~»¦مِـِـِـۈع‘ــڎ مِـِـِـع‘ـ ـآڵـڛع‘ـــآڎۿ ..!!●• - الصفحة 60

رهيفة القلوب · 07-28-2011, 02:03 PM

------------------------------------
اليوم: الأحد..
المكان: شقة ناصر ومهرة..
الوقت:الثانية صباحا (السبت بعد منتصف الليل)...
----------------------------------
(ناصر)

طلعت من الحمام وانا لاف الفوطة على خصري و احس بالظيج...
كرهت الشقة وهي فاظية بدونها.. وبدون مايد..
صايرة ماتنطاق وتلوع بالجبد..
السبت يالله يالله تحملتها مع اني ماقعدت فيها ابدا..
لاني اول مارديت من دوامي حطيت اغراض لمهرة ومايد وهي كانت تكلمني عالتيلفون وتخبرني شو تحتاج حقها وشو تحتاج لمايد ..
واول ماخلصت الشنطة سكرتها ورحت العين ومن شوي راد بوظبي..
والله يعيني كيف بيمر علي يوم الاحد..لاني مابروح العين..مادري شو بقعد اسوي هني بس تعب علي اني اروح وارد مرتين في اليوم..
يلست عالشبرية وانا ابتسم... اتذكر سلام مهرة لي امس يوم وصلت بوظبي..
دخلت عليها الحجرة وهي كانت توها حاطه مايد عالشبريه مرقدتنه...
اتذكر ويهها وخصل شعرها كيف صدت صوبي وهي تبتسم بترحيب...ولوت علي من نفسها..هي اللي يتني وحظنتني..مب انا... وكم عنالي هالشي ..!!.
خلاني اقول بدون حاسية " اشتقت لج".. لكن اليابسة ردت علي تقول "اشششش مايد راقد"..
فذيج اللحظة بغيت اعضها..بس دريت انها بتصارخ وبتوعي مايد..

لبست شورت اسود وبندت الليت مستعد اني انام... مسكت تيلفوني حصلت مكالمات لم يرد عليها .. وكان اتصال من مهرة..
اكيد تبا تطمن اذا وصلت او لا... وانا مارديت لاني كنت اتسبح..
ابتسمت مره ثانية واتصلت بها .. انسدحت وتلحفت والسماعة على اذني...
ودي بس اتخيلها راقده حذالي ..عشان اعرف ارقد..!

مهرة: مرحبااا..
ناصر: هلا والله وغلا...
مهرة: هلا ناصر..دقيت لك..وين كنت؟
ناصر: كنت اتسبح..شحالكم؟
مهرة: بخير الحمد لله.. بغيت اتطمن عليك بس..
ناصر: بس ؟!
مهرة: هممم هيه بس..!
وضحكت...
ناصر: ماولهتي علي؟..
مهرة: توك رايح عنا وين بواحي اتوله عليك..!!
ناصر: ليش احس انج يالسه ترمسين وتطلعين لسانج فنفس الوقت.!!
مهرة: ههههههه كيف يعني.!
ناصر: يعني يالسة تجذبين عليه..
مهرة: هل تنعتني بالكاذبة يا هذا..!! ويحك.!

ناصر: هههههههه احلاااا هناااااااك...
مهرة: ههههههههههه حطولي اهلك خمر في الفيمتووو سكراااانه..!! ههههههه..
ناصر: قولي قسم.!!..خساااارة فاتني ..
مهرة: شو كنت بتسوي..!
ناصر: الذكي من ينتهز الفرص...مايد راقد؟
مهرة: هي راقد.. على بطنه راقد مثلك..كل ماشوفه اضحك واتذكرك...
ناصر: والله انج ولهتي علي ..
مهرة: هههههههههههه غصب..!!!
ناصر: هيه...لانه الصدق..
مهرة: انزين واذا ولهت عليك شو فيها؟
ناصر: يعني صدق..
مهرة: هي صدق..شوفيها.؟
ناصر: ولاا شي يالغلا.. حتى انا ولهت عليج... الشقة خايسة بدونج وبدون مايد والله..مب طايقنها..
مهرة: يعني انته عقب الدوام مابتي العين؟

ناصر: تعب علي مهرة.. برد من الدوام وبرقد.. بقضي وقتي ماعليج.. انتي لين متى بتيلسين في العين؟ مب بسج؟؟
مهرة:ابويه بعده ماطلع..
ناصر: ويمكن مايطلع لين اخر الاسبوع..ردي بوظبي وبييبج العين اخر الاسبوع وبتشوفينه..
مهرة: ظنك؟..
ناصر: هيه... خلاص انا بيي باجر عقب الدوام وبنرد بوظبي بعد الفطور على طول...
مهرة: هممم انزين... تسحرت ناصر؟
ناصر: ماريد شي كلت وايد عالفوالة... بس بشرب ماي قبل مارقد.. وانتي؟
مهرة: احين بنزل..!!.ماشاء الله عليهم اهلك مايرقدووون فرمضان ..نحن بيتنا مايسهرون..
ناصر: هههههههه هذيلا سكن مايرقدووون.. مب لازم انتي تسوين مثلهم متى ماياج الرقاد سيري رقدي..
مهرة: عاد استانس على سوالفهم...
ناصر: بيخلونج خبلة شراتهم..
مهرة: هههه حرام عليك... الوقت متاخر ناصر..مابتشبع رقاد..
ناصر: لا تحاتين.. بعوض خلاف .. يوم بتكونين وياي ..
مهرة: ياسلام...من زين الرقاد وياي كله مرافس.. مب انته اللي تشتكي من المرافس.!!
ناصر: يازيييييين المرافس جانه منج ..والله انتي ماتحسين باللي احس فيه.. انا احس شي ناقصني يوم انتي هب عندي..
مهرة: والله حتى انا...
ناصر: صدق؟
مهرة: هيه..
ناصر: فديت قلبج والله..
مهرة: احم..يالله برايك روح ارقد..
ناصر: امحق رد..
مهرة: هههههههههههههههههه شسوي تعرفني استحي..!
ناصر: ريلج انا..
مهرة: ادري..بس..انته تدري..
ناصر: زين زين.. خلاص انا برقد..
مهرة: ناصر..
ناصر: عونج..
مهرة: زعلت؟؟

ابتسمت وانا افكر استغل الفرصة..
ناصر: هي زعلت ..شو رايج انتي..! ..
مهرة: انزين ليش؟
ناصر: ماكد عطيتيني ريج حلو..اوكي تستحين بس وبعدين يعني؟!
مهرة: انزين خلاص لا تزعل.. قلت لك محتاجه اتعود..
ناصر: انتي متعوده علي وخالصه ..
مهرة: نصوووووري...
ناصر: ها حبيبي..
مهرة: همممم ..اناا..

فز قلبي من مكانه...حسيت بمهرة شو تبا تقول لي... وقاطعتها على طول..
ناصر: مهرة لا تقولين..
مهرة: شو..
ناصر: بس لا تقولين...هب عالتيلفووون..
مهرة: تراك تفوت الفرصة عليك مابتيني الجراة اقولها جدامك...
ناصر: جان تبيني اقوم واتلبس وامسك خط وارد العين الحين..قوليها..
مهرة: ههههههههههههههههه لا ماريد اتعبك توك واصل..
ناصر: صدق والله كنتي بتقولينها؟
مهرة: همم هيه..
ناصر: لا ماريد اسمعها عالتيلفون.. بتينا فرص وايد لا تحاتتين..
مهرة: هههه انزين..تاخر الوقت...روح ارقد ناصر..
ناصر: قولي شي ثاني..
فهمت علي مهرة شقصد.. اني محتاج اسمع ولو كلمه حلوه منها...
مهرة: هههههههه اوكي..روح ارقد عيووني..
ناصر: ان شاء الله يالغلا..وعيني الصبح لا تنسين..
مهرة: ان شاء الله ولا يهمك.. تصبح على الف خير..
ناصر: وانتي من اهله..فمان الله..
مهرة: فمان الكريم..

سكرت عن مهرة وانا قلبي مرتاح.. كانت بتقول لي انها تحبني....
ياااه من كان يصدق..!!.. انه بعد كل الي صار...مهرة صارت تحبني..
صبرت وايد ..والله عطاني اللي بغيته..
مافي شي في الدنيا بيفرقني عن الانسانه هاي...
------------------------------
اليوم: الاحد ..
المكان: بيت خلفان..
الوقت: الثالثة والنصف صباحا ( السبت بعد منتصف الليل)..
------------------------------
(سيف)..

دخلت بيتنا متكاسل والسفرة على جتفي..
كنت متعمد اني اوصل البيت متاخر عشان ما اتلاقى مع حد..
مب ناقص..
هم بلا شي كارهيني..
لشي مالي ذنب فيه..
بس الظاهر اني نسيت انه رمضان... والناس ينشون يتسحرون..
دخلت الصالة حصلت سهيل يالس بروحه يشرب شوربه ويتطالع التلفزيوون..
الحمد لله انه سهيل ومب حمد..
سيف: السلام عليكم...
التفت لي سهيل ببروود...كعادته..
سهيل: وعليكم السلام والرحمه.. هالحزه ياي من برع.!!.
سيف: هيه...
سهيل: وين كنت؟.
يلست عالكرسي وانا اصب لي شوربه..
سيف: عند جمال....
سهيل: وانته طول اليوم عنده ؟
سيف: لا .سرت دبي ويوم رديت رحت عند جمال..شحقه ايي البيت.؟ عشان تسمعوني كم كلمه انا مب محتاج اسمعهن احين؟.
سهيل: وليش يوم اتصلت بك عقب الفطور مارديت علي؟..
سيف: كنت معصب وماريد ارمس حد... شو حاله ابويه..؟
سهيل: اليوم احسن الحمد لله..وشو سويت في دبي؟
حطيت الشوربه عالطاوله ورفعت عيني لسهيل وشفت فويهه شويه لين وتعاطف.. استغليت الفرصة وقلت اشرح له شو صار..
سيف: سهييل.. ابويه مامنعني عن الغنا مع ربعي.. منعني بس اني احط فبالي اكون مطرب وانا فعلا شليت هالفكرة من بالي...
سهيل: عيل شو سالفة الشريط؟
سيف: اللي صار شوو.. نحن سوينا حفلة قبل ماروح بريطانيا.. وحضروها ملحنين وناس من شركة انتاج.. ونحن غنينا على اساس حفلة عادية من الحفلات اللي نسويها دوم.. لكن الملحن ومجموعة من شركة الانتاج سجلوا الحفلة وانشروها بدون علمنا.. وانا رحت وتظاربت وياه اليوم..
سهيل: كيف هذيلا ينشرون شريط باصواتكم وانتوا ماتدروون؟ يمكن بس انته اللي ماتدري..!
سيف: لالا..انا سالتهم.. كلهم مايدرون..واللي سووه هو مخاطرة على قولته عشان يشوفون اذا الناس تتقبل هالنوع من الاشرطه..واي من الاصوات تقبلوها الناس اكثر...عشان تتبناه شركة الانتاج وتسوي منه مطرب..!
سهيل: شوف الوقاحة... اصلا هذا الشي هب قانوني كيف ينشروون جذي بدون عقد مسبق معاكم؟
سيف: مادري..
سهيل: وشو بتسوي؟
سيف: انا تهازبت وياه اليوم.. وقلت له برفع عليه قضية...
سهيل: شو تبا تفضحنا زياده انته؟
سيف: نعم؟!!!!..عيل اخلي الموضوع يمشي جذي.!!
سهيل: ليش ماتفاهمت معاه؟.. يمكن توصلون لحل وسط..
سيف: اي حل هذا اللي بنوصل له؟..انا قهرني يوم كلمته قعد يستهزئ بي قلت بأدبه..وبيشوف..
سهيل: ومن وين بتيب محامي؟؟
سيف: راشد عنده معارف وايد...بساله اكيد يعرف حد..وبخليه يتفاهم وياهم...يا يعوضوني ويحطون اعتذار رسمي في كل الجرايد في الدولة.. يا ماشي..ارفع قضية...

تنهد سهيل.. وهو يفكر بالموضوع.. وكملت انا الشوربه وانا اخطط للموضوع هذا فبالي..
سيف: متى اقدر اشوف ابويه؟
سهيل: لا تشوفه الا يوم نحل السالفة..مانباه ينجلط علينا مره ثانيه...!
سيف: الله كريم.. انتوا قلتوله اني انا رديت؟
سهيل: لا ماخبرناه.. مب الحين..

قعدنا انا وسهيل نتسحر ونسولف بهدوء.. حسيت شوي بطمئنينه.. لانه عالاقل واحد من اهلي تفهم وضعي..
قعدنا لين صلاة الفير..وبعد الصلاة كل واحد دخل حجرته يرقد..
-----------------------------------
بعد اسبوعين من الاحداث السابقة ..
----------------------------------
اليوم: الاحد
المكان: غرفة سهيل وشيخة..
الوقت: الثالثة ظهرا..
------------------------------------
(شيخة)...

عطيت سهيل بجامته عشان يلبسها بعد ماطلع من الحمام متسبح..
شيخة: ماتبا ترقد شوي ترتاح؟..
سهيل: هيه برقد شويه..
مديت ايدي وخذت البجامه مرة ثانيه..
شيخة: دامك بترقد شو تبا بالجامه هاتها...!
ابتسم سهيل ويلس عالشبرية بتكاسل وقال لي...
سهيل: مبروووك...
ابتسمت انا بعد ويلست عداله...
شيخة: الله يبارك فيك بس على شووو...!
سهيل: اليوم اتصلوبي البنك ..وقبلوج في الوظيفه... بس قالوا بعد العيد خلها تي تستكمل اوراقها وتباشر العمل..
شيخه: واللـــــــــــــه..!!!!...
ابتسمت ابتسامه وسيعة "جدا" من زود فرحتي بهالخبر...
يالله من متى وانا اتمنى اشتغل ... اشتغل بالشهادة اللي تعبت فتحصيلها...حرام تعبي يندفن ويروح بلاش..!
شيخة: فديييييتك الله ...الله يبشرك بالخييييييييييييير...

ابتسم سهيل وهو يطالع فويهي ...
سهيل: هالكثر كنتي تبين تشتغلين..!!
شيخة: وايد يا سهيل واااااااااااايد...!..
سهيل: وليش ماقلتيلي شي من قبل..!!
شيخه: راشد وابويه كانوا يرفضون الفكرة هاي وماسوولي سالفه كل ما ارمس فيها سدووها وسكتوني... انا قلت فخاطري اكيد لك نفس الراي..
سهيل: مب شرط.. مافي مانع من الشغل عندي اذا ما بتقصرين بريلج وبيتج...
شيخة: انا اقصر بسهيييييل..؟؟..كد شفت مني قصور؟
سهيل: لا حشى...
شيخه: عيل لا تحاتي من هالناحية... ان شاء الله مابيطلع مني قصور ابد..
سهيل: ان شاء الله... انا برقد احين..
شيخة: نوم العوافي الغالي...

رقد سهيل وانا خذت تيلفوني وطلعت ابشر عفرا... اللي كانت يالسه في الصالة مع بنتها...
وما وقفت عند عفرا وبس...
خبرت امي واختي ووحده من ربيعاتي اللي مازلت اتواصل معاها بالتيلفون...
بس بعدها تندمت عالتسرع...!
واذا صار شي وتفركشت الوظيفة..! اتفشل يعني؟!
بس ان شاء الله مابيصير الا كل خير..

سكرت التيلفوون والتفت لعفرا اللي اتابع المسلسل...
شيخة: فخااااااااااااااااطري اطبخ... بتين وياي المطبخ؟
عفرا: ماتنلامين ماشاء الله محصله وظيفه لازم بتنفتح نفسج للطبخ ..
شيخه: هههه تعالي وياي عشان اقرقع على راسج في المطبخ ماعرف اسولف ويا البشكاره..!
عفرا: اصبري ربع ساعه لين يخلص المسلسل...وعقب بودي مريومه ترقد وبلحقج..

في المطبخ...
شيخة: وين حمد ؟..هالايام صاير مول ماينشاف..!
عفرا: والله مادري وين يروح..كله يقول شغل شغل... يوم في المستشفى تراه عند ابوه... واماكن غير نادر مايقووولي...كله يقول شغل ..مادري هالاشغال متى بتخلص..!

سكت انا بدون أي تعليق... حمد مقصر بحق زوجته...يعني بنته بتكبر وهو مايعرف عنها شي..!
الحمد لله على النعمة...سهيل ابد مب مقصر.. صحيح احيانا احس ببرود العلاقة بينا...
بس هذا طبيعي في كل زواج..طبيعي انه مابنتم على مشاعرنا قبل الزواج...في شي يتغير..
نبدا ناخذ بعض كامر مفروغ منه...
ماقمنا نتقنص الفرص ونخترع الصدف مثل قبل عشاان نتلاقى ونسولف..!
ابتسمت...
اشتقت لذيج الايام...
-----------------------------------
اليوم: الاثنين...
المكان: بيت خلفان..
الوقت: التاسعة والنصف مساءا ..
-----------------------------------
(سييف)..

دخلت البيت على عجل ..وشفت شيخة وعفرا يالسات كالمعتاد بس اليوم معاهن عمتي..
سالت شيخة عن سهيل...
شيخة:توني متصلتبه قال على وصوول...
سيف: وحمد وين؟
كان هذا السؤال لعفرا..
عفرا: مادريبه..دق له تيلفون..

طلعت من البيت للحوض وانا ظايج.. يعني كان ظروري يطلعون هالحزه..!!!
شو بسوي بالجماعه اللي عندي في الميلس احين..؟
صحيح انا ريال واقدر اتصرف بروحي بس بعد انا بحاجه لمشورة اخواني...
اخواني اللي فهمتهم الوضع وصاروا مسانديني والحمد لله..رغم امتعاض حمد الواضح عالسالفه الا انه قرر انه ينتقم من شركة الانتاج مثل ما انا مصر...اما سهيل فيقول التفاوض احسن....وراعي التفاوض مش موجود..!!

سهيل: مرحبا...
سيف: وينك ياخي...؟!
سهيل: راد احين البيت..شعندك؟
سيف: الملحن حسين ومحامي شركه الانتاج وريال ثاني من الشركه عندي في الميلس..
سهيل: شو يايبنهم هذيل؟
سيف: يبون يتفاهمون...مايبوني ارفع قضية..
سهيل: زاغوا عيل.!
سيف: شكلهم جي.. ومن شوي واصل حميد المحامي اللي وكلته..بس اباكم بعد موجودين..
سهيل: خلاص ولايهمك انا ياي الحين..

سكرت عن سهيل واتصلت بحمد وهذا الثاني قال انه مشغووول جدا... في شو مشغوول الله اعلم...لكني ما اصريت على حظوره.. هو حر.مايبا ايي ..برايه لا ايي..!
لكنه قال انه احتمال ايي بعد اربعين دقيقة او ساعه ...
وانا ماعلقت عالموضوع..

في الميلس بعد وصول سهيل...
محامي شركة الانتاج: نحن طبعا ياييين نتكلم بخصوص سوء التفاهم اللي صار بين سيف وبين الشركة واعتراضه على الشريط..
سيف: سوء تفاهم؟؟؟..
سهيل: اصبر يا سيف...
محامي شركة الانتاج: اللي صار صار بشكل غير مخطط له... هي كانت مخاطره وماواجهت الشركه أي اعتراض او معارضة الا من قبل سيف...
الاستاذ حميد: الشريط نزل وتوزع عالمحلات بدون اخذ اذن من الشباب اللي مغنين فيه.. وهذا مخالف للقانون..لازم يكون فيه عقد مسبق عشان تنشرون هالنوعية من الاشرطه..
محامي شركة الانتاج: تجمع الشباب في الحفلة كان لحبهم للغنا ورغبتهم بالشهرة...الشركة عطتهم هالفرصة مجانا..!!
الاستاذ حميد: مب كل الشباب لهم نفس الموقف والتفكير.. سيف واهله تعرضوا لكثير من المشاكل والسبب هذا الشريط... وهو غير موافق عليه.. وحضورة للحفلة كان لمجرد المتعه..!
محامي شركة الانتاج: بس هو صرح اكثر من مرة برغبته بالغنا...
الاستاذ حميد: عندك اثبات خطي على هالشي؟..
محامي شركة الانتاج: لا ..بس هو قال للاستاذ حسين...
الاستاذ حميد: هذا مايعتبر اثبات... مب أي شخص يقول ابا اصير مطرب تروحون تسجلون صوته وتنشرونه..!! والا انا غلطان.!
محامي شركة الانتاج: لا..لا طبعا مب غلطان.... لكن سيف من الاصوات المطلوبه والشركه حبت تعطيه فرصه بناءا على اقواله ..
الاستاذ حميد: ارجع اقول ماعندكم اثبات خطي ولا اتفاق مسبق مع سيف انكم تسجلون صوته.. حتى لو كان يقول انه يبا يصير مطرب كل ساعه ودقيقه.. مازال واجب عليكم تكتبون عقد خطي بينكم وبين الشباب...عشان تكون الامور واضحه وعشان ماتتعرضون لمواقف مثل هذي..!
محامي شركة الانتاج: صحيح... الخطوه كانت خطيرة ومتهورة... ونحن يايين نحل الامور بالتفاهم...
سيف: ماشي تفاهم بينا وبينكم..!!
الاستاذ حميد: باي طريقة تبا تحل الموضوع هذا.؟!..
محامي شركة الانتاج: بتعويض مادي واعتذار رسمي... !

كثر النقاش بينا وبين الجماعة الموجودين... انا رفعت صوتي اكثر من مرة وكانوايهدوووني احيانا ويتجاهلوني احيانا ثانيه..كنت مقهور...
ان مالي خبرة بحل هالمسائل القانونية لكن كل اللي كنت اباه اني اعاقبهم اشد عقاب عاللي سووه...

في النهاية انتهى الوضع بينا بانهم اقنعوووني اقبل بالاتفاق هذا .... باعتذار رسمي للشباب وبتعويض مادي.. وكان المبلغ كبير ... الظاهر انه الشركه تبا تحافظ على صورتها باي شكل من الاشكال...
سهيل والمحامي اقنعوني اني اوافق ووافقت..
رغم اني كنت ابا اسحبهم واحد واحد لابويه عشان يحبون راسه وريوله ويشرحون له اللي صار..
وباني انا مالي ذنب ولا عصيت له شور...
لكن للاسف الامور ماتمشي على هالحال..!..
بس انا كنت مقهور...حسيت انهم اشتروا سكوتنا بالمبلغ والاعتذار..!!!..
لكنهم اقنعوني باني انا المستفيد...وانه رفع قضية مابتزيد الامور الا سووء... والفظيحه بتكبر...واللي مادرى عن الشريط بيصير يدري وبتزيد عدد مبيعاتهم في هالحالة...

الموضوع ينتهي بهدوء..احسن.. ولو اني مب مقتنع تماما بهالفكرة..!.
بعد ما راحوا كلهم.. اتصلت انا بمهرة اخبرها باللي صار..لانها حشرتني بالاتصالات اليومية تسال عن الموضوع .. حتى ناصر كان يتصل..
بصراحه استغربت اهتمامه..لكن الظاهر انه الريال يعتبرنا مثل اهله..او يمكن من معزة مهرة عنده صار يهتم بكل شي يخصها ويخص اهلها..
يجوز..!
----------------------------------

نهاية تكملة آلبآرت آلـ 58 ! (2) __DEFINE_LIKE_SHARE__

رهيفة القلوب · 07-28-2011, 02:33 PM

----------------------------------
بعد يومين..
--------------------------------
اليوم: الاربعاء.
المكان: العين مول في مدينة العين..
الوقت: التاسعة والنصف مساءا..
--------------------------------
(يوسف)...
طلعنا من المحل انا وناصر وكل واحد في ايده كيس... ماباقي عن العيد غير يومين... وكعادتنا..دايما متاخرين بالمشترى..
يوسف: لو خذت النعال البني احسن..
ناصر: بالعكس هذا اكشخ.. وبعدين عندي وايد بني..
يوسف: مادري انا شفت هذاك فنان..
ناصر: شحقه ماخذته انته..!!..
يوسف: جان ما ارد اخذه لابويه..!..
ناصر: لا ابويه مايعيبه هالنوع يعيبه مال اول...
يوسف: مايتطور هالشايب..
كان العين موول زحمه عالاخر..لكن رغم الاصوات والحشره..سمعت صوت مب غريب علي يزقر ناصر..
لكن ناصر ماسمع...يلست اتلفت احاول احدد مكان الصوت... وبعد شوي سمعت " اووه هذا يوسف بعد".
ساعتها تاكدت من صوت منى..
وشفت ثنتين منقبات وحده منهن تاشر صوبنا..
جان امسك ايد ناصر..
يوسف: هذي منى.!!..
ناصر: وين.!
اشرت له بايدي وانا امشي وهو مشى معاي تجاه منى والبنت اللي معاها..
ويوم وصلت عرفت انه هالبنت كنه..! ماغيرها.
استانست حدي يوم شفتها.. لكن في شي غير غطى على هالوناسه ..خوفي عليهن.!!
يوسف: شو تسون هني.!!!!
منى: السلام عليك...سلموا على كنه انزين...
سكت وتحنحنت شوي وانا التفت لناصر اللي كان ويهه يعطي تعبير " لا تعليق"..

يوسف: شحالج كنه؟..
ناصر: شحالج يا كنه..وشحال اهلج؟
كنه: الحمد لله بخير انتوا شحالكم؟..
يوسف: بخير الحمد لله...
ناصر: ممكن افهم انتن شو تسون تحوطن في المول رواحكن؟
منى: نحن هب رواحنا... خالتي ام مايد مع عويش ولطوف ونحن خليناهم عشان نخلص سرعه..
يوسف: تقومن تحوطن رواحكن في هالزحمه؟
منى: يوسف شفيك نحن هب يهال.!!.
ناصر: حتى لو.. مب زين تحاوطن رواحكن بدون ريال يحرسكن..!!
منى: يووه شهالتخلف ليش وين رايحين ؟ نحن من ساعه نحاوط ولا حد عق علينا كلمه..
كنة: صح..
يوسف: هي المحامي ماصدقت .!!!
كنه: اقول الصدق انا..!.
تمينا انا وكنه نطالع بعض بنظرات..!!..ماعرفت بالضبط شو تعبير ويهها بسبب النقاب..لكن عيونها بروحها تسد انها تخلي قلبي يرجف..!
ناصر: ومتى بتخلصن ان شاء الله؟..
منى: بس باقي كم شغله وبننزل.. يوم بنخلص بنتصل بخالوه وبنروح ..لا تحاتون انتوا روحوا خلصوا اشغالكم..
ناصر: لا تبطن..ولا تتصددن..منى انتي تعرفين باقي النصايح مايحتاج اعيد عليج.. واذا صار اي شي اتصلوا..
منى: لا تحاتي.. لو درينا جان يبنى مهرة ويانا..!
ناصر: لا مهرة راحت ويا اهلها السوق في النهار..هب مثلكن نص الليل..
كنه: كله واحد..الزحمه وحده..لا تكبرون المسائل..!
يوسف: تبني اقعد وياكن عادي بكمل مشترى بعدين..
منى: هي هذا اللي تباه انته والله مب عشان سواد عيوني انا ادري..
يوسف: والله مايبين فيج الطيب يالهرمة جاني خايف عليكن.. !
ناصر: برايك جان بتسير وياهن.!!.
يوسف: لالا..خلهن ..هن مايبن حد يحرسهن.. روحنا..
مشيت وانا اسمع ناصر يوصيهن مرة ثانيه يتصلن اذا صار اي شي...
وكملنا مشترى ..ندخل محل ونطلع..
لكن كنه ابدا ما غابت عن بالي..
صارلي فترة اسمع اخبارها بس من الاهل...وبصراحه هب من زود الاخبار..
صرت اتصل بمنى او هي تتصل فيني كل يومين او ثلاثة ...يا انا اسالها عنها يا هي تخبرني من نفسها..
لكن مايكفي..
انا تعودت على شي ثاني... تعودت اكون اقرب الناس و – اول من يعلم- .. والحين انا اخر من يعلم..
انتهز الفرص عشان اشوفها ..والفرص قليلة جدا..
لكن ماعليه.. هانت..
اقص على عمري بهالكلمه ... لكن ماعليه بعدني احسن عن غيري...
هــــانــــت..!..
------------------------------
اليوم: الاربعاء..
المكان: سيارة ناصر..
الوقت: العاشرة والنصف مساءا..

--------------------------------
(ناصر)...
سكرت عن عمي بو احمد ..ابو سعاد الله يرحمها وانا اتنهد... وبان على ويهي الضيق..
حطيت تيلفوني عدالي وكملت سواقة..
اتطالع الشارع وكاني ما اتطالعه..
كلامي معاه حرك فيني اشجان... الله يرحمج يا سعاد..!!..قصرت بحقج وايد وعمري مابسامح نفسي..!!
يوسف: شفيك ناصر؟
ناصر: هاه.!!..همم.. هذا عمي بو احمد ..ابو سعاد الله يرحمها..
يوسف: هي دريت..شو بلاه؟
ناصر: زاد عليه المرض.. وبيسافر عقب العيد باسبوع..
يوسف: مسكيين..هو شوفيه الكلى؟
ناصر: هيه..
يوسف: الله يشفيه..
ناصر: افكر اسافر عقب العيد.. بالمره نقضي انا ومهرة فترة رباعه وبالمرة مايد يشوفونه اهله..وبالمرة نسلم على بو احمد قبل مايسافر ..شرايك؟..
يوسف: هممم.. والله راي طيب.. مسكينه هالمهرة من خذتك وهي في البيت..
ناصر: ماكانت علاقتنا تساعد انه نروح نتحوط..
يوسف: والحين؟
ناصر: لا الحين الحمد لله كل شي تمام ..
يوسف: الحمد لله..
سكت عن يوسف وانا افكر بمهرة...واخطط للسالفة.. الوقت مناسب.. ونحن متفقين من البداية على هالشي..
لكن اجلنا بسبب رمضان..
ابتسمت...
وانا افكر بردة فعلها...
لين وصلنا البيت..كان الخيال شاط فيني ..
نزلنا انا ويوسف .. وكل واحد منا له افكار تشغله...
دخل يوسف الميلس..
وانا دخلت البيت على طول..
شفت مهرة في الصالة مع باقي الاهل..
ناصر: السلام عليكم ..
الجميع : وعليكم السلام والرحمه..
لاحظت نظرة مهرة لي وابتسامتها الترحيبية.. ابتسمت لها..
ناصر: مهرة تعالي شوي اباج..!
مهرة: ان شاء الله ..
ميثا : هاتي مايد خليه عندي..
عطت مهرة مايد لميثا ولحقتني..
في الغرفة.. يلست عالكرسي وسحبت ايد مهرة وقعدتها حذالي..
مهرة: خير ناصر..!
ناصر: الخير بويهج حبيبتي.. همم سمعي ابا ارمسج بسالفة..
مهرة: قول..
ناصر: هممم .. بعد العيد..بحجز لنا عشان نسافر..
شهقت مهرة..!!
مهرة: نسافر؟؟.وييين..!!
ناصر: كبداية بنسير سوريا ..
مهرة: شمعنى سوريا؟
كان على ويه مهرة تعبير غريب...غيره.. خوف..تردد..! مب متاكد...
ناصر: حبي..اتصلت بابو سعاد الله يرحمها...وهو تعبان عنده الكلى وبيسافر..وقعد يتشره انه ماشاف مايد وجي.. وهو بيسافر بعد العيد باسبوع.. عاد انا قلت نروح انا وانتي ونشل مايد ..يشوفونه اهله..بالمرة نسلم عليه قبل السفر .. وبالمره..نقضي كم اسبوع انا وانتي رواحنا...
نزلت مهرة عينها... وابتسمت...
مهرة: اللي تشوفه..
ابتسمت وسحبت مهرة لحظني واسندت راسي عدال راسها..
ناصر: شوو مهاري..غيرتي رايج عن العرس الثاني؟..
سكتت مهرة شوي وويهها محمر.. حتى كنت احس انها مب قاعده تتنفس..!
مهرة:لا.. لا ماغيرت رايي..
ناصر: اذا الوقت مايناسبج.. بسير انا ومايد رواحنا بسلم عليه وبقعد يومين وبرجع..! . وعقب متى ماتبينا نسافر بنسافر...
مهرة: لا لا.. بسير وياك... ماوراي شي..ليش التاجيل.!..
ناصر: قلت يمكن تحاتين ابوج والا شي..!
مهرة: ابوي الحمد لله بخير .. ورا باجر بيطلعونه من المستشفى ان شاء الله.. وسيف خبرني انهم حلو الموضوع وكل شي بيكون زين ان شاء الله..
ناصر: يعني اتوكل واحجز؟..
ابتسمت مهرة وتطالعت فويهي لحظه...
مهرة: توكل على الله..
تقربت وبست مهرة بين عيونها...
ناصر: انا متاكد انها بتكون احلى ايام حياااااتي..!.. وببذل جهدي عشان اسعدج مهرة..
مهرة: انت مب مقصر..
ناصر: ابا اعطيج اكثر واكثر...
مهرة: ياويييلي اكثر عن هذا..!
ناصر: بعدج ماشفتي شي..
ظحكت مهرة .. والتفتت لاكياسي..
مهرة: ماراويتني شو اشتريت..!!.
ناصر: صح نسيت..يبت لج هدية..
مهرة: اللـــه شو يبت ليي..
ابتسمت وانا اطلع لمهرة علبة الساعة اللي خذتها لها.. ومثل ماتوقعت عيبتها واااايد... لكنها ردت صدت صوبي وقالت ..
مهرة: و لابوك وامك شو يبت؟!!!..
ناصر: لا تحاتين مانسيتهم... امايه يبت لها خاتم.. وابويه شريت له ســفــرّ ..
مهرة: ياحيك يوم مانسيتهم..مبوني برد الهدية عليك لو مايبت لهم شي... بس وايد حلوه السااعه شييييك..
ناصر: تستاهلين احلى منها...
سكرت العلبة والتفتت صوبي...
مهرة: ربي لا يحرمني منك ان شا ءالله..
وبحركة فاجئتني حطت مهرة ايدها على ويهي وتتامل فيني بشكل غريب..
وبسبب نظرتها انا قعدت بس ابادلها النظرة ماقدرت اتحرك او اكلمها او اقاطعها بشي..
بعدها قالت..
مهرة: محد اهتم فيني بهالشكل فحياتي كلها...شو اللي بيمنعني من اني احبك اكثر عنهم كلهم..!!!.
ارتفعت انفاسي وتجمدت اطرافي...
ناصر: شو؟..
سكرت مهرة عينها وابتسمت وشكلها توها انتبهت بس للكلمه اللي قالتها...
مهرة: ماشي..
ناصر: مهرة.... (ومسكت ويهها ورفعته عشان ترفع عينها)... قولي..!
بعد دقيقة تستجمع فيها جراتها..قالتها..
مهرة: احبك..
مايحتاج اقول المشاعر الجياشة اللي انتابتني... الرجفة اللي صابتني...
اما اللي صار بيني وبين مهرة بعدها...ســـــر..!
-------------------------------
اليوم : الاربعاء..
المكان: شقة مبارك..
الوقت: السابعة مساءا بتوقيت بريطانيا..
-------------------------------
(مبارك)..
كنت يالس احط لي ملابس واغراض يكفن لاسبوع...
اسبوع بقعدهن في الامارات..عشان اقضي العيد ويا اهلي وارجع مره ثانيه...
كنت مخطط وموفر غياباتي بس عشان هالاسبوع..
بصراحه من راح سيف عني وانا احس بملل وفراغ..
ماكنت ادري شكثر معتمد عليه فيومي..
الاقيه كل يوم واقعد معاه ونتمصخر ونسولف...
ومن راح وانا فوحده رغم تواجد ربعي الوايدين حوالي..اجانب منهم وعرب..
لكن سيف كان غير..من ريحة البلاد.. البلاد اللي حبيتها لابعد حد..
فتحت سدة التواليت اطلع منها كم غرض وصدمتني صورة كنت ناسيها...
الصورة اللي سرقتها عن مهرة... الصورة اللي فيها مهرة وسيف يظحكون ببلاهة ومن وراهم سهيل يلعب بالتيلفون ومب داري انه طالع بالصورة..
كانت هاي الصورة الوحيده اللي سرقتها من صور مهرة ...
كانت صورة تستاهل الاحتفاظ بها..
ابتسمت وانا اتطالعها..
تاملت بسيف..تاملت بمهرة.. حتى سهيل... حتى الصالة اللي صارت فيها الكثير من السوالف..
ياااه..شكثر اشتقت لهم..!!..
ياترى شحاله سيف..وشحالها مهرة مع ناصر؟..
رديت احط الصورة بالسدة واسكر عليها وانا امنع نفسي بالقو من اني اتذكر اعتراف مهرة لي بالحب.. وشكثر كنت غبي يوم رفضتها..
حد يرفض مخلوقة مثل هذي.!!..
حتى لو ماكنت احبها..بس مهرة تقدر تخليني سعيد فحياتي..وبحبها مع الوقت اذا انا عطيت الفرصة لهالشي
بس انا كنت متكبر...
وكسرت مشاعرها..
وكل حد راح بنصيبه.. اتمنى بس ناصر يكون مسعدنها..
مسكت تيلفوني واتصلت بسيف..
سيف: مرحبببببببببباا الساااع..
ابتسمت..
مبارك: هلا والله سيف شحالك؟
سيف: بخير وسهااااااااله شحالك مبارك علوومك والله لك وحشه..
مبارك: انا بخير وسهالة.. ماعليها باجر ان شاء الله بتشوفني..
سيف: قول والله؟ بتييي الامارات.! متىىىىىىىى ؟
مبارك: باجر بوصل ان شاء الله ..بتستقبلني؟.. مطار دبي.. ابويه سالته قال عنده دوام وموعد عملية مايقدر ..
سيف: افاااااا علييييك اكييييييد ان شاء الله.. بس انته قول لي متى وحاظرين ..يالله والله فرحتني بهالخبر..
مبارك: بقعد عندكم اسبوع..انا اروحي مشتاق للامارات والاهل وكل شي والله..خصوصا يوم روحت عني احس انه شي ناقص..
سيف: ياخي احرجتني...تتزوجني؟!
مبارك : هههههههههههههههههههههههه الله ياخذ سوالفك.. انا ياي الامارات عشان اخطبك..
سيف: اعععع.. ماتخيل..
مبارك: ههههههههه محد قال لك تفتح لعمرك باب... اقول شسويت بسالفة الشريط.!!
سيف: لاااا انحلت المسالة ويوونا الجماعه وحطوا اعتذار رسمي لي وللشباب مع تعويض مادي ..
مبارك: wow…how much?...
سيف: مابقول عن تحسدني...
مبارك: يعني وايد؟
سيف: هي وايد..
مبارك: وشو سويت بهن؟
سيف: حاليا في البنك..بفكر...
مبارك: عن تتخبل وتصرفهن على خرابيط... اصرفهن في شي يفيد..
سيف: ان شاء الله..
مبارك : يالله مابطول عليك.. خسرتني اتصالات كل يومين..اشوفك باجر ان شاء الله..
سيف: هههههه توصل بالسلامه مبارك.. بتريا تطرش لي وقت وصول الطيارة..
مبارك: ان شاء الله.. تامر بشي من بريطانيا.؟
سيف: يامن عافها ماريد منها شي ههههههه..سلامتك والله..
مبارك: ههه الله يسلمك..مع السلامه..
سكرت عن سيف وانا ابتسم...
ماقدر اتريا لين باجر عشان اشوفهم كلهم...
ابويه...شكثر ولهت على ابويه ومساندته لي... اول مره ابتعد عن ابويه هالفترة الطويلة..
طول عمري عايش حياتي صحيح لكن تحت ظله.. اعتمادا على نصايحه ومساندته..
الحين هو وين وانا وين..صح انا ريال وكبير ..
لكن مهما يكون وجوده بالنسبة لي ظروري...
يالله.. هي فترة خمس او اربع سنين.. وارجع للبلاد ..بشكل نهائي..!.
--------------------------------
نهاية آلبآرت آلـ [ 58 ! __DEFINE_LIKE_SHARE__

رهيفة القلوب · 07-28-2011, 02:38 PM

يلآ بنآتآت خلاص مآبآجي شششي !

آلنهآيهه قررربت ! __DEFINE_LIKE_SHARE__

رهيفة القلوب · 07-28-2011, 03:18 PM

آلبآرت آلـ [ 59 !
----------------------------
اليوم: الخميس..
المكان: بيت بو حمد..
الوقت: الساعة الرابعه والنصف عصرا..
----------------------------
(سيف)..

ظهرت عن حجرتي وانا اتسفر واتثاوب..
افف فيني رقاد ..
لكن ماعليه عشان مبارك خله يولي الرقاد...
نزلت من الدري ووصلت الصالة وشفت سيارة ناصر تدخل البيت..
ظهرت وكانت مهرة توها نازله من السيارة..
سيف: شو يايبنج كل يووم وييتي عندنا ! ..
وقفت مهرة مكانها وبرطمت بدلع... وناصر نزل وهو يبتسم..
ناصر: افا يا بو هناد جانكم عيزانين عنها تراني هب عيزان الا هي تحن تبا تيكم..
ابتسمت وتوايهت مع ناصر..
ناصر: ركبي السياره مهرة ركبي...
سيف:اوهوو محد يسولف وياكم انتوا..بس صدق والله غريبه ييتكم اليوم..
مهرة: اشوف صدقت عمرك انته..والا عشان حسابك في البنك انترس فلوس ! عنلاتك..مب يايه حق سواد عيونك يايه اتحنى.. والا نسيت ؟ ترا ماباقي عن العيد شي.!
سيف: اوهووووو الله يعينا على روايح الحنا..وبعدين شو هذا حسابي انترس فلوس شكلج حاسده !..وليش ماتتحنين هناك.؟
ناصر: قلت لها ماطاعت اون هني ترتاح اكثر وهناك تستحي تتحنى جدام خواني جنهم قاعدين مجابلينها 24 ساعه..!
مهرة: اووه عاد يا ناصر خلاص انا ابا اتحنى هني..
سيف: يااا نو بيغ ديل !
ناصر: عااااش..احتاس لسانك !
مهرة: لا يعلق على مبارك ..
سيف: على طاري مبارك... برايكم انا بسير مطار دبي ..
مهرة: مبارك بيي اليوم؟
سيف: هيه اجازه عيد اسبوع وبيرجع ..
ناصر: ياحيه والله.. يالله مهرة لا توقفين في الشمس دخلي داخل..نحن بنسير..
مهرة: اووكيييه الله يحفظكم..
دخلت مهرة عنا...
تطالعني ناصر بنظرة جادة..
ناصر: كلمتوا عمي؟..
تنهدت وانا اتذكر الموقف اليوم الصبح في المستشفى ..
سيف: هيه كلمناه..اليوم الصبح..طبعا حمد عقب ما ولع السالفه وكبرها وعق ابويه في المستشفى..رفض انه يتدخل في المسألة عشان يهديها...
ناصر: اوففففففف هذا اخوك حمد مادري شو فاكر نفسه..
حست انا بوزي بتأييد وموافقة... صحيح...حمد شو فاكر نفسه ؟ ..
ناصر: عيل انته وسهيل بس سرتوا؟
سيف: وراشد.. ادخلوا عليه راشد وسهيل اول بادي...فهموه السالفه وجذي..انا مابغيت ادخل عليه من البدايه عسب ما يتظايق يوم يشوفني.. ويوم فهموه السالفه كلها وراووه الاوراق والاعتذار الرسمي وخبروه بكل شي..تفاهم شوي..رغم انه تم متظايج.. عقب انا دخلت عاده واستسمحت منه...
ناصر: والحين كل شي تمام؟
سيف: الحمد لله...باجر بيظهر ان شاء الله من المستشفى عسب يعيّـد عندنا في البيت..
ناصر: اخيرله..الحمد لله يوم انه الامور تسهلت يابوك عفنا المشاكل...
سيف: هي والله...
ناصر: وانته مابترد بريطانيا؟
سيف: يااااااامن عاااااااااافها اسميني هب راد حتى لو سايرلها احوط ..
ناصر: ههههههههه..ليش ؟ ودراستك؟
سيف: الجامعات وايد الحمد لله وانا نسبتي تدخلني أي جامعه ابغيها..
ناصر: احسن لك واحسن لي بتفكني من حنة مهرة عليك..
سيف: هههههههه ليش يعني..
ناصر: دووومها تحن سيف وسيف حتى قمت اغار منك والله ...
سيف: هههههههه احسن..
ناصر: الله يوفقك ان شاء الله..برايك عيل ما بأخرك عندي كم شغله اخلصهن قبل الفطور..
سيف: تمام عيل....فمان الله..

طلعنا من البيت وكل واحد منا ركب سيارته...هو لاشغاله وانا ماسك طريج دبي الممل..
وطول الدرب وانا اتذكر شكل ابويه يوم دخلت عليه غرفته في المستشفى..
صحيح من عقب وفاة المرحومه امي صار اختلاطنا بابوي اقل...لكن حتى لو..
حسيت اني اشتقت له..اشتقت لنظرته ولحيته والشيب اللي مخالط شعره الاسود..
اشتقت لحواجبه اللي دايما معقودة بشكل يخوف..
دايما خوفنا منه كان هو سبب قلة اندماجنا ولجوئنا له..
والخوف اذا كان في نفس الانسان من الصغر..يكبر هالخوف معاه مهما كبر سن الانسان...
بس برغم كل هيبته حسيته منكسر وظعيف مع كل الاجهزه اللي كانت حواليه.. وشكل ابويه بين الشراشف البيظا..
ماتمالكت نفسي ساعتها من اني احظنه بقو..
صحيح انا رجعت الامارات وفكرة اني بريئ ومظلوم ثابته فبالي....
بس من شفت ابويه عرفت اني انا السبب فكل هذا...
حق شو اروح اغني واسوي حفلات؟...
صحيح ابويه كان موافق اني اغني بين ربعي بس...
بس احين دريت انه ماكان يبا يمنعني كليا... كان يتبع معاي سياسة المدمن اللي يعالجونه شوي شوي..مب مرة وحدة ...
انا السبب في طيحة ابوي... لو ماغنيت في هذيج الحفلة جان ماطلع صوتي وجان ماحصل حمد علي سبب يسوي منه مشكله...وجان ماطاح ابوي في المستشفى...
سيف: سامحني يا بويه ..!
انتبهت لنفسي وانا اقول هالجمله مره ثانيه بصوت عالي وانا اتذكر اللحظه اللي قلتها فاذن ابويه..
راس مالي هالابو.. وانا قررت اني ارفع راسه بدل ما اوطيه..

مسكت تيلفوني اتطالع المسج اللي مطرشنها لي مبارك مره ثانيه..
يقول فيها انه الطياره بتوصل ان شاء الله المسا حوالي الساعه 8.. زين..يواحيلي اشتري كم غرظ وافطر هناك وعقب بسير له..
-----------------------------
اليوم: الخميس..
المكان: بيت بو حمد..
الوقت: الخامسة والنصف مساءا..
-----------------------------
(مهرة)..

طلعت بصينية العصير من المطبخ ورحت بها للميلس ..
هناك كان سهيل.. وحسب ماقالولي حمد بعد توه واصل...مع اني مابغي اشوفه..ولا اريد اسلم عليه...
وفجأة بطلت عيني وابتسمت...صح والله!..ليش اسلم عليه؟..مالت عليه خله يولي بفشله ومابسلم..
فعلا بتصميم غريب يديد دخلت الميلس ابتسم لسهيل..
تطالعني حمد بنظره بارده بس قام عن الكرسي عسب يوايهني ...
وقفت بصينية العصير وفجأة تنازعت فيني الرغبات والافكار ... حمد وقف يسلم علي...اطنشه؟
خاطري اطنشه وافشله.....
خاطري احسسه انه مايسوى شي عندي...بس هل انا صادقه بهالمشاعر؟...مهما كان هذا اخوي العود..
واحيانا يعاملني زين...بس اغلب الاحيان لا...

نزلت عيني..حطيت صينية العصير عالطاوله عدال الماي و دلال الشاي والقهوه...
وتقربت من حمد ووايهته..
قال لي ببرود وهو يرجع لكرسيه ويقعد..
حمد: شحالج..يا ام مايد !!!!
التفت له سهيل وقال له بتهديد..
سهيل: حـــمـــد !!.
كان قصد سهيل انه " حمد لا تبدا"... لكن انا ماهمني..
وقفت ساكتة وعيني على حمد .. دقيقه وعقب قلت له بهدوء..
مهرة: تدري حمد..!..انا والله كنت معزمة حتى ما اسلم عليك ولا اعق عليك نظره ..لانه تصرفاتك معاي تثبت انك حتى نظره ماتستاهل..فمابالك بالاحترام كأخ عود ...!
انصدم حمد وسهيل بعد ..ومن صدمتهم ..ولا واحد منهم نطق بحرف..!
كملت انا كلامي دام الشجاعه بعدها فيني...
مهرة:... بس تدري.. نحن فشهر رمضان وياي علينا عيد.. والقطيعه بين الناس هب زينه..فما بالك بالاخوان.. وانت مهما كانت اخطاءك بتم اخوي العود..واحترامك علي واجب.. بس عالاقل..حاول انك تظهر بمظهر يخليك تستاهل هالاحترام ولو ظاهريا.. لاني مب مستعده اعيش حياتي وفي قلبي حقد على اخويه..

السكوت كان مخيم عالمكان..كلهم عيونهم علي ..متسائلين شو اللي هدني على حمد جي فجأة ...
صديت صوب الباب ناويه اني اطلع واخليهم...بس تذكرت الكلمه اللي قالها.."ام مايد"...
تذكرت عيون مايد وهو متعلقه فيني يوم خليته عند يدته وطلعت عشان ايي هني..ابتسمت وصديت مره ثانيه صوب حمد...
مهرة: ظنك يوم قلت لي ام مايد انا اعتبرتها مسبة او شي استحي منه...يكون فعلمك.. انا فخوره وايد ,وكل يوم احمد ربي انه خلاني ام لولد ماولدته...وبتشوف..كيف هالولد باذن الله بيرفع راس العايلتين..

بهالكلام تركتهم وطلعت من الميلس وانااتنفس بحدّة... صحيح مب هذي اول مواجهاتي مع حمد.. بس هي اول مره يسكت عني ويسمعني ..

وانا من قلب متظايقه من هالوضع معاه...
ليش مانكون مثل هالخوان اللي نسمع عنهم...ليش مانكون مثل اللي نشوفهم بالمسلسلات !!.. ونقرا عنهم بالقصص..؟..والا نحن غير عن الناس؟..
اففف...
رجعت البيت ودخلت الصالة وشفت الحريم متجمعات يترين الاذان يأذن..
عموه وشيخه وعفرا...ومعاهم مريومه الصغيره..
ييت وقعدت معاهم وبديت اصب الشوربه في اكواب الشوربه عشان تبرد..
آمنة: مهرة شبلاه ويهج محمر ومنتفخ...شفيج؟
مهرة: ماشي عموه..
آمنة: كل شي جاهز عند الرياييل؟
مهرة: هي توني وديت لهم العصير...
شيخة: انتي شكلج حد سمعج رمسه..!
عفرا: لا يكون حمد..!
مهرة: لا ماحد قال لي شي..مافيني شي..الساعه كم بتي الحناية؟
شيخة: قلنالها تينا امره عقب صلاة التراويح عسب يمدينا .. انتي بتيلسين لين في الليل صح.؟
مهرة: هي عيل اشو انا يايه حق الحنا..
عفرا: عوذ بالله جاملي شوي..!
مهرة: هههههههه...

بعد صلاة التراويح كنت انا اول وحده بدت بها الحناية لاني مضطره اروح يوم بييني ناصر..
كنت سرحانه... افكر فيه.. وبليلة امس..
وباعترافي المفاجئ باني احبه..
حسيت بالحراره ترجع لويهي وانا اتذكر كيف كانت حالتي وحالته .والفرحه اللي طفحت من عيونه..
وبالراحه النفسية اللي حسيت بها انا يوم قلت له هالكلمه..
حسيت اني هديت حواجز وايده كانت بينا..
وهالشي بين في ويهه وتصرفاته من قلت له هالكلمه للحين..
يت شيخه قعدت عدالي...
شيخه: خلصتي ايد ماشاء الله..اشوووف...
راويت شيخه حنى ايدي..وانا ابتسم..
شيخه: اللـــــــــــــه رووووووووووعه.. ااه اقولج... (كانت تكلم الحناية) انا ابا سيم سيم هذا بس نقش اكبر شوي..
مهرة: شو تبين بالعود احلى الناعم !
شيخه: حبيبتي على ايدج حلو الناعم انتي بروحج نتفه صغيروونه ما ايوزلج العود...بس على ايدي بيطلع زين..!
ضحكت على شيخه.. مسويه عمرها ضخمه عندي ومناك هي ولا شي..صحيح انا ضئيلة وايدي صغيره بس هي بعد هب ذاك الزود كبيره بالعكس مقاساتها حلوه كلها على بعضها..!
شيخة: انتي خليتي مايد عند يدته؟
مهرة: هي فديته.. يالله يا شويخ لو شفتي عويناته وهي متعلقه فيني تطالعني وانا ظاهرة من الباب...مب هاين علي..
تأملت فيني شيخة شوي..
شيخة: تعلقتيه بسرعه !
مهرة: لو تشوفينه انتي بعد بتتعلقينه..
ابتسمت شيخه مب قادره تعارض او توافق على شي..بكل بساطه هي تحاول ماتدخل ...
مهرة: تدرين انه مبارك بيوصل اليوم الامارات؟..
شيخه: واللـــــه.!!
مهرة: هيه سيف فدبي من العصر ساير اييبه..
شيخه: ياحيه يوم بيعيد عندنا...احسن له عن هناك القطعه..
ابتسمت ...
مهرة: شيخه...تذكرين ؟؟
فهمت علي شيخه وابتسمت بعد..
شيخة: هيه اذكر.. بعده الوضع على حاله؟..
ابتسمت مره ثانيه وقعدت فبالي اقارن بين الوضع الحين وقبل...بين حبي لناصر وحبي لمبارك....

فرق كبير...وشاسع..!
مهرة: وييه يا شيخه...كنت هبله..ولا اعرف شي..
شيخه: والحين تعرفين؟..
مهرة: هههههههه هيه..اعرف كللللللللل شي..
شيخه: اشـــــك !!! ههههههههه
مهرة: ههههههههههههه ماعليه انزين يالدبه..!
شيخة: جد جد...افهم من كلامج انج تقبلتيه؟
مهرة: آآآه يا شيخه.. تعالي بصاصرج...
تقربت مني شيخه وهي تضحك وانا اصاصرها عسب ماحد يسمع..
مهرة: امووووووووووووووت فناصر...

ابتعدت عني شيخه وهي تضحك..
شيخة: الله يديم عليج يارب..
مهرة: آآآآآآمييييين...

قلتها من قلبي..واعنيها.. يارب لا تغير علي فرحتي وراحة بالي..
----------------------------------
اليوم: الخميس..
المكان: مطار دبي
الوقت: الثامنة و خمس و أربعون دقيقة
---------------------------------------
(مبارك)..

كنت ماسك شنطتي وبعيني ادور سيف بين الناس في المطار...
ومن شفت ويهه المبتسم لي من بعيد ابتسمت انا بعد بشكل مغناطيسي وسارت خطواتي لين وصلت لسيف..
لويت عليه بقو وانا مب متخيل اني تولهت عليه هالكثر..
يالله شكثر ترك فراغ ..!!
مبارك: لك وحشه يا كلب ..!
سيف: هههههههه حتى انته يالقطو.. الحمد لله عالسلامه..
فجيت عنه وابتعدت وانا اضحك واتامل ويهه..
مبارك: الله يسلمك..شحالك وشو حال اهلك..شو حاله ابوك؟
سيف: شوي شوي.. هات شنطتك خل نطلع عن هالزحمه وعقب تخبر عن اللي تباه..

في السيارة ...
مبارك: لا تسرع ..شوي شوي..خل اجحل عيني ..!
سيف: مايسوى عليك ياخي ادرس هني احسن..
مبارك: نو..!
سيف: بل..رفض قاطع..
مبارك: no offense but.. .. لا تقارن شهادة بريطانيا بشهادة جامعات الدولة..!
سيف: والله عاد دولتنا سوت اللي تقدر عليه..! احمدوا ربكم..
مبارك: ماقلنا شي.. المهم شو صحته ابوك وشو السالفة اللي خليت عشانها الدراسه ورديت؟

تنهد سيف وهو يقول لي كل اللي صار من اخر حفله وشو صار لين طيحه ابوه والاعتذار الرسمي..
مبارك: ياريال ..!!..لو انا والله ما اتنازل وارفع عليهم قضية !.
سيف: مانصحني المحامي..ومابغينا نسويها سالفه عوده ونلفت نظر اللي مادرى عنها...وانتهى الموضوع على خير..الحمد لله يابوك انه ابويه بخير ماريد شي غير هذا..
مبارك: هي والله تستاهلون سلامته..ومتى بيظهر؟
سيف: باجر ان شاء الله..بيعيّـد في البيت.
مبارك: يا حيه والله.. وشحالهم خوانك وربعك..
سيف: كلهم بخير وسهاله... وانته علومهم ربعك مناك؟
مبارك:مقلع هذيلا ما اييهم شي !..
سيف: هههههههه جان اضحك !....وعلومها ام السماوي ؟

بطلت عيني والتفت لسيف متفاجئ...
مبارك: شو؟.
سيف: شو بعد شو؟..بنت المطاعم !.
ضحكت وانا اتذكر مها ...
مبارك: قصدك بنت راعي سلسلة المطاعم في لندن..
سيف: المهم عرفت منو اقصد معناته انها في البال..عنلاتك من وراي يالقطو..؟
مبارك: شو من وراي وجدامي بعد حوووه انته ماصار شي يذكر..
سيف: نصــّــاب ومـحتال انته ..
مبارك: هههههههه والله العظيم لا تقعد تالف..
سيف: اكيــــــــــد !!.. ترا اذا اكيد تراك انسان تعبان ماتعرف تتحرك..
مبارك: عرفت اسمها بالصدفه بس سمعت وحده تزقرها.. وبعدين ليش اتحرك؟.. I don’t want any complications right now…
سيف: لا تقعد تتفلسف علي..!
مبارك: ياخي الشغله هب غصب..

وعلى هالحال مغايظ وسوالف طول الدرب للعين...
نزلت من السياره جدام البيت وانا اتلفت للحاره واستذكر كل اللحظات اللي مرت بي في خلال قعدتي في الامارات.. بصراحه كانت ايام وايد حلوه...
دخلنا بيت عمي بو حمد لانه ابويه عنده جراحه على ما اذكر واكيد في المستشفى وقافل البيت..
في الميلس حصلنا سهيل وحمد وواحد من ربعهم..
مبارك: السلام عليكم..
نشوا وهم فرحانين بشوفتي ..وعقب السلامات ردينا يلسنا وانا احس بتعب من طول الرحله..
سهيل: شحالك مبارك؟ شو الرحله..
مبارك: تعب والله خصوصا لانه رمضان وصوم بس ماعليه خطف.. تستاهلون سلامة الوالد..
سهيل + حمد: الله يسلمك..

وبعد ساعه سوالف.. طلع حمد من البيت مع ربيعه.... وتمينا انا وسيف وسهيل..
وبعد دقايق...
حسيت بقلبي ينقبض..بشوفة مهرة تدخل من باب الميلس...
دخلت مبتسمه..مستانسه..حسيت انه ويهها الطفولي يشع..
مهرة: السلاااااام عليييييييكم ...مرحبا الساع باهل بريطانيا..
ابتسمت وانا اوقف اسلم عليها وفي نفس الوقت مستغرب من طريقتها بالكلام... هذي هب مهرة الخجوله اللي تركتها ورحت بريطانيا عنها.. صدق من يقول..العرس يعطي البنت جرأة !!!!!
مبارك: وعليج السلام مرحبابج...
مهرة: شحالك مبارك؟ الحمد لله عالسلامه..
مبارك: الله يسلمج انا بخير وسهاله انتي شحالج عساج بخير..
مهرة: والله بخير الحمد لله مانشكي باس..
مبارك: علوم العرس وياج؟..
مهرة: هههههه كل شي تمام..شو السفر ان شاء الله زين.؟
مبارك: تعب والله شوي مابقص عليج بس الحين مرتاح دامني في البيت..
مهرة: هيي ياحيك يوم ييت تعيد عندنا احسن لك عن القطعه هناك..
مبارك: ماشي قطعه انا عايش طول حياتي هناك..واعرف ناس هناك اكثر عن اللي اعرفهم اهني..
حركت مهرة ايدها بشكل لا مبالي وهي تقول..
مهرة: يعني انته تعرف شو اقصد...!
من حركت ايدها وانا عيني على الحنا...
مبارك: الله الله عالحنا..متحنين بعض الناس..
مهرة: لازم عيد..
وشقت مهرة ثمها بابتسامه وسيعه وهي تمد ايدها لسيف..
مهرة: حلوو صح؟؟؟؟
بعد سيف راسه...
سيف: لا تغايظين..!..تعرفيني ماحب ريحة الحنا قومي مناك...
مهرة: ههههههه انزين شوف شكله..لا تشمه...حلوو؟
سيف: لا يلوع بالجبد...
مبارك: ماعليج منه حلو..

هي تدخل سهيل وسال مهرة..
سهيل: ناصر بيي يشلج والا تبين حد يوديج؟
مهرة: لا هو بييني, قال بيقضي كم شغله وبيتصل..ظنتي الا في السوق تعرفهم انته الرياييل لين اخر يومين مايسوون شي للعيد..!
سيف: والله فيه ناس هني باجر مابنشوفهم كليا بسبب المشترى المأجل..!
التفت لسيف بابتسامه..
مبوني مقرر اروح بروحي بس عناد فيه بسحبه وياي...
مبارك: ماقول غير الله يعينا انا وانته يا سيف على الدواره باجر..
اعتفس ويه سيف ومهرة قعدت تظحك عليه ..
وانا ماقدرت اقاوم اني اتامل فويه مهرة..وقلبي يقرصني ويلومني..
ليش ما استغليت فرصتي وياها.!.
ليش ماحسيت بغلاها عندي الا عقب مافقدتها...!
ليش احس بالغيره من مجرد اني اتطالع فويهها.. لمجرد احساسي بانه مصدر فرحتها وراحتها هو ناصر .!
ابتسمت وانا انزل عيني للارض...
باختصار ..مهرة مب مكتوبة لي... ومافي شي ماقدر اتخطاه.. والحياة جدامي وانا باول شبابي...
----------------------------
اليوم: الخميس..
المكان: سيارة ناصر..
الوقت: العاشرة والربع مساءا..
----------------------------
(ناصر)...

طلعت من الحلاق وانا ماسك سفرتي بايدي... وبايدي الثانيه ماسك التيلفون واتصل بمهرة..
اعتقد بسها من القعده.. ولازم نرد البيت...
بعد كم رنه.. خفت انها فارة التيلفون مره ثانيه..عاد هالمره بذبحها...كم مره محذرنها ماتعقه..
لكنها ردت علي اخيرا وفي صوتها ضحكه...
مهرة: مرحبا..
ناصر: هلا الغاليه.. علومكم..؟
مهرة: والله بخير الحمد لله..انته وين؟
ناصر: توني ظاهر من الحلاق.. تحنيتي؟
مهرة: هي تحنيت وخلصت..انته خلصت شغلك؟
ناصر: هي .( وسمعت اصوات عندها).. منو هذا؟
مهرة: ههه سيف منو غيره يلعلع..!
ناصر: رد من دبي ماشاء الله؟..
مهرة: هي... بتيني؟
ناصر: هي بييج... يا مبارك ؟
مهرة: هيي..شو بلاك تتسأل ؟
ناصر: وانتي يالسه عندهم الحين؟
مهرة: هيه..!!!!
سكت وانا متنرفز...
اولا..تاخرت بالرد علي لانها مشغوله بالسوالف معاهم...
ثانيا.. في صوتها ضحكه وهي ترد يعني مستانسه بالسوالف..
ثالثا ..وتشوف هالموضوع عادي جدا وتسالني ليش اسال !!!!
تنهدت وانا متظايق...احين شو تبابه مبارك تقعد عنده؟ قلنا ولد خالها وياي من السفر..اوكيه تسلم وترد البيت ليش تقعد عنده؟؟؟؟؟
مهرة: ناصر..شفيك؟
ناصر: ماشي..تجهزي عشان بعد خمس دقايق جي بوصل البيت وبشلج..والا ماتبين تردين؟
مهرة: طالع ... كيف ما ابا ارد بعد؟
ناصر: قلت يمكن تبين تباتين؟..
حسيت انه مهرة قامت من مكانها وطلعت لانه الاصوات اختفت..
قالت لي بصوت ناعم..كعادتها يوم تدلع علي..
مهرة: عايفني ناصر؟؟
ناصر: لا بس اشوفج مستانسه.. __DEFINE_LIKE_SHARE__

رهيفة القلوب · 07-28-2011, 03:20 PM

مهرة: يعني ما استانس بشوفه اهلي؟..
ناصر: انا ماقلت جي..!.
مهرة: اذا تباني ابات ببات..!!!

انقهرت... يعني ماعندها مانع .!!!..وهذي امس تقول تحبني...شكله الحب طار...! بس انا هب ناصر ان خليتج تباتين ومبارك هناك !!!!
ناصر: تجهزي لاني بيي اشلج الحين...باي..
سكرت عنها وانا متظايج..
وفريت سماعه تيلفوني عالكرسي الثاني بتملل..
مب عارف كيف بتصرف معاها او مع مبارك يوم بشوفه..
بس قررت اهدا في الوقت الحالي..
وعقب بتفاهم ويا مهرة وبقولها انه هالشي ما ايوووزلي انا...!!.

وصلت بيت عمي ونزلت من سيارتي ودخلت الحوش من الباب الصغير.. ومن هناك دخلت الميلس..
ناصر: هوود !!.
سهيل: هدا..اقرب ناصر محد غريب..
دخلت الميلس وانا اشوف سهيل وسيف ..ومبارك ..!
ناصر: السلام عليكم..
ردوا علي السلام وانا سلمت على الكل وعلى مبارك ..
ناصر: الحمد لله عالسلامه مبارك..شحالك وعلوم الدراسه؟
تظاهرت بالبرود وانا فقلبي غيظ... ويمكن انا حساس زياده عن اللزوم لكن حتى نظرته هو لي كانت بارده..!
يلست معاهم شوي وسويت لمهرة رنه... عشان تعرف اني موجود وتطلع..
سهيل: ها شو اشوفك مستعيل.؟
ناصر: هي والله يبالنا نرد البيت..
سهيل: ياريال بتفاول انزين..
ناصر: اكرمكم الله ان شاء الله وقت ثاني احين هناك في البيت يتريونا..

بعد دقايق وقفت مهرة عند باب الميلس ونشيت انا وسلمنا عليهم وظهرنا..
كل واحد منا ويهه منغلق على بعضه ومتظايجين...
في السياره تمت مهرة ساكته .. وانا بعد تميت ساكت.. وكل ما التفت لها بطرف عيني احصلها مبوزه وتلعب بشيلتها او شنطتها...

بعد دقايق وصلنا البيت.. نزلت مهرة قبل ما انا انزل .. التفت انا ورا وشليت الاكياس ونزلت...
يوم دخلت الصالة شفتها تسلم على امي وتقولها..
مهرة: عموه بغسل ايدي عن الحنا وببدل ملابسي وبيي اشله عنج..تعبناج اليوم ..
ام محمد: لا فديتج ماشي تعب ولا عباله ..ومايد فديته مايغث ..
ناصر: السلام عليكم..
ام محمد : وعليكم السلام ..هلا الغالي..
ناصر: هلا بج زود امايه...بسير اتسبح انا..
مشيت صوب الدري وحسيت بمهرة وهي تتبعني..
طنشت ..

في الحجره.. كنت انا مجابل الكبت اطلع لي ملابس..ومهرة دخلت الحمام تغسل ايدها من الحنا اللي كان يابس اصلا..
ويوم طلعت وقفت عدالي وتساندت على باب الكبت وهي تطالع ويهي..
مهرة: ليش هالزعل كله..!
سكرت باب الكبت ..
ناصر: مب زعلان..

ابتسمت مهرة وتقربت مني بجراة وهي تفج معاقم كندورتي...
على طول انعفس حالي..
قالت مهرة بدلع..
مهرة: آه يعني تبا تقولي انك ما اغتظت ولا غرت يوم دريت اني يالسه مع مبارك اسولف..؟
قلت لها بزعل على ويهي..
ناصر: دامج تعرفين ليش عيل تسالين؟ ليش اصلا من الاساس تسوين هالشي..؟ وبعدين ليش قاعده تفجين معاقم كندورتي..قومي..!!!
ومسكت ايدها وبعدتها عني وعن كندورتي..
ردت مهرة مسكت كندورتي بعناد..
مهرة: اولا ..اسال عشان اتاكد...ثاني شي ..ماتوقعتك تغار من مبارك.. ثالث شي انته تراك قلت بتتسبح..!!

رديت ابتعد عن مهرة وانا متظايق وقعدت عالكرسي..
ناصر: مهرة لا تستخفين بالموضوع..شو يعني مبارك مب ريال..؟
يت مهرة ويلست عدالي بس بدون ماتلمسني هالمره..
مهرة : بلى ريال.. بس مبارك عمره مانظر لي نظره مب بريئه..ويعتبرني اخته..
ناصر: وانتي شدراج؟؟
مهرة: لانه كم مره قال لي اني اخته..ويتصرف على هالاساس..
ناصر: عاد انا مايخصني.. قايلج من قبل من يوم طلعتي لراشد اني ماحبج تكثرين سوالف.. انا مابمنعج عنهم ..اطلعي سلمي بس هب تستقعدين وتسولفين.. انا اغار ..!!!
مهرة: صدق والله؟؟؟
كانت مهرة تبتسم مستانسه وانا مغتاظ..!
ناصر: هي اغار !.. وياويلج ان سويتي هالحركه ثاني مره .!!
مسكت مهرة ايدي الثنتين وشدت عليهن شوي..
مهرة: خلاص خلاص مابقعد اسولف وياهم مره ثانيه توبه توبه..بس لا تزعل عليه جي والله حسيت بقلبي انعصر يوم حسيتك زعلان علي !!!

في خاطري كنت اتفداها واتفدا قلبها اللي تقول انعصر بس من برا كنت بعدني اظهر الزعل عشان صدق اتوب عن هالحركه..
نزلت عيني ليديها اللي ماسكه بهم ايديني.. وسحبتهن اتطالع الحنا..
مهرة: حلو؟
ناصر: مثلج..
ابتسمت..
مهرة: يعني؟
ناصر: ناعم..
مهرة: بعدك زعلان علي؟
ناصر: اذا وعدتيني ..لا
مهرة: خلاص وعدتك قلت لك توبه.. وهاي فوقها بعد..
تقربت مني وباستني على خدي بقو نفس بوسه اليهال...
خلتني اضحك غصبن عني...بطريقتها كيف تراضي وكيف لوت على راسي وباستني بقو...صدق انها ياهل..!!
ناصر: فديت قلبج والله...بدخل اتسبح انا..
مهرة: اوكييه..

شليت ثيابي ودخلت اتسبح...والبسمه مافارقت ويهي.. يازينها ويازين حركاتها..!
---------------------------------
اليوم: الجمعة.
المكان: مستشفى (...)..
الوقت: الثامنة والنصف مساءا..
--------------------------------
( راشد)..

دخلت انا وسهيل المستشفى وتوجهنا لغرفة خالي بو حمد ..
كان الدكتور عنده يوم دخلنا وسلمنا عليه..
سهيل: هاه ابويه شو الهبات ! اهون اليوم؟
بو حمد: الحمد لله..
راشد: والله انا اشوف ويهه انه بعده شويه تعبان ويباله راحه..
سهيل: هي عاد ابويه ماشي مزرعه وعزب ورجاب..بسك ارتاح في البيت..
بو حمد: يصير خير..
راشد: ههههههههه..خلاص فهمنا ..
حاس سهيل بوزه وهو محتار كيف يقنع ابوه يرتاح في البيت ...
كنا طول الدرب ونحن يايين وانا اوصيه واوصيه على ابوه..راس مالهم هالابو .. واذا فيه مشكله عندهم مايحتاج يصدعون راسه بها..لانه هم كبار كفاية يقدرون يحلون مشاكلهم بروحهم..

بدون مايدخلونه بها ويتعبونه... احين هو كبير والمفروض يريحونه من كل شي..
وسهيل مسكين يوصيني خير...
تجهز بو حمد وطلع من المستشفى ونحن وياه... طبعا ماطاع حد منا يسنده او شي من هالنوع..
ماكان يحق..
يكفي انه معصب لانهم ماخلوه يصوم من دخل المستشفى...
احيانا الشواب مادري كيف تشتغل عقولهم !.

وصلنا البيت ...كان سهيل يسحب ابوه صوب البيت..
سهيل: يابويه الله يهديك لاحق عالقعده...
بو حمد: هدني يا سهيل بقعد في الميلس شوي عيزت من كثر ما انا طايح في المستشفى .. خلاف بروح ..

وراح بو حمد الميلس ورحنا معاه..
يلست عنده حوالي نص ساعه...وعقبها يا حمد..وصادف اتصال منى..
سحبت عمري برا الميلس..
راشد: مرحبا...
منى: هلا راشد..ها علومك.؟
راشد: الحمد لله ..تونا مطلعين بو حمد من المستشفى.. ومستقعد لهم في الميلس هب طايح يروح غرفته..
منى: ههههه حليله تلقاه متوله عالبيت...تستاهلون سلامته عيل..
راشد: الله يسلمج..علومج انتي...
منى: شلة الانس عند عمتي ..
راشد: هههههههه ولاعت جبدج وييتي فوق...
منى: هي اكيد..محلاتني مجابلتنهن...متى بترد البييييت؟
راشد: بعدني شوي..
منى: انزين لا تنسى اللي وصيتك عليه...يبته؟
راشد: فظيت ثرني عشان اييبه..لازم اليووم؟
منى: هي راشد بلييييييييييز بليز بليز لازم اليوم..
راشد: وايد جبن في البيت لازم هالنوع من الجبن؟؟؟ اما وحامج غريب..
منى: يالله عاد لا تستقعدلي تعليقات احين راشد !..عشاااااااااانييييييي...
راشد: ان شاء الله..يوم بوصل الجمعية بتصلبج..
منى: فديييتك شكرا يعلني ماخلى منك والله..
راشد: ولا منج ان شاء الله..تبين شي ثاني..
منى: سلامتك بس..
راشد: الله يسلمج..يالله انا برد عندهم..
منى: اوكييه..مع السلامه.

سكرت عن منى ودخلت الميلس مره ثانيه...شوي وبدخله سيف ومبارك شالين اكياس..
سهيل: هاااه..في الوقت الضايع!!!
سيف: عزر علينا يابوك... ابوووووووووووووويه ! ياهلا والله ومرحبا ..
سلم سيف ومبارك على بو حمد وطولوا بالسلام.. خصوصا بو حمد طول مع مبارك يتخبره عن احواله ...
وسلمت انا بعد على مبارك لاني ماشفته من رد من السفر...

وعقب ماقعدوا..
مبارك: زين منـّـا انه خلصنا الحين بعد...زححححمه السوق ماينطاح..
راشد: ليش ماجل مشترى لين احين؟..
مبارك: عاد ما مدالي اشتري وامس ييت تعبان ..المهم اني خلصت..

كانت القعده حلوه.. وماشي مواضيع حساسه ونقاشات صارت..
ياريت لو يتم الوضع على حاله دوم بينهم...
هذا رمضان وخطف..الله يعوده ان شاء الله..
------------------------------------------
اليوم: السبت..
المكان: بيت ام سلطان..
الوقت: الساعه العاشره والنصف صباحا..
------------------------------------------
( كنة)..

كالعاده كنت مسنتره جدام الدريشه في ميلس الحريم دامه فاظي ومسكره الباب...
احس اللي يمرون جدامي في الحوش كانهم اشباح مافي حد مميز للحين.
لين ماظهرت سيارته وهي تدخل من الباب الرئيسي للبيت...
شهقت بشكل لا ارادي..
وانا اتحرقص اترياه ينزل.. والغلس غلس كعادته..قعد في السياره يرمس في التيلفون ..
حسيت خلايا شعري تحترق !
منو يكلم؟؟؟

بس طبعا الشكوك تبخرت كلها يوم نزل "بكامل اناقته" اذا كان ينقال عن السفره والعقال اناقه..!!
كنة: آخ ياويل حالي...يا ناس ليش احبه جي!..هالريال مسوي فيني عمل وناسي الظاهر !.

شفت بعدها بدون تركيز ناصر ومهرة ومعاهم مايد وهم يدخلون.. شكلهم يايين مع بعض بس كل حد فسيارته..

وقبل ما ابتعد عن الدريشه انفتح الباب ودخلت عويش اختي..
كنة: خسج الله طيحتي قلبي .!..بطلي الباب شوي شوي..او دقي...
عايشة: ليش ادق يعني مثلا بتبدلين ملابسج هني والا عندج موعد غرامي...!
شهقت ..مش من وقاحه عويش..بس لانه صوتها عالي ويوسف في الصالة !!!!!!!!
كنة: تواعدتي ويا جنـّي قولي امين..يالخسفه صوتج عالي شو تبين؟
عايشة: اوفف..انا مادري ليش يطرشوني دوم...امايه تقول ظهري سلمي..!
كنة: شو اسلم استحي !
حاست عويش بوزها بقهر..
عايشة: عشتو !!..نــقـــعــــي عيل !
وخلتني وراحت !!
تميت في صالة الحريم اتحرقص روحي...
مب عارفه اطلع او لا...
مادري ليش اليوم احس اني استحي اطلع..يمكن لاني من زمان ماشفته..
يمكن لانه عرسنا قرب..!
وانا غرقانه بافكاري دخلت امي علي..
ام مايد: شعندج ؟ عمتج وعيالها كلهم في الصالة وانتي هني؟ عيب عليج..
كنة: اماااياااا !!...ماااريييد..!
ام مايد: ليش!! شو مستوي مب عادتج.؟
كنة: امايا استحي..
امايه تمت اطالعني مستغربه..
ام مايد: ودري عنج الخريط ويالله اظهري لا ينقدون عليج..
كنة: يوم بيسير يوسف..بطلع..
ام مايد: يابنتي عييب !!ماتعرفينه يوسف يعني انتي بيحط فخاطره..!
تميت انا مبرطمه..ادري انه حساس وبيحط فخاطره.. بس مافيني شده على نظرات الكل لنا يوم بسلم عليه...
كنة: انزين..!

مشيت ورا امي بتثاقل..اسحب ريولي سحب..وكل ما اتقرب من الباب احس برعب فظيع..!!
واخر شي تراجعت لنص الميلس الصغير...
كنة: مابا مابا..استسمحيلي منهم بس ماقدر اظهر الحين..

تطالعتني امي بنظره معصبه وطلعت عني..
تقربت من الباب اتسمع...وسمعت امي تقولهم وفي صوتها ضحكه " تقول تستحي..مادري شفيها!"

لا اراديا رفعت ايدي وصفعت خدي...ياااااهي مصيبه شو هالحركه الواضحه يا امايه الله يهديج !!!!
فضحتيني...احين لا مجال اطلع عاد..

يلست في الميلس بروحي لين الله يفرجها..يا يخوز المستحى..يا يخوز يوسف من صالتنا ..!!
---------------------------------------
اليوم: السبت..
المكان: بيت ام سلطان..
الوقت: الـ 11 صباحا..
-------------------------------------
(يوسف)...

بصراحه ماكنت مغتاظ وايد من حركة كنة...بقد ماياني شعور غريب بالتعاطف معاها..
كنه مابتستحي مني فجاة الا بسبب..
شكلها توها حست بس بالرابط اللي بينا..
وبانه نحن مب مجرد عيال عم لكن مخطوبين لبعض وبعد 3 شهور بنعرس..

يوم يت عمتي ام مايد وقالت انه كنه مستحية تطلع... حسيت العيون كلها تسلطت علي فجاة..
وكل اصابع الاتهام صوبي باني انا سبب مستحاها ...
هالشي خلى ويهي بروحه ينصبغ بالاحمر...!..
وماكنت كليا اشارك بالسوالف...كنت يالس اخطط كيف اشوف كنه؟؟؟ وهي حابسه عمرها في الميلس مال الحريم.. والميلس مال الحريم مجابل الصالة.. كيف اشوفها؟
افف شكله مافيه امل...
التفت لناصر وانا اسمعه يقول لمهرة اللي قاعده عداله من الصوب الثاني..
ناصر: هيه شوفيها؟
مهرة: ورا باجر عاد؟ ماخبرتني..!!
ناصر: عاد هذا الحجز اللي حصلته..ونحن متفقين..
وبعد دقايق عرفنا شو الموضوع...
ناصر: تراني انا ومهرة ومايد بنسافر ورا باجر..
الموضوع هذا حصل اهتمام من الكل..
لكن محد اعترض بالعكس شجعوه...لانه كلنا نعرف انه المسكينه مهرة توها عروس وماتهنت للحين..
ام محمد: وشو تبا بمايد خله عندنا وروح انته وحرمتك..
ناصر: لا امايه ما اقدر..اهله هناك يبون يشوفونه..ويده ابو امه بيسافر يسوي عملية ويبا يشوفه بسرعه..
ام محمد: عاد انا قلت عشان تاخذون راحتكم اكثر..
مهرة: لا عموه مايد فديته مايغث..
ناصر: لو السالفه مافيها اهله جان خليته هني..بس عاد ماقدر هم لهم حق بعد يشوفونه..
ام سلطان: والله يا ولديه بقولك الصدق ..اسميك انك بليت عمرك بهالعرس الاولاني..
ناصر: عاد يدوه هذا اللي صار ومكتوب..
ام سلطان: هيه كل اغلاطكم تعقونها عالقدر والنصيب والمكتوب..
ناصر: يمكن انتوا تشوفونها غلطه بس انا هب ندمان...
يوسف: احين مايحتاج انتوا ترمسون في الموضوع مره ثانيه ماصدقنا نفتك منه..!اللي صار صار..
تدخل اخوي محمد في الموضوع..
محمد: شو رايك نرمس في ملجتك.!!
يوسف: انا موافق متى؟؟ باجر؟
محمد : بل ..مستقطع...!
ام مايد: انا ماعندي مانع لو اخوها موافق..
مايد: ولا انا عندي مانع..
ام مايد: بس سحيلة هب طايعه..!

ضحكت فخاطري وانا اعرف انه كنه قاعده تتسمع من ورا الباب وقاعده تتحرقص..وعادي تسويها في أي لحظه تطلع..
ام سلطان: صدقها بنتي...شووو له الملجه.؟ يوم انته تعرفها وهي تعرفك حق شو تملج؟ شو بيفججنا منك لو تملج كل يوم بتنقز لنا هني.!
يوسف: افاااااااااااااااااا يدوه!!!! عايفتني شوووو ؟!.
ناصر: لا هب جي ...يدوه تغار.. تباك تي بس عشانها هي..
يوسف: مب مشكله ..باقي عالعرس 3 شهور...اقدر اصبر شهرين..بس عاد في الشهر الثالث بملج....قولوا بعد لا؟ ملجه شهر مب مشكله...
ام مايد: في اخر شهر عاد بتكون مشغوله بالتجهيزات ما بتفظى لك..
يوسف: راضي..
ناصر: دامك بتصبر شهرين اصبر الثالث..انا ما ملجت الا قبل باسبوع وبعد ماشفتها الا فليله العرس يعني عرس تقليدي مال اول...
التفت انا لناصر بنظرة تهديد...
وقلت له بصوت واطي مايسمعه الا هو ومهرة..
يوسف: لا تخليني اتكلم واخرط كل ظروف عرسك !..
ناصر: بل عليك ..سيده بتخوني؟
يوسف: عيل لا تخرب علي..
ام مايد: مانقدر نقرر قبل مانشاور كنة.. بتاكلنا بقشورنا..
يوسف: يييه دام بتردون الشور لكنه عيل ماشي ملجه..
ام مايد: وين بتسوون عرسكم انزين..؟
ام محمد: والله يا ام مايد نحن عربنا وايدين وماتيوزلنا الفنادق..بنسويه في الخيمه العوده..
ام مايد: صدقج...عاد يباله حجز من اول ...
ام محمد: بتشاور بعدني ويا بو محمد عشان نحدد موعد زين..وخلاف ان شاء الله بنسير نحجز وبندور تاريخ قريب من الثلاث شهور..
التفت لي ناصر...وهو يبتسم ابتسامه مغايظ..
ناصر: يووه ماشي وقت ثلاث شهور بس ..!..تلحلح فصل فستان..مايمديك.
يوسف: اسمحلي بس ماقدر اقرر قبل ما احصل مصمم زين..

بعد نص ساعه ثانيه من السوالف فقدت الامل كليا بشوفة كنة.. قمنا نحن الشباب انا وخواني ومايد ولد عمي ورحنا الميلس كعادتنا كل عيد..
ياخسارة ..فلست من شوفة كنه وكشخة العيد ..!
---------------------------------
بعد يومين..
---------------------------------
اليوم: الاثنين
المكان: بيت بو محمد..
الوقت: الثانية عشرة ظهرا..
---------------------------------
(مهرة)...

نزلت من الغرفه وانا لابسة عباتي وجاهزة..
كان ناصر وكل اهله موجودين في الصالة..
ناصر: خلصتي؟..
مهرة: هيه..
ناصر: انزين الشنط كلهن في السياره..
بو محمد: يا ناصر شو كاظنك تغدوا وسيروا .!
ناصر: ابويه الله يطول لي بعمرك مانقدر الطياره الساعه 3 ولازم نطلع من الحين مايمدينا ...ان شاء الله بنتغدا في الطريج...

ام محمد: انزين مايخالف بس لا تنسون تطمنونا يوم توصلون بالسلامه..ماوصيك..
ناصر: ان شاء الله امايه لا تحاتين اول مانوصل بنتصل...
سرت انا صوب ميثا حرمة محمد وخذت مايد من عندها من عقب مارتبت لبسه شوي..
مهرة: يالله عيل نسلم عليكم ..

الدقايق العشر اللي طافت كانت كلها سلامات وتوصيات ..
سلمنا عليهم وطلعنا انا وناصر لسيارة يوسف اللي كان متكفل يوصلنا..

الساعه ثلاث الا عشر دقايق نحن كنا في الطياره..
حسيت بطني ينعصر..
الجو غريب في الطياره..
مهرة: اويييييييه ناصر...
ناصر: شو بلاج؟
مهرة: اول مره اركب طياره...اخاااف.!
ناصر: هههههه لا تخافين ولا شي كلها كم ساعه ونوصل ان شاء الله..
مهرة: انته خبرتهم هناك انه نحن يايين؟
ناصر: لا..يوم بنوصل هناك ان شاء الله بتصلبهم..
مهرة: هم من متى ماشافوه؟..
ناصر: من توفت سعاد الله يرحمها..يعني شافوه وهو توه مولود قاصر في الحظانه حاطينه..

تاملت فويه ناصر وشفت فويهه زعل..ساعتها ماحسيت بالغيره لكن تفهمت موقفه كليا..
مهما كان سعاد كانت زوجته اختارها بارادته واكيد انها انسانه زينه يوم يابت ولد مثل مايد..
مهرة: الله يرحمها .. بس تراني هب سايره وياك بيتهم..
ناصر: ليش؟..تعرفي عليهم..اكيد يبون يشوفون اللي بتربي ولدهم من عقب سعاد..
مهرة: لا احس انهم بيزعلون ..واشوفها وقاحه بصراحه اني اسيرلهم...سير انته ومايد وانا بقعد في الفندق..
ناصر: هممممم... على راحتج..ولو انه مب حلوه اخليج في الفندق روحج..
مهرة: لا عادي ..بنشغل والا برقد ولا بسوي أي شي لا تحاتيني

سكت عني ناصر والتفت صوب مضيفات الطيران..بشكل لا ارادي تم يراقبهن..
حسيت بالقهر والظيج كأنه الكرسي اللي قاعد عليه انا شبت فيه الظو...!

مهرة: اقول ناصر.. شرايك نتبادل بالكراسي..!!!
التفت لي ناصر مستغرب..
ناصر: هاه.!..ليش؟
مهرة: بس خلني انا على طرف..
ناصر: لا ..
مهرة: ليش؟.
ناصر: كل من يخطف عدالج يعني.!..لا..
مهرة: اذا ماتباني اشل مكانك بالغصب شل عيونك عن امهات تنوره وقميص وطاقية..!!
ناصر: ههههههههههههه اناااا؟؟ ماتطالعتهن...لا تظلميني..
مهرة: هي هي بو طبيع ما ايوز عن طبعه..
ناصر: مهروووه..ماتطالعت حد... يوزي عني..!

اعلنوا في المكبرات الصوتية انه الطياره بتقلع بعد دقايق ..حطيت مايد فكرسيه الخاص وربطنا الاحزمه..
حسيت ببطني احتاس اكثر من التوتر..
لكن بعد حوالي ربع ساعه اختفى كل شي وصار الوضع عادي..
الله يوصلنا بالسلامه بس..
الجزء الستين..
------------------------
اليوم: الاثنين..
المكان: احد فنادق سوريا / حلب
الوقت: السابعه والنصف مساءا بتوقيت سوريا..
---------------------------------
(ناصر)..

ابتسمت وانا اتطالع مهرة تبدل ملابس مايد عالشبريه وفنفس الوقت اسمع احمد عالطرف الثاني من الخط وهو يخبر اهله اللي حواليه اني انا ومايد موجودين فسوريا عشان نزورهم..
ناصر: لا اله الا الله يا احمد لازم يعني تسويلهم هالاكشن..!
احمد: أي لكان !..بس ما ايلتيلنا من أبل انك راح تيجي!
ناصر: قلت مايحتاج ازعجكم واخليكم تتعبلون وتتريون في المطار .. انا اروحي ادل المكان ويوم بستقر بتصل فيكم..
احمد: لازم تتعشى عندنا اليوم..
ناصر: البركه فيك تعال شلنا ههههههه..
احمد: والله اذا انت جاهز هلأ بيجي .!
رجعت التفت لمايد واشوف مهرة تقريبا جهزته..
ناصر: جاهزين..الا عمي شحاله؟
احمد: بنتكلم بالطريق...دقايق..
ناصر: هههه الله معاك..

سكرت عن احمد ورحت قعدت عدال مايد عالشبريه.. مهرة كانت وافقه جدام مايد تسحي شعره..
تاملت فويهها الحنون لثواني..
ناصر: شكلج تعبانه مهرة..
مهرة: افف ماحبيت الطياره..يابت لي صداع..
ناصر: هههه بتتعودين عليها خلاف..
مهرة: بس الجو عندهم حلووو هني في سوريا..
ناصر: هيه..في الشتا اييهم ثلج بعد في بعض الاماكن..
مهرة: يااه كشخه..
ناصر: متاكده ماتبين تسيرين ويانا؟ تراهم ناس وايد طيبين والله..
مهرة: ادري يا ناصر انهم طيبين.. بس انته فكر فيها.. انا احس انه بعدهم مجروحين ومب محتاجين يقابلون انسانه غريبه خذت مكان بنتهم ..
ناصر: انا متاكد انهم بيحبونج..وهذيلا ناس هب معقدين مول..
مهرة: ماعليه..انته روح مع مايد..وتعشى عندهم وخذ راحتك..وانا هني برتاح شويه ..
ناصر: انزين ..خليهم اييبون لج عشا للغرفه..
مهرة: لا تحاتيني بطلب عقب ما اتسبح ويخوز عني الصداع هذا..

وقفت وتقربت منها وبستها عدال عينها..
ناصر: سلامت راسج من الصداع.. يالله عيل تحملي على عمرج نحن بنسير..
مهرة: الله يحفظكم..
شليت مايد وشليت شنطته الصغيره اللي فيها مستلزماته وطلعنا من الغرفه..
في الرسبشن تحت تاكدت من الاستعلامات انه اللي يوصلون طلبات الوجبات للغرف في هالفندق هن حريم..
بالتالي تطمنت انه مهرة مابيدخل عليها ريال ولا بتتعرض لاي موقف بايخ ان شاء الله
وبعد ما ارتاح بالي طلعت برا الفندق..
دقايق وكان احمد واصل بسيارته اللي نزل منها وعلى ويهه ابتسامه وسيعه.. __DEFINE_LIKE_SHARE__

مشاهدة نتائج الإستطلاع: ~»{ڜۈ رآيڱمِـ بآڵقڝـۂ ? ..
طــڕڕ .. ڱڜــــخـــۂ .. فنتــڱ ~	57	90.48%
ڕۈؤۈع‘ـــــۿ .. حڵــۈۿ .. مِـمِــــيزۿ ~	6	9.52%
آۈڱــيۿ .. مِـآڜـي حـآڵۿآ .. مِـحــآۈڵـۂ جيڎۿ ~	0	0%
المصوتون: 63. أنت لم تصوت في هذا الإستطلاع

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ٱحبَڪ ۈٱڎرـﮯ تحبَنـﮯ فڎيتڪ يٱنظر عينـﮯ !●₪●..	رحلت عن بلادي	استراحة قصص وابداعات الاعضاء	594	04-28-2012 10:45 PM
آنّآ معآگّ ۈڷآ بڎۈنّگّ يسعڎگّ ربي	خوية الشقا	عدسة الاعضاء , كاميرا الاعضاء	11	05-19-2010 02:03 AM
آڛآڷڼيے ڷۈ פـپـِـِيے"ـٽ آڼآ غيرّڪ םـِآآهۈـِـِيے"ـِـِٽ (»● ڷڛعّـِـِۃ عّ ـڎآپ »●	مـِŏـلِوِ۶ أِשּׂِـِتِأنِدِرِ	تصاميم الاعضاء	4	05-13-2010 01:09 PM
أنّآ ۈڎّي ۈإنّت ۈڎّگّ ,, ۈآڷجۈآب يآرۈحي عنّڎگّ ..!ّ	خوية الشقا	عدسة الاعضاء , كاميرا الاعضاء	24	01-23-2010 11:11 AM