راعي العجراء والقطار

محروم.كوم · #1 08-31-2012, 03:10 PM

السلام عليكم ورحمة الله وبركاته

اليكم هذه السالفه بعنوان راعي العجراء والقطار قبل 40 سنه اوكثر

في سنة من السنين وكان ايام عيد وعمري بالدعش يعني احدعشر سنه مابعد وصلت للطعش ويوم تعيدناا قالوا اهلنا بنروح للدمام بالقطار عاد وش ذاك القطار الافغاني وعربيته اسرع منه وهو يدفها ومحملها ببلك وكان من زين الطبع ياقف ست مرات في كل محطه الرياض هيت الخرج يبرين التضحيه حرض الهفوف بقيق الدمام وكل وقفه ياخذ ساعات ولامر على قلبان يوقف يبرد ويعبون اديتره ماء ويشيكون على كفراته كانها ناقصه هواء وبعدين قطار منول ماله كنداسات صوته اوهي محوله داخل القطار على الركاب صجه ولجه
وماتاصل الا وراسك منفغي وتحس قلبك بحلقك ورجلينك متعكفات وفطور وغداء وعشاء بسكوت ابوميزان المهم ركبنا القطار علينا ثياب العيد المهم تحرك القطار يمكن سرعته ثلاثه كيلو بالساعه وحنا داخل المحطه مابعد طلع منها
قلت لخواني اتحدون اسبق القطار على رجولي واقعد احتريه وذا مر من عندي ركبت
قالو ايه انتحداك وانا اجيك نازل من القطار ابسبقه يوم تعديت مركبتين اوثلاث الا ذاك الرجال شايفني يوم انزل من القطار وهو يصفقني بكف ويقول عجل اركب ياحيوا؟؟؟؟
وانا اجيك معود اخواني مع الشبابيك يناظرون فيني ويضحكون من الكف وانا يصير وجهي احمر من الفشيله الرجال راح يمشي قدام وانا اطلع راسي من الشباك صاد فيه عن اخواني يوم بدا القطار يتحرك زين يعني بدا يسرع الا واشوف الرجال اللي عطاني كف وانا اشيل عليه اكرمك الله النعله حقت العيد جديده وانا اطلع مع الشباك نصف جسمي ولا الرجال قريب من القطار ومعطيني صابره زين وانا الخه بالنعله وتطيح النعله بالارض واطمر وغير مكاني وقعد اضحك عليه وانا خايف اخاف يتعطل القطار قبل مايتحرك او يوقفونه بس مع الخوف مستانس الرجال قام يحكك صابره وانا ابتسامتي عند اذاني
المهم وصلنا الدمام ونزلنا من القطار وانا اعرج ماعلي الا وحد وصلنا بيت اقرابي
وانا ماعلي الا وحده
ويوم وصلنا البيت الا واخواني علموا الولده الله يرحمها ان حذفت النعله على رجال بالقطار
ورحنا وخليناها وهي تمسكنس وخذ ياضرب ودبج وتقبيص واخواني يضحكون علي والوالده تقول انت تبي تفشلنا يقولون ولدهم جاي بدون نعول وانا خذ من الفشيله قدام عيالهم تضربني امي وزعلت وحمقت واخواني ضحك
وانا ادور على نعول الوالده الجديد ه ومحد شافني وانا اخذ وحده وسطحها على بيت الجيران لاحس ولا خبر يوم جينا نطلع للبحر وتدور الوالده على نعولها ولا تحصل الا وحده قلبوا البيت كله وماحصلوها وضطرت تدخل للسوق تشريلها وتشتريلي
وانا ماغير اتبسم مبسوط كل اللي في خاطري طلعته من صفقة الرجال الى ضرب الوالده وبيومين لبست نعال جدد
انتهت السالفه
وقبل الختام سبحانك اللهم وبحمدك لا اله الا انت استغفرك اللهم واتوب اليك
ارجوا ان اكون وفقت في سردها واخراجها لكم
حفظكم الله
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
راعي العجراء والسيكل	محروم.كوم	منتدى أخبار المواقع والمنتديات العربية والأجنبية	0	05-25-2012 02:30 PM
راعي العجراء والمطازيز	محروم.كوم	منتدى أخبار المواقع والمنتديات العربية والأجنبية	0	04-24-2012 12:20 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM