][أحبك لو بعيد الدار عنك][ - الصفحة 16

دانة الكويت · 05-10-2008, 11:18 PM

خخخخ كرهتك اصلن ما اتذكر شنو كان امتحاني هع

بس الحمدلله انا شاطرة فديتني خخخ

اشكرج على متابعتج لقصتي وربي منورة __DEFINE_LIKE_SHARE__

دانة الكويت · 05-10-2008, 11:18 PM

اما جراح واللي كان بالمطار ينطر لان الواصلين طولو على ما انزلو..
بوهادي: شو فيج يا حرمة اذكري ربج
خالدة:والله ان قلبي قارصني حاسة فيهم شي
بوهادي: تعوذي من ابليس ما فيهم الا العافية انشالله
بوهادي كان يمشي اول شي ووراه مبارك وخليفة ومايد وسلطان وهادي ووراهم الحريم
جراح اول ما شافهم دق على الرقم اللي عطاه اياه خالد واللي اهو رقم هادي...
هادي استغرب من الرقم: الو
جراح: السلام عليكم

هادي: وعليكم السلام والرحمة
جراح: هادي؟
هادي: هيه من؟
جراح:انا جراح رفيج طلال ولد خالك
هادي:مرحبا الساع
جراح: انا هني استقبلكم وبتروحون وياي حق بيت بومحمد
هادي: اها
جراح:شوف اللي لابس دشداشة بدون غترة ومرفع ايده تراه انا
هادي: انزين
جراح: مع السلامة
هادي:الله يسلمك

هادي: ابويه تدري من ياي يستقبلنا؟
بوهادي:امنووه
هادي: اربيع طلول
خالدة: ليش سالم اخوي فيه شي ؟؟ اهمه فيهم شي
هادي: ما ادري
بوهادي: مامن شر سكتي انتي الله يهداهم مرمسهم ما يكلفون على ارواحهم وبعدين نحن شو السيارة اللي بتشلنا؟
هادي: الله اعلم ابويه هاذو جراح

البنات والحريم قعدو ع الكراسي والرياييل راحو صوب جراح..
وديمة: لولو امنو هذا لا يكون فيصل فديته
لولوة: لا مب فيصل هذا ربيع طلول بس شله ياي؟
وديمة:يستقبلني بعد شو

جراح سلم ع الرياييل
بوهادي:ليش مكلف على روحك انا قايلهم ما يطرشون حد الحينه نحن على ويه الفير
جراح: لا كلافة ولا شي
بوهادي: وبعدين شو السيارة اللي بتييزينا ؟
جراح:عمي انا السيارة اللي وياي سوبربان فيه بركة
بوهادي: ما تكفي
جراح: مو مشكلة الشباب ينطرون هني ونوديكم على دفعتين
بوهادي: لا بنأجر سيارة مع سيارتك ونروح كلنا
جراح: حشا ما تأجر ولا شي
بوهادي: يا ريال نحن على ويه الفير خلنا نروح مرة وحدة
جراح: الحشا عن الف يمين كلهم شباب ماشالله وما عليهم
هادي: هيه ابويه نترياكم هنيه انتو روحو اول شي بعدين نحن
بوهادي: خلني أأجر سيارة يا ولد الحلال
جراح: عمي بتكسر حلفي خلاص يلا اول شي احنا والحريم

هادي: شباب خلونا نقعد بالكوفي شوب
سلطان: عاد الحين يتفلسف علينا اونه يا الكويت من قبل
هادي: امنووه انا خخخ؟

وبسيارة جراح:
وديمة ولولوة يتساسرون..
وديمة:فديت منطوقه
لولوة:انزين سكتي الحين
بوهادي: ما قلتلي يا ولدي ليش ما يا وياك بومحمد؟
جراح: عمي صراحة ما ادري شقولك بس
بوهادي: شو شصاير؟
جراح: فيصل عطاكم عمره

الكل انصدم اللي حاضرين عرسه توفى..!!
خالدة:فيصل؟
جراح: خالتي ذكري ربج وترحمي عليه
بوهادي:لا حول ولا قوة الا بالله متى وكيف وشله ما خبرونا؟
جراح: اول شي هذا يومه واللهم لا اعتراض
بوهادي:اللهم لا اعتراض
جراح: السالفة كلها صارت بسرعه فيصل كان ياي يستقبلكم ودعمته سيارة وودوه المستشفى وتوفى..
خالدة: جراح منو اللي توفى ؟ فيصل ولد اخوي؟
جراح: انا لله وانا اليه راجعون
بوهادي: الله يرحمه يومه ومكتوب له

وسيدا دق على نقال بومحمد بس ما يرد
جراح ما بغى يقولهم انه بالعناية المركزة

خالدة مو مستوعبة الموضوع ما بجت ولا شي
ام مايد:الله يرحمه
ام خليفة:تراه محتاي دعائكم

وديمة دمعت عيونها
لولوة ساكتة
وصلو البيت نزلو..
اما بوهادي وجراح ردو المطار...

واول ما وصلو اهل الامارات حق بيت بومحمد فجت لهم كوماري..
مريم ومنيرة وشذى بعالم ثاني
اول ما دشت خالدة وشافتهم على هالحال بجت وسيدا راحت لمت منيرة وبدو يبجون الموقف كان يكسر الخاطر لامين بعض ويبجون
سلمو عليهم وقعدو... __DEFINE_LIKE_SHARE__

دانة الكويت · 05-10-2008, 11:20 PM

تدري شنو لعيونج بحطها كاملة خخخ __DEFINE_LIKE_SHARE__

دانة الكويت · 05-12-2008, 06:19 PM

كانو قاعدين بالصالة ويبجون ام خليفة ما عجبها الوضع..
ام خليفة: لولوة شو اسم البشكارة
لولوة: كوماري
ام خليفة تنادي: كوماري كوماري
كوماري: انجين
ام خليفة:لولوة نشي ويايه
لولوة واهي تبجي : انشالله
ام خليفة: لولوة ترحمي عليه
لولوة: الله يرحمه
ام خليفة: كوماري وين حطيتي الاغراض
كوماري:انا هتي فوق داكل كرفة مال فيسل اول <حطيتهم فوق بغرفة فيصل القديمة
لولوة: خلاص روحي

ام خليفة راحت فجت التلفزيون وحطت قناة المجد للقرآن وطولت بحيث ان الصوت يكون هادي ومو مزعج وكل اللي في البيت يسمعون
ام خليفة:لولوة نشي وياي فوق
راحو فوق

اول ما صعدو لقو غرفة فيصل القديمة مفتوحة والاغراض فيها وشوق معطية الباب ظهرها وقاعدة تشوف صورة فيصل وساكتة..
لولوة لما شافتها شهقت بس ام خليفة سكتتها

دشو غرفة فيصل ..
ام خليفة:السلام عليكم
شوق لفت وشافت لولوة راحت صوبها ولمتها وبجت
لولوة: شوق؟
ام خليفة سلمت على شوق:عظم الله اجرج بنتيه
شوق: الغالي راح
ام خليفة:الله يرحمه
ام خليفة قعدت ع الكرسي : تعالي بنتيه
شوق راحتلها وقعدت عندها

ام خليفة: يا بنتي انتي مؤمنة بربج صح ؟ وكل انسان له يوم بيفارق احبابه وهذا يوم اخوج الله يرحمه بدال ما تدعوله وتدعون انكم تلاقونه بالجنة تصيحون يعني انتو تعذبونه وهو محتاي لدعائكم شوق حبيبتي كلنا متضيقين بس ربج حكم نشي غسلي ويهج وصلي ركعتين ادعيله فيهن واقري شوية قرآن نشي فديتج
قامت شوق صلت

ام خليفة: شوق عدكم مفتاح لهاي الحجرة ؟
شوق شهقت: اي
ام خليفة: شو اتفقنا عليه نحن؟ غناتي امج تحت مسكينة مو عارفة شو تسوي تبا حد يوقف وياها لزوم تساعدنها مب تزيدن عليها
لولوة:يلا شواقي مب عارفة اسوي شي
شوق: انا رايحة اييب المفتاح

ام خليفة: هيه اباج جذا

ام خليفة قالت حق شوق تقفل غرفة فيصل اليديدة بعد عشان محد يدشها
ام خليفة: هاي الحجرة ما ابغي حد يدخلها سمعي بنتيه هذول نحن يايبينهن هدايا واغراضنا ظنيه كوماري حطتهن تحت
شوق:خلاص بحطهم داخل غرفتي واغراضكم بحطهم بالغرفة اللي راح تنامون فيها
ام خليفة:نحن بنرقد تحت؟
شوق:ودوم ورواضي واميرة ولولوة بينامون عندي انا وشذى
ام خليفة: ماشالله تعرفينهن
شوق تبتسم
ام خليفة: هيه جذا الاحزان مب زينة عليكن توكن صغار
لولوة:ما قصرتي عمتي
ام خليفة: ما سوينا الا الواجب شوق فديتج بنش لامج انتي شغلي قرآن هني
شوق:انشالله

نزلت ام خليفة وراحو شوق ولولوة غرفة شوق
لولوة: هذي ام خليفة وسلطان ووديمة
شوق: اها ..منو تحت؟
لولوة:العايلة الكريمة كلها بس شواقي شله ما تردين على موبايلج ؟ __DEFINE_LIKE_SHARE__

دانة الكويت · 05-12-2008, 06:20 PM

بهاللحظة يرن موبايل شوق
شوق شافت الرقم: وي هذي ريموه
لولوة:ردي عليها
شوق:مابي مابي ما تدري ليلحين
لولوة: انتو ما خبرتو احد؟
شوق:لا
لولوة: ردي عليها
شوق: مابي
لولوة: شوق ردي
ردت شوق : الو
ريم:شوقو صج اللي سمعته
شوق: شنو؟
ريم ومبين من صوتها انها خايفة:فيصل؟؟ توفى؟؟
شوق بدت تبجي:اي
لولوة:شوقو شو قلنا؟
شوق:الله يرحمه
ريم:امي يتكم ؟
شوق: ما ادري

وسكرت التلفون..
شوق: ريموه تدري
لولوة: عيل خلينا ننزل تحت
شوق: يلا
الجو تحت تغير180 صوت القرآن عام المكان وهدوء
شوق سلمت ع الكل وقعدت

دشت عليهم خالتهم فوزية قعدت شوي بعدين راحت فوق حق غرفة دانة لانها تعرف شكثر كانت تعز فيصل طقت الباب محد رد عليها
فوزية: دانة يمه فجي الباب
ومحد يرد عليها

فجت الباب وكان شكل دانة يقطع القلب
خذتها وودتها بيتها .. اهم شي تبعدها عن اي شي يذكرها بفيصل ودتها عند رغد بنتها بعدين ردت حق بيت بومحمد

شذى:شوق
شوق:هلا
شذى:تعالي ابيج
شوق: شفيج؟
شذى:خالد وينه؟
شوق:ما ادري ما دقيت عليه
شذى:دقي عليه شوفيه عمتي سارة درت؟
شوق:ما ادري

جراح لما خذا الشباب وداهم المستشفى على طول وعند غرفة بومحمد..
الدكتور:الحمدلله حالته تحسنت وعدينا مرحلة الخطر
خالد جنه كابين عليه سطل ماي بارد:الله يبشرك بالخير
الدكتور: اشكر ربك
خالد: الحمدلله
طلال: الحمدلله
الدكتور: اليوم لازم يقعد بالمستشفى وانشالله باجر راح يطلع واشوف انكم تروحون البيت تريحون لان قعدتكم ما منها فايدة
طلال: انا بقعد عند ابوي
الدكتور: يا ولدي روح البيت ابوك تحت تأثير التخدير وما راح يصحى الا بعد 12 ساعة على الاقل توكل على الله
جراح:يلا توكلنا
هادي وسلطان وبوهادي راحو بسيارة خالد
وطلال وخليفة ومبارك ومايد راحو مع جراح

شوق دقت على خالد
شوق: الوو

خالد: هلا شوق
شوق: وينك؟
خالد:كاني قريب دقايق وايي البيت
شوق:ابوي شلونه؟
خالد: الحمدلله باجر بيطلع شوق كاني وصلت الحين اييج
طلال ودا الرياييل حق الديوانية وخالد راح حق شوق
خالد: هلا شوق بغيتي شي؟
شوق:علمتو عمتي سارة
خالد: اي وبتيي باجر
شوق:وخالاتي؟
خالد: كلهم قلتلهم.. ترى الديوانية متروسة رياييل لا تطلعون

شوق: والبيت داخل متروس حريم انتو لا تدشون الا اذا قلتلونا
خالد:انشالله ..امي شلونها؟
شوق:الحمدلله وايد احسن
خالد: الحمدلله..يارب ترحمه
شوق:ومحمد قلتوله؟
خالد: ها
شوق:محمد عنده خبر؟
خالد: ما ادري انا قلت حق مرته عاد ما ادري عنها قالتله او لا
شوق:بتنامون بالديوانية؟
خالد: اي قولي حق كوماري اتييب فرش حقنا
شوق:انشالله الحين تييبهم؟
خالد:اي تراهم تعبانين من السفر والحين الساعة 3 الا ربع
شوق:خلاص
خالد: وهالله هالله بالحريم تراهم ضيوفنا
شوق: انشالله

][...الفصل التاسع عشر...][

الكل كان تعبان شوق حطت حق البنات فرش في دارها ودار شذى
لولوة ووديمة بينامون عند شوق واميرة وروضة عند شذى ..
شوق: حياكم الغرفة غرفتكم اخذو راحتكم
لولوة:افا عليج بس انتي وين رايحة
شوق: بروح اودي هالللحافات والمخدات حق الديوانية
وديمة: وبشكارتكم وينها؟
شوق: الحين يمكن الساعة 3 تلقينها خمدت
لولوة: بتودين كل هذول بروحج؟
شوق: بس اوديهم تحت وبيي خالد ياخذهم
لولوة: ودوم نشي نساعدها
شوق: لا والله ما تقومين انتي نامي ما بقى الا شوي ع الصبح
لولوة:برايج

شوق نزلتهم دار الاكل لان فيها بابين واحد يطلع ع الحوش والديوانية وواحد يدخل حق البيت
شوق:ولليه التلفون وينه

بطلت الباب ونادت خالد بصوت واطي شوي بس خالد ما يسمعها لانه كان بالحديقة مع طلال وبوهادي كان يكلمهم عن موت اخوهم وان اهمه لازم يتحملون المسئولية..

واهي قاعدة تناديه دشت عليها ام مايد..
ام مايد:شله ما نمتي لين الحينه؟
شوق: يبت الفرش حق خالد وشكله داخل الديوانية ما يسمعني وتلفوني نسيته فوق
ام مايد: هاذوو سلطان
ام مايد:سلطان ..سلطان
سلطان:لبيه

راحلها سلطان..
ام مايد: خلي سلطان يوديهم
سلطان:شو عموه؟
شوق: ميخالف تعطي هذول حق خالد؟
سلطان: ها
شوق: عادي تعطيهم خالد؟
سلطان: هيه فالج طيب بعطيهم اياه
شوق:تفضل.. وقوله المخدات بالكبت
سلطان: انشالله

طلع عنهم سلطان..
ام مايد:شوق البنات نامن؟
شوق:اي..خالتي حطولج فراش؟
ام مايد: هيه
شوق:تصبحين على خير
ام مايد: وانتي من هل الخير

اما في الديوانية بس كانو شباب الامارات..
مايد وخليفة نايمين..
هادي كان وايد متأثر بموت فيصل وكان طول الوقت ساكت .. فيصل اللي البسمة ما تفارقه مات منو يقدر يتحمل هالخبر..!!
سلطان:شلو هالقشار عني
مبارك اللي كان يطقطق بتلفونه: شو كل هذا؟
سلطان:شو بعد كل واحد ياخذ لحاف
مبارك:من وين يبته؟
سلطان: من داخل
مبارك:سلطون دخلت عند الحريم داخل؟
سلطان: لا ابويه عطتني اياهم وحده
هادي اول مرة ينطق من درى بالخبر:امنووه اللي عطتك اياهم؟
سلطان:وانا شو دراني قالتلي ميخالف تعطيهم خالد وعطتني اياهم
سكتو شوي..
مبارك:هدوي شكلنا ما بنروح حق المولات هنيه
سلطان: ابا اشوف غراشيب الكويت
هادي:انتو شو؟ نحن بعزا تعرفون يعني شو
مبارك: الله يرحمه نحن ما بيدنا شي هذا حكم ربك
سلطان:هيه وكل واحد منا بيموت يارب تصبرنا على فراقه
هادي:ويصبر اهله

تقريبا الحريم كلهم نامو والبيت هدوووووووووء..
لولوة ووديمة نامو عند شوق بغرفتها..
شوق ما قدرت تنام كل ما غمضت تشوف فيصل..قامت وراحت غرفة دانة اللي ما فيها احد وخذت معاها مصحف وقعدت تقرا وتبجي..
تتذكر فيصل قبل جم ساعة كان يكلمها كان يقولها يالخوافة وين راح .. راح عن الدنيا تتذكر لما وداهم المرينا ولما مثل عليهم وكلهم عبالهم انه يكلم حبيبته واخر شي طلعت مريوم ولما هاوش طلال عشانها ولما كسر تلفونها اهو وجود ولما توفى بوخليفة وقاللها لا تبجين وخففي عنهم.. ليش الدنيا جذي قاسية كل حياته كانت لنا .. كان دايمن يخلينا نبتسم حتى لو كنا معصبين ياربي ترحمه وتجمعني فيه بالجنة .. وكل ما تتذكر شي تبجي بجي يقطع القلب وابوها اللي ما تدري حي ولا ميت..

لولوة كانت قايمة عشان تتوضى حق صلاة الفير وشافت شوق بغرفة دانة دشت بكل هدوء وقعدت يمها..
بهاللحظة يرن تلفون لولوة وكان هادي..
شوق اول ما شافت لولوة لاشعوريا حطت راسها بحضنها وقعدت تبجي..
هادي كان يسمع صوت احد يبجي:الو .. لولوة
لولوة:شوق حبيبتي بس..شوق خلاص عاد..هلا هدوي شو تبا
شوق ميتة من البجي: لولو فيصل راح ما راح اشوفه!! باجر بعرسه ما راح ايي
لولوة:الله يرحمه ويغمد روحه الجنة هذا حكم ربج
هادي كان يسمع شوق وقلبه يتقطع عليها ووده يكون عندها بهاللحظات ويمسح دموعها..
لولوة: هادي شو تبا
هادي: ابويه يقول نحن رايحين المستشفى عد بومحمد لا تستهم علينا
لولوة: ومتى بتروحون ؟
هادي: عقب صلاة الفير عسب نطلعله من المستشفى ونروح المقبرة قبل الساعة 9
لولوة:خلاص بخبرها
هادي:لولو خبري شواقتي لا تصيح
لولوة:مب راضية تسكت
هادي: عطيني اياها
لولوة:شواقي خذي هدوي يبا يرمسج
هادي: شواقي حبيبتي لا تصيحين
شوق اول ما سمعت صوته بدت تبجي
هادي: شو قلتلج انا لا تصيحين
شوق: هادي فيصل راح!!
هادي: قولي الله يرحمه
شوق ما قدرت تتحمل اكثر عطت لولوة تلفونها وطلعت برا الغرفة
هادي: الو شوق
لولوة:هدوي شوق طلعت
هادي على طول سكر التلفون..
راحتلها لولوة وصلو الفير ونزلو تحت..

تحت كانت خالتها بدرية بالمطبخ مع كوماري يحطون الريوق..
لولوة قالت حق امها ان بومحمد بيطلع اليوم من المستشفى ..

مرت ايام العزا الثلاث ببطء وطول هالايام هادي ما شاف شوق __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
شرح أحبك ليه ما أحبك - يامعلمني أحبك حيل أحبك {وسائط صوتيه شعريه جديده	محروم.كوم	منتدى أخبار المواقع والمنتديات العربية والأجنبية	0	06-11-2010 03:30 AM
مطلوب ارشفه تحتسب بعدد الزوار الفلوس بعدد الي يدخلو المنتدي التفاصيل بالموضوع	محروم.كوم	منتدى أخبار المواقع والمنتديات العربية والأجنبية	0	04-18-2010 09:10 PM
كل زين اشهاده وانتم بعيد منوتي ليتك معي وان سهرت الليل اهوجس بك واعيد هل لاجلك مدمعي	Al-Rayyani	سيارات و دراجات	12	10-19-2009 09:43 PM
حتى آسمك لآ بغيت آنطقه يطلع لي آحبك يا آحبك	ملك الشباب	هواتف , مسجات , وسائط , برامج , ثيمات , نغمات , بلوتوث	13	10-14-2008 09:35 PM
بعيد الدار - محمد عبيد الكعبي	الميهود	طلبات الاعضاء	0	01-10-2008 12:56 AM