لو يهون الحب قدرك ما يهون..لان عيني غيرك انته ماترى... - الصفحة 8

ريامي · 04-20-2008, 09:17 PM

الجزء السابع

هذا البارت حق كل الي يحبون الديو ^.^ خخخ

...........

هدت الاوضاع في قسم سعيد.... ومزونه رقدت وماينسمع فالحجره غير نخير سعيد........وفجــأه رن المنبه عسب يوعيهم لصلاه الفير لأن اليازيه ماشاالله عليها محافظه واااااااااااااايد ع بيتها وعيالها ..........وسعيد في سابع نومه ولاحس بشي من صوت المنبه...بسرعه قامت اليازيه وبندت المنبه عسب ما يوعي مزنه لأنها البارحه ما رضت ترقد اروحها في الحجره عقولتها تخاف لأن حلوووب محد << حليله حلوب عقولتها خلاص لاقى ربه بس للحين محد يعرف انه الله سبحانه وتعالى ماخذ روحه الطاهره إلي حتى ما مداها تشوف الدنيا وتسوي شي تأثم عليه..

اليازيه توعي سعيد عسب يصلي الفير : سعوووود يله قوم بسك رقاد ....يله قوم بتفوتك الصلاه فالمسيد
سعيد ما شبع رقاد:هااااا شو تبين؟؟؟؟
اليازيه عصبت : سعيد يله قوم

وراحت عنه وقام سعيد عسب يتسبح ويروح يصلي فالمسيد ويوم رد شاف اليازيه يالسه ع الكنبه وشكلها معصبه ومستهمه

سعيد يروح يقعد مجابلنها :هااه يزوي شوه فيج ؟؟
اليازيه وشوي بتصيح : مستهمه ع حارب اتصل ع موبايله ولا يرد
سعيد يضحك : ههههههه يمكن راقد ولا نش ..... دقي عليه لحد ما ينش
ونزل سعيد تحت عسب يتريق ويروح الدوام
اليازيه طفرانه واترمس عمرها : حرووووب ليش ما ترد .... الا تسمع حد يرد عليها

: الووووو .... مرحبااااااااا
اليازيه : الوووو .... هلا .... حااااااارب ؟؟؟
: لا خالوه هذا انا بطي
اليازيه : وين حارب ؟؟؟
بطي : خالوه حارب راقد ... صبر بوعيه لج
وراح بطي يوعي حارب
بطي : حرووووب قوم امك تباااااااك
وحارب ...........
بطي وهوه يهز حارب : حاااارب قووووووم بسك رقااااااااد ... يله قوووووم
وينش فهد ع صوت بطي وهوه يزاعق ع حارب عسب ينش
فهد يفرك عيونه : بطوي ... شفيك خله راقد
بطي : قوم وعه امه تباه ع التلفون ....بسرعه
فهد ينش متثاقل : انشا الله
بطي يكلم اليازيه : خالوه ما طاع حروووب ينش
اليازيه : امممم .... حاول توعيه عسب يصلي بعدين برايه يرد يرقد
بطي : انشا الله
اليازيه : وانتوا نشواااا صلووووووا يله
بطي يضحك :ههههههههه اوكيه ...
اليازيه : يوم يقوم حارب قوله يتصل عليه ضروري
بطي يثاوب : انشا الله ... فمان الله
اليازيه : فمان الكريم

ويلتفت بطي ع فهد الي يحاول ويا حارب عسب ينش بس ما طاع
بطي: ليش ما نش؟؟
فهد : ما ادري تعال وعه
بطي يتحسر : الحين براويك فيه كيف بخليه ينش ركيض وبثأر عن خسارتي الأمسيه يوم انه يطنز عليه وبيسوي عرس

ويوم تقرب بطي من حارب استغرب لون ويهه و حط ايده ع يبهته يمكن يكون مريض وحسه بارد ف تروع بطي وراح يركض برااا يدور حد وما يعرف السالفه وكان مانع قاعد فالصاله يشرب جاهي

مانع : شفيكم ... اصبحنا واصبح الملك لله ...ليش تراكضووون من صباح الله خيييييييير؟؟؟
بطي : منوووع تعال شوف حارب ما طاع ينش
مانع وهوه يشرب الجاهي : تحصله يريد يغيضبكم تحيده حويرب راعي مقالب ...
بطي زايغ : بس ويهه لونه اصفر وجسمه بارد ثلج
مانع : ترا الحجره بارده ...وتحيده حروب امبونه مصفر ما يعشي من البياض

فهد ياي يركض وعلامات خوف باينه ع ويهه وشكله بيصيح : دخيلك مانع والله انه ما طاع يتحرك ويوم هزيته عسب ينش طاح من عالكنبه وبدا فهد يصيح وكله خوف ع ربيعه الروح بالروح
مانع شرق بالجاهي : شووووووه ؟؟؟ جيه شو مسويبه ؟؟؟
مانع اتروع وخايف من كلامهم وخايف يكون إلي فباله وبسرعه فر كوب الجاهي وراحوا حجره فهد ومانع يدعي ربه انه مقلب من مقالب حروب وبينشلهم يضحك ويقولهم صادووووووووووووووووووه

......................
.
اليازيه: اوووووف ياربي حارب ما دقلي والله انه قلبي ناغزني
سعيد:يزوي استهدي بالله تحصلينهم سهرانين وألحين باخينها رقاااد
اليازيه :لااااا سعيد والله احس شي صاير وبطي كلمني من تلفون حارب (وصاحت) والله اني احس ولدي شي فيه
سعيد تروع من صاحت حرمته: يزوي فديتج لا تصيحين حارب ماعليه شر وهوه عند قوم خالي ما بيهملونه خلي عنج هالدلع الزايد خلاص حارب الحين ريال ما يحتاي انج ادارينه هالكثر...خلي البزا حقي وحق مزوني فديتها....
بعد ما هدت اليازيه شوي لو انها ما مطمنه وقلبها ناغزنها
اليازيه : هههههه جيه انته ناقص بزا
سعيد: هيه فديتني محد يبزيني عاطيني اكبر طاااف
اليازيه: فديت إلي يتفدا عمره ....تراك انته مدلع عمرك
سعيد يرمس الضابط: خلاص اوكيه خله يدخل المكتب
سعيد: اقول غناتي بخليج عندي شغل....وحارب ما عليه شر ولا تشيلين همه
اليازيه : اوكيه الله وياك
سعيد بزعل :يعني ما بتقوليلي اذا شي فخاطري
اليازيه تبتسم عالرغم من خوفها : ههه فديتك شو فخاطرك آمر ادلل
سعيد : توج جيه حلوه....ماشي الغاليه بس اباج ما تستهمين
اليازيه: انشالله ...تامر عشي ثاني
سعيد:لا...سلامتج
............................................
متجمعين في الصاله ويالسين يتريقون ام سعيد وابو سعيد وروضه والريم
وابوا سعيد خبرهم سالفه شهاب وذياب انهم اخوانهم من ام ثانيه وانهم كانوا عند خالهم ف امريكا والحين كبروا وردوا الامارات وام سعيد ماشاالله عليها كلها طيبه وعقل وحكمه ولا عارضت وجودهم..

ابوسعيد: اقول بناتي تراهم خلاص اخوانكم وانشاالله انكم تكونون متحابين وياهم...وهم بيسكنون ويانا ......
روضه: انشالله ابويه ما بيصير منا إلا كل خير
الريم: انزين ابويه وين بتخليهم
بوسعيد: فوق في قسمكن عندكن غرفتين فاضيات ....مب صح
الريم متفاجأه: فوووووق عندنا...!!!وفي قسمنااااا!!!
بو سعيد: هيه عندج مانع
روضه تضحك ع الريم لأنها ما مسويه فيهم شوي وياويلها منهم
الريم: ليش تضحكين
روضه تحاول تسكت: هههه ماشي سلامتج
بوسعيد:وانتي يام سعيد لو ماعليج اماره خبري الشغالات يرتبولهم الغرف فوق
ام سعيد بطيبتها المعتاده: انشاالله وبحطيهم فعيوني تراهم مثل عيالي واكثر
بوسعيد: تسلم عيونج يله من رخصتكن
روضه +ام سعيد: الله يحفظك
الريم فاجه عيونها وجنها صمخه ما سمعت امها شو قالت: شوووووووووووه امييييييييه ما سمعتج ..مثل عيالج لا وبعد واكثر
روضه: ههههههههه طالعوا الغياره
الريم: جب ما يخصج هاذي امي اروحي
روضه:لاااااا ماشي خلي عنج هالبزا يالبزاريه
الريم: جب..جب محد غيرج ...
ام سعيد عصبت: اييييييييه عنلاتكن حشمن امكن يالسه ...ولا شورايكن تتزاخن من الكشيش...
الريم بصوت واطي: جان زين بأدبها هالدبه
روضه تحب امها ع راسها: سمحييلي الغاليه ...ترانا نتمصخر

ونزلت اليازيه من فوق عسب تتريق

اليازيه:السلام عليكم (وحبت عمتها ع راسها)
ردن: وعليكم السلام والرحمه
ام سعيد :حبتج العافيه يا الغاليه
اليازيه : هاه منو الغياره سمعت وحده غياره وتبى دلع زياده
روضه تضحك:هههههههه هاي ريمووه عصبت اوين امي ليش تقول ان شهاب وذياب مثل عيالها واكثر
اليازيه تغمز للريم: اهاااا تغاااااااارين
روضه: جيه تعرفين عنهم ومنو هم؟؟؟
اليازيه تصبلها جاهي: هيييييه اعرف قبلكم من امس يعني هالخبر بااايت
الريم تلوي ع امها: فديتها امايه حقي اروحي ...ما يسد ان ولدج المفعوص مشاركني فيها........
اليازيه: فديته ولدي شيخ الرياييل علني ما اخلى منه ولا من طاريه
روضه: صح وينه...احيده ينش من غبشه وابويه يتخبر عنه اذا بيسرح وياه ونحن قلناله انه بعده ما نزل من فوق
اليازيه: فديت عمره بايت عند قوم خالكم راشد
الريم : غرييييييييييييييبه!!!!!!@.@ ...يزوي مخليه حارب يبات برى البيت
روضه: هيه والله ....لا شي بيصير...ما مصدقه
اليازيه: والله صراحه ما كنت اريده يبات بس بطي وفهد طالبينه من سعيد وما بغينا نكسلبهم ...ومب دوم بيتجمعون....
روضه: اهااااااا
ام سعيد : يله برايكن انا بسير اشوف هالخدامات شو رتبن حق اخوانكن
الريم: عااااشوا ...وتقول اخوانا بعد
روضه: يالغبيه تراهم اخوانا عيل شو
الريم: امممممممم اقصد يعني ما بناخذ راحتنا فبيتنا
روضه : هههههههه لا عادي بس لأنج انتي مطفرتنهم ومسكره الباب فويوهم ولو يدروبج انج سابيتنهم....جان لعنوا خيرج
الريم : هههههههه لا والله عادي يخسون اخاف منهم بس إلي قال انه اسمه ذياب طيوووووووووب وااااايد وحتى قالي (تقلده) اشحالج الريم....ولا الثاني اعوذ بالله منه يناااان والله انه ما يستحي يقول عني ياهل وبعد كان بيزخني وبيصفعني لو ما انا شردت عنه...
وسكتن شوي ويلسن يتريقن............^.^
......
..........
..................
الريم:اووووف.......... والله ملل صراحه البيت بليا حارب مثل الهمبرجر بليا ماينيز وكتشب....
روضه:ههههههههه تشبيه بليغ ...لا انتي شاطره في العربي
الريم: يزوي دخيلج مره ثانيه لاتخلونه يبات برى ...اكيد الحين يالس يلعب ومستانس وانا حليلي محد عندي اضارب فياه
اليازيه: عيل الله يعينج شوه بتسوين يوم بيروح العسكريه بييج بس آآخر الاسبوع........
الريم: لاااااا والله حرام اسميه هالحروب ما اصبر عنه وعن غلاسته لو انه يضيجبي مراااااات
اليازيه: الله يخليه ......علني ما امووت لين ما اشوفه ريال ومعرس واشوف عياله وعيال عياله....
روضه+الريم:آآآآآآآآآآآآآمين يا رب
......................................
..................
.........
يالس في ميلس بيت خالته في دبي وياي يقنع ولد خالته انهم يلحقون اهله ويسيرون ويتغدون عند عمه راشد ....

سهيل:ولااااااا جذااااااااااك ...والله انك خطير..
منصور: هيه اعجبك......
سهيل: ولد الخاله...لو درابك حمدان بيذبحها وبعدين بيذبحك
منصور: جيه بعدني ما سويت شي...ليش يذبحنا
سهيل: جيه تتريا انك تسوي شي يا مسود الويه
منصورعصب:اييييييه لا يروح تفكيرك بعيييييد ...والله اني اباها على سنه الله ورسوله ...شو هالتفكير الماصخ مالك...انا ماسويت شي ....بعدين انا مب نذل عسب اطعن ربيعي في عرضه ...لا وفي ميره ...مستحـــيل
سهيل: خيــبه كلتني شوي شوي علي ما تسوى علي كنت احذرك بس
منصور يوقف:اووووف خلاص انسى السالفه وانسى أي شي قلتلك اياه..من رخصتك
سهيل تلوم ف ولد خالته مع انه ياي يفتحله قلبه ويخبره عن الي يحبها والي يباها تكون حرمته وام عياله وانا الغبي اتم اقول جيه واكسر مياديفه ....والحين ضيجتبه وبيتوب ايقولي شي عنه ...شو اسوي يارب

سهيل:اممممممم منصور اسمحلي والله ما اقصد اكسر مياديفك
منصور مضايق:خلاص انسى ما صار شي عااادي...لا تستسمح
سهيل متلوم:والله يا منصور اني كنت خايف عليك وبعدين تخسر ربيعك وإلي تحبها....
منصور من غير نفس : مشكور ما تقصر ولد الخاله
سهيل واللايمه تاكله : افااااااا يا منصور حد يزعل على هذا الويه الحلوو والسمح ( ويمسك ويه من لحيته )
منصور وفيه ضحكه : مالت عليك عاد والله جمالك مب جمال حمدان اخو القلب يالله فديتها ... (ويتنهد) آآآآآآخ يا قلبي
سهيل مبقق عيونه : الحين من صدقك تحبها هالكثر؟؟؟
منصور وهوه سرحان يتذكر ميره يوم قمشته : آآآآآه ... (ويتنهد) واكثر فديتها وفديت منطوقها وفديت اظفورها الطوال اللي قمشن قلبي سيده
سهيل : هههههههههه لااااااااااااا الريال متخشع ... بس انا احيدها قمشه ايدك مب قلبك مره وحده
منصور : آآآآآآآآآآآآآآآآآآآآه ..... والله احبها يعلني فداها....والله ودي الحين اطير بيتهم بس لو ما المستحى ما حصلتني هنيه ... آآآآخ يا قلبي
سهيل : ههههههه الله لا يبلينا بالحب ودواهيه
منصور : آآآخ محلا الحب وعذابه ...انشا الله تبتليبه وذيج الحين لا تيني تقولي منصور دخيل والديك والله اني اموت فيها ..... ابا اخطبها والله اباها يعلني فداها وفدى عيونها وافدى روحها .......ههههههههههههههه
سهيل : ههههه الله لا قال وبعدين بعدها الي بحبها امها ما يابتها ولا بتيبها
منصور:ما عليه بذكرك .... انزين يله قوم بنسير بيت عمي راشد فالعين ...
سهيل : لا ما بسير استحي اسير راز الفيس وهم ما يعرفوني
منصور : قم يله عاد خل عنك مستحى البنات ... بعدين هناك ناصر وعبدالله ولد عمي يله بعرفك ع منوووع بخليه يعلمك كيف تغازل واطيحلك كمن بنت
سهيل : هههههه لا ابويه خلني جيه بلا مغازل احسن
منصور يسوي عمره زعلان ويبرطم : اهون عليك تخليني اضرب خط الين العين وانته مب ويايه والله تراني بسرع وبسوي حادث وبقولهم انته السبب
سهيل : حرام عليك وانا شوه دخلي؟؟
منصور : محد قالك ما تروح وياي
سهيل : هههه لا ابويه قم خلنا نروح ما فينا ع سوالفك بعدين خالتي تقول جتلت ولدي ويخلوني المجرم وانا مالي خص بالسالفه ....هههههههه
منصور : فديت انا عيوزي ... يله قم .... بنروح فسياره وحده عسب يوم ارده ما يعلقون فيه ويقولون شلنا فياااااااااااك
سهيل : هههههههه ماشاالله حاسبنها زين ... يله قوم بنروح فسيارتك
منصور يقوم : غايته ... توكلناااااااااا

وسرحووووووا شبابنا صوب العين وشالنهم الهوى ويغنون فسياره منصور ويبسون ويستريحووووون ..................
....................
..........
.....
اما الحال في بيت راشد المهيري امره ما يسر وبعدهم ما مصدقين إلي صار الكل مختبص من صغير وكبير وما يعرفون شو يسون وكيف يخبرون اهله وعليوه وعنود راقدات ولا يدرن بشي وبطي وفهد مساكين هاليهال كيف بيتحملون هالكارثه إلي حلت عليهم(اللهم لا اعتراض) وبعدهم مب مصدقين ويتحسبونه يتمصخر وبينشلهم فاطس من الضحك...وهاذي الصدمه كانت الاقوى على هالاطفال وما يدرون شو صاير على ربيعهم وبغوا يروحون ويا مانع المستشفى لكنه عطاهم هزبه سكتتهم وردوا داخل بس إلي يسوونه يالسين حذال التلفون يتريون حد يتصل.........

في المستشفى

مانع يتريا الدكتور برااا مب عارف شوه يسوي فقال احسن حل يتصل حق عبدالله ويقوله عن كل شي لانه اكبر منه ويعرف كيف يتصرف فهالمواقف بس قبل ما يدق شاف الدكتور طالع وشكله ما يريح مووول.........

مانع:هاااه دكتور طمني شوفيه الولد؟؟؟
الدكتور: انته بتأربله ايه؟؟
مانع ماعرف شو يقوله: اااا ..اخويه دكتور؟؟؟
الدكتور:انته مؤمن بقضاء الله وقدره ... ونحنه كلنا راح نرقع له وحده و محدش بيبئ ...
مانع يقاطع الدكتور : قووول شوه فيه من دون مقدمات ...
الدكتور عوره قلبه ع مانع : الولد عطاك عمره ..إنا لله وانا اليه لراجعون
مانع مب مصدق: شووووووووه ؟؟؟ انته شوه تقول ؟؟؟ انته اكيد مخرف ؟؟؟
الدكتور مسك مانع من كتفه قبل ما يروح : استهدي بالله يا بني ... كلنا راح نموت .... والـــــــ
مانع يقاطع الدكتور : شوه بقول حق ابوه ؟؟؟ كيف بحط عيني بعينه انا السبب؟؟ كله مني ما شليته بسرعه المستشفى ؟؟ وقعد مانع ع الارض يصيح مثل اليهال
الدكتور : يا بني الواد من خمس ساعات من طلعت روحه... اهدا يا بني واتصل ع ابوه وأوله ييقي يكمل اجراءات الدفن..دي حكمه رب العالمين وهوه مات موته طبيعيه وهوه نايم ...بس ادعوله بالرحمه

وراح الدكتور وخلا مانع في حاله صعبه ما ينحسد عليها يصيح صياح يقطع القلب ورد ع ورا ويلس وضم ريوله لصدره ومن زود انه مب مصدق يلس يدعي ربه انه في حلم وألحين بينش منه بس أصوات الدكاتره والناس الموجودين ينفون انه يكون حلم ...مرن لحظاته إلي ويا حارب يوم يلعبون بالدراجات فالعزبه ويوم يلعب وياه سوني وحارب دوم يغلبه ووايد من ذكريات حارب مرت في مخيلت مانع فذيج اللحظه...حتى ان كل الدكاتره والسسترات يمرن حذال مانع وهوه كاسر خواطرهم كيف يصيح وكيف لام اريوله لصدره
واتذكر كلام الدكتور وشل تلفونه يبا يتصل ع سعيد بس ما قدر كان مب قادر يمسك التلفون ويرتجف وحتى انه مب قادر يظهر الرقم من كثر الدموع إلي فعيونه...وقال انه مايريد سعيد يعرف منه انه ولده مات لا ما بقدر اقوله شو بسوي يارب ارحمني وساعدني شو بسوي ...هيه ماشي حل غير ادق على عبدالله وأخبره وهوه بيتصرف ......

مانع : الوووو
عبدالله : الووووو .... مرحبا الساع
مانع : عبدالله انته وين ؟؟؟
عبدالله تروع مب من عادت مانع يكلمه جيه : مانع شفيك ؟؟
مانع خانقتنه العبره : تعال المستشفى
عبدالله تروع زود : منوووع تكلم امي ولا ابويه فيهم شي ؟؟
مانع بضيج وعصبيه : لااااا ... تعال بسرعه
عبدالله عرف انه ما بياخذ منه خبر : انزين انته فاي مستشفى ؟؟
مانع : مستشفى توام ...
عبدالله : خلاص الحين ياي ... فمان الله
مانع : بس لا تتحير عليه تراني ما اروم ..... فمان الكريم

وطلع عبدالله وهوه زايغ على مانع شو استوابه وليش يقول ما اروم.. وركب موتره وشخطه بسرعه عالمستشفى وهوه متروع وخايف انه صار شي جايد و وصل عبدالله المستشفى ودق ع مانع عسب يسأله وين هوه وخبره ....يوم وصل عبدالله عند مانع شاف اخوه متلثم بالسفره وباين عليه انه كان يصيح وشكله ما يسر مووووووول

عبدالله : السلام عليكم
مانع : وعليكم السلام
عبدالله : مانع شفيك ؟؟ وليش انته فالمستشفى ؟؟ حد صار به شي ؟؟ تراك روعتني
مانع صاد عنه ع ينب: حارب
عبدالله تروع : شفيه حارب ؟؟؟
مانع : توفى .... حارب عطاك عمره
عبدالله مب مصدق : شوووووووه ؟؟؟ منوووع عن المصخره
مانع يعلي صوته: وفي حد يتمصخر فالموت ...
عبدالله :كيف توفى ؟؟؟ ومتى ؟؟؟ وليش ؟؟ استغفر الله ياربي سامحني (اللهم لا اعتراض)
مانع : ربك بغااااااااااه واختاره بين الخلق...وتوفى اليوم قبل خمس ساعات
عبدالله : الله يرحمه يارب .... خبرت سعيد؟؟
مانع : لا مستــــــــــــــحيل .......... ما اقدر شو تباني اقوله: ولدك....بجرك توفى ......اصلا محد يدري بس انا وانته

عبدالله يفكر كيف بيخبر سعيد من دون ما يروعه : اهااااا خلاص انا بتصل عليه
وراح عبدالله ع ينب عسب يتصل ع سعيد

عبدالله : الووو.... مرحبا ... اشحالك سعيد ... انشا الله دوم ... الحمدالله بخير وسهاله ومانشكي باس ... ما يآمر عليك عدو ... تعال المستشفى .... توام اترياك... مع السلامه ....
.......................................
عبدالله عوره قلبه ع سعيد توه صوته عادي ويضحك وهوه ما يدري شي عن ولده ووين هوه ألحين ...........

عبدالله تنهد: الله يعينك يا سعيد
مانع: شو قالك
عبدالله: مسكين سعيد ما يدري ويرمسني عادي ويضحك ويرحبي والله يعينه يوم بيدري...بظناه وين راح عنه......
مانع ماسك راسه:الله يعين الجميع...........
..............................
............
وصل المستشفى وخبروه شوه استوى وبعده ع تأثير الصدمه مب مصدق
سعيد يضحك:هههههههههه مانع عن السخافه انزين..... وانته عبوووود يويلك لا اتمون ترمسون هالرمسه...تمصخروا وياي فأي شي إلا حارب
مانع عوره قلبه ع ولد خاله ولف عنهم ع ينب اما عبدالله زخ سعيد من كتفه واسنده ع اليدار
عبدالله يشد مسكته ع كتف سعيد: سعيد انته مؤمن بالقضاء والقدر ونحن ما نتمصخر وياك خل ايمانك بربك قوي.......
سعيد يبتسم ابتسامه خوف: عبدالله دخيل والديك قولي أي حد إلا حارب...إلا حارب...كله ولا حارب...ويلس ع الارض وغطى ويهه بيدينه : إلا حااااااااارب لااااااا تقولولي حارب مااااات ...لا هوه ما مات انتوا مغلطين ...تبون تسوولي مقلب...ومرت ربع ساعه وهم مجابلين بعض والصمت سيد الموقف ...وبعد ربع ساعه قطعتها رنه تلفون مانع وشاف المتصل <البيت> واتأكد انهم فهد وبطي يبون يطمنون ع ربيعهم عوره قلبه عليهم شو بيسوون يوم يدرون وأغلق التلفون ولا رد عليهم...
وبعد فتره صمت اتنهد سعيد...
سعيد يتنهد :آآآآآآآآه انا لله وانا إليه لراجعون....استغفر الله ...استغفر الله
عبدالله ومانع لاحظوه
سعيد:عبدالله هوه فأي غرفه ...<وأشرله ع الغرفه>
ونش متثاقل صوب الغرفه إلي اشرله عليها وخطواته ثقيله كل وحده اثقل عن الثانيه...
اول ما فتح الباب اتشنج كل عضو فيه من اول ما طاحت عينه ع الجثه الصغيره المغطايه بشرشف ابيض طاحت دمعته ع خده بدون سابق انذار...اتجدم صوبه ..رفع الشرشف عن ويهه ..ابتسم يوم شاف هالويه البريء السمح وقال ليتني ارفع عنك واتقولي ..صباح الخير ابويه ...
سعيد: الله يرحمك يارب...ليتني انا ولا انت .(استغفرك يارب ..اللهم لا اعتراض)
.................................
.............
.......
.. __DEFINE_LIKE_SHARE__

●● 5аηƒσσš ●● · 04-21-2008, 03:21 PM

حٍـٍـٍـٍـرآم كًسر خآطري سعيد واللهـ

< وانتي بعدج هني هههـ

نتريآ التكملـــــــــــــــهـ[= __DEFINE_LIKE_SHARE__

غرنوجة · 04-22-2008, 12:11 AM

مشكورة اختي على القصة الحلوة froo0oom(((غرنوجة))) __DEFINE_LIKE_SHARE__

ملفتت الأنظار · 04-23-2008, 03:33 PM

يلا نتريااااااااااااا البارت الصراحة روعة هالبارت ونتريا التكملة __DEFINE_LIKE_SHARE__

عسوولة ترتووب · 04-23-2008, 10:20 PM

حرااام ابي القصة كاامللة

والله فدييته حروووب غمضني __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
عندما لاترى فى الحياه غيرك ... انت وحدك	محروم.كوم	منتدى أخبار المواقع والمنتديات العربية والأجنبية	0	09-28-2009 03:30 AM
كل شي يهون عند الحريم الا هذه!!!	راعـــ الــحــب ـــي	الإستراحه العامة	28	09-19-2009 07:02 AM
كله يهون عشان خاطره	محروم.كوم	منتدى أخبار المواقع والمنتديات العربية والأجنبية	0	07-13-2009 10:30 AM
كل شي يهون عند الحريم الا هذه!!!	محروم.كوم	منتدى أخبار المواقع والمنتديات العربية والأجنبية	0	06-07-2009 02:40 AM
يهون عليك ....	أمير الحزن	شعر و خواطر	4	05-31-2008 07:51 PM