. تدري/ وش أقسى ، من غدر رمح ، ( جساس ) إنـك : تشـوف الحـب مثـل .. ( المـذلـه ! )

دااانه غير · #1 11-24-2013, 09:12 PM

هذي تكملت رواية:. تدري/ وش أقسى ، من غدر رمح ، ( جساس ) إنـك : تشـوف الحـب مثـل .. ( المـذلـه ! )
للكاتبه:maflo0o03a
هي مااقدرت تسجل بالمنتدى استراحات زايد اقترحت عليها اني انزلها وبنزلها واتمنى تعجكم تراها ما من اول بارت تبون تقرؤونها افتحوا منتدى فزاع وتقرؤو اول شي وهي بطرش لي كل ويكند بارت وانا بنزله
اتمنى تفاعل واتمنى مااتخيبوا ظني
مع تحياتي:دااانه غير

(البارت التاسع)
فالمركز
طارق ياي غصبن عنه لانه امه حشرته انه يسير وياه
روضه شافتهم وراحتلهم
سيف ع طول قال:وين تيلفوني؟
روضه اطالع اللي ياي وياه عقب اطالع سيف:تعال مكتب الضابط
سيف:شفتي الصور صح؟
روضه طالعته بنظره وماردت عليه وراحت وهم تمو يمشون وراها لين ماوصلوا المكتب ودخلتهم
طارق:السلام عليكم
الضابط:وعليكم السلام ..تفضلوا
سيف وطارق يلسوا
الضابط:خير شو عندكم؟
سيف:حضرة الظابط هالحرمه هاي طفرتبييي كل ماسير مكان القاها جدامي عنبوه قلنبها الاماكن تسير وين ما اسير
الضابط:لو سمحت هالشي مايعنيك عندك غير هالشكوى؟
سيف:هيه .. شاله تيلفوني عني تقول صارقنه وانا مب قاصرنه .. وهذا شاهد علي
الظابط:انته شو تقربله؟
طارق:ولد عمته
الظابط:انته شاري التيلفون؟
طارق:امي شارتنه
الظابط يرمس روضه:ييبي تيلفونه
روضه راحت عشان تييبه من القسم الثاني
سيف:والله ياحضرة الظابط اني مب صارقنه وبعد هي مب من حقها تتهمني بالصرقه ..انا برفع عليها بلاغ مايخصني
الظابط يسمعه ومسوله طاف لانه يعرف انه مشبوه فيه ومابيلوم روضه انها اتهمته
روضه ردت وفايدها التيلفون وعطته الظابط
الظابط:هذا تيلفونك؟
سيف :هيه
الظابط عطاه اياه:تقدر تروح
سيف:والبلاغ؟
الظابط:مب مشكله انا بتفاهم وياها
سيف:وانا شو يضمني انك ماتتفاهم وياها
الظابط:يا اخ سيف انته توكل الحيين وخل الموضوع علي
سيف قام:آنزيين مشكور "يطالع روضه بنظره " يلا مع السلامه
عقب يومين
ام طارق تسحب عنها اللحاف وتصاارخ:قوومي بسسج دللع خلييتج تغيبين ع راحتج يلا قومي دااومي
ساره نشت من الشبريه وهي مظايجه طول ذيج الايام غابت عشان ماتشوف شيخه واللحيين ماتعرف شو بتسوي وياها لو داومت
راحت تتغسل وتتلبس عقب نزلت تحت
شافت طارق قاعد
ساره:السلام عليكم
طارق يطالعها وهو مستغرب:وعليكم السلام .. بداومين اليوم؟
ساره:هيه ..يلا انا سايره
طارق:ماتبين تتريقين؟
ساره:لا مالي نفس"وراحت"
سيف طلع من الحجره:انا جني سمعت صوت ساره!
طارق طالعه بنص عين ومارد عليه
سيف:عموه وين؟
ام طارق كانت توها نازله:هكي عموه شوعندك؟
سيف:شحالج عموه
ام طارق:حمدالله .. سير الحق ع ساره شكلها بتسبقك ويا الدرييول
سيف:مع اني كنت بتريق بس خلاص مب مشكله
ولف يطالع طارق وهو فيه ظحكه
كمل وهو ساير صوب الباب: يلا مع السلامه
ام طارق اطالع طارق:وانته متى بيي اليوم اللي بتسير فيه دوامك وتقولي مع السلامه
طارق"ردينا ع طير يلي" مارد عليها
ام طارق تيلس عداله:بالله بتخبرك شو عايبنك ف يلسة البيت؟ حتى ربع ماعندك شو ذي العيشه اللي عايششنها سيير دورلك شغل
طارق:انزيين بدورلي شغل
ام طارق:انزين يلا قوم سير دورلك
طارق:بدوورلي
ام طارق:انزين يلا قووم
طارق:بسير العصر
ام طارق:هيه هيه قول العصر وانته العصر ياراقد يا يالس فالصاله
طارق طفر وقام:انزييين بسسير الحييين
سار وركب سيارته وشغل المكيفات ويلس فيها
..
عليا:يوسف
يوسف:نعم
عليا متردده:ابوك.. من امس وهو مب فالبيت.. هو ينام ف بيت ام حمد؟
يوسف :لاء..هو راقد فحجرتي
عليا مستغربه ليش مارد حجرته :انزين
يوسف:لاتفهمين غلط.. هو قالي انه مايبا يزعجج لانه راد متأخر وكنتي راقده
عليا سكتت لانه مب هامنها اللي هامنها اجابة هالسؤال "هو لييش تزوجني يوم مابييلس وياي "
تنهدت بظيج وهي تقول ف خاطرها" الله يسامحك يا ابوي"
يوسف :عليا!
عليا انتبهتله:يلا سير الجامعه اخرتك "ابتسمتله"
يوسف ردلها الابتسامه
ميثا يوم سمعت حس يوسف ع طول طلعت من الحجره عشان تلحق عليه:يووسف
يوسف:نعم
ميثا:انته تعرف مكان سيف صح؟
عليا مستغربه"منو سيف"
يوسف توهق وتم ساكت
عليا اطالعه مستغربه ليش مايرد وميثا اطالعه تترياه يرد
يوسف ارتبك زياده ويوم يت عينه ف عين عليا نزلهن فالارض:ه..هييه
ميثا:وينه هو؟ لييش مارد البيت لين احين !
يوسف:مأ.مادري ..انا اتاخرت يلا مع السلامه
وطلع عنهم بسرعه
..
خالد طالع من الحمام وينشف شعره بالفوطه:ها مايد .. قول حق ميثا تي تنظفلي الحجره اباها تلمع ابا يوم ادخل اشوف وويههي فالارضيه
مايد زاخ الفون وينافخ:افف .. اصلا هي ماترد علي
خالد سمع شي يهز عالكنبه وسار يشوف شو هالشي وطلع فونها:ماترد لانه تيلفونها هني
مايد:هيه صح نسيت انها فرته هني
خالد بابتسامه عريضه:انا بوصله بيتهم
مايد سحب التيلفون من ايده:لا حبيبي استريح .. انا اعرف شو اسوي
..
عند الجامعه
قاعده فالسياره تترياه ايي
اول ماشافته نزل من سيارته شلت الغتره اللي عدالها وتلثمت ولبست الكاب ونزلت
تأكدت انه محد شافها انها نازله من السياره وراحت داخل وهي تمشي بصعوبه لانه البنطلون مال لبس الفراشين وسيع عليها وطويل
يلست تمشي فالممرات وشافته توه داخل الكلاس جان تدخل وراه
وقفت عند الباب وكانوا شي شوية طلاب والدكتور سالم موجود
سيف توه داش ويسلم من طرف خشمه:السلام عليكم
الدكتور سالم طالعه كره:وعليكم السلامه
خالد كان توه ياي ويوم شاف روضه واقفه عند الباب دزها بدفاشه وطالعها باحتقار:رووح شغلك ليش واقف هني
دخل وهو يسلم ع الدكتور:السلام عليكم دكتور
الدكتور سالم تغيرن ملامح ويهه بابتسامه:وعليكم السلام "يطالعه عقب يطالع سيف"
خالد ابتسمله وروضه حست انه بينهم شي "انا لازم اراقب هالولد"
يلس عدال سيف وروضه تمت اطالعهم
دخلت وراحت امين ماقاعدين عشان تقدر تراقبهم
وواقفه واطالع
الدكتور سالم شافها وعرف انها روضه وانقهر لانه مايبا يشوف ويهها :انته شو عندك هني؟
روضه كانت اطالع خالد وسيف ومب منتبهتله عقب انتبهتله "قطع حبل افكاري" خلت عمرها ماتعرف عربي وتاشر ع الارض انها بتخم هني
الدكتور سالم:خم بعديين يوم يخلص الكلاس يلا رووح
روضه عطته نظره لانه متعمد يسوي جي وطالعت سيف وخالد عقب ظهرت
سيف:شو سالفته هالفراش والله بقومله تراني
خالد:شرايك فالبريك نحن والشباب نزخه فالحمام ونستلمه ظرب
سيف:لا شوف انتوا زخوه حقي وانا اللي بظربه
خالد:ترتوب
..
عند فهد
فهد:لحظه ناصر "يرمس فالتيلفون وهو ساير بعيد" .. انتي ويينج ادقلج ماتردين
ثريا:شوتبا؟
فهد:ابا اشوفج واطلع وياج
ثريا:كم تدفع؟
فهد:كالعاده يا 1000 يا 500
ثريا:لا
فهد:كم تبين؟
ثريا:3000
فهد :اوووف وايد .. انتي الا طالعه وياي لا وبعد بونسج ببلاش شو تبين اكثر
ثريا"عقب محمد ومنصور ماقمت ايمع فلوس وايد .. شكلي بردلهم وبطبه هذا" :انزين خلاص مع السلامه
يت بتسكر
فهد:لالالا صبري ..انزين شورايج 1500
ثريا سكتت وهي تفكر
فهد:ها شوقلتي
ناصر:فههد يلا بنتاخر
ثريا:انزين .. تعال فلييل
فهد:انا بتفاهم وياج عقب عالوقت يلا مع السلامه
شيخه طلعت وهي تركض :نااصر نااصر
وقفت وهي تتنفس بقوه:زين لحقت عليك
ناصر يطالع فهد عقب يطالعها:شو عندج؟
شيخه:الباص راح عني
ناصر:يلسي فالبيت
شيخه:لا ابا اداوم يمكن هي بداوم اليوم
ناصر يطالع ففهد وهو طفران منها:فهد
فهد:أمر
ناصر:بتوصلها؟
فهد بمغايظ:اوصل هاي البشكاره ؟ .."يرفع تيلفونه اونه بيتصل" لحظه بشاور الحرمه قبل
شيخه اطالعه وهي رافعه حاجب:احيين انا بششكااره ماتشوف عمرك جنك هندي كاشخ
فهد بخقه:انا مب هندي كاشخ .. انا كل البنات يخقن عليي انتي بسس غيرانه لانج مب جميله
شيخه شهقت:احين انا غيرانه وع شو اغار دام انك زين من برا وخربان من داخل
ناصر عصب:شيييخه
شيخه سكتت وتمت وارمه "يعني مادافع عن نفسي" :انزين بتوديني ولا؟
فهد:ركبي ورا فالدبه
شيخه فجت عيونها:شووه!
فهد:بتركبين فالدبه اركبي مابتركبين يلسي ف بيتكم
شيخه اطالع ناصر:ناصر شوف ربيعك
ناصر:انا مايخصني السياره هب سيارتي
شيخه:اففف "بسس عشانج ياساروه بركب " انزيين بركب
فهد ظحك بشماته وهو يططالعها تركب فالدبه
ركبوا السياره وتم كل خمس دقايق يطالعها من المنظره ويظحك وهي مييته من القهر "ماعليه بخرب شي ف سيارتك"
يلست اطالع وادور شي تخربه
"المشكله الدبه فاضيه"
لقت باكيت زقاره وشلته وهي منصدمه"فهد يدووخ .. اكيد ناصر مايدري عنه اكييد بيعصب لو درا "
ابتسمت ابتسامه خبث ونطتلهم :ناااصر
ناصر:شو ؟
شيخه ترفع باكيت الزقاره:لقييييت هذا فالدببه بس شكله فاضي"تبطله" لحظه بشوف "شهقت" لاء مب فاضي
فهد بقق عيونه"الله ينطبج تبيين تسويلي مشاكل"
ناصر لف ع طول صوب فهد:فهد انته ادوخ؟
فهد بسرعه:ماادووخ ها ييمكن واحد من اللي يحطون السامان فالدبه نساه بالغلط وبعدييين اختك شو يخصها تطالع وتنبش
ناصر :هيه صح "عقد حوايبه" شيييخه
شيخه ماسمعت اللي قالوه لانه صوتهم كان واطي:نعم!!
ناصر:دواج عندي فالبيت
شيخه انقهرت وردت تيلس مكانها"افف بغيت امشكله مكشلني"
..
دخلت الصف وهي تمشي وعيونها فالارض مافيها اطالع حد ولا تكلم حد
يلست تمشي لين ماوصلت مكانها
سميه:شرففتي
شما:سمعنا انه حبيبج ودرج
سميه تظحك
ساره اجاهلتهن وراحت تيلس وراهن
سميه لفت ورا وهي ترمسها:اييه مكانج جدامنا
ساره طالعتها وماردت عليها
سميه تكلم شما:شكلها ماتعرف تفرق بين جدام وورا
شما:لاتلومينا مافيها عقل
ظحكن وهن يطالعنها عقب لفن عنها
شيخه دخلت الصف:السلام عليكم
حطت شنطتها وهي اطالع الطاوله اللي عدالها"حتى اليوم مب مداومه"
تأففت بصوت عالي ويت بتيلس
سميه تأشرلها وراها
شيخه اول ماطالعت الطاوله اللي ورا سميه شهقت بفرحه وع طوول سارت عند ساره بلهفه:ساروووه انتي حييه.. ويينج ليش ماتردين علي يوم ادقلج؟ ليش ماداومتي؟ كنتي مريضه؟ سلامات حبيبتي بسس ليش جي تخوفيني علييج ؟تعرفين اني طول ذيج الايام مارقد لاني احاتيج .. خبريني حرمة ابوج سوتلج شي؟ .."استغربت انهاماترد عليها"شوفيج؟ ليش ماتردين علي
يت منيرة صوبهم:هااي سارووتي آي ميس يو وايد ..هيه صصح ليشش تقوليلي انه ماي بيبي اخوج واجذبين علي والله زعلتيني منج
شيخه عقدت حوايبها:منوور سيري ترا مب وقتج
ساره مسكت ايد منيره وقامت :خلينا نطلع
شيخه انصدمت من حركة ساره"ليش تسوي جي.. اكيد انا مسويه شي.. انزين انا شو مسويه!"
منيره:اوكيييه
راحن وشيخه اطالعهن
سميه:هههه خلااص بعد اليوم ماشي ساروتي
شما:هييه ههههه .. خلاص ساروتي راحت عنج
شيخه عصبت:سكتن انتن الثنتيييين تراني مب ناقصتنكن
..
فبيت بونادر
عليا وميثا وبونادر يالسين يتريقون
بونادر:وانتي ليش مب سايره الدوام لين احين؟
ميثا:الحين بسير
عليا:انزين خلها تكمل ريوقها عقب بتسير
بونادر:لا اباها الحيين تسيير .. تسير تشتغل مب تيلس فالبييت
ميثا قامت وراحت تتغسل عقب ردتلهم:ابويه انا بسير تامر ع شي؟
بونادر:سيري سيري توكلي وداومي دوام كامل مابا اشوفج مداومه نص دوام ويالستلي فالبيت
ميثا اظايجت من كلامه:ان شالله
وطلعت
ركبت السياره وشغلتها"ياربيي وين اروح يوم انا ماقدر اداوم .. وين بسير الحين؟شو بسوي طول هالوقت..كله من علييا ابووي راغني بسبتها.. اكييد قايلتله شيي عني"
بونادر يدق بونيت السياره
ميثا طالعته
بنادر:يلااا سيري شو اترييين
ميثا:ان شالله ان شالله
حركت السياره وراحت "شكلها صدق مسوتله شي..اكيد ساحرتنه ,,أخخ يا ابووي لييش عرسست انته تعرف انه نحن ياالله يالله فلوسنا تكفيينا .. حرام علييك اللي تسوييه فيينا "
ظربت بريك قوي وطأأأأخخخ
نزلت من السياره
وسارت تشوف اذا تعورت السياره اللي جدامها ولالا
شهقت"تعوررت واايد..ياويلي الحيين بيدفعني الدفايع"
نزل من السياره وميثا ع طول راحتله عشان تستسمح منه
ميثا:السلام عليكم.. ا السموحه منك اخووي ماأ "يوم شافتت ويهه شهقت" انتته "عقدت حوايبها ورااحت عشان تركب سيارتها"
مايد :صصصببر ..
ميثا وقفت وهي عاطتنه ظهرها ومجتفه ايدها وتحرك ريلها بتوتر
مايد تقرب صوبها وحط التيلفون ف ايدها:نسيتي هذا ف بيتنا
ميثا مدت ايدها عشان تعطيه اياه ويت بترمس
مايد قاطعها:سمعيني .. اجازتج بكنسسلها وبخلييج ترديين لدوامج بسس تيين تشتغلييين خداامه عندي
ميثا طالعته باحتقار "بعده يرد يقول خدامه "
كمل بابتسامه قهرتها:التيلفون هذا مب بكيفج تفرينه متى مابغيتي غصصصببن عنج تخليينه عندج وتردين عليه يوم ادق .. وترا الدعمه مب شويه بسس هالمره بطوفها لج لكن المره اليايه بتعرفين شو بيستوي ويلا احين تقدرين تسيرين دوامج
ميثا براكيين تثور داخلها تحسس انها تبا تفر الفون وتكفخه ع ويهه بسس يودت عمرها
مايد لاحظ انها مغتاظه:هه لاينطلج عرج .. يلا سيري وقفتنا فالشارع جي مب حلوه شو بيقولون الناس عني
ميثا اظايجت وراحت تركب سيارتها وهو بعد
وسارت الدوام
"كلاامه واايد يققهر يالسس يذلني وهو اللي محتايني .. هو يدري انيي مب محتايتنه عشان جي يالس يمسكني من ايدي اللي تعوررني .. والله لو مب الدوام جان ماخلييتك تذلني جيي ..انا بسسكت عشان اهلي "
..
شوو سالفت ميثا ومايد؟؟؟

وساره ليش ابتعدت عن شيخه فجأه؟؟
سيف ويوسف وطارق وبونادر وعليا وثريا شوو دوورهم ؟؟؟
اتمنى اوجد تفاعل
مع تحياتي:دااانه غير

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ماركينا يلتحق بصفوف «فياريال»	محروم.كوم	منتدى أخبار المواقع والمنتديات العربية والأجنبية	0	08-03-2010 08:40 AM
:: الحـب مايسكـن قــلوب ومحــاني .. الحـب اسمـه "عاطفة" تسكـن الـروح ::	BiN_RaSHiD	عدسة الاعضاء , كاميرا الاعضاء	15	12-03-2009 10:32 AM
هـل تـعـلـم إنـك تـشـرب الـخـمـر ؟‎ وانت لا تدري	محروم.كوم	منتدى أخبار المواقع والمنتديات العربية والأجنبية	0	09-11-2009 07:40 PM
أنا أهنيك مـن قلبـي قـدرت إنـك تبكينـي	عيناوي حبتين	الشعر المنقول	10	03-19-2009 10:30 PM
تدري وش أقسى ما يمرك يـ الإنسان إنگ تشوف الناس تبكي { عشانگ }	яôǾô7-έłĢsёёđ	هواتف , مسجات , وسائط , برامج , ثيمات , نغمات , بلوتوث	26	12-26-2008 03:28 PM