صبرت ولا قدرت اصبر واتحمل اني اعيش العمر من دونكـ

غرام البدو · 06-21-2012, 02:31 PM

الساعه 11 في الليل بتوقيت الامارات والساعه 7 في لندن في منطقة كروميل ..
العنود ومنصور كانوا قاعدين في البلكونه ..
منصور : عنود شفتي نصيبي وياج لين وصلنا
العنود : حبيبي منصور كل شي في هالدنيا نصيب ... وهاذا كله من عند الله تتدري ليش
منصور : ليش
العنود : لانك حبيتني من كل قلبك لانك حبيتني بنيه صافيه مافكرت في اي شي همك حبك وحبي وبس . ورب العالمين شو يقول يامنصور يقول اسعا ياعبدي وانا اسعى معاك والحمد لله انته سعيت والله وفقك ..
منصور : الحمد لله اهم شي انه حبيبت قلبي حذالي .. قومي قومي هب مصدق بنتحر ..
العنود : هااااااااااااه لااااااااااااا تعال اباااااااااك وييين تنتحر ... وقامت وصاحت ..
منصور : هههههههههه حبيبي ليش اصيحيين فديتج انا لها الدرجه اتخافين عليه .. واتحبييييني
العنود : ياويهك انزييييين ماعليه انا براويك .. قوم قوم وربعت عنه في الصاله ..
تم منصور قاعد يفكر فيها وفي شكلها وهي دموعها في عيونها ودلعها يوم انها تصيييح .. احبهااااا احبهااااا وربع وراها ..

الصبح 8 يوم الثلاثاء
في بيت المر الرميثي
شمه تربع صوب بنتها لانها نامت عنها ونستها بما انه راشد اليوم مريض ومابيروح المدرسه ...
شمه : ميثووووووووه ميثوووووووووه قوووومي نسيتج غربل الله العدو ..
ميثه : هاااااااااه امايه اشويه بس ..
شمه : غربل الله بليسها اشويه اونه قومي الساعه 8 الحيييينه ..
ميثه : والله اويييه وتنقز ميثه من على السرير ليش تنسييييييني .
شمه : نسيتج شسوي الكبار والصغار كلكم عليه عنبوه جاني بتحملكم كلكم .. قومي يله روووحي لا تمين واقفه جدامي جذه روحي اتلبسي عن لا تتاخرين زياده .. اتحرررررركي ..
ميثه : هيه انتي انسينا وخلاف تعالي وواقعينا ..
شمه : اتحركككي انتي ام لسان طويييييل عنبوه هب لسان هاذا ا يله ..
ميثه : انزيين
وقامت ميثه بسرعه اتلبست وظهرت وركبت السياره وهي توها راكبه السياره وسيارتهم بتتحرك شافت سيارة خليفه توها ظاهره من البيت .. في نفس الوقت قامت وحطت ايدها على راسها ...
ميثه : لا حول ولا قوة الا بالله العلي العظيم اصبحنا واصبح الملك لله شو هاااااا
بشير : وين يريد يروح شو يقول مافي يسمع
ميثه : راحت روحك وين بروح يعني غير المدرسه روح بسرعه ...
بشير : جيين
ميثه في خاطرها زنت في راسك حصاه ان شاء الله ناقصتنك انا بعد .. خليفه كان طريق دوامه على طريق مدرسة ميثه انصدمت ميثه
ميثه : ليكون هاذا يلحقني لا لا ماظني يمكن طريق دوامه هنيه ..
خليفه شاف السياره وهو اصلا يوم كان نازل من الدري اللي في الببيت شاف ميثه وهي راكبه السياره .. خليفه شاف ويه ميثه لانها كانت متحجبه .. وماشافته ..
خليفه : ااه ياقلبيه صدقهم يوم قالوا الحلو حلو لو نش من النوم .. فديتها اكيد رايحه المدرسه الا الحقها واشوف مدرستها وبعدين هالطريق مايودي غير مدرسة عليا اكيد هي في مدرسة عليا .. لا مافيني تاخذ عنيه فكره ... لا ياخيلفه اعقل .. وراح خليفه صوب دوامه ...
ميثه : يوم شافته راح عنهم اف الحمد لله نفس ماظنييييت اكيد دوامه هالطريق ... ياله ياخليفه تشعل في وسط قلبي حرايق وقت شوفتك .. ونزلت ميثه من السياره ودشت المدرسه وكان عليهم عربي وهي وربيعاتها مطفرينها مس العربي ... ..
فاخره : حوووووه امون وينها ميثوه مايت ليكون غايبه والله بذبحها ...
امنه : لا تخسي ماتروم والله ونتم نحن رقود في حصة هاي العنزه الضايعه ..
المس : امنه وفاخره بس خلاص حكي مابتخلصوا
ساره : ايييه خلصوا يلله سكوووت..
وتوها ميثه كان داشه ..
ميثه : السلام عليكم ..
وفاخره وامنه وساره وباقي البنات اللي وياهن من شافن ميثه شهقن ..
المس : وعليكم السلام وقوموا بوسها وحظنوها شو تستنوا
ساره : لا لا عقب هب الحينه ..
المس : بالله شوووه يله اقعدي محلك خلونا نكمل .. وراحت ميثه وقعدت على كرسيها المعتاد اللي كان عدال ساره .. وقعدت ..
فاخره ادق ميثه اللي كانت سرحانه كانت في عالم ثاني عالم اسمه خليفه ..
فاخره : حووووووه
ميثه : هاااااااااه شوه قاعدين في الزريبه مالومج مزروعيه
فاخره : شو هاااه هب عابينج المزاريع
ميثه : يارهم الله
فاخره : هههههههه اتحرا
ميثه : يله عاده امحق ويهه لا تنفخين ريشج وايد
فاخره : جوفي امون شو يايبه
ميثه : هههههههه ليكون شلق
فاخره : لا لا هب الحينه الشلق .. الشلق في رمضان والامتحانات ..
ميثه : عيل شو يايبه ..
امنه : اللله يسلمج يايبه معجون }صلصال{ بلزقه على الكرسي حق مس الرياضيات
المس : بس اخرسوا من الصبح عمالين تتوشوشوا انتوا التلاته اخر انذار فاهميييييين
امنه : هيييه ماعليه خير ان شاء الله امري انتي بس
صدت المس وكملت شرح ردت ميثه مره ثانيه وصدت على فاخره
ميثه : فخور عطيني بلعب فيه ..
فاخره : هاه يودي ..
ميثه : الااااااااه يجنن صبروا شوفن شو بسوي .. وتاشر على ساره ..
وقامت ميثه وخشت الصلصال في ثياب ساره
فاخره + امنه : هههههههههههه
ساره : نشت من مكانها الله يخسج ..
المس : قاعده تتطالع وليييييييييه اقعدي شو فيييييييه ... شو بكي .
ساره : مافي شي بيلس خلاص ههه الله يخسج ياميثوه
ميثه : ههههههههه ..
وتمن ميثه وفاخره يلعبن .. في الصلصال .. وخاست ايد ميثه وفاخره وامنه كلها صلصال ..
فاخره : مس بروح اغسل ايدي ..
المس : لا عدي محلللك
فاخره : انزين خلاص بقعد ..
ميثه : مس انا بروح عند الدكتوره ..
المس : لا ماحتروخي
ميثه و امنه و فاخره : ههههههههههههههههه ااااااااااي روخه روخه
المس : انا ماراح اشرح لين ماتتطلعوا برع اطلعوا برع ..
فاخره : قومن يله نظهر ..
ميثه : هههههه تعودنا دومنا برع
امنه : هههههههه استوا الويهه لوح يقولج ..
ويوم توهن ناشات وبيظهرن من الحصه لفت المس عليهن ..
المس : فاخره روحي اتحممي كمان مو بس تغسلي اايد يكي وانتي كمان انسه ميثه لو فيكي كمان تروحي للمستشفى بعد برع المدرسه روحي ..
امنه : اونها بعد علموها
ميثه : الله يخليكن طالعوا منوه ينكت ...... وظهرن من الصف ..
فاخره : الله يخسكن هههههههه

الظهر
خليفه كان راد من الدوام وكان وايد حاير من سالفة ميثه مايقدر ايقولها انه يحبها ومايقدر انه يتقدملها مني والدرب وشو بيقول وكيف بيتكلم وهي بعدها هب مخلصه وحتى هو روحه ماكان يعرف هاي في اي صف ... تم محتار ويفكر عند منوه يسال عنها عند منوه يقدر يحط سره فكر وماقدر انه يحط سره عند حد الا عند اخته نوف ..
خليفه : اوووووووه يانوف وينننننننننح عن بالي من زمان .. انتي الوحيده اللي دوم تفهميني واكيد بعرف عن ميثه كل شي من عندج ..
وصل خليفه البيت شاف امه واخته وحريم اخوانه وبنات اخوه يتغدن ..
خليفه : السلام عليكم ..
الكل : وعليكم السلام ..
ودش خليفه غرفته وبدل ثيابه وظهر من الغرفه .. وراح الخيمه عسب يتغدا هو كان يبا يكلم نوف بس ماقدر يقولها حتى انه هو يباها او انه يبا يكلمها جدامهم .. بعد ماخلص الغدا راح غرفة نوف ودق عليها الباب ..
خليفه : هلا
نوف : وغلا
خليفه : بقولج شي
نوف : قوول اصلا انته من اول مارديت من السفر وانته هب نفس قبل ودوم ابا اسالك بس هب رايمه لاني اتعودت عليك كل مايكون عندك شي اتي تخبرنيه اياه وها انته جداميه يله قول ..
خليفه : بس وعععععععععد يتم بيني وبينج ..
نوف : يالسخيييف ليش من متى بيني وبينك وعد او من متى اتخليني اوعدك شو مافي ثقه ..
خليفه : لا بس هالسالفه غير عن كل السوالف هاي سالفة هاذا .. وياشر على قلبه وبعدين اذا مافي ثقه مابيي عندج واخبرج
نوف : ياله سالفة هاذا عيل رحنا فيها ههههههه يله قول ..
خليفه : نوف تعرفين بنت خالتيه شمه اللي كانت تلعب وياكم هني يوم كنتوا صغار
نوف : اي خالتيه شمه يارتناا
خليفه : هي يارتنا
نوف : هيه احيدها بنتها ميثه هي ماعندها غير ميثه والريم وبعدين شو تلعب ويانا وماتلعب ويانا البنت استوت حرمه الحينه وماشاء الله عليها يا خليفه لو تشوفها ماشاء ماشاء الله اطيح الطير من السما .. وبعدين تعال لييييش تسال عن البنت شو تبابها .
خليفه : احبهااااااااااا .. وانا الطير اللي هي عقته ..
نوف : تتطالع خليفه وهي منصدمه وفاجه عيونها هاااااااااه تحبهااااااااا ويييين وكيف ومتى ..
خليفه : عنبووووووج اشعدنج اتريي خليني اخبرج ... جوفي اول يوم رديت في البلاد انا كنت قاعد انزل اغراضي من السياره وهي يت وفتحت سيارتهم وشلت شي من السياره ويوم شافتني اتغشت عني ودخلت بيتهم وسكرت الباب بسرعه في ويهي .. ومره رحت الجميعه وشفتها ويا امها وكانت رافعه غشوتها ادور اختها وربج راد اي انا احصل اختها وادور على هلها ويظهرون هم هلها ومره يوم عرس سعيد اخويه انا كنت توني بظهر من الخيمه وهي توها حادره شفتها واول ماشافتني انصدمت من كثر الصدمه قعدت تتطالعني وخلاف اتغشت عني وحدرت الخيمه .. ودومي اشوفها واتعذب وهي هب مفتكره واخر موقف صار اللي هو قبل يومين يوم شفتها في المارينا كانت ويا امها واختربت سيارتهم ووصلتها ويا امها البيت ... والله يا نوف احبها احبها افكر فيها غصبن عني كل ماسال نفسي ليش ماحصل جواب اتخيلي دومي اتصادف وياها دومي كل ماروح مكان اشوفها نوووووف انا في عمري ماكد جربت الحب وماعرف شو هالحب صح انها ماتمت بنت ماعرفتها وسويت وايد مشاكل ورحت استراليا اكمل لكن عمري ماحبيت و تخيلي انا الحين كم عمري .. عمري 24 وتخيلي انا في هالعمر وحبيت مع اني كنت واثق اني برد البلاد وباخذ بنت خالتيه سلامه وبيكون حبي الها لانها بتكون شريكة حياتي لكن الحينه لا سلامه ولا الف سلامه ولا الف بنت في هالدنيا يسوون ظفر من ظفور الشيخه ميثه .. سكنت قلبي شلت كل تفكيري .. ويوم ركبت ويايه السياره حطيتلها اغنية عيضه حكم القدر وقلت انا ماحبيت عيضه الا من عقب هالاغنيه عاد مااعرف فهمت ولا لا ..
نوف : الاه ياخليفه معقوله .. انته خليفه اللي ماتمت بنت مالعبت عليها اتحب اتصدق خلوف انا هب قادره اصدق عمري .. احس انه هاذا هب خلوف اخويه اللي جدامي ..
خليفه : عشان اتعرفين يانوف ان هالشي هب بكيفي هالشي صار غصب عني وخلاص طار قلبي جداها وماظن يعود لاي حد في الدنيا ..

نوف : وهي تتدري انك تحبها ...
خليفه : كيف بتتدري يعني هي منوه بيقولها .. يعني
نوف : انته تعرف انته اكبر عنها بكمن سنه
خليفه : كم ليش هي كم عمرها .. عادي لو حتى 12 سنه بعدني باخذها .. وماتخيل اني في وحده غيرها اتكون حرمتيه ..
نوف : 17 ثالث ثنوي .. يعني انته اكبر عنها بسبع سنين جانك ماتتدري يعني .. وبعدين اماايه شو بتقوللها انته تعرف امايه ماعندها هالسوالف واللي في شورها بتسويه ماعليلها لا منك ولا منيه ولا من حد ... ولاما تذكر اللي صار لسعيد .. يااخ خليفه ..
خليفه : اذكر .. بس مب اللي ماقدر غير يسويه انا بعد مااقدر اسويه بسويه وبتشوفين .. عادي وشو يعني ماتفرق الا هن 7 سنين في عيني ولا شي ...
نوف : خليفه انته اخويه وانا ماريدك تتعذب ..
خليفه : اذا صدق انتي ماتبيني اتعذب وماترضين انج اتجوفين اخوج جدامج يتعذب خبريها اني احبها واول ماتخلص بتقدملها .. بس المهم انها تتدري بحبي وماتم متعلق في امل نوف انا واصل من استراليا من ثمان شهور تعرفين شو يعني ثمان شهور وانا من اول يوم شفتها فيه وهي هب راضيه اتروح دقيقه من تفكيري واحبها لين يومي هاذا ومستحيل انساها بتم طول عمري بليا حرمه اذا ماخذت ميثه .. بموووت بموووووت تعرفين شو يعني بمووت ان ماخذتها حسي فييييني ارجوووج حسي فييني .,..
نوف : والله ياخليفه انته اخويه وانا مايهون عليه تتعذب جدامي هالعذاب وانا مالي غيرك ... ان شاء الله ياخلوف الله يحقق اللي في بالك ويسعدك فيها ... ويرضي ويهدي امايه يارب العالمين ..
خليفه : امييييين ..
نوف : بس ماخبرتني شو تباني اسوي ..
خليفه : ابااااااج اتروحين واتسوين واتقولين اللي بقولج عليه اوكي .. وماتقولين لا مابقول ولا لا عيب خلاص حطيت العيب جدامي 8 شهور بحالهن وهب قادر اتحمل زياده ..
نوف : انزين ان شاء الله ..
خليفه : هاليووومين
نوف : ان شاء الله هاليوومين ..
خليفه : مشكوره يااغلا اخت في هالدنياااااا والله لو هب انتي الله يعلم كيف بيكون حالي ..
نوف : والدموع في عيونها لاتقول جيه ياخلوف انا مالي الا غيركم اخوان ..
وظهر خليفه من عند نوف وراح يرقد في غرفته وراحت نوف عند امها في الصاله ..
نوف : امايه ... خالتيه شمه ماتيكم .
عزه : الا امبلا البارحه الصبح كانت عندي اشعنه تتخبرين
نوف : ماشي يامايه طرت على بالي بنتها ميثه ماشفتها من كبرت الا في عرس اخويه . .. والله خاطري اشوفها قووليلهم يوم بتي اتييب بنتها ..
عزه : انزين ماعليه ان شاء الله .. بخبرها ..
مايد ريل عاشه كان ياي يربع صوب عزه ..
مايد : عمتيه عمتييييه .. هوووود
عزه : لبيه الغالي .. اهداااا
مايد : عمتيه قومي ويانا عويش داقنها الويع جنها بتربي ..
عزه : يله يله هيد عليه بس نوف امايه قومي هاتي عبااتي ..
نوف : ان شاء الله ..
مايد : عمتيه اترياج انا في السياره ..
ويابت نوف عباة عزه وراحت ويا مايد وعاشه مستشفى الكورنيش وربت عاشه ويابت ولد وسموه فاضل على ابوها ...
عالسااااااااعه 8 المغرب
عزه : الحمد لله عالسلامه يابنتيه ..
عاشه : الله يسلمج يامايه .
مايد : اخيرا ياني الولد اللي اباه .
عاشه : هيه يله عاد الحينه اشتغل فيه .. ههههه ..
مايد : الحمد لله يارب ..
واحتلفوا كل اللي في بيت فاضل القبيسي عسب ربا عاشه .. وقومتها بالسلامه ..
يوم الاربعاء الصببببببببح ..الساعه 11
في بيت غيث ..
احمد كان توه يايب شمسه من المستشفى
ام حمدان : هاه يابويه رب ماشر شو فيها
احمد : اقووول ولا انتي اتقوليين ..
شمسه : لا انا بقووووول ..
ساره : شمييس حامل صح مبررروك مبروك الف مبروك قتلج البارحه يوم كنتي اتقولين جبدي لايعه قتيلي لا مااظني ..
شمسه : صدقتي يام غيييث .. الله يبارك فيج
ام حمدان : مبروووك يابنتيه الف مبروك تستاهلين ..
شمسه : الله يبارك فيج ياربي يالغاليه ...
احمد : انا ابوه انا مالي مبروك
شمسه : لا والله بصمت انه ولد . ..
احمد : هييييييه ولد
ام حمدان : ولد بنت مايفرق ..
سلطان توه كان حادر عليهم ..
سلطان : شو هو اللي ولد بنت مايفرق شو السالفه ..
ام حمدان : ماقلت مبروك لبنت خالتك حامل ..
سلطان : اويييييه حامل اونه مبرووووووك اكيد ولد احم احم بروح وياه العين مول .. بنغازل المزايين . .
ام حمدان : هب هباك الرب مسود الويهه مقصر .. انته
شمسه : هههههههههه ولديه ولد مطوع مايسوي هالحركات
سلطان : نعم نعم ياختي منوه اللي مطوع وياشر بصبعه على احمد هاذا .. هي اذا هاذا مطوع قوموا عني انا صراحه بنتحر ..واذا هو مطوع مره انا مطوع الف ..
ساره : تعال يالمينووووون وين رايح .
سلطان : صبري بنتحر وبرد لج ..
ام حمدان : يوم اقولكم هب صاااحي اتقولولي لا صاااحي الحمد لله والشكر يله هاه اتريي بينتحر وبيردلج تعال انته يالخديه كيف بتنتحر وبترد .. هاذا اصلا من بونه خديه وهاك اليوم بيروح المبزره ايقولي بروووح البحر اي بحر يلي هب صااحي وهزاع بعد وياه يقولي بنروح البحر اي بحر هاذا اللي في العين ..
سلطان : انتي يالعيووز اشعنه اربعه وعشرين ساعه اتقفطيييني هههههه انزين انا قتلج بحر ابا اجوفج تتدرين ان العين مافيها بحر ولا لا .... هههههه كيفي والله بلادي العين انا اقول الماي فيها بحر يعني الماي من وين ايي هب من البحر .. وانتي ليش اتصدقييييني
ام حمدان : مسود الويهه اتجوفني كبر يدتك اتقولي عيوز ... واللللللللله شدراني اتحرا سوو فيها بحر وبتروحله انته وهزاع وخلاف يوم قعدت افكر قلت وين هاذا بحر في العييين
سلطان : ههههههه مشكلتج مامااااااااااامي
احمد : اشعنه اتسبين يدتيه حليلها في القبر ..
ام حمدان : الله يرحمها ..
سلطان : ترا اليده الثانيه امج ..
شمسه : مالك خص في يدتيه ..
احمد : اوووه ويانا بنت بنتها هني هههههههه........
في التقنيه ..
روضه : ايييييه غايه في خاطرج اتشوفين مزيون ..
غايه : ههههه ادري بتراوني روميو مالج .. شايفتنه ..
روضه : هههههههههه لا لا هب روميو بتااااااعي براويج عمي اللي ارمسج عنه دوم المزيوووون ..
غايه : والله بتراويي شامسي مزيون ..
روضه : هيه نعم براويج اياااااه
غايه : يله راوييني
روضه : حبي ريلي اول ..
غايه : حبج برص ياربي راوييني اياااه بسرعه ابا اشوفه ...
روضه فتحت اللابتوب مالها وراوت غايه صورت سلطان ..
غايه : هااااااااااااااه لاااااااااااا لااااااااااا لاااااااااااا لاااااااااااااااااااااااااااااا
روضه : بسم الله الرحمن الرحيييييم شو فيييييييييييييييييج خوفتييني .. شو فيييييييج شو بلاه شو مسوي فيج

ظنكم نوف يوم بتشوف ميثه شو بتقولها .
ظنكم شو سالفة غايه ربيعة روضه ويا سلطان

الجزء الثالث عشر

غايه : لا رويض حلفي ان هاذا عمج ليييش ليييييش ... لا مستحييييل مستحيييييييل ...
روضه : يالسباااااله يالهبله شو فييييييييج شو سوا فيج خبرييييني
غايه : الجمعه اللي طافت كنت رايحه المبزره ويا هليه وشفته هناك قعد يرقمني ..
روضه : والشرار يظهر من عيونها وقامت اتير شعرها من الغصه .. وفصخت نعالها وقعدت تضرب غايه فيه .. بابقره انتي بقره اتعرفين شو يعني بقره انتي انقوووووووح ... من الصبح مروعتني انا قلت احينه مسوي فيها داهيه خاطفنها ومسوبها شي ... اقول تف عليج ولا مايحتاي
غايه : هههههههههههههه ههههههههههههههه الله يخسج ... بسي يعور النعال ...
روضه : تتادبين عافان الله محد صاحي شبلاكم انتوا كله تفلخوني هاك اليوم بنت عمتيه سوت فيني نفس الشي .. واليوم دورج اخر شي .. انا بتعقد بتعقد .........
غايه : صبري بخبرج السالفه ..
روضه : جب لا تقولين ..
غايه : لا بقول اول شي قولي ان هاذا عمج اف ياربي مزيووووون عنده رنج سوده صح ..
روضه : هييييييييه
غايه : انزين اقولج هاك اليوم كنت رياحه ويا هليه المبزره كان هو ووياه واحد بعد حليووو هيييه بس الحين عرفت يشبه اظني روميو مالج ..اللي كان وياه
روضه : شووو منوه هزاااااع قولي والله
غايه : هي اظني راويييني الصوره يمكن اتذكر ..
روضه : شوفي هاذا هو ..
غايه : هي والله هاذا هاذا حتى كان لابس كندوره حليبيه وغتره حمرا ..
روضه : هييييه يوم الجمعه يوم صباحية عمي منصور انزييين روميو مالي كان وياه ماعليه انا براويه ان مانتفت ريشه ..
غايه : والله حليله مسكيييييين هو ماسوا شي بس هاذا عمج اللي كان متخبل اقولج كنا نمشي انا وختيه العوده وانا كنت متغشيه .. وهوشافني شاله شنطة ديور جان يقول حق هزاع مالج اتصدق احلا ماركه في الدنيا كلها ديور والاحلى الاحلى القمر اللي شالنها ... وتم ينقل وخلاف قالتله اختيه بس عنبوك حفظتها حفظته روح ...وخلاف قال السموحه وحليله هزاع كان يسحبه ويوم شاف اختيه اتقول جيه روح عنه وخلا اروحه ..
روضه : والله هاذا سلطون مشاااااكل ..
غايه : هههههههههه الاه اسمه سلطان رويض والله انه قمر خليه يخطبني انا في خاطريه ريل شااامسي فديتج فديتج ..
روضه : هههههههههههه راحت عليج الريال خاطبيله ..
غايه : افاااااااا ليييش لييييييييييش وانا
روضه : لو عندي عم اصغر جان خطبتلج اياااااه صح تبين عبد الله اخويه
غايه : حلووو نفس عمه اباه ..
روضه : هيييييه حليووووو بس عيونه سود
غايه : لا امحق ماباه ابا عمه عيونه عسليات ..
روضه : الله وكبر كيف شفتيه يام اربع واربعين وانتي متغشيه ..
غايه : هههههه اللي يبا الصلاه ماتفوته ..
روضه : يوم اقولج ..
وتمن يكملن سوالفهن .. لين ماخلص الدوام وردن البيت ..,,

الظهر
في بيت حمدان الشامسي
عبد الله : ابويه عاده يله متى بتخطبولي ميثه تعبت من كثر ماتريا ..
حمدان : خلاص ان شاء الله يابوحميد تامر امر ... باجر ان شاء الله برمس ابوها وامها في الموضوع ..
ميره : يله ان شاء الله الله يوفقكم ويابعض ..
عبد الله : اميييييين .. بس ماعرف امايه احس ساعات انها ماتبااني ..
حمدان : اصلا ميثه وين بتحصل اطيب عنك وواحد يحبها وشرانها وبعدين الحي ابقا منن الغريب ...
ميره : صدقت والله رمسة ابوك هي الصح ياعبدالله ولا هالخرابيط شلها من بالك ..
عبد الله : ان شاء الله يامايه الله يسوي اللي فيه الخير السموحه منكم بستاذن الحينه انا ...
حمدان : مسمووووووح الغالي ..

العصر .. الساعه 4..
في بيت المر الرميثي ..
شمه : ميثه ميثثثثثثثثثثثثثثثثثه ... ميثوووووووه
ميثه هاذا الوقت كانت تتطالع خليفه اللي كان قاعد يلعب مع ولد اخوه علي في الحوش وهو كان حاس انه ميثه اتشوفه مع انها ماشفها لانها ماكانت تبين .. وكان قاعد يسوي حركات ..الا يرفع شعره عن ويهه وميثه مسكينه كانت رايحه فيها .. كل ماسوى حركه ..
ميثه : احبك احبك احببببببببك ..
الريم: ماماتي تباج انتي ماثماين ...
ميثه : اسمع بييها الحينه روحي عني ..
الريم : بكبر ماماتي اليج ..
ميثه : هاه امايه ...
شمه : عنبوه من الصبح ازقرج ..
ميثه : مامسمعت شو تبين ...
شمه : عاشه بنت خالتج عزه ربت جان بتين ويايه ...
ميثه : لا والله ومن متى انا مارحت بيتهم ليش تبيني اروح..
شمه : اليوم الصبح كنت ارمس خالتج عزه في التلفون وقالتلي جان بتون صوبنا هاتي ميثه وياج نوف تباها من زمان ماشفتها ...
ميثه: بعد انا ملانه وخاطري اسولف ويا حد ... ابا حد اسولف وياه بس متى بتروحين ..
شمه : الحينه بنتلبس وبنروح عالساعه 5 بنظهر
ميثه : خلاص ان شاء الله ..
وراحت ميثه غرفتها وشافت سيارة خليفه بس ماشافته .. وكانت اتقول في خاطرها تم لاتظهر من البيت بيي صوبكم ..وقامت ولبسة مخوره عربيه واتعدلت طبعا ولفت شعرها واتعطرت ونزلت عند امها ..
شمه : هاه بنتيه يله خصلتي ..
ميثه : هيه خلصت شو رايج امايه ..
شمه : شو راييي بعد ماشاء الله عليج يله روحنا ..
وراحت ميثه وياامها بيت قوم فاضل واول ماحدروا من الباب خليفه كان ظاهر الخيمه وبيحدر بيت عمه ... فشافهن وميثه كانت متغشيه وامها بعد ..
شمه : مرحبا خليفه شحالك ولديه ..
خليفه : مرحبا خالتيه بخير يعلج الخير شحالكم انتوا ...
شمه : بخير وسهاله يعلني افداك امك وينها ..
خليفه : امايه داخل خالتيه حياج الله اقربي اقربي ..
شمه : حد عنكم غريب ابويه ..
خليفه : لا ياخالتيه محد الا امايه وحريم اخواني وختيه .. حياج ..
شمه : الله يحيك ويبجيك ..
وطبعا هاذا كله ميثه كانت واقفه ورا امها وتقول في خاطرها .. عنبوه انا قلت اتمنى اشوفك بس هب اول مادخل اف يالهحظ ....وراحت شمه وبنتها عن خليفه وحدروا الصاله ..
خليفه : يالله يارب ساعدني ساعدني يارب وحنن قلبها عليه يارب الحينه نوف بتكلمها والله يعييين ..
شمه : السلام عليكم ..
عزه : مرحبا ملايين بمن يانا وانا اقول شبلاه منور البيت اليوم ..
وقامت شمه واتوايهت مع عزه : منور بهله يعلني افداج ..
وراحت شمه ووايهتهن كلهن .. وميثه راحت وسلمت على عزه وحريم عيالها اللي كانوا قاعدات حرمة سعيد وحرمة نهيان ..
عزه : حيالله بنتيه ميثه وين ماتينا ولا تنشافين احيدج يوم انتي صغيره اربعه وعشرين ساعه في بيتنا والحينه امره مول محد يشوفج ..
عفراء : ماشاء الله ياعمتيه البنيه كبرت واستوت حرمه ...
عزه : الله يخليج يارب
شمه : امين ويخليلج نواف وبنات نهيان وكل اخوانه يارب ..
عفراء : امييين يارب
وقعدن الحريم ياخذن علوم بعض وخلاف راحن عند عاشه اللي كانت قاعده في الغرفه اللي تحت في بيت امها .. موزه ونوف ونوره كانوا داخل عند عاشه في الحجره ..
نوف : عاش من شافج ياميثه وين ويين ياله عاده الحينه بذمتج جان امايه ماقالت حق امج اتيبج وياها جان مايتينا ولا شفناج ..
ميثه : لا والله حرام عليج بس اتعرفين انتي الدراسه ...
نوره : لا لا كلنا ندرس هاذا هب عذر ..
ميثه : حرام عليكم عاد انتوا كلكم الحينه مخلصات انا اخر سنه ..
موزه : هيه والله .. الله يعينج هاذا كان حالي السنه اللي طافت ..
ميثه : الحمد لله بس انج افتكيتي ..
تمن البنات يسولفن لين اذان المغرب وخلاف ميثه قالت انها تبا تصلي وودتها نوف فوق غرفتها وهن راكبات الدري ..
نوف : ميثه اوووه نسيت السياده بروح ايبها وبييج روحي اول غرفه على ايدج اليمين ..
ميثه : لا لا بروح وياج يمكن حد في بيتكم ..
نوف : منوه يعني في بيتنا اصلا اخواني كلهم محد والباقين برع في الخيمه مايحدرون البيت الا يوم يرقدون بس ..
ميثه : ان شاء الله خلاص ..
وركبت ميثه الدري وخليفه كان ياي من المسيد راح غرفته لانه نسى السويج ماله في الغرفه نسا يشله وياه لانه كان بيظهر .. كان يكلم الخدامه عسب تكويله السفره واتيبها السياره وكان بشعره وكان لاف ويهه يطالع الخدامه ..
وميثه كانت تركب الدري ومنزله عيونها وهب منتبهه اول ماوصلت فوق خليفه كان تو ه بينزل واداعموا واجابلوا بالويهه .. خليفه انصدم كان يتحرا هاذا اللي جدامه خيال ميثه هب ميثه ...
خليفه : والله احبج حتى لو كنتي خيال .. مايكفي انج دوم في بالي حتى في خيالي ياميثه ....
ميثه : انصدمت من هالكلمه حست انها خلاااااااص خلااااااااص فقدت كل روحها عقلها قلبها حست انها مجرد انسانه بلا احساس حست باحساس صعب انه ينوصف .. في هالدنيااااا ..
خليفه : هز راسه بس عسب يستوعب اللي صار وخلاف استوعب صدق انه اللي جدامه ميثه هب خيالها ..
انا اسف ..
ميثه : ماصدت صوبه وربعت على الغرفه اللي قالتلها عنها نوف ..
خليفه كان نازل من الدري مصدوم من اللي صار مصدوم من اللي قاله هو كان يتحرا اللي جدامه خيال ماتوقع انه اللي جدامه ميثه ... شاف نوف
خليفه : نوف الحقي ..
نوف : خليفه انته شو تسوي هنيه احيدك برع وماتحدر البيت .. اويه تعال ليكون شفتها ..
خليفه : شفتها قولي شفتها وبس شفتها وقتلها احبج ..
نوف : شووووووووووووووو ليييييييييش ..
خليفه : مااعرف ليش ماعرف لا تساليني انا ماعرف شي اصلا .. بس لا تنسين عطيها الرساله .. وراح عنها وماعطاها فرصه انها تكلمه او تقوله شي ..
نوف : هاذا الخبله شو سوا فينا انا برووح ولا بتكلم ولا بقولها يسد الفضيحه اللي سواها ..
دشت نوف على ميثه الغرفه ولا كانها عرفت بشي دخلت عادي بس يوم دخلت شافت ميثه قاعده اتصييييييح ..
انصدمت نوف الله ياخذ بليسك ياخلوف شو سويت في البنيه
نوف : ميثه شو فيييج
ميثه : لا ماشي ليش ..
نوف : لا فيج شي اشعنه اتصيحيين صار شي ...
ميثه : ومن دون احساس وماكانت تعرف هي شو كانت اتقول او شو بيستوي بعد الكلام اللي بتقوله .. قال الكلمه اللي طول عمري ماكنت اتوقع انه بيقولي اياها رحمني من العذاب اللي انا اتعذبه عسبه ليل ونهار ... يحبني نفس ماحبه يتخيلني حتى في خياله احبه احبه يانوف .. ماعرفت الحب والهوى والعشق الا على ايده هو اول واخر حب في حياتي اول انسان فز له القلب وارتجفت له الايد .. معقوله يازمن معقوله اللي صار نوف انا في حلم ولا علم ..
نوف : ميثه منوه هو خليفه
ميثه : هيييييه هيييييييه خليفه ..
وقامت نوف وحظنت ميثه اللي كانت دموعها على عيونها ..
نوف : قومي ياميثه وصلي واستغفري ربج ..ربج يحبج وهاذا الدليل انه خلاكم تتصادفون ويا بعض .. جان ماخيل لخليفه صورة حبيبته اللي من اول مارد البللاد وهو يحبها وسبحان الله هي طلعت تحبه اكثر عن لا هو يحبها ... عسب يقولها الكلمه .. وبيني وبينج اللي كنت بقولج اياها الكلمه بس الله ماراد انها تتطلع من لساني الله راد انها تتطلع من لسانه هو ..
ميثه : شو يانووووووف منوه شو اتقولين اول ماوصل البلاد ...
نوف : هي ياميثه اول ماوصل خليفه من البلاد ماشاف حد جدامه الاا انتي .. وحبج وبغاج ويطلب منج طلب واحد وبس ...
ميثه : نوف احس انه هاذا كله حلم .. كل شي هب متوقع احس انه كل شي صار بالغصب .. مااعرف مااعرف كيف اعبر .. بس يانوف انا طالبتنج طلبه .. ماريد حد يعرف باللي صار ولا الكلام اللي انا قلته ممكن .. وخصوصا خليفه ولو حتى سالج بينيله اني احبه بس من دون لا تقوليله انه هيه تحبك ممكن ..
نوف : افا عليج ياميثه ماطلبتي وانا بعد واعده اخويه بالهشي ومستحييييل ..
ميثه : نوف يعني خليفه يحبببني يحبنننننيي
نوف : يحبج والله ويموت فيج والله ياميثه لا ليله ليل ولا نهاره نهار حاله معتفس من اول مارد لبلاد... وهو يبا منج شي واحد ..
ميثه : شو ...
نوف : يباج اتلخصين دراستج وتشدين حيلج لانج اول ماتخلصين بيي يخطبج ..
تمت ميثه مستحيه ومنزله راسها في الارض وراحت وفرشت السياده عسب تصلي ..
نوف : فديت اللي يستحي انا ... عالعموم هالرساله من عند خليفه ..
وشلت ميثه الرساله وخشتها في مخباها ..
وراحن ميثه ونوف الصاله وقعدن شويه .. وخلاف راحت شمه وبنتها البيت .... اول ماوصلت ميثه الغرفه فتحت الورقه وحصلت مكتوب فيها ..
من عرفتك ابتدى عمري وانكتب في الحب ميلادي
ولا قبلك يابعد عمري كان امر الحب لي عادي
جيتني من دون مادري كالقدر من غير ميعادي
وانتشى بالشوق لك صدري كل يوم الشوق يزدادي
ياربيع الورد والزهري ياعطر يافل ياكادي
لك مسلم في الهوى امري لك ملبي قبل ماتنادي
ميثه احبج احبج وغلات الغالي احبج من يوم ماشفتج .... دخيلج اتريني واوعدج اني بكون لج الزوج المناسب .. اللي يريحج ويعطيج عيونه .. ياعيوني .. الغاليه كلام قلبي وايد بس مهما عبرت مابيسدني ولا بيوصل لمستوى حبج بقلبي ...
السموحه منج
خليفه القبيسي __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ياصاحبي ... وش خانت العمر والأيام من دونكـ	محروم.كوم	منتدى أخبار المواقع والمنتديات العربية والأجنبية	0	06-11-2012 02:30 PM
مَا يلذّ الوَقت دونكـ ، لو بغيتْ اتصـبّره ♡	A.albloshi	عدسة الاعضاء , كاميرا الاعضاء	15	02-23-2012 09:41 PM
يابوماجد2ما قدرة اصبر لبكره واستلم:-	محروم.كوم	منتدى أخبار المواقع والمنتديات العربية والأجنبية	0	02-23-2012 03:10 AM
فرصة العمر لشراء بيت العمر (جديدة) في مدينة السيلكون دبي على اقساط مريحه بالصوور	محروم.كوم	منتدى أخبار المواقع والمنتديات العربية والأجنبية	0	01-06-2012 11:10 PM
* ترى مهمآ بعادك عني طول .. آبصبر لآجلك آنته واتحمل وترجع لي حبيبي mms new	M حياتي والله M	هواتف , مسجات , وسائط , برامج , ثيمات , نغمات , بلوتوث	116	10-28-2010 06:56 AM