السلام عليكم ورحمه الله وبركاته

خل اعلمكم انا كنت مره اصيد طيور وقت النزل وكان معي بندق شوزن وتمشا في النخيل ويوم دريت ولا هذا فلان من الناس يصيد بعد مثلي بس البندق الي معه ربع شوزن وينشب فيني الا ابا ارمي بالشوزن حقتي ونا اقول يبن حلال ما معي الا سبع رصاص ونحن تونا الضحى ويلزق فيني لزقه الا ابا ارمي وقوم وعطيه بندقي ويروح يم الاثله الي يجلسون العيال تحتها من شمال ولا فيها ثلاث صفاري وجنب بعض وهو الي يركد البندق وبسم الله بوم ولاه متشنقل على ظهره والبندق طاحت هنااااك ولاه يون يوجعه كتفه من الرميه انا من بدايه الحدث ونا معاد قويت اتحرك من مكاني من الظحك وهو يصيح من الوجع ونا وش اسوي ما قويت اتحرك من الظحك عليه ولاه بجيه اثنين يمشون مع السوق وسمعوني ونا اظحك ويجون ويشيلون الرجال ويقعدونه وش فيك وش فيك قلت ابد ما فيه الا العافيه رما بالشوزن ووجعه كتفه وبس قالو نحسبك راميه يوم نجي الرجال طايح ونت ما عليك منه - بس صارت درس له كل ما اشوفه اقول ما ودك برميه يافلان الاذاك قال اعوذ بالله من بندقك احسن خله ما يتعودها

تذكرون المقبره الي جنب حليوه من جنوب وتعرفون جدارها الي قبال بيت الخراجا والخباز اذكر فيه عيال يتسابقون هم ويا بنت بزور يعني المهم انهم يتسابقون هم والبنت - البنت ترقا علا الجدار حق المقبره وتركض عليه والعيال تحت الجدار ويتسابقون هم وياها هههههههه ياحليلهم يلعبون هههههههههههه

اقول يالغالين والله ان قصدي بذكر هذي السوالف عن حياتنا منول هو سعه صدوركم وتعرفون الا اي مدى وصلت البرائه فينا وحنا خاطه شواربنا بس ما عندك احد هههههه

خل اعلمكم يالغالين عن منول ترا ما عندنا تلفزيونات ولا اي شي والناس ما يخلون بناتهم يلعبون مع العيال ولا شي يعني ثقافه انثويه عند العيال منول 0 صفر ايه صفر
والله العظيم ان هذا حال العيال منول وتلقونهم كلهم هلحين يظحكون تذكرو
وش اقصد تذكرو كان توه بادي يطلع مسجل صغير اسمه نا شونال يجي رادو ومسجل مع بعض وكان مع واحد شريط قبله شايله في مخباته من حبه له وكان في الشريط واحد يغني خلاعه تدرون وش يعني خلاعه يقول


اه واويـــلاه يــوم هب الهوا

طير الفستان عن شلحه هدى

ولا قال طير الفستان عن شلحه تشخص ابصارنا وندلي نحس بشياء غريبه ون تلخبط ولا نعرف نتكلم كله من الشلحه والله العظيم اني صادق وتحدا من ينكر ذا الشي

ولا شغلو المسجل يقصرون عليه وهم خايفين لا يسمعه احد -

وخل بعد اعلمكم بالدلاخه الي فينا منول اذكر فيه واحد وكانه يقرا هلحين الذكريات يبي يعرفني ويبي يذكر كلامي المهم ذا الرجال قبله يتهاوش يعني يتظاربون هو ويا واحد ثاني وهو صديق له بعد تدرون وش سبه التظارب الي بينهم لان الثاني قبله يغني

رن التلفون وباالصدفه وشليته

الو نعم مين قالت لي انا نــوره


ويقول لرفيقه لا تغني ها الاغنيه ابد تدرون ليش لان اسم اخت الي يزعل اسمها نوره


ومن يوم يغني ما تشوف الا الظرب والمظارب يالله اقوا افكهم وتاصل الا المفالق بالحصى ويصب الدم من روسهم

وخل اعلمكم صدقوني ان كلامي من واقع الحياه منول وذي بعد مهيب مبطيه واجد والي حاصله له القصه او السالفه هو الي قايلها لي بنفسه يقول تذكر في التلفزيون يوم انه توه جاي كان فيه افلام كرتون وكان فيه وحده من الكرتون نفسه اسمها زينه او لينه والله اني نسيت بالظبط المهم تدرون وش يقول ذا الدلخ يقول ياليت من يتزوج على زينه ياخي احبها مرررررره

صدقوني هذي حقيقه ما كنا نعيشه في الماظي ولولا الحياء بعد قلت شي اكود بس يكفي خلوكم تعرفونا على حقيقتنا هههههههههههههه

الله يوسع صدوركم جميع يالغالين وهذا هو المطلوب اول وا اخر

وفي الاخير ما اقول الا

سبحان الله العظيم سبحان الله وبي حمده - عدد خلقه وزنه عرشه ومداد كلماته