راعي العجراء والمطازيز

محروم.كوم · #1 04-24-2012, 12:20 PM

السلام عليكم ورحمة الله وبركاته

اليكم هذه السالفه القديمه
واعتقد من 40 سنه اقل او اكثر مدري
الدخول في السالفه
كنا عزاب نسكن في بيت طين صغير ايجار كبر كبريت ابو نسر من صغره فيه مجلس 3*2 فيه مروحه بالسقف شارطين على راعي البيت يركب لنا مروحه وغرفه رئسيه مساحتها 2.5 *2 متر ومطبخ وبطن البيت 4*2 كذلك غرفه صغيره ودورتين مياه الله يكرمكم

ماغيرانا وزميلي ونفكر نؤجر وحده من الغرف حتى تخف عنا عب الا يجار بس نبي عزوبي
ينسفط وربعه شويين حتى مايضايقنا ونبي نصير بعد معازيب من رجال الاعمال اللي يملكون البيوت ويؤجرونها
المهم في ذاك اليوم عزمنا لنا ضيوف جايين من الديره عددهم ثلاثه وعزمناهم على الغداء ولزمنا عليهم قالوا خلاص لاصار عقب صلاة الضهر جيناكم
قلت لرفيقي وش تبينا نغديهم قال مدري قلت انت معك دراهم قال ابشر بعزك معي قلت كفو

كم هي قال 6ريال قلت زين تفرجت انا بعد معي سبعه ريال وخابر ريال بالغرفه حاطه في سلك اللمبه عاد من اول التمديدات خارجيه وهالريال ماطلع فيه حاطه احتياط وقت الزنقه
للخبز والفول حتى لو هو وقت الغداء نشتري خبز وفول
المهم ونجمع اللي معنا قال وش تبي تسوي قلت ابشتري كيلو لحمة حاشي وقرعه ونسوي مرقوق او مطازيز قال طيب منه اللي بيرق لنا او يطزز لنا قلت انت قال ماعرف
قلت انا وياك علمن وعلمك وتراه مايبي له شي ولازم انتعلم بنبتل مانعرف شي
لا ويقول ابعرس وشلون تعرس وانت ماتعرف تسوي مرقوق او مطازيز من يبيك انت وكشرك
قال يالله اجل نروح ونشتري قرعه والحمة حاشي وكيلو طحين وطماط والملح والماء عندنا متوفر يالله لاتغيره من نعمه
المهم شرينا اغراضنا ورجعنا للبيت وجاب خوي قدر وفحج عنده وقام يسوي الطحين
(يعجن)ويطزز وانا اقطع الطماط والقرعه وفوح الماء واغسل بعض الصحون كلها صحنين وصغار على قدنا انا وخوي وملعقه وسكين لاوتذكرت باديه عندنا مثل الصفريه ولاهيب صفريه مهجنه ولاهيب لنا حقت واحد من ربعنا كل يوم امه تنشده عنها ولاجانا نساها وطلع وخلاها وعبيت الزير ماء من البزبوز خدمات خمس نجوم
المهم رحت ونضفت المجلس بمكنسه خوص تشتغل على الكهرب خط 220 ولا كسرتها

صارت خط 15 وانا ارجع لخويي قلت وين تبينا نمشيهم لاتغدينا قال نروح بهم للبطحاء والثميري ومن هالقبيل قال بس البطحاء بعيده علينا يبيلنا ساعه وحنا نمشي طبعا على رجولنا وحنا ساكنين عند دوارأم سليم الله يصلح ضناها ويخليه لام ترجيه
قات بكر بغداك حتى يمدينا نروح نتمشى قال ابشر
اذن الضهر وصلينا شوي يوم جونا الضيوف وانا اقهويهم واسولف معهم وشلون فلان وشلون الديره وتخبر وماتخبر يوم حنا وكنا ويوم تفقلقن بالحصاة
المهم خويي جاء وسلم ورحب بالربع وهو يعرفهم كلهم من نفس الديره واخذ فنجال ورجع لقدره مره يفتش الغطاء ومره يعبي الدافور هواء

ومره يذوق الملح ويحس انه خانس ويزيد الملح ومره يذوقه ويقول مالح ويزود الماء وعلى هالحال
تمت الساع ثنتين والغداء ماخلص ياولد وين الغداء شوي ويخلص الشوي ويجينا شوي ثاني المهم يوم تمت ثلاث الا شوي يوم ناداني قال الغداء خالص بس وش نحطه فيه الصحون صغيرات قلت حطه بالصفريه بس عجل علينا قال بالفريه والله ان يقعد ساعه مابرد وحنا قيض قلت يابن الحلال انت حطه وان شاءالله يبرد مع المروحه
المهم جاب المطازيز وقلطوا الضيوف ويوم مدينا يدينا ولاه حار احر من يوم انه على الدافور وحنا نرفع يدينا عنه نحتريه يبرد صلاة العصر قربت والغداء مابرد ونبي نطلع نتمشى بالبطحاء
قال اخويي ابا ارفع على المروحه كوده يبرد قلت المرواحه بعيده الله يهديه راعي البيت حاطه بالخضيرا قال مايخالف ابا ارفع المطازيز فوق راسي حتى يقرب للمروحه
وان شاءلله يبي يبرد
اخذ المرقوق وحط فوق راسه والكن المروحه بعيده قال واحد من الضيوف اطلع فوق المركات حتى تقرب قال عزالله انك جبته وهو يقرب له المركى وهو يطلع عليها لعل المركات زلت عن رجله وهو يبي يتمالك نفسه وهو يصب المرقوق فوق ضهره
ويدخل بعض المطازيز بين رقبته والثوب وعلى ضهره وهو يجيك يطامر بالبيت من الحراره
وحنا نمسكه ونفسخ ثوبه وفنيلته ونكب عليه ماء من الزير يوم صار ضهره احمر وبعض الاماكن فيه دواوير المطازيز تقول جرة كفر ابو لبنه بنفود ممطور والسواق عليمي وحنا نسدحه تحت المروحه ونبدا نهف عليه في براطمنا
المهم وتصير ضحكه لنا والاوجاع على رفيقنا والغداء مامن غدا الا لحيمات الحاشي
كل واحد اخذله قطيعه ان وجدت
انتهت السالفه وارجوا ان اكون وفقت في اختياري لهذه السالفه
وقبل الختام سبحانك اللهم وبحمدك لا اله الا انت استغفرك اللهم واتوب اليك
دمتم بخير
مع تحيات
اخيكم
راعي العجراء يونايتد ابو جلنبو

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
احد يطمنا عن راعي العجراء	محروم.كوم	منتدى أخبار المواقع والمنتديات العربية والأجنبية	0	01-11-2012 10:10 AM
راعي العجراء والخروف	محروم.كوم	منتدى أخبار المواقع والمنتديات العربية والأجنبية	0	11-17-2011 03:30 PM
عرس راعي العجراء	محروم.كوم	منتدى أخبار المواقع والمنتديات العربية والأجنبية	0	09-26-2011 02:30 PM
من سواليف راعي راعي العجراء (ثوب العيد والخياط الباسكتاني )	محروم.كوم	منتدى أخبار المواقع والمنتديات العربية والأجنبية	0	09-16-2011 02:10 PM
من سواليف راعي العجراء (عزيمة القعوس لراعي العجراء )	محروم.كوم	منتدى أخبار المواقع والمنتديات العربية والأجنبية	0	09-10-2011 01:40 PM