الحر لافوحه شوا وجهي اليوم=في جرهديه طوقتها المظامي
زفرة جهنم تطرق شعاف واحزوم=من حرها المشراف دونه عسامي
من واهج الرمضا جفت عيني النوم=عجزت اقيل ولافح القيظ حامي
وانا رجاي بملتجا كل مضيوم=رب السماوات العلا ما ينامي
دورت ظلن لو حدر خوصة الدوم=ولا لقيت من المشاجير زامي
عساني معذورن وما نيب مليوم=واقدر اللي شفت فيه احترامي
ابطا رشيق السيل والعد معدوم=والطير من فوق اسود الجيف حامي
ولقيت لي شلقة سلم حولها رجوم=قلت اتقي فيها واريح عظامي
وابقى تحتها اليوم والرزق مقسوم=لما يجيني بالشعيب الظلامي
علقت انا القربه على عود مبروم=وبديت ادور صيدتن لجل ايدامي
ولقيت جرتها تقل مضرب ختوم=ويوم انها صفت تمسس قوامي
حين استحسيت انها عندي تقوم=بديت اقول القاف باحلا كلامي
مصباحها بالعرفجه تقل مرشوم=وبرقت بالدعب الموالي امامي
غشاها خوفن كنها الطفل محموم=واشوفها تنفج سواة السهامي

مديت بارودي وهي كنها تعوم=وذكيتها واحمد مليك الانامي
قطعتها والحقتها كشنه وثوم=وروبت ماها في عقودن تمامي
هذي حلاة الصيد له وقت واسلوم=وطرايقن يطرب لها كل رامي