته يا يوسف رووح لا يشوفونك..!!.. يوسف: محد بيشوفني... كنه: اذا حد وايج من الدريشه بيشوفك... يوسف: خلاص عيل بدور على المطبخ وانتي طلعي من الباب الثاني جذي محد بيشوفنا... كنه: ينيت انته.!!!.. يوسف: محد بيييب لي الينان غيرج...يالله بسرعه... واختفى يوسف من الباب الامامي للمطبخ...وبعد دقيقه كان عند الباب الخلفي للمطبخ...توترت وقلبي يدق دق... خيبه لو حد من الخدامات يوصل الكلام لامي..!!!... بتجتلني... لكن هذا يوسف ماقدر ارفض له طلب... عدلت حجابي وطلعت من الباب الخلفي ... حصلته هناك موجوود واقف ومتساند عالجدار.. كنه: انزين ادخل كلمني جدام الخدامات عشان مايفترضون امور... يوسف: لا ثيابي بتخيس ريحتهن مطبخ... وبعدين انا ماعرف ارمسج جدام الناس...تعالي... تنهدت وتقربت منه وتركت مسافه متر تقريبا بيني وبينه... كنه: امر.. يوسف: مايامر عليج عدو... وينج طول الاسبوع.!!!.. كنه: موجوده...ادخل...بس ماشوف حد.. يوسف: وانا نفس الشي ادخل وماحصلج... كنه: كنت تقدر تطرش لي مسج وتعرف اني مابتخلف عن الموعد الابعذر مقنع... يوسف: ماحبيت افرض نفسي عليج قلت يمكن بعدج متظايقه... كنه: وانا فعلا بعدني متظايقه من موقفك.. يوسف: كنه اعتقد نوره وناصر خارج حياتنا ومالنا خص فيهم ولا لهم خص فينا..فليش نحنا نتزاعل بسبتهم..!!! كنة: السالفه ومافيها يا يوسف انه نوره اختي مثل ما ناصر اخوك... وانته دايما اصلا تسب نوره ..ويوم ييت انا ارمس عن ناصر ماعيبك واحتشرت؟؟؟؟ يوسف: انا لله وانا اليه راجعون...يابنت الحلال ناصر ماظرج بشي... كنه: لكنه ظر اختي... يوسف: شو ظرها فيه الله يخليج؟؟ ..نوره ظرتج انتي وظرتني انا بشكل مباشر...وظرت اخويه بعد بشكل غير مباشر... كنة: يا سلام والله..؟ شو سوت فيه؟؟!!!.. يوسف: شوفي شو سوا بعمره عشان يفتك منها... وشوفي كل الاهل كلهم محتشرين عليه بسبب سالفه زواجه.. كنة: والله هو اللي يابه لعمره ماحد ظربه على ايده وقال له عرس بالسر... يوسف: لو اختج مب متشبصه فيه جان صار كلام ثاني.. هذاوهو قايلها انه مايبغيها ... كنة: لكن هي كانت تبغيه وتحبه... يوسف: بس هو مايباها وقال لها هالكلام... كنة: وجرحها وايد وحطم كبريائها بهالكلام..انته ماشفت حالتها ذاك اليوم قطعت قلبي...!! يوسف: ياسلاااام؟!!..بس لانه وقف مع الحق؟!..الزواج هب غصب ياكنووه... كنة: اوففف ..حتى لو..كان يقدر يقولها بطريقه احسن من جذي...هب يقول لها لو كنتي اخر بنت في الدنيا ماخذتج..!!!!... شفت يوسف يتلفت حواليه متظيج...وتنهد بظيج اكبر... يوسف: لاحول ولا قوة الا بالله ....سمعي كنوه..انا قبل ماخطبج..نحنا كلنا عيال عم... ونعرف بعض...ونمووون على بعض.. يوم باخذج العلاقه بينا بتقوى..ناصر بيصير اخو ريلج ونوره اخت حرمتي.. مجبور اتحملها واعاملها بادب مثل ما انتي مجبوره تتحملين ناصر وتعاملينه بادب واحترام... نحن مقبلين على حياة وماريد شي تافه مثل هذا يخرب علاقتنا... ناصر ونوره مالنا خص فيهم...ولاريد انه نتناقش بامورهم مره ثانيه.....فهمتي..!!! تنهدت انابعد...مقرّة بصحة كلامه... كنة: فهمت... يوسف: قولي اسفه بسامحج... كنه: نعم؟ يوسف: هههههههههه ملسونه ماتيوزين.... كنوه ترا ظايق صدري من ظرابتي وياج.. تعرفين اني ماحب اتظارب وياج... كنة: ولا انا... يوسف: عيل ليش واقفه جي وشكلج بعدج زعلانه..!! كنة: يوسف المشاعر هب فص تضغط عليه وتغير كل شي على كيفك...لا تتوقع اني ارضى في دقيقه...انا احتاج لوقت شوي... يوسف: شو يعني بتمين جي زعلانه؟! كنة: انته ليش ماتفهمني..!! اووففف هي بتم زعلانه شويه... يوسف: كييييفج... تظيج يوسف وانسحب من المكان معصب... صفعت عمري كففف..انا شو ابغي اتغلى هالكثر...شسويت.!!!..اففففف ياربييييييه... احين بيتم بعده زعلان اسبوع...!! يبالنا نسويله صرفه ونراظيه هذا بعد... يالله يا ثقاله دمي...لازم يعني اتدلع..!!.. استاهل اللي ياني... اليوم: الاربعاء.. المكان: بيت بو حمد... الوقت: التاسعه والنصف مساءا.. --------------------------------- (سهيل)... دخلت صالة بيتنا وحصلت شيخه بروحها حاطه ايدها على خدها وتطالع التلفزيون بتملل... سهيل: السلام عليج شواخي.. صدت صوبي وابتسمت... شيخه: هلا والله سهيل...واخيرا ...!! يلست عدالها عالكرسي بتكاسل... سهيل: شبلاج؟ شيخه: محد في البيت..زهقت اروحي.. سهيل: وينهم عنج؟.. شيخه: عفرا سارت عند اهلها..حمد طبعا محد...عمي سار عند خالي يابر بيتعشى وياهم... محد في البيت غيري.. سهيل: ياحليلج يا شويخ...ماخبرتيني عيل .. شيخه: شو كنت بتسوي؟ سهيل: مادري..اي شي..بوديج عند خالتي والا نطلع رباعه...تستاهلين بنت خليفه... ابتسمت شيخة واستندت على جتفي بدلع.. شيخه: ماحبيت اعطلك احيدك قايل لي عندك شغل وبتتاخر شوي..المهم انك ييت البيت احين .. تباني اقولهم يحطون العشا؟!!.. سهيل: هي والله ماعليج امر..يوعان.. شيخه: ماعاش اليووووع...دقيقه بس... طلعت شيخه من البيت رايحه صوب المطبخ..وانا عقيت سفرتي عالكرسي.. وانسدحت على هالكرسي اريح عضلات ظهري المتصلبة شوي... الظاهر ان شيخه تعاني من الملل الشديد..وماقدرت امنع نفسي من المقارنه بينا وبين راشد وحرمته... معرسين عقبنا... لكن ماشاء الله حرمته حامل.. وشيخة ماحملت للحين... وبصراحه مادري من منو الغلط ومب متحمس اعرف... كل اللي اعرفه انه الله مارزقنا بعيال للحين... وانه شيخه وايد تحس بنفسها فاظيه وماتعرف شتسوي..!! غامضتني... انا عالاقل اشتغل واطلع وارد...لكنها مسكينه ماتروح مكان... رجعت شيخه وهي تبتسم.. ابتسمت لها انا بعد وانا افكر بحالها... شيخه: ياسلام عليك استحوذت على مكاني...!! رفعت شيخه ريلي ويلست ورجعت حطت ريلي على ريولها وهي قاعده... شيخه تحب تدلعني... شيخه: شو هالرييييل..فيها كل انواع العلامات...نفس ريل راشد عنبو شو كنتوا تسوون بعماركم انتوا يوم صغار..!! ابتسمت مره ثانيه.. سهيل: شيخه... شيخه: عيونها.. سهيل: تسلم عيونج والله....تبين تشتغلين؟؟؟ بطلت شيخه عيونها بصدمه واندهاش.. شيخه: صــــــــدق..!!! سهيل: هي صدق..تبين؟ شيخه: بس انته كنت رافض والكل كان رافض اني اشتغل..!!.. سهيل:غيرت رايي...بس شرط نشوف لج شغل فمكان مافيه رياييل.. شيخه: افف سهيل احين كل مكان فيه رياييل... سهيل: بس فيه اقسام حريم...خصوصا في العين ..كل مكان له قسم حريم... قالت شيخه بحماس وهي شوي وبتناقز.. شيخه: هي هي هي سهيل فديتك والله ابا اشتغل هذا حلمي من تخرجت بس محد سوالي سالفه.. سهيل: انزين خلاص..هاتي اوراقج وبدورلج شغل.. شيخه: انزين مب أي شغله عاد...!! سهيل: هي عاد بدينا بالتشرط...اخبرج هذي البشكاره يابت العشا..بنرمس في السالفه بعدين.. عالعشا... قطعت شيخه سوالف كنا نسولفها وقالت.. شيخه: سهيل.. مهرة بتينا باجر.. من طاري مهرة وقفت اللقمة فبلعومي ويالله يالله سرطتها... يالله كيف كان الموقف صعب وايد في اخر مره يتنا..!!! سهيل: حياها الله..... شيخه: سهيل... وضع مهرة مع اخوها ابدا مش حلو...اقصد حمد... سهيل: هذيلا الثنينه الظرايب بينهم جديمه ..شو تبيني اسويبهم يعني... شيخه: اباك تتوسط بينهم وتراضيهم على بعض.... مب زين جذي نحنا على ويه رمضان.. سهيل: انتي ماشفتيهم كيف وقفوا بويه بعض... كل واحد منهم يكره الثاني من خاطره... حمد متسلط ويكره حد يوقف بويهه وماينفذ لي يقوله ومهرة انظلمت وايد على ايد حمد... كيف بصلح هذا كله بينهم...!!!.. شيخه: يعني شو..!! سهيل: انا اقول خلهم متزاعلين احسن ويفكونا من شرهم وحشرتهم.. شيخه: حرام عليك مهرة ماتستاهل هذا كله... هذا ريلها اللي انتوا يوزتوها اياه غصبن عنها...ويوم رضت بحياتها وتاقلمت تبونها تطلق منه..مش على كيفكم...هي اللي بيطيح على راسها وضع المطلقه وانتوا مابتعانون من شي..ولانها فكرت بعقل وحكمه زاعلتوها كلكم... !! سهيل: متى قلت اني زعلان عليها احين... شيخه: انته كنت وايد منقهر ومعصب على قرارها... سهيل: كنت... بس دام انها ماسوت لنا شور واتخذت قرارها بنفسها... خلاص عيل معناته مب محتاجه لنا...كيفها بحياتها...انا مايخصني... شيخه: سهيل...خوانك هذيلا.... كيف مايخصك.. سهيل: شيخه ماعرفنالج..!!!..يوم تدخلنا قلتي لا تدخلون ويوم مانتدخل قلتي كيف ماتدخلون....انا مايخصني فيهم فهمتي...خليهم يتذابحون كيفهم.. شيخه: انزين خلاص...لا تعصب عليه انا بعد... سهيل: يعني قصدج انتي ماتعمدتي تعصبيبي.!! شيخه: لا والله ياعمري انا بس غامضتني مهرة.. سهيل: خلاص سدي السالفه هاي.. والا بكنسل سالفه الشغل.. شيخه: لالالالالالا الله يخليك والله بسكت.. ابتسمت غصبن عني وانا الاحظ انه سالفه الشغل هذي تقدرني اني ابتز شويخ واخليها تسوي اللي اباه انا... اما مهرة وحمد...انا فعلا غسلت ايدي منهم... السالفه تعدت حمد ومهرة..السالفه وصلت لناصر اللي خذ موقف من حمد من عقب ماصفع مهرة جدامه... وفعلا ناصر شكله ابدا مايرضى عليها ولا يرضى حد يمس منها شعره حتى لو كان اخوها.. مهما كان رايي بناصر وتفكيري به...مهما كانت اغلاطه ومساوئه... لكن دام انه يداري ختنا وحاطنها بعينه وهي مستانسه ومرتاحه معاه...خلاص...هذا المهم...والباقي مايخصنا فعلا... ------------------------------------------- اليوم: الخميس.. المكان: سيارة ناصر.. الوقت: الثالثة والنصف ظهرا... ------------------------------------------ (مهرة)... حسيت بالغرابه وانا يالسه في السياره لاني لاول مره من دخل مايد حياتي وهو مب موجود معاي...!!.. لكن الابو موجود معاي طبعا... صديت صوبه وانا اراقب صبوع ايده اللي صارت بيظا من كثر الضغط على السكان... وويهه الجامد.. شكله ناصر متوتر..او في شي مب عايبنه.. مهرة: احم...شفيك ناصر..؟!.. التفت لي بسرعه وهو يتظاهر بالاستغراب.. ناصر: هاه؟..ماشي... ورجع يركز عالشارع... مهرة: ماشي؟ ناصر: مافيني شي...ليش؟ مهرة: انزين خف عالسكان شوي لا تكسره عيل.. تنهد ناصر بعد ما انتبه لشده ضغطه عالسكان ورفع ايد وحده وقعد يفرك فيها جبهته بحركة توتر... مهرة: مابتنزل تسلم.!! سالته وانا اجوابه سلف.... هز ناصر راسه بالنفي.. نزلت عيني لموضع ريلي...وانا احس بالحزن... ناصر خذ موقف من اهلي...واهلي خذوا موقف منه ومني...لكن انا بنتهم ويحق لي ازورهم...لكنهم مابيتساهلون مع ناصر لانه خدعنا كلنا ...انا سامحت لكن هم لا...وناصر ماخذ موقف منهم لانه يحس انهم مايرحبون فيه وبانه مش مرغوب كنسيب.. وبصراحه زعلني حاله ...وزعلني اكثر انه اهلي سبب زعل ناصر.. صحيح انه ناصر سوا اشياء فظيعه...لكن مادري كيف حسيت انه مايستاهل واحزنني حاله.. مديت ايدي بجرأة وحطيتها على ايده اللي كانت على القير .. مهرة: ناصر..لا تحاتي اهلي وعلاقتك فيهم..كل شي بيتصلح مع الوقت ان شاء الله.. ناصر: انا ادري مهرة انه اللي صار هب شويه...لكن هم بالغوا وايد..وبعدين اخوج هذا...من متى وهو يمد ايده عليج.؟!!!. قلت بهدوء...وخجل من الذات... مهرة: من زمان.. ناصر: وانتي ساكته ليش؟ واهلج ساكتين عنه ليش..!!!!.. مهرة: تبا الصدق؟...مادري...هو ماكد ظربني جدام حد...دايما يكون في الحجره... ناصر: ياسلام..!!!..مافيه شي يبرر افعاله ماله حق يمد ايده عليج باي شكل من الاشكال... اسندت راسي على المسند وراي وانا اتامل ويه ناصر بطريقه حالمه... مهرة: هالشي انتهى احين... انته موجود عشاني... ومنعت أي حد يلمسني... ابتسم ناصر ابتسامه خفيفة... ناصر: مهرة انتي حرمتي...ماتحمل حتى حد يتطالعج بنظرة.. او يعق عليج كلمه شينه..فما بالج بالظرب..!!!.. زين ماجتلته اخوج بس... حسيت بفيض من المشاعر تجتاحني ماعرفت افسرها او اسميها...كل اللي نطقت به كان سؤال.. مهرة: تحبني؟!.. ابتسم ناصر وعقبها ضحك... وتطالعني بطرف عينه.. ناصر: مابجاوب.. مهرة: ليش ؟ ناصر: لين ماتجاوبين انتي انا مابجاوب بعد...عناد.. مهرة: ههههههه انزين..مد ايدك بفلوس لو سمحت... ناصر: حاضرين ماطلبتي... مد ايده وطلع بوكه وعطاني اياه كامل... ناصر: شلي اللي تبينه...بس ممكن اسال حق شو؟ ناويه تطلعين السوق وياهن والا شي؟ مهرة: لا والله يا ناصر هب جي..السالفه ومافيها اني لا شريت هدية لبنت حمد ولا حتى سلمت على حرمته ولا شفت البنت للحين...قلت عاد بحط لها فلوس...وافك عمري من العباله... وصلنا بيتنا..ورجعت اوصي ناصر على مايد...اللي خليناه في البيت لانه ناصر رفض انه مايد يدخل بيتنا " بحجة انه ولهان عليه ويبا يقعد معاه"...لكني اعرف انه السبب هو احساس ناصر بانه هو وولده غير مرغوب فيهم ولا مرحب بهم في بيتنا... وقبل ما انزل رجعت امسك ايده اطمنه... مهرة: لا تحاتي.. كل شي بيرد طبيعي واحسن مع الوقت ناصر...وكل شي بيتصلح... ناصر: اتمنى... ماريد اكون السبب فخراب علاقتج مع اهلج يكفي اللي سويته فيج لين الحين... وبجرأة فجائية مني تقربت منه وبسته على خده بخفه... تفاجأ ناصر بهالحركه وتم يطالعني بدهشه وتوتر... مهرة: بترياك الساعه عشر في الليل... فمان الله.. ونزلت من السياره قبل مايعطيني ملاحظة تحرجني بسبب حركتي... ودخلت بيتنا..بينما ناصر تراجع بسيارته من البيت وراح... داخل البيت كانت شيخه وعفرا وبنتها الصغيره يتريوني... كانت البنت صغيره وحمرا وشكلها ...بريء.. عفرا: شرايج فيها...؟!!.. مهرة: بنتج شكلها جي معقده حياتها لايكون طالعه عالابو بس.. عفرا: هههههههه ليش ماتبينها تشبه ابوها.. مهرة: لا حشى ليش تظلمون البنت...!!.. عفرا: ههههههههههههههههه..حرام عليج... شيخة: الا وينه مايد ولد ناصر مايبتيه وياج؟ مهرة: لا يبوونه هناك اهله.. ماشبعوا منه... شيخه: المره اليايه بتيبينه؟.. مهرة: يمكن... شيخه: ايييه ماخبرتكممممممم..!! عفرا: خييير.!! شيخه: سهيل وافق اني اشتغل... مهرة: عجيييييييييييييييب... __DEFINE_LIKE_SHARE__ | |
| ||
 |
|
07-28-2011, 01:17 PM
| رقم المشاركة : [ 292 ] | |
| عضو فعال | كان باين الفرح على ويه شيخه لانه سهيل وافق انها تشتغل..جذي بتشغل وقتها... من حقها...صعب عالحرمه تكون بلا عيال وبلا شي يشغلها...انا لو مب مايد... جان طلبت من ناصر يخليني اكمل دراسه في أي جامعه او تقنية او أي هيئة دراسية في بوظبي.. لكن بوجود مايد...انشغل وقتي معاه ... وبصراحه ...حسيت انه تربية طفل متعه ...كانك تيب معجون لعب وتقعد تشكله على كيفك...لكن بطريقة مسؤوله اكثر ... واكثر متعه وبهجة للنفس.... مهرة: وين ابويه؟.. شيخة: سار مزرعته قبل ماتين بشوي.. عفرا: الظهر عنبوو..!!! شيخه: هيه...قال العصر مايواحي بسرعه يخطف.. مهرة: صدقه...قرّب رمضان...النهار اقصر من الليل.. والعصر ساعتين مايواحيله والمزرعه بعيده...بس هو شو يبا يهلك عمره وياها الله يهديه.!!!.. عفرا: منو عيل بيدير المزرعه وبياخذ باله منها؟؟..حمد؟؟ والا سهيل؟!!!... شيخه: صدقها ولا واحد منهم يشل عن عمي شوي... مهرة: اصلا ابويه متمسك بها وحتى لو عرضوا عليه مابيوافق لانه يبا يشغل نفسه باي شي ... من عقب التقاعد شو يسوي يتم الا يالس في البيت؟!!..بس انا ماريده يتعب نفسه في الحر.. شيخه: انتوا احين طبوا هالسوالف....مهرة خبريني...ماعندج يارات هناك في بوظبي؟!!.. مهرة: هممم هو تعرفين نظام البناية ثلاث شقق في كل طابق....وحده نحنا ساكنينها طبعا والثانيه ساكننها ربيع ناصر واهله...والثالثه فاظيه محد فيها.. تقنيا ماعرف حد في البناية كلها.. عفرا: ملل...شو هذا مايسيرون ويردون عليج ولا انتي تروحين تزورين حد.!! مهرة: انتي تعرفيني عفرا يالله يالله اكون اجتماعية ويا الناس..كيف اسير عند حرمه ماعرفها ماكد شفتها ولا كلمتها...بس بصراحه ناصر خبرني مره انهم يبون يعزمونا كان يوم جمعه بس ناصر قالهم ياجلون العزيمه شويه عسب هو يمر بظروف صعبه..تعرفيه سالفه مايد وغيره ما كانت الامور مستقره...بس يمكن في المستقبل القريب نتعرف على بعض.. شيخة: رمضان الاسبوع الياي....عزميها على فواله... مهرة: من زين طبخي...مسكين ناصر يتحمل طبخي كل يوم... شيخة: عيل قلتيلي اتطورتي بالطبخ... مهرة: والله شويه هب اني استويت طباخه واعرف اكلات وجي.. عفرا: ههههه عيل ذكريني قبل ماتسيرين اعطيج كم كتاب طبخ فيهم اكلات روعه... شيخة: بس جربي على ناصر قبل ماتطرشين للعرب.. مهرة: ههههههههههههههههه الله يعينه... العصر زارتنا عمتي اللي من شفتها حسيت اني افتقدتها... وعلى هالسوالف لين في الليل... --------------------------------------- اليوم: الجمعة.. المكان: بيت بو محمد.. الوقت: الخامسة عصرا... --------------------------------------- (ناصر)..... هزيت راسي للمره الالف دليل الطاعه.... ناصر: ان شاء الله امايه ان شاء الله... ام محمد: هي مثل ماقول لك ناصر...رمس الريال واشرح له الوضع...في النهاية هو شو حايته بالارض من عشر سنين ماسك الارض ومابناها...انا سالت حرمته قالت لي مايباها ...ونحنا ارضنا بعيده ... انته عاد رمسه وقول له ... قاطعتها وكملت عنها الكلام اللي عادته علي اكثر من عشر مرات.. ناصر: ... انه مستعدين نبادله ونزيد عالارض فلوس بعد..خلاص بقول له قلت لج... ام محمد: هي الله يرضى عليك ياولدي مافينا نسكن فقلعة ابليس اخر الدنيا...نبا قريب من البلاد.. ناصر: لي يسمعج امايه يقول القروض طلعن والمهندسين واقفين يتريون اشاره.... ام محمد: مايخالف ياولدي الناس الايقضون اشغالهم قبل بوقت... ناصر: ماعليه انتي لاتحاتين... الريال ساكن فبوظبي اصلا ونادر ما ايي العين وماله حايه بالارض اظني...بسير له وبرمسه.. كان مايد يالس فحظن يوسف... وكل شوي مايد يصفع يوسف كف خفيف ويضحك على ويه يوسف يوم يسويله حركات كانه متفاجئ... كنت انا واقف اتسفر جدام المنظره اللي كانت مثبته بين فتحه الصاله والباب الرئيسي للبيت... وامايه وياي..ترمسني عن سالفه الاراضي هذي... سمعت حركة عند الباب ...التفت وشفت مهرة يايه من برا...كانت تشرف على تحميل شنطنا واغراضنا للسياره... ناصر: مهرة فظـّـوا ثلاجة السمج وحطوها في السياره؟!!.. مهرة: هي كل شي جاهـــ.... انقطعت كلامها بشكل مفاجئ وهي تتعثر وكانت على وشك انها اطيح على جدام ..لكني بحركه غريزية سريعة مسكتها.... تقنيا.!!..طاحت فحظني..لكن مب بشكل شديد يثير الشبهات يعني... ناصر: بسم الله عليج...حياتي شفيج..!!..شي يعورج؟! شفت على ويه مهرة الصدمه والاحراج ونوع من الالم... ام محمد: بسم الله عليج يابنتي شياج.!!!.. اعتدلت مهرة في وقفتها وعدلت حجابها والتفتت وراها بتوتر.. مهرة: مادري شو خرطفبي.!!.. بعدت ايد وحده عنها...لكني ظليت ماسك ايدها الثانيه خوفي انه ياها شي...لاني تذكرت بسرعه تنبيهات سيف بانه مهرة اقل حادث ولو كان بسيط يؤذيها بسبب هشاشة عظامها...وضعف صحتها نوعا ما.. مشيت مع مهرة لداخل البيت وانا اشوفها تمشي شوي شوي وعلى ويهها ويع بسيط... ناصر: شي يعورج؟! مهرة:لالا مافيني شي.. وانحرجت مهرة من الموقف وانحرجت بعد لاني ماسكنها جدامهم..ولانها طاحت فحظني...وبسبب كلمه حياتي بعد...كل شي انرسم على ويهها...الاحراج اكثر من الالم...انا اعرف انه فيه شي يعورها...بس اعرف انها منحرجه لدرجه انها مش ملاحظة.... ابتعدت عني ومشت ببطئ صوب الكرسي...وانا خليتها بدون أي اعتراض...وصديت صوب يوسف معصب... ناصر: كله منك انته... تفاجئ يوسف وبطل عيونه... يوسف: اناااا..!!!... ناصر: هي انته... كم مره منازعنك ابويه ماتفر نعولك عالمدخل... يوسف: احين بترد على نعولي يعني..!!! ناصر: شسويبك يوم كل نعال كبر القفعه شطولها...هب ريل لنج هذي....متعايز يعني تحط نعولك على الزاويه مثل الناس..!!!.. مهرة: يوووه عاد بس يا ناصر مافيني شي حق شو يالس تظارب يوسف..!!.. يلست عالكرسي... ناصر: ولو ياج شي؟!!..انتي عالدقه بكل سهوله تتكسرين وتمرضين... مهرة: انزين لا صار لا هذا ولا هذا ... لا تكبرون السالفه بس... يوسف: والله.!!..ماحصل حد يرد عليه رد عليه انا.... انته لو مارمستها جان انتبهت وين تحط ريلها... مهرة: يوووه انته بعد...!! انا اسكت ناصر تقوم انته تتنقرش به..!!.. ناصر: هات ولدي هات....اسميك تستاهل يوم انه يصفعك طراقات من الصبح... شليت مايد عنه ويوسف يضحك... ناصر: بغيت تكسر حرمتي ماعندي غير حرمة وحده... يوسف: هههههههههههه يااااارج الله من حرمة ماتقهرييييييييين... مهرة: احين جلبتوها عليه انا تطنزون... ههههه مافيني شي يالله سكتوا... تاملت ويه مهرة وانا ابتسم..واشوفها شوي شوي تتاقلم مع اهلي اكثر واكثر... ناصر: اقول حرمتي....توكلنا..؟!.. مهرة: متى مابغيت ريلي... ناصر: يالله عيل.... سلمنا عالاهل وطلعنا من البيت...واول ماركبنا السياره...مسكت مهرة ريلها وقالت.. مهرة: واي واي واي...ياوييلي... قعدت انا اطالعها بزياغ.. ناصر: شفيج؟!.شو ياج؟!.. مهرة: الظاهر ريلي انفجت... وعظت على شفايفها بالم... ناصر: انتي من الصبح تمشين عادي والحين عورتج؟ مهرة: من الصبح تعورني بس مابغيت يوسف يتلوم.. ناصر: الله عليج يامهره...!!!.. مسكي مايد مسكي...خلنا نروح بوظبي وهناك بنشوف لنا صرفه لريلج... في بوظبي...يالله يالله وصلنا مهرة الشقه...ماسكنها بايد..وبالايد الثانيه شال مايد... اما الشنط فتكفل بهم احمد البواب... ناصر: ماريد حركه زايده في البيت..قري مكانج وخلج يالسه لين ايي...بتمين ادوسين على ريلج بيزيد عوقها...فهمتي؟!.. مهرة: بسم الله وشحقه تنازعني..!!!.. ناصر: مانازعتج لكن ادريبج تنسين عمرج... مهرة: لا تهتم انا بخير.. يلست عدالها على كرسي الصاله.. ناصر: شقايل ما اهتم وانتي روحي وحياتي وقلبي...!!.. ابتسمت مهرة وحمر ويهها ونزلت راسها باستحياء... ضحكت عليها وبستها على خدها بسرعه ورجعت اقوم.. ناصر: ولا تسوين عشا..بييب عشا من برا.. وبعد ساعه ونص...رجعت البيت محمل بالاكياس.. حطيتهم بالمطبخ... ودخلت ادور مهرة ومايد... حصلتها ترقده بهدوء فغرفتنا... واشرت لي عشان اسكت وما اصدر صوت... دخلت الحمام وتسبحت وبدلت ملابسي ..ولبست شورت كحلي.. وقميص كحلي له خط احمر بالعرض بوسط الصدر.. كان مايد رقد... ومهرة من قبل لاحظت انها مبدله ملابسها ..لابسه قميص نوم طويل قطني لونه ابيض وله تطريزات خفيفه وناعمه... وكان كم قصير جدا حتى مايعتبر نص كم... فكانت ايدها مكشوفه كلها... وفاله شعرها براحه... لكن ماكانت موجوده في الغرفه..طلعت ادورها حصلتها في المطبخ تفتش في الاكياس.. ابتسمت... مجرد شوفتها تخلي قلبي يرقص رقص ويمتلي سعاده... ييت من وراها بهدوء... وحظنتها وانا اشم ريحة شعرها كالمعتاد.. ناصر:شو قلنا عن المشي في البيت.!!.. مهرة: حق شو يايب هالكثر اكل.!..منو بياكله.!!. ناصر: انتي... شو نسوي نبا نخليج تمتنين باي طريقه ممكنه...غاديه لي يبسون محد ييسر يصكج..يا تتعورين انتي يا هو يتعور من عظامج.. كنت اغايظها طبعا... دارت مهرة بين ايديني وواجهتني... وهي تمثل مقهوره... مهرة: شو قلت شو قلت؟!!!. انا عظام...!!.. ناصر: هي مب مصدقه يعني..! مهرة: لا والله فديتني فيني لحم... ناصر: تبين اثبات يعني...شوفي.. وبسرعه وخيت شوي ومسكتها وشليتها فوق.. صرخت مهرة ...وقعدت ترافس.. مهرة:نزلني نزلني... بطييييح... ناصر: وين اطيحين وانا جني شال مخده من خفتج....صبري بوديج الصاله يايبلج دوا... مهرة: شو دواه بعد... !! نزلتها وحطيتها على كرسي الصاله... ورحت للمكتبه اييب الكيسه اللي فيها الدوا.. ناصر: دوا حق ريلج... ياريت احصل لج دوا حق ظعفج بس... مهرة: عاد ناصر...!!..مش لهالدرجه..! مخلني مول هيكل عظمي.. ناصر: هاتي ريلج...(رفعت مهرة ريلها وحطتها عالكرسي)... انا بسوي أي شي بس عسب تكرهين جسمج وتقولين ابا امتن... مهرة: يابوي مايناسبني المتن انا قصيره.. ناصر: مايخصني... مهرة: بدل الموضوع...هالدوا المفروض شو يسوي؟!!.. ناصر: يخفف من الالم... حطيت لها الدوا في المكان اللي يعورها فيه... مهرة: انزين..خلاص؟..بسير احط العشا.. ناصر: يلسي مكانج ... انا بحطه... نشيت عن الكرسي واتجهت صوب الباب.. مهرة: يا سلام شو هالدلع اليوم...!!.. ناصر: لين تصح ريلج والا لا تصدقين عمرج وايد... مهرة: اقول انا بعد.!!!... ناصر: هههههههههههه ... كانت ليلتنا حلوه...كلها ضحك وسوالف..وشوية عاطفة... احساس مهرة بالراحه معاي ينعكس علي ويخليني انا بعد احس براحه مابعدها راحه.. عسى بس تستمر الاحوال على ماهي بينا وتتحسن للافضل... -------------------------------------- بعد اسبوعين.. ------------------------------------- اليوم: الخميس.... المكان: بيت بو حمد.. الوقت: التاسعه والنصف مساءا ----------------------------------- (سهيل).... بسبب علمي بتملل شيخة من قعدة البيت بروحها..قررت اني اقرر طلعاتي ورداتي بدون فايده... يعني اهلي اهم واولى اني اعطيهم اهتمامي... وبعدين نحنا في رمضان...والتواجد في البيت امر مهم...واصلا ماكان لي مزاج على الطلعه كنت توني ياي من الصلاة...وقررت اقعد في البيت.. كنت يالس في الصاله مع شيخه وعفرا..وبنت حمد الصغيره مريم فحظني... انفرضت عليه طبعا من قبل شيخه تبا تخليني احس باي احساس تجاه هالصغيره... شيخه: بالله عليك ماودك تفعصها..!!.. سهيل: والله يا شيخه واسمحيلي ياعفرا يعني ماحس باي تجاه صوب هالبنت...يعني ياهل صغيره ماتسوي لا سوالف ولا شي يعني عشان اتعلق بها..يمكن يوم تكبر واتعود عليها ابدا احس فيها...مسكي بس مسكي... شيخه: لا ما امسكها خلها عندك يا حافظ على هالعم... سهيل: لا حول ولا قوة... فجاه دخل علينا حمد وويهه صاير اسود من الغضب والظيجه الواضحه عليه... انصدمت بمظهرة..قمت من مكاني وانا اعطي البنت لشيخه... وتاملت حمد اكثر... شو صاير فيه؟!!..عقم كندورته مفتوحه من فوق...وماسك بايده شريط مسجل.. وسفرته كانت معقوقه باهمال على كتفه... حمد: وين ابويه.!!!.. سهيل: شفيك..!!..حمد شو صاير... حمد: وين ابووويه.!!.. سهيل: مادري بعده ماياا..!!..شفيك خبرني..!!.. حمد: اخووك...اخوك مسود الويه... عقدت حياتي..واستغربت.. سهيل: سيف.!!..شفيه سيف.!!.. حمد: انا اقول لك شفيه.... تعال وياي... طلع حمد من البيت بعنف بنفس الطريقه اللي دخل فيها... صديت صوب شيخه وعفرا... سهيل: ولا حرف يطلع لين ماعرف شسالفه..... طلعت ورا حمد بسرعه وشفته يالس فسيارته... ركبت عداله وقلت له .. سهيل: خبرني شو صاير؟؟ شفيه سيف...!! حمد: شفيه بعد.!!..مســوّد ويهه... اسمع ...اسمع اخوووك.... ودخل الشريط وشغله.... وسمعت اللي ماتمنيت اني اسمعه فيوم عن طريق شريط مسجل منشور...سيف يغني..!!!!... سهيل: شو هذا..!!.. حمد: هذا الله يسلمك شريط مسجل لحفله وموزعه على محلات التسجيلات.... ومنتشر عند كل الشباب... اليوم صدمني واحد منهم يقول لي ماتوقعت انكم توافقون ان اخوكم يغني لكن الظاهر تفتحتوا وانا مادري.!!!... سهيل: انا مش فاهم..!!..سيف عمره ماسجل أي اغنية له...ولا عنده أي اغنية خاصه اساسا ...كل اللي اسمعه انه يغني اغاني غيره... حمد: ترا الشريط لرعاية مواهب الشباب... الشريط هذا يقدر يخلي اكثر من واحد منهم ينتشر صيته ويطلبونه المنتجين وينزل له البوم خاص واغاني...وطبعا اخوك..هذا اللي كان يطمح له... سهيل: كيف سيف يسوي هالشي فينا...هو يعرف انه نحن نعارض هالشي..!!!... فجاه سمعنا دق على دريشه حمد...التفتنا وشفنا ابوي واقف...انا عن نفسي...وقف قلبي..!!! وبسرعه قلت لحمد بصوت واطي.. سهيل: حمد لا تخبره بشي... حمد: شوووو ماخبره خبل انته خز عني خز... وسحب ايده بقوه من ايدي وفتح الباب يواجه ابوي..نزلت انا من السياره وسرت صوبهم بسرعه... بو حمد: شفيكم..؟!!..شو ميلسنكم في السياره..!!.. حمد: يالس اسمع سهيل سواد ويه ولدك يابويه..... عقد ابويه حياته ... بو حمد: سيف..!!!.. سهيل: يا حمد...ماله داعي هالكلام الحين... حمد: لا ياسهيل خله يدري... ابويه ترا عيالك هالثنينه انا ماعرف شسوي فيهم اقول لو ادفنهم يكون وايد احسن... بو حمد: سيف ومهرة.!!..شو مسويبك عاد تقول هالكلام....!!!.. حمد: ابويه...سيف منزل له شريط في الاسواق يغني فيه مع الشباب....!! زاد تعقيد ابويه لحياته وصار ويهه يخوف... بو حمد: شووووووووو تقول..!!!!.. والله يهدي حمد زاد الطين بله .. حمد: فضحنا يابويه جدام اللي يسوى واللي مايسوى...الشباب حرقوا ويهي بالاسئله.. بو حمد: مايصير هالكلام...مايصير انا خذت منه كلمه انه يبتعد عن هالسوالف... حمد: من متى سيف عند كلامه يابويه..!!..شوف شو صار الحين...هذا الشريط..(وحطه فايد ابويه)... ومكتوب عليه بعد الجزء الاول يعني فيه جزء ثاني الله يعلم وينه...!! سهيل: ياحمد خف شوي الكلام استهد ِ بالله... حمد: السكوت ماينفع يا سهيل...ونحنا لازم نشوف لنا حل ويا سيف.. بو حمد: كيف يسوي سيف جذي..!!..كيف.!!.. يالله انا بتحمل شو والا شوو..!!.. ليش كل هالمصايب..!! ليش..! وفجاه اعتفس ويه ابوي اكثر... وبدا نفسه يعلى ...ويتوتر..حط ايده على صدره... سهيل: ابووويه...ابويه شفيك.!!.. حسيت بابويه يهوي وينزل عالارض..والشريط طاح من ايده ..مسكناه انا وحمد واسندناه...وكل واحد منا ينادي باسمه ويساله عن اللي فيه.. لكن ابوي غاب عن الوعي بين يدينا... زاغت عقولنا انا وحمد... صرخت بويهه... سهيل: شفت...شفت شو سويت .!!!.. حمد: مب وقت الاتهامات الحين...فج الباب خلنا نحطه في السياره ونوديه المستشفى عقب قول اللي فخاطرك.. وبخوف شديد...حطينا ابويه في السياره وطرنا صوب المستشفى... ------------------------------------------- __DEFINE_LIKE_SHARE__ | |
| ||
| |
|
07-28-2011, 01:20 PM
| رقم المشاركة : [ 293 ] | |
| عضو فعال | آلبآرت آلـ [ 58 ! ----------------------------- اليوم: الجمعة ... المكان: الامارات/ العين/ سيارة الأجرة.. الوقت: الرابعة و 16 دقيقة.. عصرا.. ----------------------------- (سيف)... رغم الخوف والقلق والحيرة اللي انا فيها من ظهرت من بريطانيا لين الحين...لكني ماقدرت امنع نفسي من الابتسام لشوفة شوارع العين... ماقدرت اكبت تنهيدة الراحه وانا افتح دريشة التكسي واشم هوى العين... يا ناس.. الواحد يوم في بلاده غير.. له كيان وله شخصية... هني احس اني انا..انا..!!.. هناك..كنت مظيع نفسي ويوميا اتسائل " انا شو اسوي هني؟" .. فعلا شو كنت اسوي هناك..!!.. دراسة..!!. دام اني برجع هني في الاخير شحقه ادرس في الخارج من الاساس.. ادرس فجامعاتنا احسن... مهما كان الفرق في المستوى لكن عالاقل..مابتغرب عن اهلي .. جربت وشفت النتيجة.. الحين ابوي طايح في المستشفى مادري شصاير عليه... واهلي زعلانين علي مادري ليش... انا ماسويت شي..!!.. سيف: لف يمين بعدين سيده..! قلت هالجملة بذهن شارد لراعي التكسي وانا انتبه لفتحة حارتنا.. وابتسمت مره ثانية... وانا اراقب الملعب اللي مسوينه وكنا نلعب فيه كورة دايما.. واسترجع ذكريات..ياااه..احس اني غبت زمن طويل..!!!.. وقفت السيارة جدام بيتنا..ونزلت وكلي شوق.. ساعدني الهندي على تنزيل الشنط.. دخلناهن داخل الحوش .. حاسبته..وراح... سكرت الباب وراه وانا اتامل حوش بيتنا.. وكل شوي تزيد ابتسامتي كل ماشوف شي يدل على انه بيتنا مثل ماهو ماتغير... هذي سيارتي مغطينها...سيارتي اللي ماتهنيت فيها.. مثل ماهي... وهذي ميمي قطوة مهروه متسدحه تحت النخله ... والبشكاره في المطبخ..اشوفها من باب المطبخ المفتوح...تعابل في الفطور..! مشيت صوب البيت.. تجاهلت الميلس لاني شفته مسكر... وماشفت نعول جدام بابه... دخلت البيت..كان هدوء..رغم انه عمتي وشيخه وعفرا كانوا هناك.. تفاجئوا كلهم يوم شافوني..وقفوا.. ابتسمت لويووههم المدهوشة... سيف: السلام عليكم.. آمنه: سيف..!! ماقلت لنا انك بتي.. سلمت على عمتي.. وعلى شيخة وعفرا... وبعد السلامات.. يلست... سيف: شحقه اقول.. هب بشاره.. دام كلكم تتحسبوني مسود ويهي... وعاق ابوي في المستشفى.. ظنج يا عموه انه حد بيفتكر وبيي يستقبلني.!!! سكتوا كلهم.. وماعرفوا شو يردون علي... حسيت بانكسار... عالاقل..جان قالوا شي يريحني باني هب الغلطان..سكوتهم يدل على انهم بعدهم يتحسبوني انا الغلطان..!! قلت لعمتي بحزن.. سيف: وين ابويه.!! أي مستشفى.؟ جاوبتني عمتي .. وقمت عنهم...وعن استقبالهم البارد لي.. بس شو كنت اتوقع..!!..الكل يلومني على شي ماسويته..وانا ماقدر ادافع عن نفسي لاني ماعرف شو التهمة وشو السالفه اصلا.. ركبت فوق..غرفتي..ماظيعت وقتي وايد..لكني فتحت السده وين اذكر اني حاط سويج سيارتي..ظهرته ورجعت اطلع .. دخلت المستشفى ورحت المكان اللي قالولي انه ابوي مرقد فيه...العناية المركزة.. هناك.. من بعيد..شفت سهيل وحمد..وناصر...ومهرة اختي.. سهيل وحمد يالسين على كراسي.. اما ناصر ومهرة متساندين عالايدار وواقفين عدال بعض..طبعا مهرة متغشية لكن مايحتاج اشوف ويهها عشان اعرف.. اول واحد شافني ناصر..وشفته يحرك ايده وينبه مهرة لوجودي وهو يقولها شي بصوت واطي.. وابتسم ناصر.. ومهرة يت ركظ بعد ماتخطت الصدمه ولوت علي بقووو... حسيت بجزء من قلبي يرد مكانه.. كله ولا مهرة...ادري ماهون عليها مهما كانت غلطتي كبيرة..!! سيف: مهرووه شحالج.؟ ولهت عليج وايد.. ابتعدت عني مهرة ومسكت فثيابي وقالت وهي تحاول انها تهزني بقهر.. مهرة: ليش سويت جي سيف...ليش؟.. راس مالنا هالابو حرام عليك..!!! تطالعتها انا بالم..ليش مهرة تقول جي؟..حتى مهرة!!.. انا ماسويت شي..!! مسكها ناصر من كتوفها وسحبها وحاول يهديها.. ناصر: اذكري الله مهرة شو جي ...!! نحن هب فالبيت... (والتفت لي ناصر) هلا سيف..! الحمد لله عالسلامه... توايهت مع ناصر وانتبهت من وراه على سهيل وحمد اللي انتبهي لوجودي... وبان على ويههم الظيق والعصبية.. سيف: هلا ناصر..الله يسلمك.. (والتفت لمهرة) ... مهرة انا ماسويت شي..!!. مهرة: كيف ماسويت ياسيف وحاطين اسمك بالشريط وصوتك مسجل..!!!. سيف: وين هالشريط اللي تتكلمين عنه...!! مهرة: عند سهيل..انكر بعد!!!.. ناصر: مهرة..!!..اهدي..كل شي له تفسير .. التفت انا لناصر...وتذكرت شي فجاه.. سيف: سمعت انك معرس وعندك ولد..!!!!.. حاس ناصر بوزه.. ناصر: نحن وين وانته وين...لا تبدا.. حمد: ســـيـــف..!!!!...ولك ويه توصل لهني بعد..!! كان هذا حمد توه واصل لنا ومن وراه سهيل... مسك حمد فكندورتي وهزني وناوي على فظيحه... حمد: هذي اخرة التربية فيك..هذي اخرة الحشمة يا سواف..!! جذي تسوي بابوك؟ تفضحنا.!!!! سهيل وقف على جنب وعقد يديه جدام صدره وقعد يتفرج كانه راضي عاللي يصير..!!.. سيف: فجني يا حمد.. انا ماسويت شي.. من ييت استلمتوني حتى ماخليتوني اسال عن ابويه..!! حمد: انسى انه لك ابو...لو انك صدق مهتم ماسويت اللي سويته..فضحتنا جدام اللي يسوى واللي مايسوى..! ناصر: يا حمد الامور ماتنحل بهالاسلوب.. فج الريال ..كل شي بالتفاهم لا تسوي فضيحه.. هو لو صدق مسوي شي غلط مابيرد من بريطانيا بيتم زابن هناك.. اكيد فيه تفسير..!! حمد: انت اسكت..مايسد انته مسود ويهك وماخذلك سورية وخاشنها ياي تتكلم فامورنا بعد..!!! ناصر: وكوني كنت متزوج من قبل هذا شي يفشل وينعد عيب؟؟؟ حمد: اكبر عيب..اصلا انته بكبرك عيوب..ماتستاهل حتى انه نناسبك..لو مب هالياعدة اللي يوزناك اياها اللي ماطاعت تفارجك ..كنت بتكون احين مطلقنها وبعيد عن حياتنا لكن هي مابغت لعمرها الحشمه... ناصر: اسمع انته هاي... لا تقعد تبدا بالغلط... ترا انا اقدر انزل من مستواي واسوي فظيحه هني بالمستشفى لكن مب حشمه لك حشمه للشيبه اللي طايح مريض والا بعرف شغلك عدل.. حمد: شو بتسوي يعني هاه...!! ناصر: عالاقل..انا ما سويت شي حرام.. مب غيري..!!! ناصر كان يلمح لخيانة حمد لعفرا..كلنا في البيت لاحظنا انه يخونها..كان واضح عليه انه يكلم بنت غيرها... وماكان يعرف يدس اموره عدل... لكن ناصر كيف عرف.!!... مهرة.! فجني حمد وهو ويهه مسود من الظيج.. والتفت لمهرة اللي افشت سره لناصر..نظره ان كانت تذبح كانت مهرة بتكون ميته الحين.. لكن مهرة عقدت يديها جدام صدرها هي الثانيه وقالت .. مهرة: اللي بيته من زجاج لا يرمي الناس بصخر..!!!. تفشل بصراحه حمد وماعرف شو يقول لكنه تظاهر انه متجاهلنهم ورجع يلتفت لي وقال بتهديد.. حمد: لا عاد اشوفك في المستشفى ..!!.. ابويه ان شافك بيموت سيده.. احذرك يا سواف..! خلانا وراح.. مديت ايدي انا وارتب كندورتي.. والتفت لسهيل اللي كان ساكت طول الوقت.. سيف: اشوفك ساكت ماقلت شي.. سهيل: شو تباني اقول؟..انته فعلا مسود ويهك..! سيف: انا لله وانا اليه راجعون... وينه الشريط هذا عطني اياه.. مد سهيل يديه وخشها فمخباه..وطلع شريط.. وقال.. سهيل: جان مريت وانته ياي على واحد من محلات التسجيلات وطلبته..!!..الشريط موجود في المحلات ..لا وابشرك..تراه جزئين مب جزء واحد.... مهرة: مب وقت الطنازة سهيل..!! مسكت انا الشريط وانا منصدم.. هذا اسمي.. وهذي اسماء ربعي.. والشباب اللي كانوا يغنون في اخر حفلة حظرتها قبل ماروح بريطانيا.. شي غريب.!!!!. سهيل: هاه سيف اشوفك ساكت..!! سيف: والله ماسجلت شريط اغاني انا..! سهيل: هذا تسجيل لحفلة.. سيف: مابعرف شو الموضوع الا يوم اسمعه... سهيل: فات الفوت يا سيف..ابوك طايح في المستشفى .. واسمك على كل لسان .. سيف: كل شي بيتصلح... ابويه مامنعني من الغنا مع ربعي ..لكنه منعني اني اخذ الموضوع بجدية وانشر شي او اطمح اني اكون مطرب وانا التزمت بهالشي... سهيل: عيل شو تفسر هذا؟؟؟ سيف: ماقدر افسره الحين..لكني بثبت لك ولكم كلكم اني مب ورا هالسالفه.. انا ماقطعت دراستي في بريطانيا وييت هني بدون سبب... انتوا ظالميني..وبثبت لكم هالشي..!!.. صديت عنهم وطلعت من القسم... احس بثقل فصدري... صعب يوم يكونون اهلك كلهم ضدك... صعب..!!.. سمعت ناصر يزقرني ووقفت... وقفت بدون ما اصد له...بروحي متظيج منه على اللي سواه..بس انا مب في وضع اني اقعد احاسب حد الحين..! ناصر: سيف... وين بتروح..؟!.. سيف: بذلف بعد شو تبوني..! ناصر: اسمع... خوانك متظيجين ومصدومين.. وخايفين على ابوك.. يوم بيستوي ابوك بخير ان شاء الله كل شي بيتوضح وبيرجع مثل ماكان.. سيف: صدري ظايج يا ناصر... والله ماسويت شي.. انا التزمت باللي قاله لي ابويه.. وماسعيت انه ينتشر لي أي شريط..!!.. واحين ابويه طايح ويقولون انا السبب..ولا ندري اذا بيغدي بخير او لا.. ناصر: لا انا سالت الدكتور عنه وطمني.. بس قال لا تضايقونه لانه كبير في السن وبسهولة يتعب.. سيف: ان شافني بيتظايق اكثر... ناصر: نحن مابنخليك تدخل عليه جذي...لازم حد يشرح له كيف صار سوء التفاهم هذا ونشرح له انك مالك ذنب ويوم بيستوعب الموضوع مابيعارض شوفتك..!!.. سكت وانا افكر بكلام ناصر... ياريت الامور تنحل بهالبساطة...! كل اللي اتمناه انه ابويه يصير بخير..ماريد شي ثاني.. ---------------------------------- اليوم: الجمعة.. المكان: المستشفى.. الوقت: الخامسة وخمس دقائق عصرا.. ------------------------------ (مهرة)... تركت سهيل يرجع لحمد ..ولحقت ناصر اللي طلع ورا سيف.. ما ابتعدوا وايد... كانوا واقفين عند المصاعد... فرحت وايد يوم شفت سيف... صح معصبة عليه وعاللي سواه فينا... لكن مهما كان هذا سيف... انظميت لهم ووقفت عدال ناصر... اللي كان يكلم سيف .. سيف كان ويهه متظايق حدة.. ناصر: حل المسالة هاي ما بيي بالظرايب.. نحن عفنا الظرايب.. سيف: هم مايفهمون الا بالصريخ شسويبهم.!!!.. مهرة: منو يقصد ؟ خواني؟.. سيف: وانتي وياهم...!!.ماتوقعتج تظلميني جي يا مهروه.. حتى الحمد لله عالسلامة ماقلتيلي.. وانا من ياني اتصالج حجزت ورديت لكم... لو مسود ويهي بردلكم؟؟؟ مهرة: سيف..شو تباني اسوي او اقول يعني..؟؟... ابويه فعلا طايح بسبتك... انا ماقلت لك ودر الغنا..!! سيف: ابويه ما منعني اغني ويا ربعي... مهرة: بس الشريط في الاسواق..!!!!!!!... سيف: انا ما نشرته... ولا ادري اصلا انه بينشرونه.. ناصر: اففف هدوا اعصابكم شوي...سيف انته الاسماء اللي موجوده عالشريط عرفتها؟.. تطالع سيف الشريط مره ثانيه بظيج وقال.. سيف: هيه.. هذيلا حد منهم ربعي وحد منهم الشباب اللي كانوا يغنون ويانا اخر حفلة حظرتها ..قبل ماسافر..!. ناصر: يعني التسجيل كان لهالحفلة؟.. سيف: هيه... هاي الحفلة الوحيده اللي حظروها ملحنين وناس من شركة الانتاج وبعد ناس لهم ضلع بسوالف الغنا.. وهي الحفلة الوحيده اللي حظروها وايدين..وسجلناها باجهزة غير احسن عن اللي كانت عندنا قبل.. ناصر: وانته ماكنت تدري انه الحفلة بتتسجل؟ سيف: بلى... بس تحسبتها بتتسجل حالها حال باقي الحفلات اللي سجلناهن.. تسجيل عاادي... ماحد خبرني انها بتتسجل لغرض ثاني...خلوني على عماي..!! سكتنا كلنا متظايجين... انا حسيت بالاسف..واني ظلمت سيف... حرام ...نظرة وحده لويهه كان المفروض تخبرني انه ماله ذنب.. برطمت وقلت له... مهرة: سواااااف..!!! التفت لي سيف بعيونه الزعلانه وعرف شو فخاطري... سيف: اوص انتي...ولا تفكرين تعتذرين... تقربت منه وتمسكت بكم كندورته.. مهرة: فديتك سواف اسفه والله بس شو تباني اسوي.. سيف: كان المفروض تعرفين اني مابسوي جي بابووويه..! اسالينيي قبل هب تهاجميني جي ..شو الفرق احين بينج وبين هالتماسيح سهيل وحمد؟؟؟ ناصر: عاد لا تقارن بين حرمتي وبين هذيلا لو سمحت... مهرة: والله اسفه ..عن شو تباني اسال ..؟ الشريط كان موجود ويثبت كل شي ..شو تباني اسوي..!! اسفه عاد.. سيف: سكتي عني ...بسامحج بعدين... ضحك ناصر علينا انا واخويه... وابتسمت وانا بعدني زعلانه..لكن شسوي..ضحكة ناصر وابتسامته تخليني ابتسم غصب..! ناصر: المهم احين شو بتسوي؟.. تنهد سيف...وفكر شوي.... سيف: بروح دبي.... انا اعرف واحد من الملحنين اللي حضروا...اسمه حسين.. بروح وبسالة عن هالسالفه وبشوف شو يطلع معاي..!!. ناصر: اذا احتجت لاي شي...رقمي تعرفه... سيف: تسلم ناصر ..ماقصرت....تعال شو سالفة عرسك انته هاه؟!!! تطالعنا انا وناصر بعض للحظه وبعدها قلنا مره وحده ... ناصر + مهرة : لا تـــبـــداااا..!!!!.. ابتسم سيف بتملل... سيف: خلاص انزين..كيفكم... مهرة: بخبرك انا كل شي بعدين سيف...بس مب الحين..مالنا خلق ماصدقنا نفتك من هالسالفه .!!. سيف: مب مشكلة..انا احين بسير برد البيت وعقب الفطور بروح دبي وبشوف الريال هذا... وبخبركم شو يصير وياي.. ناصر: تمام... الله يحفظك.. سيف: مع السلامه... راح سيف وخلاني انا وناصر بروحنا... التفت لي ناصر ومسك اييدي... ناصر: كنت ادري انكم ظالمينه..!!... مهرة: فديت روحه والله.. __DEFINE_LIKE_SHARE__ | |
| ||
| |
|
07-28-2011, 01:23 PM
| رقم المشاركة : [ 294 ] | |
| عضو فعال | ناصر: الحين فديت روحه ... من امس وانتي تسبين فيه... مهرة: عن قهر والا مب من قلبي.... ناصر: فديت قلبج... خلينا نسير البيت..بي وقت الفطور ونحن بعدنا... مهرة: اوكيه.. طلعنا انا وناصر من المستشفى وركبنا السيارة..وطول الطريج انا اتطالع ناصر وهو يسولف علي ..وانا افكر فيه هو... بصراحه رغم زعل اهلي من ناصر الا انه وقف معانا وماتركنا ابد... حتى علاقته معاي صايرة حلوه وطيبه ومستقرة... وانا صرت احس فنفسي ان الوقت صار قريب لين يقرر ناصر يكمل هالزواج... وكان ينتابني شعور قوي بالخوف لمجرد التفكير... لكن حب ناصر لي... وحبي له... خلاني اتقبل الفكرة يوم عن يوم... ناصر ذكي... حاليا مكتفي بس بالتلميحات والحميمية البسيطة... لا يشد ولا يرخي... وانا منتبهه له... ومستسلمة ..راضية وقنوعة.... كل يوم تزيد قناعتي بصدق حب ناصر لي.. وكل ماتزيد قناعتي...كل مازاد حبي له... لكن خل يتعذب شوي... مابعترف له الحين... --------------------------------- اليوم: الجمعة.. المكان: غرفة ناصر ومهرة... الوقت: العاشرة والنصف مساءا.. --------------------------------- (ناصر)... كنت منسدح عالشبرية ومايد عندي ..يالس على بطني... الاعبه ويضحك.. ومهرة يالسه على كرسي التواليت تراقبناا وهي تضحك ويانا شوي... وترجع تعدل اضافرها شوي... ناصر: فديته محلاة ظحكته... مهرة: قول ماشاء الله.. ناصر: ماشاء الله... مهرة: عموه تقول مب زين يظحكون الياهل وايد.. ناصر: ليش.؟ مهرة: تقول بيتم يصيح في الليل..مابيرقد.. ناصر: اهااا معلومة يديدة...متى تبينا نظهر؟ مهرة: نظهر وين نسير؟!.. تطالعت انا مهرة باستغراب..! شو الظاهر ناسية انه بنسير بوظبي..!!! ناصر: بوظبي..! والا عيبتج اليلسة هني..!! نزلت مايد من حظني وحطيته عالشبرية عدالي وعطيته لعبة يلعب بها..كان اصلا مبين عليه نعسان... ناصر: مايد فيه رقاد بعد شكله.. بيريحج في الطريج بيرقد مابيعفسنا نفس اول امس.!!. راقبت مهرة والتفكير بادي على ويهها... حطت المبرد عالتواليت وقامت وهي تلعب بصبوعها بتوتر..ويت صوبي... مهرة: آآآآآ..ناصر..!.. ناصر: عيون ناصر.. ابتسمت انا...ومديت لها يدي ...مسكت مهرة فايدي..سحبتها وخليتها تقعد عدالي عالشبرية .. وخليت ايدها فايدي مافجيتها... ناصر : شي فخاطرج ...قولي يالغلا..! مهرة: همممم... ناصر كيف اروح بوظبي وابويه في المستشفى؟؟؟. سكت انا شوي...عقدت حياتي..التفت لمايد اتطمن انه يالس مكانه ومابيطيح من الشبرية.. وشفته لاهي بالعابه... ورديت اصد لمهرة اراقب عيونها المتوترة.. ناصر: شو تبينا نسوي يعني مهرة؟ انا عندي دوام..!! حطت مهرة ايدها الثانيه على ايدي الي ماسكة ايدها...وتمسكت فيها... مهرة: ناصر خلني اقعد كم يوم هني... لين اتطمن على ابويه.. ناصر: مهرة.. اخليج واروح؟.. اتم روحي هناك..!!!.. الظاهر اني كسرت خاطر مهرة ..شفتها برطمت... وسكتت.. غمضتني..اناادري انها خايفة على ابوها.. بس انا ماصبر عنها... ناصر: ومايد.؟؟.. مهرة: يتم هني عندنا... عموه هني...وميثا هني.. وانا ...ومنى تي وتروح علينا..لا تخاف عليه.. ناصر: ماعندكم ثياب ولا اغراض... مهرة: انزين انته روح داوم ورد لنا باجر ..والا بتقعد هناك بروحك طول اليوم؟.. ناصر: تعب علي جذي مهرة ساير راد..!!.. سكتت مهرة وعلى ويهها الزعل.. كرهت نفسي لاني رفضت لها هالطلب... مديت ايدي ومسكت ويهها..ورفعته عشان ترفع عينها لي ..ابتسمت لها... ناصر: فديت هالويه ياربي... وانا اروم اقول لج لا.؟..تدرين شو؟ انا برقد هني الليله...وبعد صلاة الفير بتوكل..وعقب الدوام برد الشقة بييب لكم اغراض وبرد العين... اتحمل تعب الخطوط بس ماتحمل فراقكم... ابتسمت مهرة بفرح وراحة... وبعد دقيقة قالت... مهرة: الله يخليك لنا... سحبت ايدها اللي كنت ماسكنها وبستها... ناصر: ويخليكم لي يارب... مهرة: ماتبانا نسير وياك الصبح ونرد العصر؟ ناصر: لا...مايحتاي...لو انتوا هناك انا بتعايز عن ردة العين..لكن اذا انتوا هني بتحمس وبرد بسرعه... سحبت مهرة وقربتها مني اكثر... ناصر: تعالي خليني اشم شعرج..!.. خشيت ويهي فشعرها اتنشقة وهي تضحك علي.. مهرة: يالله هالكثر ثرك ماتصبر عنا...!! تقربت من اذن مهرة اقولها بصوت واطي.. ناصر: ليتج تدرين بالغلا اللي فقلبي لج..جان رحمتيني من العذاب... مهرة: أي عذاب ماحيدني معذبتنك..!!..بالعكس وايد عاطتنك ويه هههههههه... ناصر: انا ماريد بس ويه....!.. مهرة: ناااصر... !! فجيت مهرة وابتعدت عنها شوي وانا ابتسم... ناصر: لو الوقت مناسب... جان تميتي تزقرين من اليوم لباجر ولا بسمع لج..لكن الوقت مب مناسب.. انا احين برقد..وراي نشة من الفجر.. ابتسمت لي مهرة... وبشكل خلاني استغرب واستانس فنفس الوقت.. تقربت مني... باستني..عالخدين..بوستين.!!!.. مهرة: تصبح على الف خير...بوعيك قبل الصلاة عشان تتسحر وتشرب لك شي.. انا ومايد بنروح تحت.. ناصر: وانتي من اهل الخير الغالية... شلت مهرة مايد وطلعت تكمل سهرة ليالي رمضان مع الاهل..اما انا ...انسدحت ومادريت بعمري الا وانا غاط بالرقاد...! ----------------------------------- اليوم: السبت.. المكان: بيت خلفان.. الوقت: الرابعة عصرا.. ----------------------------------- (سهيل)... سكرت باب السيارة ونزلت وانا اتنهد... صحيح ابويه حالته تتحسن... لكن ابدا مب عايبني الحال... وشوفته طايح جذي في المستشفى.. تذكرني بشوفه المرحومة طايحة في المستشفى..!.. والفترة اللي مرينا فيها... والعذاب النفسي.. اتذكر اني كنت اقول لنفسي " فاي لحظة بتموت..".. كان الوقت وكل دقيقة تمر عذاب ..وترقب.. وحزن.. صحيح الحمد لله الدكتور طمنا على ابويه..بس ماقدر امنع نفسي من الحزن على حالته.. شو من العيال نحن..كل يوم يايبين لهالشيبه مصيبة وهو اللي فيه كافيه..!! لاحول ولا قوة الا بالله... دخلت البيت.. شفت شيخة يالسه مع عفرا وبنتها الصغيرة مريم.. التفتت شيخة صوبي وابتسمت.. شيخة: مرحبااا الساع... سهيل: السلام عليكم .. ردوا علي السلام.. وتقربت انا من الكرسي ويلست مجابل شيخة وعفرا... سهيل: شحالكم.؟.. شيخة: الحمد لله تمام..شحالك انته؟ سهيل: الحمد لله... شيخة: سرت له عمي؟..شو حاله اليوم؟ سهيل: حمد هناك عنده انا رديت شوي تعبان... اليوم احسن عن امس الحمد لله.. دخلنا ورمسناه شوي.. عفرا: الحمد لله... حمد مابيي عالفطور؟ سهيل: اكيد انه بيي قبل الفطور بشوي....وين سيف؟ ... من ظهر عنا امس ماشفناه..! شيخة: بلى ..شفناه نحن..يانا في الليل متاخر... ورقد.. واليوم الساعه ثلاث ظهر قال انه بيسير دبي.. رفعت حواجبي انا مستغرب...احين نحن في حاله وهذا الصايع ساير دبي؟؟؟ سهيل: شو يسوي في دبي؟ شيخة: مادري...يمكن عشان سالفة الشريط..! سهيل: ااه صح..يمكن.. سكت وانا افكر بهالاخو هذا... مادري نحن ظالمينه والا لا... بس شكله امس كان فعلا يبين عليه انه مظلوم.. لكن يمكن يمثل علينا بعد.. بس كلام ناصر صحيح..!! لو كان مظلوم مابيرجع البلاد.. بيتم زابن هناك ومابيرد.. رجعته للبلاد اكيد تبين انه السالفه لها تفسير ثاني..!!.. بس بنتريا وبنشوف هالتفسير شوو... التفت لشيخة وقلت لها بابتسامه.. سهيل: شويخ...اليوم اتصلوووبي يبون يوظفوونج..!. نقزت شويخ من كرسيها مستانسة .. شيخة : صدق والله..!!!!!!!.. متى .؟..وييييين؟... سهيل: اصبري شوي علينا .. الله يسلمج فيه بنك فاتح فرع في العين ويبون مواطنين..وانا سرت وشفت المكان شفت مبنى مسوينه بس للحريم.. وقدمت اوراقج واحين اتصلوا عشان المقابلة.. عفرا: ياسلاااام ياهيه بشارة حلوه مبروووك شويخ.. شيخة: هي والله ..جان استااااااااانس صدق..! ابتسمت وانا اشوف شويخ فرحانه من خاطرها ... سهيل: عاد لازم تسوين مقابلة ونشوف اذا بيقبلونج مافي شي اكيد... شيخة: ربي يخليك لي ان شاء الله ... ومتى المقابلة؟ سهيل: الاثنين.. انا بظهر من الدوام ساعتين ثلاث جي وبوديج.. شيخة: الحمد لله... يارب يقبلوووني...والله من متى وانا اتمنى اشتغل..كديت ودرست في الجامعة وتعبت واخر شي بلا وظيفة مايصير..!!.. عفرا: ثرج انتي تدرسين للوظيفة... الناس يدرسون للعلم.. شيخة: خلي عنج كلام الدكاتره انتي.. انا درست عشان اشتغل فشغله سنعة.. سهيل: ماعليه ولا يهمج اذا ماقبلوج هني ان شاء الله بيقبلونج فمكان ثاني... شيخة: بس الوظايف تحصلها بطروح الروح في العين..لو انا فدبي والا فبوظبي جان اشتغلت بسهولة.. سهيل: العين مافيها حركة اشغال مثل دبي وبوظبي.. والوظايف محدودة والواسطة هي اللي تمشي هني..لكن اذا ربج قال كلام ثاني وصار لج نصيب في الوظيفة بتحصلينها ان شاء الله.. قمت عنهم ناوي اروح غرفتي.. شيخة: وين؟ سهيل: بسير ببدل ثيابي وبقرا قرآن لين الفطور... اليوم ماقريت وامس ماقريت..!! ــــــــــــــــــــــــــــــــــــــــــــــــــ ـــــــــــــــــــــــــــــــــــــ رحت الغرفة وبدلت ملابسي وانا افكر بسيف... معقولة سيف بيسوي هالشي من ورانا؟ ما اعتقد.. بعد التفكير... سيف تغير الفترة الاخيرة قبل مايسافر وكان شال فكرة الغنا من باله..!!.. سيف اخوي..المفروض اوقف معاه واحل المسالة وياه مب اسوي مثل حمد واعقدها اكثر..!! افففف.. بعد الفطور بتصل به وبشوف شو صار وياه..!! ------------------------------- اليوم: السبت.. المكان: سيارة سيف... الوقت: الرابعة والنصف عصرا.. ------------------------------- (سيف)... طلعت الشريط من مسجل السيارة وفريته على السيت اللي عدالي بقهر... هذي هيه اخر حفلة حظرتها ..ماكنت غلطان... حضور الملحنين والناس المشهورة اللي شفناهم ماكان عبث... كان فبالهم مشروع بيجربونه علينا وخلونا على عمانا.. انا سالت الشباب كلهم.. كلهم تفاجئوا بتزيل الشريط لكن كانوا مستانسين انا الوحيد اللي كنت مقهور..!! لانه هالشي يشكل خيانة لاتفاقي مع ابوي.. وقفت السيارة جدام مكتب حسين.. نزلت من السيارة وانا احط الشريط فمخباي... اذا كان فيه شخص يعرف شو اللي صار..فهو حسين... تطالعت البطاقة الخاصة بحسين..عنوانه وارقامه..وتاكدت اني في المكان الصحيح... ودخلت.. هناك حصلت السكرتيرة.. سيف: السلام عليكم... السكرتيرة: وعليكم السلام..تفضل.! سيف: هذا مكتب الملحن حسين؟ السكرتيرة: نعم هذا هو مكتبه.. سيف: ممكن اشوفه؟ الموضوع ظروري.. السكرتيرة: انا بعتذر منك الملحن مو موجوود .. راح البيت.. تظيقت انا وبان الظيج على ويهي... ذكاء.. ماكنت اقدر اتصل يعني قبل..!!!.. سيف: ومتى بيرجع؟.. السكرتيرة: بيرجع الساعه سبعة ونص..بعد الفطور.. سيف: خلاص انا برجع له الساعه سبع ونص.. ياريت لو وصل الملحن قبل تقوليله انه سيف الـ (..) يبا يكلمه ظروري جدا وماتخلينه يطلع..لاني انا ياي من العين بس عشان اشوفه..! السكرتيرة: تكرم عينك.. سيف: مشكورة... طلعت من المكتب وانا اتافف.. احين وين اروح؟!.. قعدت افتر بشوارع دبي ..لين مااذن المغرب..نزلت اصلي في واحد من المساجد... وبعدها رحت مطعم من المطاعم وفطرت... ومر الوقت...الساعه سبع وعشرين دقيقة وصلت المكتب مرة ثانيه.. سيف: السلام عليكم... السكرتيرة: وعليكم السلام..تفضل استاز هلأ الاستاز حسين بيوصل.. سيف: شكرا.. يلست على واحد من الكراسي الجلد... اتريا وصول حسين.ويوم وصل... شافني وتذكرني على طول.. حسين: ياهلا ومرحبا.. هلا بسيف.. وقفت له وانا مالي نفس لسلامه... سيف: مرحبا بك استاذ حسين..كيف الحال؟ حسين: الحمد لله بخير... عيل قالولي مسافر..!! سيف: رجعت امس.. حسين: الحمد لله عالسلامه..تفضل تفضل ... واشر لي على المكتب المفتوح عشان اتقدم وادخل.. وهو تاخر وراي شوي وانا اسمعه يطلب من السكرتيرة كوبين كابتشينو..!!!.. منو ياي يشرب كابتشينو احين.!. سكر حسين الباب ورانا .. وقعد ورا مكتبه.. حسين: تفضل..تفضل يا سيف اقعد..شرفتني بهالزيارة.. سيف: انا ما ياي اقعد يا استاذ حسين..! تطالعني حسين باندهاش.. واعتدل في كرسيه اكثر.. واختفت الابتسامه عن ويهه.. حسين: خير يا سيف... عسى ماشر؟..شكلك متظايق.. طلعت الشريط من مخباي وحطيته على مكتب حسين جدامه.. سيف: ممكن تفسر لي شو هذا؟؟! ابتسم حسين وتراجع على الكرسي وتساند باسترخاء.. حسين: صح..مبروك على نجاح شريط الحفلة.. كانت مخاطرة وماتوقعنا تنجح بهالطريقة... لكن الظاهر انه الجمهور حبها ... ويتنا اتصالات وايد من شباب يبون يشاركون في الحفلة الياية هذا اذا كان في حفلة ثانية..! سيف: منو ورا سالفة نشر الحفلة في شريط؟ حسين: انا وشركة الانتاج .. سيف: ممكن اعرف..ليش ماخبرتونا انه الحفلة بتنشرونها وبتوزعونها بهالشكل؟!. طلع تعبير بايخ مستغرب على ويه حسين.. حسين: وشو المشكلة؟. سيف: شو المشكلة؟.. انا مب مستوعب لين احين انتوا كيف تتصرفون من دون علمنا بهالشكل؟ ليش مخلينا على عمانا.!!.. حسين: شوف.. نحن ليش حضرنا من الاساس؟.. نحن شفنا السوق راقد وحبينا نطلع ويه وصوت يديد.. انا يبت شركة الانتاج وسجلنا الحفلة عشان بس نختار صوت او صوتين نتبناهن.. لكن اقترح واحد منا انه ننشر الحفلة بكبرها.. كتجربة..وبنشوف أي صوت من الاصوات حبها الجمهور اكثر..ساعتها بتتبناه شركة الانتاج .. وبيطلع بالشكل المطلوب...يعني نحن قاعدين نعطيكم فرصة انتوا ماكنتوا تحلمون فيها... وعلى فكرة..صوتك من الاصوات اللي حبها الجمهور..! يلست عالكرسي.. وانا اتذكر شكثر كانت رغبتي كبيرة اني اسمع شي مثل هذا... فرحت ..اجذب اذا قلت اني مافرحت... لكن الحياة اولويات... واهلي هم الاهم .. في هاللحظة وصلت السكرتيرة بالكابتشينو.. وجودها نبهني للواقع..انا هني عشان احل المسالة مب عشان اتعاقد مع شركة انتاج عشان اصير مطرب..!!!!.. هزيت راسي وانا اقول لحسين.. سيف: بس انا مش موافق... انتوا ماخبرتونا ولا استئذنتوا منا لنشر اصواتنا بهالشكل... حسين: ولا واحد منكم ترك رقمه... كيف تبانا نتواصل معاكم؟ ندق على كل بيت؟ سيف: هذا مب عذر كنت تقدر تيبه لو تباه.. وايد من الشباب اللي اتصلت بهم تواصلوا معاكم من بعد الحفلة كنت تقدر تقول شي... حسين: ماكان الفكرة مطروحه ساعتها..!. سيف: بعد مش عذر... يمكن غيري مستانس انه يشتهر بهالاسلوب ويحصل هالفرصة ويطلع كمطرب لكن انا ماريد.. انا كان الموضوع عندي مجرد حفلة استانس فيها مع ربعي قبل ما اسافر اكمل دراستي في الخارج... حسين: ياخسارة.. طيب مب مشكلة انسى الموضوع ولا جنه الشريط طلع..!! دامك ماتبا تصير مطرب..خلاص مابطلع صوتك في أي شريط ثاني.. انقهرت من برود اعصابه.. قمت من الكرسي مرة ثانيه وتساندت عالمكتب وانا صوتي بدا يعلا.. سيف: انسى..!!!.. كيف انسى... يا استاذ حسين اذا ماكنت تدري ابويه طايح في المستشفى بسبب اللي سوييتوه..عايلتي كلها مقاطعتني بسبب هالشريط..وانته تقولي انسى..!!!!.. حسين: شوف سيف.. اسف عشان ابوك والاهل بس رجاءا لا تدخلنا في مشاكلك العائلية.!! انقهرت اكثر.. سيف: المشاكل العائلية انتوا سببتوها.. والا انا واهلي بخير مافينا شي...لكن كله من تحت روسكم.. حسين: محد قال لك تغني ..انت الي كنت تبا تغني وتصير مطرب انت عطيتني هالفكرة..!!! والا ناسي؟ . سيف: وشو يعني غنيت؟ انا مغني ويا ربعي.. مادريت بكم بتسووون اللي سووييتوه..!!!.. حسين: وصار واستوى... ليش مكبر المسالة.!!..شو نقدر نسوي يعني نسحب الشريط من الاسواق؟.. سيف: لا تتحسبني بسكت... ماكون انا سيف اذا ماشهرت بكم في الجرايد ورفعت عليكم قضية.!!.. راقبت ويه حسين وهو يتغير.. حسين: ماتقدر تسوي جذي.. سيف: ماقدر؟...راقبني..وبتوصلك الاخبار..!!. خليته وطلعت من المكتب... حسين: سيف...لحظة ياسيف خل نتفاهم.!!!.. سيف: انا يييت عشان اتفاهم..لكن انت مستتفه المووضووع ولا مسوي لاي شي اقوله أي اعتبار..!!.. حسين: ياسيف ارجع وبيصير كلام ثاني.. سيف: راحت عليك الفرصة... بيني وبينك المحاكم احين... طلعت من البناية كلها ونزلت تحت وركبت سيارتي.. وانا مقهور حدي.. كيف يتجرأ ويستخف بالموضوع.؟..ويتصرفون ويسوون هالشي كله من ورانا؟!.. اوكي الشباب مستانسين من اللي صار بس انا لا..انا اهلي غير..مايتقبلون هالاموور.!. لكن يا انا يا انتوا...ماكون سيف اذا مانفذت تهديدي واخذ قضاي منهم... __DEFINE_LIKE_SHARE__ | |
| ||
| |
|
07-28-2011, 01:27 PM
| رقم المشاركة : [ 295 ] | |
| عضو فعال | ------------------------------ اليوم: السبت.. المكان: صالة منى وراشد في بيت بو راشد.. الوقت: الثامنة والنصف مساءا .. ------------------------------ (منى).. ضحكت على كنة يمكن للمرة العاشرة من اتصلت بي... والله هالاثنين خبايل... مادري متى بيعتدل حالهم.. كنة: لا تظحكين منى والله اني متوهقة ... منى : انا قايله من قبل... انتوا الاثنين حاسدين عماركم عالنعمة اللي انتوا فيها.. كنة: اخوج مره مطنش .. لا يدخل ولا يسال ورمضان لين احين مابارك لي ومره مب مسوي لي سالفة.. منى : محد قال لج تتغلين عليه هالكثر اخويه مايطيق هالحركات.. كنه: اخوج غير شكل... طبيعته غير عن طبيعتي..هو انسان عملي خلاص من يقرر شي ينفذه بدون أي مشاكل في التاقلم...لكن انا لا.. مزعلني ويوم يا يراضيني قلت له خلاص مب مشكله لكن تمت السالفة حازة فخاطري .. وهو يباني ارضى بلمح البصر... ماعطاني وقت.!!!.. ابتسمت وانا افكر بحالهم..من ظرابة لظرابة... لازم يصطلبون.. منى: كنه... انتوا ظرايبكم زايده...هذا وانتوا بعدكم ماعرستوا... كنة: شسوي باخوج.. منى: السالفه مب من اخوي بس... انتوا اثنيناتكم ماتتحملون شي من بعض... (وابتسمت ابا اخوفها).. يمكن المفروض تفجون الخطبة... وفعلا..شهقت كنه كانها سمعت خبر اعدامها... كنه: شووووووووووو؟ شو تقولين انتي خرفتي؟.. الظاهر نسيتي شكثر تريييت هاللحظة ..!! منى: كنه ..ماتناسبون بعض... كله ظرايب ونجرة ..متى تتراضون متى تيكم لحظة حلوه.. كنة: حرام عليج منى ليش تقولين جي والله بتصيحيني..!!.. منى: انا اتكلم عشان مصلحتج...الزواج هب لعبه.. ساليني انا.. والله الزواج صعب... كنة: انزين الامور بتتغير بينا ان شاء الله وبنصير زينين... منى: لازم تغيرون طريقة تعاملكم مع بعض من الحين... والا تراني اقولج ..تفجون الخطبه احسن..انا ماشوف مستقبلكم زين اذا تميتوا على هالحال.. كنه: منى والله تخوفيني.. سكتي دخيلج انا ماتحمل هالفكرة.. انتي تعرفين مشاعري..! منى: عيل حافظي عليها... ظرايبكم البايخه هاي ودريها.. والا الحب بيتحول لكره ولا مبالاة... كنه: انزين السبب مب كله مني ... منى: بعدني برمس يوسف.. بس لازم تهدون اللعب شوي شو هذا مصختوها..طفرت انا من ظرايبكم... سكتت كنة ..وانا اعرفها..اكيد مبرطمة...صحيح انا ما اتمنى لهم انهم ينفصلون.. لكن اللي سويته فمصلحتهم... اخوي بكلمتين بيرضى.. يحب الامور تكون هادية عشان يتمتع بحياته.. بس كنه هي تكثر التغلي وتبالغ بالمواضيع... فتزيد المشكلة..ولانه يغليها مايتحمل كلمه منها هو الثاني.. منى: كنووه حبيبتي... ادري انج تحبينه هو بعد يحبج بس الحب بروحه مايسد صدقيني.. لازم انتي وهو تقدمون وايد تنازلات حق بعض عشان تعيشون حياة هادية..انتوا على ويه عرس مب زين عليكم.. كنه: ان شاء الله.. منى: تعالي شخبارها اختج؟؟ كنه: منوو نوورة؟ منى: هيه... كنة: زينة..تقبلت الموضوع احين بشكل احسن وردت عند ريلها...الله يصلحها ..والا احمد مسكين مب مقصر معاها... منى: الله يهدي.. كنة: ان شاء الله... همم خلاص بخليج مابطول عليج.. ماصليت التراويح..!. منى: ولا انا بعدني.. برايج وسلمي عالاهل.. كنه: يوصل ان شاء الله... مع السلامه حبيبتي.. منى: الله يحفظج.. سكرت عن كنه وانا ابتسم.. عسى تهدي من هالتغلي والدلع على يوسف.. وتخف مشاكلهم.. حطيت التيلفون عالطاولة ودخلت اشوف راشد اللي كان ياي من المسيد من شوي .. حصلته يبدل ملابسه... منى: ها حبيبي.. بتطلع بعد..؟!.. راشد: هي الغلا.. بسير المستشفى بتطمن على خالي خلفان.... منى: شو صحته احين؟؟. راشد: يقول لي سهيل انه اليوم احسن عن امس.. وان شاء الله بيصير بخير.. مسكت سفرة راشد وعطيته اياها وبدا يتسفر جدام المرايه.. راشد: تدرين..!!.. سيف رد من السفر... منى: سيف ولد خالتك؟... راشد: هيه..يوم سمع بسالفة الشريط وابوه رد من السفر.. بس لين احين ماشفته.. منى: وشو سوووبه قوم سهيل وحمد.. راشد: شو بيسوووبه يعني؟ انا ماسالت عن التفاصيل سهيل كانت متظايق عشان ابوه.. منى: الله يقومه بالسلامه ان شاء الله...مساكين راس مالهم هالابو.. راشد: هي والله...مادري بيحصلونها من وين والا من وين.. منى: شكلك تلمح لسالفة ناصر..!! راشد: منى... لا تقوليني شي ماقلته... انا بسير تامرين بشي؟.. منى: سلامتك... تحرك راشد صوب الباب.. منى: راشد..!! راشد: نعم.؟ منى: افا..تطلع بدون بوسه .. انا واللي فبطني بنزعل بنحس بالحرمان..!! ابتسم راشد وتقرب مني وباسني.. راشد: ارتحتي؟...يالله اشوفج خلاف ان شاء الله.. منى: تحمل على عمرك .. طلع راشد.. وانا ابتسم.. وايدي على بطني.. ست شهور بعد..ست شهور ان شاء الله واشوف ولدي او بنتي..مايهم.. المهم ذرية اربيها تربية صالحة.. ابتسمت اكثر ودخلت اتوضى واصلي التراويح.. ---------------------------------- اليوم: السبت.. المكان: غرفة يوسف.. الوقت: الساعة الحادية عشرة مساءا.. ------------------------------------- (يوسف)... ضحكت وانا اسمع سوالف خالد عالتيلفون ... كان حاليا موجود في تركيا ..ويخبرني عن واحد من الجنس الثالث حصله هناك وتشبص بخالد .. يوسف: هههههههههههههه لله يقطع سوالفك... لا يكون تيبه وياك.. خالد: انابديت احبه.. خلاص تعلقت به..بييبه وياي بتشوفه عقب يومين.. يوسف: هههههههههههه والله لو يبته بربطه في الحارة بخلي العيال يردونه جنس خشن.. خالد: ههههههههه اعع يخسي يا ريال والله بس ابا الفكة منه.. حتى غيرت الفندق بسبته.. يوسف: هههه والله مايسوى عليك.. متى بتي بالضبط؟.. خالد: الاثنين ان شاء الله بكون في البلاد.. ياشين رمضان يوم انته هب فبلادك.. يوسف: هي والله..يالله توصل بالسلامه ان شاء الله مابطول عليك.. خالد: زين.. انته بتي تستقبلني والا اخبر اخويه.. يوسف: لالا شو انا بيييك لا تتصل بحد.. خالد: خلاص تمام..فمان الله يوسف: الله يحفظك.. سكرت عن خالد وانا اضحك عليه وعلى سوالفه... حطيت تيلفوني عالطاوله وفتحت الكمبيوتر .. صارلي اسبوعين ماكلمت كنه.. ولهت عليها صح... لكن خلها تتادب.. مادري لين متى بتم على هالحال.. كل اسبوع ظرابه ..نتراضى يوم واحد....لين ماتحصل سالفة يديدة تظاربني عليها .. هذي هب حالة.. عاد زعلتي الاخيرة هاي شينة.. عشان بس اادبها.. طرشت لي رسايل وايد بس انا مطنش.. وترد تطرش تعاتبني واطنش بعد.. فتحت ايميلي... وشفت رساله ثانية منها... بتاريخ اليوم ... ومن ساعه مرسلة الرسالة.. وتقول انها اسفه وتوعدني خير بانه مانتظارب... وتقول سوالف وايده.. ابتسمت وانا الاحظ اسلوبها المتغير..هذا هب كلام كنوه..! لكن اتمنى انها تعنيه.. قررت اني اطنش اكثر.. سكرت الايميل وكنت ياي بنش عن الكمبيوتر..لكن رجعت اقعد وفيني فضول.. فتحت المسنجر اشوفها اذا موجوده او لا... وفز قلبي يوم شفتها اونلاين... وانا كنت داخل " ظهور دون اتصال" يعني محد يدري اني اونلاين.. وقعدت اراقب اسمها يمكن عشر دقايق... والرغبه تتنازعني...اخليها واروح او اكلمها؟؟؟ ابتسمت وانا افتح المسنجر ...قلبي مايطاوعني...شسوي..!!.. ومثل ماتوقعت.. بادرت كنه بالسلام.. كنة : مرحباااااااااااااا الساااااااع .. يوسف: مرحبابج... كنة: يااااااالله بالستر مابغيت ترضى علينا حششششششششى.. يوسف: بغيت اراويج التغلي على اصولة شو يسوي...يوم انتي تتغلين علي وايد ماتعرفين انا كيف احس... بغيت احسسج بس.. كنة: يابوك خلاص توبة ماريد احس مرة ثانيه... مايسوى علينا.. يوسف: يعني تادبتي؟. كنة: هي تادبت.. بس مب جنك انته بعد لازم تعتذر لي؟.. يوسف: على شوووو؟؟؟ كنة: لانك مول ماتصبر علي ..انا اصبر عليك بس انته مول ماتصبر علي..ولا تعطيني فرصه..كله مهازب مهازب.. يوسف: بعطيج فرصة يوم بشوف الموضوع يستاهل.. بس انتي تتزعلين وتحتشرين على اشياء ماتستاهل.. كنة: انزين يوسف شحالك شخبارك؟.. ابتسمت .. كنه ماتبا تفتح نقاش.. همها تنسى الموضوع هذا بس ونرجع مثل قبل... وانا قررت اجاريها.. يوسف: انا بخير وسهالة انتي شحالج.. كنة: انا الحين صرت بخير... عنبو يا يووسف.. مبرووك عليك الشهر ..مايسوى علينا هالزعل حتى ماباركنا لبعض..! يوسف: شسويبج.. الله يبارك فيج وينعاد علينا وعليج ان شاء الله.. كنة: امين.. انته مشغول؟ يوسف: لا هب مشغول ولا وراي شي .. ليش؟ كنة: هممم ابا اكلمك بموضوع.. يوسف: تفضلي.. كنة: يوسف..ماباك تزعل عاللي بقوله.. بس انا ماريد اكلمك لين وقت عرسنا.. سكت وانا اقرا مره ثانية كلام كنه...انصدمت...شو تقول هاي.؟؟؟ يوسف: شو تقولين انتي؟ كنة: اقول اني ماريد يكون بينا تواصل واحتكاك لين مانعرس.. يوسف: ليش..!!..شو سويت بج تبين تقاطعيني.!! كنة: يوسف مب سالفة مقاطعة..بس نحن كثرة الاحتكاك بينا صارت تسوي مشاكل بايخه ..مثل ماتشوف.. وانا ماريد نتعود على هالاسلووب.. ماريد تتغير مشاعرنا تجاه بعض قبل العرس.! سكت.. ماعرف شو اقولها...زعلت بصراحه.. كيف اقاطع كنه لين وقت العرس؟.. هذا يعني اربع شهور ما اكلمها او يمكن خمس شهور...! يوسف: كنه..خمس شهور وايد..! كنة: بتسمع اخباري من منى وانا بسمع اخبارك منها بعد..وتراك تي تسلم كل جمعة او خميس..بنسلم على بعض بدون كلام مطول يعني مثل ماكنا قبل..انا اقصد المسنجر.. حطيت لكنة ويه زعلان يعبر عن مشاعري الزعلانه.. وحطت لي كنه نفس الويه.. يوسف: دامج زعلانه ليش عيل هالقرار.؟؟ كنة: يا يوسف لمصلحتنا.. نحن وايد نحتك ببعض وجذي بنمل.. وانا في سنه تخرج.. وكثرة ظرايبي وياك تخليني اتظايق وهالشي ياثر على دراستي بعد... خلنا ناخذ بريك..!!!. يوسف: اللي تشوفينه...! كنة: لا تزعل.. يوسف: مب زعلان..بس بشتاق لسوالفنا.. كنة: قول بترتاح من الصدعة.. يوسف: كانت عايبتني الصدعة.. كنة: الحين عايبتنك هااه... عالعمووم انته موافق؟. يوسف: موافق بس بشرط. كنة: شوو..؟ يوسف: انتي بتتخرجين في الصيف صح؟ كنه: هيه.. يوسف: خلاص.. اول مايخلص الكورس هذا..نملج.. كنة: نحن مب قايلين ماشي ملجه الا قبل العرس بشوي؟.. يوسف: مالي خص.. كنة: همممم خلاص اوكي..كم يوسف عندي انا.. يوسف: فديتج..والله بشتاقلج.. كانت سهرتنا هالمرة مطولة باعتبار انها اخر وحده... وكانت مليانه بالاعترافات اللي طلعتها من كنه بالغصب.. اعترافات كانت رافضة تقولي اياهم من زمان... يمكن قرارها صحيح وعين الصواب... نحن بدينا من كثر احتكاكنا ببعض ندور على اسباب تخلينا نتظارب... وهذا هب في صالحنا... بس والله بشتاق لهالظرايب..!! ------------------------------------- __DEFINE_LIKE_SHARE__ | |
| ||
| |
|
| مواقع النشر (المفضلة) |
العرض العادي
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| ٱحبَڪ ۈٱڎرـﮯ تحبَنـﮯ فڎيتڪ يٱنظر عينـﮯ !●₪●.. | رحلت عن بلادي | استراحة قصص وابداعات الاعضاء | 594 | 04-28-2012 10:45 PM |
| آنّآ معآگّ ۈڷآ بڎۈنّگّ يسعڎگّ ربي | خوية الشقا | عدسة الاعضاء , كاميرا الاعضاء | 11 | 05-19-2010 02:03 AM |
| آڛآڷڼيے ڷۈ פـپـِـِيے"ـٽ آڼآ غيرّڪ םـِآآهۈـِـِيے"ـِـِٽ (»● ڷڛعّـِـِۃ عّ ـڎآپ »● | مـِŏـلِوِ۶ أِשּׂِـِتِأنِدِرِ | تصاميم الاعضاء | 4 | 05-13-2010 01:09 PM |
| أنّآ ۈڎّي ۈإنّت ۈڎّگّ ,, ۈآڷجۈآب يآرۈحي عنّڎگّ ..!ّ | خوية الشقا | عدسة الاعضاء , كاميرا الاعضاء | 24 | 01-23-2010 11:11 AM |
الساعة الآن 03:08 PM
- اخبار رياضية
- اخبار الامارات
- اخبار ريال مدريد
- اخبار برشلونه
- العاب فلاش
- مسلسلات وافلام
- مسجات
- فيديو كليبات
- سيارات للبيع
- ارقام سيارات
- ارقام هواتف
- هواتف للبيع
- حيوانات للبيع
- قوارب ويخوت للبيع
- ملابس واكسسوارات
- ساعات ومجوهرات
- اناشيد اسلامية
- نغمات اناشيد
- نغمات اسلامية
- ادعية اسلامية
- رقية شرعية
- قران كريم
- ديبيات اسلامية
- اذكار المسلم
1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227