مع خالص "احتقاريـﮯ " محبوبتگ لعام 2007 م - الصفحة 13

! ĐįƠЯ ƒάṦђịǑη ! · 12-19-2011, 10:28 AM

"17"

من اذن الفجر ... نشت اليده وتوعي علايه ...

اليده : عليوه عليوي ..

علايه : اممم اوكي انا بسير بركض

اليده : غربلج الله ياعليوه شو تركضين ؟؟

علايه تنتبه : هااه الساعه كم ( وتطالع الساعه ) يالله بنش

نشت علايه تسبح ع السريع وطلعت برع وهي تنشف شعرها ومجابله الحرم وتقول في خاطرها " الله كريم " ..

كانت نفسيتها مرتاحه اتحس انه بيكون منها فايده في ها الحياه... ومستانسه ... وتدعي ربها انه الحلقه المفقوده في السالفه ماتنكشف ...ع الاقل قبل العرس !!

يلسو في الحرم يصلون وخلصو علايه تمت تقرا قران وتحاول تراجع الاجزاء اللي نستهن ... شويه ورن تيلفونها وشافت مكتوب ع الشاشه " امبيدو "

علايه : هلا اواللللللللله

احمد شويه متضيج : هلا عليوي

علايه بصوت خفيف عشان محد يسمعها : بلاك ؟

احمد : علايه ابا ارمسج

علايه : رمسني

احمد : عن خطبتج ..

علايه : انا اللي ابا ارمسك ..

احمد : شو

علايه نشت عنهم وتمت تمشي في الممر: دخيلك مابا ابويه وامايه يعرفون تراه ..........................

احمد منصدم: جذااااابه يعله في ذمتج

علايه : اولله احمد دخيلك ها الشي خله بيني وبينك ...

احمد يبا يقنعها تهون: عليا هاي حياه .. وعمر .. ودهر .. مب يوم ولايومين ..

علايه باقتناع : انا راضيه

احمد : ترضين بـ ..........

علايه تقاطعه : هيه راضيه بس احلفك بالله ماتخبر امايه وابويه ولا اي حد

احمد : تراه محد يعرف الا اقرب الناس وماتوقعت انج تعرفين ..

علايه قلبها بدى يدق : ان شالله خير

احمد يرمس بحسره : طول عمرج يابنت اخويه تحبين المغامرات .. تحبين التضحيات .. تبين تخلقين لج لحظات ...

علايه تقاطعه : اخلق لحظات حلوه للي يحاتجونها مب لي اانا

احمد يبتسم لانه حس انه علايه مرتاحه : فديتج والله .. احبج عليوه

علايه تضحك : ههههه فديت عمي والله لاتغازلني انا في الحرم اخلاف برمسك

احمد : اوكي فديتج لاتنسين اتصلي وانا برمس ابوج

علايه : ما اوصيك

احمد بضيج شوي : ان شالله ..

وسكر احمد عنها وهو متضيج مايدري كيف بنت اخوه تفكر ؟؟؟ علايه ردت مكانها وامها تبا تسالها ...

ام محمد : ها عليا شو رايج ؟؟

عليا تطالع الكعبه وهي تبتسم : امايه انا استخرت ربي ووايد مرتاحه ... وان شالله خير

ام محمد : يعني شو نرد ع العرب ..

عليا تصد ع امها : انتي مرتاحه

ام محمد : هيه فديتج ..

عليا تطالع يدتها : اونتي يالغاليه ..

يدتها اتغبت : والله ياعليا انا فوادي اشوفج وانتي عروس .. وربي يعلم كم ترجيت احمدوه يعرس بس يقول لي مب وقته ... ويوم انه احمدوه مشيبني ... خاطري اشوفج انتي يالطويله عروس

علايه تضحك : ههههههه ان شالله

ام محمد استانست : يعني مواااااااااااافقه

علايه تهز راسها " هيه " .. وتطالع فرحة امها ويدتها وتدري انه ابوها اكيد بيتسانس ..بس هم مايعرفون شي ... الشي ها وايد خاص .. واايد سري .. ومايعلم به الا اشخاص ينعدون ع الاصابع .. واخر ها الاشخاص كانت " عليا "

طلعو من الحرم ويلسو كلهم في التوسعه وبو محمد مستانس من رد علايه

بو محمد : انا خبروني انه الريال زين وماعليه كلام وهم توهم منتقلين دبي الا من شهر .. اصلا كانو في العين ... وكل حد يمدحه ..

اليده : فديت عليوه العرووس

ام محمد : بس تراهم مستعيلين ... يعني يبون العرس عقب شهر

علايه فجت عينها :لا شوووو شهر

ام محمد : مستعيلين يامايه ..

بو محمد : انتي ماوراج جامعه وان شالله كل يوم بنوديج تتزهبين وبتخلصين

علايه نزلت راسها : والمحل ؟؟

بو محمد : انتي سويتي الي عليج .. وكفيتي ... لو ريلج يباج تسيرين المحل بتسيرين .. لو مايبا بتخلين المحل ..

علايه : ان شالله ...

تمو يسولفون عن العرس وعلايه كانت نفسيتها مرتاحه .. كانت كل يوم تسير الحرم وتدعي ربها انه يهني سعيد قبل لايهنيها .... !! وتحاول تنساه لانه خلاص بتكون ع ذمة ريال مايستاهل الا كل خير ..

العد التنازلي لعرس علايه بدى .. ومن ردو البلاد ويوو يخطبون الرياييل رسمي ... انتشر الخبر بلمح البصر .. انه فلان الفلاني .. خطب عليا خليفه الـ ....

ليلة خطبة علايه .. علايه يالسه ويا الحريم داخل ... كانن حريم طيبات ... وعايله على نياتها .. ماعندهم الا بنت وعرست .. و3 اولاد ... واحد ومعرس .. والثاني ريل علايه .. والثالث يدرس في التقنيه بعده ..

علايه يالسه بين الحريم في الصاله ولابسه جلابيه حمرا فخمه ومتحنيه كانت طالعه ناعمه وايد ... وحاطه ميكب خفيف .. شويه يت ويلست حذالها اخت المعرس

نوره ( اخت المعرس ) : هلا والله بعروستنا ..

علايه : ههه اهلين ..

نوره : ممكن نسير ارواحنا ..

علايه : هيه

علايه يودت ايد نوره وسارو فوق حجرتها .. فتحت عليا الباب وحصلت ميروه اختها يالسه ع الاب توب ..

عليا : ميروه شو تسوين

ميروه بعيون زايغه : والله االعب

عليا : هههههههههههه انزين شليه وياج برع

ميروه استانست وع طول شلت الاب توب برع وسكرت الباب وراها .. علايه التفت لنوره اللي تطالعها من الصبح

نوره يلست ع الشبريه واشرت لعلايه تي وتيلس حذالها ..

يت علايه ويلست حذالها

نوره ترمس بحنان : عليا عندي رمسه من المعرس لج ... انتي اذا ماتبين تربطين عمرج بواحد شراته اللحين ترومين تردين عنه

علايه : انا مقتنعه والله

نوره دمعت : انتي والله انج اصيله ... ماتعرفين كيف اخويه استانس ... والله انه مستانس .. علايه سعادة اخويه وياج صدقيني بتكون وياج والله انه غالي عندي ها الانسان ماتتخيلين كيف احبه .... وانتي طيبه ياعليا وايد طيبه

علايه : انا ماسوويت شي لاتشكريني .. تراه حالي مب احسن من حال اخوج

نوره تبتسم : عشان السكري ... ماعليه حبيبتي ... ربج كريم

علايه ابتسمت لها .. رن تيلفون نوره وكان ريل علايه .. نوره غمزت لعلايه : ههههههههه بعلج

علايه استحت ونزلت راسها ..

نوره : لو طارين مليون جان زين .. هيه هيه استريح يالسه وياها .. شو قالت ..؟؟ بخبرك يوم بنرد .. اللحين خيبه مستعيل .. لا لا اخلاف ... بس عاد لاتحشرني . ههههههه فديتك ان شالله يوصل.. لا سلامتك .. انزين بقولها

نوره تصد على علايه : يقولج المعرس تامرين شي ؟

علايه بصوت خفيف : لا سلامته

نوره : ههههههههه ياعيني .. تستحي .. تقولك سلامتك ... ادري انك ماسمعت صوتها اطمن مابترمس .. لاحق لاحق عرسكم وايد قريب ... ان شالله .. تحمل ع عمرك فديت روحك .. يالله الغالي .. فوداعة الله

سكرت نوره عن المعرس وصدت على علايه ...
__DEFINE_LIKE_SHARE__

! ĐįƠЯ ƒάṦђịǑη ! · 12-19-2011, 10:29 AM

نوره : علايه تبين ملجه

علايه بخوف : لا مابا .. دخيلج دام انه العرس عقب شهر الملجه مالها داعي دخيلج

نوره شكت في تصرفها : خلاص براحتج

ونشت نوره : يالله ننزل عيل

علايه : ان شالله ..

نزلو تحت واتعشوو وعقب روحو ..

علايه ترمس امها : امايه ترني مابا ملجه !

ام محمد : ليش عليا احلى وقت الملجه ...
عليا : لا امايه ماعرف جي ... دام انه العرس عقب شهر ماله داعي ملجه ماروم اجهز لمناسبتين تكفيني وحده

ام محمد : فديتج والله ... ( وحضنت بنتها اللي كبرت واستوت عروس )

شويه ويسمعون عالباب .. : هوود .. هوود

علايه تزاعج : امبيدووووووووووو

احمد يوايج : هههههههههه عيوووووووووووونه

علايه : بات عندنا ليوم

احمد : هيه انزين ان شالله ريلج العور بييب لي ثياب ولاجان بسبح وباخذ من ثيابج

علايه تفكر : امم هيه صح عندي بجامه سبورتيه ..

احمد : هههههههههه عشان يطلع عليه القميص طالع البطن والبنطلون برمودا .. والله شكلي بيكون دلع

علايه تفل شعرها وتصد على امها : امايه انتو شو مخليني البس اليوم والله ماحب ها اللبس احس اني لابسه خيمه

احمد يتقرب منها : مين أدك ياعروس .. ( ويغمز لها )

علايه تضربه ع صدره بالخفيف : جب نتفاهم بعدين

احمد يصد على ام محمد : هييييييه حركات البنات ... اونها مستحيه اشك انج تعرفين تستحين ..

حمود نازل من فوق وحاط اغنيه في تيلفونه : اييييييييييه اليوم عمي احمد هني يعني انا مابرقد ع الشبريه

علايه : جب مالك خص .. خله كيفه

حمود يغمز لعلايه وينش يرقص رقص غبي ويدور في الصاله : ياعيني ع ا لعرووس .. ( ويغير الاغنيه في التيلفون ) صبووحه خطبها نصييب .. هيييييه خطبها نصيب

علايه عصبت : امايه طالعيه ..

ام محمد تضحك : هههههههههه خليه

حمود ييلس ويتعبث في تيلفونه : اميه ..

ام محمد : عونك

حمود : ابا يخطبوني شرات عليوه ... اشمعنى عليوه تخطب هاك الطويل وانا ما اخطب

احمد : هههههههههههههههههههههههههههههههه اونه اختك اللي خطبت .. اختك انخطبت .. هو اللي ياها مب هي اللي سارت له شو وين عايشين في الهند ..

ام محمد : هههه ان شالله يوم بتبكر اخلاف وبتغدي ريال بنخطب لك ..

حمود : يعني انا مب ريال مثلا اللحين
احمد : صخ صخ انا اللي اكبر عنك بعشر سنين ماخطبت تي انته ياالنتفه وتبا تخطب بعيد

علايه صدت عليه : بتخطــــــــــــــب !!!

احمد : ويا ها الراس ... امره ماتصدق ..

علايه بوزت : انزين برايك بسير اصلي وببدل ثيابي ..

احمد يطالعها ويدعي له في خاطرها ان الله يهنيها .. موقفها من خطبتها وايد كبير ... قام يفتخر ببنت اخوه ... !!

سارت عليا فوق وجيكت تيلفونها وحصلت مسج .. بس مسج من حمدان وكاتبلها " مبروك شريكتي في المحل .. بس بعد ها لمره خونتي فيني .. تبيني اعرس واتعرسين انتي قبلي ... ع العموم الله يهنيج يالغاليه .. "

ابتسمت علايه للمسج .. ماحبت في حمدان كثر ماحبت طيبته ...

.................................................. .................................................. ......................................

عقب الخطبه باسبوعين ... وقبل العرس باسبوعين

دش حمد البيت وهو متضيج كانت الساعه 1 ونص ... من يوم انخطبت علايه .. وهو خلاص بدى يفقد خيوط الامل في رجعتها ... له ..!! كيف ترجع له وهو معرس اصلا من غيرها .. ويفتح الباب بهدوء عن تنش غايه ..

وطالع غايه منسدحه ع الشبريه وحاطه ايدها ع عينها .. طالعها وهز راسه ... وحط غترته وعقاله ع الغنفه ويلس ومسح ويه ..

غايه نشت ويلست : انخطبت ..

حمد صد عليها وعيونه حمر : هيه

غايه : زين افتكينا

حمد : انتي بلاج شو فيج ؟

غايه : هههههههه ماشي افتكينا من وصيتك ...

حمد حس انها تستهين بمشاعره : انتي ايه شو فيج

غايه : انا شو فيني ولا انته شو فيك .. ولاجني حرمتك ... ع الاقل قبل خطبتها كنت تي وترمسني ونطلع سااعات ومن انخطب ست الحسن والدلال .. عيونك .. روحك .. عشقك .. مادري تسميها غرامك .. وانته حالك متغير .. ماترد الا تالي الليل ... عاد من زينها ومن زينك انته بعد ... صدق انه الطيور على اشكالها تقع فقدتكم انته وهيه فوقك ..

حمد شل سويج سيارته وكالعاده طنشها وطلع . .. من يوم انخطبت علايه ويحس انه غايه تغار .. تغار من اللي فقده حمد ... فقد حبه من المراهقه للشباب ..!! وقلب ياما اتمنى يملكه ..

.................................................. .................................................. ......................................

طافت الايام بسرعه بدون ماتحس بهن علايه .. لانه كل يوم طالعه سايره تتزهب ... وكل مايطوف يوم .. تحاول تطالع ملامح امها وابوها اذا يعروفون شي ولا لا ...!! ويوم تشوفهم طبيعين تحمد ربها ...

قبل العرس بيوم علايه راده من الصالون وتطالع بيتهم الكبير المزين بالليتات ومنور البقعه كلها ومنور الفريج حتى
وهي تحس بعمرها تعبانه ركبت فوق بتعب ووياها فطيم بنت عمها سارت بتفتح حجرتها بس حجرتها ماتنفتح .. عصبت علايه اعصابها ها الايام ماتتحمل شي موول ..

علايه توايج من فوق : امااااااااايه .. اماااااااااااااااااااايه

ام محمد : هااه علايه بلاج تباغمين

علايه : منو قافل حجرتي ..

ام محمد : بسم الله عليج انتي شاله المفتاح وياج

علايه تتذكر : انا ؟

ام محمد : هيه انتي ..

علايه تفتح شنطتها وتنبش بس مالقت شي .. وتصد ع فطيم اللي ترمس ريلها في التيلفون : طالعي مفتاح الحجره عندج

فطيم تطالع الشنطه : لا

علايه ردت تفتح الباب وانفتح ها لمره والحجره ظلاااااااام وبااااارده .. استغربت توه حايلته كان مقفول واللحين انفتح فطيم تطالع من ابعيد ..

فطيم تزاعج : بسم اللللللللللله بيتهم مسكووووون

فطيم ترمس ريلها : خلوف تعال شلني بيتنا اميه بيتهم مسكوون .. ههههههههه مسود الويه ... ماعليه بخبرها

علايه تطالع فطيم ..

فطيم ترمس علايه : عليوه يقولج خلوف انه حجرتج مسكونه وجان مايلبسج جني قبل العرس باجر

علايه زاغت : حسبي الله ع بليس خلوووف ... بندي في ويه .. ممنوع ترمسينه في بيتنا فاهمه

فطيم تضحك وترد ترمس ريلها .. علايه فتحت الباب واتسكر الباب وراها والحجره ظلام وماتشوف شي... هني علايه زاعجت من الخاطر .. فطيم سمعت الصرخه وتركض تفتح الباب بس الباب مقفول...

فطوم شويه وبتصيح : خلوف الحق عليوه انقفل الباب عليها مره ثانيه

خلوف : اميييييييه ببند عنج افطوم مابرمسج اخاف الجني اللي في بيتهم يظهر لي من السماعه برايج برايج

فطوم تضحك : هههههههههه والله مب وقته خلوف .. شو اسوي ...

تمت تحايل الباب بس ما انفتح لها وتمت اتدق ..

علايه تامه ساكته وتطالع الشاشه الكبيره اللي جدام عينها كان فيديو بالـmove maker

كان ريلها اللي انصدمت بشكله .. انه مب غريب عليها موول ... واحمد عمها ميودنها من ايدها .. ولحظات هدووء ..

كانو في السياره احمد وريل علايه ... اول شي احمد يرمس في الفيديو وحاطين لحم حزين شوي ..

احمد ينزل من السياره وييلس ع الحصى جدام البحر ...

احمد يرمس في الفيديو : حبيبتي بنت اخويه الغاليه ... علايه ... ( يغني ) تحيه طيبه وبعد التحيه ..

ويطلع صوت رجالي من ورا الكيمرا كان ريل علايه : صخ صخ .. صوتك يزيغ ..

احمد يرفع حاجب ويرقق صوته ويرمسه طبعا كله في الفيديو : صخ انته تتمناني ..

ويرد يصد ع الكيمرا ويرمس جد : علااااااااااااايه ( قالها بصوت عالي ) احبج والله احبـــــــــــج ... جان تذكرين انتي دوم اللي تخلقين لي اللحظات الحلوه .. بس انا حبيت اخلق لج ذكرى حلوه ... قبل لاياخذج الثور اللي ورا الكيمراااااا .. انتي ماشفتيه ياعليوه بتتروعين .. اميييه ( يرقق صوته ) يخووف يمه .. ابي امي ابي ابوي .. ابي زوووجي لا ماني قادره ( ويرفع ايده في الهوا اونه مايتحمل ) ... ع العموم غناتي ... انتي الفخر اللي عرفته في ها الحياه ... انتي كبرتي في عيني الاضعاف ... موقفج هذا خلاني مب بس احبج .. الا اموت فيج ... حبيبتي والله ....

صوت من ورا الكيمرا وينسمع في الفيديو : احم احم ..

احمد ياشر : ههههههه ورا الكيمرا فيه ناس تغار .. المهم نحول المايك .. ويتحول التصوير .... وينقطع احمد عن الكلام وتبدى تطلع صور .. صور ريلها وهو يسوق السياره .. وهو يسبح في البحر .. وهو ياكل في المطعن وهو يسوق الدراجه ... وهو راقد .... وعلايه كل ماتطلع لقطه تضحك من بين دموعها ... لين ماطلعن صور قلبها يعورها ... وانكتب ع الصور ... كلام

(( عليا .. انتي ضحيتي بحياتج عشان تقضين عمرج ويايه .. مابا اعور قلبج بها الصور قبل لاتعرفين بالحال .. بس هذا حالي ... انا صح اني ماعرفج ولاتعرفيني .. بس احبج ... لاتساليني كيف ... كفايه انج وافقتي ع واحد شراتي .. عافوه كل البنات ورضيتي به انتي ... افديج بروحي .. وعمري .. وعيوني .... وو دمي .. ياعليا .. ))

وعقب طلع فيديو ... كان ريلها يمشي ع البحر واحمد يصوره .. وعقب يا ريلها صوب الكيمرا ويرمس : علايه .. راعية الميني كوبر الحمرا ... هههه ( وينزل راسه في الفيديو ويرد يرفع عينه ) راعية المحل الغاوي .. – ويسال احمد – عادي اقول شي .. – احمد من ورا الكيمرا – هههههه برايك هاي حرمتك ...

ريل علايه يكمل : ههههههههه اوكي ... ويتقرب من الكيمرا .. ويقول بصوت خفيف : احبج ... ويخلص الفيديو بكلام اخر شي ..

(( مبروك علايه . ... الله يهنيكم .. عمج .. احمد 2007-2008 ))

وفتح الليات احمد وطالع علايه اللي كانت تصيح ودموعها اربع اربع ... احمد فتح ايده وهو يضحك .. علايه لمت عمها وتمت تصيح ... : احبك احبك .. احبك ...

احمد يمسح ع ظهرها : فديتج والله ... وانا امووت فيج بتخليني يالدبه .. بس والله يستاهل ريال طيب ..

علايه تبتعد عن حضن عمها : اتصدق ..

احمد : شو ؟

علايه : غاوي

احمد يعطيها ع راسها : ههههههه طفسه ..

عليا استحت جان تشهق : اوييييييييه فطيم

احمد بحذر : لا علايه لاتراوينها ترجاني مليون مره انه ها الفيديو ماينعرض الا عليج انتي ..

عليا : عشان !!

احمد : هيه عشان

عليا هزت راسها بالايجاب ..: اوكي شله .. بس تعال من وين حصلت الداتا شوو

احمد : ههههههههه صخي مصروقه من الدوام لجل عينج .. ويلست اركبه ساعتين ..

عليا : ههههههههههههههههههههههههههههههههه وياويهك خله بنشوف عليه افلام

احمد : الحمدلله والشكر مب صاحيه انتي باجر عرسج

عليا : ماشي مشاكل الحياه حلوه ( وتطلع لسانها )

احمد : هههههههه وانتي محلتنها سيري طالعي البغام بنت عمج شو تسوي اكيد ترضع التيلفون ويا ريلها حشى مايملون عاد الا هيه فطيم

علايه تفتح الباب وتطالع فطيم طايحه ع الغنفه وترمس في التيلفون ومن شافت علايه نشت : انتي زينه ؟

علايه : هههههههههههه توه الناس .. هيه زينه

فطيم : منو داخل ..

علايه : عمي احمد

فطيم : هيه انا من سمعتج انكتمتي قلت اكيد مافيها شي

علايه تفج عينها : انزين وياها الراس لو انكتمت يعني حد جتلني عادي بعد

فطيم تدز الباب : انا شدراني ..

فطيم من شافت الشاشه شهقت : خيااااااااااااااانه عيني عينك ... شو كنتو تشوفون

احمد يغير السي دي .. : مالج خص كنا نشوف بوكاهاتنس انتي شلج

علايه دشت الحمام بدلت ثيابها وظهرت ... وسارت تصلي ... وعقب يلست ع الشبريه .. وتطالع عمها اللي يالس ع النت .. وفطيم ترمس في التيلفون ..

علايه : امبيدو شكلنا بنروغ وحده اليوم

احمد : هيه روغيها حشى ذلتنا جنه محد عرس غيرها ..

فطيم : مالكم خص

وصدت الصوب الثاني ..

سارت علايه حطت سي دي فيلم " انا ستازيا " رسووم ويابت مخدتين حقها وحق عمها وبندت الليت وطاحو ع الارض ويلسو يشوفون الرسووم لين ماخلص ... وتمو سهرانين يسولفون وحاشرين البقعه ويتهم ام محمد وبو محمد الفجر يسولفون وياهم عن العرس وجي وعقب كل حد حط راسه ..

.................................................. .................................................. ...................................... __DEFINE_LIKE_SHARE__

! ĐįƠЯ ƒάṦђịǑη ! · 12-19-2011, 10:30 AM

ع المغرب كانت علايه في القاعه وراعية الصالون عندها والبنات كلهن مخلصات ع المغرب ... راعية الصالون تشتغل في عليا وسوت لها شغل حلوو وطلعت علايه متغيره 180 درجه من غير انها صبغت شعرها خصلات بنيه استوت حلوه بزياده .. كان قلب علايه يدق بسرعه كل ماتطوف ساعه .... ماهمها منو يا يسلم عليها .. ولا كيف فستانها .. ولا كيف مكايجها .. بكثر ماكانت مهتمه ... بشوفة ريلها وكيف بتكون حياتهم ويابعض ... دشت عليها عنود وروضه وفطيم وميثا .... واصطفن كلهن جدامها وتمن ساكتات ويطالعنها ... علايه استغربت ..

علايه : اييه شو فيكم ؟

ولا وحده ترمس ماشي ولا اكشن ... شو مستوي ... قلبها تم يدق بسرعه بسرعه ...

علايه : شو مستوي ؟
كــــــــــــــــــــــــــــــــــــــت __DEFINE_LIKE_SHARE__

! ĐįƠЯ ƒάṦђịǑη ! · 12-19-2011, 10:31 AM

"18"

فجاه تنقع من الضحك فطيم ...... : ماشي انتي اليوم عرووس .. ومسوين لج شي نبا نسمعج اياه ..

وتشغل ميثا تسجيل في تيلفونها : انا ولله مابعرس .. انا وين والعرس ويييييين ... هه احلموو اني اعرس انزين

علايه : هههههههههههههههههههههههههه

روضه : منو اللي مابيعرس هااه

عنود تغمز لها : ههههه حركااااااات بنات ..

ميثا : بنسمع ريلج

علايه ابتسمت وسرحت عنهم

شويه ويدشن بنات ربيعات علايه مال الدراسه تمت علايه مستغبنه كيف بتسير ؟؟؟ وبتخليهم .. كان صدق احساس صعب ... عقب طلعو عنها عشان المصوره تصور علايه ... وقفت علايه جدام المنظره .. تشوف التغيرات كانت قمه في الروعه .. فستانها الابيض منعكس على بشرتها .. كان شويه عاري .. يعني حفر .. وكله شج وشغل ... وبكبره يلمع ... ووتطالع ميكبها الخفيف بس عرفت كيف راعية الصالون تبرز جمالها .. شويه ودشت ام ريلها عليها ..

علايه اول ماشافتها ماتعرف ليش حست انها بتصيح ... ع طول دشت امه وسكرت الباب وراها .. وحضنت علايه تمت حاضنتها والام تصيح ..

علايه دمعت : بس فديتج خالتي ليش تصيحين ..

ام ريلها : فديتج الغاليه .. والله انج اصيله وبنت ناس ... وافقتي على وليدي وهـو

علايه تقاطعها : هو مابلاه شي وانا راضيه ...

ماتحملت علايه تشوف ام ريلها جي ... حضنتها مره ثانيه هي كبيره في السن وخاطرها تشوف ولدها معرس .. بس ماكان له نصيب ... او محد رضى به .. الا هاي الانسانه اللي واقفه تضحي بحياتها بس عشان يكون لها فايده في الحياه !!

علايه تحط يدها وتمسح دموع عمتها ام ريلها من تحت البرقع وهي تبتسم والعمه تضحك اول مره حد يسوي لها ها الحركه ... عقب سحبت عمتها ووقفتها حذالها وصورتهم المصوره ... شويه ودشت ام علايه .. وسارت حضنت بنتها على طول خلاص اللحين بتطلع ومن بتطلع للناس .. بتطلع لبيت ريلها ... بعيده عن عيون امها .. بعيده عن دفىء ابوها ... ام عليا تمت حاضنتها لكن انه لفستان هو مخرب شوي بس مامنع دموع ام علايه .. وعلايه ها المره صاحت ...

ام عليا : لا لا بيخترب المكياج

علايه تحط صبعها على طرف عيونها وتضغط عشان تطلع الدموع ومايخترب الميكب .. وام ريلها تطالع ام عليا .. وسارت لها : يازين ماربيتي يام محمد .. عليا طلعت اصيله .. ومافي منها .. دورنا منها .. بس وربي مالقينا .. الا هي ..

ام عليا مافهمت شو السالفه .. شو دورنا ومالقينا ..بس على حسب شخصية ام عليا انه على نياتها طوفت .. وعلايه خافت انه تخبر امها بس ظهرت عنهم شويه وطلعت علايه للناس ... وقفت جدام الباب تتريا الباب ينفتح لها وتطلع تجابل حياتها تحت مسمى المجهول .. بعيد عن ذكريات ماضي خذلها... وطعنها ... وجرحها .. بتترك كل الامها ورا ها الباب الخشبي الكبير .. وبتنسى كل شي من اليوم .. اليوم علايه يديده ... مايقيدها ماضي حبها .. ولا ماضي احزانها ...

علايه ماكانت رايمه تتامل ويوه الحريم اللي يالسات ويطالعنها ويدققن في كل تفاصيلها .. لانه الفلاشات عامتنها .. والفستان ثجيل عليها .. بس لولا ميثا وفطيم هي ماتدري شو بتسوي ... ركبت ع دري الكوشه وحست انها بتطيح .. وفعلا اتخرطفت شوي وكانت بتطيح بس لولا ايد ميثا جان هي من الصبح طايحه من فوق الكوشه ..

فطيم تضحك تحت : هههههههههههههه عليوه ماركه ماركه

علايه طنشت سمعتها بس ضحكت وكملت دربها لين ماوصلت الكرسي وواجهت ها العالم كله عقب مانورت القاعه وابتسمت للناس اللي وصلت عشان تحضر عرسها .. بدو الحريم اييون ويسلمون عليها ... وكانت واقفه حذالها روضه ..

علايه تسحب روضه : روضوه وين غايه ؟

روضه تطالع علايه : مايت ..

علايه انصدمت : ليش

روضه : اتقول تعبانه وتسلم عليج

علايه نزلت راسها وتمت تطالع الباقه اللي في ايدها : اها ..

ماتدري ليش لمعت عيونها بالدموع بس كل اللي تعرفه انها ماغلطت في حق ها الانسانه حتى في اللحظه اللي كانت تبا تغلط فيها قلبها ماطاوعها .. !!

فجاه سمعو انه المعرس بيدش .. علايه قلبها تم يدق بقوو .. تحس بانه قفصها الصدري من داخل اتهشم من قوة ضربات قلبها ... تمت تتنفس بسرعه ... ايدها قامت ترتجف بالقوو والورود اللي في ايدها قامت تنتفض من نفضة ايدها ... دش ريلها وابوها وعمها احمد وحمود اخوها .. وهي عينها على ريلها ... عرفته .. خلاص اخيرا اتذكرته ... !! نزلت راسها ...

اتجدم لها ريلها وباسها ع يبهتها وقالها بصوت خفيف : مبروك ..
علايه بصوت خفيف : الله يبارك فيك

سلم عليها ابوها وتم حاضننها .. وعلايه حضنته .. عقب يا دور عمها ... عمها من شافها سوى حركته فتح لها ايده .. علايه ضحكت .. : اعفد ..

احمد : ههههه اعفدي ..

علايه نزلت الباقه ع الكرسي واتجدمت لعمها اللي تام فاتحلها ايده وحضنته بقوه .. وهو تم حاضننها .. حضنها بقووه من خاطره .. وحتى علايه ... تم ريلها يشوفها وهي يبتسم .. وحتى بو خليفه .. بو خليفه قلبه يعوره هاي البجر .. غلاها غير ... !! دمعت عينه وطلع بسرعه عن يصيح جدامهم .. حتى احمد ماتحمل ها الموقف وصاح ... وبعدها عن حضنه وتم منزل راسه ويحط ايده عند عيونه ويمسح دموعه بسرعه .. علايه دمعت بس ماصاحت .. ومن شافت حمود مويم ... نزلت شويه وخاشمته وباسته ع خده : حبيبي انته

حمود : خلاص خطبتي سلطون الطويل وماتبينا وبتسيرين وياه

علايه اتلومت :اييه صخ انا ماخطبته ..

سلطان يوقف شراتها وينزل لمستوى حمود : انا اللي خطبتها مب هي ..

وصدت علايه عليه وصد هو عليها وكان ويهه قريب من وييها .. واستحت ونزلت راسها ..

ها النظره تكفي سلطان انه يموت ويحيا ..

ردت علايه تيلس مكانها وشلت الباقه في ايدها ويلس عمها ع طرف الكرسي وتم يسولف وياها ورد سلطان مكانه ويلس ويرمس حمود

حمود يرمس سلطان في اذنه : تراه عليوه تسوق لاتخليها تسوق وخل تعطيني السياره ..

سلطان يصد صوبها وهي ترمس عمها : ههههه ان شالله

حمود : تباني ايوول

سلطان : هيه

حمود : انزين بس مثل مااتفقنا ابا سيارة عليوه

سلطان : هههههه ان شالله

احمد سار جدامهم ويلس على ركبه مجابلنهم هم الثنينه وحاط ايد ع ركبة علايه وايد على ركبة سلطان ..

احمد : المهم خلوني اوصيكم .. عليوه ما اوصيج ع سلطون تراه والله انه طيب وان شالله ترتاحين وياه وانته ايه بو راس ( اونه يزقر سلطان ) مب تزعل عليوه كله ولا علايه ..

علايه تضحك وتصد ع سلطان : تسمع

سلطان من سمع صوتها ع طول صد صوبها وقرب راسه من راسه : اسمع فديتج

علايه استحت وترمس بصوت واطي : اهزبه يغازلني

احمد : هههههههههههههههههههههههههه وياها الراس ريلج ماروم اقوله شي ..

سلطان : هههههه اونه يغازلني .. قوم نضربها احمدوه

احمد : والله انته ماتوب ..

سلطان ياشر على حمود : طالع حموود شاد حيله

احمد يعدل غترته : انا بيوول ..

علايه : عن اتطيح الكوبرا

احمد يطالعها بنظره ويقلدها : عن اتطيح الكوبرا صخي صخي تامه جنج مال قمه ..

سلطان ضيج بعينه : شو مال قمه

احمد : هيمن على ارض االجمال ولمه .. ( جان تقول علايه وياه ) وجمع ثقافات البشر في تاجه .. ( وعلايه تاشر هي وعمها بنفس الحركات ) وقمه على قمه وفوقه قمه ... ذوق وجمال وغرتن وهاجه ..

سلطان تم ناقع من الضحك : والله انته وبنت اختك كوبل .. رهيب ..

احمد يضحك ويسير صوب الدي جي ويقولهم يحطون له اغنيه اوكي .. عشان اييول عليها تمت علايه تطالع عمها واخوها .. وسلطان نفس الشي .. وحس سلطان بالفرحه .. ويود ايد علايه اللي كانت بااااااارده .. علايه ع طول صدت ع ايده بس استحت اتشل ايدها وخلت ايدها في ايده .. صد عليها سلطان وهي تطالع ايدها وايده .. سلطان يقرب راسه من راسها .. : اطمني مابهدج ...

علايه : ههههههههه انزين لاتهدني ..

سلطان يطالع عيونها : وانتي بعد دخيلج لاتخليني ..

علايه حست بقلبها يدق بسرعه وتم تتطالع عيونه : مابخليك ..

سلطان اتقرب منها وباسها .. : هههههههههههه احبج بس جب صدي جدام

علايه ضحكت عليه وتمت تطالعهم .. والقاعه فضت .. وسارو يصورون .. وعقب اتيمعو كلهم يتعشوون وبدلت علايه ثيابها .. وسارت البيت تسبح وتبدل ثيابها وتشل شنطتها لصغيره ... عمها احمد حاجزلهم في برج العرب لين مايسافرون باجر ..

علايه يلست تسلم على اهلها وسلطان يترياها في السياره .. وطبعا ابوها تمت حاضننها .. كله ولاعلايه وامها تصيح ... وميروه وريم لصغيره تصيح .. وحمود واقف مبوز ع طرف ...

بو خليفه : علايه لاتنسين الابره فديتج

علايه : ان شالله ابويه

ميروه : انزين ابويه لاتخاف خلاص عليوه عرست واللحين بتيب لنا يهال ..

علايه ويها اتغير 180 درجه ...

بو خليفه يضحك : ههههههه ان شالله

علايه حبت تغير السالفه : امايه بس عاد ما احب اشوف دموعج ..

وطلعت يدت علايه من داخل .. : يامسودة الويه امره بتروح بدون ماتسلم على يدتها هيه كبر راسج يابنت ابوج

علايه تمشي ليدتها وتبوس راسها : فديت عمرج ..

اليده : ما اوصيج على سلطان حطيه في عيونج ..

ينزل سلطان يسلم ع اليده ويحب راسها : فديت اللي تحاتيني ..
__DEFINE_LIKE_SHARE__

! ĐįƠЯ ƒάṦђịǑη ! · 12-19-2011, 10:32 AM

اليده : وانته حط عليوه في عينك

حمود : طالعو يدتي جنه الراهب مال الكينسه يوم يزوج الاجانب ..

اليده : طالعو الهرم ..

كلهم يضحكوون ..

سلطان : خلاص بنترخص نحن

سلمو عليهم وصاحت علايه وركبت السياره وهي مويمه ...

سلطان : لاحوول بس عااد علايه والله ماتهونين

علايه تصيح : اتخيل مابشوفهم

سلطان : ههههه ثرج وين بتسيرين ..

علايه : ..........

وصلو برج العرب ونزلو الشنط نزلت علايه وتغشت .. وسار صوبها سلطان ويودها من ايدها وهي خذت راحتها يودته بعد .. وسارو لحجرتهم .. دشو الحجره وسارو الحجره ووطت علايه شنطتها الصغيره وظهرت لها بجامه خفيفه ..

سلطان يطلع له ثياب بعد : منو بيدش انا ولا انتي ..

علايه بحركات : عفيه .. عفيه .. انا

سلطان : ههههههه اوكي بس لاتطولين

علايه : اوكي انا بس ببدل ثيابي ..

دشت علايه وبدلت ثيابها وطلعت كان شكلها صغيرونه .. توها بنت 18 .. حتى مادشت 19 .. وهو عمره 25

دش سلطان الحمام يسبح .. وهي يلست تسحي شعرها .. وهي تنزل قصتها ع يبتها وتتعطر .. وتطالع لون شعرها مخلنها تتغير وايد .. ومستويه حلوه وايد .. شويه وتشوف ريال لابس كندوره وغتره وعقال .. وداش الحجره بس يمشي بالريوس .. هني علايه اتبنجت .. جان تزعج من الخاااااطر ..

سلطان تم زايغ .. ع طول حط الفوطه وظهر خاري ... وعلايه تامه حاطه ايدها ع ثمها والريال مايتحرك سلطان سار له وهو ناوي يضربه وعلايه لحقت سلطان تمشي وراه ... جان يصد عليهم ... : صااااااااااااااااادوووووووه ..

سلطان معصب : وقسم بالله يا احمدووووووووووووووه كنت بضربك ضرب اليهد

احمد : هههههههههههههههههههههههههههههه

علايه : سخيييييييييييف وقفت قلبي سبال

احمد : هيه هيه بنت اخويه عندج سلطون ( ويصد عليه ) وبعدين تعال انته ماتستحي ظاهر جي جدام البنت رد داخل

سلطان معصب صدق ودش الحمام يلبس ثيابه ...

علايه : اوييييييييه زعل ..

احمد يقلدها : اويييييييه زعل

ويسحبها من ايدها : اتولهت عليج تعالي يايبلج شي ..

دشت الصاله وحصلت عشاا .. وبلي ستيشن ع الطرف .. احمد يركب البلي ستيشن ويحط لها شريط " كارش سيارات "

علايه اتخبلت ها شريطها الحبيب ع قولتها " لايقاوم " ويلست تلعب ويا احمد ومتحمسين .. سلطان طلع ..

سلطان منصدم : انته بعدك هني ؟

طااااااااف لاحياة لمن تنادي شادين حيلهم في اللعبه .. جان يسير يوقف جدام التلفزيون ويهوس احمد " ستارت " ..

احمد : ياخي نش ..

سلطان يطالع علايه اللي شكلها يياهل : مابا .. اليوم يومي . .

احمد : سلطون لاتمصخها .. بنت اخويه وبتشلها شهر عنا مالي خص

سلطان : احمدوه ياريال اليوم عرسي

احمد : انزين وخير اقول طالبلك عشا سير اتعشى

سلطان : مابتعشى لين ماتتعشى حرمتي ويايه

احمد : لاحوووووووول قومو

نشت علايه ونش احمد .. ويود سلطان ايد علايه . جان يصد عليهم احمد ويطالعهم من فوق لين تحت ... ويقول بدلع : حركات مراهقين

علايه صدت على سلطان : تسمعه

سلطان يقولها شي في اذنها : احبج خليه .. متغايض

علايه ضحكت : ههههههههههههههههههههه اوكي

احمد ييلس ويرفع ايد كندوره يعني يشمر عن السواعد .. : تعالو يا عصافير الحب ..

علايه استحت صدق من الخاطر ... كيف بتعيش ويا سلطان صح انه طيب واايد .. بس هي بتحبه ... هي من يوم واحد وتحس انها تحبه .. مب عشان شي لانه الشي الاول اللي يجبرها انها تحبه هو انه ريلها .. حلالها ..

يلسو يتعشوون وكل ماياكلون احمد يصد عليهم ويقولهم : ياللللللللللللللله .. يالللللللللللللله .. اووووونه .. اوووووووونه ..

سلطان : هههههههه ياخي اسكت فكنا انته احمد ربك انه ماطردناك لين اللحين

علايه : لا كله ولا امبيدوو

سلطان : هيه كله ولا امبيدوو

احمد : يالله يالتقليد ..

احمد عقب ماخلص اكل .. : اسمعو اانا بحترم اللحظات الحلوه وبخليكم عشان تتذكرونها ... ( وبدى يرمس جد ) الله يهنيكم ان شالله .. فديت عليوه والله ..

ويسير يحضنها يحط ايده من ورا رقبتها ويحط راسه حذال راسها عقب حبها ع راسها وطلع عنهم .. من طلع احمد علايه ويمت وحطت الشوكه وربعت ايدها .. سلطان كان ياكل ..

سلطان يطالعها : شو فيج ؟

علايه دمعت : والله احبه ..

سلطان : احم

علايه : ههههههههههههههههه

علايه سارت تتغسل وعقب شافت الدريشه صوب البحر ... وفتحتها وتمت تشوف البحر .. وحطت ايدها على حد الدريشه وحطت ايدها تحت خدها وتمت تطالع البحر .. يا سلطان وحط ايده ع جتفها

سلطان : علايه احبج

علايه وهي سرحانه : حتى انا ..

سلطان : انتي ماتعرفين .. من يوم شفتج اول مره يوم دعمتيني ...ويوم كان مغمى عليج يوم عرس ولد عمج وبعد مره في المحل .. بس جنج ماتذكريتي شي .. لانه من شفتج حسيت بج ماتتذكريني ..

علايه تتذكر : انا اقوول انه شكلك مب غريب .. بس من شفتك ع الكوشه اتذكرتك

سلطان : ههههههه وايد عليج

علايه : ليش انته ماتعرف اني ...

سلطان : امبلا فديتج اعرف .. وانتي تعرفين اني

علايه صدت عليه وحطت عينها في عينه : اعرف .. وانا راضيه ... ( وصاحت ودمع سلطان وياها )

ها المره علايه حضنته اتعودت على عمها .. وها مب غريب عنها ..!! تم سلطان حاضننها يخليها تصيح .. براحتها .... وتم يمسح على ظهرها ... ابتعدت علايه عن حضنه وتمسح دموعها : اسفه

سلطان : ع شوو

علايه : لاني صحت .. احسبك اتضايجت

سلطان : بالعكس .. اباج تصيحين وتعبرين عن شعورج ولا انج اتمين ساكته ..

علايه ابتسمت له ومشت عنه الحجره ... رد يطالع البحر .. وهو يتمنى حياه سعيده وها هاي البنت الصغيره اللي اقتحمت قلبه قبل حياته ..................

.................................................. .................................................. ......................................

يا اليوم الثاني وسافرو علايه وسلطان وحسب طلب علايه تبا تسير النمسا ... صح انه ها الدار لها ذكريات تعيسه بس هي عشقت النمسا حبتها بحلوها ومرها ... وصلو للفندق اللي بيستقرون فيه ومن وصلو ع طول دقو بعمارهم من التعب ...

وع المغرب نشووو من الرقاد وكانت علايه ناشه قبل سلطان .. ويالسه تطالع التلفزيون .. وسلطان طالع من الحمام وكاشخ وينشف شعره بالفوطه ومن طلع علايه يلست تشوفه .. صح انها تسولف وياه بس تحس انها تستحي منه لين اللحين ..وتحس به اخوها الكبير مب ريلها وضحكت على ها الافكار وطالعها سلطان وهي تضحك

سلطان مستغرب : بسم الله عليج بلاج تضحكين ؟

علايه تحط ايدها ع ثمها : لا ولا شي ..

سلطان يغمز لها : عليناا ..

وسار يمشي صوبها ويلس ع الارض وتربع بحيث انه عاطنها ظهره وعطاها الفوطه وصد عليها : نشفي لي شعري

علايه ابتسمت له وتناولت الفوطه وبدت تنشف شعره ..

سلطان صد عليها : بس جي .. طلعتي رخوه ..

علايه فرت الفوطه في ثبانه : رخوه هااه .. نشف بروحك ..

ونشت عنه بتسير تبدل ثيابها .. وتم يضحك عليها .. دشت علايه تبدل ثيابها لبست تنورة جينز و بدي طويل لونه برتقالي وعليه بنت كيووت يعني ثيابها مايخصها انها عروس وجنها توها بنت صغيرونه .. رفعت شعرها بطريقة " مالي بارظ " وطلعت وايد كيووت وحطت ميكب وطلعت في الصاله ..

سلطان من طلعت تم يشوفها وعلايه اونه مب مستوله سالفه ..

علايه صدت عليه : فيه شي ؟

سلطان ينش من مكانه ويسير صوبها : هيه

علايه تطالع عيونه وهو يطالعها : شو

سلطان : ان شالله بتطلعين جي

علايه : انا لابسه شي ساتر

سلطان : اسمحيلي اذا قبل بيت اهلج يخلونج تظهرين بليا عباه تراني انا ماابا حرمتي تظهر جي

علايه ماتضايجت بس لمست في شخصيته شي ثاني .. انه يغار عليها .. ابتسمت له .. جان يحط ايده في قصتها وتم يردها ع ورا وهي تبتسم وعقب باسها ع يبهتها : يالله سيري البسي عباتج بنظهر شوي ..

علايه : ان شالله ..

سارت لبست عباتها وشيلتها وطلعت وياه وشي طبيعي سلطان مابيفجها تم قابضنها من ايدها ... هو صار له 3 ايام وياها ويحس انه مايبا يفارقها .. وانها شي مقدس في حياته ... وعلايه كانت تحس انها مابتروم تتاقلم وياه وبيكون صعب انها تتفاهم وياه .. بس من عرست وعاشت وياه حست انها اتجاوزت كل الحدود وانها عايشه حياه ولا احلى وياها السلطان وهي بروحها تقول ..

" لو كنت ماخذه غير سلطان ما اتوقع اني بكون مرتاحه كثر اللحين !! "

تم يتمشى سلطان وعلايه بين الاجانب وطبعا لازم يطالعونهم .. كان الجو مغيم وباارد .. وها الشي خلى سلطان يلم علايه في حضنه ع الكرسي اللي مجابل البط ... ويطالعون البط وهم ساكتين ...

سلطان : عليوه ..

علايه : همم

سلطان : مرتاحه ويايه ؟

علايه صدت عليه : انته شو تخربط

سلطان : مجرد سؤال

علايه : هيه مرتاحه فديتك

سلطان : يعني مابيي يوم وبتقولييين

علايه تقاطعه : اششش.. دام اني رضيت من البدايه لاتتوقع اني في يوم بيي وبقولك خلاص

سلطان كان كل يوم يبا يكسب علايه له عن تتغير عليه في يوم وتطلب انها تبتعد عنه لانه مايتخيل حياته بدونها .. سلطان كان يحب علايه ضعف الاضعاف ... صح انه علايه حبته بس سلطان بزياده ...

فديت علايه والله صبرتي ع الظلم .. ونلتي قلب يحبج ومستحيل يكرهج ... الله يهنيكم ..!!

.................................................. .................................................. ...................................... __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
بلاك بيري تورش 9860 فل تتش مع بن ممير """"""""""""""""""""""	محروم.كوم	منتدى أخبار المواقع والمنتديات العربية والأجنبية	0	10-28-2011 11:00 AM
""""""""مطلوب لكزس lx570 الدفع كاااش """"""""""	محروم.كوم	منتدى أخبار المواقع والمنتديات العربية والأجنبية	0	07-19-2010 03:50 AM
"""""""""""""""""""""""""""فساتين زفاف راقية ومميزة """"""""""&am	محروم.كوم	منتدى أخبار المواقع والمنتديات العربية والأجنبية	0	07-13-2010 12:00 AM
"سيتي" يصدر تصنيفات إيجابية لـ "إعمار" و"الدار" و"العربية" و"الخليج الأول"	محروم.كوم	منتدى أخبار المواقع والمنتديات العربية والأجنبية	0	09-29-2009 01:20 PM
"""""للبيع باترول سوبر سفاري موديل 99 ديزل """""""""	محروم.كوم	منتدى أخبار المواقع والمنتديات العربية والأجنبية	0	04-28-2009 02:40 PM