سالفه سحاب نجد-راعي شقراء- ايام الطفوله وبيوت الطين

محروم.كوم · #1 08-22-2012, 08:30 AM

السلام عليكم ورحمه الله وبركاته
هذي يالغالين سالفه حاصله لي ونا صغير مرررره
طبعن ذالسالفه ايام بيوت الطين من عشرات السنين
ونا كاتبها بالهجه الشقراويه

اذكر يومني صغييير جت حرمه عجوز الله يغفرلها واميمتي وابوي واخيي قالت لأمي جعلهم في

الجنه قالت ابونا رايح للرياض وانا لحيلتي في الدار يعني في البيت وابي وليدك يجي عندي وانا

استاحش في الدار لحالي وهذا الكلام حول اذان المغرب قالت لها امي ورا ماتنامين عندنا
قالت والله ما نيب مخليه داري لو اخليها ويدري ابونا والله ان يشنع بي
حاولت امي معها تقعد عندنا وابت يعني عييت وعنتر زمانه قاعد على حصير خوص ويسمع الحوار اللي هو انا .. امحق!!
قالت امي لي تروح مع فلانه تجسرها ابوهم رايح للرياض وانا امك ولاهيب جاسره تجلس لحالها
وتبدأ الهموم عندي تشتغل قلت ايه اروح
ونروح انا والعجوز وهي ماسكه يدي ياملا الجنه البارده وقد غابت الشمس وحان موعد النوم وكنا ايام صيف يعني حر وندخل بيتهم بيت طين كبييير وبعذرها لو ما تجسر
المهم انا قد تعشيت من عقب العصر لان الناس عشاهم مسيان يعني عقب العصر
المهم ونرقا في الطايه او السطح حق بيتهم وتفرش لي فراش وهي فراش ونرقا معنا بغضاره اوسحله فيها ماء وتغطيها بشيله وترفعها على جدار صغير ما يجي نص متر حق الباحه او الفتحه الي بين الطايه والمجبب نسميها الباحه وتحطها فوق الجدار وانا نايم تحت الغضاره او السحله علشان اذا عطشت يعني ظميت الها قريبه
وننام وهي جعلها في عليين تشاخر تقول ناس يشذبون خشبه ههههههههه
قبل لا ننام قامت تسبحن علي سبحونه النباقات سبع بنيات ويوم انتصفت سكتت

واقول لها وش بعد قالت يوم السلطان لقا نعامته قلت وشذا مهيب هذي السبحونه قالت لي انت

ورا ما ترقد قلت كملي النباقات وارقد وابيك تعلميني بعد عن نعامه السلطان الا قضينا من النباقات هههههههههههه
قالت لي رح لمك عاد مهنا الا النباقات وبس هههههههه
وهي مهنا حشا ينطح

يعني حرمة حاره الضعيفه وداخلها النوم وانا جازت لي السباحين وقامت تعربد علي بالسباحين مرة

قعدوا ياكلون مدري منهم ومرة لحقهم الذيب وذي بعد مدري وشي وانا ملبد واذا سكتت هزيتها

يعني كملي وتصوق علي قالت ترا ان ما رقدتا تراي ابا اعلم امك عليك ارقد ياوليدي والا اصبحنا ابااعطيك قريض وحلاو موزيته عقب العيد وقلت طيب خفت تضيع الصفقه يعني العطيه واسكت

واناااام
يوم نمنا ويجن قطاوه يتلاحقن وحنا نايمين
الناس منول ما يرفعون صوتهم كل نايم في

سطحه تسمع وصوصة الجيران يعني نسمع الجيران يتكلمون بشويش يازين منول وحياه منول

المهم ويجن القطاوه طردي وراء بعض تقوله العجوز لي انا ماشفتهن ويخبطن السحله اللي فيها

الماء وتنكب علي وانا نايم ههههههههههه وهي جاها شوي بس انا اكثر وانا انقز مدري وين انا فيه

هههههههههههه الله لا يلومني وتنقز العجوز معي وتخمني وتسمي علي ياملا الجنه وانا لساني

يلوط اذاني باقوى صوت اصيح بغيت انهبل وامتلن ثيابي اصلا مافيه الاثوب وش ثيابي هههههههه

والا ام الجيران من وراء الجدار حق السطح تقول فلانه فلانه تعاني العجوز عسى ما فيك شي وردت

عليها وقالت ابد جن قطاوتن يتطاردن وكبن السحله اللي فيها الماء علي وعلى الوليد
قالت الجاره وشو وليده ماشاء الله جاك عيال
قالت لا هذيا وليد فلانه جايبته يجسرني
ابونا رايح للرياض جعله للريح ههههههههههه
وانا سبحت بالماء وشلون ارقد واحول انا واياها وماتجسر تحول لحالها يا ملا الجنه

وتجيب لي ثوب من ثياب رجلها ونرقا ثانيه وتفصخ ثوبي وتلبسني ثوب رجلها قالت اذا جاء الصبح

ان شالله الاه يابس وطلعت كني من جزيره الاقزام ثوب عودها اسحبه مترين وراي هههههههه
مااعرف امشي فيه
وتنشر ثوبي على الجدار ونصبح وتفطرني قوط ترا منول في شقرا ء يسمون الطماط قوط يازين ذيك المرقه مرقه طماط ونغط بقرصان يازين ذاك الفطور ماني ناسيه ابد

قايمين مع العصافير رغم الاحداث المرعبه في الليل ويوم جاء مسيان يعني عقب العصر وتجي

ياملا الجنه تاخذني ماجاء رجلها واروح معها جازت لي السباحين والفطور وهي كلها نومه ههههههه

المهم رحت معها هذي الليله الثانيه ونرقا ونرقد وهالمره ابعدت الغضاره عنا
المهم قامت تسبحن علي هذا شرط مافيه نقاش وتقول لي سبحونه الغنمة اللي راحت تشتغل وخلت عيالها في البيت لحالهم وجاهم السعلو وكلهم
المهم نامت وانا مانمت اناظر في السماء
المهم ياملا الجنه وتطلع صوت من تحت ههههههههههه وانا وجه ابن فهره مستحي واغشا عليها من الضحك وتصحي
حست فيه شي غلط هههههههه
قالت اسم الله عليك ياوليدي عسا منتاب تحلم قلت لا ما احلم انتي طقعتي هههههههههههه
قالت هها بس مهوب انا اللي اسويها هذا انت اللي مسويها ههههههههه

واقعد احلف لها انه مهوب انا انها هي اللي مسويتها وتصر علي انه انا واقعد اصيح هههههههههه

قالت والله انك عليله الله مار يعظم اجر اميمك فيك خلاص مهوب انت واسكت وانوم
ويوم جاء الصبح وتفطرني ياملا الجنه مرقه طماط وقرصان مثل امس ويوم جيت اروح ملت المخابي حقتي قريض وحلاو وبسكوت ابوميزان وقالت لي وش انت موحي البارح يومك تضحك قلت انتي طاقعه هههههههههه
وهذا السؤال بعد ما ملت المخابي قريض قالت عسا منتاب اذا رحت لامك تبي تعلمها
قلت ايه
قالت تكفا ياوليدي اسكت وتعال باكر وبعطيك حلاو وقريض وبسكوت
بس ترا ان علمتها ماوالله تلهطهن يعني ما والله اعطيك شي
واتفقنا وصدقوني هذي اول مره افشي بالسر

علشانكم ماتدرون منهي ههههههه
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سحاب نجد - راعي شقراء - وسالفه راعي الكحه ولسان الثور	محروم.كوم	منتدى أخبار المواقع والمنتديات العربية والأجنبية	0	08-10-2012 03:50 PM
سالفه الكلب البوليسي و سحاب نجد - راعي شقراء	محروم.كوم	منتدى أخبار المواقع والمنتديات العربية والأجنبية	0	08-10-2012 05:50 AM
سالفه الخيمه والبر وسحاب نجد - راعي شقراء	محروم.كوم	منتدى أخبار المواقع والمنتديات العربية والأجنبية	0	08-10-2012 04:50 AM
قصه حاصله ل سحاب نجد راعي شقراء	محروم.كوم	منتدى أخبار المواقع والمنتديات العربية والأجنبية	0	08-02-2012 03:50 AM
سحاب نجد راعي شقراء جاكم ظيف	محروم.كوم	منتدى أخبار المواقع والمنتديات العربية والأجنبية	0	08-01-2012 08:50 PM