بسم الله الرحمن الرحيم

السلام عليكم ورحمه الله وبركاته

حبيت اشاركم اول رواية اكتبها " اهل الغرام " ..

الرواية مش كامله .. بديت فيها من فتره بسيطه ..

بنزل بارتين ان شاءلله .. واذا اعجبتكم الرواية وحسيت بتفاعلكم .. راح اكملها وانزل كل اسبوع بارت او بارتين ... الي اقدر عليه

كل بارت هو عباره عن 7 الى 8 صفحات ..مممم .. حسيت ان عندي الخيال الي يسمح لي اكتب هالرواية الجريئه شوي .. فـ اتمنى من كل قلبي انها تنال اعجابكم .. وانا اوعدكم ان اهتمامي فيها يكون كبير واكرس كل وقتي لها ان شاءلله ...

ملاحظه : حبيت انوه عن شي بسيط .. انا بنزل الروايه باسمي فهالمنتدى ومنتدى ثاني ان شاءلله .. واي عضوه حابة تنقل الرواية لمنتدى معين , انا سامحه لها بس مع ذكر المصدر

وو .. لو عجبتكم الروايه باذن الله ... مثل ما وعدتكم بنزل كل اسبوع جزء او جزئين .. بس مثل ماتعرفون كل شخص وله ظروفه و لتزاماته يعني لو تاخرت عليكم شوي طولو بالكم وياي

وصح نسيت .. انا اتقبل اي ملاحظهو اي نقد .. البناء طبعا .. فاي عضو عنده ملاحظه لايبخل علي فيها بس بليز بدووووون ... وبسسسس
والحين ...

.... اخليكم مع " اهل الغرامـ " ونقول بسم الله

...................................

الجزء الاول :


ميثه ""



نشيت على حشره تلفوني .. قمت ادوره يمين يسار بس ماحصلته.. مادري وين اختفى ..اففف الصوت مزعج ابا انااااام .. وين راح ؟؟ انتبهت على ليت التلفون وشفته عالارض .. هههههه هالطبع مابودره كل شي اشوته برقادي ماحس بشي .. نومي ثقييييييييييييل .. انتبهت على المتصل "" حبي الاول والاخير "" هههههه غبيه هالبنت غبيه , بكيفها مسجله اسمها بالفون
انا اتصنع العصبيه : الوووو
هاجر تستهبل : فدييييت هالصوت انا
انا : انتي حيوانه اصلا
هاجر بعبط : بسج رقاد لا , تعالي والله ملل
انا : حرام عليج والله كنت احلم حلم جميييييييييييييييييييل .. بعدين!! .. ايي شسوي الحين كلاسي الساعه 12!!!
هاجر : اهون عليج ميثوه والله ملانه طفرانه بموت انا بمووووت .. ماعندي حد ايلس وياه كل البنات فكلاساتهم الحين
انا : ماتكسرين الخاطر ترا
هاجر: انزين شو رايج .. بريقج وبغديج وبنحوط اليوم حواطه محترمه على حسابي
انا واوني افكر : مممممممممممم ,, بس على شرط
هاجر : تم قبل لاتقولين شي
انا : بنسوي شوبينق خفيف وبشتري على حسابج الي يدش خاطري , مايهمني سعره
هاجر بخوف : خيبه
انا : خلاص كيفج بكمل رقادي , يلا باي
هاجر : تمي تمي , حيوانه وحده , خلاص اوك يلا نشي تلبسي ولا تتاخرين
انا : هههههههههه اوجيج .. يلا مسافة الطريج .... احبجججج انا
هاجر : غصبن عنج , باي
انا : هههههه باي
هاجر رفيقة دربي .. ربيعتي من ايام المدارس .. من بداية علاقتي فيها ارتحت لها , شفافه وطيبه ونيتها صافيه وايد .. دمها خفيف وتفهمني بسرعه .. احب اكلمها ووايد واشكيلها .. احسها تعرف كيف تخفف عني وباسلوبها الذكي تقلب الموضوع ضحك .. دخلت وياي نفس الكليه على قولتها " الله كاتب تلصقين فيني وين ماروح فالمدرسه وفالجامعه .. الله يستر ماتاخذين الريال الي باخذه بعد " هههههه .. كانت دوم وياي الا بفترة التخصص .. اختارت تخصص غير عني لانها ماحبت تخصصي تقول ماتحس انها بتفلح فيه ,, وانا بصراحه ماحسيت اني بفلح بتخصصها .. بس كنا نشوف بعض فالبريكات وايد .. المهم .. شكلي تاخرت عليها صح .. بقوم بلبس اخاف تصفعني
سبحت عالسريع .. رفعت شعري كل على فوق وربطته .. من جريب قاصه قصتي وقامت اضايقني وايد ليتني ماقصيتها .. جحلت عيوني بجحال ازرق وحطيت مسكره زرقه وبلاشر وردي خفيف وقلوس وردي .. لبست كعبي الفوشي الي خذته من قريب .. حبيته .. عشقته من اول نظره .. خذت شنطتي حطيت فيها بوكي و تلفوني وقلمي و عطري بعد ماتعطرت خفيف .. طالعت عمري اخر مره .. فديتني والله جميله انا .. عسسسل يانااااس هههه امواححح وركضت لان الدريول يتريا من متى حليله
.......................
هاجر ""


الكلبه السباله الطفسه والله بذبحها .. ها كله تلبس .. خل اشوفها بس ... اتصلت فيها
يرن يرن يرن .. لين ردت الشيخه ميثه
ميثه بكل ادب : اللو
انا ومعصبه : قسم بالله يا ميثووووه بعد لين 5 لو مايتي بنش بسير كلاسي الحين
سمعت صوتها وراي .. صديت ورا
ميثه : هههههههههههههههه خيبه خيبه والله خفت
انا اطالعها بنظره : تو الناس
ميثه : والله اسفه ... بعدين شو يوديج كلاسج الحين الساعه 9 وانتي كلاسج 10
انا : ملللتيني ... المهم " وطالعت تحت " .. شو هالنعال ابا مثله يالحيوانه
ميثه : ياربي .. انا كل شي بيبه لازم تقلديني يعني .." وسوت حركه بعيونها ورفعت حياتها اونها تتخقق"
انا : قولي والله .. قولي قسم .. مب منج يالكلبه مني انا الي اخذلج الي اخذه لعمري
ميثه ميته ضحك : هههههههههههههه انزين خلاص .. والله عيل اني يبت لج نفسه بس مب نفس اللون .. يبت لج كحلي .. طررررررررر والله حتى احلى عن مالي
انا اعطيها بوسه عالهوا :: اموااحححح .. غصبن عنج حبيبتي .. يلا قومي بنطلب ميته يوووع
ميثه : انا بعد ... سرينا
.................................................. ................
خليفه ""


متاخر عالدوام وايد .. اصلا كيف ماحسيت بالوقت .. يلا الحمدلله ان سعود ماسك الزام اليوم بيطوفها لي .. خيبه كيف عيوني متنفخه رقدت وايد والله ... اصلا امس كنت تعبان وايد ورديت البيت متاخر .. سهرت ويا ربعي فدبي ورديت البيت 2 فليل .. الله على سهرة امس .. يخرب بيته رشود من وين ميمع هالبنات .. عسسسل عسسل كل وحده احلى عن الثانيه ... رن تلفوني وقطع تفكيري .. ابتسمت من شفت الرقم ..
انا والابتسامه شاقه حلجي : صباح الخير
غايه برقه : صباح النور حبيبي
انا : تعرفين عاد
غايه : شو
انا : تولهت عليج
غايه بدلع : جذاااااااب
انا : افا غايوه .. والله تولهت عليج
غاية : مامداك توله علي من يومين شايفتنك
انا : اصلا شعرفج انتي .. انا اتوله عليج وانتي وياي
غايه : ههههههههه فديتك .. محد بيذبحني غير كلامك هذا
انا بخوف: بسم الله عليج , كم مره قايلج عن هالرمسه الخايسه . ماحبج يوم تقولين جي
غايه : تخاف علي خليفه ؟
انا بصدق: لو ماخاف عليج اخاف على منو غايه ؟ انتي كل شي والله .. انتي روحي حبيبي روحي .. قد سمعتي حد مايخاف على روحه ؟
غاية بخجل : فديتك
انا بهمس : تعرفين هالكلمه شو تسويبي ... تذبحني والله . . تموتني وترد تحييني من يديد .. " خذت نفس طويل " .. فديت روحج .. احبج غايه .. احبج وايد
غاية بارتباك : مممم انزين خليفه بكلمك عقب
انا بابتسامه .. ادريبها استحت .. اعرفها من زمان بس بعدها تستحي مني : وين بعدني ماشبعت من صوتج
غايه : حبيبي عندي كلاس وبعدين ماحب اكلمك جدام البنات وانت تعرف
انا : انزين فديتج .. تحملي على عمرج .... تعالي صدق ..طلعت نتيجه الكوز
غاية : هاه
انا بحده : غايوووووووه
غاية : شوف .. الصراحه يعني .. مممممم ..
انا بعصبية : قووووولي شو .. هببتي صح ؟
غايه شوي وبتصيح : عيل قسم بالله اني حليت عدل بس ماعرف ليش عطاني 8
انا : 8 من كم
غاية بخوف: من 15
انا بحده : يا حيوااااااانه هاي درجه الحين تيبينها .. كم مره اقولج شدي حيلج بترسبين انتي شكلج والله
غاية : لا لا بعدنا اول الكورس .. اروم اعدل الدرجه والله ..
انا : زين بنشوف .. يلا سكري الحين وصلت دوامي .. تريقي لاتمين بيوعج
غايه بحب : ان شاءلله .. وانت بعد تريق .. ولا تزعل وعد اني استوي زلمه وايب كله فل مارك
انا : غسلت اييدي منج انا من زمان تقولين هالرمسه .. هههههههه يلا زين فديتج بخليج الحين ... يلا مع السلامه
غايه : مع السلامه حبيبي
...........................................
غايه "



وصلت كلاسي – هالكلاس كريهه والله .. احس اني مافهم هالماده مووول لو مهما درستها .. كالعاده الدكتور يشرح ويشرح ويشرح وانا مب وياه موووووووول ... ممممممم خلوف ... هو الي شاغل تفكيري دوم ... احضر محاضراتي وانا بالي دوم وياه .. والمشكله !! يلومني ليش درجاتي زفته!! ... شسوي يوم اني احبه هالكثر انزين .... احبه من سنتين ...عرفته من النت .. ارتحت له وايد واطورت علاقتي وياه بسرعه وبدون ماحس .. صارلي اكلمه بالفون من سنه .. اشوفه بس من بعيد لبعيد .. دوم يقولي" صح اني ما قعد وياج .. ولا امسك ايدج .. بس شوفتح حتى لو من بعيد تريح قلبي" .. عرفته وانا عمري 20 .. وانا الحين 22 .. وخليفه مممم صار 26 من قريب .. انا اعرف ان خلوف مب ملاك .. واعرف ان عليه حركات طياشه .. دوم يسهر ف دبي ويا ربعه وكل مره اضاربه على هالموضوع .. بس يرد يقص علي بكلمتين .. وارد اشوفه بنظري ملااااااااك وانسى عيوبه كلها ... ماعرف ليش ؟؟ بس الي اعرفه .. اني احبه وايد
حسيت بهدووووء ونظرات الدكتور والبنات علي ... شو السالفه ؟؟ ...
الدكتور : ماجاوبتيني غاية ..
اجاوب على شو ؟؟؟
انا احس باحراج فظيييييييييع ياربي شو السالفه ماسمعت السؤال انزين : ااااااااااااآآآآآ ... ممممم . اس اسفه دكتور ماسمعت
الدكتور بحده : لازم مابتسمعين لانج مب ويانا
انا اتمنى الارض تنشق وتبلعني ... اخييييج موقف خايس احس وييهي حاااااااار :آآآآ اسفه دكتور
طنشني الدكتور وكمل شرحه .. واصلا للحين ماعرف شو سال واستحيت اسال الي قاعده حذالي ... اففففففف .. خل انتبه شوي اصلا ماباقي عالكلاس غير ربع ساعه
.................................................. ...................................
سعيد ""


طالعت خلوف وانا اعرف شو بيقول .. مليت من كثر مانصحه بس مثل مايقولون بو طبيع مايوز عن طبعه
خلوف : سعود والله راحت علي نومه ياريال ماحسيت بشي موووول
انا : الحين بسالك .. انت متى رقدت امس
خليفه وشكله قافط : شوف بقولك
انا ارفع له ايدي بمعنى لاتكمل : خلوف اسكت اسكت اعرف شو بتقول ... ياخي خليفه انا احبك والله انا ربيعك مايرضالي اشوفك بهالوضع .. لين متى يعني خليفه .. لين متى هالسهرات الي ماتخلص .. وانت تعرف وبدون ماحرجك هالسهرات شو يستوي فيها ... خليفه انت مب مراهق الحين خلاص هالحركات حق الصغاريه .. انت عمرك 26 الحين .. لين متى بتتاخر عن دوامك وانا اتستر عليك.. كم مره بكلمك وانا اعرف ان كلامي يدخل من هني ويطلع من هني
خليفه وبعده قافط : ان شاءلله
انا وانا متاكد ان ماشي فايده : ماعرف متى بتعقل .. الله يهداك بس ...
خليفه وحركاته المعتاده : فديته يا ناس يا عالم فديت الي يحبني ويخاف علي .. تعال ببوسك تعال
انا وفاج عيني : خوووووووووووووووز عني لعطيك كف قسم بالله
خليفه واونه بيهجم علي : مايخصني لازم ابوسك اليوم
سعيد : هههههههههههههههههههههههههه اطلع برا .. براااااااااااااااااا ببوسك اونه
حركاته مايودرها ..
.................................................. .....
عبدالله "


ابوي متصل بي يقولي ان مطرش الدريول يخلص شغله .. ويباني امر على هالحيوانه الي يالس اتصل بها وماترد .. ماحب اتريااا مول اخر مره بتصل لو ماردت عادي اسير
اتصلت ..... يرن ويرن يرن ... و اخيرا ردت
ميثه : هلا عبدالله
انا بعصبيه : ميثه كم مره بتصل ؟ ليش ماتردين
ميثه : سوري والله عبدالله بس كنت فالكلاس وتوني مخلصه ... امر فديتك شو بغيت
انا : انا برع .. ابوي مطرشني لان الدريول محد
ميثه بزعل : لاتقووووووووووووووووووووووول .. عبدالله حرام والله انا كنت ابا الدريول فحايه
انا : شو تبينه ترا اقولج انا بردج البيت
ميثه ومبين من صوتها انها مقهوره : عبدالله كنت ابا اسير السوق اليوم انا وربيعتي عقب الدوام
انا بظيج: قولي والله انتي بس ,, انا اترياج من متى الحين عشان تقولين بتسيرين السوق .. يلا يلا تعالي ..
ميثه واونها تصيح : حرام عليك عبدالله دخيلك والله فخاطري .. ابا اسيييييييييييييييييييييييييييييييييييييييييييييير
انا اتافف : ميثه والله تعبان ياي من الدوام ماشوف جدامي .. سرت ابدل عالسريع وييتج .. مافيني على الحواطه فالسوق ... بعدين تعالي!! .. ربيعتج منو هاي؟؟؟
ميثه : هجوووور
احس قلبي انقبض من قالت اسمها ...هجور !! ... اقصد ... هاجر .... شفتها مره ... شفتها ف بيتنا وتحديدا بغرفة ميثه .. كنت مستعيل داش الغرفه ابا اتعطر .. عطوري مخلصه متعايز اسير اخذ لي .. وميثه ماشاءلله تارسه السده عطور .. قمت اي كل يوم اتعطر عندها ... المهم .. دشيت وانا مستعيل وايد
عبدالله : ميثوه
يبست ... ماكانت ميثه .. كانت وحده ثانيه .. تميت واقف مبهت .. ماعرف شو فيني!!؟؟ .. اطالعها .. ماقدرت ماطالعها ... ماشاءلله .. ماشاءلله .. وماشي ف بالي غير كلمة ماشاءلله .. كانت يالسه عالشبريه تتعبث بفونها ومن شافتني يبست وطاح الفون .. اذكر ملامحها عدل ..بيضه وشعرها عسلي لين نص ظهرها ... ممم .. لا شوي اطول .. وعيونها كبيره عسليه ورموشها طوال .. خشمها صغير و شفايفها احلى مافيها ... كنت اطالعها مبهت ماحسيت الا بصوتها وهيه تكح
انا .. نزلت عيني وباحراج : آآآآآآآآ آآآ اسف والله مما ماكنت اعرف ان حد هني
هاجر :
انا . . شت والله شكلها ماتت من القفطه .. صديت بطلع من الغرفه ..: انا اسف مره ثانيه السموحه منج
وطلعت .... شفت ميثه فويهي
ميثه معصبه : عبدلله شو تسوي طالع من الغرفه
انا للحين مبهت :
ميثه : اكلمك عبدالله . ." واتاشر بايدها" هيه هيه عبدالله .. اووووهو ..." تصارخ بصوت عالي" ... عبددددددددداااااااااالله
انا : هاه
ميثه تتجتف : لا والله . شو ها .. شو تبا داش الغرفه
انا : كنت ابا عطر ..... آآآآآ ... ميثه منو بغرفتج
ميثه بظيج : هاي هاجر ربيعتي .. حرام عليك شكلها ميته الحين بروح اشوفها
راحت وخلتني ....
نشيت من سرحاني على صوت ميثه بالفون .... نسيت اني اكلمها
ميثه تصارخ : عبدالله وووووووووين رحت اكلمك اناااااااااااا
انا : هلا فديتج ... امري
ميثه : عبدالله بتوديني .؟؟ حرام فخاطري
انا : وربيعتج .. مستحيل تركب وياي منو بيوديها
ميثه : دريولهم ... بلاقيها هناك
انا : وان شاءلله ناويات تتمشون روحكم
ميثه : عبدالله منو فالسوق هالوقت .. ماشي زحمه .. بعدين نحن بندخل كم محل عالسريع وبنظهر مابنطول يعني
انا : اسف .. تبين بترياكم انا فالمقهى لين تخلصون شغلكم .. ماتبين !! يلا طلعي اترياج برع بردج البيت
ميثه تتافف : افففف عبدالله عاد ..... " بعد تفكير " مممم انزين خلاص موافقه .... يلا بطلع الحين
..........................................
الجزء الثاني :


هاجر ""


ميثه بترجي : هاجر يعني شو فيها .. ترا اقولج هو بيقعد فالمقهى لين نخلص نحن .. يعني مابيكون ويانا .. مافيها شي والله لا تصعبينها
انا : ميثه تستهبلين .. استحي والله .. خلاص قولي لاخوج ماتبين .. خليها مره ثانيه
ميثه شوي وبتصيح : مايخصني .. انتي دخلتي الفكره ف بالي .. بنسير يعني بنسير .. انا طالعه الحين وسايره السوق .. اترياج هناك .. لو فيج خير لاتين يا هجور ...
وراحت عني ...
ماروم .. والله ماروم .. اصلا ماباخذ راحتي .. وبعدين لحظه !! هاي كيف سارت وخلتني جي ..يعني غصبن عني !! ياربي شسوي ؟؟
طلعت شفت الدريول يترياني برع .. وميثه محد .. شكله راحت ويا اخوها وتترياني الحين ... مممممم .. اروح ؟ ... انزين ليش ماروح .. هو مابيشوفني ولا بيمشي ويانا .. انزين منو من خوانها ماقالت .. اصلا انا ماعرفهم .. لا .. انا اعرفهم ..بس من رمسة ميثه عنهم .. بس انا ماقد شفتهم ... الا واحد .. حتى ماعرفت اسمه .. استغفر الله .. مابا اذكر هاك اليوم
كنت اتعبت بفوني .. اكلم فاطمه اختي عالبيبي .. تشكيلي من محمد ريلها .. مشاكلهم ماتخلص .. فطيم حساسه وايد ومحمد مب مقدرنها ..توني برد عليها .. فجاه سمعت صوت واحد ..
عبدالله: ميثوه
انا ماقدر اوصف شعوري .. احس ان حد صب ماي بارد علي .. يبست .. تشللت.. ماقدرت اتحرك ولا اتكلم ولا اسوي اي شي .. شفته يطالعني .. ويطالعني .. وبعده يطالعني .. كان مممممم .. كان جميل .. بكل معنى الكلمه .. حلو وايد .. اسمر وخشمه سيف ,, حواجبه ثقيله وطويله وعينه مب صغيره ومب كبيره ,,, حاده وعسليات ,, ورموشه كثيفه .. ماحسيت بعمري وانا اطالعه .. طويل .. و عريض شوي .. ياربي .. انا شسوي الحين ؟؟ بنتم جي وايد ؟؟ ..ها بعده يطالع!! .. ماعرفت شسوي .. غير اني ..احم .. كحيت !! .. ها الي طلع وياي .. شسوي يعني ؟؟
عبدالله نزل عينه وشكله توه حس بعمره : آآآآآآآآ آآآ انا اسف وو والله مما ماكنت اعرف ان في حد هني
انا ماقدرت ارد .. ويهي احمر من القفطه واحسه نار .. تميت ساكته :
عبدالله صد .. شكله بيطلع من الغرفه .. الحمدلله .. : انا اسف مره ثانيه السموحه منج
وطلع ....... احس بيغمى علي ... ماقدرت اتنفس .. ماشي هوا ... شو هالموقف ؟؟ ... ياربي .. عيوني انترست دموع بدون ماحس ... ابا اصيح ماعرف ليش ... وينج ميثه وين رحتي ؟؟ ... ودشت ميثه ... شكلها سمعتني ...
ميثه منحرجه : هجور اسفه والله .. توني شفت اخوي وقالي انه دش بالغلط ... السموحه منج
انا ساكته ودموعي تنزل :
ميثه بخوف : هجور شو فيج ؟ لاتخوفيني ؟... " حطت ايدها على جتفي وتهزني خفيف " هجور ..هجور.. اخوي قالج شي ؟؟
انا بسرعه هزيت راسي بمعنى لا :
ميثه : تريني شوي بيب لج ماي بسرعه
وقفت السياره وسمعت علي الدريول يقول : وصلنا ماما هاجر
صديت عليه واانا معصبه : علي كم مره اقولك لاتقول ماما لاتقول ماما .. قول مدام هاجر مدااااااااااااااااام
علي : اوك ماما
انا احرك راسي بيئس : اففف .. ماشي فايده
شليت فوني واتصلت ل " حبي الاول والاخير " ردت علي بسرعه مامداه يرن
ميثه : وينج
انا فيني ضحكه : ماييت ,, روحت البيت
ميثه تصارخ : بذمتج ؟
انا .. ماقدرت ايود عمري : هههههههههههههههههه لالا .. عن تموتين علينا .. هني وصلت انتي وين ؟
ميثه : انا ف باريس غاليري تعالي اترياج
انا : اوك .. يلا باي
ميثه : باي
نزلت من السياره ودخلت المول سيده .. الحمدلله ماشي زحمه .. هالوقت احسن شي للسوق .. الواحد يقدر ياخذ راحته شوي
سرت عند ميثه ..شفتها تنقي عطور .. ياحبها للعطور هالانسانه .. يلسنا نسوق شوي لين تعبنا ..
ميثه بتعب : تعبت ... نريح شوي
انا : حتى انا تعبت .. وين نروح
ميثه : ابا ممم ابا ايس كريم
انا : زين يلا
وقفنا ناخذ ايس كريم .. وجريب من المحل مقهى .. كنت اتجنب اطالع الي يالسين هناك .. مابا اشوف .. اخاف اخو ميثه يالس هناك .. بس من يقول !! ميثه لازم تحرج الواحد ولا ماتكون ميثه
ميثه : هجور .. تشوفين الي لابس كندوره بيج .. الاسمر .. الي يالس هناك
انا : تستهبلين .. كيف اشوف يعني مابا اشوف
ميثه واونها ذكيه : ياغبيه .. مجابلج هو .. بس رفعي عينج .. اصلا ما بينتبه يالس يتعبث بالفون
بخوف .. رفعت عيني اطالع الي تقصده ميثه .. يبست .. هو .. نفسه .. هو الي شفته في غرفتها هاك اليوم .. قلبي يدق .. يدق بقو .. بسم الله .. شوفيني ..
ميثه : ها اخوي .. عبدالله .. فديت الجمييييييلين
انا فخاطري .. اسمه عبدالله!! حلو اسمه ..احب هالاسم .. وو .. و فعلا جميل .. لا مب جميل بس .. ملامحه حلوه وايد .. ربي رزقه بجمال يوسفي يخليه يجذب كل بنت تشوفه .. ماشاءلله عليه
انا بارتباك : ميثه يلا .. خلينا نطلب عشان نروح .. تعبت ابا اريح شوي .. بعدين عندي كوز باجر لازم ادرس شوي
ميثه : انزييييييييين
................................................
عبدالله"


شفت ميثه يايه ويااها ربيعتها .. وقفن عند محل يطلبون ايس كريم .. نزلت عيني مابا اشوفها .. اخاف تقول شو ها الي مايستحي .. اصلا مايسد هاك اليوم!! . . ماشلت عيني من شفتها ... انزين شسمه !! .. ابا اشوفها ..بشوفها شوي بس .. توني برفع عيني ..الا ميثه تتصل
ميثه : عبدالله انا خلصت .. يلا بنسير
انا فخاطري اقولها تمي لين باجر تمي عادي بترياج .. : انزين .. يلا بيب الموتر جريب ..باي
بعد دقايق .. وقفت الموتر عند الباب واتصلت ف ميثه عشان تطلع .. طلعت وياها هاجر .. كنت اطالعها وهيه تمشي ..سايره بتركب سيارتهم .. مممم .. طولها حلو لاطويله ولا قصيره .. وجسمها حلو .. مليانه خفيف .. احلى عن ميثوه اليابسه .. سمعت صوت باب الموتر يصكر بقو ..
ميثه : تعبت .. وايد مشيت
انا : وانتي ماتعرفين تصكرين الباب شوي شوي .. ها شفط كم مره بقولج .. بتخربينه بعدين .. ماتفهمين!!
ميثه : انزين بسم الله شو فيك .. كلتني والله ...عوذ بالله .. ها يود .. ايس كريم
انا قفطت : احم .. مشكوره فديتج ..
حرام ..كسرت خاطري .. كله اعصب عليها .. ههههه تستاهل عيل حد يبند الباب جي
.................................................. ............
فاطمه "



تعبت .. والله تعبت .. متى بيحس فيني؟؟ .. متى بيودر هالطبع؟؟ .. صار لنا متزوجين 3 سنين .. ماكان جي بداية زواجنا ... كان يحبني .. يحبني وايد ومتعلق فيني . شو الي غيره ؟؟ .. مايرد الا فليل ..و مرات الفير .. كم مره تضاربنا كم مره رديت بيت اهلي زعلانه .. يحس بغلطته كم يوم ويرد لطبعه .. انا اسامحه عسب عمي .. وعسب ميره .. ميره بنتنا .. ووو .. ولاني احبه .. احبه وايد .. شليت اللحاف من ويهي بعد ماسمعت صوت حد دخل الغرفه .. شفته وصل .. اخيرا؟؟ توه حس ان في حرمه تترياه ؟
محمد : فطيم .. مارقدتي ؟؟
انا هزيت راسي بمعنى لا :
محمد فصخ كندورته ودخل الحمام يسبح .. بعد دقايق طلع وشافني بعدني اترياه ..
محمد وهو عارف اني بتحرطم : لاتقولين شي .. تعبان والله .. تعبان وايد ... ابا حضنج بس
انا .. ماقلت شي ..اصلا تعبت من كثر ما ارمس .. سويت له مكان حذالي وصديت عنه الصوب الثاني ..ثواني ..وو . .. وحسيت بانفاسه .. كان قريب مني وايد .. حضني بقو ولف ايده على خصري .. وهمس باذني
محمد : حبيبي
تميت ساكته .. قلبي يدق بقووو .. اسمع دقاته .. ويمكن محمد يسمعها بعد .. غمضت عيوني ... ماحسيت الا لما جلبني صوبه .. كان ويهه قريب من ويهي وايد .. وانفاسه اختلطت بانفاسي .. حطيت ايدي على صدره احاول ابعده
انا بهمس : محمــ
محمد حط صبعه على شفايفي : اشششششششش .. قلت لاتقولين شي . " واتقرب اكثر ".
غمضت عيني ... واستسلمت له
.................................................. ..........................
ميثه"


كالعاده .. يالسه ادرس .. عندي تست يوم الاحد .. ياربي متى بتخرج وبفتك ..باقي سنه .. خيبه احس وايد .. انا شو الي خلاني اتفلسف وادخل هندسة ..لا و معماري بعد .. لو داشه نفس هجور مدني والله بخلص بسرعه .. بس ها حلمي .. حلمي اني اكون مهندسه معماريه .. وافتح شركه .. شكره كبيره .. واصمم خرايط لبيوت وعماير و ابراج كبيره .. الله .. حلووو .. متى بس!! انا الحين 22 بتخرج وانا 23 وبفتح شركتي وانا 24 وبعرس وانا 25 وو.. وفي حد يدق الباب وقطع علي افكاري .. مايخلون حد يتهنى ياربي
انا اصارخ : هاااااااااااااااااااااااااااااااااااااا
الخدامه : ماما تقول تعالي تحت بسرعه
انا : انزين يلا يايه ... " اكيد زهب الغذا .. يوعانه وايد "
نزلت شفت امي وابوي وعبدالله وسعيد يالسين عالسفره .. الله مجبوس .. محد يفهمني غير هالخدامه .. احسها تحبني وتقرا افكاري
انا : السلام عليكم
الكل : وعليكم السلام
امي باهتمام : تعالي فديتج .. بسج دراسه .. ريحي شوي !!
سعيد : امي فديتج خليها تدرس .. شو ورا البنت غير الدراسه والعرس
انا باعتراض : شي .. شي وايد وراها .. شي بعد الدراسه الشغل .. ليش البنات يدرسون عشان يعلقون الشهاده فالبيت
سعيد : البنت مالها غير اليلسه فالبيت كم مره بفهمج .. بتخلصين دراسه وبتعرسين .. وبعدين.. " باستهبال" .. منصور يترياج تخلصين .. يلا شدي الهمه .. كم بيتريا الريال ؟
انا اعرف ان سعيد يبا ينرفزني من يطري هال منصور : مابرد عليك .. ابوي .. شوف سعيد .. يبا ينرفزني
ابوي بحزم : بسكم انتو الاثنين .. خلونا نتغدا .. بعدين قلتلج وبرد اقولج منصور محد بيغصبج عليه حتى لو كان ولد عمج .. ماعليج من سعيد وحركاته
سعيد يضحك : هههههههههههه لاتقصون عليها .. " ويصد علي " .. بتاخذينه ترا.. " ويرد يضحك"
طلعت له لساني عشان اقهره ...طنشته و يلست اكل بشهيه .. الاكل لذيذ .. سرحت بموضوع منصور .. انا اعرف ومتاكده محد بيغصبني على منصور .. بس اصلا منصور ريال والنعم فيه .. مافيه عيب عشان ارفضه .. بس انا مابا افكر بالعرس الحين .. ابا اتخرج واشتغل .. وانا متاكده ان منصور يفكر شرات سعيد.. يعني رافض فكرة الشغل تماما .. خلصت غدا ..
انا .. نشيت : الحمدلله .. شبعت ... بروح ارقد شوي .." صديت على امي ".. امي قوميني عالاذان بنش اصلي وبكمل دراسه
امي : ان شاءلله .... " رحت الغرفه وانا اسمعها تتحرطم " ... حشى .. ماعرف متى بتخلص هالدراسه
ههههههههه فديتها ياربي .. الله لا يحرمني منها بس
.................................................. ..............................................
خليفه"


لبست كندورتي وعدلت غترتي .. اليوم السهره للصبح .. باجر السبت يعني ماشي دوام .. رشود يقول السهره فالمزرعه اليوم .. اصلا احلى شي المزرعه .. لا من شاف ولا من درى .. ركبت سيارتي واتصلت فيها ..
غايه وصوتها كله رقاد : الوو
تميت ساكت
غايه بخوف : الو .. خليفه
انا : عيون خليفه
غايه تتنهد : خليفه شو فيك خوفتني!!
انا مبتسم : ماشي .. احب صوتج وانتي ناشه من الرقاد .. تكلمي انا مابقول شي .. ابا اسمعج بس
غاية بدلع : خلييييييييييفه
انا : فديتج .. للحين راقده بسج رقاد يلا نشي
غاية : ليش الساعه كم الحين؟؟
انا : 6 المغرب .. يلا نشي .. حشى ماتشبعين رقاد
غايه : حبيبي والله تعبانه .. كنت سهرانه على فلم هندي امس .. صحت صياح
ضحكت عليها ... يحبها للافلام الهنديه .. تحب تطالع عقب تيني تصيح .. لاتشوفين انزين
انا : محد قالج تشوفين ... مممم " بمكر" ... حبيبي
غايه بحب : هلا حبيبي
انا : انا بيلس ويا الربع اليوم .. بتاخر شوي .. لو تاخرت عليج وماتصلت .. ارقدي فديتج لاتستهمين علي
غاية بلوم : خليفه .. بعد سهر .. ماتبت يعني!!
انا بسرعه : لالالا .. انتي تعرفين اني مودر هالسوالف من زمان .. قعدت شباب بس .. دق عود وهالشغلات .. تعرفين غاية فالويكند الشباب يحبون يتيمعون ..
غاية تتنهد : انزين لاتتاخر وايد ..و تحمل على عمرك
انا : ان شاءلله حبيبي .. وانتي بعد نشي كلي لقمه ويلسي ويا خواتج شوي
غاية : ان شاءلله ... خليفه !!
انا : هلا
غاية : احبك
انا ابتسمت : وانا بعد ... والله احبج
يقولون ان الانسان مهما يعرف مايرتاح الا عند شخص معين .. وهالشخص هيه "غايه" .. عرفت وايد .. وللحين اعرف وايد .. بس غايه غير .. غايه حبيبتي .. وحياتي .. وهيه الانسانه الي اباها ام عيالي ..بس ..ممممم ... بس مب الحين .. الحين مب مستعد للاستقرار .. صح ان عمري 26 مثل ما الكل يذكرني .. بس انا ماشبعت سهر .. هياته .. ماعشت حياتي بعدني .. بعدين صح ان غايه حبيبتي وحياتي بس انا ماقدر اوصل لها .. انا اكلمها كل يوم و اشوفها نادر من بعيد .. بس ماقدر اقرب صوبها .. ماقدر المسها ..هالشي انا محتاينه وايد.. وصوتها مايكفيني .. وانا مارضا اني اعاملها مثل الي وياي ..هيه مب رخيصه .. بس انا ريال .. وابا استانس شوي .. يعني مايضر لو لعبت شوي .. وبعدين .. الاستقرار لاحق علي .. ولما بستقر .. غايه هني .. مابتروح مكان!! .. واخيرا وصلت المزرعه .. شكله رشود مرتب سهره محترمه اليوم ... بنستانس ..
......................................
سعيد"


ساير بيت عمي حمد ... بشوف الحب اليوم .. من ملجنا من اسبوعين ماشفتها .. اخر مره كلمتها بالفون قالت لي انها بفتره امتحانات الحين .. حسيت انها تبا تقولي" يعني يا ذكي لا تفكر تي بيتنا هالفتره .. و خفف اتصالاتك شوي" .. ماكنت ابا اضغط عليها .. بعدين انا اعرف انها تتعذر بالدراسه لاني خجوله .. خجوله وايد .. وهالشي الي احبه فيها .. وصلت بيت عمي ودخلت الميلس .. حصلت منصور يالس يطالع مباراه .. اففف .. ابدا مب وقت هالانسان الحين
انا : السلام عليكم
منصور نش يوايهني : وعليكم السلام .. مرحبا بو عسكور .. شحالك ؟
انا : بخير ربي يسلمك .. شحالك انته ؟ عساك بخير
منصور وحسيت مب عايبنه : بخير ربي يعافيك .. ماشاءلله منور بيتنا اليوم
انا ومتعمد : هيه ياي اشوف حرمتي
منصور : هييييه ماشاءلله .. حياك حياك .. بسير ازقرها
وطلع ... الي ابا اعرفه شي واحد بس .. ليش هالانسان كريه!! .. عوذ بالله .. من صغره جي !! .. يا سبحان الله .. في ناس جي نفسيات من الفطره .. مايعيبهم شي .. ماعرف ليش مارتاح له .. موووووليه .. الله يعينج يا ميثه .. من الصغر يقولون ميثه لمنصور ومنصور لميثه .. والله انه مايستاهلها .. ميثه شيخه وتستاهل شيخ .. قطعت علي افكاري .. الحرمه
الريم وعينها تحت : السلام عليكم
اأأأه قلبي .. ماعرف هالبنت شو تسويبي من اشوفها .. والله احس بقلبي يرقص رقص ... من صغرنا احبها .. الي تباه تحصله .. مبزنها ونحن صغار ولين اليوم .. لو حد يضايقها كانت تيني انا ركض وتشكيلي .. ويا ويله مني الي يزعل الريم شيخه الحريم .. ادري انها صغيره .. 18 سنه .. توها مخلصه ثانويه .. قالولي اترياها تخلص جامعه .. ماقدرت اصبر .. ماقدر اتريا .. من صغري اباها .. ترييت وايد ..بس ماروم.. نشيت بسلم عليها ..
انا : وعليكم السلام .." توني ببوس راسها جان ترد على وره "
ههههههه فديتها .. مابيذبحني الا هالمستحى الي فيها .. بس متى بتفهم اني انا ريلها خلاص
انا : تعالي فديتج .. يلسي هني " واشرت لها صوبي .. يلست بعيد .. بعيد وايد ههههههههه .. نشيت وقعدت حذالها "
انا ارفع راسها عشان تطالعني : الريم ..
الريم وعيونها بعدها تحت : ه ه هلا
انا : طالعيني فديتج
الريم تطالعني وتمت ساكته
انا بهمس : وحشتيني
نزلت راسها .. حسيتها ترجف وايد .. يودت ايدها ورصيت عليها ..
انا : بس حبيبي .. هدي .. مابسوي فيج شي والله .. ياي اسلم بس وبروح
الريم ردت تطالعني ببرائه : يعني مابتتعشى وياي ؟
انا ابتسمت : امبلا .. خاطري .. " وحطيت ايدي على بطني " .. اصلا يوعان وايد .. بس انتي ماتبين .. شوفي كيف ترجفين "ورديت ارص على ايدها " .. اغصبج يعني؟
الريم تطالع تحت وويها صبغ احمر : لا تم " وردت تطالعني " اصلا انا سويت لك العشى .. كيف تروح؟
انا واحس اني ذبت من نظراتها .. قربت ويهي منها وهمست : انزين بتلقميني ؟
الريم واحس بانفاسها تتسارع: لا " ونشت تركض برع "
انا : ههههههههههههه "و اقول فخاطري ... فديتج "





.................................................. ..............




نهاية البارتين ... ترقبوو البارت ال 3 ان شاءلله ...
اتريا تعليقاتكم و بفارغ الصبررر ^^ ...
لاتبخلون علي بردودكم

اختكمـ ..شــووقـ