لو انت مكانه وش تسوي ؟؟

محروم.كوم · #1 03-14-2012, 04:30 AM

مساكم الله بالخير ..

ابي اقول لكم سالفة لاحد من اخوياي مولع بالصيد وصادف موقف من احد القنوص الي مبتلين الصيد بلوى يعني مع الخيل ياشقراء .. يصيد عشان يقولون فلان قناص ..

ونسى ان الصيد مبداه ومنتهاه رجولة في رجولة والتزام بأخلاق الرجال ..

يقول خوينا :

فيه راعي مزرعة ابن حلال ولحية غانمة ومزرعته تجذب طيور الهجرة بأنواعها ومن زود حرصي على الصيد بدون مضايقة وعدم تنكيد على الناس سألت عنه حتى عرفت بيته لاني ماصادفته في مزرعته المهم رحت لبيت الرجال وتقهويت عنده وقلت له انا يابو فلان مستحي بالطلب الي جاي اطلبك به ( الرجال يحسبني ابي اخطب :d) قال تفضل حياك الله يابن الاجاويد قلت هو طلب محرج لكن انا يابو فلان رجال احب الصيد وبالاخص صيد هالطيور المهاجرة ومزرعتك بها الطيور الي ابي وهي مزرعة واسعة لكن والله اني مادخلتها حياء منك حتى استاذنك يمكن انك ماتبى احد يدخل مزرعتك ...

يقول تبسم الرجال وقال اجل راع ولع وصيد الله يلوم الي يلومك وانت رجال طيب ومعروفين اهلك مايحتاج كل هالاحراج واعتبر المزرعة حلالك وفيه بالمزرعة بركة ماء وعريشة خذ راحتك بها ولو يحصل لي اجي وتخليني اذوق من صيدك ..

يقول خوينا بصراحة طلعت من عنده وانا طاير من الفرحة لانه كلم عامل المزرعة وعطاه رقم جوالي وسيارتي ورقمها عشان يفتح لي البوابة ... المهم قنصت فيها واستانست اسبوعين ..وبعدها بكم يوم جيت الصباح والا المزرعة فيها عج وغبار سيارة تطرد ؟؟

دخلت مسرع والا البوابة مقفلة ناديت العامل وفتح لي واستغرب ؟؟ وقال انا فكر انت سوي كذا خراب مزرعة :d... قلت لاوالله توي جيت المهم رحت يم القناص والا هو حايس المزرعة حوس ويطرد داخل البرسيم الي توه محصود ولاعب بالمزرعة ورامي الرشاش المحوري يوم شافني جاي شد للموتر وابعد وانا الي الحقه ... ووراه وراه يااخوان وش متوقعين مسوي قليل هالمروءة ؟؟؟ قص شبك المزرعة بالزردية وخرب شبك الرجال ومزرعته !! المهم انحاش وانا وراه حتى لحقته وبالنهاية تمرجل ووقف ومعه 3 من اخوياه وانا لحالي يوم وقف جيت وراه واخذت رقم اللوحة وقفت جنبه راح طلع سلاحه وقال وش عندك تطردني ؟؟ قلت ليه تدخل مزرعتي وتخربها ؟؟ تدرون وش رد عليه ؟؟ مادريت انها مزرعتك ؟؟ قلت له تعرفني ؟؟ قال : لا ؟؟ قلت اجل وشلون تقول مادريت انها مزرعتك الا اذا انك تعرفني ؟؟ قال الحين وش تبي ؟؟ قلت ليه تقص الشبك وتدخل المزرعة بدون اذن انا لو ابي احد يدخلها كان ماحطيت شبك وحطيت بوابة ؟؟ قال دخلناه عاد وش عندك ؟؟؟ قلت ليه ترمى الرشاش وتطرد داخل البرسيم ؟؟ تدرون وش رد ؟؟ قال كيفي ..

يقول خوينا يوم وصل الكلام لكذا عرفت اني قدام شخص عديم المرجلة هو الي معه ..

قال العلم تلقاه قدام .. قال اعلى مابخيلك اركبه ....وراح

يقول رحت ابي اشوف الدمار الي صاير والا البرسيم محفور حفر من الكفرات من قوة الطرد والرشاش متشقق الليات الي عليه من اطلاق الشوزن وفيه حلال وغنم فكه الله منه ..

جبت العامل ووريته كل شئ وشهدت على كل شئ ومكان الشبك المقصوص ..

ورحت لراعي المزرعة في بيته حوالي الظهر وعلمته بالسالفة كاملة وطلعت معاه للمزرعة ووريته كل شئ وقلت انا مابيك تعتب علي تحسب اني خربت مزرعتك هذا رقم اللوحة وهذا مواصفات الشخص الي دخل ومايردك الا الامارة خذ حقك كامل ..

قال بيض الله وجهك وماني شاك فيك لكن لاتجي هالايام لان اكيد راح يكون فيه لجنة ودوريات واخاف يمسكونك بالغلط وانا راح اربي هالخايس ..

القناص للحين بالتوقيف ويرسل جاهات على راعي المزرعة عشان يتنازل عنه ..

السؤال :

لوانت مكان خوينا هل تفعل مثله والا تسكت وماكنك شفت شي ؟؟

اعتذر لكم عن الاطالة ..
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
لو كنت مكانه	محروم.كوم	منتدى أخبار المواقع والمنتديات العربية والأجنبية	0	01-05-2012 03:40 PM
[.. بسوي مثل ماشوفك تسوي وفعل افعالك \\ من صنع مزاجي الحب ..~	»●مزآجيئےآلحـب●«	تصاميم الاعضاء	11	11-18-2009 01:43 AM
يا ليتني كنت مكانه	محروم.كوم	منتدى أخبار المواقع والمنتديات العربية والأجنبية	0	04-07-2009 01:10 PM
تصور نفسك مكانه اشراح تسوي	الهنووووف	عجائب و غرائب	42	10-29-2008 11:38 AM
شو بتسو لو كنت مكانه؟؟؟؟	dreames ^_* girl	المواضيع المكرره	1	10-02-2008 03:00 AM