"-._." ابداااع الشعر .. " بعد سنتين " .. ملحلمة شعرية من كلماتي .. " -.

BiN_RaSHiD · #1 04-14-2009, 09:28 PM

بـــعد سنتـــين ..

تعاتبني بعـد سنتين وتكثر ف العتب واللـوم

ولا كنّـك بديت البعْـــــــــد والفرقـا قبــل سنتين

بعــد مادارت الأيّــام تجـــــي وتْقــول وين اليـــــــوم

قبــــــل سنتين ويـن انتـه وهــذيك المحبّة وين

بعـــــــد ما كنْت لي دنياي وكنت ف جنّّتـك مغـروم

وكنت الروح لي والقلب وكنت النور وسط العين

تعاتبنــــي ونا اللي كـم تمنّيت الغــرام ايـــدوم

رخصْت العمْر كلّه لك ولجْـــل اعْيونك الحلْويين

إذا جانــي النّهار أجلس معــك لين النهـــار ايقوم

وقوم أويــاه ودموعـي تشاكــــي لاعجات البين

وذا جانــي ظلام الليل أمــــوت بشــي أسمه نــــــوم

ولو انّّي خصيم النّوم ولكن لجْل أشـوف الزّين

وكم وكم حسدت أعيوني وطيفك بها مظموم

وقلت الله يا ليت العمــرْ يبقى معـــــــك عمرين

أنا مانســا سؤالك يوم تسألني "حمدان" مهمـــوم

وحــدْ يهتـمّ يوم اشوفك ويحْظنْك بالليدين

وشــم من طيبك النرجس وطيب الورد والمشموم

إذا اتْحـدّر مع حــرّ النهــــــــار وســال ع الخدين

وحسن ٍ فيك منه تْغــــــــــار يا سيـدي عـــذارى الروم

ووجهك والبـــدر واحـد تناصف بينكــم نصّين

وعرْنينٍ خنس وانْدق وقف كالفيصل المصـــــروم

وزجّــــج حاجبين دقـــاق وعـــادً كنّهن قوسيــــن

ومنطوقٍ سكــــن ثمّـــك كأنْه الكــــوثر المختــــوم

جرى في أذْني جرْيان المطر في ارْض عطْشا اسنين

وبين الشّفّتين إسيل خمْــــر الجنّة الموســــــوم

شربْت مْنه غرام وحبّ واسْقيتك منه كاسيـن

وعنــقٍ جمّله لونــــك وزانه عقـــــدك المنظـــــــوم

يســـــــرّ الناظرين وتفْتديه اعْيونــــــي الهنتين

إذا يمشـــي مــع مثله تخــــال أنّ الثنين اريـــــــــوم

دقيق ابمشيته كنّه إذا يمشـــــــي على الحدّين

تمايل وانثنــــى كنّــه مــــع بعظه صبـــــــــح ملموم

تقاطــــر منّـــــه الرّقّة نعومه كلّهـــــا مـــــعْ ليــــن

وكفلٍ يسبح ف كفلٍ يغوص ف خصـره المهظوم

شكـــا من ثقْله المتْنين والخصرين والردفين

بعينــي هذي أوصافك وفــــي قلــبـي المحبّة دوم

لهينا ف الزمن هذاك بجسمٍ واحــــــد وقلبيــــن

تكلّمْنــي كـلام الحبّ واشْــواق الغــــــرام اتْحـــــــوم

تقول الله يخلّينــــا ليوم المــــوت وقــــول آميـــن

تطمّن لو بحت سـرّي أنا سّـــــــــرك معـــي مكتوم

بقايا عايش اواياهــا جميله كنّهـــــــــــا العيدين

حبيبي هذي أشواقي بقا الها ف الفواد ارسوم

أنـا باقـــــي علــى ذاك الولـه والــــــود لين الحين

ولكنْها سهام البغض منّك جرّعتْني اسْهــــــوم

تلقّيت السّهم منّك بقلبـي الحانــي المسكين

وحاولت اتّقي هجْــــــرك بصبْر العاشــــق المكلوم

وظمّــد من نيا بعْــدك وصـدّك والجفــــا جرحين

وقوّي عزمــــي الصابر وجلّــد بالعــــزوم اعــــــــزوم

وقول الله ياقاسـي تمهّــــل والعمــــــر يومين

بعـــــد ما ظمّتـــك يدٍّ غريبة والوفـــــــا معــدوم

تمهّـــل وبْشـــــر ابْدينك تــرى لا بــد يردّ الدّين

أنا م دعي على مثلك ولا هـي دعـوة المظلوم

أنـا مانـي مثـــــل ياللــي يردّ الصّـــــاع بالصاعين

ولكـني بشـر أخطـي وصيب ولانيه معصـــــوم

أجازي الطيب مثله طيب وبعد عن دروب الشين

طباعي ما يكدّرها دنيّ النفس وكــل مسمـوم

تعوّدت العـــــلا دايم ومثلي ما يدوس الطين

إذا غيري صغير العقل أنا فعلي كبيــــر القوم

إذا شــان الفعــل مـــــــرة أرد الزيــــــن له مرتين

عزيزي لا نته الكسبان في بعدك ولا المهزوم

و لكـن من وطــــى نارين لابــــــــد تحرقه نارين

منازلك الغنية صــارت أطـلال وسكنهــا البـــــــوم

وغادرها الفـــــــرح لما نعــق فيها غراب البين

أنا حظّي أعيش ابدونك أيامــي وذا المقسوم

خلاص أطلــــــع من أفوادي بدال الباب لك بابين

بعد ما مرّت أيامك بعمـــــــــري مثْل طيف أحلــوم

وعشْت ابدونـــــــك أيام الوله ياهاجــري عامين

أنا م ندم علـــــى وقتٍ كتبه الله علـــيْ م يـــدوم ْ

عســـــى ياتــي العوظ منّه وحبّه للأبـــــــد حبيّن

وهذا اليوم عيش وحسّ مرّ العاشـــــق المحروم

خلاص اشرب من الكاس الذي شرّبتني سنتين

ســـوالــم ..

كلمات : بن راشد .. __DEFINE_LIKE_SHARE__

غلا البحرين · 04-14-2009, 11:32 PM

روووؤؤؤؤؤعه

صح السانك

ثانجسوو ع الطرح

و الله يعطيك العافيه

و لــآ تحرمناا من اليديد

و الله يوفقك __DEFINE_LIKE_SHARE__

BiN_RaSHiD · 04-15-2009, 07:26 AM

صح بدنج ..

وتشكرين ع الرد .. __DEFINE_LIKE_SHARE__

الرهيب القطراوي · 04-15-2009, 10:44 AM

كلمات في الروعة يااخيييييييييييييي BiN_RaSHiD وصح لسانك يابن راشد وتقبل مروري.......

& كلنا واحد * وخليجنا واحد &
__DEFINE_LIKE_SHARE__

BiN_RaSHiD · 04-15-2009, 11:33 AM

صح بدنك .. وماعليك زود

اشكرك على المرور .. __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
""""""""مطلوب لكزس lx570 الدفع كاااش """"""""""	محروم.كوم	منتدى أخبار المواقع والمنتديات العربية والأجنبية	0	07-19-2010 03:50 AM
"""""""""""""""""""""""""""فساتين زفاف راقية ومميزة """"""""""&am	محروم.كوم	منتدى أخبار المواقع والمنتديات العربية والأجنبية	0	07-13-2010 12:00 AM
"دويتشه بنك": "إعمار" و"الدار" و"الخليج الأول" و"الموانئ" شركات واعدة	محروم.كوم	منتدى أخبار المواقع والمنتديات العربية والأجنبية	0	04-22-2010 09:30 AM
"سيتي" يصدر تصنيفات إيجابية لـ "إعمار" و"الدار" و"العربية" و"الخليج الأول"	محروم.كوم	منتدى أخبار المواقع والمنتديات العربية والأجنبية	0	09-29-2009 01:20 PM
"""""للبيع باترول سوبر سفاري موديل 99 ديزل """""""""	محروم.كوم	منتدى أخبار المواقع والمنتديات العربية والأجنبية	0	04-28-2009 02:40 PM