زاد العجاج وطال وقت الذواري=خمسة عشر يومن على غير معهود
قد زلت الذرعان والوقت ساري=تمضي سنين الناس والعمر محدود
دلت تسف الريح رمل الصحاري=والنقد والعرفج بالابطاح مرمود
وامسا الفلا قاعن من العشب عاري=والارطى من عقب الروي صارم العود
والما نشف من قاصيات الخباري=وغدا الخلا كنه سبل عيش محصود
ما جانا غير اللي مع الكون جاري=الذنب وايات السور عندك شهود
واقرا الحديث اللي رواه البخاري=تلقا بطياته عن القول مقصود
عصيان وتطفيفن وغشن تجاري=حتى ولو علم الصناعات موجود
ما ينفع التعليم لو كنت قاري=ما دام قلبك باسود الفعل مقرود
كذبن وغيبه واسعات انتشاري=واحوالنا ما بين حاسد ومحسود
واليا لقيت اللي على الحلف ضاري=يكذب على بيع السلع يطلب الزود
الدنيا ما تمشي بكيف اختياري=عسى السلامه يكفي الخاطر لهود

غرارتن من يقتفيها تماري=واللي مشى مع وطية خطاها مصيود
يا كم من نفسن تجيها اغتراري=واستافت الساعات ما حصلت فود
غير الغبن والتايهات الطواري=والقلب من عجفاتها صار مبرود