رحلة الكوابين النوابغ الى الشرقية عام 1409 ه ..بدون دراهم ولاسيارة

محروم.كوم · #1 12-12-2011, 09:30 AM

<div>
يالله ان تحييهم

وش هالسوالف الزينة وينا عنكم من زمان اثرنا لاهين في الخيام والقزوز وغافلين عن حتسياتكم الزينه

بصراحه لي أكثر من شهر اقراء سوالفكم وحكاياتكم كلبوكم (مخاوي مخباته - التلميذ وراعي العجراء اوالعوجا ..صح كتبت المأسي ولا صححو لي

المهم مالكم بالطويلة

الرحلة بين عامي 1409 و1410 هجرية اجل ميلادية وكانت عطلة ربيع

ابطالها أربعة كوابين وأنا أكبنهم
ولد عم العقل المدبر
ولدجيران مع الخيل ياشقراء فديغ لكن خدوم
ولد خال نجس مره ودب وعلية مخمس يوزن بلد لو سطرك جلست تعوي شهر
ومحاكيكم راعي الفرت لبى قلبه

كنا ساكنين وقتها في الفاخرية وافقت اجازة الربيع وكل الناس ر ايحه ومسافرة الا حنا والكوابين نتعبث في الحارة وما نخلي أحد في حاله لو يمر قطو طقطقنا عليه من الفراغ
ومن على عتبة الباب مجلسنا الدائم ومخابينا دايم فاضيه مهنا دراهم ولا بلاي ستيشن حتى الفديو نسمع به فقط تخبرون الناس ذيك الأيام محافظة جدا ويازينها من أيام ليتها دامت لكن الله يرحمنا برحمتة ....

ولد العم خمت معه وش رايكم كل الناس في الهاف مون مخيمين وفالينها طبعا وقتها الهاف مون وجهه كل الشباب جاله وقت لاينساه من عاصره كنه النمسا عندنا واحلى ..>ايه هين
ورى مانروح انا رفضت وش بتروح عليه طيارة مثلا اللي مابعد شفناها الا في التلفزيون والسما ولا القطار اللي مامعنا دراهم نركبه قال ولد الجيران الأفدغ مالنا الا نروح مشي يعني مسكرة مافيه حيله ....
والعقل المدبر يفكر ويفكر قلنا هااااااااااه نروح ولالا
قال نروح
قلنا كيف
قال اختارو احد هالونيتين اللي مشخصه قدامنا وكانت دايم واقفه في وجهه بعض
ددسن جيرانا ومسافرين
وهايلوكس غماره موديل 82 حق البيت والمقاضي ودايم واقف مطربل عليه شراع مغطية من ساسه لراسه من خوف الوالد عليه ..>الله وأكبر ياللكزز بعناه وهو جديد على سوداني بخمسه راح وقته حدر الشجره بلافايده
قلنا هات وش بعد
قال حق الجيران ما يصلح لنا ان انقفطنا صارت سالفه ومشاكل وشرطة
وهايلوكسكم اقرب ماله طيب وشلون بيدرون أهلي قال ماعليك بس توافقون
قلنا هات قال بنوقف ددسن الجيران مكان الهايلوكس ونغطيه بنفس الشراع وعلى أنه هايلوكسكم و موتر الجيران محد منتبه له أهله مسافرين أصلاً

نفس هالهايلوكس واللة انها مواتر سادت ثم بادت مايطلب الا بنزين وزيت ونم

كمل يالخبل ....اسمه كذا مدري تذكرونه حول منفوحة
أول مادخلنا كلن ينطل حكي علينا
اللي يقول ابد سارقينها أجل ورى ماربطوها
والثاني يقول من أي مسجد ساحبينها

المهم حرج لا تحرج
ومن 10 ومن يزود
وبخمسين تبيعون ومن يزووود
وصلوها اذكر 120
قال الفديغ قطتنا 150 وبنروح للشرقيه مانبي غيرها قايلكم كمخة
سطرته وقلت أنطم لاتحكي الزود بنغير فيه الزيت تراها هايلوكسنا

وها وهاه ومنا ومنا قالو مالكم الا 200 اي والله نعمة وهات الميتين قال لفديغ لو صبرتو وموصلينها الى 500 كان ماردنا الامصر آمال وطموحات ذيك الأيام
وطيران
وعلى بيت الدب وحملنا الأغراض وكلش تمام ..>آخر شي نفكر فيه تبليغ أهالينا جعل ماجاهم تكفير
جينا لمشكله حجز المقاعد وشلون حنا أربعه والدب عن 3 أشخاص فخذه لحاله كنه سيخ شورمة الصاج أول ما يحطونه العصر
العقل المدبر هات ماعندك
قال الدب يركب في الصندوق وهو يسمع ....جاه هزه خفيفه من الدب حركت كتفه وخلته خلف خلاف
قال الدب نزلو العزبه وانقلعو ولا مقعدي على الدريشه
التفتو على راعي الفرت محاكيكم قالو يالذيب الصندوق الله لايهينك والدب مايحبني وكان مبسوط ويتبسم أمس طاقني بلاه وبينتقم زود قايلكم نجس مره

قلت أنا لالا هايلوكسنا وتركبوني في الصندوق ياللي ماتستحون قالوا لايكثر هذا الحل الصعب

ولاهههههههه بررررررد قارس قلت وشلون برد قالو بنرفع الخيمه على الغماره واندعس حدرها وخل فروتك عليك وتلحف وبنفتح الدريشه اللي ورى وكنك معنا
نعن ابو بليسكم تراها 400 كيلو ميب مشوار لعليشه
وافقت وش اسوي
واللة وينطلوني مع العفش كني عجيله ..>وهي أصغر انواع البقر
ان رفعت رجلي طاح قدر وان نزلتها طاحت على بريق ذيك الأيام مافيه شنطة السنيدي ولادلع كلش منطل في الصندوق

<div align="center"><font size="4"><font color="dimgray">وصلينا المغرب على الخط القديم كان رايح جاي وضيق والشباب فالينها في الغماره وانا مدخل وجهي مع الدريشه والدب النجس ان ذكرني رجع راسه بقوه وعلى وجهي وأنا كل شوي ازعق واحوسه ياماعط شعره بالغلط ولا كاب مويه عليه ولا مدخل عود في اذنه بنتقم منه مايقدر يسوي لي شي انا وين وهو وين .....ومافيه الاشريطين معنا سامري وشريط للدب دايم في مخباته حتى لو هو نايم لو تدرون وشو جوه ........ __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
مطلوب : رحلة صيد في الشرقية ثاني ايام العيد	محروم.كوم	منتدى أخبار المواقع والمنتديات العربية والأجنبية	0	08-28-2011 09:30 AM
تقرير رحلة ضيوفنا من الشرقية والبحرين الى ينبع	محروم.كوم	منتدى أخبار المواقع والمنتديات العربية والأجنبية	0	09-29-2010 11:00 AM
فزعتكم أبغا قارب يطلع رحلة صيد من الشرقية لـ أكثر من 10 أشخاص	محروم.كوم	منتدى أخبار المواقع والمنتديات العربية والأجنبية	0	08-03-2010 04:20 PM
تعرف رحلة غوص في الشرقية يوم الخميس القادم؟ 5/8/2010	محروم.كوم	منتدى أخبار المواقع والمنتديات العربية والأجنبية	0	08-03-2010 04:20 PM
1409	محروم.كوم	منتدى أخبار المواقع والمنتديات العربية والأجنبية	0	03-23-2010 11:50 AM