آه يا زمن

[mnasj]

السلام عليكم


هاي من اروع القصص الي قريتها



آه يا زمن

الجزء الأول

أحداث القصه في دبي في بيت بو خالد.. فاطمه بنت عمرها 19 سنه.. هي آخر العنقود.. يعني دلوعه البيت.. هم يتكونون من 4 أفراد بنتين وولدين.. البجر خالد عمره 32 سنه متزوج وعنده بنتين توأم.. وبعده فيصل عمره 28 سنه بعده مب معرس.. والبنت الثانيه مريم عمرها 25 سنه متزوجه وعندها ولد صغير وطبعا آخر العنقود فطووم.. وأمهم وأبوهم..
نرجع بأيامنا لأيام طفولة فاطمه.. كانت محور اهتمام البيت كله.. لأنه بعد 6 سنين من ولادة مريم وصلت فاطمه.. فخذت الإهتمام من مريم ومن الكل.. كانت مشاغبه وإنظوائيه نوعاً ما.. كانت تشعر بوحدة لأنها كانت الطفله الوحيده وكل من حولها اكبر عنها.. بدت تستوعب هذا الشي لما صار عمرها 5 سنين ودخلت المدرسه يعني مريم كان عمرها في هذا الوقت 11 سنه كانت في أوائل سن المراهقه.. والي بهذا العمر يحب يهتم بنفسه فقط وبالي في نفس عمره.. يعني كان لها عالمها الخاص.. وبدت تبتعد من اللعب مع فاطمه.. قامت فاطمه تشعر بالوحده .. وصارت اكثر انطوائيه من قبل.. كانت مجتهده في دراستها وبعدها تملك محبه الجميع صوبها .. كان اخوها فيصل يحبها وااايد رغم فارق العمر 9 سنين.. بس كان يودها وايد ويحبها.. وهو الي كان يهتم فيها دايما ويوديها المكان الي تباه .. مع ان مريم اقرب من عمره عنها.. بس هذي علاقات يتحكم فيها القلب .. الواحد ما يقدر يتحكم في درجه حبه للي حواليه..




مريم: افففففف.. شو ها منو بيوديني المكتبه ابا اصور هالأوراق.. الأبله طالبتهم مني.


فيصل: ما اتشوفيني يالس ادرس فطووم.. روحي قولي حق خالد؟


مريم: خالد خالد خالد.. مافي غيره في البيت.. يعني لو احين كانت فطووم مكاني جان رحت

فطووم: مريووم.. تعالي سمعيني النشيده وخل فيصل يرووح..

مريم: شوووو.. فاضيه لج انا.. حبيبتي انتي اول ابتدائي وانا صف سادس.. يعني انا اكبر منج.. يعني مالي خلق لج..

فطووم: خلاص فيصل انا بروحي بحفظ انت روح ودها..

فيصل: اقول مريووم اظهري برع.. شو يعني ما تتنزلين اتدرسين اختج هااااااي..
انتي ليش جيه انانيه.. عناداً فيج مب ساير.. شو رايج.. ؟

مريم: بخبر عليك أمي..

فيصل: خبري شو يعني اتخرعيني اونج...؟

مريم: أميييييييييييييييي.. شوفي فيصلووو.. ما يبا يوديني المكـ...

فيصل من سمع اسم فيصلووو حرج.. وما خلاها اتكمل كلامها وقام وصفعها .. :
انا كم مره قايلج اذا زقرتيني بهالإسم بصفعج.. استحي على ويهج مب اصغر عنج انا..

مريم بدت اتصيح ووصلت امهم: لا اله الله..حسبي الله منكم من عيال.. شو بلاج مريووم.. شو صاير..؟؟

مريم وهي اتصيح: هيئ.. هذا فيصل صفعني ليش اني قلت له فيصلووو .. ومب طايع يوديني المكتبه عشان بنتج الدلووعه..

الأم: تستااااهلين.. انتي تدرين ان عيب عليج تزقرين الي اكبر عنج بأسامي الدلع .. وخصوصا اخوج.. كم مره علمناج انتي ما تصتلبين..وبعدين انت فيصل ليش مب طايع اتوديها.؟

فيصل: امي انا كنت بوديها بس .. يوم قالت لها فطووم تعالي سمعيلي وخل فيصل يوديج.. تمت تتكبر الأنانيه وما تتنزل اونها.. فعناد فيها ما وديتها.. ؟

الأم: عيب عليج من بنت.. روحي يالله .. بشوف منو بيوديلج اوراقج..

مريم: اففففف.. كلكم وياها وياها.. دلوعه البيت محد يرضى عليها.. أما انا مادري من وين ملقطيني..

الأم: مريووم افهمي.. نحن ما نفرق بينكم بس انا اباكم كلكم اتحبون بعض واتساعدون بعض.. مابا تتشتتون من عقب وفاتي

مريم+فيصل: بعد عمر طويل امي..


وهدت السالفه.. ومرت السنين والأعوام وهم على هالضرايب وهالسوالف.. وصار فيصل عمره 17 يعني خلاص ثانويه عامه اخر سنه له في المدرسه وكانت مريم عمرها 14 سنه وفطووم عمرها 8 سنين..
وطبعا تخرج فيصل من الثانويه وياب تقديير عالي 96% وحب يلتحق بكليه الطيران يعني يدرس برع البلاد.. لأن نسبته اتخوله يدرس في هالمجال وقدر يحصل على منحه دراسيه وقرر يسافر برع البلاد يدرس..


فطووم: فيصل.. يعني خلاص مصمم اتسافر..؟؟

فيصل: هي حبيبتي... خلاص .. تدرين انا حلمي استوي طيار عشان اشتري طياره واركبج وياي فيها.. وها مستقبلي..

فطووم وعيونها مليانه دموع: ليش ما تقدر تدرس هني في دبي.. ؟

فيصل: فطووم .. حبيبتي لا تكدرين روحج.. لو كنت اقدر ادرس في دبي جان شفتيني بعدني قاعد على جبدج .. بس هي مافي كليه طيران.. ما فتحوا بعدهم.. عشان جيه بسافر برع البلاد.

فطووم: حرااااام.. عقب ماشي حد يدرسني.. ماشي حد يوديني برع.. ؟

فيصل: شقايل ماشي .. خالد تراه خلاص بيتخرج وبيرجع البلاد وبيوديييج وين ما تبين.. وعندج مريامي هني .. احين هي اوكي وياج عقلت اخيرا

فطووم: انا ما يخصني ما احب اطلع ويا غيرك.. خالد تدريبه ما يداني يطلع ويانا كله ويا ربعه ولا بروحه

فيصل: ما عليه ولا تزعلين انتي بس.. انا يوم برجع في الإجازات وعد اني كل يوم اوديج وأعوضج شو رايج؟؟

فطووم: Give me five?

فيصل: الللللله ياني بشتاق لهالكلمه.. عقب منو بيعطيني فايف..

فطووم: خلاص انت اتصل فيني وانا بعطيك فايف..

فيصل: لا والله .. ويا هالراس.. انزين يلا طلعي من الحجره ابا انام..

فطووم: مابا .. انت باجر بتسافر انا ابا انام وياك .. عشان بشتاق لك

فيصل: خلاص انا بسير اييب لي فراش وانتي نامي على سريري.

فطووم: وانا بعد بييب لي فراش ابا انام عدالك.. عشان بشتاق

فيصل: الله عليج انتي وهالشوق مالج.. انزين امري لله ماروم اقول لج لا
دخلت عليهم مريم: شوو اتسوووون.. زخيتكم .. بخبر امي..

فيصل: عاد انتي ويا جملتج المعتاده بخبر امي ما عندج شغله غيرها

مريم: والله فيصل بتوحشنا وااااايد..

فيصل: شو بلاكم انتوا الثنتين.. شو تبون اتصيجوني غصب.. يا جماعه كلها 5 سنين فتره دراستي وبعدين في اجازات وانا بييكم فيها..

مريم: بس لما انشوفك 24 ساعه غير عن انشوفك كل كم من فتره..

فطووم: هي والله .. (وبدت اتصيح في حضن اخوها)

فيصل: اييييه انتوا الثنتين بتسكتون عن هالكلام ولا شو.. ترا بطردكم احين من الحجره

فطووم: انا سكت خلاص.. بس بسير اييب فراشي عشان انام

مريم: لا والله مب بس انتي اتنامين هني.. انا بعد بنام وياكم

فيصل: ههههه شو رايكم ازقر امي وابوي ايون يرقدون هني ويانا..

مريم: فكره حلوه.. ولا شو رايج فطووم؟

فطووم: لا عقب اذا بغينا نرمس امي وابوي ما بيخلونا خلهم في حجرتهم

فيصل: لا والله السالفه فيها نرمس.. ايه ابوي كل وحده على غرفتها . وراي سفر يعني لازم انام عدل.. تبون اتسهروني شكلكم

مريم: غصبن عنك بنرقد هني..

فطووم: هاج فراش مريووم.. حطيه عالأرض..

فيصل: لا انا برتب .. وروحي انتي مريووم ساعدي اختج وييبي الفراش وياها

مريم: اوكي



وفرشوا فراشهم وناموا عند اخوهم في ذاك اليوم.. وطبعا اليوم الثاني الكل كان حزين في البيت لأن فيصل بيسافر والبيت بيفضى عليهم.. وخصوصا فطووم كانت اكثر وحده حزينه في ذاك اليوم.. وسافر فيصل بالسلامه .. وكان طول فتره سفره دووم يتصل في فطووم ويسولف وياها ويا مريم.. وكبروا وهم بعدهم عايشين وحدتهم.. وصار الوقت الي وصلت فيه مريم للثانويه العامه.. يعني استوى عمرها احين 17 وفطووم عمرها 12 يعني صف اول اعدادي.. وطبعا خلصت مريم دراستها الثانويه ويابت نسبه حلوه.. قررت من خلال هالنسبه الحلوه تدخل كليه الطب في جامعه الإمارات.. يعني راح اتفارقهم واتروح العين.. وهني راح اتم فطووم بروحها في البيت حتى لو كان خالد في البيت ما تحس بوجوده لأنه ما ينشاف كله برع البيت ويا ربعه ودايما مسافر .. ومع مرور الأيام تكبر فاطمه والكل يكبر وياها.. يعني امها تكبر في العمر وتزيد متطلباتها.. ويقل اهتمامها في فاطمه لأنها تعبانه ومريضه ومشغوله دايما..
كانت الأم تعبانه من تصرفات ولدها خالد.. ومن اعماله الي لا يرضى فيها الرب والعباد.. كان انسان عاصي من كل النواحي.. ودايم السفر للأماكن المشبوهه.. كان دايما يسافر للمغرب وتايلاند.. ورغم محاولات الأم وياه انه يتزوج ويكمل نص دينه لكنه دوم يتعذر ويرفض.. ويأجل هالموضوع.. ودخلت فاطمه سن المراهقه العمر الخطر.. طبعا في هالمرحله من العمر تحتاج فاطمه لكل اهتمام ولكل رعايه ومراقبه .. لكنها كانت مهمله من هالناحيه طبعا لإنشغال امها بنفسها وبمرضها وشغل البيت.. فكبرت فاطمه وهي على الوحده هاي .. لا من يسليها ولا من يشوف امورها .. كان عمرها في هالوقت 15 سنه .. وكانت مريم تزورهم على نهايه الإسبوع بحكم دراستها وكانت اتييها فترات ما تنزل دبي في الإجازه بسبب ضغط الدراسه عليها..

في المدرسه.. كانت الفسحه والبنات كلهم متيمعات ومسوين حلقه ويسولفن...

نوال: بس اتصدقون الصراحه احلى شي في الفلم يوم شلاها من الأرض يوم طاحت واتعورت..

خديجه: لا شوووو.. في فلم ثاني عن قصه حب رومانسه .. آآآآآه كل ما اتذكر القصه ابا اصيح.. وايد مؤثره..

هند: خلكم من هالأفلام والخرابيط.. خل اخبركم هالسالفه.. امسات كنت سايره وافي ويا اختي كنا رواحنا.. تدرون منو شفت اهناك..

الكل: منوووو؟؟

هند: اخوا أميره.. حليييييييو.. يخبل يخبل..

خديجه: أي أميره.. ؟

هند: انتي ما تعرفينها .. نوال اتعرفها..

نوال: قولي والله.. شو سويتي عقب؟؟

هند: انا شو سويت .. ما سويت شي.. هو يوم شافني اتخبل.. ما عرف شو يسوي .. يبا يعتذر لي بس مب عارف كيف.. بس خسي اقبل اعتذاره

نوال: هي مب تغلطين واتردين له هالنذل.. خليه يولي.. ترا انتي حلوه و100 من يتمناج .. لا تنزلين عمرج له..

هند: لا طبعا.. خلوني اكمل.. اقولج انا رحت صوب الألعاب كنت اتريا اختي تطلع من الحمام.. الا اشوفه ياي صوبي .. استغربت .. ما عرفت شو اسوي.. جان ايي ويقولي هند بعدج زعلانه مني.. ؟ جان اطالعه بإحتقار.. قلت له اسمحلي شو قلت انا ما سمعت.. اقولج ليش ما ينقهر..

خديجه: هههههه.. زين سويتي فيه.. خليه يستاهل..
فطوم كانت توها طالعه من الصف وراحت صوبهم: السلام عليكم بنات..

نوال: هلا والله .. وينج تعالي سمعي السالفه..

فطوم: اي سالفه؟؟

خديجه: هندووووو شافت ناصر الي كانت اترمسه قبل.. اتحيدينه.

فطوم: هيييييه.. والله.. شو سويتي.. لا يكون رديتي له..

هند: لا ما بنزل عمري... بس ما كملت لكم شو قالي.؟؟

الكل: كملي شو تترين؟؟

هند: اقولج قالي اونه بيكلم اخوي عشان يخطبني.. لأنه ما يقدر على فراقي.. واترجاني اتصل فيه

نوال: الللللللله على الحب.. صدق بيخطبج؟؟؟

خديجه: يا حييييج والله اتخيله يخطبج.. يا حيج تاخذين واحد كنتي عايشه قصه حب وياه.. اااااه احلى شي مثل مسلسل ماريا

فطوم: انتي ويا هالمسلسلات ما تشبعين منها.. انزين كملي وبعدين

هند: ماشي.. بس جيه.. انزين فطووم.. كلمتي ابوج عشان يوصل لكم خط انترنت في البيت

فطوم: هيه قلت له.. قالي اليوم راح ايي الريال ويعدل كل شي..

نوال: هييي والله جي كشخه.. عيل اليوم اذا وصلو النت .. دشي سوي لج ايميل اول شي.. وعقب بنعلمج نحن كيف تدخلين على الجات..

فطوم: بس انا ما اعرف كيف اسوي ايميل..

خديجه: انا كم فطوم عندي افا عليج بس.. اليوم بيي بيتكم وبسوي لج كل شي.. وبعملج على الجات.. سهل مافيه شي .. بتتعلمين بسرعه شراتنا..
هني دق جري الحصه الثالثه والكل قام راح صفه.. .. وكملوا حصصهم وردوا البيت.. وكان مقرر ان خديجه اتزور فطوم في بيتهم عشان اتعلمها على النت..


والبقيه تأتي..
يا جماعه حبيت اشوف رايكم في بدايه القصه.. وبشوف اذا شفت اقبال عليها وفي حد مهتم بقرائتها .. راح اكملها..


مع القصه __DEFINE_LIKE_SHARE__

[mnasj]

افا وين الردود __DEFINE_LIKE_SHARE__

[هيام القلب]

افا عليج بس ^^


كملي القصهـ طرطريشن فديتج^___^



اترياج^______________^ __DEFINE_LIKE_SHARE__

[mnasj]

________________________________________
الجزء الثاني

خديجه طبعا راحت لبيت فاطمه مثل ما وعدتها عشان اتعلمها على الإنترنت واتسوي لها ايميل..
فطووم: هلا والله.. تعالي بسرعه من متى اترياج انا.. دشي غرفه الكمبيوتر وشغليه وانا احين بييج..
خديجه: سوري انزين على التأخير.. يلا اترياج..
راحت فطوم عشان اتخبر امها ان ربيعتها في غرفه الكمبيوتر عن ابوها يدخل عليهم ولا شي.. وخديجه طبعا فتحت الكمبيوتر ووصلت على الإنترنت لغاية ما اتييها فطوم.. ودخلت على موقع الجات الي متعوده عليه.
خديجه: الللللللله.. الفارس موجود.. خل اكتب له.. (وجه البدر): السلام عليكم .. اشحالك؟

الفارس: هلا والله بالقاطعه.. اشحالج.. شو اخبارج؟؟ وشو الدراسه وياج؟
وجه البدر: الله يخلييييييك لا اتذكرني بالدراسه .. لوعة جبد.. شو اسوي اسمحلي اذا قطعت عنك هالفتره .. اسفه والله
الفارس: بس انا مشتاق لج وايد.. ما تتصورين اشكثر انا اشتقت لج والله.. طووول الوقت ادش اترياج .. اقول احين بتدخل .. حرام عليج جيه اتسوين فيني..
هني دخلت فطوم الغرفه عند خديجه وشافت خديجه مبتسمه وتدق على الكيبورد.. : اقول خدووي شو اتسوين؟
خديجه: تعالي اقري الفارس شو كاتب لي.. ؟
فطوم: ههه.. يحليله.. ليش ما تدخلين انزين..
خديجه: بس جيه اتغلى ابا اشوف كيف بيستحمل ولا لا.. شو اكتب له..
فطوم: اكتبي له اي شي .. انا شو دراني..
خديجه: هي والله انا هالبله الي قاعده اسألج..
وجه البدر: والله حتى انا افكر فيك دوم.. بس ما اروم ادخل وايد على النت تدري ما بقى شي على الإمتحانات لازم انشد حيلنا شوي..
الفارس: توج اتقولين لا اتذكرني بالدراسه يعني ما اتحبينها.. شو الي حببج فيها احين..
خديجه: طاع الحمار ورطني.. شو اقوله احين.. اممممم
وجه البدر: لازم مجبورد احب الدراسه عشان مستقبلي..
الفارس: انزين وانا وين في مستقبلج؟؟
فطووم: أوييييه شوفي شو كتب؟؟
وجه البدر: انت كل مستقبلي..
الفارس: اتخيلج اتدشين الصاله بفستانج الأبيض وادخل عقب انا الصاله ولابس لي بشت.. واخذج على الحصان الأبيض واوديج لأخر الدنيا وياي..
خديجه: اللللللله.. شكله الريال وايد يحبني.. ؟
فطوم: يا حيج مب انا يحليلي.
خديجه: لا ما عليج انتي .. بس خل اعلمج انا راح اتحبين..
فطوم: والله كشخه كلكم بتاخذون الي اتحبونهم انا منو بياخذني الله اعلم..
وجه البدر: انا بظهر احين .. جااااااااو
الفارس: وين حرام عليج تو الناس.. تحرميني من البدر.. لا ارجوج..
وجه البدر: مشغوله فمان الله
وطلعت خديجه من الجات ودخلت على موقع الإيميلات وبدت اتسوي ايميل حق فطووم وعلمت فطووم كيف اتسوي لعمرها ايميل.. وبحكم ذكاء فطووم تعلمت بسرعه .. ودخلت الجات بنك نيم خاص فيها (عيون المهى) وعلمتها كيف تستخدم الجات وكيف طريقته.. وعدلت لها كل شي يخص الإيميل والجات.. ونزلت لها برنامج ال icq وسوت لها النك نيم .. وطبعا وصل الوقت الي ترد فيه خديجه بيتهم.. لأنها تأخرت.. على البيت.. أما فاطمه فحبت انها تيلس على الإنترنت وتبحر في عالمه وتكتشف خفايا هالعالم.. دشت الجات .. وبدت اتشارك فيه..
عيون المهى: السلام عليكم يا جماعه..
عيناوي أصيل: هلا والله.. اشحالج غناتي؟
عيون المهى: والله بخير ربي يسلمك ويعافيك.. انت اشحالك؟؟ انت عيناوي .. انا احب العين وايد..
عيناوي أصيل: بخير طاب حالج.. العين دار الزين.. انزين من وين الحلوه؟
عيون المهى: انا من دبي وانت من العين؟
عيناوي اصيل: لا الغاليه انا من بوظبي.. كم عمر الورده ما عرفنا؟؟
عيون المهى: انا عمري 15 .. يعني اول ثانوي..
عيناوي اصيل: يحليلج والله اصغر عني عيل.. انا عمري 19.. انتي نونو يعني..
عيون المهى: لا والله ليش نونو؟؟ 15 سنه مب صغيره وايد..
عيناوي أصيل: بس بعد مو مشكله.. انزين ما قلتي لي شو الدراسه وياج؟؟
عيون المهى: والله الدراسه وايد زينه..
عيناوي أصيل: شو اكيد شاطره ولا؟
عيون المهى: دومي من الأوائل..
عيناوي أصيل: تدرين هاي اول مره انا ادخل فيها الجات.. ولحسن حظي لقيتج.. انتي اول وحده ارمسها ..
(كانت الساعه في هالوقت 11 فليل)
عيون المهى: حتى انا اول مره ادخل الإنترنت اصلا.. لأننا اليوم يادوب ركبناه وربيعتي يت وعلمتني كيف استخدمه..
عيناوي أصيل: ما قلتي لي شو اسمج"؟
عيون المهى: انا اسمي فاطمه.. وانت؟
عيناوي أصيل: انا اسمي هزاع.. فديت هالإسم والله.. أوصفي لي كيف شكلج؟
عيون المهى: عاشت الأسامي.. شكلي؟؟ اممممم انا مب حلوه ترا.. انا بيضه ويهي دويري عيوني وساع عسليه وشعري طويل اسود.. وخشمي عادي.. بعد شو؟
عيناوي أصيل: كل ها واتقولين مب حلوه.. شو خليتي للحلوين عيل؟.. انزين كم طولج كم وزنج؟
عيون المهى: انا طولي 157 ووزني 53 .. ليش؟ تبا تاخذ لي لبس على طولي يعني؟
عيناوي أصيل: ههههههه .. ليش ما اخذ لج.. خلاص انتي صري حبيبتي ومافي شي يغلى على الحبيب..
عيون المهى: خجلتني.. انزين انت اوصف لي شكلك؟
عيناوي أصيل: انا حنطاوي.. طويل شوي اطول عنج طبعا.. خشمي ضعيف مثل السيف .. تدرين البدو كيف بعد.. وعيوني سود.. بس جسمي وايد حلو . الكل حاسدني عليه..
عيون المهى: ماشاء الله عليك.. عن عقب اتقول حسدتك ولا شي..
(وتموا على هالحال يسولفون ويا بعض والساعه جربت 2 نص الليل.. وطبعا اخر شي عطته ايميلها عشان يتراسلون.. وظهرت من النت.. وراحت ترقد لأن باجر الخميس.. يعني بيظهرون من البيت بيسيرون من الصبح بيت يدتهم .. هناك في بيت يدتها كل اسبوع يجتمع الكل من عمومها وعيالهم.. فاطمه عندها عم وعمتين.. عمها خليفه اكبر من ابوها .. عياله كلهم كبار واصغر واحد فيهم غانم عمره 19 سنه.. وعنده بنت وحده خوله عمرها 25.. وعمتها كلثم عندها بنت وولدين .. بنتها نوره في نفس عمر فاطمه وأولادها كبار اصغر واحد فيهم عمره 22 .. وعمتها الثانيه هنادي الله ما غير بولد واحد اسمه علي عمره 17
قامت فطووم الصبح متحمسه لأنها بتروح بيت يدتها بحكم انها بروحها في البيت فهي تنتظر هاليوم عشان اتحس بلمه الأهل حوالينها..
بعد ما تلبست واتجهزت .. راحت دخلت على النت عشان اتجيك على ايميلها.. فتحت الإيميل لقت فيه ايميل من هزاع..
(السلام عليكم فطووم..
اشحالج؟؟ الصراحه طول الليل ماياني رقاد من كثر ما افكر فيج وافكر بكلامج الحلو.. مشتاقلج واييد الصراحه اتريا متى ايي الوقت الي بلتقي فيه وياج على الجات. الصراحه احس انج انتي البنت الي كنت اتمناها طول عمري.. تسمحين لي اقولج حبيبتي؟؟ هل استاهل اني اقولها لج؟
هزاع)
فطووم: يحلييييييله.. شكله متعلق.. برد عليه..
(هلا هزاع..
اشحالك؟ انا بخير.. انا بعد كنت افكر فيك.. ندمت ليش اني طلعت البارحه كان ودي اتم اكثر عشان اسولف وياك. بس يالله مو مشكله بلقاك مره ثانيه.. بس وااااااااااايد استانست من ايميلك الصراحه .. انا بعد احس اني ارتحت لك وايد.. سوالفك وايد عيبتني.. وانا اسمح لك انك اتقول لي كلمه حبيبتي.. انا احين بظهر بيت يدوتي باااااااي
فطمطم)
طلعت من النت .. وراحت لبست عباتها وشيلتها عشان يروحون بيت يدتهم.. وكانت طول الوقت اتفكر في كلام هزاع.. كانت اتحس انها وااايد مستانسه وياه.. طول الدرب وهي تفكر لين ما وصلوا بيت يدتهم.. لقت علي واقف في الحوي.. هي ما تداني علي ..
نزلت من السياره وسلمت على علي من ورا خاطرها ودخلت البيت لقت الكل قاعد يعني هم اخر ناس واصلين: افففف شو ها دومكم سابقينا.؟ما يستوي تتأخرون.. السلام عليكم
عمها خليفه: الناس يسلمون أول عقب يتحرطمون انتي عكس الناس دوم.. هههههه
غانم: ههههه هاي في كل شي عكس الكل.. على الدفاشه الي فيها اخوها فصوول وخالد مب جيه.. الا وين خالد ما يا وياكم؟؟
فاطمه: اونكم عاد ما اتعرفون له خالد.. ها متى شفتوا ايي ويانا مكان.. زين انه يرقد في البيت اصلا.. الا وين يدووتي حبيبتي؟؟
علي: يدوتي حبيبتي.. اكيد ورا هالكلمه مصلحه..
فاطمه: اسكت الله بخليك..محد طلب منك توضيح..
ام فاطمه: فطووووم ويهد.. عيب عليج لا تتطاولين ويا ولد عمتج..
فاطمه: مب كافي عمو هنادي مدلعتنه انتي بعد بدلعينه.. غدا ريال احين... ماشي دلع ما دلع
دشت اليده وهي تتحرطم: الله يغربلكن من خدم.. عنبووووو ساعه لين ما يفهمون شي واحد..
سالي: ماما انتي في وايد جرجر.. راس مال انا عور.. شنو هذا انا يعرف شغل انتي كلش مافي يعجب انتي.. انا شنو سوي.؟؟
اليده: ايه انتي ليش ملاحقتني لين الميلس.. روحي جابلي شغلج عن التحرطم .. يلا مالي خلق لج... هلا والله بالطش والرش.. هلا والله بفطوووووم الحبيبه. وينج ما تسألين عن يدوتج..
فطوم: افا يدووو انا ماانشد عنج.. اسأليهم اول ما دخلت اسأل عن منو؟؟
غانم: خييييبه جذابه.. اول ما دخلتي تميتي تتحرطمين عقب تذكرتي ونشدتي..
فطوم: ايه انت بلاك.. لازم اتفتن..
اليده: ههههه.. يا حلاتكم والله .. احلى شي يوم اسمع حشرتكم وايد استانس..
فطوم: علووووو وين نواري..
علي: غريييبه توج اتقولين لا اتدلعونه وروحج اتدلعيني علوو.؟؟ شو هالتغيير
فطوم: انت ليش ما تفهم.. ها دلع مال مصلحه.. يلا جاوبني وينها
علي: لحظه خل اشوف في مخباي اليمين ماشي.. ولا في مخباي اليسار.. مادري والله وين خشيتها
فطوم: ملييييق.. روح ويا هالويه انت مب ويه حد يسألك؟؟
العمه كلثم: هلا والله بفطامي... وينج ما سلمتي علي..
فطوم: هلا والله .. هلا بأم الحبيبه.. هلا بأم نواري.. هلا فدييييتج
العمه كلثم: ايا العياره الي فيج انتي.. ام الحبيبه يعني.. انتي ما اتحبيني انا اتحبين نواري..
فطوم: لا لا منو قال.. نواري كخ وانتي الشيخه فديييتج اممموح على راسج
نوره: انا كخ.. يالبخ.. تعالي خل امطج من شعرج وادبج اشوي..
فطوم: منو قال كخ.. انا ما قلت ها غنوم اخوج يالس يقول
نوره: غنوم اخوي ها.. ماعليه تعالي انتي بس بشوف شغلي وياج.
فطوم: يا جماعه ابا ضمان على حياتي
علي: لا ضمان لمن انتهت صلاحيتهم
فطوم: انت منو قص عليك وقال انك من ظمن الجماعه الي ازقرهم
نوره: ايه ام لسانين تعالي هني انتي بس.. ما يخصج في حد..
فطوم: بااااااااي... الفااااااااااااااااااااااااتحه.. ايهئ ايهئ ايهئ.. امنتي جميله يا فطومه.. دنتي كونتي حاجه ما بتتعوضجي.. ااااااه.. انا بحبك قوي قوي يا فطومه.. الله يرحمك يا فطومه
الكل تم يضحك عليها وعلى سوالفها.. ودخلت ويا نوره الغرفه وتموا يسولفون ..
فاطمه: تدرين البارحه ركبوا النت عندنا في البيت .. ودشيت الجات.. اقولج اتعرفت على واحد مال بوظبي.. سوالفه وااايد حلوه
نوره: هههههه.. تو الناس.. تو التكنلوجيا دخلت بيتكم.. انزين عطيني ايميلج .. عشان اراسلج.. انزين اي جات تدخلين انتي
فاطمه: جات***** وايد حلو..
نوره: لا هالجات مب شي وايد.. بعطيج عنوان جات احلى دشيه.. www.******.com ها كشخه وايد ناس يدشونه..
فاطمه: خلاص بجرب ادشه.. وانتي شو سويتي ويا هالي كنتي وياه في الجات..
نوره: منوووو راعي البيكب.. ودرته.. اتزاعلت وياه مره دخلت بإسم ثاني رمسني عادي خاين هذا.. ودرته واحين تعرفت على واحد ثاني بس شو فنان.. طرشلي صورته.. شو حلووووو يخبل
فاطمه: انزين.. شقايل خليتي يطرش صورته.. ؟
نوره: بعد قلت له مابكلمك لين ما ترسل لي صورتك؟؟ الريال عاد هو متخبل فيني وايد يحبني.. كل مره ادخل الجات اول شي يكتبه لي.. متى اخطبج.. متى؟؟ اقوله بعدين بخلص دراستي.. اقولج يترجاني يباني اكلمه على التليفون انا مابا.. خليه يتخبل علي احسن
فاطمه: افففففف متى بييني هاليوم..
نوره: انا بقولج شو اتسوين.. يوم اتكلمينه وااايد فجأة ودريه ولاتكلمينه كم يوم.. بيتخبل تمي سوي فيه جيه.. انتي اتقولين متعلق فيج.. خليه يتعلق اكثر..
فاطمه: هي والله يبالي اسوي فيه جيه اتصدقين..
دخل عليهم غانم وقطع رمستهم: هاااااا شو اتسوون اعترفوا..
نوره: شو انسوي يعني انسولف سوالف بنات
غانم: انزين بسمعكم هاللحن على العود عطوني رايكم حلو ولا لا..؟؟
نوره: يلا سمعنا..
تم يدق غانم على العود بطريقه واايد حلوه واللحن هم كان وايد حلو.. والكل اندمج
غانم: تراراراااااا.. شو رايكم؟
فاطمه: بكم اتبيع اللحن؟؟ ههههه.. لا وايد وايد حلو الصراحه.. لو يسمع راشد الماجد لحنك بياخذه عنك على طول
غانم: ايه انتي تتطنزين علي ويا هالويه.
نوره: لا والله ما نتطنز.. بس والله اللحن واااايد حلو..
دشت عليهم عمتهم كلثم: يلا غدا يا عيااااال..
الكل: اوكي..
فطوم: اخر وايد ام عيال .. اخر واحد ام عيال..
غانم: لا يكون نحن نركب باص وانا مادري
نوره: ههههه .. هي والله هاي البنت خبله صدق..
فطوم: شو قلتي ما سمعت..
نوره: ماشي اقول هالبنت واااايد حلوه صدق..
فطوم: حسبالي..
الكل تم يتغدا.. ومتيمع حول السفره... فجأة دخل عليهم خالد.. الكل استغرب ووقف عن الأكل.. معقوله خالد اييهم اليوم.. شو صاير في هالولد.. عمره ما ايي بيت يدته..
العم خليفه: هلا والله بالي ما ينشاف.. اشحالك؟؟
خالد: هلا والله عمي.. استريح استريحوا كلكم حلفتكم ما اتقومون..انا بغسل ايدي وبيي اتغدى وياكم.. اشحالج عمو كلثم واشحالد عمو هنادي؟؟
كلثم+هنادي: بخير الحمد لله
خليفه وهو يساسر بو خالد: اقول.. شو صاير.. شو الي غيره
بو خالد: والله علمي علمك اخوي. مادري عنه.. اصلا ها خالد ما ينعرف له..
خالد: ايه انتي فطوم وسعي بيلس عندج..
فطوم: تعال حياك.. اذا ما كفاك المكان انا بكبري بقوم افا عليك بس..
غانم: بدت احين اتدلع اخوها.. عفان الله .. اتعلمي منها اشوي نورووو
نوره: شو اسوي فيك ماهو انت بروحك قاعد ذاك الصوب انا وين ايي..
خالد: هههه.. فديت اختي انا.. وين يدوو؟ ما اشوفها تتغدى..
غصت مني فطوم وتمت اتكح يابلها خالد كوب ماي وشربها: بسم الله عليج..
ام خالد: شو صار فيج بسم الله..
فطوم: ماشي.. بس خالد قال فديت اختي استغربت .. ومن كبر المفاجأة غصيت اللقمه
علي: هههه.. اكيد بتستغربين مب متعوده حد يتفداج..
فطوم: لا والله.. ليش بلاني عشان ما يتفدوني..
اليده: اعوذ بالله احترموا السفره على الأقل عقب اتناجرو.. هلا والله .. وينك يالي ما تسأل عن يدتك حيه ولا ميته..
خالد: هلا والله بيدو .. تاج راسي والله انتي.. امممموح على راسج ولا تزعلين.. الا وين مريم.. شو ما نزلت هالإسبوع..
ام خالد: لا اتقول عندها امتحانات ماتروم تنزل هالإسبوع..
خوله: تسلم ايديج يدو.. شبعت..
اليده: لا اله الا الله.. انتي لين متى بتمين جيه ما تاكلين عدل.. ما كلتي شي شوفي صحنج..
خوله: لا تسلمين شبعت..
خالد: اقعدي انزين عشان خاطري من زمان ما ييتكم.. وبعد ما تبين تيلسين.. (خالد صار له فتره واااايد طويله ما شايف خوله يمكن من سنين.. لأنه هو من صغره محيرينه لخوله ومحيرينها له.. وخوله المسكينه اتعلقت فيه لكن هو ما يباها.. ومحد خطبها لأن الكل يعرف انها محيرينها لولد عمها ويدتها خصوصا رافضه ان خوله تاخذ اي واحد غير خالد.. )
هني الكل استغرب لكلام خالد.. معقوله خالد الي كاره خوله يقول جيه؟؟ الكل تم ساكت مستغرب.. حتى خوله نفسها استغربت من هالموقف.. حست عمرها مب قادره اتصدق الي يصير.. شكت في عمرها يمكن تحلم والي يصير حلم..
خوله: لا شبعت.. بس انا يالسه تراني ما رحت مكان..
خالد: عيل انا بعد شبعت.. تسلم ايدج يدوو
خوله: لا لالا شو شبعت.. توك ياي..
خالد: عيل تعالي كملي صحنج وانا بكمل صحني..
الكل مستغرب بما فيهم خوله: خلاص ان شاء الله..
ويلست اتكمل اكلها واتفكر .. ياترى خالد اتحسن في معاملته وياها ليش؟؟ شو الي ورا هالتغيير المفاجئ.. الكل خلص اكله وقعدوا كلهم ويا بعض وتموا يسولفون الا خوله الي كان السكوت مغيم جوها..
خالد: يدوو تعالي ابا اكلمج انتي وامي اشوي.؟؟

ام خالد استغربت .. : خير ان شاء الله..
اليده: تعالو حجرتي عيل.. (دخلو الغرفه) خير شو صاير؟؟
خالد: انا قررت اتزوج؟
ام خالد: والله هاي اللحظه الي نترياها من زمان.. بس منو؟
اليده: منو بعد غيرخوله.. تبا اتعرس مالك غير خوله..
خالد: هي باخذ خوله..
ام خالد: والله والنعم.. بس خالد متأكد انك تبا البنت.. الله يخليك ترا خوله ما تستاهل انك اتعذبها.. ؟
خالد: انتوا شو بلاكم يوم قررت اعرس قمتوا اتقولون جيه.. مب انتوا تتريون اللحظه الي اخذ فيها خوله.. ؟
اليده: هي والله ودي افرح فيكم وانا امك.. خلاص عيل انا بظهر وبخبر ابوك عشان يكلم عمك
خالد: خلاص على خير ان شاء الله..
ام خالد: خالد تعال برع اباك في كمله راس..
خالد: حاضر.. هلا امي شو بغيتي؟؟
ام خالد: خالد.. صارحني وانا امك... قولي الصدق.. شو الي ناوي عليه.. حرام مابا اني اعذب البنت.. ادريبك انك ما تباها قول لا تستحي
خالد: امي انا باخذ خوله وما عندي كلام ثاني اقوله.. انتوا شو بلاكم كله مستغربين مني اليوم كني واحد غريب هب خالد ولدكم..
ام خالد: انزين.. بس الله يخليك.. ودر سوالف البطاليه وسفراتك هاي دام انك تبا تستقر.. ودر ربعك هاييل.. ربع السوء..
خالد: امي شو اودر ربعي وسفراتي.. انا اسف ما بودر.. تدرين ان السفر حبي.. ومالي غير ربعي يروحون وياي.. اسف ما اقدر
ام خالد: انزين سافر ويا حرمتك..
خالد: ما عندنا حريم يسافرون.. وقولولها اذا حاطه في بالها تشتغل ولا تسوق خل تنسى.. قولو لها خالد ما يحب جيه..
ام خالد: انت شو ناوي اتعذب البنت شكلك..
خالد: والله هاي شروطي بغيتوا بغيتوا.. ما ببغيتوا كيفكم..
دخلت ام خالد البيت وهي مب مرتاحه لفكره الزواج هاي.. وكلمت ابو خالد وقالت له عن الشروط وكلموا خليفه ابو خوله .. وماكان عنده اي مانع.. وخذوا راي خوله وقالو لها عن شروطه.. وهي قالت ان مب معارضه لأي شي .. لأنها من صغرها محيرينها له وهي كانت تباه يعني تتريا هاليوم الي يخطبها فيه..وتم تحديد الملجه يوم اتخلص مريم امتحاناتها ويرد فيصل من السفر..
يوم سمعت مريم هالخبر استغربت فعلا.. معقوووووله خالد بياخذ خوله.. حتى فيصل استغرب .. بس عقب اتعودوا على هالفكره على اساس انه الله هدا خالد..

شو راح يصير؟؟
والبقيه تأتـــــــي... __DEFINE_LIKE_SHARE__

[غرور طفله]

أعتقد خووله بتحب عقب فيصل..


وفطوووم بتحب هزااع وبتستمر معااه ..

بس ورا خاالد في شي وانا متاكده ..

تسلمين غلآآيهـ وبليـز نتـريآ الجزء الثآآلث..

حآولي تنزلينه بسرعه . . السموحه __DEFINE_LIKE_SHARE__