رّوآيه " هآيـم فيّ بحـر آلشّوق وُ لذة هيآمك " - الصفحة 49

روحي مشتاقه · 07-18-2012, 08:00 PM

مشكوووره خيتووو ع هذي الرواااايه الروعه

و تسسسلم ايدينجج

يحرااام مهووور كاااسره خاااطري واايد بسس يستااهل سيف من الي بيه من مهوور

سيف يقهرني واايد ياااخي ماا داامني انا مابي بنت خااالي مااا بروووح اخذهاا غصبن عني حتىى لو ابوي قالي خذهاا بعارض بسوي اي شيئ بسس ما اخذ الي ما احبهاا

وليد انشاء الله تكوون مهوور من نصيبه

ميره تقهرني واايد

اليد احسس كل مشاااكل العااايله عنده واايد حبووب

اليده ماالت عليهاا عيووز لاازم تتحرطمم خخخ

عميمه يااخي حسي شوي ف مهوور احسس ان ماا فيهاا قلب ابدااا مااداامج انتي مطلقه يووم عرفتي ان ريلج معرس عليج طلبتي الطلااق ليششش تلووومين مهره

بو حمد ماالت عليكك يااخي ليششش ماا تحب مهوور حتى لوو صايره مشكال بينك و بين ابوهاا هي شو ذنبهاا تتعذب

تقبلي مرووري اخويتج. •• روحي مشتاقه ••

وو ف انتظااار الباارت

* __DEFINE_LIKE_SHARE__

طيبتي عذبتني · 07-19-2012, 10:33 AM

مأآ شـــأء الله عليـج ضحــووووي أآبـــداآع

تخلين القرآآء يتعمقون ويعيشووون الأجوووأء وهذا احلى شي
تسلميــن وأنتظـأآرج ., __DEFINE_LIKE_SHARE__

«ضَحِيًة حِبُيًبُيً ..}● · 07-19-2012, 05:48 PM

.

.

.

البارت الـ 12

الساعه تشير للـ 8 ونص المساء . . صلينا فروضنا فالدرب واتريينا فالمسيد لين صلاه العشاه وعقبها ييينا المرسى . . كانو الناس قلايل مما خلاني ارتاح شوي . . كنت وايد مفتشله وانا امشي عداله وين ما يروح . . بالذاات لما رحنا عشان نحجز سياكل والبنات كانو يطالعون وليد ويبتسمون ويسوون له حركات وعقب وحده قالت لربيعتها ( اييه . . حرمته وياه ) حسيت اني متوتره بشكل ما ينوصف . .

خذنا السياكل . . ورفعت العباه شوي عشان ماتشتبك ويا السيكل واتخرطف . .

وليد : يالله خلصيييييييينا . . بروح عنج ترى . .

انا حركت السيكل : يالله . .

تمينا نتمشى بالسياكل والهوا يضرب ع ويهنا . . خاطري اعرف شو كانت اعذارك يا سيف . . شو كنت بتقولي ؟ شو الحال بيني وبينك الحين بيكون . . . لين وين بنوصل اكثر . . انا شو الي لازم اسويه . . اتنازل عن حب 21 سنه بهالسهوله . . انزين هو ليش ما يفكر بهالتفكير . .؟ ليش ما يفكر ان حب 21 سنه حرام يروح ويسوي عشاني كل شي صعب . .

وليد : شاركيني افكارج عن سيف . .

انا اطالعه : شدراك اني افكر فـ سيف

وليد : لان سبحان الله يوم تفكرين فيه تتلاشى ابتسامتج وتتغير ملامحج الحلوه لملامح حزينه بشعه

انا ابتسمت : سخيف

وليد : والله . . .

انا : . .

وليد : قوليلي الي تفكرين فيه

انا زيدت سرعه السيكل عسب اسبقه واتجنب اني اكلمه لكنه لحقني وجابلني عشان اوقف . . كن بتخرررررررطف وبدعمه .!!!!!!!!!!! لكن الله ستر ع اخر لحظه تداركت الوضع . .

انا : تستهبل

وليد يطالعني : لانج ماتردين علي يوم اكلمج . .

اانا اطالعه : شـ اقول ؟ ماعرف اتكلم

وليد : انا ماقلتلج اتكلمي . .قلتلج قوليلي الي في بالج الي تفكرين فيه

انا اتنهد . .

وليد : اسمعج . .

انا : مستغربه . . ابا اعرف ليش سيف ما حارب عشاني . . ما سوا المستحيل عشاني

وليد : قصدج ما حارب عمي حمد

انا اطالعه : وليد لا تتحراني من النوع الي اباه يجحد على ابوه ويعصيه لا ابد . .

وليد : عارف

انا : انا كنت اباه يحاول . . يسعى . . ما ييئس ابد . . سيف كان يرمس ابوه مره فالشهر . . مرتين فالشهر لو انا حنيت عليه . . ماكان يحن على راسه كل يوم كل يوم كل يوم . . ماكان يحارب ويقول انا لو ما خذتها ما باخذ غييرها . .انا ماقلت انه لازم يعصي عمي ويصارخ عليه ويتحداه . . لا والله ابد ها اخر شي انا اباه وعمري ما حرضت سيف على عمي . . دومني اقوله كلمه بالهداوه . . اقنعه . . سيف ضيع سنين من عمري لانه يجنب يكلم عمي . . لو استغل هالسنين وهو يحن ع عمي كل يووووم جان انا وهو متزوجين من زماااااااان . .لكنه ما كان يسوي شي . . دومني انا الي اسوي . . دومني انا الي احارب واوقف ف ويه الكل لين سموني وقحه ومافيج ادب وابوج ما رباج . . انزين انا قاعده اسوي الي الريال ما رام يسويه شـ سوي . . انا ماكسرت قلبه ولا وافقت على حد . . وليييد

وليد يهمس : عيونه

انا كنت مندمجه ماعاتبته ع الكلمه : انا قلبي يحترق " دمعتي تنزل " كل ربيعاتي عرسو . .والله العظيم كل ربيعاتي عرسو ما تم حد . . لا تقولي بعدج صغيره والعمر جدامج .. صح انا اعرف لكن " اطالعه عين بعين " انا جد كنت متلهفه ع زواجي منه بشكل محد يتصوره ..

وليد : وهالشي كلنا عارفينه بنت عمي . . هالشي واضح وحتى احنا الشباب عيال عمج نعرفه وتعبنا ونحن نلوم سيف ونقوله بسك البنت تتعذب بسك تحررك . . بسسسك اتزوج احنا بنعطيك ما بنقصر ! ما نصحتج من عبث بنت عمي وربي مانصحتح من عبث . . يمكن في وايد اشياء انتي ماتعرفينها ومالي حق ارمس فيها . .

انا بس اطالعه وهو يرمس وقلبي يعورني . . : تتحراني ماعرف . . انا اعرف كل الي تعرفه ترا . . بس لاني احبه اتغاضي . .

وليد يطالعني : شلي تعرفينه

انا ابتسم : صدقني اعرف . . انا اي شي يخص سيف ما يغلبني اني اعرفه . . لكن عشقي له خلاني اسكت واتغاضى واتحمل . .

وليد يطالع : تعرفين معقوله

انا : انه قبل لا يموت ابوي ويسير العمره ويهتدي كان ف تايلند ويا بنات . .

وليد مصدوم وبس يطالعني

انا : وعقب عمي حمد وعبدالله راحو يابوه وسكتو عن السالفه ومحد قال ليش سافرو وليش ردو ويا سيف مع انه مسافر قبلهم " ابتسمت " وماحاسبته ع شي ابد . . ومحد يعرف اني ادري . . حتى ميروه ماتدري اني ادري . . مع اني اعتبرها صديقه قبل لا اعتبرها بنت عم وكان المفروض تعاملني بالمثل وماتخش عني علشان تتستر على اخوها . .

وليد : شو كان سبب سكوتج . .

انا : انه اهتدى بروحه من توفى ابوي . . وتأثر بموت ابوي وتأثر وهو يدفن ابوي بتراب . . حس ان الدنيا ما تسوى شي وحس بنفسه وبروحه تااب وألتزم وتغير بعدها وايد . . " ابتسمت " والله اعرف كل شي

وليد : كيف . .

انا : انا بنفسي حرقت صور سيف الي كان متصور فيها ويالبنات . .

وليد يطالعني . .

انا : كنت رايحه بيت عمي ويا ميروه بتشل اغراض ودشيت حجرته وشفت إلي ما كنت ابا اجوفه فالسدات . . شليته وحرقته . . انا الي حرقته تعرف ليش ؟

يطالعني

انا : عشان ما يطيح من عين حد . . عشان محد غيري يمسكه ويعرف هو كيف . . ومحيت الشي من بالي لاني اموت فيه ولانه مشى صح ماعلي من الاشياء الغلط الي سواها . . بس سيف صااني . . وايد صاااني . . حسسني اني صدق حرمته بدون لايلمس صبعي . . " ابتسمت باستهزاء " لكن حسافه . . " اطالعه " هو واثق من حبي له . . يعرف اني بروح وبرجع له هو وبس وماقدر بدونه . .

وليد : علشان جي قاعد يعذبج اكثر . .

انا : خاطري اعرف هو حبني ولا ماحبني . . والله ها الي ابي اعرفه . . هل الي كان بينا حب ولا كان يقص علي وما يبا يجرح مشاعري . . ليش خلاني معلقه له ومارضى اني اتزوج . . ليش خلاني اعشقه كل يوم اكثر واكثر واكثر . .. وايد اشياء في بالي محتاجه اعرفها وليد وايد اشياء "حطيت ايدي ع قلبي " انا مجروحه وايد . . " نزلت دموعي " قسم بالله انا وايد مجروحه . . لا تتحرا انا عندي ميره وامي ويدي واقدر اقولهم هالكلام . . لا ماقدر . . امي من تشوفني بس اشكي كل الي تسويه تصيييح . .بتوقف معاي ف كل شي انا اعرف هاي وصيه ابوي لها . . لكن ماقدر اقولها كل شي لانها بتنهار . . لو فضفضت لها مره بتم طول الليل تصيح وتحاتي . . ميره صح اقرب انسانه لي واقرب صديقه وانا اعتبرها وااايد بحياتي لكنها ماتعاملني بالمثل . . انا ماكنت اخبي عليها لا صغيره ولا كبيره . . لكن ميره تحاسب ع الي بتقوله . . في اشياء بتقولها وفي اشياء لا . . ماتقولي الاشياء الي انا احتاج اني اعرفها وهالشي دوم يضايقني منها . . " ابتسمت " وميره انانية حيل . .وايد وايد انانيه انا هالشي اعرفه فيها من زمان . . بتاخذ الجانب إلي هي تبيه اكثر . . صح اني مابهون عليها لكن بعد الانانية طبع فيها . . ويدي " غمضت عيني " نظر عيني . . شايل همي والله شايل همي . . انا استحي على ويهي أني اكلف عليه اكثر من إلي هو فيه . .

وليد يبتسم : بس انتي الغاليه . . دلوعته . . حبيبته

انا : اكيد بكون دلوعته وحبيبته لاني دوم لاصقه فيه مافارجه . . ولاني وايد اغمضه واكسر خاطره . .ع رغم ما الكل يتحراني قوية من برع وحقيره ووقحه لكن هو يعرف اني من داخلي هشششه على ادنات الدون انكسر . .

وليد يبتسم . .

انا مسحت دموعي : انا ماعرف شقاعده اقول . .

وليد يطالعني : انا بعد ماعرف انتي شقلتي اصلا . . وانا نسيته وشلته من بالي . . وإلي اباه انج تشيلينه من بالج بس هالساعتين . . يوم بتردين بتفكرين بكل شي . . لكن هالساعتين لا تفكرين بأي شي . . ها إلي اباج تسوينه الحين ..

انا نزلت من السيكل : مالي خاطر اركب خلاص . .

وليد : ركبي ركبي دافع بيزات انا . . مش من جيبج علشان جي تتهاونين

انا : واي ما يسوى علي

وليد : يلا خلصيني . . " يطالع الوقت " اصلا باقيلنا ربع ساعه وبيخلص حجز السياكل . . وايد قرقرتي . . يالله لفه سريعه وبنودر السياكل مكانهم . .

ركبت وسبقته وتميت اسوق بسرعه طاااااااااااااااااايره عشان الهوا يضرب ع ويهي . . ششششششعور منعشششش وحلوو . . فجاه صديت وماجفته ورايه . . انصدمت . . وين ساار . . جان ارجع ولمحته

انا حطيت ايدي ع قلبي : ويييه . . شو استوالك . .

جفته ع الارض قاعد وكان ماسك ايده اليمنى بقوة ويتعصر من الألم

انا : وليييييد . .

ماقدرت اجوف ملامحه لانه كان منزل الكاب ع ويهه . .

انا : رمممسني خوفتني والله خوفتني لا تسوي جيه اتكككككككلم . .

وليد كان بس ماسك ايده واسمع تناهيده وعوقه . .

تقربت منه ورفعت كابه شوي شوي خفت انه متعور براسه . . ومن رفعت كابه تقرب وباسني ع خدي

انا ماحسيت بروحي إلا وانا عاطتنه كففففففففففففففففف ع ويهه

وليد مبتسم ويعض شفايفه : اخخ عورتيني . .

انا بعصبيه : مصختتتتتتتتتتتها . .

وليد قام وانا مشيت عنه وكنت معصصصصصصصصصبه جد معصبه ف مسك ايدي بقوة وخلاني اجابله

وليد : جفتي . .

انا مافهمت شو يقصد . .

وليد : كل شي فالدنيا فيه رده فعل . . انا طول اليوم تماديت معاج وانتي ساكته ماسويتي شي بس تهذربين وتعصبين .. لكن تماديت اكثر وشوفي شـ سويتي . . طراق . . هاي رده فعلج للموقف . .

انا عاقده حياتي . .

وليد يبتسم : لازم تتخذين رده فعل لحالج مع سيف . . شفتي الي صار بيني وبينج طول الوقت شو . . هذربه وتعصبين ؟ انتي جي قاعده تسوين مع سيف . . ماتتخذين رده فعل مناسبه تخلي الشخص يتأدب ويوقف عند حده . . " هد ايدي " ما يحتاي ألمسج الحين لاتحاتين . . أنا هذا إلي كنت أبا أوصل له من الصبح . . ها إلي كنت ابا افهمج اياه من زمان بس ماعرفت كيف . . اتخذت وايد طرق وماجفت نتيجه وعرفت شي واحد عنج . .

تميت اطالعه

وليد : عندج طوله بال كبييييييييييرة . . وصبوره بمعنى الكلمه . " يبتسم " ماشاء الله عليج نادر ما يتصف الواحد بطولة البال وبهالصبرر . .

بلعت ريجي . .

وليد : لا تنسين هالدرس . . خليه عبره لج وافهمي منه وايد اشياء كنت اباج تفهمينها . .والحين يالله اسحبي سيكلج خلينا نرده عشان ناخذ لنا عشا فالطريج ونرجع . . " يبتسم " يالله لا تبحلقين فيني جيه . .

ماقدرت ارد عليه . . كلامه كان قوي بالنسبه لي . . لا ما كان قوي . . بس كان صفعه ! كان شي مثل ما يقولون اني غافله عنه ومش حاسه فيه وهو نبهني .! انا متى بتخذ رده الفعل مع سيف ؟ صح . . ها الي لازم اسويه الحين . . أتخذ رده فعل . . ما افكر واتعذب واتحمل . . كل الي لازم اسويه رده فعل . . " ابتسمت "

انا : مشكور ولد عمي ع النصيحه . . وبنفس الوقت انا نص اسفه ع الصفعه . .

وليد : نص اسفه بالله كيف ؟

انا : يعني انت تستاهل لانك تماديت لكن نيتك كانت شي ثاني ف تستاهل نص الاسف

وليد يبتسم ومارد علي بس نزل الكاب ع ويهه . .!

ردينا السياكل وعقبها كملنا مشي . .

انا وقفت صوب البحر وجابلته . .

وليد : تبين تشوفين مكان احلى ؟

انا اطالعته : في احلى . .

وليد : هيه . . الصوب الثاني . . تعالي ورايه

ولحقته . .

كان في ع البحر انارات فنادق وانارات جسر . . فـ ألوان البحر طالعه غراااااااااااااااااام . . سحرر سححر سبحان اللــــــــــــــــــــــه . . شي خيااالي . .

انا اتنهدت : آآآآآآآآآه .. روووووووووووعه

وليد يصد يمين يسار ما جاف حد. . فـ صااارخ وهو يكلم البحر وحاط ايدينه الهنتين ع حلجه لانه بيهتف بصوت عالي : يا بححححححححححححر . . اشششهد . . انا اليوم ياي ويا مهوووووور وهي بنتتتتتتت عمممممممممي . . في يوم من الاييييييييييااااااام . . في يووووووووم فيييي يووووووووم . . ااذا الله كتب فيييييييييييه الخيييييييييير . . بي وياااااااااها لكن بتكووووووون حرررررررمتي مش بنت عممممممممي . .

ابتسمت . .

سويت نفس حركته . . وصرخت : يا بحححححححححر . . هالمينوووووون ولد عمممممي ما يجوف شي فالدنيا غيييير زوووووواااااج . . يتححححححرا كل شي سسسسسسسسهل " اصارخ " مايدري في وايد اموووور كبييييييييييره انا مااااااااقدر عليييييها . .

وليد : يا بحححححححححححر . . " يصارخ اكثر " انا مينوووووووووون . .صح انا مينووووووووووووووووووووووووووووووووووووووووووووووو ووووووون . .

انا : هههههههههههههههه بس كافي " اتصددت " عن حد يسمع

وليد : يا بححححححححر . . تتتتتتتتذكر هاليوم عدل . . وتذذذذذذذكر هالتاااااااريخ . .انا راح اررررررررررجع وبتششششششوف . . يا انا اكسسسسسر خشششششمك . . يا انت تكسسسسر خشششششمي . .

انا اصارخ : يا بببببببحررر . . مييييره بنت عميييييييي تعشششششقه يا بححححر . . اكسر قلببببببببها ؟

وليد : ميييييره منجذذذذذذبه لي يا بححححححر . . ماااااااااتحبننننني . . " يطالعني ويرمس عادي " حبيني ولا تفكرين بالعواقب . .

انا : وليد شو هالكلام . . انا بعدني مجروحه من علاقه كبيرة .. علاقه بعدني ماتخذت فيها موقف

وليد : بتتخذين . . وانتي قدها انا عارف . . لكن دخيلج حبيني . . لو حبيتيني بنكون انا وانتي اسعد ناس فالدنيا . . كل الناس بترمس عن علاقتنا . . الكل بيتمنى . . الكل بيحسد . .

انا اتنهدت : خلنا نرجع يالله ..

وليد يرد يطالع البحر ويصارخ : نننننننننتلاقى يا بحححححححر .. يا تذكرني . . ياااا اذذذذذكرك . .لللللكن لووووووو . . " يصارخ بصوت اعلى " لووو جفتني بروحي يايييي هالمكان . . لا تتشمت فينيييييييي . .

اانا ابتسم بعذاب . .

وليد يطالعني : لا تبتسمين جيه . . ما احب هالابتسامه الكريهة . . خاطري اعفص ويهج وربي يوم تبتسمين جيه

انا بنظرة جديه : جي زين

وليد : ارحم عن توه . . يالله امشي لا امرغج بنعال . .

انا فاجه عيني . .

وليد : اسولف بنت عمي . . محشومه . . النعال يمرغ نفسه ولا يمرغج . .

انا ابتسمت : اسميك انت وكلامك ..

وليد : ههههههههه اعجبج . .

وطلعنا خذنا سندويجات بالطريج وتمينا ناكل بهدوء ومشغلين اذاعه القرآن ومقصرين ع الصوت . .

وليد : مهور .. مهوور . . " ماسك قلم ويدقه ع جتفي "

اانا : اآآي .. يعور . .

وليد :شسوي . . تبيني اواعيج بأيدي قوليلي عادي بسويها

انا اطالعه : سخيف . .

وليد : ماتلاحظين دوم ترقدين فـ سيارتي ؟

انا : والله ؟ " اتثاوب " ماحسيت . .

وليد يبتسم : لهالدرجه تحسين بالامان فيها . .

انا يايه انزل : جب جب . . " اطالعته " مشكور وايد وايد ع طلعه اليوم . .

وليد يبتسم : العفو وايد وايد . .

انا : ودرسك ما بنساه . . وبتخذ رده الفعل المناسبة لان شرا مافهمت . . حان الوقت اني اتخذ فيه رده الفعل بدال الثرثره الزايده . .

وليد يبتسم ويسويلي بأيده اوكي : جيه اباج . . واعرفي بنت عمي . . بأي رده فعل بتتخذينها . . بتلاقيني موجود . . " يبتسم " موجود كـ زوج . . او موجود كـ أخ . . ع حسب اختيارج لرده الفعل

انا اتثاوب

وليد : شفطتييييييييينا . . روحي روحي يالله

انا ابتسمت : مادري ليش مدوخه لهالدرجه . .

وليد : روحي الحين اسبحي بماي دافي ووطي راسج ونامي ولاتفكرين بشي

انا اطالعه : ان شاء الله . . بنزل بسلم ع يدي اول

وليد : وين تسلمين عليه الساعه 12 إلا ربع . . يدي راقد من ساعتين

انا : هيه صح . .

وليد : يا حبج للهياته . . يالله انزلي . .

انا : انزييييين . . " ابتسمت " تصبح ع خير

وليد يبتسم : هاي الابتسامه الشيطانية المشاغبيه إلي اونها بريئية إلي احبها . .

انا : هههههههههههههههههههه . .

وليد : حتى هاي . .

انا ابتسمت بحيا : هههههههههه

وليد : عاد هاي لها طعم ثاني . .

انا : ايييييييييييه . .

وليد : ههههههههههههههههه . . يالله فكينا روحي

انا ابتسمت : انزين

وليد : شسالفتج تجربين ابتساماتج عليّه ؟

انا : سخيييييييييف ما يضحك . .

يرن تلفون وليد ..

وليد : هلا ابويه . . هيه عند باب البيت انا . . يالله ياااي . . فمان الله

انا : اوب بتنهزب . .

وليد : لا يوم بقوله ويا بنت عمي ما بيقول شي " يبتسم "

انا فاجه عيني . .

وليد : اذا ما بتنزلين بحرك والله

انا نزلت : خلاص رايحه . .

صكيت الباب ونزل لي الجامه وسوالي كشش : يالله دشي دااااااااااخل .

انا ابتسمت ورحت عنه مع انه شي فيني كان يبا يتم . . مش عشان شي لكن لاني مابا اتم بروحي ولا ابا افكر بالهم ولا ابا احس بضعفي ولا ابا يمر في بالي اي شي . . يوم اكون معاه يكون همي وابيد اقل . . وايد يخفف عني ويخليني انسى الي امر فيه . . ليش ما كنت نفسه ياسيف ليش . .

دخلت البيت ودخلت على امايا كانت تصلي قيام الليل . .

انا اترييتها لين سلمت وعقب تذكرت اني ماشليت الكيس الي فيه جلابيتي والشيله .! شليت فوني بس ونزلت . .

امايا : رديتي اميه . .

سرت صوبها وحطيت راسي ف حظنها : هيه امايا . .

امايا : طولتو . .

انا غمضت عيني : ماحسيت بالوقت . .

وخبرتها مقتطفات سريعه من إلي صار بيني وبينه . .

امايا تمسح ع راسي : صح كلامه . . " تبتسم " اتخذي رده الفعل وانا وياج يا اميه ف كل قرار لج

انا : أمايا ماتعرفين ليش عمي يكرهني .. ؟ او ليش يكره عنود بعد . . وليش يكره ابووي . . ليش يكرهنا واحنا عيال اخوه .. حتى حقده ما خاز عنا حتى يوم مات ابوي . .شو الشي الكبير الي شالنه عمي

امايا : قومي اميه سيري وطي راسج . .

انا اتنهدت : بروح بسبح ع السريع وببدل وبي برقد عندج . . " عقدت حياتي " البيت هادي . . وينهم؟

امايا: عميمتج تقول مزهبه مسرحيه وقالتلهم يتجمعون عندها وسارو كلهم . . بيون خلاف . . سيري امايا لهم اضحكي وسعي صدرج

انا : لا امايا مالي خاطر . . بسبح وبييج بنام فحظنج . .

امايا تبتسم : يالله سيري اميه . .

وسرت عنها . . خذت لي شاور سريع وبدلت ونزلت عند اميه وشفتها بعدها تصلي ف وطيت راسي ع سريرها ورقدت قبلها وماحسيت بالدنيا إلا لصلاه الفير وحتى ماسرت اواعي حد كنت منهده حيل ورجعت انام .! مادري شفيني صايره انام بعمق . .

.

.

.

يوم الثلاثاء . .

الساعه 12 ونص الظهر . . نشيت على صوت شما وهيه تقرا ع راسي قرآن . .

انا فجيت عيني بتعب : شموه . .

شما بعدها تكمل قرآيه .. وانا استرخيت بصوتها وااايد . . تميت مغمضه وهيه تقرا وتقرا لين خلصت . .

شما : مهووور . .

انا فجيت عيني : الله يجزيج خير بنت عمي . . . " ابتسمت " فديت هالقرايه وفديت هالصوت . . وفديت تلاوتج تشرح الصدر . .

شما تبتسم : قومي ابا اقولج شي . .

انا اطالعها : قولي . .

شما : ابوي اتصل فينيي وقال لي . . " كانت تتكلم وهي تلعب بطرف الشيله ومستحيه موت " انه عمي حمد خطبني لـ مروان

انا اطالعها بصدمه : احلفي

شما تبتسم ومنزله راسها . .

انا قمت وحظنتها : مبرووووووووووووووووووووووووووووووووووووووووووووووو ووووووووووووك حياتي والله فديييييييييييييتج فدييييييييييييييييييييييتج . . تستاهلين كل خيييييييييييير شموه

شما تغطي ويهها : مهور انا من كثر ما كنت مستحيه اول ما قالي شو رايج قلتله اوكي . .

انا : ههههههههههههههههههههههههههههههههه

شما : والله مادري كيف طلعت مني تم يضحك ابوي علي وايد . .

انا : فديتج يا شموه تستاهلين كل خير والله

شما : انا بعد صليت استخاره من عقب ما قلتي لي انتي وميروه انه بيخطبني . . واحس اني ارتحت " تبتسم " عادي صح

انا : هيه عادي اكيد . . " تبتسم" يافرحتك يا مروان . . منو بيوده الحين . .الدنيا ماتوسعه

شما تبتسم . .

دخل علي حبيب قلبي وفديت روحه وعمره وقلبه وهو يركض . . : كااااااكام

انا قمت عن شما وع طول شليته : صققققققققققققققوووووووووووور . . عيوووووووووون كاكام انتتتتتتتتته . . وففففففففدييييييييييييييييييييييت روحك يالغالي . . " حظنته وكلته كلته من البوسسسسات " انت ويييين . .

صقوري مستانس علي ويلعب ف ويهي ويخوز شعري عن ويهي . .

انا : حبيييييييبي انت . . قولي ممممهرررررره

صقوري : مممممهللللللله

انا :واااايد فديييييييييت المههههههله على لسانك السسسغيروووني

شما : ههههههههه السغيروووني

انا : وييييه اسمحيلي شموه . . انا يوم اشوفه انسى عمريه

شما تبتسم . . : عسوول

انا اعض خده : عسسسسول وقموووول واي قلباااي على خديدااتووووووو وااه عمري ع شعللللوو القممممييييييييل . .

خلود تدخل : شرايج فالمفاجأه . . " تبتسم " انا يبتلج اياه وبيتم عندنا لين الجمعه

انا فاجه عيني ع وسعهن : احححححححححلفي

خلود : وربي

انا اعض بطنه : يااااااااكككككككككلبييييه انننننننتتتتتتتتتاااااااه . .

عنود تدخل : السلام عليكم . .

انا وشما : وعليكم السلام . .

ويت سلمت علي . .

عنود : شعندج راقده عند ماما ؟ تدلعين عكبر . .

انا ابتسمت : تغااارين لانج ماترومين ترقدين عندها . .

عنود تبتسم وتطالع خلود . . : خبله هذي

صقوري : كاااااااااكااااام

انا : حبيييييي قلبي . بعطيك كاااااكام اصبر . .

عنود : مهور ديري بالج عليه . . حطيه في عيونج . .

انا : انتي وين بتروحين ؟ غريبه اول مره بتخلينه اكثر عن يوم . .

عنود تطالعنا : عبدالله قال لي . .

انا مستغربه : شو .؟

>

<

عبدالله : خلينا نروح نغير جو في دبي عشان تنسين امر الجنين . .

عنود : انسى ؟ بيتم قلبي محروق حرق مش عشان الجنين بس . . لانك تونست بموته

عبدالله يتنهد : عنود شتبيني اسوي وانا قلبي مش بايدي . . الحب مش بالغصب

عنود : لا تحبني . . انا مابيك تحبني خلاص . . انا تعبت ومليت من هالحال . . خلنا ننفصل انا جد افكر بالانفصصصال

عبدالله : وانا قايل لج طلاق ماراح اطلق . . ولدي بيربى بين ام وابو متزوجين . . مش مطلقين

عنود : شو الفايده حياتي معاك بكبرها انفصال بانفصال

عبدالله يمسك جتفها : انسى الموضوع . .

عنود توخر ايده : مابنسى شي

عبدالله يتنهد . .

عنود : انا عرفت انها اقرب الناس لي . .

عبدالله بصدمه : شو

عنود : وانا تنازلت عنك واقترحت عليها تكمل الحب بالزواج . . لكن مع الاسف رفضت بقوة

عبدالله يبلع ريجه . : . .

عنود : انا اقدر اجمعكم عبدالله . . " تتجمع عيونها دموع " والله اقدر اجمعكم مع بعض .. عطني الفرصه وانا بسوي كل الي اقدر عليه عشان اسعدكم . . اثنينكم غالييّن عليّه . . وبعوضكم عن الحرماان الي كنت انا سبببه . .

عبدالله : كيف تقدرين تقولين هالكلام . .

عنود تنزل دمعتها : عطني الفرصه بس اعوضكم . .

عبدالله يتقرب منها ويمسح الدمعه بحنان : الي بيني وبينها انتهى من زمان . . الي باقي فالقلب رماد ما بنمحي يا عنود . .

عنود توخر عنه : اعرف اني ماقدرت امحيه ولا بمحيه . . مابي اكون شي ثجيل ع قلب حد . .

عبدالله بهدوء : وانتي مش ثجيله ابدا . . انا اقدرج واحترمج

عنود تقاطعه : تقدرني وتحترمني بس ماتحبني . . شـ يفيديني تقديرك واحترامك عبدالله شـ يفيدني

عبدالله : شـ تبيني اسوي خبريني

عنود : ارتاح مني وخلنا ننهي كل هذا

عبدالله : مستحيل . . مستحيييل . . انا ابد مافكر أأذيييج . .

عنود : قربي معاك بهالحال اكبر اذى . .

عبدالله : كلامج قوي . .

عنود : هالحال من كم سنه وانا ساكته ماقلت شي لكن دامني اعرف الحين كل شي ماله داعي نجامل بعض والسبب صقر . .

عبدالله : عنود قبل لا تكونين حرمتي تراج بنت عمي وانا مستحيل أخلي بنت عمي مطلقه مستحيل . . هالشي انا ما رضى فيه ولا برضى فيه طول عمري . .لو اخليج معلقه طول العمر لكن ما اطلقج . . انتي مالج فالدنيا غيري انا الي بوقف معاااج وبساندج . .

عنود : عبدالله انت من داخلك انسان وايد زين . . لكن

عبدالله يطالعها بتمعن

عنود : ماتقدر تسعدني . .

عبدالله : تفكرين بالزواج من عقببي اذا اطلقتي ؟

عنود : طبعا لا . . انا فكرة الزواج خلاص . . من قلبي شلتها

عبدالله : عيل ليش تحنين ع الطلاق ؟؟ تتوقعين ااذا اطلقنا بينحل شي

عنود : بحررك . .

عبدالله : تحرريني من شو

عنود : احررك من العذاب

عبدالله : العذاب موجود موجود يا بنت عمي . . الطلاق ما بيحررني من الرماد الي باقي ف قلبي . . حرام نتشتت ياهل بينا . .انا مابا ولدي يكبر ويفكر ف يوم ليش ابوي طلق امي . . مابا اتم هالفكره فراسه ابد . . اباه يعرف ان امه وابوه احسسن اثنين .. احسن اثنين يفتخر فيهم

عنود : حتى لو كان العكس ؟ تقص عليه . . تعيشه ف وهم

عبدالله : يعيش في وهم اهون من انه يتعقد وينصدم

عنود : طلقني عبدالله

عبدالله : شيلي هالكلمه من راسج لا تعيدينها ولا تزيدينها لاني والله ما اطلقج . .

عنود : فهمنننننننني شالفايده تامين مع بعضضضضض شالفايده

عبدالله يمسك ويهها ويخليها تجابله : خلينا نحاول . . نحاول نتأقلم ويا بعض . . خليها تكون اول واخر محاوله لنا . .خليها فررصصصه نشوف شو الي نقدر نسويه . . خلينا سوى لين الجمعه . . لو ماقدرنا راح نشوف شو الي بيصير . .

عنود تطالعه عين بعين : انت ماتقدر تعطي قلبك فرصه . . انا عمر معاك ما قدرت تحبني . . بتروم بـ 4 ايام تفتحلي قلبك

عبدالله : خل نحاول . . ساعدييني . . انا ماريد اتنازل عنج ابدا . .ولا اريد اترك ولدي

عنود تتنهد . .

عبدالله : أنتي مش خسرانه شي . . خلينا نجرب . . خلينا نكون لحالنا ونشوف شـ إلي بنقدر نعدله ونسويه . .

>

<

>

مسكت ايدها بقوة : حبيبتي عنود . . حبيبتي والله . . ان شاء الله بهال4 ايام يعتدل حالج . . ماتدرين ربج قادر يغير كل شي بدقيقه فـ ما بالج 4 ايام . .

خلود : قلتلها . .

شما : ادعي ربج وكثري من الاستغفار

عنود : ان شاء الله

انا اساسرها : وماوصيج بالدلع

عنود : هههههههههه لا تحاتين . .

خلود : قلتلها طلعي مهاراتج كلها . .

ابتسمت : انا متفائله . .

عنود : مادري انا متردده وايد

خلود : مثل ما قال انتي مش خسرانه شي . . ف لا تترددين . . تصرفي معاه جنج عروس يديده . . ادللي وادلعي ودلعيه . .

انا :عطي نفسج هالفرصه ووسوي كل الي كنتي تحلمين تسوينه . . لاتضيعينها من ايدج

عنود : ان شاء الله . . بترومين تتحملين من صقور ؟

انا : اطاعو شو تقول . . صقوري في عيووووووووووووووووووووووووني . .

تلفونها يرد . .

عنود : هذو يتصل . . بروح عنكم عيل . .

انا : كل يوم اتصلي فينا عطينا تقرير . .

عنود تبتسم : بتصل ف خلود وخل خلود تخبركم . .

انا ابتسم : الله وياج اختيه . .

وسلمنا عليها . .

صقوري يمسك ريول امه : ماااااامااااااه

انا : صصصصقوري تعال بعطيك كااااااكام . .

ركض صوبي : كاااااااكاااااام

وشردت عنود بسرعه . .

اميه تدخل : يالله اميه مهره نشي تحركي . .

انا : ان شاء الله امايا . .

اميه تطالع خلود وشما : رمست امكم . . قالت بتي يوم الجمعه " تبتسم " عشان يسوون ملجه مروان و شما . .

انا اشهق : شووووووو . . بهالسسسسسرعه

شما مسكت جتفي وبخوف : ليش بسرعه . .

اميه : هههههه مروان يوم ردو عليه اشتط . . قال الخميس انسب وقت . . فـ سيرو اليوم تزهبو ودورولكم شي بنسوي الحفله في بيتكم

اانا : يااااااااااي وناسسسسسسسه . .

خلود مستغربه :امايا وابويه متى بيردون . .

اميه : باجر . . ما خبروكم ؟

خلود : لا مارمستهم .

اميه : توه قررو . . قالو بيردون باجر وبيخلصون امور الملجه وبيحددون وقت العرس وبيردون يسافرون لان نتايج الفحوصات بتطول . .

انا : حتى لو ما بتطول . . وين بيرومون على حنه مروان . . بياكل فوادهم والله . .

خلود : هههههههههههه هيه عاد مروان لو بغا شي منو بيهديه . .

شما مستحيه وقامت وطلعت من الحجره . .

انا : ههههههههههه ياويلي على بنت عمي . .

اميه : يالله امي نشي وخلي صقر عندي روحي تغسلي وصلي الظهر عشان نحط الغدا . . شوي وبي راشد من الدوام . .

خلود : انا بسير بواعي ميود . . من اختربت سيارته مسكين مول ما يظهر الا من بيت يدي لين اهني وماسك هالفون 24 ساعه مادري شو عنده . . ماكان جي

انا اتذكرت . . بعده هو وميروه ؟؟؟

انا : اندوج خلود . . امسكي صقوري وعطيه كاكااو . .انا بروح بتغسل وبصلي وبدق عليه الباب . . لاني اباه برمسه . .

وسرت سويت إلي قلتلها عليه . . ومن عقبها اول ما دقيت باب حجرته صرخ

مايد : واااااااااااعي

انا : فج فج الباب واظهر اباك فرمسه

مايد يفتح الباب : هاااه . .

انا : بعدك صح بعددددددددك .. .

مايد : انتي ما بتنسين . .

انا عاقده حياتي : وبعدين ميود . .

مايد يبتسم : شفيج والله احس بشعور حلو . .

انا عاقده حياتي . .

مايد يبتسم : اقري اقري لين ماروح ابدل . . ادريبج ما بتودريني لين تقرين

وسار . .

ميره ( صباح الخير . . قايمه ؟ )

مايد " صباح النور . . هيه , توه الناس توج افتكرتي فيني ؟ امس طول اليوم اطرشلج مسجات ماتردين علي . . كبر راسج ولا مليتي مني "

ميره ( حرام عليج مهووه شو هالكلام والله ماتدرين شصارلي البارحه اف مول مابا اتكلم فالموضوع لكن كنت امر فموقف صعب وصارتلنا مشاكل )

مايد " وايد تصيرلكم مشاكل "

ميره ( شفتي عاد الله لا يبليييييييييج )

مايد " ما بتقوليلي "

ميره ( ماعرف كيف ابدا )

مايد " عادي ابدي من وين ما تبين خاطري اعرف لو ما يضايقج "

ميره ( تذكرين مهور بنت عمي صح ؟ )

مايد " هيه اذكرها إلي وايد وياج واخوج بياخذها . .بلاها ؟ "

ميره ( اكتشفت البارحه انه اخويه مالج ع غيرها وزعلت مني لاني ماقلتلها )

مايد " وانتي ليش ماقلتي لها . . حرام "

ميره ( كيف اوشي على اخوي !!! )

مايد " ومافكرتي في الي تحبينها و وايد معاج "

انا ابتسمت : هيييييها يا ميره . . اخرتها تسترين ع اخوج حتى ع الاشياء الي بتعورني

ميره ( والله اني احبها وهي شرات اختي لكنه اخوي صعبه فالحالتين . . وانا فضلت السكوت . . لكني مقهووووووووووووووووووووووووره اكثر لانها طلعت ويا ولد عمي الي انا وايد يعيبني )

مايد " وليد ؟ "

ميره ( شدرااااااااج )

مايد " تراج قلتي لي . . نسيتي ؟ "

ميره ( اونه . . هيه نسيت ماحيد . . اوف ماقدرت انام للحين مواصله )

مايد " مالت عليج "

ميره ( شو ؟ . . ليش )

مايد " جب انجلعي "

ميره ( اويه بلاج )

مايد " مادري ع شو منجذبه ع ولد عمج .. ماحسه يلفت الانتباه "

ميره ( ههههههههه لا حرام عليج والله كيووت . . يخبل )

مايد " مالت عليج "

انا : ههههههههههههههههههه . . مارام يقبض عمره

ميره ( للللليييييييششششش )

مايد " عندج صورته ؟ ابا اشوف متخبله ع شو "

ميره ( اكيد عندي . . لحظه في صورة متصورنها ويا اخواني وعيال عمي بصورلج شكله بس )

انا : والله انج هبلللللللله يا ميروه . .

مايد " وصلت الصوره . . امييه يخوف "

انا : ههههههههههههههه مكار والله انه غاوي . .

ميره ( حرام عليج والله انه جميييييييييييييييييييييييييييييييل )

مايد " وين الجمال ؟ الصوره كلها كاب "

ميره : ( ها احلى شي يميزه .. )

مايد " تعرفين انج بايخه وماعندج سالفه .. يالله انجلعي بحاول ارقد "

ميره ( مهو بلاج عاد . . تحسسيني انج بويه )

مايد " هييييييه انا بويه اصلا ؟ توج تكتشفين "

ميره ( شووووووووووووووو .. احححححححلفي . . انا ما ارمس هالاشكال لو بويه احلفي )

مايد " اقص عليج والله مش بويه . . انا سبورتيه اكثر من اني زوز "

انا : هههههههههه والله مش هين يعرف البويات والسبورتيات والزوز !!!!!!!!!!!

ميره ( يعني تتمكيجين وجيه ولا )

مايد " هيه هيه انا نفسج لكن الفرق اني ألبس بس جواتي واحب بنات لكن مش الحب الماصخ وحب بويات . .حب تملك وصداقه قوية فيها غيره .....!! "

ميره ( انتي شكلج فالكليه صح . . لان هاي بس سوالف بنات الكليه والجامعه )

مايد " جب لا ترمسيني "

ميره ( بلاااااج متقلبه )

مايد " سيري دقي راسج فاليدار ويا ولد عمج بو كاب الي ويهه شرات نعال جحا "

ميره ( ههههههههههههههههههههههههههه حرام عليج ما ارضى )

مايد " مادري شو شايفه فيه . . سخيفه !! تصبحين ع خير "

ميره ( مهو لا ترقدين عااااد . . )

مايد مارد عليها

ميره ( مهوووووووووووووووووووو . . )

مايد " شو "

ميره ( ههههههههههههههههههههههههههههه )

مايد " طرشيلي صورتج خاطري اشوفج . . "

انا شهقت : حسبي الله عليك يا ميود . .

ميره ( لا مسسسستحيل ماطرش صوري )

مايد " احسن . . من زينج .! جنج فحم "

ميره ( انتي وايد تسسبيني اليوم )

مايد " مش طايقنج "

ميره ماردت .!

مايد طرشلها " طايقتنج اقصد . . سقط التاء سهواَ "

ميره ماردت . .

مايد " وينج ؟؟ "

ميره ( هااه خلص رصيدي توا طرشت من تلفون اميه )

مايد " انزين جب جب "

ميره ( ههههههه برقد حبيبتي سطلت )

مايد " انزين حبيبتي "

انا : يالحيوان . .

ميره ( بكلمج يوم بنش اوكييييييه )

مايد " اوكيه غناتيه "

مايد : ليش تسبين . .

انا يايه ااتحرطم عليه لكن خلود يتني : مهور يالله حطو الغدا . .

مايد : يالله ياي ياي . .

وشرد عني وشل تلفونه . .!

انا يايه ألحقهم عشان اتغدا لكن سرت صوب تلفون البيت برد لانه يرن . .

انا : الو . .

سيف : انتي فالبيت يعني . .

انا انبلع لساني . .

سيف : خلي الشغاله تفتح لي انا برع . .

انا بندت عنه وتميت ارجففففففف . . قلبي يدق بقووووووة وماقدر اتكلم . . اليوم لازم اعرف كل الي ابا اعرفه . .اليوم لازم اقوي روووووووووووووووحي واتخذ رده فعل . . ورده فعلي بتخذها من كلامك يا سيف . . كل شي راح يتحدد اليوم . . كل شي راح احدده اول ما تتتكلم وياي . . !

.

.

.

__DEFINE_LIKE_SHARE__

«ضَحِيًة حِبُيًبُيً ..}● · 07-19-2012, 05:53 PM

السلام عليكم ورحمه الله وبركآته

وشحآآآآلكم . . . .!

الصرآآآحه ردودكم حمآآآآآآآآآآآآآآآآآآآآآآآآآآآس
حمسستوني . . من امس وانا اقرى ومندمجه صرآآآحه
فـ بدعت لكم ببآآآرت طويل حيييل ان شاء الله يشفي الغليل . .
اليوم بقعد ارد على كل ردودكم من عقب مآ كتبت آني بودره آسبوع = ) .!
خلوني آجوف توقعآتكم وحمآسسسكم .ّ!
لو شسمه . .
كان رمضآن بآجر فـ راح يكون ها اخر بآرت لين عقب رمضآن . .
ولو ورى باجر رمضآن بتشوفون لي بآرت ان شاء الله . .

لي عؤؤده
__DEFINE_LIKE_SHARE__

«ضَحِيًة حِبُيًبُيً ..}● · 07-19-2012, 06:05 PM

المشاركة الأصلية كتبت بواسطة احبه ويخونني

تروحين وترجعين بالسلامه غلايه

ومثل ما قلتي رمضان لازن نتعب ونرضي ربنا هو شهر ما ايي كل يوم

ولي بارك بعد البارت الرب لا هانج غلايه

الله يسلمج فدييتج . .
منوووره . .

المشاركة الأصلية كتبت بواسطة عيناويه وبكيفي

تروووووحين وتردين بالسلامه ان شاء الله

وصح كلامج لازم نستغله في اشياء نكسب فيها اجررر

وتسلم اييييدج ع البارتات

مع تحياتي عيناويه وبكيفي

الله يسلمج قلبي . .

المشاركة الأصلية كتبت بواسطة صـآפـبـۃآڷـڛـمـو

مرحبآآ السآع‘ . . *
شحآلج ، ضحيوؤؤؤؤؤؤي !
عسآج بخيربصصرآحة أسلوبج ططر و فنآن و البآرت إلي كتبتييه
كل شي فييه محمس و بصرآحة
كآن إبدآع , أكييد من كآتبه مبدعة مثلجج ..
..
ؤؤؤؤؤؤؤبآرتج وآيد وآيد وآيد ححححلؤؤؤؤؤو عيبني ححححيل وبكون من متآبعينج آول بـآول.,
., استمري فدييييتج والسموحه لو كآن الرد مب من مقآآمج =)
, لج خبره في هالمجآل ف آكيد بتبدعيين فيه.,
بآنتظآر اليآآآآآآآآآآآآي
ويسلمو على هيك روآيهه.,,
>وليد فنآآن خخخ لومهووؤر توافق عليــــه وؤنآسة
جد بستآنسسسس هع.,
ووتروحين تردين بالسلآلآمـة حبؤؤؤبـــة!

مرحبآآني مليؤؤؤن . .
تسسلمين لي والله غنآإتيه . .
على رآإسي فديتج

المشاركة الأصلية كتبت بواسطة نــــور عــــيني

مسااااائج خير حبيبتي ... واايد وحشششتيني ..

سامحيني على القطااعه ... تدرين ظروووف ...اجازات .. وسفر ورمضان على الابوااب ...

اامممم في كلام واايد بخاططري ومادري من وين ابتدي ....

اولاَ : الروااااايه والله والله ماعليهاا كلام ... مثل ما أبدعتي في وطت رجلي .. ابدعتي في هايم بحبة ....
أبدااع واتقان .. والهاام جميل ..

اسسسسلووووب مختلف عن باقي الرويااات جداَ في الم ومعناه .. فيه دمووع وفرح .. وحزن وظلم ...
اختلف الرواية كثيراً بالنسبة لي الرواية لها معاني كثيرة وفايده عظيمة ..علمتني كيف الحياة لها طرق واكيد احنا معظمنا مجربين هالطرق..

ثانياَ: من خلال قرائتي للرواية .. مهره وسيف ووليد ..
لقيت الفرق مهمها عااشت مهره حب سيف 21 سسنه بكل مراحلة ..ماظن سيف حبها كثر مامهره حبته ..لدرجه مافكر يسك ايدها او يقولها احبج في يوم الا نادر ... حسيت يستغل نقطة ضعف حبها له ..وبلحظة يقدر يراضيها ..اللوم على مهره اتصدقه بس الحب عمممي ...

ولييييد متوقعه مهره بتستمر معاه وادري بتحبة حب وليد غير واضح صادق ..غير عن حب سيف غمووض وجبرووت ابوه يفرض عليه راييه ...صح او احتراام يوافق اراءه بس مو لهدرجه ...

اما وليد حبة حلوو محد يقدر يفرض رايه يعرف شنوو يبي والبارت الاخير وايد حلوو .. حسيت مهره اتحسس براحه كبيرة واياااااه زصاتر تنجذب له .. وبأذت االله تكون من نصيب وليد ...

ثالثا:دائماً ضحية مختلفه بكل تفاصيلهاا وكتابتها ... واسلوبها والله يحفظج من الحسد .
سامحيني حبيبتي على تاخيري .. وان شاء تاكدي بكون متتاابعه بكل شووق ...ومابختفي باذن الله

دمتي بحفظ الرحمن ..

نور عيني

مسسآء الورد . .
حيّ الله حبيبت آالقلب . .
حبييبتي والله مسموؤؤحه دوم . .
وانتي تعرفين ان وجودج يعنيلي دؤؤؤم = )
واحب توآجدج وتعليقآتج وتوقعآآتج . .
شرفتيني حيييلّ بهالرد الجميييل
يعلني مآ خلاآإ

المشاركة الأصلية كتبت بواسطة احبه ويخونني

جد جد قهرني هذا وليييد اوكي يحبها بس نحن نبي سيف ومهاري خله يبعد عن مهاري احسن له

ولييييد اكرهه اجتليه سوي فيه اي شي ما نبييييييييه

سواف ماله ذنب يحبها ويموت فيها بس وليييد يخرب

ههههههههههههه لؤؤل . .
بنششوف شو ردج عقب هالبآرت إلي كتبته

المشاركة الأصلية كتبت بواسطة زهرة الجلاس

تروحـين و تـرديـن بالسلامهـ , البـارت جنــانـ ..
احـس انـها بتـوافق ع وليــد , و ميره الصراحهـ تقهــر ..
و تسلميــن ع البـارتـ ..

يسلمج ربي . .
بنششوف . . راوينآ توقعآإتج

المشاركة الأصلية كتبت بواسطة 2dmnt-gRbk

السلـآم عليكم والرحمةة

شلوؤنج ضحيةة .. عساج بخيير ان شاء الله
تروووحيين وترديين بالسلـآمةة .. عسـآج عالقووة

وكلـآمج كلةة صحح وان شاء الله يمـر رمضـآن بكل سهولةة وبدوون مشـآكل

تعالي تعالي بقوولج [ شلوون يعني ماشاءالله كتاباتتج هييك عطيينـي السرر يمكن افلح فروايتي ]
حبييت كل الشخصيات .. ماعدآ العممة كرهتتها عدددل والعم حمممد ماعرف شوو مشكلتةة

سووري لوو طوولت حبيبتي .. نتريااج بعد اسسبوعع >> هااه ترآنـي احسسسب !!

وعليكم السلام ورحمه الله وبركآإته . .
هههههههه فديتج والله .. ما عندي سر ولا شيآته
روحي جيه ويآ هالالهآم معتمده عليه . .
تسسلمين لي ع هيك طله فرفوشه قميييله __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
خادمة "تذبح" طفلة مخدومها بحفر الباطن	محروم.كوم	منتدى أخبار المواقع والمنتديات العربية والأجنبية	1	04-16-2013 02:04 AM
المرور""""""""للايجار """"""" فالمرور """"""4 شقق.. غرفتين+3 غرف ((65الف_150الف))	محروم.كوم	منتدى أخبار المواقع والمنتديات العربية والأجنبية	0	01-20-2012 04:10 PM
بلاك بيري تورش 9860 فل تتش مع بن ممير """"""""""""""""""""""	محروم.كوم	منتدى أخبار المواقع والمنتديات العربية والأجنبية	0	10-28-2011 11:00 AM
""""""""مطلوب لكزس lx570 الدفع كاااش """"""""""	محروم.كوم	منتدى أخبار المواقع والمنتديات العربية والأجنبية	0	07-19-2010 03:50 AM
"""""""""""""""""""""""""""فساتين زفاف راقية ومميزة """"""""""&am	محروم.كوم	منتدى أخبار المواقع والمنتديات العربية والأجنبية	0	07-13-2010 12:00 AM