العيّار والعقرب ... ( ابو الشبرميات )

محروم.كوم · #1 07-18-2012, 04:10 AM

بسم الله الرحمن الرحيم
الاخوة المشرفين والاعضاء والزوار الكرام
السلام عليكم ورحمة الله وبركاته

اليوم وحنا قاعدين عند ابل واحد من الربع معنا واحد عيّار سمه ابو علي
شوي الا وذيك العقرب تمر من بيننا
وينتبه لها واحد منا المهم ويخبطها بذيك العصى والاه ذابحها
قال العيار : ليتك ما طقيتها يا فلان
كان اخذها لربعي ابلعب عليهم بها
قلنا : وشولون
قال : اجيب مقص الاظافر واقطع الشوكة
واحطها في علبة كبريت واوزيها في مخباتي
واذا دخلت على ربعي اطلعها واخليها تمشي على جسمي
واخليهم يرتاعون منها
قلنا له : وش الفايدة ؟؟؟
قال : اسمعوا ذا السالفة
قبل كم سنة اخذت لي عقرب ويوم جيت ربعي وانا اللي اطلعها واخليها تمشي على كتفي
قال واحد من الشيبان : يابو علي انتبه للعقرب لاتقرصك
يقول : وانا اللي اخذها واحطها في راحة يدي واقّلبها يمين يسار
ثمن ادخلها في العلبة واحطها في مخباتي
وهم اللي يتعجبون مني ويفقون خششهم من الفهاوة
قالوا : وشلون ما تقرصك ؟؟؟
قال : انا قاري عليها قرّاية العقرب
قالوا : وش هي قرّاية العقرب ؟؟؟ علمناها تكفى
قال : بسيطة مرة اسمعوا ...
وانا اللي اعطيهم خرابيط وطلاسم وكلمات غير مفهومة
واكررها عليهم كم مرة
قالوا : خلاص حفظناها الله يعافيك
المهم يوم جاء بعد يومين وانا اللي امرهم واسولف معهم
وانشدهم عن واحدٍ منهم غائب وكان متحمس يوم قرايّة العقرب
قالوا البارح جتنا عقرب صفراء وبطنها اسود كبر كف اليد
وهو يقوم ويلقطها بيده ويبدى يهربد عليها ويقرا عليها قرايّتك
وهي اللي تقرصه ,,,
شوي والا هو منبطح بيننا ومغير يون ويطن
وحنا اللي نقوم ونشيله للمستشفى
وهو يقول : تراها ماقرصتني انا قاري عليها قرّاية ابو علي
قلنا له : اسكت يارجال وفر الباقي من النشاط للابر في المستشفى والرد على الدكاترة بمعلوماتك
المهم يوم جبناه المستشفى والا يده وارمة
ويبدون ياخذون الضغط والحرارة ويغززونه بالابر والمغذي
وينومونه 3 ايام عندهم
وانا اللي امره واساله عن حاله
قال : يابو علي قريت قرّايتك ولافادتني

قلت له : وش انت قايل ؟؟؟
علمني عنها ؟؟؟
يقول : وهو اللي يبدا يهربد ويخربط بكلام ما ينعرف
قلت له : غلط عليك يارجال هذي قرايّة الحية ( الثعبان )
العقرب غيرها
تبيني اعلمكيها ؟؟؟
قال : لا فكنا هالمرة سلمنا
يمكن الثانية القرصة والقبر .

وسلامتكم
...
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
بكرة وضحى للبيع ( ابو الشبرميات )	محروم.كوم	منتدى أخبار المواقع والمنتديات العربية والأجنبية	0	07-11-2012 03:30 PM
الحمالين والصوم ... ( ابو الشبرميات )	محروم.كوم	منتدى أخبار المواقع والمنتديات العربية والأجنبية	0	07-10-2012 04:30 PM
مجاراة النبهاني في عرسه ( ابو الشبرميات )	محروم.كوم	منتدى أخبار المواقع والمنتديات العربية والأجنبية	0	07-02-2012 02:40 PM
حزام الأمان ... ابو الشبرميات	محروم.كوم	منتدى أخبار المواقع والمنتديات العربية والأجنبية	0	06-24-2012 03:10 PM
من قصص الآباء والأجداد رحمهم الله ( ابو الشبرميات )	محروم.كوم	منتدى أخبار المواقع والمنتديات العربية والأجنبية	0	06-05-2012 01:10 PM