كيف بنسـآ حبهم . .

bskat · #1 07-16-2013, 04:41 AM

كيف بنسـآ حبهم . .
اول روايه انشرها وليست اول روايه اكتبها . .
" كيف بنسـآ حبهم "
روآيتي دمجت فيها من الواقع والخيال قد تكون حزينه او ربما تكون جريئه في نظر البعض
عند كتابتي لها عشت معها كلمه كلمه واتمنى ان تصل كلماتي ل قلوبكم وتعيشونها معي . .
.
.
البـآرت الاول ..
صـرآخ ابوها وصـيآح امها ونظرات اخوانها الصغار لها حطت ايدها ع ثمها مصدومه من الي تشوفه والي تسمعه . .
رجعت بذاكرتها ل قبل عشر دقايق . . .
مستانسه ويا اربيعاتها تلعب وتضحك وتسولف اتصلبها اخوها : خوله ظهري انا برع , , وسكر الخط بدون لا يسمع ردها ..
خلود : اوهو خولو وين بتروحين تمي ماشبعنا
ريم : هيه والله خولو اتصلي ب امج رمسيها يلسي شوي
خوله : لا ايه من متى انا عندكم من العصر والحين الساعه 9 حميد بيذبحني لو مارديت وياه
سميه : اوهو انزين اقولج اتصلي ب امج وانا برمسها
خوله : امم انزين بس اقولكم رمسسوها انتو اخاف تهزبني
اتصلت خوله على البيت كذا مرهه محد رد عليها اتصلت على تلفون امها وبعد ماترد فقدو البنات الامل وودعو بعض ووعدتهم خوله اول ماترد ترمسس امها وترد لهم بما انهم جيران والبيت ملاصق بيتهم . .
عن الباب . .
خوله وهي ميته من الخوف : حميد اسفهه والله تـأخرت عليك بس البنات كانو يبوني اتم وياهم

حميد : هه لا ماعليج خوله امم بقولج شي قبل ماندخل البيت
خوله وهي زايغه من نبرة حميد : ححمييد ماما فيها شي !! حد من اخواني فيه شي ؟
حميد : لا كلهم بخير وسهاله امم خولهه ابويه معرس ونحن ماندري
خوله :لالا حميد اكيد تمزح تسستهبل انته ابويه يموت ف امايه شو تقول مسستحيل اصلا
حميد وهو ماسك ايد اخته : لا خوله ما امزح هالسوالف مافيها مزح
خوله وهي تغمض عيونها ودموعها تنزل: حميد اكيد هالي متصل يبا يخرب بين ماما وبابا اكيد حميد لاتصدقه اصلا حتى ماما ماصدقته
حميد: منو ها الي متصل شو تقولين انتي !!!
خوله : هي حميد اتصل واحد اليوم ب ماما يوم كنت يالسه ع الكمبيوتر الظهر سمعت ماما ترمس ومعصبه ويوم يت سالتها قالت لي ها واححد يبا يخرب بيتنا ويقول ان ابوج معرس
حميد : خوله مابا ابويهه يعرف عن هالمتصل سمعتي
خوله وهي تشاهق : اصصلا ماما قالت حق بابا يوم رد من العزبه وبابا عصب وقال بيطلع الرقم حميد لاتصدق والله هذيل يجذبون بابا يحب ماما ويحبنا مابيعرس ب وحدهه ثانيه غير ماما
قامت من سرحانها على صوت اخوها وهو يزاعق ويصوت عليها : خولو خولو خوووووووووووولوه ويهد يارب صصمخه !!!!
خوله : هااااااااهاااااا خالد خير شو مسوي اليوم شو من مصيبهه يابنها لنا
خالد : امايه تقولج نشي زهبي الغدا هي بتروح ترقد ابويه وحميد يايين فالدرب
تنهدت خوله وقامت تزهب الغدا حق ابوها واخوانها وفخاطرها تقول " افففف افف اففف لي متى بتم على هالحال انا لين متى بتم بس اشتغل ف هالبيت شلي وحطي وسسوي "
وصل ابوها البيت وهو معصب ويزاعق يبا ماي : خولهه خالد اعويش هاتولي مايي حسبي الله على ابليسكم لا راحه فالبيت ولا راحه فالدوام
ركضت خوله وفايدها قلاص الماي حق ابوها وهي زايغه : ها ها بابا تفضل اسفه والله كنت فالمطبخ
ابتسم بوحميد ف ويهه خوله : فديتج اميه والله محد شراتج فديت هالويه انا من اشوفج ارتاح
.
.

خلونا نوقف لـحد هني ونتعرف ع الشخصيات الرئيسيه ف روايتنا . .
خوله : انا خوله عمري 17 سنه اكبر خواتي يقولون اني دلوعه ورقيقه بس احس العكس ! شايله مسؤولية البيت ومسؤولية اخواني من يوم عمري 12 سنه
حميد : وانا حميد اخو خوآلي عمري 20 سنه انا البجر والخبزه المحروقه مثل مايقولون شال حمل البيت مع خولو من وانا صغير بتعرفون السبب مع الايام . . يمكن اكون ف نظركم قاسي بس الزمن علمني اكون قاسي شوي
خالد : امم انا خلود الي مامني فايده كلهم يقولون انته سخيف وعمرك مابتسستوي ريال الا خولو فديتها دومها ادافع عني وتوقف ف ويهم حنونه علينا وتخاف عليه انا بالذات من نسمة الهوا عمري 13
عوشه : انا عواشي خولو تغار مني ليش ماعرف يقولون اني ام لسان ! اعرف اسرارهم كلهم ههه يحسبوني ما افهم صح ياهل وعمري 8 سنين بس افهم كل شي يصير حولي واسوي عمري غبيه
.
. __DEFINE_LIKE_SHARE__

bskat · 07-16-2013, 05:20 AM

البـآرت الثانـي . .
.
.
خلونا نروح بعيد عن بوظي شوي . .
ف بيت يد خوله . . والي يكون ف دآر الزين
.
.
........: اوهو الحين ابويه يباني اتم وياه وامايه تقولي ردي الفجيره كم قطعه استوي ها قوليلي
خوله : افففف عميمه ردي الفجيره عند امايه يديي قاسسسسسي وباجر يمكن يتزوج ويعقج ف الشارع

........: خولو تستهبلين !! شو بعد يعقني فالشارع بنته انا ايه انا لو شبرت خطوه عند الباب ابويه بيدفني بعد تبينه يعقني فالشارع
خوله بكره : هيه هاي يدي من عرفته وهو كل يوم حرمه وملتهنج من بيت ل بيت بس مايباج تروحين عند امايه عميمه مياري افهمي ياخي ييييييييييدي مايحبكم لانه امايهه هندييه
ميره بعصبيه : خولو الرمسه وياج مامنها فايده زولي عن ويهي
سكرت ميره الخط ف ويه خوله وهي معصبه صح خوله على حق ابويه من متى يحبنا نحن على قولته عيال الهنديه مب كفايه طرد خليفه لانه عرس بوحده مب من القبيله افففففف متى الله ياخذني وارتاح
.
.
نتعرف على بيت يد خوله . .
ميره : انا بعرفكم على اخواني انزين اول شي نبدا ب سلطان . .
سلطان : البجر اخويه الكبير سكانه حرمته لو قالت له عق روحك فالبحر بيقول لها ان شاء الله
حرمته شويخ واآآآآآآآآآآي كيف اكرها بس طبعا ماقدر اقولها اكرهج او حتى ابيين لها سلطان اخويه من ابويه امه عذيجه الله يرحمها ربته امايه من عقب ما توفت امه
عيال سلطان : محمد عمره 26 بس ماله شخصيه والبركه ف امه . . . عيسى : ريال بمعنى الكلمه شوره يمشي ع الكل كلهم يخافون منه له هيبه وشخصيه يقولون انه يشبه اخويه بو حميد ف كل شي عمره 24. . سميه : عمرها 22 كريها بمعنى الكلمه مسويه عمرها مطوعه وهي من تحت ل تحت . .
خليفه : بوحميد هالانسسآآآآآآآآآآآآآآآن حنون وطيب بس ف نفس الوقت عصبي وشري له هيبه عجييبه فري شوي غير عن باقي اخواني
حرمته فطيم طيبه على نياتها غبائها وصلها للي هي فيه . . عرفتو عياله قبل . .
موزه : ختيه العوده بس ماحبها انانييه بدرجه فضيعه وتغار وايد شريه حتى عيالها مايحبونها وبس تبا تضارب الحمدالله انها فالشارجه مسيطره على ريلها
عيالها : ذياب عمره 18 طبعه شرات طبع امه . . سلامه : غامضتني هالبنت كل يوم تتصل تتشكى من امها عمرها 17
ميره : الي هي انا فديتني عسسسسسسسسل انا عسل بس مالت علي حظي كل يوم ف بيت والبركه ف ابويه وحريمه عمري 18 اقرب وحده لي خولو بنت اخويه خليفه
.
.
خوله : مااااااااااامااااااااا ابا اظهر ويا ريمو
ام حميد : خبري ابوج
خوله : باااااااااااااباااااااااااااااا بظهر ويا ريمو
بو حميد : شاوري امج
وقفت خوله فالنص وزاعقت : مممااما بابا بظظظظظظظظظظظظظظهر عطوني كلمه وحده
بوحميد وام حميد : روووححي يالصدعه
راحت خوله تتلبس وتقول ل اربيعاتها
وقفت فنص الدري وهي تسمع امها ترمس ابوها : والله ماعرف شو صابها هالبنت
بو حميد : خليها خليها يا فطيم وسوي لها الي تباه مافينا ترد ع ايام اول وترد ل وحدتها
ام حميد :هيه والله صدقك يابوحميد يالله يارب وفق الي ظهر بنتي من حالها ويسر امره يارب ياكريم
ابتسمت خوله وهي تسمع امها تدعي ل حبيب قلبها وصديقها واخوها والي وقف وياها وطلعها من عزلتها صح الي تسويه غلط بس ماتقدر تعيش بدونه 3 سنين مب شويهه
ضربت خوله يبهتها : اوييييييييييييييييه انا كيف نسيت عبود ماخبرته اني بظهر
ركضت غرفتها وشلت الفون واتصلت ل عبدالله
خوله : الو !!
عبدالله وهو راقد : همم
خوله : امم عبادي انا بظهر ويا اربيعاتي
عبدالله : اوكي اوكي
سكرت خوله وهي تناقز الحمددالله انه راقد ولا مابيخليني اروح

# هذي بداية الروايه واتمنى انها تعيبكم . . __DEFINE_LIKE_SHARE__

bskat · 07-17-2013, 03:34 AM

البـارت 3 . .
.
.
ظهرت خوله ويا اربيعاتها وهي مستانسه وتفكر ف حالها كيف كانت وشو صارت . .
نرجع مع خوله ل قبل 3 سنين ..
.
.
يالسه بروحها وملانه وهي تسمع صراخ ابوها وامها وضرابتهم الي ماتخلص تاففت وفتحت الاب . .
خوله :امم شسوي الححين حتى النت ملل !!
اتصلتبها اربيعتها مريم
مريم : الو خولو واعيه !
خوله : هلا مريم لا امري
مريم : خولو ملانه بتحدرين معايه الجات !؟
خوله : لالا مريم شو جات اخاف انا والله حميد وابويه لو عرفو بيذبحوني
مريم : مالت عليج يلا باي يالديايه
سكرت خوله وهي تتحرطم : اونه احدري جات هالي ناقص اخر مره حدرت انضربت ضرب اليهد سكتت شوي وهي تفكر امم ليش ما احدر يلا يوم واحد ماياثر خلني استانس شوي
حدرت خوله الجات وتمت تسولف ويا فلان وعلان من سوالفها يبن انها ياهل دخل لها واحد فالخاص وطلب منها ايميل لها فكرت شوي بعدين رفضت
تمت ترمس هالواحد للفجر بدون ماتحس اشتكى لها الحال واشتكت له الحال عطاها ايميله وقال انه يبا يرمسها دوم تردد خوله وبعدين ضافته عندها وكملو سوالف قام ينصحها ويحاول يطلعها من عزلتها ووحدتها لين ماحبته وحبها . . وصارت تشوفه كل حياتها وماتستغنى عنه
.
.
انتبهت على ريم وهي تناديها : خوله حوووووه خولو وين طرتي يلا نزلي وصلنا
خوله : هاه هي اوكي اوكي بنزل
رن تلفون خوله طالعت الفوون بخوف : أأ ريم انا بروح الحمام شوي وبي
ريم بلامبالاه : روححي روحي الحمدالله والشكر مب طبيعيه
راحت خوله وريم صدت على امنه : امون بلاها خولو ! ماتلاحظين انها وايد تسرح و من يرن فونها تشرد
امنه: ريمو خولو مب من النوع الي تفكرين فيه خليها ب حالها ماصدقنا انها ردت شرات قبل
ريم : اقققققققققققققص ايدي اذا السالفه مافيها انّ
امنه: ارتاحي عيل وقصي ايدج هاي خوله من عرفت ب مرضها وهي جي وها حالها
رمست خلود والي كانت تسمع بصمت : الله يشافيها ويعافيها وانتي ريمو مايخصج ب خوله خلاص عاد
ردت لهمم خوله وهي زايغه : اا بنات انا لازم ارد البيت الحين سي يو
استغربو البنات ب استثناء امنه الي تعودت على خوله ف نص الطلعه تقول برد البيت
ريم : والله العظيم مب طبيعه اقولكم في شي

امنه وهي تغطي على خوله : اوهو ريمو بسج عاد لاتنسين انها مريضه يمكن تعبت
ردت خوله البيت وكملو البنات حواطه . .
.
.
بيت يد خوله . .
ميره: اففففف اففف افففف شو هالحاله لا تلفون ولا انيس ولا ونيس يارب خذ روحي بس وريحني
دخلت عليها سلامه وهي تضحك على خالتها الي دوم تتحرطم وتدعي على عمرها وعلى حظها
سلامه : خالو بلاج بلاج استهدي بالله ههههههه والله تضحكيني يوم تدعين على عمرج
ميره بحزن : تراكم عايشين يوصلكم كل الي تبونه الا انا وحليلي حتى امايه حارميني منها
سلامه وهي تنهد : الله كريم مياري احمدي ربج غيرج مب محصله مكان يلمه
ميره بعصبيه : وانا كل ماقلت لككم شي قلتو لي غيرج غيرج غيرج وانا شو يخصني فالغير خلوني اعدل حالي قبل عقب اشوف الغير
طلعت ميره وهي معصبه وزعلانه على حالها ولين متى بتعيش جي كل يوم ف بيت وكل يوم مع حرمة ابو يديده
وقفت ع الدري وهي تشوف البنت الي داخله بيتهم وكملت دربها ولا اهتمت منو يعني اكيد وحده من حريم ابويه
البنت : احم السلام عليكم !
ميره : افف وعليكم السلام
البنت : أأأ انتي ميره ؟!
ميره : هييييييييييييه انا ميره واكيد انتي حرمة ابويه اليديده خير شو تبين مب فاضيه انا
البنت وهي مستحيه و مصدومه من اسلوب ميره : اا ميره انا مب حرمة ابوج
ميره وهي منحرجه : اا السموحه منج حياج منو انتي .؟
البنت : احم انا اربيعت ميثه
ميره وقفت وهي معصبه: والخيبتين ميثو بعد عندها ربع اتصلي ب ست الحسن خليها تنزل لج ماعندي وقت للاشكال هاي
نزلت ميثه على صراخ ميره : هييييييييييي انتي هيي وين تحرين عمرج تزاعقين جي يلا روححي قولي حق البشكاره تزهب الفاله
ميره وهي متخصره : والله هالي ناقص بعد ميثو تقولي زاعقي وروحي ولا تزاعقين هييي انتي تراهه بيت ابويه اذا ماعندج خبر
ميثه بدلع : وبييت ريلي يا قلب ابوج . . دزت ميثه ميره وقامت ترحب ب اربيعتها العنود وعطت ميره اكبر طاف
.
. __DEFINE_LIKE_SHARE__

Itzz Nweer · 09-26-2013, 09:19 PM

حلوه الروايه وامممم ياريت تكملينها صح مافيها تفاعل وايد بس حلوه ياريت تكملينها اختي <3 __DEFINE_LIKE_SHARE__

عاشقة حضرة سموه · 09-27-2013, 06:48 PM

تتتتتتتتتتتتححححححححمسسسسسسسسسسست لللرووووووووووايه تسسلممم ايددج , ف انتظارج الغلا , والله حبيتها الروايه من الخاطر __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
وربي لأدمر حبهم ...... }~	تعبت آقول وآحشني ،	قصص و روايات	123	10-19-2013 05:36 PM
مواطن يتهم طبيباً بارتكاب « خطأ طبي »	محروم.كوم	منتدى أخبار المواقع والمنتديات العربية والأجنبية	0	11-20-2011 08:30 AM
رجل يتهم زوجته بالتزوير في قضية نفي نسب	محروم.كوم	منتدى أخبار المواقع والمنتديات العربية والأجنبية	0	08-19-2011 06:10 AM
بني ياس يتهم «القرعة» بإقصائه من الكأس	وحداوي البال	اخبار محلية و عالمية	11	03-06-2010 02:17 PM
بنت تحب بنت مثلها ؟ شو نهاية حبهم ؟	» βỊη άℓ đόόŁα «	الحوار والنقاش - الرأي والرأي الآخر	13	04-15-2009 03:59 PM