سالفة:عرس الأراضي..قوافي

[محروم.كوم]

مشرفينا،اخواني،اخواتي،زوارنا

صبحكم / مساكم الله بكل خير

سالفه سمعتها من احد كبارنا ،،يقول واحد من اصدقاه كان يشتغل مساح اراضي بالبلديه ،،والمساح هو من يحدد مساحات الاراضي من وين لوين على ما فهمت..

السالفه هذي تقريباً لها 50 سنه يمكن تزيد او تنقص ..

يقول ان صديقه هذا كان توه مكرمه ربي بولد وماله بالعمر إلا: 7أيام ،،راح الصبح للعمل مثل كل يوم،، وبلغوه ان عنده انتداب للديره الفلانيه ومطلوب يحل مشكلة تداخل ارضين تنازعو عليها قبيلتين بتحديد مساحة وأملاك كل قبيله ..

أخذ اوراق تخطيط الاراضي الخاصه بالمنطقه وسافر من بكرا وهو ماوده يروح ويبعد عن ولده اللي توه مولود..

وصل للديره وحلف عليه واحد من الشيوخ بأنه ما يبدا بالعمل ولا يطلع من عندهم قبل ما يوجبونه وياخذ حق الضيافه

ويوم اصبحو ثاني يوم راحو معه للأرض ،،وروه الحدود القديمه لكل ارض ..

وهي املاك قديمه وحده لها صك والثانيه شهود بس ..

فل اوراق المخططات على الارض وبدا يارايح منا ياجاي منا وقعد على هالحاله اسبوع وبالاخير حدد هو والمساعدين اللي معه حدود الاراضي وطلع القسم الاكبر للي ماعنده صك ..

يوم جا عقب صلاة العشاء طلب المساح منهم يتجمعون بمجلس واحد كبير من نفس الديره بس ماله شي بالاراضي على اساس طرف محايد يتقابل عنده الخصوم..

حضرو كلهم وراعي الصك جاب صكه وراعي الشهود جاب شهوده والمشكله اللي صارت بسبة ان الاراضي متجاورات من جهه والجهه ذي بطرف شعيب والشعيب مع الوقت تغير وتوسع وهو سبة المشكله..

تراضو وعرف كل واحد حدود ارضه،، وجا اللي ما عنده إلا شهود وقال:

أشهد ياشيخ فلان وانت ياشيخ فلان ويالحاضرين ترا بنتي لفلان ..

يقصد منتدب البلديه ..

باركو له وقال الرجال ابو البنت بكرا ما ترجع الرياض إلا ومعك عروسك..

هذا ضاق صدره وماله اي حيله ولا وده يعرس ثاني لكن ماله إلا يشكر الرجال على طيبه ومن بكرا تم العرس ،،وفجر ثاني يوم رجع بعروسه للرياض..

الطريق طويل وذا يهوجس بنفسه انه لازم يكرمه آخر كرم وش ما صار يصير وهذا اقل شي يرده لجميل ابو البنت..

انتبهت العروس له وقالت :أبسئلك سوءال وحلفتك بالله ماتكذب..

انت ودك انك معرس ثانيه؟

قال:لأ ،،بس مأرد كلمة ابوتس لو على رقبتي..

قالت :أدامك حكيت ابقولك اني ما أبي اترك ديرتي واروح الرياض وأبوي ماأقدر اقوله شي ولا أبي ادخل على جاره ومالنا إلا نتفق ،،والله ياولد الاجواد اني ما ابيك وتراي محللك من هالعرس وكل اللي ابيه تتركن عندك كم شهر همن ترجعني لديرتي وانا بعلم ابوي عقب وهو رزين ويقدر وكريم طبع ونفس..

وصلو للرياض وعلم امه باللي صار وطلب تكرم البنت وتفرش له احسن غرفه ببيتهم ولا تخلي عليها قاصر ابد وهو اخذ فراشه وصار ينام برا ولا طب داخل البيت ولا شافه لين كملت عنده الثلاث شهور وهي اللي قالت لأمه خلاص قولي لفلان يجي يودين ديرتي ..

راحو ويوم وصلو طلب منها تشكيه لبوها انه بخيل او اي شي يدينه ولا يقال انه رجعه وهي مهديه له..

البنت يوم جا ابوها ينشدها وش فيه ؟قالت:

يبه انت ما اخطيت وعطيتن لرجال مشهود له باخلاقه لكن السالفه كذا وكذا وانا اللي طلبت ارجع وتراه طلب اني اقول انه بخيل وذا شي ما يعرفه ولا من طبعه .. إلا غرقون بكرمهم هو وأمه..

أسكت الابو وراح المجلس سوى نفسه انه مصدق كلام بنته ويقصد المزح معه وقال:بنتي تقول انك بخيل وتبي طلاقه لكن انا عندي بنت ثانيه بخيله تصلح لك وش رايك هههههههههه

هذاك وجهه تغير لولا ان الابو على طول قال: انا عرفت بالسالفه وهذي ديرتك وانا ابوك وديرت اهلك ومتى ما بغيت تسير الله يحييك بين اهلك وربعك ..

تحياتي

اختكم

..قوافي..

__DEFINE_LIKE_SHARE__