السلام عليكم ورحمه الله وبركاته ... وبعد

في الموسم الماضي جتني قصيده وحبيت انقلها لكم مع قصتها

انا عندي طير حر طيب حيل اسمه ( نوماااس ) وهو اطيب طير مر علي

حمر صافي ممسوع العمد وله عندي ثلاث سنوات ولا يوم هديته على

حظه ، كل الحباري اللي اهده عليهن كلهن بعد طيور ولا فرط ولا وحده

ولله الحمد والمنه ، المهم الموسم الماضي شريت طيور لاشارك فيهن

في سبااق طريف للصقور وبديت اجهز طيور السباق وانشغلت معاهن

ويوم جيت امشي لم طريف تركت نوماس بالاستراحه وقلت للعامل

لا تعلفه انا اكلم اخوي / مشعل ابو راكان وهو يعلفه لانه يعزه حيل

مشيت انا ونسيت اكلم مشعل عن عشاء الطير ويوم جاء اخوي

للاستراحه في وقت متأخر من الليل حصل الطير يكفخ على الصوت

سأل العامل ليش نوماس ما تعشاء قال بدر يقول انك انت اللي تعشيه


راح مشعل وذبح له علف وعلفه وكلمني وهو زعلان ليش مخلي نوماس بدون

عشاء قلت انشغلت مع طيور السباق ونسيته قال نوماس زعلان عليك

و المفروض كل الطيور اللي بالسباق ما تنسييك نوماااس وفعوله

ومن باكر وتصبحني هالقصيده على اللسان نوماس


قل للطيور اللي تنافس بالسباق ..

مالك فخر لو جبتي دروع وذهب ..

إن كان فرقك بالشلو والانطلاق ..

فرقي انا لامن تعلت للسحب ..

لاحل طير ، وخرب لوح للفراق ..

تسمع لصوت الآيكوم بإسمي صخب ..

حتى الذي مدحه وصل حد النفاق ..

اتقول طيره صايرن فارس عرب ..

لاشافها قامت تقطع بالزراق ..

جود سبوقه وقال طيري ماطلب ..

وقته وسيع الجو لاطرت به ضاق ..

ووقته كسبت إسمي بجهدي والتعب ..

\نوماس/ وتفسيره على أصغر نطاق ..

عوق الخريش اللي تنحرت المهب ،،!!


وتقبلوا خالص تحياااااتي

اخوكم / بدر العرادي