[العنا وش هو العنا .. غير أنتيـﮯ وجروحك وأنـا ! ] - الصفحة 34

Roo7 wlhana · #1 05-02-2008, 09:43 PM

دخيلك كملها ما فيني صبر __DEFINE_LIKE_SHARE__

galby_usoonk · 05-03-2008, 01:00 PM

ثانكسـ ع البارتـ الروعه .........ونتريا التكملهـ........بليز لا تتأخر __DEFINE_LIKE_SHARE__

هيمـان يالمنصوري · 05-03-2008, 03:47 PM

السلااااااااامن عليكم شحالكم ؟

ع العموم حبيت انزل لكم البارت من اللحين اقولكم طوووووووويل مب قصير لعيوونكم طبعا

واسمحولي ع التاخير والقصور

مع خالص احتقاري .. محبوبتك لعام [ 2007 ] - البارت الـ 17 -

غايه بصوت مرتجف .: أأأ .. حـحـ ...مــد .

حمد بهدوء : ياعيون وروح وقلب حمد ..

غايه استغربت : شو فيك حمد ..؟؟

حمد قام نش صوبها ويلس ع ركبته وقام وحط ايده ع خدها ويمررها بنعومه .. غايه غمضت عينها حست بالوضع مب طبيعي ..

غايه تطالعه وتكرر سؤالها : شو فيك حمد ؟

حمد بدى يفقد الهدوء ثانيه بثانيه : غايه

غايه بجفا : هلا

حمد ينزل ايده من خدها ويحطها ع رقبتها وفجأأأه .. قوى قبضته على رقبتها وجنه بيزغدها .. هني غايه اختنقت مب رايمه تتنفس ..

غايه تصيح من الالم وتحاول تبعد ايده اللي لاصقه في رقبتها وترد براسها ع ورا عشان يبعد بس ماشي فايده

غايه تصيح من الالم ..

حمد يوم حس بانه لونها اتغير فج ايده عنها وقبضها من شعرها وقربها منه : انتي ياااااااااحققققققيرررررررررررره .. ياااااااخااااااااااااينه ... انتي جذااااابه ياغااااايه .. انتي اللي تبينه فيصل .. مب علايه اللي تباه ...

غايه فجت عينها من سمعت وتمت ساكته وتطالعه بعيون مذهوله ..

حمد : كله منننننننج ياغايه هدمتي قلبي .. ومن عقبها هدمتي حياتي .. الله ياخذج يالخاااااااااااااااايسه .. الله يااااااااااخذج

غايه استقوت وتقاوم الالم : انا خايسه ولا انته الخايس اللي تربع ورا وحده مب مسوتلك سالفه .. وطابني انا حرمتك ولاتدري بي .. يابابا انسى انه علايه صارت لواحد غيرك .. هاذيج الحيوانه خربت حياتي .. الصايعه

حمد يدزها ع الارض وينش يكفخها من خاطره : اتخسين ياسباله والله اني ندمان اني خذتج .. وغلطت على علايه .. كله منج ...

حمد ضربها من خاطره ... من خاطره ... تم يضربها ويصيح ... ويقول لها : ليش ياغايه ليش ؟؟؟ ليش الخيانه ...؟؟ وعلايه شو ذنبها ..

عقب ماتعب من الضرب وحس انه مابيستفيد نش وشل الشنطه اللي فوق الكبت وحطها ع الارض وطلع ثيابه وقام يفرهن في الشنطه بعصبيه ... وسكر الشنطه وسار صوب الخزنه وشل ظرف فيه فلوس وااااااااايد .. وشل جوازه ... وحطهن في مخباه ... وسار ياب تيلفونه واتصل لربيعه ... انه يدور له حجز وبسرعه يبا يسافر ...

وغايه لامه عمرها وتصيح من خاطرها .. وتطالعه ... حمد شل شنطته وياي بيظهر من الباب .. بس تام عاطي غايه ظهره ..

حمد بألم : غويه الله يهنيج في حياتج من عقبي .. وعلى الله ايي ها الفيصل مالج ويشلج ... وماتسوين بلاوي للناس ... انتي طالق ياغايه .. طالق .. طالق

وشل قشاره ونزل وحمد ربه انه امه ولا روضه في البيت .. بس كانت عنود شاهد من بعيد لبعيد يوم يظهر حمد وردت تركض حجرتها من الزيغه ...

غايه تامه في نص الحجره واثار الضرب مبينه عليها بشكل واااضح .. شكلها تشوه نشت وقفلت الباب .. وردت تطالع عمرها في المنظره وهي متكسره ... وتشوف انها وييها اتشوه .. ونصه دم .. طالعت عمرها بارف .. وبحقد .. وقامت تزاعج وتحط ايدها في شعرها وتمطه : اكرررررررررررررهج علاييييييييه . اكررررررررررهج ياحقيره .. والله لاندمج ع الييوم اللي ييتي فيه ..

وسارت الحمام ترد تغسل جسمها عن الدم ... وتفكر في مليون فكره .. شو بتسوي من عقب اليوم ؟؟

.................................................. .................................................. ......................................

مر اسبوع بطيء ع الكل ... باستثناء علايه وسلطان اللي حاسين بحلاوة الدنيا من عقب الالم والفراق ..

فليل علايه يالسه ويا سلطان ويطالعون فيلم ومبندين ليت الصاله ومخلين بس ليت الابجوره الطويله مشتغل ..

سلطان : عليوه ..

علايه مندمجه : هممم

سلطان : ماحلو جي .. خلينا نسير السينما ..

علايه شهقت : حسيبك الله ياسلطون طالع الساعه كم ..

سلطان : ههه الساعه الان الواحده بعد منتصف الليل طووط

علايه : يعني ماشي طلعه وقر مكانك

سلطان ايودها من ايدها : عفيه . عفيه ..

علايه تطالعه وهي تضحك : هههههههههههه انزين

سلطان : فيلم رومنسي بحت ( ويغمز لها )

علايه : ههههههههههه لا لا نبا رعب

سلطان : طالعووو .. اقولها رومنسي . تقول رعب .. شتان مابين وبين

علايه تشل تيلفونها :بتصل حق احمدوه ..

سلطان يحيس ثمه : لا والله

علايه : هيه هيه

سلطان يسحب تيلفونها ويغلقه : جب اليوم بس لنا انا وانتي

علايه تطالعه وهي تحس بالسعاده : اصلا كل يوم لنا انا وانته

سلطان ابتسم وينزل راسه ويحط ايده بين شعره .. شويه ورد يرفع راسه ويطالع الصقف ويزااعج : ياربيييييييييييييه احبهاااااااااااااااااا ... احبهااااااااااااا

علايه استحت .. هذا سلطان من عرفته وهو يموت عليها .. وهي بعد تحبه ... ماتنكر انها في يوم حبت سعيد .. بس حب الحلال .. له طعم ثاني ... !!

سارت علايه تتجهز وقررت تقهر سلطان ليش انه بيظهرها فليل وتكشخت من الخاطر.. وطلعت من الحجره .. سلطان يطالعها من فوق لين تحت : حضرتج وين سايره

عليا : عرس

سلطان : هيه حتى انا اقول .. وياهاالويه بيقولون مواعدين ويها الكشخه

عليا : وربي دلع ..

سلطان : كشختج بس هني في البيت وجدامي مب جدام الخلق

عليا : يعني شو اسوي ؟

سلطان : يعني بدلي ..

عليا : هههههه اوكي انا براويك

سارت علايه ولبست بدي اسود كت وعليه جمجمه بالفضي .. وبنطلون اسود وفوقه بوت لين الركب عليه جمجمه كبيره ع الطرف .. وحطت جحال غليظ وحطت روج احمرررررر .. وفلت شعرها اللي طول .. ولبست كاب مال سلطان عليه جمجمه بعد ... وطلعت له

من شافها .. اتخبل ...

سلطان يقولها قصيده : يقولج الشااعر يا عليا بنت خليفه الـ .....

ما دِمتْ غالي وقلبي صــــار بيدينــــك
راضـي حبيبي تدلَّـــع بس بالراحـــــه
ماقـدر أواجه دلـــــع همساتك وعينـــــك
يكفي عيــــــونك بلا تغنيج ذبَّاحــــــــــه
خف الدلع لا تّـثنى شـد من لينــــــــــــك
في مشيتك يكفي انّـك تقلب الساحــه
المشكله هالدلــع ذايب بتكوينــــــــــك
ذايب مثل سكِّـرٍ ذايب بتفَّـاحَــــــــــــه
زيد الدلع خلّ يقتل كل معادينـــــــــــك
يَا عَـلْ يفدى وطاتك ليــــل بصباحــــه
خلاص بادلّـعك لو مِتْ في عينــــــــــك
راضي حبيبي تدلّـــع .. بس بالراحــــه

سلطان : يخررررررررب بيتج ياعليوه .. اتدلعي بس بالراحه .. خفي عليه

علايه تسوي حركة قوم واتس اب : ههههههه على هواك

سلطان : هههه اوكي انا براويج ..

سار سلطان ولبس بدي كت لونه اسود بعد وعليه جمجمه وبرمودا اسود .. ورد شعره الطويل شوي ع ورا .. وطلع

علايه من شافته تخبلت : سلطوووووووووووووون دلع .. دلع ... فديييييت ريلي طالع غاوي

وسارت له وتطالع الجمجمه اللي ع فانيلته : وااااااااو ياخطيره انتي ..

سلطان يعطيها ع راسها بالخفيف .. : ههههه اتحسب حبتني انا ...ثرج مغرمه في هاي الجمجمه .. ليتني جمجمه تحبيني كثر ماتحبيهم حشى .. مب حب هذا..

علايه : طوف نطلع بنصيع في الممزر

سلطان : ههههههههههه صدق اني ماخذ ياهل ..

علايه تطلع لسانها :يالله انزين ..

سلطان يطالعها وهو مغرم : امم البسي عباتج المسكره واتحجبي عدل والبسي نقاب ..

علايه تحط ايدها ع خاصرتها : لا والله احلف انته بس ... اتنقب ولابسه مال الجماجم وين ابا ..

علايه تطالعه : اصبر شووي سلطون

سارت الحجره وطلعت كيمرتها ... ويلست تضبط العدسه :يالله ايلس ...

قامت تاخذ لقطات حلوه لسلطان وطالع في الصور روعه ... شويه وسحب هو لكيمرا وقام يصور علايه بلبسها الخطير ... شويه وقامو يحطون الكيمرا ع الطاوله وتصورهم بروحها ... وكانت صورهم رهيبه

سلطان يطالع : خيبه استوت هنتين يالله هزي طولج بسرعه انقفضي

علايه : اوكي ... اصبر دقايق

وسارت علايه تحت تيب عباتها وشيلتها وترتب عمرها وتمسح روجها الحمر وخرابيطها لانه بتظهر ... ااما سلطان فيلس ينزل الصور ع اللاب توب ماله وكل ماتطلع علايه في صوره يتفداها ... قام يحبها بخبال ..

ركبت علايه الدري وتشوفه مندمج في الاب توب يت ويلست صوبه .. وتوايج في الاب توب ... وسلطان يخوز راسها : حشى ما اشوف

عليا : ياخي كيفي .. ( تطالع الصور ) اللللللللله اجنن جني عروسه مال اليهال

سلطان : صخي صخي .. بطرانه ..

عليا : هههههههههههه انزين نش

سلطان يسكر الاب توب وعلايه تطالعه : وانتي ليكون بتظهر جي ..

سلطان يغمز لها : ترانا اليوم بنصيع

علايه : عيل بفصخ العباه

سلطان طالعها بنظره .. علايه زاغت :خلاص اسفه بس يالله طوف

وظهرو سايرين السينما ... ودشو الفيلم وكانت تقريبا السينما فاضيه .. تمو يطالعون الفيلم وطبعا سلطان مخوز اللي يحطون ايدهم عليه وعلايه لزت صوبه وحاط ايده ع جتفها وهي حاطه راسها عليه ويالسين يطالعون ومندمجين .. ورن تيلفون سلطان علايه طالعت انه اخته اللي متصله ... شله ع طول سلطان

سلطان : الوو .. نوره ؟؟ شو فيج .. مامن شر ... هيه انا وياها في السينما .. اممم اوكي لحظه ثواني ..

سلطان يصد على علايه : عليا حبيبي بسير شويه وبرد اوكي

عليا : اييه شو تخليني بروحي

سلطان : اولله ثواني بسير وبيي ..

عليا : اوكي بس لاتحيير

سلطان يبطل ايده من ايدها وينش عنها وعلايه ترقبه بعيونها وهو طالع من السينما ويرمس في التيلفون .. تمت علايه تطالع ساعتها .. كل ماتطوف عشر دقايق قلبها ينغزها شو مستوي ؟؟ طافت ساعه الا ربع وهو مارد والفيلم بيخلص ...

علايه نشت بتطلع وتلاقت وياه عند مدخل السينما

سلطان بجفا وعيونه حمر: شو مطلعنج بعد

علايه طنشت نبرة صوته المتغيره : انته تحيرت عليه ..

سلطان : طوفي بنروح تعبان ..

ومشى عنها .. وعلايه تركض وراه : سلطان تعبان ..؟؟ شو فيك ... تروم تسوق ولا لا .. اذا ماتروم انا بسوق

سلطان يفاتن عليها : انتي ايه شو فيج ... اقولج تعبان اشحقه مسوتلي تقرير

ومشى عنها وتمت علايه واقفه ومنصدمه صوته عالي لدرجة انه استوى صدى .. صدت تطالع حولها كانو شي شباب شويه وكانو يطالعون علايه حست بالفشله كيف انه يزاعج عليها جدام الناس وفي مكان عام .. مشت وراه وهي متغشيه وتمو يمشون للباركنات .. وكان سلطان متجدم .. ركب سلطان الصوب الثاني .. علايه عرفت انه سلطان تعب ... هي ماتسوق عنه الا يوم هو يتعب .. وماتحب تشوفه وهو تعبان اتم تصيح ... كانت دوم يوم تسير المستشفى كل شهر عشان يبدلون له دم اتم اتصيح عليه وهو تعبان يبتسم لها ويمسح دموعها ويحبها ع راسها ويطمنها انه هو بخير .. بس سلطان متغير ها المره .. ركبت علايه السياره وفر سلطان السويج في وييها .. استغربت علايه تصرفه بس قالت يمكن متضايج لانه رد يتعب مره ثانيه .. وحطت السويج وشغلت السياره وع طول حطت الاف ام تبرد الجو .. وتحاول تهدي قلبها ...

هات العذاب وهات حزنك و اللآلام , و اضحك يا >> سلطان << و اجعل الهم نسيان ,
هات الشقا و الهم و بعون الايام , خذ فرحتي و الشوق يا أغـلـى انـســـان

تم سلطان يطالع الصوب الثاني من الدريشه وكل ماتصد عليه علايه تشوفه ساكت ومويم ... وقررت هي تبدا وتساله

عليا : سلطان

سلطان : .......

عليا : سلطان شو فيك شو مستوي

سلطان يفاتن عليها : سوقي وانتي ساااااااكته مابا اسمع صوتج .. اسكتي خلاص

عليا انصدمت من خذت سلطان ماجد رفع صوته عليها .. حتى يوم ابوها كان يبا يطلقها منها كان موقفه وايد غير ... حتى يوم ردت البيت بالعكس شلها ع راسه وحطها في عينه بالرغم من انه خليفه قسى عليه ... !! لكن حاول يثبت للكل العكس انه هو شارنها .. بس اللحين شو فيه .. معقوله ينتقم ؟

وصلت علايه البيت .. وبعدها حتى مابركنت نزل بسرعه والسياره تمشي وسكر الباب بقوه ودش البيت وهو يرمس في التيلفون .. علايه استغربت وضعه ... وبركنت السياره في الكراج وتمت تطالع الميني كوبر وتحس انها تولهت عليها وصدت ع بيتهم الصغيرون واتنهدت بحسره ودشت داخل البيت .. حتى ماكلف عمره يفتح ليتات الصاله .. شلت السويج وتمت تلعبه في ايدها وهي ترقى الدري .. شافته نازل تحت ...

علايه : سلطان وين بتسير

سلطان : ماللج خص

وظهر سلطان وسكر الباب ... علايه ركضت وراه هذا اتخبل .. تعبان وبيظهر .. منو بيشوفه ... ركضت وفتحت باب الصاله وشافته يرمس في التيلفون ويمشي في الحوي .. ردت سكرت الباب وهزت راسها بيأس .. وردت تركب فوق وبدلت ثيابها .. لبست البجامه اللي يحبها سلطان لونها اسود وحرير وعليها عنز صغار .. وفلت شعرها وتعطرت سارت توايج من البلكونه شافته يالس في ها الحر ع الكرسي وحاط راسه بين ايده وهي مستنكره حاله شو فيه وشو ياه مره وحده ..؟؟ قررت تنزل له .. وفعلا نزلت له علايه انتبه لها سلطان بس ماسوى لها سالفه ..

علايه حست انها بتصيح .. مستحيل يخليها ... مستحيل تتخيل انه سلطان ريلها اللي تحبه وهو يموت فيها في يوم يعاملها بها الطريقه .. ماترردت لحظه انها تسير له .. ويلست ع ركبها مجابلتنه .. ويودت ايده وبعدتها عن ويه وهي تدمع ..

علايه بصوت مبحوح : شو فيك ؟؟ سلطان لاتعذبني دخيلك قول

سلطان يطالعها بعيون حمر : تعبان علايه تعبان ..

علايه ماتحملت ونشت وحضنته .. ويلست تصيح : انا ماتخيل انه في يوم بتخليني ياسلطان او بتعاملني جي انته مالاحظت انه اليوم اول يوم تزاعج فيه عليه ..

سلطان : اعذريني

علايه : خبرني شو مستوي ؟

سلطان : ماشي انسي .. وانسي سلطان بعد

علايه تمت يالسه ع الكرسي ومشى عنها سلطان .. وهو داش داخل ماتخيلت انه يسير عنها او تنساه في يوم قالت اكيد تعبان ولانه تعبان يقول جي ..

نشت علايه وحضنته من ورا ..: لاتخليني سلطان .. ( وتصيح ) لاتخليني عقب ماتعلقت بك ... ( حطت راسها ع ظهره وتمت تصيح .. يود ايدها اللي ميودتنه ورفعها وباسها ... )

سلطان عقب مابعدها عنه تم يطالعها .. : اخليج .. !!

ومشى عنها .. تمت ها المره علايه واقفه مكانها مب فاهمه شو يستوي .. تبا حد يفهمها ... سارت دشت داخل وع طول شلت تيلفونها وع طول اتصلت لنوره بس ماترد عليها حرقت تيلفونها ونوره ماترد .... وعقب اتصلت لعمها احمد تبا حد يواسيها وهي في الصاله اللي تحت سايره وراده وحاطه ايد في خاصرتها والايد الثانيه ميوده التيلفون .. لانوره ولا احمد يشلونه ... رفعت ايدها الثانيه وتطالع الساعه كانت الساعه 4 الا خمس .. يعني الناس رقود ....

سارت يلست ع الغنفه وتتريا حد يتصل لها منهم وسرحانه وتترياه ياذن وبتسير تصلي ...

اما سلطان فكان فوق طالع في البلكونه ويفكر .. ويفكر .. لين ما اتخذ قرار .. لا وعزم عليه بعد ..!! .. نزل سلطان ع الدري وشاف انه الصاله ظلام .. سار صوب الابجوره وشغلها شاف علايه طايحه ع الغنفه وراقده ماتردد لحظه انه يسير لها .. سار لها ونزل لمستواها وتم يطالع وييها

" فديت ها الويه ياربيه ..!! ( وباسها ع راسها ودمع ) انا اخليج ... وين اروم ؟؟ بس والله محتار غناتي .. محتار .. شو اسوي ... عمري كله ماتوقعت انه في يوم بيستوي جي .. ( وحاس ثمه باستهزاء ) وانا شو بخسر ...انا مابخسر شي .. الا روح عشقتها لحد الموت ... "

طاحت دمعه من عين علايه ... وبيأس من سلطان عشان يخفف على عمره سار وباسها ع خدها .. وحس بطعم مالح عرف انه دموعها ابتعد عنها ومسح دمعتها ونش عنها سار يصلي ..

علايه من سمعت صوت الباب نشت تمت تدوره وماحصلته .. سارت تتمسح وتدعي ربها انه يعدي ها السالفه على خير ..

سلطان من طلع مارد لين الساعه 7 الصبح وحصل علايه راقده ... سار وطالعها ولحفها عدل وسكر الباب وسار الحجره الثانيه ورقد ووقت المنبه ع الساعه 9 ... .. وعقب ساعتين ... نش سلطان وظهر برع البيت ...

ع الساعه 11 نشت علايه دورت سلطان اتصلت له مايرد عليها .. اتصلت لنوره مليون مره ماترد عليها ...

تمت تحاتي وايد ... ومن استوت الساعه 12 ردت تتصل لسلطان وشله

سلطان متضيج : الو

علايه بخوف : هلا سلطان انته وينك ماييت ترقد ؟

سلطان : امبلا رقدت طشونه في الحجره الثانيه

علايه انصدمت : الحجره الثانيه ؟؟ ( وبصوت خفيف ) ليش ؟؟

سلطان بجفا : فكيني تبين شي ..

علايه : هاه لا لأأ .. بتي تتغدى

سلطان : تغدي بروحج باي

وسكر في وييها ردت تتصل له مايرد عليها ... ويوم ضاجت من حالها سارت تتلبس وسارت المحل وهي تعبانه واول ماوصلت المحل ماحصلت حمدان وحطت راسها ع الطاوله وتمت طايحه وهي تحس بتعب .. طلعت الابره من شنطتها وضربت عمرها بالم ..

رد سلطان وماحصلها واستانس انه مالقها .. يعني ماله داعي يودعها .. عرف انها في المحل .. سار وظهر شنطته وحط ثيابه .. وظهر برع وطالع البيت للمره الاخيره ... وشاف صورتها وصورته في برواز ع الطاوله شل الصوره وباسها وردها مكانها ...

"اسمحيلي ماروم اودعج .. وعمري ماكنت حاط ببالي اني بفارقج .. بس ها النصيب .. "

ردت علايه البيت العصر لانه تعبت وايد ... والبيت خالي استغربت .. سارت فوق تركض اتحس انه فيه شي مستوي دورت سلطان مالقته بس سيارته هني ..؟؟

فتحت الحجره شافت الكبت مفتوح وطالعت داخل ثيابه ماشي ..؟؟ والمعلايق طايحه ع الارض والحجره معفوسه شوي .. حصلت ع التواليت ورقه .

(( علايه غناتي انا سافرت وماعرف متى برد انتي سيري بيت اهلج ... لانه محد بيتم وياج وماعرف كم بتم هناك بس مطول ها المره ... تحملي ع عمرج ))

اطرافها ماقامت تشلها من قرت الورقه حست بعمرها خفيفه ..؟؟ شو يعني ردي بيت اهلج .. وشو يعني مطول ؟؟ ها الوضع ماينسكت عنه اتصلت لنوره .. بس بعد نوره ماترد عليها .. مالها الا عمها .. شلت تيلفونها واتصلت لعمها ..

علايه شويه وبتصيح : عمييييه

احمد : هلا

علايه : سلطان خلاااني

احمد استغرب : خلااااج

علايه : هيه حاط لي ورقه ومكتوب فيها – خبرته شو في الورقه - .. امبيدو والله هو من امس مب مسولي سالفه وكله معصب ومارقد في البيت تخيل .. او يعني ( بصوت خفيف ) مارقد عندي ..

احمد استغرب : انزين انتي ردي بيت اهلج اللحين كيف بتمين في البيت بروحج

علايه : انزين وسلطان ؟

احمد : اممم برمس عمر

علايه تمسح دمعتها : اوكي

بندت علايه عن احمد عمها وسارت تيمع اغراضها بترد بيت اهلها .. واتصل احمد لعمور اللي اصلا مغفي ومايدري شو السالفه ..

علايه من خلصت تحط اغراضها قفلت البيبان وشلت الشغاله وياها وسارت بيت اهلها ... دشت البيت وهي تعبانه وويها مصفر .. سلمت على امها وميروه اختها اللي كانو يالسين في الصاله

ام محمد : خير عليا شو فيج

عليا وهي سرحانه : هاه لاماشي بس سلطان مسافر وييت هني مافييني اتم بروحي

ام محمد شكت : تعبانه انتي ؟

عليا تهدج صوتها : لا ... امبلا .. امبلا .. شويه بس ..

ام محمد : نشي فديتج ارتاحي ..

علمتني كيف اعزك ولعيونك أشتاق
بس...................
نسيت تعلمني الدنيا بغيابك كيف تنطاق ؟

.................................................. .................................................. ......................................

عقب شهرين ...

مرن شهرين على علايه بدون ماتعرف شي عن سلطان وسلطان كان يعرف اخبارها من احمد .. وكانت بس ام سيف كل اسبوع تمر على علايه في البيت لكن نوره مول مايتها ولاحتى اتصلت لها تيلفون ...

احمد في المستشفى يرمس سلطان ..

احمد : اف صخ عني والله ميت من الزيغه مادري شو بيقولون لها

سلطان : والله يا احمدوه ان طلع فيها شي بضربك ضرب

احمد معصب : ليش مني انا ولاممنك انته اللي خليتها ببند عنك اللحين

سلطان : لا حلفت عليك ماتبند خل السماعه وجنك ماترمس حد

احمد باستسلام : اااه امري لله ..

طلعت علايه وهي منزله راسها ... وشافت احمد بعيون تلمع بالفرحه والخيبه بعد ... تمت تمشي وهي لابسه احمد اللي يسالها شو قالو لها ... علايه وقفت برع المستشفى عند الباب وتحس انه ها المكان الوحيد اللي بعيد عن عيون الناس وتروم تخبر عمها عن اللي فيها

احمد : ارمسي عليوه

عليا عيونها تلمع وتطالع الشمس : انا حامل يا احمد ( وتطالع الشير اللي يتحركن في المدى البعيد ) اتخيل انا حامل ...

احمد بصدمه : حاااااااااامل

عليا تهز راسها بالايجاب .. وسكتت شويه وعقب قالت : لكن انا ماكنت ابا احمل ..

احمد يبتسم : ماكنتي تبين!! احمدي ربج غيرج يتمنون ..

عليا تقاطعه : همم لا لا .. ماقصدت جي ... ليش اعذب عيالي .. ويكونون مرضى ... مب كفايه امهم متعذبه بعيد عن ريلها .. اللي مايندرى به متى يرد .. مب كفايه انها تعاني بروحها ... واللي بيطلع ولا اللي بتطلع .. بتعاني شرات ما ابوهم يعاني .. ؟؟

احمد يبتسم ويهديها : انتي عرستي والمفروض انج كنتي تحطين ببالج انتي تييبين عيال ع الاقل واحد .. او اثنينه ..

عليا اتحط ايدها ع بطنها : لو درى سلطان شو بيسوي ؟؟ بيرد ولا بيتم مخلني هني ماا عرف شي عنه

احمد صد الصوب الثاني وقرب السماعه من ثمه وبصوت خفيف : حوو اخبرها

سلطان ساكت ومويم في الطرف الثاني وكانت عيونه مليانه دموع : لا خلها جي .. مع السلامه

وع طول قطع الاتصال سلطان تم يشوف شقته ويطالع صورها اللي ماليه المكان .. طلع كل الصور اللي في الاب توب واشترى براويز على عدد الصور وترس الحجره من صورها ... ومايخلي حد يدش شقته .. اصلا ماتعرف على حد هناك .. عايش لحاله . عازل عمره عن الناس .. عن الكل .. الكــــل .. حتى عن حبيبته !!

.................................................. .................................................. ......................................

احمد في السياره يسوق وعلايه تطالع الشارع من الجامه وهي سرحانه وتفكر في سلطان ؟؟ شو يسوي اللحين ... يسال عنها ولا لا .. ايي في باله ولا لا .. ؟؟ اكيد ايي في باله ع الاقل لو دقيقه .. صح سلطون ايي ببالك .. !!

عليا بصوت خفيف : لو يبت ها الياهل بيكون مريض

احمد : عليا سمعي حسب معلوماتي البسيطه .. اذا كانت الام مريضه بالثلاسيميا تراه العيال مب كلهم اييون فيهم ها المرض .. لكن لو كان الابو هو اللي مريض تراه اتاكدي انه بيكون الياهل حامل للمرض .. وتراه الذكر يحمل المرض اكثر من الانثى .. بس الثلاسيميا نوعين .. نوع بيتا صغرى .. والنوع الثاني بيتا كبرى .. لو كان من النوع الاول اللي هو البيتا الصغرى تراه بيكون وايد هين .. وبس بياخذ ادويه .. ولكن لو بيتا الكبرى .. تراه الياهل بيتعب وانتي احمدي ربج في كل الحالتين انه بيكون عندج ياهل هاي نعمة ربج .. وان شالله يكون خير .. ومافيهم شي .. واذا كان فيهم يكون فيهم االنوع الاول ..

عليا : ان شالله

احمد غير دربه ووقف عند مكتب السفريات : عليا فديتج ثواني وبرد لج ..

نزل احمد من السياره.. واتصل لخليفه ابو عليا

احمد : خليفه انا وصلت مال السفريات .. هاه احجز ولا لا

خليفه : هيه شو تشوفها ..

احمد مايبا يخبرهم انها حامل لانه مابيخليهم يسافرون : هيه محتاجه تغير جوو وانا عندي اجازه اسبوع

خليفه : على خير ان شالله

احمد : خلاص بحجز

خليفه يتنهد : على هواك يا احمد دام انها ضايجه خلها تسير وياك بس هاه حط بالك عليها ..

احمد : ان شالله

دش احمد مكتب السفريات وطول شوي لين ماحصل لهم حجز حق باجر ... لكن علايه ماحست بالوقت لانها اتعودت انها تقضي ها الوقت الطويل في التفكير ... ماتوقعت انه غياب سلطان عن عينها بيسوي بها كل ها .. ؟؟

ركب احمد السياره وهو مستهم لانه اتاخر عليها ..

احمد يربط حزام الامان : اتاخرت عليج

عليا : ماعرف

احمد صد صوبها : ايه انتي شو ماتعرفين انا من ساعه داخل ..

عليا : هيه شويه

احمد : ياللللله ها كله عشان سلطان

عليا صدت عليه وعيونها حمر .. : عمي ليش يخليني .. انا احبه .. قوله يرد ... مب عشاني .. عشان اللي في بطني ..

احمد مارام يرد عليها .. سلطان راكب راسه .. مايبا يرد اللحين ع الاقل لين مايهدى يخاف يرتكب في حقه وفي حقها شي يندم عليه بعدين .. يبا يبتعد سنه . سنتين .. ثلاث .. المهم يبتعد ويدري انه عليا ع ذمته ... مايبا يكون في البلاد وهو مطلقنها .. !!

اذا لك شف في شوفي
تراني على شوفتك صحيت الاماني
زرعت الشوق كله في انتضارك
وخذت الانتضار وجيت عاني
نسيت الناس ولكن مانسيتك
عجزت انساك حتى لو ثواني
مليت الكون واشغلت الجوارح
نظر عيني سمع اذني . لساني
عطيتك شي ماهو عند غيرك ولاقصرت ولكنك اناني
انا احبك واذا ودك تاكد شف الله كيف ليدينك هداني
غيابك صعب والاصعب وجودك وانا في الحالتين اتعب واعاني
حبيبي ولاتواخذني ولكن ابيك اتحط نفسك في مكاني
اذا جيتك وانا مشتاق تقفي .. تجاهلني وكانك ماتراني
واذا صديت وقلت ابرحل وقف قلبك على الباب ودعاني
ولو سويت نفسي ما اشوفك يميل القلب صوبك ويحداني
انا يابن الحلا اصعب حكايه كتبني الوقت ولكن ماقراني
مضى عمري وتقدر تعتبرني غريب وفي زمن ماهو زماني
زماني راح مع نصفي ونصفي نسى نفسه مع الوقت ونساني
اساس الحزن والصحبه ثلاثه انا والصبر وسهيل اليماني
واذامريت في بلاد الطفوله فتحت الصدر للحزن وطواني
هنا دمعة جرت من عين ياهل
هنا لاقيت همي والتقاني
هنا باعتني الديره واهلها
هنا ضحيت لسلطان وجفاني ...
هنا حاولت اصيح وماسمعني سوى بعض الشوارع والمباني
انا ياسيدي دقه جديمه بغيت اخذ من الوقت و خذاني
على الانقاض واقف دون حيله
اشوفك وجهتي بين المواني
تعال وطف بايدينك حنيني
تملكني وانا اشعلك حناني
تعال وضمني ياتاج قلبي ..
دخيلك لاتخليني عشاني ..
انا شاعر عيونك ياحبيبي
مع التحريف في بعض المعاني
ومانيل المطالب بالتمني
ولكن شوفتك كل الاماني
محبة صادق النيه قصايد
ومحبة ساقط النيه اغاني
قسم بالله لو موتي بيدك
واموت الفين مره ماكفاني
اذا باقي من الطلقات طلقه
دخيلك حطها بين المحاني

~[~ رصاصة الــرحـــ م ــه ~]ْ~للشاعر * عبدالله * بس ماعرف شو اسم ابوه هع

احمد بدفاشه : عليوه

علايه تصد عليه : هلا

احمد : باجر بنسافر

علايه فجت عينها : انسافررررر ؟؟ انته تخبلت

احمد : لا وحياتج عاقل حبتين ..

علايه ضحكت : هههه صدق صدق بنساافر والله وناسه

احمد استانس : انتي موافقه

علايه : حد يقولون له بتسافر ويقول لا ..

احمد : الحمدللللله

علايه باستفسار : بس تعال منو بيسافر ؟

احمد يرمس بالمصري : لوحدنا ..

عليا : ااه كويس اووي

احمد : بوكاهانتس . بوصي ..

عليا تستهبل وياه : فييين

احمد : طرزان بيطير ..

عليا : ههههههههههههه وياويهك

احمد : دووم ان شالله الضحكه

عليا ابتسمت : وياك .. ( وبصوت عالي ) انزيييين وين بنسير

احمد : مفاجعه ..

عليا : هههههه اوكي مب لازم اعرف المهم اني اسافر واغير جو والله ماتعرف كيف ياامبيدو محتايه اني اغير جوو بالقوو

احمد : فديتج والله

عليا : انزين قوم ابويه مايدرون اني حامل ؟

احمد : لا ومابنخبرهم نحن بنسير اسبوع بالكثير وبنرد

عليا : اوكي مب مشكله

احمد : سيري زهبي شنطتج من اللحين

عليا : ان شالله

احمد يدخل السياره في الحوي : يالله اترياج باجر

عليا : ان شالله ..

نزلت عليا وها المره اتدش البيت وهي فيها روحين ... لا تقصد 3 ارواح .. روحها وروح ولدها الصغيرون . وروح حبيبها سلطون .. !!

دشت وهي مرتاحه رغم بعد سلطان عنها ولكنها دوم تقول " عسى خير ..! " دشت الصاله وماحصلت حد كالعاده بيتهم دوم متفرقين كل حد مشغول في عمره ...

دشت حجرتها وهي تحس بتعب ظهرت الشنطه وقامت تحط ثياب تقريبا لاسبوع ... شويه ويرن تيلفونها وكانت روضه متصله ..

روضه : الوو

عليا : هلا ولله

روضه : اهليين وسهلييين

عليا : وينج انتي مختفيه

روضه : اتعرفين الدراسه وجي ... !!انتي شحالج شو مسويه من عقب العرس

عليا تتنهد : اااااه بخير

روضه : فيه شي

عليا ترد قصتها ع ورا وتساند ع طرف الشبريه : لا لا بس باجر مسافره ويا عمي

روضه : ليش ريلج وين ؟

عليا : مسافر ..

روضه : اها

عليا : عيل وين غايه عنج ؟

روضه : ليش انتي ماتعرفين

عليا : شو اعرف ؟

روضه بحزن : حمد ..

عليا زاغت :شو فيه

روضه : لا لا مافيه شي .. بس حمد طلق غايه ..

عليا انصدمت صدق :لييييييييييش !!

روضه : محد يعرف الا انا ..

عليا حبت تتاكد : ليكون عشان اللي بالي بالج

روضه : تقصدين فيصل .

عليا بألم : هيه ( وبهمس ) فيصل ..

روضه دمعت : هيه

عليا : ....................

روضه : وفيه شي بعد ؟

عليا بحزن : شو

روضه : فيصل خطبني ..

عليا : وافقتي ..

روضه : شو مينونه انا . صح انه فيصل ريال ومايعيبه شي . لكن انا مب نذله اخذ واحد كانت تحبه بنت عمي واتم هي تشوفه ويايه .. شو بيكون موقفي .. وموقفها .. مب حلو جي ..

عليا : الله يجدم اللي فيه الخير فديتج .. بس ( وترددت ) شو حال حمد ؟

روضه : تعبان ياعلايه تعبان .. تعبان وايد ( وتصيح ) ماتتخلين عليوه .. كيف تام اول مره اشوفه جي ..

عليا : وينه ؟

روضه : مسافر يكمل دراسه .. يتغرب مره ثانيه .. قبل اتغرب عشان هاذيج خانته .. واللحين اتغرب عشان حرمته خانته .. وانتي في قلبه ياعلايه .. انتي وبس ..

عليا سكتت : ..................

روضه : صح انج معرسه بس وربي الشاهد ع رمستي ياعليوه امايه اتعرف انه حمد يحبج من قبل لاياخذ غايه ... ولو انتي مب معرسه اللحين جان حمد خاطبنج ... لانه يموت فيج

عليا : الله كريم ياروضه ها النصيب .. وحمدان شحاله من عقب العرس سرت كم مره المحل وماريته

روضه : ههه حمدان .. الخطيب النيو

عليا فجت عينها بوناسه :لاتقولييييييييييييين

روضه : ههههه هيه على هواج

عليا استانست صدق :فدييييييييييييتج والله تستاهلون حمدان شيخ الرياييل كلهم .. وشهادتي فيه مجروحه ها الريال ينحط ع الجرح يبرى والله

روضه : احم احم بس بس مدحتيه لين ماقال بس

عليا : ههههه يستاهل ..

روضه : اوكي الغاليه بخليج لانه امايه تتصل ع الخط الثاني

عليا : خلاص فديتج سلمي عليها ..

روضه :يوصل وانتي بعد سلمي ..

سكرت عليا عن روضه وهي تحس باحساس غريب وين كانت هي ها الفتره كلها ؟؟ شو استوى ... لها الدرجه كانت عازله عمرها .. عشان منو .. عشان سلطان .. اللي باعها وخلاها ... صدت تطالع تيلفونها وبحركة يائسه اتصلت ع رقمه وعطاها .. " ان الهاتف الذي طلبته مغلق .. او خارج نطاق الخدمه حاليا يرجى الاتصال فيما بعد " ..

فرت تيلفونها ع الشبريه وسرحت في ها الدنيا وكيف تتغير في ظرف شهرين بس ..!!

.................................................. .................................................. ...................................... __DEFINE_LIKE_SHARE__

Roo7 wlhana · 05-03-2008, 05:46 PM

تسلم ع الباارت ونتريا الزوود منك __DEFINE_LIKE_SHARE__

سحــر الغــرام.. · 05-04-2008, 11:57 AM

اشكرك اخويه عالبارت الحلوو

ونرتقب البارت الياي^^ __DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الفقع والفياض الغنا .........................؟	محروم.كوم	منتدى أخبار المواقع والمنتديات العربية والأجنبية	0	02-21-2010 10:30 PM
شتات العنا روجيه فيت ليجندري	jnoon	اغاني , شلات , هبان	0	06-14-2009 10:07 AM
اه العنا - محمد المزروعي	@ العامري @	نغمــات للهــواتف	29	07-10-2008 08:58 AM
اهـ العنا بيـ طاليــ....	@ العامري @	تصاميم الاعضاء	35	05-23-2008 02:58 PM
راشد الماجد_اه العنا	عسوولة ترتووب	المواضيع المكرره	4	05-15-2008 07:38 PM