بسم الله الرحمن الرحيم
السلام عليكم ورحمة الله وبركاته
قال تعالى (وَكُلُوا وَاشْرَبُوا وَلا تُسْرِفُوا إِنَّهُ لا يُحِبُّ الْمُسْرِفِينَ) (الأعراف:31)
(لا للصيد الجائر)
.......................
قبل البدء بالتقرير اود ان اشكر جميع من قام على هذه المسابقه
سواء منضم وداعم ولجنه حكم
وهذا ليس بمستغرب عليهم
ولا اقول الا كم قال ابن فطيس
بيض الله وجهه راعي الفكره = عزالله انها تنحسب لحسابه

التقرير مختصر في الصور والتعليق ولعلي استعجلت في ذلك من باب رد جزء من جميل اصحاب المسابقه ليكون محفزآ لباقي اخواني المتسابقين للمشاركه
واعتذر ان كان حصل قصور

في البدايه تعلمون مدى ولع الصقار بمقناص الطير وماله من نكهه خاص لديه
لذلك تكرر الاتصال بأخويانا وتحفيزهم على مقناص الكراوين خصوصآ بعد انتهاء مقناص الوحوش
وتم الاتفاق على المقناص في يوم من الايام وكانت مده المقناص اربعه ايام
صباح يوم الانطلاق والطيور المشاركه




انطلقنا وكان الموعد في اول محطه
وهنا اتذكر بيت شعر لمحمد بن فطيس

على الوعد فأول محطة طوابير =وفي كل موتر عزبة فوق قسام



كملنا نواقصنا وشيكنا المواتر وعلى بركه الله انطلقنا

اثناء الطريق جاتنا هاك المزنه المبروكه



كملنا طريقنا بعد ما توقفنا بعض الوقت من شده المطر

والحمد لله الفال طيب مطر وغيم وجو عليل
هزعنا عن الخط وتوجهنا شرق على حروه المطر
اجتمعنا وتشاورنا وامرنا علينا
وكانت هذي اخر نقطه تجمع




انطلقت القافله




وصلنا ارض المقناص وكانت مربعه يالله لك الحمد




وهذه بعض من صور القاع










اخترنا هالطعس للممسى




اصبحنا واصبح الملك لله وتوجهنا للجهاز
وفي الطريق مرينا بالبل وكانت سارحه




وفجأه الا اللي يأشر بنور السياره
ويراسل اميرنا واحد من العيال رح يمه شف لا يكون متعطل
راح خوينا يم الرجال وسلم عليه
رحب راعي البل بخوينا وقال تعال عاوني بالخلفه احلبها لكم
وما قصر حلب لنا الخلفات الطيبه والحليب السكر ما شاء الله الله يبارك له في حلاله



كثرنا بخيره وتوجهنا يم الجهاز
والا عنده جره واحد



وابشر العيال بالجره والا واحد من العيال يصيح يقول
طارت ..طارت
والا هي ثلاث كراوين
وقعت ..وقعت
ويقدموني العيال بالهدد بيض الله وجيههم
وافرد واحد منها واهد القرناسه
وماشاء الله عوايدها ما تخيب ظني فيها




يالله يالي عليه الدور جهز طيرك
ويهد خوينا فرخ جير
وبسم الله عليه سم الكروان



الثالث منهو عنده
ويتقدم خوينا معه قرناس صاطي
مبروك يابو عبدالله




استانسنا وكان الفال طيب
ويش الرأي يالربع
شار اميرنا بديره قريبه وبها حروه مقناص
توجهنا ويوم وصلنا جانا ايعاز انتشروا

واخذنا شوي الا الامير يبشرنا بواحد
ويجهز طيره فرخ شاهين ويهد
سبوق ما شاء الله




دونا غيره ولا عينا شئ وشويات الا وهاك المزنه الطيبه جايه من غرب وصلتنا وامطرت والحمد لله
خوينا راعي القرناس يقول طيري تعب اليوم في الطرد ولا زم يتسبح



اميرنا: يالربع المطر شكله جنوب امس وقبله نبي نتوجه
قلنا :سم
توجهنا وجينا هالك الوادي سايل قبل يومين

وشوفت الماء شئ ثاني



كملنا طريقنا ولاوصلنا الديره الا بالليل
امسينى وشبينى النار علينا برد ولزوم الدله والبراد وابريق الحليب بالزنجبيل يدفي البردان




اصبحنى الصباح وكان غير

توجهنا يم الجهاز وقبل ناصله الا واحد من العيال يصيح يالربع عندي جره ارنب مصبحه وكان فيه حره ماهي بعيده منى ولا هي قريبه وحروه الارنب ممكنه لكن اقرب مالها تكون معشيه بعد المطر وعودت الحره
قال : الارنب اصبح عليها الصبح ولا يمديها تاصل الحره
وعنده طير ما شاء الله طلع وسبوق والارض بصراحه ما تساعد للمطراد
قال خوينا اببلج عن الطير وباقص وانت استقطعوا
عزالله اخذنا حول الساعه وهو يقص وحنا نستقطع وماعينا الا هو يصيح الطير طلع واثاري الارنب كل ما قربناها اجفلت وراها ويحطها الله في عين الطير
وتعال شوف الطرد
وهذي من نتائجه






وماشاء الله على الطير ردد الارنب لين الله عانه وطرحها بعد





الرجاء عدم الرد
للتقرير بقيه