السلام عليكم ورحمة الله وبركاته
صبحكم الله بالخير ومن العايدين الفايزين

الموضوع هذا عبارة عن توضيح مدى سذاجة بعض التجار - الله يصلحهم - في تلفيق الاسماء ونسبها الى شركات أو دول عظيمة لتسهيل بيع بضاعاتهم المتكدسة في المخازن . وللأسف نجحوا في غش الكثير من الزبائن و عذرهم المعروف ( ارخص لك ) .

مواقع البيع مليانه من الدرابيل المغشوشة تحت اسم ( ابوتاج / الياباني / الجاكور ....الخ
ومن زود البجاحه في التاجر أو البايع حاط الصورة ومكتوب على السلعه بالعربي - ابوتاج الأصلي - لا والخط حتى متعوووب عليه جدا

ياخي اللي واثق من سلعته مايحتاج يكتب أصلي وبخط يسد النفس بعضهم وده يكتب عليه ملكي

ولما تستفسر من البايع وش نوعيته يقول ياباني . طيب اوكي وش الماركه حقته يقول ابوتاج
طيب من وكيلة ؟؟ مافيه وكيل يفتخر بأنه يبيع ذا النوعية . لأنها اردى انواع الدرابيل الصينية ولايمت لليابان بأي صله . ياخي ماعليه ولاحرف ياباني حتى كرتونه (وش ذا اليابانيين اللي يحبون العربية ).

حاولت ابحث عن الدربيل ابوتاج الأصلي اللي يقولون انه حق القديمين في المواقع الأمريكية وتواصلت مع هواة جمع الدرابيل وحفرت الويكيبيديا مالقيت شركة بإسم ابوتاج الأصلي .

لقيت واحد عارض دربيل عليه ختم تاج لكن هل هو الأصلي فعلا والا حقنا الأكثر اصالة