الكبد من فوق المليله كمدها=والعين تذرف من غطاها رشاريش
والنفس لشافت تزايد نكدها=تسكب على بعض النواظر غوابيش
الروح تطغى لختلف معتقدها=تصير مثل اللي بغوه الدراويش
الام ممدوده وثاوي جسدها=ضالوا عليها ناس صيدن مهاتيش
اشرف عليها مستشرن عصدها=ذكاها الامعط بالكفوف النواهيش
من واحدن يمناه صلفن هددها=ما يترك من الصيد غير العراميش
مطروحتن يبكي عليها ولدها=يفز مرعوبن سواة المرابيش
يبي الخلاص وماسكه من طردها=ما يفلته يا كود عند التفاتيش

الدنيا صفحاتن كثيرن عددها=خله على ساسك جميلة نقاريش
يا سامعي بيض الليالي ومددها=ازل نكايدها بروس النواقيش
كم واحدن سود الفعايل مهدها=وابعد عن حماها زمانن من الطيش
يالله عسى غيمه سريعن نودها=تمطر علينا من غزير المراهيش
تومر على كل الشعاب وبلدها=والسيل يبعد كل غث وقشاويش
على العوالي تنثر اقصى بردها=في كل حاجر يصفق السيل ويطيش
مع تالي الذرعان يكثر زبدها=والناس فيها ناصبين الخرابيش
القيظ حل وكل عشبه رمدها=فيه النصي مع هبة الريح كالريش
دنيا كما العقرب خطيره غددها=نروح بارحاها وهي لغيرنا اتعيش