راعي العجراء .... سالفه جديد بطابع قديم .... مالنا بالسندوتش نصيب

محروم.كوم · #1 12-22-2012, 10:40 AM

السلام عليكم ورحمة الله وبركاته
سالفه جديده بطابع قديم
بعنوان
مالناا بالسندوتش نصيب
انتم تعرفون ان الفقير كل شي يخطرفله لو يرقا نخله يبي ياخذ تمره ينكسر فيه كرب النخله ويطيح ولو يشوف ماء ويروح يشرب لابد مايزلق قبل مايشرب عشر زلقات والتاجر يشرب الماء وهو منسدح بفراشه الله المستعان والتمره تطيح بفمه وهو نايم
وسالفتي اليوم عن السندوتش ايام الدراسه
ندخل بالموضع
كنت ادرس في السنه الثانيه او الثالثه وكان عندنا مقصف بالمدرسه يبيع شاهي وسندوتش وحلوى كاكاو وقريض وملبس وووو
المهم المقصف ماحد يشتري منه الا عيال النعمه عيال اللي امورهم زينه والا عيال الدرجه السياحيه لهم الفرجه على عيال النعمه وهم ياكلون وعيناتهم تلاقط خاصه لاصاروا مشترين كاكاو اذا جدعوا قرطاس الكاكوا ناخذها ونشمها عقبهم ونسبح في عالم الخيال
واحيان الواحد ياخذ القرطاسه للبيت يشممها اخوانه
المهم اخيكم راعي العجراء قرر وهو في كامل قواه العقليه ان يصبح ولد نعمه يوم واحد
فقط غير قابل للتجديد
وشلون بس اصير ولد نعمه فكرت وفكرت ان الطريقه السهله جمع بيض الدجاج اللي عندنا وعددهن ثلاث دجاجات وماتبيض منهم الا وحده وثنتين من جبنهن عندنا وهن ما يبيضن يومهن عند راعيهن الاول وهن يبيضن ويوم صارن عندنا خاطن اذنا؟؟؟؟؟
ببره وسلك مكره حتى مايبيضن
المهم قعدت اجمع البيض عشره ايام بلياليهن حتى احصل على عشر بيضات
ويوم صارن عشر وانا اطمر على السوق ركض اقطع الشارع ومالتفت من الفرحه

ماتسمع الا صوت فرامل السيارات والسياكل وعربانه التحميل واحيان اسمع بعد فرامل
الناس الرجليه
ويوم وصلت للسوق وانا احرج عليهن وماكان بالسابق اللي يشترون البيض الا الشاميين
اللي يلبسون بناطيل ومهما كانت جنسته ولابس بنطلون مانعرف الا شامي لو يجي واحد
من نيجريا والا من السودان ولابس بنطلون نقول شامي
المهم بعت البيض بريال وخشتي واصله اذاني من الفرحه ماتسكر ولا بسحاب ملابس ويمكن ينقطع ومايتسكر افمي المهم رجعت من السوق واركب تكسي بربع ريال ويبقى معي طايح ربع كنا بالسابق نقول طايح ربع من الريال يعني ريال الا ربع ويوم وصلت حول البيت وانا احول ومر على ذيك البقاله واشتري بربع ريال حلاو لخواني حمض حلو ويبقى معي نصف ريال وانا اغبيه لباكر للمدرسه حتى اصير ولد نعمه
ويوم صار من باكر وانا اروح للمقصف بس اتلفت على خوياي ابيهم يشوفوني عند المقصف وانا اشتري
وانا اطلب شاهي وسندوتش الشاهي بربع ريال والسندوتش بربع قال اللي يبيع بالمقصف
لازم تحط تامين للكاس ربع ريال قلت مامعي الا نصف ريال قال اجل خذ الشاهي اللحين واذا
رجعت الكاس اعطيك السندوتش قلت لا ودي اكل السندوتش واشرب الشاهي (ودي اجخ
قدام الطلاب مثل عيال النعمه) قال لا رح تبي شاهي عطيتك والا رح العب هناك ياشاطر
قلت مايخالف عطني الشاهي واذا خلصت عطني السندوتش وهو يصب ذاك الشاهي
لاتحسبونه لبتون ورق تلقيمه ويوم صب بالكاس ولا حثال الشاهي كله بالكاس
وانا اخذه وقعد عند ذاك الجدار زاويه على شارعين ابيهم يشوفون راعي العجراء وهو معه شاهي من عيال النعمه ويني وين نفسي المهم شرب الشاهي وخليت الكاس بيدي ماوديته على طول ابي اللي ماشافني يشوف
عاد انا اشوف عيال النعمه اذا بغوا يرجعون الكاس ينفضون الكاس حتى يطيح ورق الشاهي بالارض ويرجعون الكاس الارض رمل ماهي بلاط وانا اروح عند الرمل وابغى اسوي مثلهم وانا انفض الكاس نفضت الشر وهو يطيح بالارض ولا يطيح الا على حصاة ماهيب شي صغيره ولكن اصابته في مذبح مع حافت الكاس وهو ينثلم وينكسر المقرود مقرود
وانا اخذه ورجعه للمقصف وحاولت اغبي الكسر ودي بالسندوتش بس اللي يبيع ياكبر عيونه لو يخلونه بالمستشفى كان مايحتاج ياخذون المرضى اشعه هو يكفي يشوف الكسر
بالساق لوهو قبل خمسين سنه
قال لا الكاس مكسور قلت طيب عطني سندوتش ولا رجع الربع قال رح والا ناديت المدير
وانا اروح من عنده بخفي حنين انا وجهي وجه عيال نعمه انا وجهي وجه عيال مزنه
انتهت السالفه
وقبل الختام سبحانك اللهم وبحمدك لااله الاانت استغفرك اللهم واتوب اليك
مع تحيات
اخيك راعي العجراء
منتدى مكشات العالمي
__DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجراء والبحر والمشق سالفه جديده	محروم.كوم	منتدى أخبار المواقع والمنتديات العربية والأجنبية	0	06-30-2012 08:30 PM
راعي العجراء في سالفه	محروم.كوم	منتدى أخبار المواقع والمنتديات العربية والأجنبية	0	06-02-2012 10:20 PM
راعي العجراء والسنبوسه سالفه قديمه	محروم.كوم	منتدى أخبار المواقع والمنتديات العربية والأجنبية	0	02-01-2012 12:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM