سالفة:سبحونة جدتي..قوافي

[محروم.كوم]

مشرفينا،اخواني ،اخواتي ،زوارنا

حياكم الله جميعاً

من السباحين القديمه واللي أكيد ميب صدقيه ،،تفضل به علينا الخيال الواسع والامنيات الفكريه المتـئمله عطاء بلا حدود من الحياة ..

قالت جدة أمي لنا رحمها الله وأسكنها فسيح جناته بيوم من ايام الصيف وهي تحاول تهدئة درزن من النشئ الصالح إن شاء الله حتى لا نزعج الجيران النايمين بالسطح المجاور لبيت جدي:

كان فيه بنت جميله تعيش بمغاره (كهف )لحالها فهي من وعت على الدنيا وهي وحيده لا أب ولا أم ولا أحد من مخلوقات الله حولها غير شجره كبيره جمب المغاره اللي تنام فيها البنيه ..

كل صبح تروح البنيه للغديروتغسل ولين رجعت لمكانه قبل تدخل تسقي الشجره وتدعي ربه ان الشجره ماتموت عشان تسلا به ،،وكل يوم تلاقي بداخل المغاره خيرات ربي فواكه خضار تمر،، وكل ماتمنت شي بكره تلاقيه ،،غير ترتيب المغاره وفرشها من أحسن مايكون ..

بيوم قامت من النوم على صوت صجه ولجه ويوم ناظرت ولين فيه مخيم وغنم وحريم ورجال وعالم ما قد شافت مثله لا من البشر ولا من الحيوان..

البنت من الخوف صرخت وسمعوها اهل المخيم وراحو مع اتجاه الصوت ويوم دخلو المغاره ولين النعمه والنظافه واللبس والعيشه اللي يصعب وجودها بهالمكان..

سألو البنت وين اهلها ؟

قالت :ما عندي احد..

طيب منين كل هذا ؟

قالت:مدري..

شكو فيها وقالو هذي ماتبي تقول وتستر على أحد أو أنها جنيه ،،وربطو البنت وأخذوها معهم ..

وصلو لخيامهم وحطو البنت عند حرمه كبيره وعلموها بسالفتها وانهم بينتظرون لين يسأل عنها أحد أو أو ،، مـــــايـــدرون..

انتبهت العجوز ولين البنيه بآخر الليل يفك الرباط وهو صعب فكه عليها ،يعني لازم أحد يساعدها او يفكه وعندها أكل وشرب غير ماعندهم ولين قرب الفجر تربط ثاني ويشال كل ما عندها وترجع كما كانت..

علمت كبيرهم وحاولو معها تكلم قالت ابد مدري مثلكم !!!

جا واحد قال أخاف أنها جنيه او أنسيه مسحوره أو ممسوسه ،، انا بقعد عندها بالليل وأشوف ..

ويوم جا وقت فك الرباط مادرى إلا وهواء خفيف ريحته زينه مثل أطيب انواع العود (الدخون) ومن غير ما يشوف جسم او شكل انفكت البنت وانتلت الخيمه صواني من اطيب ما يكون من العيشه ،،ما يدري وش جابهم ومتى!!

والرجال يقول لربعه من بكره وعقب صلاة الفجر:

اتركوها تروح لمغارتها البنت مخدومه من البسم الله الرحمن الرحيم واخاف نستظر منهم لو أخذناها عندنا او بتلنا حاجزينها..

راحو لها وعلموها انهم بيفكونه بس بشرط تعلمهم !!

قالت:انا ما أعرف غيرأني أدعي ربي يكرمني بحياتي ومماتي وهذا الدعاء لقيت نفسي أقوله كل يوم تحت الشجره القريبه من المغاره وماعندي غيره اهتم فيه واسقيها كل يوم ،وبس..

تركوها ترجع لمكانها وراحو بعد ما طيبو خاطرها وعاهدوها انهم ما راح يقربون مكانها إلا بالخير..

@انتهت السبحونه@

كلنا يادرزن النشئ مستمعين ومركزين والاذان تقل سماعات نسجل كل كلمه تقوله جدتي ، ونمنا والأحلام تصافق من كثر الطلبات اللي ودنا احد يجيبه لنا حنا بعد بس؟؟

جدتي تحب زرع الياشموم او الريحان او المشموم( مدري ايهم اسمه او كلهم اسم لنبته وحده) والورد البلدي..

وليننا ما قد خلينا لها وحده تفرح به ،الورد يقطع واليشموم يوكل ،،كأن مافي فرق بيننا وبين اللي بالقوع..

ومن طلعة الشمس ما بقى إلا نغني للمشموم والورد ،وسقايه وتنظيف وشوي نحب الورق وحده وحده ،،ومع كل نقطة ماء ندعي ربي وطلبات ماله أول من آخر..

وجدتي تسمع وتضحك وقبل المغرب كان حوش البيت مليان العاب صح موب كثر ماتمنينا المهم أن اللعاب جت ..

كل ما ذكرت الحين اضحك علينا انا وباقي الدرزن وشلون ما جاء على بالنا أن جدتي تبينا مانخرب زرعه اللي صار يا سلام أدام فيها من لعاب ،،والسالفه كانت للأصلاح و نجحت..

تحياتي

اختكم

..قوافي..

__DEFINE_LIKE_SHARE__