سالفة:التحدي وخشم البندق..قوافي

محروم.كوم · #1 06-14-2012, 04:30 AM

حياكم الله مشرفينا الافاضل
يامرحبا بأخواني.أخواتي المكشاتيه وزوارنا الكرام
سالفتنا مر عليها قرابة 60 سنه ويمكن أكثر
((رحم الله الحي والميت منهم))
مجموعه من الأصدقاء كانو برحلة قنص وجميعهم متوسطي العمر إلا واحد منهم كان بعمر 18 سنه وهو نسيب لواحد منهم..
بليله من الليالي وهم قاعدين عند النار او الضو واحد منهم اقترح انهم يلعبون لعبه للتسليه فكرو انهم يتحادون من يقدر يرفع البندق من طرف الماصوره اللي هو ..خشم البندق..
قعدو من يبدا يا يافلان ماقدر ودورك يافلان وعجز ودارت عليهم كلهم ماقدر واحد فيهم يشيل البندق ..
جا الشاب اللي معهم قال طيب وانا مالي دور ناظرو بعض ورد عليه نسيبه لاااايابن الحلال الحين ماقدرنا حنا تقدر انت :rهو داري انه نشيط ويخاف عليه يشيله وهم كلهم عجزو ..
المهم ان الشاب أصر إلا ياخذ دور مثلهم ..الرجال قالو لنسيبه خله يجرب حنا عجزنا بيقدر هو..
سما الشاب بالله ومسك البندق من طرف الماصوره ورفعه يوم طارت عيونهم :l فيهم من ذكر الله وفيهم من ناظر وشلون قدرت وحنا لا ومن هالقبيل..
تعشو وشربولهم على بيالت شاهي ونامو ..

يوم مر عليهم حول ساعتين او ثلاث ويصرخ الشاب من قلبه من الوجع ولا ايده من طراف اصابعه إلى كتفه وارم ويقوله نسيبه وشبك يقول مدري اوجس او احس تقل صيخ باصابعي :f
يالله الخيره وش السوات قم واحد من الربع وقال تراه فلان.. سمعت انه حوير شوي وهقوتي لازم نتزعده من نومه يقرا عليه وينفخ ..هذاك ما سمع حوستهم لأنه متطرف وفارش فراش له بعيد شوي وهو توه متعرف عليهم ماطلع معهم إلا مره او مرتين قبل هالطلعه..
راح له واحد وقاله .. ذاك زعل وحلف انه ما قصد ينظره او شي لكن ما يصير إلا خير..وراح عند الشاب ولاه غادي حوسه ومن الوجع صاير وجهه اسود وقعد يقراء وينفخ عليه وبسط طاسة ماء ويمسح ايده من طرفه إلى كتفه ألين نام ويوم جا الصبح ولاه طيب..
وبتل الرجال يقراء عليه يومياً ألين رجع كل واحد لبيته سالم..
تحياتي
اختكم
..قوافي..
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سالفة:عرس ليمونه..قوافي	محروم.كوم	منتدى أخبار المواقع والمنتديات العربية والأجنبية	0	05-20-2012 12:10 PM
سالفة:تيس الأصدقاء..قوافي	محروم.كوم	منتدى أخبار المواقع والمنتديات العربية والأجنبية	0	03-16-2012 03:20 AM
سالفة:دوج ابو عبيد..قوافي	محروم.كوم	منتدى أخبار المواقع والمنتديات العربية والأجنبية	0	12-13-2011 07:30 AM
سالفة:عرس حي العطايف..قوافي	محروم.كوم	منتدى أخبار المواقع والمنتديات العربية والأجنبية	0	11-03-2011 09:10 AM
سالفة:طين جدي.قوافي	محروم.كوم	منتدى أخبار المواقع والمنتديات العربية والأجنبية	0	10-11-2011 08:30 PM