مجبور أنسى ! - الصفحة 2

Ruudy · 02-14-2013, 05:25 PM

مرحبـآآ ،

شو هيدآآ البـآآرت الحلو اللي بيجنن ولك تؤبريييني ولآآآك ، عنن جد بيجنن هعع ! "

احمم ،،"

أولآ رآآيي "!

جوود : غمضضتني حرآآآم !

عمهآ : كرريهه و يلوع الجبد

مرته : هآي بلوة و علةة خيببة من اولهآ جي سوت فالبنت والبنت يتييمه !

ذياب : مآيستآهل بس الله يعوضه و يهدي حرمته "

حرمته : احسسهآ صآيعة بالقو بعد ""

عيالهآ : يغمضوون حرآم ، "

ام عآمر : كريهه احسسهاا شرآت مرت عم جود "

سعييد : واييد يشفق ع جود و من حققه البنت مآنتلآم " !

و ثآآنكسس ع بآآآرت و في أنتظآآر اللي عقبـه خيتوو ،

أبدعتتي و تسلمم يمنآآج ،،

ربي يعطييج الف عآفييية ،

^^"
__DEFINE_LIKE_SHARE__

ودي بك · 02-18-2013, 10:37 PM

تسسلمون على المتابعة . .
و على التعليقات . .
لا هنتوا ^^ . .

بنزل لكم البارت الثاني باذن الله . . __DEFINE_LIKE_SHARE__

ودي بك · 02-18-2013, 10:51 PM

البارت الثاني . .

الساعه 12 و نص فليل . . في بيت ذياب . . كالعاده ذياب برا البيت و بعده ما رجع . . طبعا من حقه اذا حرمته و أم عياله هاملتنه و لا تهتم فيه . .
كانت وديمة يالسة في الصالة تعابل البلاك بيري و مندمجة وياه . . جنها تسولف مع حد . . شوي تضحك و شوي تحيس بوزها و شوي تبتسم !
يتها البشكارة تربع و شاله مهره وياها : مدااام . . مدااااااااام !
وديمة : خير شو عندج تصارخين ؟ شوي شوي تراني أسمع !
البشكارة بخوف : مداام . . مهره في مريض . . اليوم وايد وااااااااايد زووع !
وديمة : و خير يا طير . . شو اسوي بها يعني ؟
البشكارة : ودي مستشفى . . خلي دكتور يشوف . .
وديمة : افففف فاضيتلج انا . . هاللي قاصر بعد . . بشكارة و تتأمر علي !
البشكارة : مداام ما في زين . . حرام ودي مستشفى . .
وديمة بعصبية : خلاص ذللللللللللفي من ويهي . . روحي عطيها ادول و فكيني من صدعتج . . انا يايبتنج حق شو ! عشان انتي تسدين العيال عني . . مالي خلقج انا !
البشكارة سكتت ما عرفت شو تقول . . بس شلت مهره بين احضانها و راحت تطلع الادول مثل ما قالت لها وديمة و عطتها منه شوي و خلاف رقدت !
اما عند وديمة . . ردت ع البلاك بيري و لا جنه شي مستوي . . شوي و رن فونها . .
وديمة : هلا والله هلا . . هلاااا بالزييييييييييييييييين كله !
سيف : ااااااااااااه فدا الصوت انا . . يرد الروح و قسم !
وديمة تضحك بالخفيف : ههه افداك يا روحي . . شحالك حبيبي ؟
سيف : مشششتاق مششتاق والله !
وديمة : و انا اكثر فدييتك . .
سيف : يللا ودوومتي عاد . . قومي تلبسي عباتج و بخطف عليك . .
وديمة : لا حبيبي ماقدر اليوم . .
سيف : ليش عاد ؟
وديمة : انته تدري به ذياب بيحتشر لو شافني اظهر كل يوم . . و بعدين امس كنت عندك . .
سيف : ما اشبع منج فديتج ماا أشبع !
وديمة : و لا انا والله . . بس شو أسوي . .
سيف بلوم : ليش ما ترييتيني لين ما أرجع من السفر ؟ جان الحين تزوجنا و عايشين حياة حلوة . . بدل ما نكون جي متبهدلين . . انتي في صوب و انا في صوب . . شو هالحظ بالله عليج شو هااه !
وديمة : خلاص فديتك كل شي بينحل !
سيف : متى بس قووولي متى ؟ انتي كل يوم تقولين بتطلق و بتطلق . . و لين الحين ما سويتي شي !
وديمة : سيييف . . انا قلت لك شرطي . . نفذ الشرط اول و عقب بتطلق !
سيف : حبيبي . . قلت لج اني مريم ما اباها . . تراها داشة حياتي عرض و . . .
وديمة تقاطعه : بس و لو . . انا ما ابا اكون الحرمة الثانية . . و لا ابا حد يشاركني فيك !

سيف بهمس : تغارين ؟
وديمة : الا امووووت من القهر يوم ادري انك كل يوم تجابلها !
سيف : اي كل يوم حبيبي ! انا طول الاسبوع في بوظبي . . و الويكند تدري بي ما ايلس في البيت . . يعني ما اجابلها !
وديمة : احسسسن بعد . .
سيف : فدييييتهم اللي يغاارون انا . .

ذياب : منو يالسة ترمسين في انصاف الليالي ؟
وديمة زاغت و حطت ايدها ع قلبها : شفيك بسم الله زيغتني . . الناس يقولون السلام عليكم !
ذياب : سألتج سؤال و جاوبي علي . .
وديمة : منو برمس يعني في هالوقت ! عواش اختي . .
ذياب شافها بنظرة مب مصدق . .
وديمة تمد له الفون : خذ الفون هاه . . و رمسها جان تبا . .
ذياب طنشها و راح عنها . . راح صوب العيال . . لازم يتطمن عليهم قبل ما يرقد !
اما وديمة ردت على سيف : هلا !
سيف : انتي ما تخافين ؟
وديمة : لا عادي . . ادري انه ينقص عليه بسرعه !
سيف : دامج ما تخافين ليش ما قلتي له انج ترمسيني ؟
وديمة : لا لا مب الحين . . بقوله عقب اني ما اباه و جي . .
سيف : اهااا . . اوكي حبيبي . . انا باجر بروح بيت اهلج . . ترا الولفه بتكون عندكم باجر . .
وديمة : هيه ادري . . ان شاء الله اشوفك عاد . . مب شرات كل مرة . .
سيف : لا افا عليج . . انا بروحي مششتاق . .
وديمة : فدييت روحك والله . .
سيف : خلاص بخليج الحين . . دام ان ريلج وصل . .
وديمة : لا حبيبي ما شبعت من صووتك !
و شوي و يدخل ذياب شال مهرة بايده و يربع : بنتج مريضة و انتي يالسه تهذربين بالفون في هالوقت . . يللا بسرعه تلبسي عباتج . . اترياج في السيارة . .
+++++++++
نروح صوب منيرة شوي . .
كانت فالمطبخ . . من العيازة اللي فيها مب مغسلة وعيان الغدا و لا العشا . . و الحين يالسة تغسلهن كلهن مع بعض . . وصالح ريلها يالس ع الكرسي اللي فالمطبخ و يسولف وياها . .
صالح : هاه خلصتي و لا بعدج ؟
منيرة : شكلي ما بخلص لين الفير . .
صالح : انتي ليش ما تغسلين وعيان الغدا في وقتهن ؟
منيرة : حبيبي ريلي كانت تعورني . . و الحين زين زييين واقفه عليها . .
صالح : لو قلتي لي انزين . .
منيرة : مااريد اتعبك فديتك . .
صالح : تعبج راحة يالغالية . . بعد انتي ما تهونين علي اتمين واقفة طول اليوم . .
منيرة : ما عليه بتحمل هالـ كم من يوم . . لين ما ترجع جود . .
صالح تنرفز : ياخي طاريها ما احبه . .
منيرة : بس شو اسوي . . هي اللي تنظف و تشتغل . . ما عندي بشكارة . .
صالح : تبيني اييب لج بشكارة ؟
منيرة سيده رفضت : لا لا . . جود بتكفي و توفي . . بعدين شو بيقولون عنا الناس . . البيت محد فيه الا انا وياك . . شو نبا في البشكارة . .
صالح : وايد تحاتين رمسه الناس . .
منيرة : و لو حبيبي . . ترضى حد يرمس عن حرمتك ؟
صالح : لا والله ما ارضى . . "و قام رايح صوبها و مسكها من خصرها " اللي يرمس عنج جنه يرمس عني . . كم منيرة عندي انا ؟ وحده والله يخليها لي . . " وباسها ع راسها "
منيرة : فديتك . . ربي لا يحرمني منك . .
+++++++++++
ذياب في السيارة و هو ماسك اعصابه : ليش ما رحتي تشوفين عيالج في الغرفة ؟ يعني لو انا ما ييت جان ما دريت ان مهاري حرارتها مرتفعه !
وديمة : قالت لي البشكارة . . بس انا اتحراها تبالغ !
عصب ذياب : قالت البشكارة و سوت البشكارة و خبرت البشكارة . . خبريني لين متى بتعتمدين عليها ؟
وديمة زاغت : اعصاابك انزين . . ليش معصب . . والله ما يرزى !
ذياب : لا والله . . اشوف بنتي مريضة و طايحة و اقول ما يرزى !
وديمة : اوكي اوكي خلاص . . ان شاء الله ما فيها الا الخير . .
سكتوا فترة بسيطة . . وديمة مب هامتنها مهره و يالسة تفكر في سيف و كيف بتتلاقى وياه باجر . . اما ذياب عكسها تماما . . يالس يحاتي بنته و يخافها تتعب زياده . .
ذياب : ليش ما تعابلين عيالج شرات باجي الحريم ؟ شو ناقصنج انتي ؟
وديمة ملت من الموضوع : و البشكارة شو خانتها ؟ يايبينها حق شو نحن ..
ذياب ضرب السكان بقو : ردت تقوووول البشكارة . . "صد عليها " من يوم الاحد انسي ان شي بشكارة . . عيالج انتي عابليهم بروحج . .
وديمة : ليش ان شاء الله ؟
ذياب : لاني بكنسلها . . خلاص عفت طاري البشاكير . . و ثانيا انتي شو خانتج . . اذا انتي مب قد المسؤولية ليش يايبة عيال ؟ او بالاصح ليش تزوجتيني اساسا ؟
وديمة لقتها فرصة : والله انا جي . . تبا تتحملني تحملني . . ما تبا تتحملني طلقني و ردني بيت اهلي . .
ذياب : بكل برود ؟ بكل برود تقولين طلقني ؟ ليش الزواج لعبة ؟ متى ما اباج بخذج و يوم ما اباج بردج بيت اهلج . . ليش مسترخصه عمرج انتي ؟
وديمة : مش مسترخصه عمري . . بس انته حشرتني بـ هالموضوع . . شو تباني اسوي لك . .
وصلوا المستشفى . . عشان جي ما رد عليها ذياب . . من الاساس يعرف ان الكلام معاها ضايع . .
+++++++
في اليوم الثاني . . كان يوم الجمعه . .
الساعه 7 الصبح . . سمعت حد يدق عليها الدريشة . . اول شي ما استوعبت . . و عقب سمعت الدق مرة ثانية . . جان تنش و يلست ع السرير و تمت تفرك عيونها . . تحس انها ما شبعت رقاد . . البارحة رقدت متأخر من كثر ما تفكر في أهلها . . و الحين ناشة . .
قامت و غسلت ويهها و لفت الشيلة ع راسها و فجت الدريشة شوي و وقفت عدالها . . بحيث انهم ما يشوفون بعض . .
سعيد يمد ورده من الدريشة : صباح الخير صديقتي !
جود تشوف الوردة و هي مستغربة : صديقتي ؟
سعيد ابتسم : هيه صديقتي . . فيها شي ..
سكتت جود . . تحس انها متلخبطة و مسطله !
سعيد : ما بتقبلين الورده يعني ؟
جود : اسفه . . ما اقبل شي منك . . و لو سمحت ماباك ترمسني ثاني مرة . .
سعيد : افااا . . و انا قلت خلاص استوينا ربع . .
جود : لانك رمستني مرة وحده . . خليتني ربيعتك . .
سعيد : هيه طبعا . . انتي امس فضفضتي لي . . و قلتي لي كل اللي بخاطرج . .
جود : ما كنت احس اصلا . .
سعيد : ايوه قلتيها . . ما كنتي تحسين . . معناته انتي ارتحتي لي . .
جود انصدمت : نععععععععععم ؟
سعيد : بسم الله زيغتيني انزين . . شفيج انا اقول الصدق !
جود : بليز يعني لا تقعد تألف رمسه من عندك !
سعيد : يعني ما ارتحتي لي ؟
جود : ما حسيت بأي شعور اتجاهك . .
سعيد : امممم . . انزين تعبت و انا ماد ايدي . . يللا عاد اقبليها . .
جود : محد جبرك تمد ايدك . . و الورده مب شالتنها . .
سعيد : انتي ليش تحبين تعاندين !
جود : و انته ليش مصر انك ترمسني . . خلاص عاد روّح من هني . .
سعيد : اوكي بروح . . بس خذي الوردة !
جود : مـ ....
سعيد قاطعها بترجي : يللااااااااا عااد . . بس هالمرة . . ما بمر صوبج مرة ثانية . .
تنهدت جود و شلت الورده من عنده و قالت له : مشكور ما تقصر !
سعيد مبتسم : و لو صديقتي . .
جود رافعها واحد من حياتها : سعيد انته كم عمرك ؟
سعيد استانس : 22 سنة . . ليش ؟
جود : العمر كله . . بس جي اسال . . تحريت عمرك 15 جي يعني . . بـ هالحدود !
سعيد شق الحلج : لـ هالدرجة باين علي صغير . .
جود : اقصد من الحركات مب الشكل . .
سعيد تقفط : اووووب اووووب . . نضرب صواريخ بعد . .
ضحكت جوود : ههههههههه ما اقصد انزين . .
سعيد : تدوووم لج هالضحكه ان شاء الله . .
سكتت جود . . مب عارفة كيف ترد . .
سعيد : خلاص بخليج عيل . . بس قلت بصبح عليج قبل ما ينشون أهل البيت . . تامرين على شي ؟
جود : لا سلامتك . .
سعيد : الله يسلمج . . باي . .
جود وايد ارتاااحت لـ هالانسان . . تحس انه طيب و حبوب . . و تحس انه لو تمادى وياها احتمال كبير انها تحبه . . "لا لا . . ما يصير جي . . انا ياية هني اشتغل و بس . . مب ياية اسوي علاقات مع فلان و علان . . سعيد لازم احط بيني و بينه حدود . . انا ما ارضى باللي قاعد يصير من بينا . . خلاص ان شاء الله من المرة الياية ما بعطيه ويه و لا برمسه . . ما يحق لي ارمسه اصلا "
طلعت دفتر الاشعار مالها . . و حطت الوردة بين صفحاته . . و سكرت عليه . .
اما سعيد . . نقدر نقول انه معجب فيها . . في يوم و ليلة استوت جود جزء من حياته "يالله كيف جي . . بهالسرعه دخلت قلبي . . معقولة انا جي حبيت ! لا لا مب حب هذا . . بس هذا شو ؟ انا احس ان دقات قلبي تنبض بسرعه يوم اشوفها . . شو الموضوع يا ناس . . حد يفهمني شو هالحاله اللي انا عايشنها الحين . . اااااااااااه . . مادري والله مادري شو لازم اسوي . . المفروض ما ارمسها من الاساس بس مادري شو اللي يخليني اروح لها و ادق الدريشة عليها . . مع اني ما اشوفها فيس تو فيس . . بس صوتها يكفي . . شو الموضوع !!"
+++++++++++

على الساعه 11 نشت وديمة و هي مستانسة . . "لازم اليوم اكشخ كششخة عمري ما كشخت شراتها هههه . . اليوم الحب بيشوفني . . و اتمنى عاد انه يشوفني مب شرات كل مرة . . بس ما عليه هالمرة انا اللي بدوره . . مب كل مرة يخلص اليوم بدون ما نتشاوف . . امممم شو اتلبس ! " يلست تدور لبسة محترمة من الكبت . . و احتارت شو تتلبس . . مرة مخور . . و مرة تنورة و قميص . . اخر شي استقرت على لبسة شيفون . . هادية و بسيطه . . لونها عنابي . . و ع طرف الكم دانتيل ذهبي . . مع حزام ذهبي رفيع . . اللبسة وايد فخمة . . تسحت و لبستها . . و عقب سشورت شعرها الاشقر القصير . . و سوت لها باف و خلته مفتوح . . و حطت مكياج بسيط لان سيف ما يحب الدفش . . بس حطت بودرة و جحال و روج عنابي . . كان شكلها ملائكي . . شافت عمرها فالمراية و اقتنعت بعمرها . . بس ناقصنها الاكسسوارات . . تلسبتهن و ابتسمت يوم شافت عمرها مرة ثانية " بخبل بك اليوم . . يا كثر ما تقول احب اللون العنابي . . نسيت سالفته الا يوم شفت هاللبسة في الكبت " . . شوي و سمعت باب الحمام ينفج . . كان ذياب طالع متسبح . . طبعا كالعادة ما اهتمت فيه . . بروحه ينش و بروحه يخدم نفسه بنفسه . . عكس باجي الرياييل المعرسين . .
تلبس ذياب كندوه بيضا و تغتر بغترة حمرا . . خلاف سوا دخون حق عمره . . و دخن عمره و تعطر و حط حق عمره دهن عود . .
ذياب : بروح اصلي و بخطف عليج عشان نروح بيت اهلج . .
وديمة : لا الحين ودني عندهم و انته روح صل . .
ذياب رافع حياته : يعني افوت صلاتي عشانج ؟
وديمة : لا مب قصدي .. بس اكيد امي تباني اساعدها في شي . .
ذياب : ما احيد خواتج يقصرن في شي . .
وديمة : لا ما يقصرن بس . .
قاطعها ذياب : بسرعه خلصيني انزين . . ادريبج بتمين تهذربين ع راسي لين ما اوديج . . يللا فكينا اترياج في السيارة . .
و طلع ذياب . . اما وديمة فـ راحت بسرعه صوب العيال و لقت البشكارة مسبحتنهم و مخلصه . . قالت لها تروح السيارة بسرعه لان ذياب مستعيل . . و ردت هي و تعطرت و شلت شنطتها و حطت فيها العطر و شوية مكياج احتياط . .
++++

نرجع لجود . . عقب الشغل ردت غرفتها عشان تتسبح و تصلي الجمعة . . عقب فجت مصحفها و تمت تقرا سورة الكهف . . شوي و سمعت حد يدق الدريشة . . غمضضت عينها عشان تركز شوي و ردت تقرا و هي مطنشة . . بس سمعته مرة ثانية و ثالثة و رابعة . . و اصرت انها تطنش لين ما تخلص قراية . . اول ما سكرت المصحف . . رد يدق الدريشة للمرة الـ مادري كم !
فجتها و وقفت ع طرف . .
جود بعصبية : خيييييييير ان شاء الله ؟
سعيد : بل بل بل جبريييييت . .
جود : و بعدين وياك يعني ؟
سعيد : اسف اسف . . بس قلت ابا اتطمن عليج انزين . .
جود : ليش ان شاء الله ؟ تتحراني في مستشفى ؟ و لا يالسة اختبر ؟ قال بتطمن علييج قال . .
سعيد سكت شوي و خلاف قال : شفيج معصبة . .
تنهدت شوي و قالت : انا كنت اقرا قرآن و انته كل شوي تدق !
سعيد : اهاا . . اسف انزين ما كنت ادري والله !
جود : ادري "سكتت شوي " سعيد . . ياخي اللي قاعد يصير غلط . . شو اللي يجبرك اتيا و ترمسسني ؟ انا مش من محارمك عشان متى ما تدق في راسك اتيا و ترمسني . . خلاص خل بينا حدود . . ترا حالك من حال عامر اخوك . . شوف كيف عامر محترمني و لا يرمسني . .
قاطعها : يعني انا مب محترمنج ؟
جود : انا ما اقول جي . . بس ما يصير ترمسني !
سعيد : اها . . اوكي مب شكله . . حصل خير صديقتي . .
جود ابتسمت و لا ردت عليه . .
++++++
وصلت وديمة بيت اهلها . . اول ما دشت ما لقت حد موجود . . راحت غرفة عواش و لقتها فالحمام تتسبح . . عقب راحت غرفة سلامة و لقتها يالسة تقرا قران . . سلمت عليها و راحت عنها عند خلود . . لقتها يالسة تمشط شعرها و تكشخ و تتعدل . . سلمت عليها و عقب :
وديمة : بل بل بل شو هالكششخة ؟
خلود دارت على عمرها : شرايج باللبسة ؟
وديمة : رهييييييييييبة . . من وين ماخذتنها ؟
خلود و هي تتجحل : من وين يعني . . كالعاده من القرية !
وديمة : بس وايد رهيبة . . الاصفر و الازرق كشخة . . توني ادري . . كنت اتحرى هاللونين مع بعض عنقاش !
خلود : هو عنقاش عنقاش . . بس عيبني الموديل و ما لقيت ألوان ثانية . .
وديمة : لا بالعكس " غمزت لها " تكشخين حق هدوف ؟
خلود : آآآآآآآآآآآآآآآآآآآآآآه فديت هالطاري . . افدا عمي و حرمته يوم يابوه لي . .
وديمة : هههههه بلاج مستوية خبلة . .
خلود : اليوم قال يباني اقعد عنده شوي . .
وديمة : بس انتوا مب مالجين . .
خلود : و انتي شعليج . . و هالكشخة الل كاشختنها حق منو . . ترا الا عشان ايلس عنده . .
شوي و سمعت امها تزاقر : عوااااش . . سلامي . . خلوودووه . . تعالن عاونني . .
خلود : ان شااء الله اماية . .
وديمة : برايج انا بظهر بسلم على اماية . .
خلود : اوكيييه . . خبري البشكارة اتييب لي مهرة و مهير . . اشتقت لهم وايد . .
وديمة : اوكي . .

شو تتوقعون بيصير مع جود و سعيد ؟

و شو اللي بيصير في بيت وديمة ؟
و شو نهاية اللي تسويه وديمة في ريلها ؟
__DEFINE_LIKE_SHARE__

︶أميرهہْ ألہْ ذوقہْ︶ · 02-19-2013, 06:34 PM

وآآو روووعهه ححتى رووعهه قلييلهه عليهآ ..

شو تتوقعون بيصير مع جود و سعيد ؟ آمممممممممممم آتووقع يحححبون بععض
و شو اللي بيصير في بيت وديمة ؟ آممممممممم آتووقع يتطلقوون

و شو نهاية اللي تسويه وديمة في ريلها ؟ يطلقهآإ وتقععد مططلقهه ططول عممرهآ

تقبليي مممروريي .. __DEFINE_LIKE_SHARE__

Ms.7boba · 02-22-2013, 02:43 PM

ودي بك صرآآححهه الرواايهه طرررر في قممه الرووعه
أاستمري فديتج ف الروايه
وانا بكون من متابعينج ان شاء الله =)
أمممم نجود تكسر الخاطر وان شاء الله الله بيعوضها عن اللي عاشته

عمها وحرمته جهنم تآخذكم شوو مآتححسون o.O __DEFINE_LIKE_SHARE__

مشاهدة نتائج الإستطلاع: شو رايكم فـِ♡ـيْ الرواية ؟
كششخة ..	8	80.00%
نص نص ..	1	10.00%
خربوطية ..	1	10.00%
المصوتون: 10. أنت لم تصوت في هذا الإستطلاع

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
فلم عن قصة موسى .. انشقاق البحر .. وعصى موسى	محروم.كوم	منتدى أخبار المواقع والمنتديات العربية والأجنبية	0	08-28-2010 02:32 PM
يا حظك موسى عيسى موسى العامري وحسافة عليكم يا اتصالات	محروم.كوم	منتدى أخبار المواقع والمنتديات العربية والأجنبية	0	05-18-2010 10:20 AM
مجبور احبك كيف ما اكون مجبور "طلب"	1111111	طلبات الاعضاء	3	03-29-2010 08:54 PM
شلة احمد الكيبالي مجبور احبك كيف ماكون مجبور	same	طلبات الاعضاء	9	03-16-2010 05:49 PM
أنتم أوسخ أعضاء في أوسخ منتدى....	محروم.كوم	منتدى أخبار المواقع والمنتديات العربية والأجنبية	0	12-11-2009 03:40 AM