سالفة:قبيلة حريم من الجن..قوافي

محروم.كوم · #1 05-24-2013, 08:20 PM

بسم الله الرحمن الرحيم
أخواني ، أخواتي ، زوارنا
حياكم وأسعد الله أوقاتكم بالمسرات
سالفتنا اليوم عن رجال فقير معدوم مبتلى بحب الزواج من النساء على قل الحال..
ولد فقير ابن فقير ومن الأجداد كانت وراثة قل الحال ..
أشتغل عند حرمه غنيه يبيع ويشري لها وتعطيه على حسب البيع بهاك اليوم ..
الحرمه اكبر من الرجال بيجي 15 سنه،،وكل يوم المغرب تجي للرجال بالمحل عشان تحاسبه على ماباع ..
مابين يوم ويوم صار يتميلح لين جت واهتم شوي بشكله وكل مره تجي يجدع عليها كلمه يشكي الوحده وقل الرفيق ،، الحرمه انتبهت وانشغلت بكلامه لين جا يوم وقالت له :
تعرس علي؟؟
قال :
بس انا فقير وانتِ غنيه وعندتس بيت وانا بيتي نصه طايح ومهدم بعضه وين اجيبتس بها البيت
هو يقول هالكلام ومتأكد انه بتقول : مابي منك شي واسكن عندي ،،وفعلاً صار مثل ما توقع..
أعرسو وانبسط أو حيا مع الحياة الجديده لكن ابو طبيع ما يجوز عن طبعه
بيوم قال لحرمته ،،يافلانه:
قالت : سم،، قال : فيه شي عني ماتعرفينه ابي اقولتس اياه بس لا تخافين !! طارة عيون الضعيفه وقالت : خير ان شاء الله وشي؟؟
قال : خير خير ،،
أنا وكل أهلي ماورثنا بها الدنيا إلا قبيله من الجن وكلهم حريم وتراهم لا موذين ولا شي ،،بس مابين فتره وفتره تشوفينهم بسطح ولا بحوش ولا بالمجلس ،،سولفي معهم ولا تخافين مامنهم شر ..
الحرمه مابلعت الكلام وحست أن السالفه شي ثاني..
أعرس الرجال على حرمه جديده وليلة عرسه قال لها بنقعد كم يوم ببيتي الصغير وبعدين نروح للبيت الثاني عند حرمتي الاوله لكن ابيتس تحملينها شوي ولا تطلعين من المكان اللي اقولتس و اقعدي فيه ولين كلمتس ردي بكلمتين لا تزيدين ،،وتقدرين تمشين بالبيت بس عند الضروره بس لازم لازم تلبسين العبات ( البشت النسائي) انتبهي تمشين من غيره وتشوفتس..
جابه يوم سادس لبيت الاوله وقاله ارقي للسطح لين اقول حولي ،، وطلب من الاوله ترقى للسطح تجيب غرض ويوم رقت ولا الجنيه مرتزه ( زوجته الجديده ) سمت بنفسه وعلى نياته تحسب هذي من الموروثات لرجله ..
حولت حدر وقالت يافلان الظاهر عندنا زوار وحده من جنكم فوق
قال ما يخالف المهم مثل ما علمتس ولا تهتمين،،وصار يلعب على الثنتين ويخوف الثنتين ،،والحال ما صمل ولا أسبوع ونص..
مع الوقت عرفت الاوله انه يكذب وذي مرته لا جن ولا خرابيط وقررت انه ماتخليه يتهنى كثر ماتهنى ..
أسكتت لين جت الفرصه ،،كانو شتاء ويشبون حطب بالمجلس وفيه مثل الغرفه الصغيره له باب صغير على نفس المجلس وفتحه مثلثه تسمى (الطاق) ويخزن فيه الفحم والحطب..
ولين الجديده استملس جلده على الروحه والجيه قدام عيون الاوله وراحت من قرادة الحظ لم الغرفه الصغيره اللي مخزن به حطب تبي تاخذ شوي تولع بهن بغرفة المخبئ اللي بالسطح ،،والرجال بغرفة الاوله بسابع نومه (مبسوط عمي لكن دوام الحال من المحال) ..

شافته الاوله وهي بسط غرفة الحطب تضف و قومي هذي وصكي الباب بالمزلاج عليه ،،واخذت عودين اوثلاث حطب من اللي مولع نار وجدعته من الطاق ووقفت عنده عشان تشوف الجاره الجنيه ..
دلت الجنيه تصارخ وتصارخ لين بغت هي اللي تنهبل خوف تولع الدنيا وتحترق مع الحطبان ويوم تأكدت انه خلاص باقي له شعره وتنهبل فتحت له الباب وذيك من غير فكره وعلى برا ،،
قام النشمي على الصوت وش ذا وش ذا؟؟؟؟
قالت : ألحق ألحق جنيك انجنت وطلعت من الدار تركض بغت تعلق بغرفة الحطب ،، أحد يشب بغرفة الحطب ،،صدق جنيه
ركض ورى جنيته والروحه هي الروحه وسلا متكم..
تحياتي وتقديري للجميع
.. قوافي..
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سالفة:من خاف سلم..قوافي	محروم.كوم	منتدى أخبار المواقع والمنتديات العربية والأجنبية	0	01-20-2013 01:40 AM
سالفة:رسب ثمن سقط..قوافي	محروم.كوم	منتدى أخبار المواقع والمنتديات العربية والأجنبية	0	07-07-2012 01:20 AM
سالفة:دوج ابو عبيد..قوافي	محروم.كوم	منتدى أخبار المواقع والمنتديات العربية والأجنبية	0	12-13-2011 07:30 AM
سالفة:سوق حلة القصمان.قوافي	محروم.كوم	منتدى أخبار المواقع والمنتديات العربية والأجنبية	0	10-20-2011 01:00 AM
سالفة:طين جدي.قوافي	محروم.كوم	منتدى أخبار المواقع والمنتديات العربية والأجنبية	0	10-11-2011 08:30 PM