البوح الثاني

أرجوان .~


قاعدين على سفرة الطعام أتريا الهوانم خواتي إييوون
أبويه: وينهن خواتكن ؟!!
حمدان: أبويه تدريبهن بنات تلاقيهن يبدلن ويتلبسن ..
حسون " حاط رأسه على الطاولة " : لو أنا ما خليتوني .. هي ترا الناس مقامات صح
أنا " ياية أقوم " : أنا بشوفهن
أبوية: لا لا تمي " يطالع أمينة " أمينة حطيلنا ريووق خل ناكل .. برايهن البنات
أمينة: حاضر يا باشا على آمرااك ..
[ أمينة هذي مثل مدبرة المنزل .. مشرفة على الخدم .. عندنا من عمر .. ووايد صرنا وياها عقب ما توفت امايه الله يرحمها .. نحبها ونحترمها .. زوجها ياسر يشتغل عندنا كسايق .. ]
وبدت تحط لنا من هالبيض والجبن والجاي وإلخ ... !!
شوي نزلن " ديم وجوجو "
ديم لابسة مريول المدرسة ورابطة شعرها من ورا بربطة ومحطية جحل خفيف تحت عينها ..
أما جوري لابسة قميص كت أصفر وبنطلون جنز .. رافعة شعرها بإهمال .. وشالة عباتها بإيدها وشيلتها ..
باسوا راس ابوية : صباح الخير
الكل: صباح النور
أنا : وينكم من مساعة نترياكم ..
نانا: قاعدة اترجاها تعطيني القميص مب راضية فلبست مالي
ديم: قلتلج مالي مالي يعني ليش تبيينه ..
أبويه " حسيته معصب بس كاتم غيظه " : زين قعدن إكلن بسرعة عشان تلحقن ع إمتحاناتكم
نانا : إن شاء الله .. " تتلفت " عيل ذيااب وينه
أنا: راح دبي عنده كلية
حسين: حسبالج أنتي مثلاً تروحين الكلية متى ما تبين وتردين متى ما تبين
نانا: جب جب ..
أبويه: خل عنكم الكلام يالله بسرعه ونت حسينووه وراك مدرسة يالله قوم خل نوصلك بدربنا
حسين : عادي بروح ويا عمي ياسر
أبويه: أنا بروح وياه الشركة يالله قوم وياي
حسين: أبويه دخيلك بروح مع حمدان
حمدان: خلاص أبويه أنت ترخص وأنا بوديه وبنزل وياه
أبويه: زين عيل أنا بمر المشروع قبل ماله داعي أنت أتي روح الشركة ع طول
حمدان: إن شاء الله أبويه
أبويه " يطالع البنات " : وأنتن ؟!
أنا: أبويه أنا بوديهم بسيارتي من زمان ما وديتهم
أبويه: زين عيل شوي شوي بالدرب وعن التهور وياهن
أنا: إن شاء الله الغالي
وطلع أبويه وشوي لحقه حمدان و حسين وتميت أتريا البنات يخلصن ريوقهن حشى سوالفهم أكثر عن أكلهم متى بيخلصون !! هذا بدال ما يراجعون للامتحان
.
.

سهيل .~
حدرت غرفة غاية وشفتها مغمى عليها شليتها أركض فيها وأجوف امايه تعق عليها عباية وتغطيها ولبست عبايتها و طلعنا ..
" ياربي أنا روحي ما عندي سيارة "
جفت سيارة سلطان ولد عمي برع وهو واقف يمها يرمس بالفون .. سكر الفون بسرعة وهو ايي صوبنا
سلطان : خير خير شو صاير؟!
أنا: خير ولد عمي .. أختي تعبانة وبنوديها المستشفى
سلطان: زين يالله تعال بوديكم
أنا: لا عادي سلطان لا إتعب روحك
سلطان: أفا عليك سهيل عيال عم نحن .. يالله تعالوا
وحطيت غاية ورا ع ريل أميـه وركبت جدام يم سلطان وكل شوي أطالع ورا أبا اتطمن عليها
.
.

عذبة .~
بعد ما نزلنا ريم مدرستها .. وقف بابا عند مدرستنا أنا ورغود و روضة..
أنا: باباه بتنزل ويانا
باباه: هيه صح زين ذكرتيني .. بنزل وياج
علاية: بتنور السكوول الوالد
باباه: هههه عن هالحركات ويالله نزلن بسرعة عشان ألحق ع الدوام
روضة: عادي باباه أنت شريك مع أخوك بالشركة يعني كأنك صاحب الشركة
باباه: حتى لو لازم أهتم بالشغل
" بند السيارة ونزلنا بعد ما شلينا كتب الإمتحانات والمقالم طبعاً "
أبويه مسك أيدي وأيد رغد مشينا لين ما وصلنا بوابة المدرسة وكان الحارس " أشرف " واقف برع .. خذ بطاقة أبويه ودخلنا
روضة " أتي توقف جدامنا " : لا والله يعني انا مب بنتك .. !! بنت البطة السودا يمكن ..
أبويه : ههه إنتي أغلاهم " يهد أيدي وأيد رغد " تعالي بلمج أنتي
علاية: لا والله أبويه .. خيااااااااااانة " تتطالعني " عذوب يقولها أنتي أغلاهم يعني أغلى مناا ..
أنا: زين مثل ما نحن بناته هي بنته
علاية : لا لا ظلم
أبويه: أي ظلم الله يهديكم .. كلكم عيالي وأحبهم كلكم بنفس الدرجة يلا جدامي أمشوا
" باللحظة وصلنا لباب الاستقبال ودخلنا مع بعض "
أبويه : يالله روحوا صفوفكم وأنا بدخل عند الأخصائية بكلمها
علاية: أبويه ما تبا مساعدة مني مناك يمكن تستحي ترمس الحرمة
أبويه: رغدووه عن الهبال يالله روحي شلي خواتج وروحي
علاية: من عيوني
ودخل أبويه حجرة الأخصائية وكلمنا مسيرنا للصفوف دخلت روضة قبلنا لان صفها قبل صفنا
تصدقون لو أقولكم تعبت وريلي بدت تعورني
أنا: عليووه تعبت بقعد منيه
علاية " تتطالعني " : زين وصلنا " تأشر " هذا صفنا خل نقعد اهنيه ع ما الامتحان يبدأ بعده باجي وقت
قعدنا وغمضت عيوني وأنا أتألم ياربي ألم فضيع واايد هو اللي أنا أحس فيه

أرجوان .~
يالسة ع واحد من الكراسي الي موجودة بمدخل البيت أتريا الهوانم اييوون جفت أمينة طايفة
أنا: أمينة
أتي صوبي
أمينة: أهلين ست أرجوان
أنا " مديت لها سويج السيارة ": عطي عميه ياسر يشغل سيارتي ويطلعها برع جدام الباب لين ما أجوف خواتي وأطلع له
[ صح هو مب عمي ويشتغل عندنا بس لازم نحترمه هو ككبير بالسن ومعانا من عمر ]
أمينة: على أمركِ عايزة حاقة تانية
أنا: سلامتج
ياية بروح بس تذكرت
أنا: أممم
أمينة " أطالعني" : . . . .
أنا: محتاجين أغراض للبيت أييبهم بطريجي
أمينة: لا يا ست أرجوان أي حاقة عاوزينها أبلغ ياسر أيقيبها من الجمعية إنتي لا اتعبي حالكٍ
أنا: لا عادي يلا روحي خل يشغل السيارة خل أشوف نانا و ديم وين
" اتي نانا صوبي وشوي أجوف ديم تمشي ع الخفيف وراها "
نانا : يالله أنا زاهبة
ولبست عباتها المفتوحة و سكرت كل الفصم لين تحت ركبتها وخلت الباجي مبطلات وحطت الشيلة ع راسها بطريقة مظهرة قصتها .. أما ديم حاطة الشيلة ع كتفها وشالة جنطة صغيرة ع ظهرها
أنا: زين وإنتي [ أقصد ديم ]
ديم: جاهزة
أنا: زين شو هالجنطة أنتي مب إمتحانات
ديم: هيه بس عن حد يشل كتبي ترا لازم نردهن للمدرسة
أنا: زين يالله أمشن تأخرنا
نانا: زين بعدها ما يات 8 أنا إمتحاني الساعة 9
أنا: بس المدرسة الحينه الامتحان يبدأ 8:30 صح ديم
ديم : هييييييييه
بعد أقل من ربع ساعة وصلت للمدرسة
ديم: زين أنتي بتمريني
أنا: متى تخلصين
ديم:" علي جيولوجيا الامتحان ساعتين يعني عشر ونص جي يعني
أنا: بمرج إن شاء الله بس إنتي ركزي بالامتحان
ديم: أوكي يوم بخلص بتصل فيج أوكي
أنا: زين يلا مع السلامة
ديم : مع السلامة
ولفت الجهة 2 وأترييتها كالعادة لين ما دخلت المدرسة ووقفت شويه وعقب حركت
أنا: الساعة 8:10 تبين تروحي الكلية ولا نتحوط قبل
جوجو : والله ما عندي شغل ضروري بس امتحان و مابا اراجع
أنا: زين عيل بنمر الشيشة بعبي بترول
جوجو: أوكي
أنا: شلون الدراسة وياج
جوجو: تمام
" أطالع الجنطة اللي شالتنها نانا كانت جنطة اللاب الصغيرة يعني يادوب اللاب يدخل "
أنا: وإنتي ما تشلين كتب
جوجو: اليوم الامتحان ع اللاب نانا تراني ادرس كمبيوتر ولا نسيتي يالعيووز
أنا: ههه عيووز بعينج أمم لو سامعة كلامي وياية وياي لندن مب أحسن لج ..
جوجو: ممم يمكن بس أنا عايبتني دراستي اهنيه ومستفيدة وايد
أنا: إنزين ليش ما رحتي كليات دبي مثل ذياب
جوجو: أرجوانوه بلاج علي !!
أنا: ههه ما بلاني شيء " بجدية" أنتي للحينة متأثرة بوفاة ماماه وما تقدرين تبتعدين عن البيت وايد صح
جوجو " لفت رأسها الجهة 2 " : . . .
أنا: جووج عاد ليش قلبتي جي أنا أسفة " وأحط إيدي ع جتفها "
جوجو: أرجوان إنتبهي ع الطريج
أنا: بس أنا موقفة من زمان
جوجو: " تتطالع جدامها " هي صح

كنت موقفة يم البحر مادري ليش يمكن إشتقت له إشتقت أعق همومي في قاعه
جوجو: شو من الهم عندج اليوم ؟!ٍ
أنا " وأنا أتذكر الأشياء الي صارت الفترة الأخيرة " : أه خليها بس ع ربج
جوجو: سلامتج من الأه
أنا: الله يسلمج
نانا " ياية تبطل الباب "
بس مسكت إيدها : يالخبلة بتخيسين ثيابج بتغدي ريحة بحر وراج كلية
جوجو " ضربت يبهتها " : أووه صح نسيت
أنا: بنتم شوية بس وراج امتحان أنتي ..
.. > !! نغمة فوني
جفت الفون في هذي الفتحات اللي يحطون فيها الأكواب مادري شسمها بس أكيد تعرفونها

شليته وجفت خالد أخوي متصل
أنا : هذا خلوود " رديت " هلا هلا
خالد " بضحك " : أهلين أهلين
أنا: شعندك متصل مب من عوايدك
خالد: هههه خبرج الأنسة أرجوان كل يوم بشوارع لندن تتمشى وإن غيرت راحت جنيف ولا إيطاليا ما نقدر نرمسها صايرة بزنس وومن ههه وهي بعدها تدرس .. !
أنا: ههههه شسوي تراني أدرس وبعدين جنيف وإيطاليا ما أيي صوبها إلا بالإجازات وخاصة يوم يكون باباه اهناك
خالد: زين زين شكلنا حسدناج بلاج رديتي قبل لا يخلص الكورس
أنا " سكتت وأنا أتذكر " : ماشي خلود أنا ما وقفت أنا مخلصة كورسي سلمت مشاريعي وخلصت باجي النتايج
خالد: هههه زين أممم أنتي بالبيت
أنا: لا طالعة وديت ديم مدرستها والحينه بودي جوري
خالد: زين عيل أنا بودي بدور بيتكم عشان ما اتم روحها وديري بالج عليها
أنا : لو طايعنا وتام ويانا البيت بدال ما ساكن بشقة مب أحسن
خالد: عن الهذرة الزايدة يلا فارجي
أنا: حيواان واحد مع السلامة
خالد: عن تزعلين بعد ما فينا ع زعل أم عيون رمادية
أنا: خلوووووووود فارق
خالد: ههههه أوكي باي
وسكرت عنه وحركت السيارة عسب أودي جوري
جوجو: شو يبا ؟!
أنا: بييب مرته عندنا البيت أونه ما بيخليها بروحها
جوجو: أها عيل وناسة بيكون بس خسارة أكيد بيروح عقب الغدا
أنا: أمم عيل بخليهم ايتموون عندنا لين بالليل
جوجو: هيه الله يخليج مشتاقه لهم وايد
أنا ابتسمت لها وتمينا تقريباً ساكتين لين ما وصلنا الكلية
وقفت صوب البوابة من برع ما أدري ليش ما يخلونا ندخل داخل
أنا: يعني لين متى ونحن برع شو بيصير لو خلونا ندخل داخل
جوجو " طلعت روجها والجحل ونزلت الجامة الأمامية تعدل شكلها "
أنا: يالله بسرعة
جوجو خلصت بسرعة وردت أغراضها بالجنطة وياية تنزل بس ردت
جوجو: جوفي جدام جوفيهذا!!
إطالعت جدام شفت واحد توه نازل من سيارته وواقف يشل أغراضه متعصم ولابس كندورة بيضا ما لحقت أجوفه لأنه لف الجهة الثانية وعطانا ظهره
طالعت نانا أبا منها تفسير
جوجو : هذا ..
قاطعها صوت طق طق > ع الجامه
الحارس يبانا نحرك عساس واقفين بالطريق بطلت الجامة
أنا: زين زين بلاك متسعيل
الحارس: Too many cars are waiting you
أنا: يالله بالستر منك وين توو مني " إطالعت الجامة وراي صدقه وايد "
جوجو : بقولج عقب يوم برد البيت وراي امتحان باااي
أنا: باي
ونزلت بسرعة بسرعة وحركت سيارتي متوجهة للبيت
.
.
حمدان .~
نزلت حسين مدرسته وتوني حادر الشركة وأشوف عمي عبدالله قاعد ع مكتبه
أنا: السلام عليكم
عمي: عليكم السلام توه الناس
أنا: ههه ترا رحت مدرسة حسين أوصله
عمي: حتى أنا رحت مدرسة البنات ودخلت عشان عذبة ما تأخرت شراتك
أنا " عقدت حياتي " : بلاها عذبة ليكون متضاربة ولا مسوية مصيبة
عمي: فال الله ولا فالك يا ريال لا رايح عشان ريولها تدريبها عظامها وجي وممنوعه من الرياضة
أنا: هيه صح نسيت الله يعينها
عمي: آمين زين وأخبار خوانك من زمان ما يينا صوبكم
أنا: والله تمام وأرجوان أمس رادة مخلصة أشغالها وبتم ويانا اسبوع وبترد هي والبنات يأجزون بلندن
عمي:هيه أجوف اللي عندي محتفلات يبون يسيرون بعد
أنا: هيه عمي برايهن خلهن يستانسن شوية
عمي: هيه عيليبالنا كلنا أجازة و نسير يميع .. يالله جوف شغل ابوك قبل لا أيي
أنا: إن شاء الله
وقعدت أجوف الشغل والأرواق اللي يبالها توقيع الوالد
.
.

جوري .~
نزلت بسرعة من سيارة أرجوان عشان ما أتأخر روحها الساعة 9 إلا ربع شوية وببدأ الامتحان
وصلت صوب باب المدخل بس سمعت حد يزقر
.. : لو سمحتي لحظة
إطالعت وراي جفت نفس الشخص اللي كنت أبا أقول لأرجوان عنه أويه شو يبا مني !! نزلت رأسي أباه يرمس يقول شو يبا !! بس ما تكلم رفعت رأسي وأجوفه يالس يأملني وسرحان فيني يلست أطالعه عيني بعينه وهو شكله حس بعمره ونزل رأسه
الولد : وإنتي تمشين طاح منج هذا البوك
إطالعت إيده ~ بوكي كان بيده
مده لي و شليه بس تلامست إيدي بإيده حسيت بكهرباا مشت بكامل جسمي
أنا: مشكور
الولد: العفوو
حطيت البوك بالجنطة .. كانت مفتوحة عشان جذه طاح .. ومشيت عنه وأنا فكري متلخبط أمشي أمشي وأنا ما عرف وين أسير نسيت وين إمتحاني نسيت دربي مب لمسة جي سوت فيني مب كهربا هذي اللي سرت بجسمي ولخبطت كياني . .
وقفت أخذ نفس يم ثلاجة الماي الموجودة بالممر وشربت لي ماي ولمحت بنت كلاسي وسرت وياها لقاعة الامتحان
.
.

ديمه .~
قاعدة بوسط الإمتحان طافت نص ساعة كتبت بالورقة كل اللي أعرفه و تام وايد ما كتبت فيه أي شيء رفعت رأسي أجوف الوضع حولي بما أني أخر وحدة بالعمود الثاني فتقريباً أقدر أطالع كل الصف
جفت علاية وهي قاعدة وظهرها سيدة وتحل ما شاء الله عليها لمحت عذبة جدامها تحل شويه وشوي تغمض عيونها أكيد ريلها تعورها .. لمحت مها بنت عمي محمد بعد يالسة تحل وتحل وتحل ما شاء الله عليها عيني عليها باردة هذي أشطر وحدة من قروبنا الله يكتب لها كل خير .. بس في وحدة فاقدتها غاية ليش اليوم مش مداومة عسى خير
وتميت أفكر فيها شوية وأفكر بحل للأسئلة
.
.
حمدان .~
ياني رقم غريب شليت الفون ماعرف منوه !!
عمي: ياخي رد ع تلفونك أزعجنا
أنا: رقم أرضي ماعرف منوه
عمي: رد يمكن حد يباك ضروري
أنا: أوكي " ورديت " ألوو
صوت أنثوي : هلا أخوي
أنا: آمري أختي
..: ما يأمر عليك عدو أنت ولي أمر غاية
أنا " غاااااااااية ياربي من زمان ما عرفت أخبارها " : هي أنا شو السالفة [ ما كنت أبا أقول أني ولد عمها عشان أباها تكمل أخاف أقول وتقولي أنت مب ولي أمرها ]
..: هي اليوم غايبة وعليها امتحان وحابة أتأكد من سبب الغياب
أنا: والله أنا بالدوام ما أعرف هي شو فيها ليش ما إتصلتي بالبيت
..: في رقمين مسجلين عندي واحد محد يرد عليه والثاني رقمك هذا
قاطعتي عمي: غاية بنت أخوي
أنا: " هزيت له براسي " زين أختي يمكن البنت تعبانة ولا شيء ما بتخلي الامتحان بدون سبب ماعليه أنا بتأكد
..: إن شاء الله مع السلامة
أنا: مع السلامة
عمي: زين إتصل بأبوها
أنا: أبوها أنت أدرى بحالته وين أتصل به تلاقيه هو روحه ما يعرف عنها شيء
عمي: رقم سهيل عندك
أنا: " أدور بفوني وأنا أدعي إن ألقااه" إن شاء الله يكون موجود
وحصلته وأتصل بسهيل اللي رد من أول مرة
سهيل: ألووه
أنا: ألووه سهيل
سهيل [ بصوت خايف ]: هيه ألحقني أميرتك تعبانة ماعرف شفيها ؟!
[ أميرتي دلوعتي غاية هذا لقبها من يوم صغيرة وأنا اللي ملقبها ]
أنا: أنت وين بييك
سهيل: مستشفى [ . . . ] صوب . . . . .
أنا: مسافة الطريق
سهيل: بترياك لا تسرع
أنا: أوكي مع السلامة
عبدالله: بتروح
أنا: هيه بروح لو أبوي سأل خبره إن شاء الله ما أتأخر
>
>
دخلت المستشفى وأنا أسابق خطواتي لين ما وصلت للمكان اللي وصفه لي سهيل
لقيته واقف يم باب غرفة ويمه أمه وأتوقع هذا سلطان ولد عمي علي
أنا: السلام عليكم
الكل : عليكم السلام
أنا: وينها أميرتي شو صار فيها !!
طلع الدكتور في ه اللحظة
سهيل: بشر دكتور
قلبي يرقع ما وقف من الخوف عليها
الدكتور: مجرد حالة إعياء هي ما بتأكل عدل و عندها فقر دم وشكلها بتفكر وايد يا ليت تهتمون شوي بأكلها وتبعدون عنها أي ضغوطات نفسية في ه الفترة
أنا: دكتور نقدر نشوفها
الدكتور: أكيد تقدرون تتفضلون تشوفونها بس بهدوء
سهيل: نقدر نطلعها
الدكتور: لما تستقر حالتها تقدرون
قاطعتهم ودخلت عليها
أميرتي الغالية متمددة ع الفراش الأبيض وإبرة المغذي بإيدها ويهها مصفر وباين عليه آثار التعب
مشيت صوبها ومسكت يدها ويلست أمسح ع شعرها .. غاية تصير أختنا بالرضاعة .. إمايه الله يرحمها مرضعتنها مع ديم
بطلت عيونها : همم
أنا: لا تتعبين روحج ارتاحي كلنا حواليج
سهيل : شحالج الحينة
غاية [ بصوت تعبان ]: تعبانة
أنا: ارتاحي غاية نامي شوي لا ترهقين روحج
غاية: ماماه
أم غاية: أنا هنيه يمج [ ومسكت يدها ]
وغفت غاية شوية وهي راضة على إيد أمها
.
.
مريم .~
وصلت الكلية تقريباً حضرت الامتحان وأحس حليت نص نص إن شاء الله أنجح
رحت مع شوق ربيعتي الكانتين بنأكل وعقب بنرد البيت
أنا [ قعدت ع الكرسي ]: جوفي هذيج البنت يالسة تطالعني من لما طلعت من قاعة الامتحان والحينة يات ويانا الكانتين
شوق : هذي بنفس تخصصنا بس سنة أولى أسمها أتوقع جوري أنتي تعرفينها ؟!
أنا: والله ويهها مب غريب ..
شوق: زين سويلها طاف خبريني بلاج مالج خلق لشيء اليوم حتى الامتحان حليتي وطلعتي
أنا: تراني مواصلة مب راقدة
شوق: صج وشو سويتي ؟!
أنا: ماشي قعدت أطالع المسلسل الكوري اللي خبرتيني عنه
شوق: ومواصلة للصبح ع النت
أنا: تخيلي إنتي بس .. لا حبيبتي نزلتهم ع اللاب وبالليل يلست أطالع بدون نت
شوق: اها زين والله
أنا: سكري والله يوم ماماه تقولي ليش قافلة الباب ما عرفت شو أرد ؟ انربط لساني
شوق: ههه
أنا: لا وتقولي لو عرفت في شيء منيه ولا منيه يا ويلج ..
شوق : زين خلصي المسلسل
أنا: لا باجي أربع حلقات الحينة بكملهم
شوق: زين يلا بطالع وياج
أنا: تطالعين بس بدون أي تعليق ما أبيج تخربين علي
شوق: ههه بفكر
إبتسمت لها أدريبها ما تروم تسكت الود ودها تقولي القصة كاملة
وبطلت اللاب ع المسلسل أكمله لين ما أتصل بأمي أتي تشلني

البوح الثالث
.
أرجوان .~
قاعدة مع بدور مرت أخوي
أنا : و شحالها بدور وشحال خلود أخوي
بدور: أنا تمام و خالد زين
أنا: ولهت عليكم من زمان ما قعدت وياكم
بدور: كله يهون في سبيل دراستج الغلا
أنا: بدينا في دروس النصايح
بدور: هههه . . بس تبين الصدق فكرة توقيف قيدكم لمدة سنة ع السنة اليديدة ما داش بالي يعني أحس ماله داعي
أنا: تتكلمين عني أنا ولا عن نالووه
بدور: عن نالووه تدرين أنها ساكنه عند خالتي وتدرين شو فيها خالتي ع الأقل في لندن أنا مطمنة عليها وعارفة هيه شو تسوي وشو فيها أما عند خالتي
قاطعتها: إن شاء الله هي بخير وبعدين هي مب عند غرب خالتكم هذي يعني مستحيل حد يضرها إهناك مستحيل
بدور: إنتي ما تعرفينهم
أنا: ههه أنزين يمكن نوقف بس يمكن لا وبعدين نحن بنرد لندن بعد اسبوع عسب النتايج
بدور: اها
أنا: تدرين ولهت عليها خل أدق لها وبنمرها شرايج
بدور [ حسيت بفرحة بانت ع ملامحها ] : هيه هيه دقي لها
شليت فوني وأنا أضغط الأرقام اللي حافظتنهم عن ظهر قلب مثل ما يقولون نالووه [ منال ] هيه توأمي الروحي ربع من عمر حافظتنها أكثر عن روحي درسنا ونجحنا بتفوق مع بعض طلعنا لندن ببعثة مع بعض اجتهدنا مع بعض وعندنا أحلام كثيرة لازم نحققها مع بعض نالووه وبدور خوات أبوهم وأمهم توفوا بحادث يوم كانوا صغار و سكنوا عند خالتهم عوشة اللي كانت تغار من أمهم وما تحبها وما كانت تعاملهم زين عشان جي بدور متخوفة من وجود نالووه ببيت خالتها .. بس أنا ماحس بأي خوف يعني مستحيل في خالة بتضر بنت أختها مهما كرهتها بتظل في لمحة حب مخفية في روحها .. ماعرف يمكن كلامي صح غلط الله يعلم
نالووه : هلا
أنا: نالووه عندي لج مفاجأه تبينها ولا أردها
نالووه: لا طبعاً أباها ليكون معرس
أنا: هههه لو معرس جان خذته حقي ما خليته لج ويا ويهج
نالووه: هههه إنزين خبريني شو المفاجأه
أنا: بدوورووه عندنا بالبيت شرايج نمرج وتقعدين معانا اليوم
نالووه: صدق وناااسة
أنا: تزهبي ع ما ألبس وأسخن السيارة وأييج يالله بسرعة ماكو وقت
نالووه: أوكي

سكرت من عندها و رحت غرفتي ألبس عباتي و نزلت لبدور وطلعنا
.
.
.
نالووه.~

أنا منال عمري 20 كبر أرجوان يدلعوني نالووه أرجوان صديقتي من أيام الطفولة قضينا أيام حلوة مع بعض من أيام الروضة لين الحينة دفتر ذكرياتي كله معاها بكل صورة هي موجودة بكل لحظة بحياتي كانت لها بصمة أرجوان مب صديقة وبس هيه أختي هي اقرب لي من روحي أقرب لي من كل البشر ما أكذب عليكم لو قلت أني أعتبرها أمي وأبوي وأختي وكل خلاني . . أشبه أختي بدور بس شوي أختلف عنها ببعض الملامح

بدلت ثيابي ورفعت شعري بقباضة صغيرة بإهمال لبست عبايتي وشيلتي بإهمال وييت بطلع تبون الصراحة كنت أدعي بقلبي أنه ما أتصادف ويا خالووه عوشة لأنها أكيد ما بتخليني أطلع وبتطلع لي أأألف لعثة وسبب عسب ما أطلع خذت لمحة ع شكلي جدام المنظرة وطلعت من باب غرفتي اللي أصلاً مطلة ع صالة اللي يقعدون فيها وجفت خالوه عوشة وولدها قاعدين [ أحمد 27 سنة مب معرس ]
أنا: السلام عليكم
الكل: وعليكم السلام
خالوه عوشة: هااه على وين العزم أجوفج كاشخه
[ مرت في خاطري اللمحة اللي خذتها جدام المنظرة قبل لا أطلع .. ويهي أجلح بدون أي مكياج حتى حجل ما حطيت .. لابسة عباة سادة وشيلة سادة ما فيها اي ألوان .. إللي يجوفني يقول رايحة لعزا إستغفر الله وهذي تقولي كاشخة ]

.
.

أنا: خالووه بروح مع بدور بعد شوي بتمرني
خالوه: بدور من متى تسووق أكيد بتمرج ويا ريلها ماشي سيرة وياهم عيب عيب قاعدة ع جبد الحرمة وريلها
أنا : خالوه أرجوان بتمرني وياها
خالوه: جي السالفة يعني أرجوان
أنا [ الله طولج يا روح ]
أحمد [ كان يطالعني وعقب لف ع أمه ]: إماية خليها تسير تتسلى ويا البنات بدال قعدة البيت
خالوه: تتسلى عندها المطبخ تسير تتعلم لها شغلة تستفيد منها يوم تعرس
ـأنا: منووه قالج بعرس أنا
خالوه: هيه تبين تقعدين ع جبدي وأصرف عليج من أنتن صغار وانا أصرف عليكم
أنا: زين سجلي ه المبالغ ع ورقة وأنا بسددهن لج [ وقمت لما رن فوني ] هذي البنية يات بالإذن
طلعت من البيت وأنا حاز بخاطري كلام خالوه مادري ليش جي تكرهنا تنهدت بصوت عالي لما وصلت لباب الحوي وييت أبطله بس شدني لورا صوت
أحمد : منال لحظة شوي
لفيت ع ورا
أحمد: منال أمسحي كلام إميه بويهي ما عليه هي شوي مضايجة مني و حطت حرتها كلها فيج
أنا: أحمد لا تدافع عنها ما صار شيء يالله بالإذن البنات يتريووني
أحمد: نانا اللي وياج
أنا ضحكت : هيه
أحمد: زين طلعي بسير شوية بضحك وياها
وتميت أضحك من القلب عليه لين ما وصلت السيارة بطلع الباب اللي ورا وركبت أما هو فسار لجامة نانا ودق عليها;
نانا بطلت الجامة : هااه العيووز أنت اهنه اليووم
أحمد: هيه يالعيووز إهنه
نانا: أنت العيوز مب أنا ويا ويهك
أحمد يضحك: حمدلله والشكر أبوي عيوز تنقال للحرمة مب للريال يعني إنتي عيوز مب أنا
نانا: زين أنت عاانس هههه بعد قول إني عانس يالله قوول
أحمد: لا ما بقول بعدج إنتي صغيرة عن تنعسين بس إدعي ربج إييب لج معرس قبل لا تعنسين عقب صدق بزقرج يالعانس بدال يالعيووز
نانا: لا بليز كله ولا تقولي عانس هههه
أحمد: زين وين بتسيرن [ يطالع بدور ] هااه بنت الخالة شحالج
بدور: تمام الحمدلله
نانا : يالله إسمح لنا بنسير بيتنا وو بليز يمكن نالووه تنام عندي فلا تحاتونها زين
أحمد: خلاص تم إمره دام عندج أنا مطمن عليها 100 %
نانا: يالله نتلاقى
أحمد: نتلاقى
وسكرت الجامه وحركت وهيه تضحك على أحمد صدق ه الإنسان على إني مضايقة من أمه إلا أنه هو اللي يفرح قلبي أعتبره أخوي إلي ما يابته أمه

.
.
.
جوري .~

طلعت من الامتحان حالة أوكي متأكدة من كل الأسئلة يعني إن شاء الله a+ طلعت وقعدت بالكاتنين ما خذت لي أي شيء بما أني متريقة بالبيت وتوه الناس كنت قاعدة على وحدة من الطاولات قبل لا أيي صادفت مريم بنت عمي وكانت تتطالعني بنظرات غريبة مادري شفيها يمكن ما تعرفني أمممم ما علينا إطالعت ساعتي الحينة 10:15 ديم الحينه بتخلص امتحانها بدق لجوجو اتيني عقبها شليت جنطتي ووقفت ياربي هالألم ثاني مرة أحس فيه اليوم بكل جسمي خل أروح أدق لجوجو وبالطريق بأكل بندول إذا عندها يخفف علي الألم مشيت خطوتين لما من طلعت من الكانتين وعقب ما حسيت إلا بدوخة وو الدنيا أسودت جدامي وطحت من طولي
.
.
.

أرجوان .~
عقب ما شليت نالووه دقت علي ديمة ورحت أمر عليها دقيت لجوري فونها مغلق أكيد بعدها تامة بالامتحان رديت البيت معاهم وقعدنا نسولف بغرفتي أنا ونالوه وبدور أما ديمة راحت تسبح وتقول بترقد شوية
نالوه: نانا
أنا: هلا
نالوه: نانا أنا أقرب لج من روحج صح
أنا: هيه
نالوه: إنزين خبريني شو صار بذاك اليوم
حاولت أرجع بذاكرتي بس قطع ذكرياتي . ~
صوت فوني . ~ شليته شفته باباه
أنا: هلا باباه
باباه: هلا حبيبتي إنتي بالبيت صح ؟!
أنا: هيه باباه بالبيت
باباه: زين لبسي عباتج وطلعي برع أبيج ضروري
أنا: خير باباه شو صاير
باباه: خير إن شاء الله طلعي برع وبتعرفين يلا أترياج
أنا: إن شاء الله باباه
سكرت عنه
بدور: خير شو صاير؟!
أنا: مادري باباه يقول أنه برع ويبيني
نالوه: زين يلا قومي لا تتأخرين عن أبوج
أنا: أوكي بدور خلج ويا نالوه
بدور: أوكي
طلعت من الغرفة بعد ما لبست عبايتي وأنا محطية أيدي ع قلبي والخوف شل كل أعضائي . , ~
.
.
.
.
حمدان .~
بعد ما إطمنا على غاية كتبولها تصريح خروج ونبهونا إن محد يعكر مزاجها ولا يسمعها أي كلام يضايجها ، ركبوا معاي هي وأخوها وأمها ووديتهم بيتهم . ~
.
لما وقفت جدام البيت
سهيل: يالله ولد عمي مشكور وما تقصر
أنا: العفو وبعدين ما بينا شكر سهيل غاية أختيه
سهيل : يعني لو ما كانت أختك جان ما سويت إلي سويته . ~ وكان يتمصخر
أنا: كنت بجوفها بنت عمي اللي واجب علينا نساعدها
غاية: مشكور حمداني
أنا: العفو يالله إنزلوا أنا بروح بييب لكم أكل وبيي
غاية: حمداني شلني ما أروم أمشي .. [ كانت تقولها بدلع ]
أنا: إن شاء الله الغلا
[ نزلت من السيارة وشليتها وهيه مستحية مني لأني قريب منها حيل . ~ ]
دخلنا البيت أنا وغاية ومرت عمي وسهيل ورانا
نزلت غاية عند الغنفة وييت بطلع بس شدني صوت على ورا
. .: عفية عليكم من وين يايين ؟!
سهيل: أبويه
عمي: لا وشالة بنتي وياج لو تبين . . . . . روحي بروحج مب ساحبة عيالي وياج
إطالعت غاية مهما كان هي صغيرة ما لازم تسمع هالكلام اللي إنقال
سهيل: أبويه
أنا: سهيل شل أختك وأمك وردوا السيارة بسرعة
سهيل [ إطالعني ] وهزيت له رأسي وسوا اللي قلتله عليه
أنا: عمي شهالكلام اللي قلته هذي مرتك
عمي: ونت بعد ما شبعت منها ياينا للبيت إطلع برع ورد مرتي وعيالي ردهم
يحاول يقترب مني وهو يترنح عرفت أنه شارب ومب بوعيه .. خليته وطلعت من البيت وركبت السيارة
أنا: بوديكم بيتنا عمي مب بوعيه أبد وأخاف يأذيكم
مرت عمي: هيه يا ولدي ودنا [ تتكلم بنبرة خوف وحنية مرت عمي تحبنا وايد ]
أنا: إن شاء الله
تحركت متجه للبيت
.

مريم . ~
قاعدة على المسن بغرفتي أكلم شوقيه .. ~
أنا . نك نيمي [ ميمي ] ، ما محطية توبيك ، الصورة : كوب نسكافيه
شوق . نك نيمها [ أشتاق لك ] ، ما محطية توبيك ، الصورة : قلب أحمر
.
.


أنا: شوق ملانة


شوق: شو اسويلج ؟! شوفي المسلسل


أنا: مليت شوقيه خلصته وشفت واحد غيره بس مليت


شوق: زين تعالي وياي ما بتملين


أنا: وين أيي وياج ؟!


شوق: بغرفة الشات بتستانسين وايد


أنا [ خفت والله ] : لا شوقيه تعرفيني مب مال هالسوالف


شوق: ليش خوافة محد بيعرف واللي بترمسينهم ما بيعرفونج


أنا: لا شوق مابا خلاص


شوق: كيفج ، انا بطلع من المسن أوكي


أنا: أوكي قلبوه


طلعت من المسن أنا بعد وسكرت اللاب بكبره وأنا أفكر لو أهلي دروا اني حادرة الشات شو بيصير . ~


.


.


روضة .~
نمت تقريباً من بعد الغدا بساعة لين قبل أذان العصر . ~
قمت من النوم وسبحت ع السريع ، وأترييت أذان العصر وصليت ولبست لبس الفروسية وطلعت برع
جفت ماماه
أنا: ماماه بتوديني عند الخيل
ماماه: ما أروم أوديج
أنا [ بدلع ]: يالله ماماه يالله عشان خاطري الله يخليج
ماماه: زين بشرط أوديج وأشوفج تتمرنين
أنا: أوكي موافقة
ماماه : عيل بروح ألبس عباتي وبيي
يوم راحت إكتشفت أني وافقت ع شيء أنا ما أحبه من متى روضة تخلي حد يحضر تمارينها ما أحب حد يجوفني غير المدرب وأوقات أقول للمدرب أسكت وما تتكلم عشان أنسى إنه موجود أصلاً وأبدع بركوب الخيل
ماماه: يالله ماما
أنا: ماماه أنا ما أحب

[ قاطعتني ]: بس أنتي وافقتي
أنا [ هزيت رأسي بقلة حيلة ]: أوكي
وطلعنا
كلها 20 دقيقة ووصلنا مزرعة أبوي اللي متفقين نلتقي بالمدرب فيها عسب تدربني عدل
المدرب . عبدالله . 20 سنة محترف ركوب خيل عسب جي أبويه اختاره عشان يدربني
عبدالله: أهلاً روضة هااه اليوم عندنا ضيوف
أنا: هيه ماما تبا تشوفني عسب جي يات
عبدالله : كيف وافقتي ؟!
أنا: مسكتني بالإيد اللي تعورني فرضت علي الشرط ووافقت عليها بدون وعي
عبدالله: هههه [ يطالع إميه ] شحالج عموه
ماماه: الحمدلله ونت شحالك ؟! و شحال الأهل
عبدالله: تمام هاه روضة جاهزة
روضة : جاهزة
عبدالله : عيل سيري طلعي الخيل وجهزيه عسب تتأقلمين وياه
أنا: إن شاء الله
عبدالله: بس إن شاء الله تقدر تسوي عدل وما يأثر عليها وجودج
أميه: إن شاء الله
إنقطعت عني رمستهم لأني إبتعدت عنهم . ~
دخلت إسطبل الخيول ، صوب المهرة اللي أحبها . ~
طلعتها بهدوء وأنا أمسح عليها وأهمس بإذنها : إشتقت لج وايد مهرتي ـ، شحالج ؟! ما وحشتج . ~
ركبتها بعد ما حسيت إنها مرتاحة وتباني أركبها ومشيت فيها لين برع صوب المدرب وماماه
إبتسمت لي ماماه وبدأ مدربي يدربي على قفز الحواجز .~
وهو يكرر [ بتقدرين ] وحاولت أكررها بذاتي أكثر من مرة .~

.
.



ذكرى عابرة . ~
هي .. طفلة بعمر الأربع أعوام
هو .. شاب بعمر الخمسة عشر عاماً
.
.
صحت من نومها شالت عروستها الصغيرة وهيه لابسة ملابس النوم القطنية ذات اللون الوردي .. ~
راحت للصالة وهي تعرك عيونها من النوم .. جافت أمها .. حضنتها وغمضت عيونها وهيه تتلذذ بكل أنواع الأمان والحنان .. ~
أمها : ماماه يلا نروح نتغسل
هي: لا لا مابيي
أمها: لازم حبيبتي يلا نقوم [ مسكت إيدها ] جوفي منوه يانا عشان يلعب معاج
رفعت رأسها تتطالع منوه .. ~
هو إبتسم لها ..~
هي إبتسمت بخجل وقالت: ماماه يلا بسرعة نتغسل
راحت مع أمها غسلتها وبدلت ملابسها ولبستها فستان صغير لونه أحمر ومشطت شعرها القصير وحطت لها فيونكة ع طرف شعرها
طلعت من الغرفة مستانسة راحت له و مسكت إيده وطلعوا برع يلعبون
أمها: دير بالك عليها
هو: إن شاء الله خالوه
بعد فترة
هو: رحتي الروضة
هي: هيه راحيت
هو: وشو سويتوا؟!
هي: لعبينا وايد ورسمنا بعد
هو: وناسة صح
هي [ تمشط عروستها ] : هيه
شوي وطافت فوقهم طيارة وملأ صوتها العالي المكان
هي رفعت إيدها تأشر ع الطيارة: شوووف
هو إبتسم لها: طيارة
هي: هيه طيارة
هو: تبين تركبينها
هي: هيه أبا أسير فيها لندن
هو [ مستغرب ]: لندن
هي: هيه بروح مناك
هو: بتدرسين مناك
هي [ بلا وعي ]: هيه
هو: إنزين أنا بوديج
هي [ إبتسمت له ] : أنزين
شوي ويات سيارة أبوها وبركنت حذال الباب
هي: يوم بكبر أبا أسوق سيارة
أخوها الي نزل من السيارة وسمع أخر كلمه: ماشي سواقة سيارة
هي[ بهدوء عادت كلامها ] : أبا أسوق سيارة
هو : خلاص يوم بتكبرين أنا بشتريلج سيارة وبتسوقينها
نزل أبوها وراحت له ركض
هي: باباه منصور بوديني لندن
أخوها: ماشي سيرة لندن
أبوها: ونت شو يخصك بنتي بتروح لندن صح
هي: هيه باباه بنركب طيارة وبنروح لندن وبيشتري لي سيارة وبسوقها [ وتطلع لسانها تغايض به أخوها ]
منصور + أبوها ضحكوا عليها . . ~
أبوها: إنزين يالله ندخل داخل بنقطع بيذام
هي: باباه قص لي وايد وايد أكثر منهم
منصور: وأنا
هي: أنتا بتأكل وياي
دخل أبوها وأخوها ومنصور أما هيه سبقتهم ركض للجهة اللي فيها شجرة البيذام
هي: باباه يوم بكبر هذي الشيرة بتكبر صح
أبوها: هيه حبيبتي
هي: بتم حقنا يعني
أبوها: هيه
هي: عيل يوم بكبر بيي أنا ومنصور بنأكل منها
أبوها [ ضحك ]: ع هواج يا بنتي

.
.
أرجوان . ~
هذي الذكرى راودتني وأنا قاعدة تحت ظل شيرة البيذام
كبرت وكبرت أحلامي معاي
سرت لندن وركبت الطيارة
ومحد من أخواني عارض هالشيء
وركبت سيارة وسقتها
وأخواني ما عارضوني
تدرون شو الفرق بين أحلامي واللي تحقق ؟!
الفرق أني رحت لندن بروحي
سقت السيارة روحي
ركبت الطيارة روحي
منصور محد .. ~
راح وخلاني
أختفى من الكون حولي
انقطعت أخباره عني
وما عاد عني يسأل
يا ترى هو وين الحينة ؟!

[ في هذه اللحظة سطرت تلك الأشواق التي باح بها قلب أرجوان لمنصور ولم تصل إليه مباشرة ]
يا ترا هل ستصله أم أنها ستموت بأرضها؟!
.
.
رفعت رأسي لما حسيت بذياب توه داش من باب البيت ياي من الكلية ويا صوبي
ذياب: نانا شفيج
أنا: ولا شيء [ ابتسمت له ]
ذياب: أيوا [ قعد يمي ] عيل اليوم قاعدة إهنيه
أنا: هيه الجو غرام
ذياب: هيه برودة يالله نقوم داخل الحينة المغرب
أنا: إن شاء الله
قمنا ودخلنا داخل وقعدنا بالصالة
أنا: جوري مريضة
ذياب [ عقد حياته ]: شو فيها ؟!
أنا: تعب وإرهاق ودمها شوية نازل
ذياب: تعبت عليكم
أنا: طاحت بالكلية
ذياب: أها والحينه شحالها
أنا: ع العصر جي رادين من المستشفى باباه يابنا
ذياب: زين حمد لله ع سلامتها عيل خلود أهنه أجوف سيارته برع
أنا: هيه إهنه بغرفته كان بيروح بس أبوي قاله يتم
ذياب: زين
أنا: ما قلتلي شو سويت بالكلية اليوم
ذياب: سويت الي علي سلمت البروجكت و سويت العرض وإن شاء الله ما يضيع تعبي
أنا: إن شاء الله
ذياب: خلاص يعني بالأحد بنروح لندن
أنا: هيه جي متفقين
.
.
بعد جم دقيقة أذن المغرب ورحت أصلي والشباب راحوا يصلوا مع أبوي بالمسيد
بدور وديم قعدوا بالصالة أما جوري قالت أنها بتنام ونالوه رجعت بيت خالتها من مساعة
رحت أقعد بغرفتي روحي ع اللاب ، فتحت المسن جيكت ع الموجودين
جفت الكل أوف لاين ما عدا مايد ولد عمي
مايد . كاتب نك نيمه د. مايد محطي صورة حرفه وما كاتب توبيك .~
أنا. كاتبة نك نيمه مس نانا و التوبيك [ مع نانا ماحدش يضيق ههه ] . ومحطية صورة ايد مسوية قلب .~
ييت بكتب له بس سبقني

مايد: هلا وغلا
أنا: اهلين
مايد: شحالج منورة
أنا: هههه تمام ونتا ؟!
مايد: أنا زعلان أصلاً ، خليتيني روحي ورحتي عني
أنا: ههههه
مايد: جب ما أرمسج
أنا: ليش؟!
مايد: مخلتني بلندن روحي
أنا: ترا أنت دراسة

مايد: حتى إنتي
أنا: أنا خلصت كل شغلي وإنت طب غير عني
مايد: أيوا صح صح قصي علي
أنا: بنرجع بالاحد مع أهلي
مايد: صدق يعني بجوفج
أنا: هههه
مايد: والله ولهت عليج كل يوم أطوف يم باب شقتج وأتخيلج فيها خبلتي فيني لا ويقولج أترياج تظهرين أوصلج بدربي الجامعة
أنا: هههه
[ إندق الباب ]
أنا: ميود الحينة بخليك بروح لأخواني
مايد: خلاص أوكي ديري بالج ع روحج
أنا: إن شاء الله تبا شيء؟!
مايد: لا سلامتج
أنا :الله يسلمك
سكرت المسن وبطلت الباب ، طلع ذياب
أنا: هلا ذياب
ذياب: تعالي تحت أبوي يبانا
أنا: بالصالة
ذياب: لا بالمكتب
أنا: أوكي
[ وعقدت حياتي أبويه ما يطلبنا بالمكتب إلا بحالة ضرورية أو لو شيء خطير صار ]
يا ترا شو اللي صاير ؟!
.
.