فزعتكم تكفون .. مشكلة تقطيع في سيارتي - فكتوريا 2007

محروم.كوم · #1 07-15-2012, 04:00 AM

اخوتي الكرام
سيارتي - فكتوريا 2007
ماشيه بالكيل متر 84.000 فقط
عندي مشكلة وهي التقطيع الغير مستمر
يعني كل 4 ايام تقريبا يجي مره وويروح
والتقطيع عباره تقطيعات صغيرات ماهو شي يعني يخليك تهتز وان تسوق او يخليك لازم توقف يعني تقول كن السياره تنخنق وترجع
عادي السيارة تمشي بس فيه تقطيع

المهم غيرت البواجي وصفاية البنزين
وبعد اسبوع رجعت نفس المشكلة

رحت لورشة الدمشقية اللي بشارع الجمعية بالصناعية القديمة بالرياض
وقالي مافيه تقطيع الحين قلت ايه هو يروح ويجي
وقالي لازم فحص كمبيوتر ونشوف

وفحص كمبيوتر وماطلع شي وضغط المكينه 100% وزي الفل ماشاء الله
وقال اركب مشينا نجربها وحنا نمشي
ومشينا والكمبيوتر مشغل فيه مسار الكويلات والكهرباء بالسسياره وكان ممشانا بسرعه 60 تقريبا
وماطلع شي
المهم ويروح على شارع سريع ويعطيه الدعسه الثانية اسرع شي ويبين معاه الكويل السابع والاول قال يبي لهم تغيير شوف مسارهم يوه اسرعنا بالسياره صار راس مثلثق على تحت

ونرجع للورشة واغير الكويلين 7 و1
وقلت سوو لي تصفيه مكينه
ابي ارتاح
قالي ننظف لك البخاخات وحساس الدعسه والحساسات كلها ب 350 ريال اتوقع
قلت مافي مشكلة

المهم الكلام هذا له اسبوع
اليوم انا توي جاي من سفر بعد مامشيت 300 كيلو ووقفت بمحطه اعبي بنزين
وبعدها مشيت حوالي60 كيلو رجع التقطيع نفسه
يالييييييييييل
المهم وقفت وطفيت السياره وشغلتها الا وامبير ضغط الهواء مو ثابت على طبيعته الاوله يرتفع وينزل وفيه صوت طقطقه اسمعها بالكبوت تقريبا حول جهة الخاخات وةالكويلات وهناك يم حساس الدعسه واشوف حتى الخاخات تتحرك بالحركه الغير طبيعية

المهم لت خلني ابرمج المةتر لاني كنت فاصل البطاريه قبل يومين يمكن
واوقف واسوي نفس الطريقه الي ذكرها احد الاخوة (الأماكن) اللي بالرابط التالي
انتبه..! إذا فصلت البطارية لازم تبرمج السيارة....

واسويها والمتر كان يقطع وبعدها صار معدل استهلاك الوقود 11.5 وامشي وشوي ينزل الى 10.9 ومره 11.4

للمعلوميه البنزين 95

المهم قبل لا اسافر كان المعدل 13 لتر لكل 100 كيلو

للمعلوميه البنزين 95

ياجماعه الخير افيديوني وش سبب هالتقطيع ؟؟؟؟؟؟؟
والله فكرت ابيع السياره جننتني
وهل علي خوف سافرت لاني الحين برا الرياض وتوني واصل من السفر
ولا ارتحت وقلت قبل انام لازم اكتب موضوع عن المشكلة

++++++++
بعد اول يوم من المشكلة
++++++++
ذكر لي احد الاخوة وقال: تأكد من صلاحية البطارية وقوة شحن الدينمو لان اذا حصل ضعف في الشحن فان مضخة الوقود والبخاخات سوف لن يصل اليهما جهد كهربائي كافي وبالتالي سوف تتأثر المضخة والبخاخات ,
لأني من اليوم الصباح طفيت السياره لمدة يمكن 10 ساعات وماشلغتها الا بعد العشاء
المهم اول ماشغلت ونفس المشكلة امبير الضغط يطلع وينزل ومحرك السياره غير مستقره واشوف معدل استهلاك الوقود والفاه 10.9 لتر لكل 100 كيلو
والاهم من ذلك والجديد اني اشوف المبه الداخليه الي بالسقف نورها يضعف وترجع لوضعه الطبيعي يمكن 15 مره يعني غيؤ مستقره على تيار ثايت !!!
وافتح الكبوت واراقب البكرات الي عليها السير والقا وحده منهم الي هي البكره اللي تحت بكرة الدينمو تضعف وترجع لسرعتها الطبيعيه وتضعف وترجع لسرعتها الطبيعية علما توني مغير السير من اسبوع

وانوار السياره الأماميه شغلتها ولكنها ثابتها ونورها طبيعي ماضعف ولا شي بس الضعف في لمبه السقف الداخليه بالسياره

وبعد 5 دقايق ثبت امبير الضغط وارجع اشوف معدل استهلاك الوقود والقاه ارتفع الى 12.5
والموتر ماعاد قطع ولا شي ورجع لوضعه الطبيعي والبكره اللي قلت كذكل وضعها طبيعي
وبعد مامشيت بحوالي مسافة ربع ساه ارتفع الى 13

؟؟؟؟ افيدووووني مشكورين

++++++++
بعد ثاني يوم من المشكلة
++++++++

الديره اللي انا فيها مافيها الا ورشة وحدة الي عندهم فحص كمبيوتر
المهم رحت لهم اليوم الصباح وفحص الفلبيني وقالي الكميوتر يقول تحتاج صيانه واصلاح منظم الدعسه TPS
Throttle Position Senson

وقالي ماعرف اسوي الا اني انضفه
قلت نظفة علماً بأني توني منظفة قبل اسبوع
المهم فك الوصلة اللي بين منظم الدعسه وبين فلتر الهواء
وفك منظم الدعسه وراح بخ عليه بخاخ منظف وطلع سواد اتوقع كربون

وراح بعد في الماصورة الموصلة لداخل الماكينة وفيها سواد كثير بعد وبخ عليها ونظفها بفانيله معه
وغيرت فلتر الهواء بعد

المهم ركبها واشغل واروح للبيت واطفي السياره واشغلها بعد 5 ساعات يمكن وبفس المشكلة رجعت تقطيع بالماكينه ونور السقف الي داخل الغماره يضغف ويرجع لوضعه الطبيعي

الغربية اني والسياره واقفه وتشتغل والقير على P بس الف الطارة يمين ولا يسار لو حاجه بسيطه مباشرة تطفي السياره !!!

قلت بكره اخر محالوه لو ماليت احد بالديره الي انا فيها يعرف يطلع المشكلة ولا شحنتها بسطحه للرياض 600 كيلو وش اسوي
والسحطات يقولون 700 ريال ننقلها ....

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
شباب ابغا فزعتكم في مشكلت الجير في سيارتي	محروم.كوم	منتدى أخبار المواقع والمنتديات العربية والأجنبية	0	07-14-2012 11:00 PM
:: عندي مشكلة تقطيع في السيارة شيروكي كوماندر 2007 ::	محروم.كوم	منتدى أخبار المواقع والمنتديات العربية والأجنبية	0	06-11-2012 07:20 PM
تكفون ياشباب فزعتكم سيارتي انسرقت	محروم.كوم	منتدى أخبار المواقع والمنتديات العربية والأجنبية	0	04-16-2012 02:40 PM
تكفون ياشباب فزعتكم سيارتي مسروقه	محروم.كوم	منتدى أخبار المواقع والمنتديات العربية والأجنبية	0	04-14-2012 12:20 PM
ابي فزعتكم يالاخوان .. سيارتي فيها مشكلة ,,,	محروم.كوم	منتدى أخبار المواقع والمنتديات العربية والأجنبية	0	11-10-2011 02:10 PM