ﭑرسم خياله ڤي نظر عين #_مشٺاق ' ۈﭑسري بِ طيڤهہ بس ۈيني ۈ ۈينه♡

بسمه وفا · 07-01-2013, 01:19 PM

اههم شيء لحد ينسى الصلااة

الـ 4 part

\
\

مآ ابيگ تعشقني ولگ غيري معشوق
ولا ابيگ تشتآق لي وعندگ اللي يسليگ
انآ غير البشر و في شخصيتي فروق ..
ما ارضى بحب الشراكه لو قلبي يبيگ♡̸'

\
\

شما: امسك هالورقة
حمدان "وهو محبط": ورقة !
شما: ههه,, زطي
راحت شما ودخلت البيت,, وحمدان كان ماسك الورقة ويطالعها,, يت صوبه سياره مسرعه,, حمدان تم واقف مكانه,, لف صوب السياره " هذي السياره مب غريبه عليه " السياره كل ما كانت تتجدم كانت تسرع اكثر,, العنود طلعت من السياره ..
العنود: حمداان

حمدان استوعب ان سيارة يايه صوبه كان بيلف بس السيارة وصلت عند ريوله ووقفت,, العنود كانت متوتره ومتروعه,, اول ما وقفت السيارة ربعت صوبه,, حمدان من الصدمه كان واقف مكانه,, انفتح باب السياره وسمعوا حد يضحك لفوا صوب السيارة يتريون اللي بينزل ..

ساره " وهي نازله ": ههههه شفتوا اشكالكم كيف صارت !
العنود " معصبه ": اييييه,, تستهبلين انتي!
ساره: شو؟ شسويت بعد هالمرة
العنود " متنرفزة منها ": بعد,, وتسال شو سوت! شو انتي مينونه ولا فيج شي؟ اكيد مب صاحية,, كنتي بتدعمينه
سارة: لا لا تخافين انا مب مينونه عشان ادعم حمدان,, بس كان مجرد مقلب
العنود " معصبه ":مقلب!! ايييه,, لا يكون ع بالج ...
حمدان " بنبره شدة ": العنود... ردي السيارة
العنود: حمدان!!
حمدان: بس خلاص,, المقلب كان موجه لي,, اعرف اتكلم
راحت العنود وهي حاسه بقفطه ,, لف حمدان صوب سارة وهي كانت اطالعه وتبتسم ..
حمدان: سمعي سارة ..
سارة: حمدان والله سوري,, ما كان قصدي جي بس كنت ابا امزح معكم
حمدان: هذي مزحه
سارة: والله آسفه,, لا تزعل حمدان,, والله ما كان قصدي
حمدان: شوفي اعرف انج تبين تنسينا اللي صار قبل,, بس مب جي " تنهد " انتي انسي ونحن بننسا وبينتهي كل شي ..
سارة: بس حمدان...
حمدان " بنبرة شدة ": خلاص سارة قلتلج بينتهي كل شي
لف عنها وركب سيارته وراح,, سارة تمت واقفه مكانها اطالع وهو يروح وفي خاطرها تقوله: {ليش تحبها هي؟ ليشم مب انا؟ "تنهدت" هذي اخر مرة تخليني وتروح}

ــــــــــــــ

"الساعه 3 في بيت بو منصور"
منصور متسدح ع الكرفايه وماسك تلفونه ويجلبه كل مرة صوب كان مشغل المكيف ومشغل ليت النوم ع اساس تعبان بينام بس هو كان يفكر بالبنت اللي عيبته كان يفكر بالعنود

منصور: من هذي؟ بس ابا اعرف اسمها,, لو عطيتها رقمي بتكلمني؟ لالا ما اعتقد,, هي يوم سالتها عن موزوه كانت مستحيه,, يمكن لاني كنت اكلمها فيس 2 فيس,, الوضع بيختلف من الفيس 2 فيس للفون؟ يمكن من يدري!
مسك فونه ودق ع اول وحده
...: هلا منصور
منصور: بقولج اياها بدون مقدمات
...: خير,, عسى ما شر
منصور: اممم انا ما احبج,, ولا حبيتج في يوم كنت العب مليت وقلت العب عليج,, اممم بس ما اعتقد نسيت شيء,, هيه مسحي الرقم ولا تفكرين ادقين مرة ثانيه لا ايي جدام بيتكم واخبر اخوج انج طلعتي عندي كذا مرة
..: أأأ منصور
سكر الخط ودق ع الثانيه
...: تصدق توني كنت بدقلك هههه
منصور: هلا
..: امم انت قلت بنلتقي اليوم بس نسيت ويين,,
منصور: لا اتعبين عمرج ما بيي
..: ليش؟
منصور: جي مابا اشوفج شو اباج ما احبج كنت العب عليج تفهمين واكلم 2 غيرج,, اممم ولا ادقيين واتعبين روحج لاني ما برد واذا تجراتي ودقيتي تعرفين شو بسوي ولا اذكرج
..: انزيين انتي ليش تسوي جي
منصور: ما فيه علييج بعدها وحده غيرج تترياني
سكر الخط وسيده صاح تلفونه,,
...: منصور
منصور: هلا
..: منصور الحق,, ولد عمي يا يخطبني وانا ماباه
منصور: وان اشو دخلني في السالفة!
...: منصور اقولك بيي يخطبني,, انا اباك انت شفييك منصوور

منصور: زيين والله,, يا فوقته كنت بدقلج وبقولج ان اللي بينا انتهى,, وافقي ع ولد عمج احسلج محد بينفعج غيره,, لا ادقيلي ولا ترفضينه ولا بروح عنده وبقوله ليش رفضتيه
سكر الخط وتنهد
منصور: الحيين بنشوف اذا بترضين فيني ولا لا !

ــــــــــــــ

"الساعه 3 بيت بو خالد "
خالد يالس في الصاله اللي فوق وع اعصابه مره يقوم ويدور في مكانه ومرة ايلس ويتم يحرك ريله من التوتر وكل شوي يشوف فونه اذا في حد دقله ولا طرشله مسج.. ماعرف يعصب ولا يخاف لان شما تاخرت وما ردت البيت,, دخلت شما ببرود تتمشى.. ماسكه هديه حمدان واطالعها وتبتسم ...

خالد: اخيرا شرفتي
اختفت ابتسامه شما ويلست تدعي انه ما شافها عند حمدان
خالد: وين كنتي؟
شما:عند ربيعتي,, افهمها الدرس
- والله! يعني ما يصير ادقيلها وتفهمينها صح!
- كنت موجودة هناك وتاخر دريولها يعني بدال ما تتريا وتضيع وقت ع الفاضي استفادت من هالوقت وشرحتلها
- انزين هي استفادت انتي شو,, ما قلتي اخوي يالس في البيت بيخاف علي بيفكر فيني ما قلتي تاخرت بدقله ولا بطرشله مسج
- سوري ما قلت بناخذ وقت
- انزين ما علينا,, من ربيعتج هذي
- بنت بو فيصل اخت محمد ربيعك العنود عرفتها
- هيه هيه عرفتها ,, مب لاازم بالتفصيل بس اذا عدتيها مرة ثانيه يويلج
- بس
- هيه بس ولا تبين طراقات وتصفيع
- لا لا بس يعني مب من عوايدك انت ع الشي البسيط تصارخ
- اعرف بو فيصل وعياله وانا واثق فيهم
ابتسمت "فخاطرها": ان شاء اللع ما تضيع الثقة فيوم
لفت عنه يايه بتطلع
خالد: تعالي تعالي,, شو هذا اللي فايدج؟
شما " متوتره ": ماشي
- شو ماشي وهذا الصندوق والباقة
- هيه ترا اليوم عيد ميلادي
- انزيين
- شو انزيين بعد عيد ميلادي يعني اكييد في هديه
- انزيين تعالي اشوف الباقة
عطته الباقه ببرود لانها خايفه يعرف انها من حمدان وتمت اطالع,, شما " فخاطرها ": ان شاء الله ما يكون حاط كرت
خالد كان يطالع الباقة ويدور كرت.. تم يدور بعيونه ويجلب الورود حتى خربهن يوم مل وما حصل شيء شل كم حبه من الحلاوه,, شما تمت اطالعه بنضرات

شما: خربتها >< .. " فخاطرها " شو جي يايبينها حقي
خالد: كيفي,, ما بتم اترياج ع الفاضي
شما: مالت
خالد: نعم! يلا يلا روحي غرفتج

ــــــــــــــــــــــ

" الساعه 3 وربع في بيت بو فيصل "
حمدان والعنود توهم رادين البيت,, محمد وفيصل كانوا يالسين برا جدام الباب ومبين انهم خرسانين ماي والكريمه يبست في شعورهم وع ويهم من ضربة الشمس,, يوم شافوا العنود وحمدان يايين صوبهم راح محمد ورا فيصل فيصل ما عرف شوي سوي وراح وراه تموا جي لين ما وصلوا عندهم,, اول ما شافوهم نقعوا من الضحك

العنود: ههههههه,, شو اليوم عيد ميلادي وانا ماعرف
حمدان: ههههه متبرعين تكونون المهرجين اليوم,, ههه لا بصراحه جمييل الا اقول عنود كم يعطون المهرجين هالايام
العنود: امم عطهم الف ولا اقول ميتين الشغله مب صعبة دام ان الشيبه اشتغلها ولا فيصل لاحرام اشفق عليه الصراحه
العنود+ حمدان: هههههه,,
فيصل: هاهاها,, ما يضحك
محمد: اصلا عادي ضحكو من عاب ابتلى
العنود: هههه والله سوري بس شكلكم يضحك
حمدان: ههه انزيين شو سالفتكم ليش شكلكم جي ؟
العنود: هيه صح ليش ما تدخلون وتتسبحون بدال ما تيلسون هنيه؟ الرايح والراد شافكم,, فشله
محمد: تبيين تعرفيين شو صار سالي اخوج فيصل شو مسوي
فيصل: محدق الك انت بديت
حمدان: افف وبعديين يلا حد منكم يرمس,, ياني فضوول
محمد: انزيين اسمع شو السالفه
ــــــــ
"قبل ساعه"
مشوا فيصل ومحمد وهم يمشوون كانوا يرمسون
فيصل: كله منك
محمد: كله منك انته
فيصل: انت اللي بدييت
محمد: هيه صح,, من اللي يايب كل هذا
فيصل: والله محد قالك ترقد الحيين,, ابوي قالي اوعيك
محمد: جي يوعون ؟
فيصل: الحيين بنهزب مرة والسبه انت
محمد: محد غيرك السبب
فيصل: جب,, شكلي بدخل في موسوعه غينيس من كثر ما انهزب
محمد: ليش كم مرة انهزبت اليوم
فيصل جب,, ما يخصك
محمد: لا يكوون هزبك في الشركه بعد,, هههه تستاهل
فيصل: الحيين بتلقالك هزبه
محمد: عادي مب كثرك,, هههه
نزلو تحت وتموا يتريون بو فيصل ومنزلين روسهم اونهم مب مسوين شيء,, نزل بو فيصل ووراه ام فيصل وحصة

بو فيصل: ما تستحون انتوا,, عنبوا رياييل عرض وطول تلعبون جنكم يهال,, شو خليتوا حق الصغار !
فيصل: ابوي انـ....
بو فيصل: جب,, لك عين ترمس بعد
محمد لف صوب فيصل وضحك
بو فيصل: اضحك ع خيبتك انت الثاني
محمد من سمع ابوه نزل راسه وسكت
بو فيصل: ام فيصل.. حصة,, محمد وفيصل بيلسون برا اليين الساعه 6 واللي بتدخلهم ولا تيبلهم ثياب ولا اكل بجهزلها شيء ثاني
فيصل اشر حق حصه "بصوت خفيف": اييه ماخذنج ع الفاضي قولي شيء
حصه "بصوت خفيف": شو اقول يعني ؟ ما تشوفه معصب !
فيصل "بصوت خفيف": أي شيء عاد مالي خص
حصه: عمي استهدي بالله,, مب لازم كل هذا جيه هم ما سووا شيء
بو فيصل: ابالهم,, خلي الرايح والراد يشوفكم ويضحك عليكم,, عيل يلعبون جنهم يهال مب جنهم رياييل كبار اعمارهم في العشرين
راح غرفته وفخاطره يضحك عليهم "ههه,, زين ما ضحكت جدامهم,, لازم اييب الكام”

" تحت عند فيصل ومحمد "

محمد: اماايه قوليله،، ما يرزا علينا وبعديين انا مالي خص هذا فيصلووه الغبي
فيصل: محد غيرك غبي يالكللب،، المهم الحيين روحوا كلموه
حصة: والله محد قالكم تلعبون
ام فيصل: صدقها حصة محد قالكم.. عطتهم ظهرها وراحت

محمد: اماايه.. ردي اماياااااه
فيصل: حصة.. روحي انتي كلمييه
حصة: مالي خص فيكم عطتهم ظهرها هي الثانيه وراحت
محمد: الحرييم مالهن فايدة.. انت متزوج ع الفاضي
فيصل: شكلي والله.. قم قم خلنا نروح بكرامتنا ...

محمد: وهاذي نهايه المأساه
حمدان: والله انكم سالفه.. بس يخي غريبه ابوي يعصب جي
فيصل " منزل راسه ": لا هو اصلا معصب من قبل
العنود: ههه اكييد منك كالعادة.. يالله ما علييه ع الاقل انت احسسن من نااس " اطالع حمداان " في احد بهالزماان يدلع بنت شمامه
فيصل+ محمد+ العنود: ههههههههههه
محمد: شمامه عااد
حمداان تم يطالع العنود " دخلي داخل انتي بس "
خطفت العنود تربع داخل وتصارخ: شمااامه ههههه
راح حمدان وراها وهو متفششل ويمشي بسرعه يبا يلحقها: تعالي ابا اقولج سالفه.. عنووود

ـــــــــــــــــــــــــ

" الساعة 6 ونص في بيت بو عبد العزيز "

ام عبدالعزيز يالسه في الصاله لابسه عباتها ع اساس تروح بيت بوفيصل عشان سيف.. وسيف الا يصارخ يبا يروح ...

سيف " وهو يصيح ": يلاااا متى بنرووح؟
ام عبدالعزيز: انزيين اصبر خل الدريول ايي،، لا اله الا الله
سييف " يصارخ ": قوليله ايي.. ابا ارووح

نزلت سارة معصبه وتدق بريولها
سارة " معصبه": شفيه هذا يصارخ؟ يعلك الحشرة
سيف " بعده يصيح ": جب انتي.. يلا متى بنروح
سارة: ويين بتروحون ؟
ام عبدالعزيز: بيت بو فيصل،، اخوج يصيح يبا يرووح
سارة: عييل تريي.. دقايق
راحت تربع فووق ودخلت غرفتها.. ما كملت دقيقه وخطفت تربع تحت وعباتها تطيير وراها
ام عبدالعزيز: ويين ويين؟؟
سارة " ببراءه ": عندكم
ام عبدالعزيز: لا لا ماشي سيرة
ساره: امااايه,, دخيللج
ام عبدالعزيز: لا دخيلج ولا غيرة يلاا
سارة " بخبث ": اماايه.. بقولج شيء
يلست عدال امها ويلست ترمسها عشان تخليها تروح عندها

__________________

" الساعة 7 في بيت بو فيصل "

الكل مجتمع في الصاله ويضحكون ع الموقف اللي صار لفيصل ومحمد

محمد: والله لو درييت انك تتمصخر ما يلست في الشمس
بو فيصل: ههههه ما كنت ابا احد يفووت المنظر
حمدان+ العنود: هههههه
فيصل " مسوي مالت ": وعع مالت،، الحيين خليتنا في عشان هذيلا " اشر بصبعه ع العنود وحمدان" ليتني عرفت والله ما كنت بيلس
حصة: ههههه حراام عليك عااد انا تمنييت حمدان يشوفكم لانكم دورم تتمصخرون عليه
حمدان: كفو والله حرمة فيصلووه
فيصل: الحيين انا ابا افهم.. من متزوجنج انا ولا هو
الكل الا حصة وفيصل: هههههههه
حصة استوا ويهها احمر قامت : برووح اسوي كوفي تبوون
حمدان: يب مي
العنود: مي تو
محمد: هيه سويلي انا ولا تنسيين ريلج هههه
حصة رااحت وهي متفشله
ام فيصل: محمد،، عييب علييك
فيصل: اييه لا اتم تضحك عليها.. مب مضحكه هييه
العنود: اوووب نطر العاشق
ام فيصل: شو هالرمسة انتي بعد.. اصص عييب علييج
العنود: شو قلت يعني
بو فيصل: برايها ما قالت شيء
محمد: انت دلع دلع.. وانا وفيصل متبري منا
ام فيصل: ما عليكم منه.. انا اباكم انتوا عيالي.. فديتكم
نقز محمد عند امه وباسها: لا خلا منج يالغاليه
يت حصة ووزعت الكوفي عليهم واخر شيء يت عند محمد وعطته ماله ويلست
شرب محمد منه واستوا وييه غيير جنه لاعت جبده
محمد: اعع شو هذا مااللح
الكل: هههههههههه
حصة "تكلم فيصل": هاا شو قلت الحيين حرمتك ولا لا !
فيصل: هههه اكييد
محمد: هيييه محد معلمنج الضيااع غيره
فيصل " حاط صبعه ع راسه": كييفي
تمواا يسولفوون وعقب دقايق احد دق الباب راحت الخدامه تفتحه وطلعت ام عبد العزيز وسارة وسيف
اول ما دخلوا سلمت ام عبدالعزيز وسارة ع اهل البيت وربع سيف سيدة عند حمدان
حمدان " فاتح ايدييه ": سواافي.. شله فووق وباسه
ام عبدالعزيز: امره سيده ما تسلم
سيف " ماط لسانه ": مابا كيفي
الكل: ههههه
ام عبدالعزيز: سييف عييب علييك
ام فيصل: ما علييه برايه ياهل
بو فيصل: شحالج سارة ؟
سارة: الحمد الله شحالك انت عمي؟
بو فيصل: يسرج حالي هاا علووم المدرسه؟
سارة: ههه امرة لا ترمسني عنها
الكل " الا العنود ": ههههه مزفته
محمد: هييه صح يتي فوقتج خالوه.. " يرمس وهو يمد الرمسه ويطالع حصه وفيصل " تعرفيين بنتج حصصه شو سوووت
ام عبد العزيز: شو مسويه؟
هيه وريلها متآمريين علي.. حاطيين مللح فالكوفي مالي ولا تارستنه بععد

الكل تذكر شكله كيف كاان الا ام عبد العزيز وسارة طبعا": هههههه
تموا يرمسوون ويضحكوون
العنود " بصوت خفيف حق حمدان ": هذي ليش يايه؟
حمدان: بس خلاص عنوود انا قلتلها بننسا السالفه
العنوود: مابا مستحييل انسا اللي سوته

ام عبد العزيز: الا ما قلتولي.. تخطبون حق حمدان وما تقولولنا !

فيصل + محمد + العنود لفوا صوب ام فيصل وابو فيصل: خطبتوا !!!!
حمدان تم يطالعهم حس بشعور ما ينوصف وبصووت ياله ياله يطلع ومرتجف: خـ ..خطبـ ....تولـي !!

في البارت الياي:
قلتلكم في البارت اللي قبل انه بتصير احداث لاني كنت بطول البارت بس لاني طولت الغيبه ما اقدر اكمله فان شاء الله البارت الياي بتكون فيه هالاحداث
__________

شو سالفة الخطوبة؟؟
شو هي السالفه اللي صارت بين سارة وحمدان + العنود ؟
منصور شو ناوي يسوي ؟
وصفوا حمدان - حصة - فيصل - محمد في هالبارت

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ﻣﺗﻋﻮ̃ډ ¸ ﭑﻣﺷيّ ﺑثقـہّ ۈ ﭑډڕَيّ ۈڕَﭑيّ ﭑلفّ {ﻋﯾڼ}..~	ŀДmô0Ņỷ fë 7฿қ	مدونات ويوميات الاعضاء Blog	1091	08-27-2015 01:04 AM
مـآ آ آ هۈ ۈ ۈ بڪَڤۈ ۈ ۈ آڷۈ ۈ ۈ قٿـ . . ح ب ڪَ [ يمَحييييييــہ ] !	» Ѯ η ą d	عدسة الاعضاء , كاميرا الاعضاء	19	06-23-2010 01:36 PM
ۈڤآة مۈآطنه حڒقآً عڷى يڍ زۈؤۈچهآ	ريم الشمالي	المواضيع المكرره	1	11-01-2009 05:14 PM
~{آخــآڤ آرمش مـטּ عيـۈنـﮯ ۈآپعــثر جيـﮧ ۈصآلــڪ..~	A7la brensisa	ملحقات وأحتياجات التصميم	37	10-21-2009 06:00 PM
ۈڤآة مۈآطنه حڒقآً عڷى يڍ زۈؤۈچهآ	difsha	اخبار محلية و عالمية	32	10-19-2009 03:54 PM