|
إنضمامك إلي منتديات استراحات زايد يحقق لك معرفة كل ماهو جديد في عالم الانترنت ...
انضم الينا
#1
| ||
| ||
السلام عليكم ورحمة الله وبركاته . السالفه طويله شوي ولازم اعطيكم صوره مقدمه ومتقدمه اكثر عن اسباب عنوان الموضوع . كثرة السرقات في الحي اللي انا ساكن فيه ( والشرطه ) ما جابت خبر ( ما علينا ) ----------------- وصل الحال الى بيتي المتواضع . وبعد عدة سرقات قررت ان اقوم بشراء كلب حراسه من سوق الكلاب بالحاير / ولآني لست خبير بما يكفي لشراء كلب تنطبق عليه المواصفات المطلوبه من عض ونهش وهوهوه فقررت الآستعانه بالبحث في قوقل / ووجدة ان افضل شي هو كلب يقال له جيرمن شبر . ولاكن له معامله خاصه من حيث الاكل والشرب والتكييف . وبما اني في كل مره اتذكر اثار سرقة بيتي العزيز وما خلفه لي من اثار نفسيه / فقررت ان اهتم بهاذا الكلب نفسيا ايضا . من باب العدل . ذهبت الى سوق الحائر عصر يوم الجمعه بعد ما حطيت بطانيه في الكرسي الخلفي لسيارتي وشغلت المكيف عشان يتبرد اللي ناوي اشتريه ( الجيرمن شبرد) / وحصلت انواع الهوهوات وبكل اللغات لاكن فيه هوهوه مميزه وهي لكلابنا المحليه ( عليها صوت ) مميز عرفته من يوم نزلت من السياره . دخلت السوق وقمت بالسؤال عن الأسعار / وكل سعر اغلى من الثاني والأسباب ان اللون والعمر والشكل له دور في تحديد السعر / رغم ان طلبي هو كلب يهوهي فقط واذا حصل منه عضه او عضتين مع تفحيطه بالحوش فلا مانع من زرقة المذكور . الأسعار خلتني امتنع عن فكرة شراء كلب من الأساس وخصوصا اذا تذكرت ان سعر صندوق الدجاج حوالي المية ريال / يعني كلب بالف وخمسمية ريال يجيب خمسة عشر صندوق دجاج فرنسي دو اكل فيها انا وعيالي سنه . وبعد استعراض للسوق خرجت من السوق وكلي حسرة . ويوم جيت اركب السياره الا واشوف هاذا الجرو الصغير يتمشى بين السيارات وانا اقوم اراقب الوضع واتلفت يمين ويسار اشوف وين راعيه / ولا شفت احد وانا اتمقل في وضع هاذا الشبل . ويوم تأكدة ان ما فيه احد حوله واقوم انادي عليه (بسب ) ويجيني الى عند رجولي ويشمشم . ما صدقت على الله وبحركه خطافيه فتحت الباب الخلفي ورميته على الكرسي / وانطلق بالسياره . وانا الوم نفسي اني سرقت كلب / والعاده ان الكلب يعض السارق . ----------------------------------------------- السياه كانت شغاله على التكييف عشان اللي كان في بالي الجيرمن شبر . مشيت بالسياره من الدائري وكل شوي اطالع وراي قلت يمكن اصحاب الكلب يطاردوني الحين ثم تصير فضيحه / وقمت اتذكر تهمتي بقسم الشرطه والله فضيحه اخر عمري اصير (سارق كلب ) . وصلت قريب من البيت / واتصلت على صاحبي وعلمته بالسالفه كلها . اشار عليه اني اول اطعمه ضد الأمراض المعديه . اطعمه / اطعم كلب . سألته وين قال . قال في المكان الفلاني . لفيت السياره وانا اتفكر في هالمصيبه . هالحين ما طعمت اصغر عيالي / اقوم اطعم كلب . ---------------------------- يوم وصلت للعياده المخصصه / نزلت من السياره وانا متلطم / ودخلت على الأستقبال وانا اشوف الناس مستلجه تقول في عيادة بشر . المهم كلمت راعي اللأستقبال بصوت خافت بالمره وقلت له ممكن ترسل عامل يشيل كلب من السياره (طبعا انا موقف السياره بعيد ) . ما قصر الرجال ارسل العامل وجاب الكلب وانا مسوي ان الكلب ما يخصني . وأنا في بطن عيادة كلاب . دخلنا على الدكتور / وقال بسم الله شو وسيم كلبك ...شو اسمه . (((((((((((اسمه )))))))))))))) اسم ايش . ما خطر على بالي الا اسم (لاسي ) اللي شفته بفلم امريكي زمان . قلت له ( اسمه لاسي ) قال : بس هادا دكر حرام تسميه اسم انتايه / بدك تسميه اسم دكر عشان ما يتعقد . سألت الدكتور وش نوعه ووش هو من لحيه (((((قال )))) هاذا مهجن وذكر لي كلام مخربص / المهم انه من نوعيه انبح انبح . ويحتاج الى اكل خاص / خصوصا انه صغير ويحتاج الى تغذيه خاصه وفيتامينات .وانا انقل نظراتي ما بين الدكتور والكلب . فوق هاذا اضطريت اشتري معلبات اكل للكب عشان تصير عظامه قويه عند الكبر وعند مهاجمة السراقين . ________________ قلت له يا دكتور / ابي اطعمه عشان ما يتأذى منه العيال (منا ولا منا ) . الدكتور طلب ميتين وخمسين ريال / وانا ارتج . وش ميتين وخمسين ريال / يوم رفعت صوتي واتلفت الا واشوف وراي وحده حرمه معاها قطو ملون / وانحرجت / وتصكني النعره اللي ماهي في محلها لاكن وش اسوي / دفعت المبلغ / واهم شي عندي اني كنت متلطم . ------------ اعطيت العامل خمسة ريال عشان يرجعه للسياره . __________________ وصلت للبيت ولا علمت ام العيال عن شي خصوصا ( التطعيم ) . والله ان تقلبها عاليها واطيها .( سرقت كلب وطعمته وبفلوس ) وانا اللي نصف عيالي ما طعمتهم الا بالهواش من الكسل . نزلت الكلب بحوش خلفي ولا نزلت الأكل المعلب (خليتها في شنطة السياره ) وعلبه وحده بس حطيتها بجيبي الين تعدين مقدمة البيت . ------------------- وقمت اهوجس علبة الأكل تكلف تقريبا خمسه ريال / وشريت عشر علب . في الساعه الاول ( لهط ) علبه . وقمت احسب التكاليف / خمسه ريال في ثلاثين يوم / يعني مية وخمسين ريال / وحسبتها بصندوق الدجاج ......وجدة ان صندوق الدجاج ارخص . لاكن جتني فكره جهنميه / ليش ما اخلط رز مع هالمعلبات واضحك على الكلب ياكلها / واذا ما اكلها بخليه يجوع واذا جاع ياكل الحصى غصب . لاكن من وين نجيب الرز ........ اتصلت على صاحبي راعي مطعم ( ذبايح ) وقلت له عندي ( بط ) يحب اكل الرز وودي اذا بقا عندكم رز با أخر الليل ترسولنه لي عشان ما ودي اعطي ( البط ) اكل ماهو نظيف . ما قصر الرجال / اخر الليل جاب لي كيس اسود كبير مليان رز يكفي قبيله . وقمت بالتأكد ان العيال نايمين / ما ودي يشوفون ابوهم وهو يخلط رز با أكل كلاب / وخصوصا ان صورة الكلب على العلبه . طبعا كنت مجهز اكياس بلاسيتك حقت اللحم / ووزعت الرز المخلوط بالتساوي / وطلعت حوالي خمسين كيس . الورطه اللي جتني وين احط هالاكياس . فكرت وفكرت / قلت مالي الا فريزر البيت / وقمت فرغت مكان وحطيتها فيه / ورحت تروشت ورحت صليت الفجر / ورجعت نمت . ما جلست الا واللي تصايح وصوتها واصل للشارع واقوم مفزوع ( وش فيه ) قالت وش اللي بالفريزر وريحته مقرفه . علمتها بالسالفه . وهي تقوم تشيل الاكياس وترميها بالحوش / وترمي كل شي كان بالفريزر / وقامت (ترمي كلام علي ( ++++++++++) . ما عليه ( معها حق ) . تفتق ذهني عن شراء فريزر خاص با اكل الكلب / وقلت مالي الا (نذير) اللي يصلح الثلاجات والمكيفات / اتصلت عليه وعلمته بالسالفه / قال فيه عند راعي البقاله فريزر يبغا يبيعه / رحت لراعي البقاله وشريته ووديته للبيت وشبكناه بالكهرب / وحطيت اكل الكلب فيه قبل يجون العيال من المدرسه .في الحوش الخلفي . اليوم الثاني / الفريزر يبرد ولا يثلج / اتصلت على نذير وقلت له تعال صلح الفريزر / جا هو واثنين من العمال وشالو الفريزر بالأكل اللي فيه الى محلهم وقاللي بعد العصر يكون جاهز . ما فضيت اروح لهم الا بعد العشاء .....وصلت للمحل واشوف ما فيه احد مثل العاده قدام المحل .والعاده يبشكون على كراسيهم قدام المحل . __DEFINE_LIKE_SHARE__ |
مواقع النشر (المفضلة) |
| |
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
مقلقل لحم (موضوع مشارك ) | محروم.كوم | منتدى أخبار المواقع والمنتديات العربية والأجنبية | 0 | 03-05-2013 06:50 AM |
مقلقل الدجاج ....... شهي ولذيذ | محروم.كوم | منتدى أخبار المواقع والمنتديات العربية والأجنبية | 0 | 06-21-2010 03:30 PM |
مقلقل عراجين (ريم البراري) | محروم.كوم | منتدى أخبار المواقع والمنتديات العربية والأجنبية | 0 | 01-30-2010 09:30 PM |
مقلقل (لحم صغار ) مع خبز التنور ( صور ) | محروم.كوم | منتدى أخبار المواقع والمنتديات العربية والأجنبية | 0 | 06-29-2009 01:20 AM |
سمك مقلقل من مطبخي | محروم.كوم | منتدى أخبار المواقع والمنتديات العربية والأجنبية | 0 | 05-31-2009 07:50 PM |