يالله يا منشي ركوم السحايب=يا مرسل الوابل على كل ديره
ترحم بلادن صبحتها اللهايب=بها حميم الشمس يشوي محيره
حتى الشجر فيها قفيضن وعايب=واعوادها صارت تحتها كسيره
واوراقها عقب الشتاير شهايب=تبني عليها العنكبوت لصغيره
فيها السحق يبست عليه العشايب=غدا كما صوفن تبعثر شريره
واحزومها غبرا ذرتها الترايب=لجا الضحى دلا يسافي ذريره
حتى الذعيذع مع صليف الهبايب=يلوي غصونن باللفوح الشطيره
في كل دحمولن تشوف الهدايب=رميم واقشاشن يغطي حفيره
تهايلت جيلان بعض الرجايب=يبي لها طينن توالا مطيره
قاعن غدا ريغا غباره عجايب=ادنات هفهوفن يهب ويثيره
يا رب راجينك تزيل الجدايب=يالله عسا في قادم الوسم خيره
يالله عساني عن معاصيك تايب=توبة وفا تاتي من اقصى السريره
من واحدن صار بعطاويك طايب=واليا حصل جودك تهون العسيره
انت السميع اللي تحل النشايب=عيني ترا لرضاك تبقى سهيره
تجثي على بابك زحوم الركايب=باحماك نفسي دايمن مستجيره

من جاك يا مولاي ما راح خايب=انت الكريم اللي جنانك عطيره
نفوسنا تنساق لجلك جذايب=يالله بالفرردوس ناطا خضيره