يا ساكن الربوه نشوفك على خير 0000000 بالعاصمه يا كبرها اليوم ديره

[محروم.كوم]

يا ساكن الربوه نشوفك على خير=بالعاصمه يا كبرها اليوم ديره
والا بخلا صلبوخ لو تالي عصير=لو انها لشرواك جلسه قصيره
بغيت حجان الوجيه المسافير=اللي لهم في طاري البال سيره
يابو سعد ما شفت فيك الخماكير=انت الرفيق اللي علومك عطيره
ما تاتي الايام بالكيف واتصير=تمشي باوامر من خلقها يديره
متى نتواجه لو على شوفة الطير=من بين ريضانن تفاوح عبيره
والا على طعس الغضا ضونا تنير=على سواد الليل ماريد غيره
ومقيلنا بين الضلوع المشاجير=فيها الطلاح العاليه مستديره
من حولنا حدب الدلال المباهير=وابريق شاهي راكدن باتخديره
وقدوعنا الشقرا جلبناها من حير=في ضمدها الدبس الحمر تقل شيره
والطير الاشقر واقفن كنه الزير=على الوكر ساقيه خضرا قصيره
والا المخالب مثل عوج المسامير=كما الشباري للدواغر طريره
وافي ولا له في مزاياه تصوير=الا كما الصاروخ دون المغيره
اليا هوا للخرب كالفارس مغير=والنايفه بالجو توحي صفيره
تلقاه فوق القاع لطمن وتمزير=لما يموت الخرب هذا مصيره
والا الرقاد الليل بين العثامير=مرعى النياق اللي تباري بعيره
وسوافي دعوب الصحاري مباذير=وازهورها بين الرجايب نثيره
نوحي بها القوبع وجول العصافير=حتى القطا فيها فروقن كثيره
ناخذ كفاية يومنا دون تقصير=والرزق عند اللي يواسي فقيره

يوسف الخليفة ( أبو عبد الله )

__DEFINE_LIKE_SHARE__