-بين منطوق لم يقصد ، ومقصود لم ينطق ، تضيع الكثير من المحبة

JOLNAR · #1 12-24-2013, 09:57 AM

-

السلام عليكم ورحمة الله وبركاتة
شحالكم كلن بحاله
طبعا هاي أول رواية لي ، ف أتمنى أنها تعجبكم ولو لقيت تشجيع
ع البارتات الاولى بنزلكم كل أسبوع ان شاء الله
" الرواية تحمل أحداث واقعيه ، وأحداث غير واقعيه ،
يعني تتحدث عن بنيه وفيه أحداث أستوت وبعض الاحداث محتمله ،
وبعضها خياليه مؤلفه ، ما أطول عليكم –

" بين منطوق لم يقصد ، ومقصود لم ينطق ، تضيع الكثير من المحبه"

جبران خليل جبران

__DEFINE_LIKE_SHARE__

JOLNAR · 12-24-2013, 10:00 AM

......
البارت ال1

جلنار : أبوي أنت أكيد تمزح !
أبوها : حاولي تتقبلين هالفكرة أو المفروض تتقبلينها .
جلنار ، ودموعها بعيونها : لكن .. لكن مااايستوي أبوي أهلي بيتنا جوار ربيعاتي كل كل شي هني ليش نسير ؟
أبوها بحزم : الموضوع غير قابل للنقاش.
قام ووشل سويج السيارة وظهر ، أما جلنار أكتفت بانها تطالع أمها اللي مابيدها أي حيلة على القرار اللي اتخذوه ، واللي هو أنهم ينتقلون إلى العاصمة .
فتحت اللاب وبدأت تكتب
(جلنار تتحدث)
"معقولة معقولة نترك كل شي هني معقولة ! ، مب مصدقة أن هالشي سهل عندكم ليش ! ليش أنتم ماتحسون أن هالمكان له قيمة عندنا هالمكان اللي انولدنا وتربينا وعشنا وشفنا ورابعنا وطلعاتنا وزياراتنا وسيرتنا وردتنا وكل شي كل شي والأهم أهلنا أهلنا ! أجدادنا أعمامنا خوالنا خالاتنا نتركم ! نروح لديار مافيه أحد نعرفه ! مب مصدقه كيف أن هالشي يرضيكم "

..
نشت جلنار من هالذكرى اللي ماتفارقها ، بدقه الباب .
جلنار : منو !
أمها : أمج بطلي الباب .

جلنار : حدري أمايه .
أمها : يالذكاء الباب مسكر .
نشت جلنار وفتحته ودشت أمها ، يلست تتطالع ويهه بنتها اللي صاير أحمر من الصياح ، قالت بتغير الموضوع
: يعني لو أن الباب هب مسكر بدقه جي !
جلنار بابتسامة بارده : ماذكر متى سكرته ، شوتبين أمايه ؟
أمها : يلسي برمسج شوي .
جلنار : شو مستوي ؟"

أمها : جلنار أنتي تدرين أن هالموضوع صارله سنين وأنا أجوف أن أنتي تأقلمتي مع الجو هني وكونتي لج مجتمع وربع صح ولا ؟
جلنار تطالعها:..................
أمها : يعني هالتفكير اللي تفكرينه يوميا مول ماله داعي ودريه .
جلنار : أنا ماعتبر روحي تأقلمت ، يمكن عشان كملنا أكثر من 5 سنين وحنا هني ، ولان هالشي مب بيدج أنتي أمايا واللي يقوله أبويه من حقج وحقنا نسمعه وها شوره وماروم أعارضه .
أمها بابتسامه : ونعم الرمسة ، نشي بنسير البلد اليوم .
جلنار بوناسة : والله ! ، جان قلتي باجر .
أمها : هههههه ، ريلج يوديج باجر قومي سوي أغراضج .
نشت جلنار وحطت ملابس وشوزات بالجنطة ، وخذت كتاب الفيزياء (الجميل) وياها عشان بالاحد عندها إختبار وشكلها مابتذاكر موليه هناك ، لان أصلا مابيكون عندها وقت .

"جلنار ، بنيه عمرها 17 ، بثالث ثانوي ، علمي ، البنت الوحيده ف عيلتها ، طيبة بقوة وذكية
شخصيتها قوية ، وعنيده ف نفس الوقت تحب تعاند أمها ، عدم وجود اخوات عندها خلاها دايما تكون بروحها وأغلب قرارتها وأمورها كانت تتخذها بنفسها وتعتمد على نفسها بشكل كبير "
-
-
-
على مذكراتها في اللاب ,,
(جلنار تتحدث)
أنا وحيدة أمي وأبوي ، احب دايما التجمعات العائليه لاني افتقدها بشده ، عماتي 6 هم ، دنيا وفاطمة وجواهر وملاك ورقية وأمل وسلمى أكبرهم ، وأعمامي الثلاثة ، عمر ومنصور ويحيى ،في (البلاد) نعيش في نفس البيت وهالشي اللي خلا فراقي عنهم صعب بقوة )
^

"ببيت خال جلنار راشد ،"
نوف : ههههههههههه الله يقطع بليسج .
خزامى : هههه جفتي ونعم الصحبة انا .
نوف : وايد صراحه ، محد مخربني غيرج خزوومي .
خزامى تطالع مبايلها- : مب كنه الوقت وايد متأخر أحسن أرد البيت قبل لايسوون فيني شي .
نوف : ويين يلسي بعده .
خزامى وهي تقوم : يالله نوفي بسير عنج ، مايستوي أودر أمايه بروحها فالبيت . أبويه هالايام يرد متأخر وخواني كل واحد بروحه .
نوف تتأفف : انزين ، فمان الله ، الا تعالي منو بيوصلج ؟
خزامى بارتباك : أ أ ء أ ء الدريولل بيمر علي أنا قلتله على هالوقت يكون هني
نوف تطالعها بعدم اقتناع : اوك ، تشاو حبي . ، أوصلج لين الباب .
خزامى : يلسي يلسي هب لازم ، أحيده بيتكم .
ظهرت خزامى من الغرفة وهي تمشي قابلت "عبدالله" أخو نوف ، خزامى وقفت تطالعه بدون ماتكمل مشيتها
كان شكلها غلطت وهي تطالعه "ياربييه شحححلاته هالمخلوق ، ايييه جب شوبلاني أنا ما استحي ع ويهي ، ههه أستحي عويهي ! من متى أنا أستحي ع ويهي " وسوت روحها جنه ماصار شي وكملت مشي لين وصلت عند الباب
أما هو كان مبلم ومستغرب من حركتها .
عبدالله : شوبلاها هاي ! ، وسار وراها بيجوفها ، لاحظ انها تتلفت يمين ويسار جنها خايفه من شي .
مشى شوي شوي لين وصل عندها وبدون ماتحس قال : شوبلاج تتلفتين جي محد بيذبحج ترا !
خزامى فخاطرها "ااااااااه عبدالله يرمسني يرمسني أنننننننا" : لالا بس اتريا أخوي يمر علي شكله تأخر .
عبدالله : أنزين دشي داخل أول مايي بخبر نوف وتزقرج .
خزامى بارتباك "يحاتيني بعد": أنت دش داخل اخاف لاشافني وياك يفكر غلط ، وهو هب متأخر اللحينه ياي .
عبدالله أنصدم من ردها ومن تفكيرها : .............. ومشى من دون مايعلق
"شوبلاها هالخبله ، تينن ، ايه شو تينن أنا بعد ، هاي وحده جي ماتخاف ع روحها يالسة برع ، شوعلي أنا طاف مايخصني"

(نوف ، بنت خال جلنار أصغر منها بسنتين تدرس أول ثانوي عمرها16 ، مرحة وعنيده وطوول حياتها تنكت ، خزامى ، ربيعة نوف من صغرها ، عبدالله : أخو نوف عمره 21 ، اهبل دايما يأقلم نفسه ع المواقف ، محبوب العيله وعلى قوله نوف " مدلل ماما" ، مريم أختهم الكبيره عمرها ، 25 ، محمد أخوهم الكبير عمره تقريبا 29 متزوج عنده بنيه ، والباقيات شما 9 سنين وشيماء 12 )

__DEFINE_LIKE_SHARE__

JOLNAR · 12-24-2013, 10:01 AM

البارت ال2
^
(جلنار وأمها وأبوها توهم واصلين)
جلنار : يدووووووه ، "سارت تربع وطاحت فحضن يدتها"
الجده : جلناار يالهرمه وينج وين دياركم مانجوفكم "تطالع أبو جلنار"
أبو جلنار : والله يا يا أميه شغل وجلنار عندها دراسة واختبارات هالفتره وجيه
"جلنار عطته ذيك النظره "
أم جلنار : محد عنده اختبار فيزياء عقب باجر ها !
جلنار ماده بوزها : انزيييييييييين فيزياء شو يعني فيزياء مايباله
أم جلنار وهي ماشيه بتدش داخل تسلم : ههههه مايباله هاه بنجووف الدرجات 
جلنار تتأفف : جفتي يدوه معذبيني دومهم ينكدون علي ويذكروني بالدراسة .
الجده : وانتي لازم تذاكرين عدل عسبت تدشين الجامعه اللي تبينها فديتج .
(جلنار فجت من يدين يدتها) : يدووه وأنتي بعد طلعتي شراتهم .
ومدت بوزها ودشت داخل بتسلم على عماتها .

^
دشت غرفتها وحطت اغراضها وطاحت فالشبريه " على أساس أنها ترتاح"
تبطل الباب بقوة ، وقامت جلنار بخوف ..
مروة : جلللللللللناااااار اشتتتقتلج يالخاييسة .
جلنار : بسم الله الرحمن الرحييييم ، زيغتينننننني مراوي .
مروة : هههههههههههههه أثار الشوق ، شحالج ؟
جلنار بوزت : حاليه مايسر ومن صوبج !
مروة : أفااا ، كل ها عشان زيغتج يالهرمه ؟؟؟
جلنار : سخيفه ، تتحرين ها شويه ترا قلبيه طاح .
اندق الباب ع الخفيف ودشت أميرة ..
: شحححالكم .؟
جلنار : جووفي جووفي الرقة أميرووز ،
أميرة : هههه جلنارووز زين ييتي وحشتينا ياقليلة الدسم .
جلنار : وانتي وحشتيني أكثر ياكاملة الدسم .
أميرة : ياعومريي .
مروة : ويييه صراحة ماعندكم سوالف يا الحليب ومشتقاته .
أميرة : نوفيي تقول أن اليوم بيسوون بارتي حق شمووه انابسير أجوف لو يبون هيلب وجيه .
جلنار : اختربوا البنات .
مروة : نشي بتسيرين ويانا .
جلنار : انتوو سيروا انا برقد شوي وعقب بييكم .
أميرة : مراوي تعالي ، ودريها العيوز هاي .
جلنار : أنتوو أصلا لو تحسو.... " ظهرت أميره وعقبها مروه وسكروا الباب قبل لاتكمل جلنار رمستها"
جلنار " طااااااعع مايسمعون ، أصلا عادي"
وغطت روحها ورقدت ..

(مروة /، بنت خالة جلنار ، عمرها 19 تدرس في الكلية – أميرة بنت خالة جلنار عمرها 23 ماتدرس)

-

في بيت بومحمد
عبدالله يالس ومتساند ع اليدار..
رنن مبايله /
عبدالله : ألوو .
....:عبووود يالهرم .
عبدالله عاقد حايبه : الهرم أنته ، منوو أنته ؟
.....: أفا ياعبدالله أفا ، ماعرفتني ؟
عبدالله : حمممممممدان
حمدان : لا حرمته .
عبدالله : حمدان الرقم مال البلاد وينك أنت ؟
حمدان : توني واصل في المطار .
عبدالله : يارياال ، وماتقول بييك ترياني
حمدان : لا هب لازم ياي اربع البيت اصبر علي .
عبدالله : ههههه والله وتنكت ، اصلا مابيي ايلس هناك قابل حرمتك .
حمدان : لاتسب حرمتي .
عبدالله : بس اسكت ، على أساس ان الحرمة تترياك .
حمدان : يابووي تعال شلني وبسك .
عبدالله : ياينك ياينك ، الا تعال اسألك .؟
حمدان : سألني عقب ، يالله اترياك ............. سكر

عبدالله " مايستحي ع ويهه شو "

" حمدان ابن خالة جلنار ، أخو أميرة ، عمره 25 ، يدرس في بريطانيا ، هو وعبدالله شرات الاخوان ، دومهم ويا بعض رغم الفارق في العمر "

- __DEFINE_LIKE_SHARE__

JOLNAR · 12-24-2013, 10:03 AM

لو لقيت تفاعل ،، بكملكم .

أستقبل انتقاداتكم ورأيكم ,,
أدري أن الباراتات الاولى قصيره __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
بيان تيار الوفاء:استهداف المرتزقة للنساء ممنهج ومقصود و يراد منه إذلال	محروم.كوم	منتدى أخبار المواقع والمنتديات العربية والأجنبية	0	07-06-2012 08:10 PM
بيان تيار الوفاء:استهداف المرتزقة للنساء ممنهج ومقصود و يراد منه إذلال	محروم.كوم	منتدى أخبار المواقع والمنتديات العربية والأجنبية	0	07-06-2012 08:00 PM
ياللي تزعل وانا ماني بغلطان . . . ابداعات منطوق حمد السعيد	محروم	الشعر المنقول	3	02-26-2010 12:13 PM
أنا ومكشات.. فهل كان صراع الأحبة أم ادمان المحبة...السرالكبير	محروم.كوم	منتدى أخبار المواقع والمنتديات العربية والأجنبية	0	02-08-2010 08:50 PM
أرى الأحبة عن دنيايا قد رحلو ..مؤثرة جدا ..ضرورى تسمعوهاأرى الأحبة عن دنيايا قد رحلو	محروم.كوم	منتدى أخبار المواقع والمنتديات العربية والأجنبية	0	08-24-2009 11:00 PM