راعي العجراء وفتيلة التريك

محروم.كوم · #1 12-01-2012, 03:10 PM

السلام عليكم ورحمة الله وبركاته
اليكم هذه السالفه القديمه اكثر من 35 سنه
بعنوان راعي العجراء وقزازة التريك
كنا من اول اذا بغينا نطلع للبر ناخد معنا تريك من اللي يعبىء قاز وناخذ زود فتايل مدري فنايل نسيت ايهن اللي تلبس هي الفتيله او الفنيله وناخذ زود قزازه نخاف تنكسر ثم مايشتغل من الهواء وخايفين عليها تنكسر حاطينها على المرتبه حتى ماتنكسر من زود الحرص
المهم مشينا والوعد محطة مفرق صلبوخ اخوياي بالسياره الثانيه اربعه كلهم راكبين قدام
سيارتهم ونيت فرت وانا ورفيقي سيارتنا ددسن مرتبتين او غمارتين ويوم وصلنا للمحطه
وتقابلنا وعبينا بانزيم ترانا من اول نقول بانزيم بس يوم تمدنا صرنا نقول بانزين والطرمبه
كل لتر تدق جرس تعلمك بعدد اللترات من اول ماكل الناس تعرف الارقام لاتكتب ولاتقراء
عربي حتى تعرف للارقام العنقليزيه ولكن يعرفون يحسبون بالعربي ولا دق الجرس قال واحد ولادق مره اخرى قال اثنين ثم ثلاثه واربعه على هالطريقه وانا مثلهم من اول ادربي الدميجه
لو ترجه ثلاثة ايام ان ماتسمع به الا قرقشة حثال شاهي ابو جبل وتالي قهوة بريه والباقي فاضيه من قل الذهانه تقول قرقوشة طفل توه بادي يحبي
المهم يوم جينا نمشي قال واحد من ربعنا اللي بالسياره الثانيه اصبروا ابركب معكم وكان سمين بالحيل حنا اربعه بالغماره وضيقه قلنا تعال اركب نسينا قزازه التريك انها على المرتبه وربعنا مشوا قبلنا وهو عجل يعنني رشيق وهو وينه وين الرشاقه الى قعد ماينقشع من الارض الا بكريك
من سمنه وهو يفتح الباب ويركب ولاه على القزازه يوم خلاها تقول سكر منتثر كتم نفس القزازه كتم ماعاد تنفس وهو يصيح ويطمر من المرتبه ويحول بسرعه هالمره برشاقه من حر الوجع وبفتح الباب وينزل هه وش فيك قال انا قعدت على قزاز قلنا اجل كسرت قزازة التريك الله لايعافيك منين نجيب وحده ثانيه ماهمنا هو همنا القزازه يوم حولنا من السياره ورحنا نشوف الرجال ولا مقفاه يخرخر دمان تقول مرمي بشوزن رقم سته ابو غزال بولندي الاصلي
وحنا نرفع ثوبه ونفسخ بعد السكري (السر...) ونسدحه على كبوت الددسن المشكله ضلام المحطه مامن اناره بالحيل وان قربنا عند اللمبه كل يشوف وحنا نبعده شوي واطمر للبقاله اجيب كشاف (تريك) ذاك الاصلي اللي فيه مغنطيس بخمسه ريال يوك كشفنا عليه والا الرجال كل شي يخرخر فيه
نسد هذا يصب الثاني كله جروح المشكله اللي بين الشطايا مانشوفه والرجال سمين ومتعافي
قلت الخويي انقز لراعي البنشر وجب لنا ليور نقرص على الشطايا نشوف جروحه الداخليه المسيكين هو يتوجع وحنا ماخذينه ضحكه وفسقه
البفاله ماهيب شي صغيره ولكن عندنا صارت صيدليه قلت لخويي رح جب منقاش وابره راح وجاب وكل قزازه نطلعها مكانه يصب دم وهو ماغير يون ويحن وحنا نقوله خلك هذا اللي يمشي حافي
المهم شلنا اللي شلنا وخلينا اللي خلينا
ووانا اروح للبقاله قلت عندك شاش قال لا
من حين الرجال سمين وش يكفيه من الشاش وانا افل فراش البر وطلع ذاك الشرشف

وامهد الرجال مهد مولود وجيب حبل وحطه اسباق وانا امهده وعلى مستشفى بحريملا
يوم جينا عند الدكتور وشاف الرجال قال من اللي راميه
قلنا قزازة التريك وتعال وشفها جايبنها معنا بأثر الجريمه والرجال ويحكي اسأله
والا كان بيحولنا للشرطه
المهم انه دخل عندهم يجي ساعه ينقشون القزاز
وحنا نخلص ونواصل الطريق الا وربعنا يتحروننا على الخط هه وينكم قلا القصه كذا وكذا وصارت ضحكه
ويوم وصلنا للبر وقعدنا صار شيخ هاتوا كذا ابي كذا ماغير يتدلع علينا ودك من يرميه صدق بشوزن ام حبه والفشقه ام توسع
انتهت السالفه
وقبل الختام
سبحانك اللهم وبحمدك لا اله الا انت استغفرك اللهم واتوب اليك
وبعد الختام
اشكركم على سعة صدوركم والله يحفظكم ويرعاكم
اخيكم راعي العجراء
منتدى مكشات
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجراء والقطار	محروم.كوم	منتدى أخبار المواقع والمنتديات العربية والأجنبية	0	08-31-2012 03:10 PM
راعي العجراء في سالفه	محروم.كوم	منتدى أخبار المواقع والمنتديات العربية والأجنبية	0	06-02-2012 10:20 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM