مع خالص "احتقاريـﮯ " محبوبتگ لعام 2007 م - الصفحة 11

! ĐįƠЯ ƒάṦђịǑη ! · 12-19-2011, 10:21 AM

...........................................

مرت الايام بسرعه وكل حد بدى يداوم .. وانشغل بحياته علايه دوامها ويا المدارس تاريخ 26 -8 لانه هي في جامعة الشارجه ... قبل العرس بيوم الساعه 12 علايه في حجرتها طبعا مسكره الليت ومشغله الابجوره ويالسه ع الشبريه وجدامها الاب توب وبين ايدها بطاقه بنفسجيه فخمه ووتجلبها بين ايدها وهي تضحك على سخرية القدر ... باجر عرس حمد وغايه وهي موقفها الاخير ويا حمد مب رايمه تنساه ... ومشاعر حمد مب رايمه تتجاهلها ... وصوت الاغنيه اللي اهداها اياها تحس بها لين اللحين .. هاك لحن العود الحزين تحس به في اذنيها .. ضمت ريلها على صدرها وابتسمت بانكسار وحطت ايديها الهنتين على اذنيها ... وهي تسمع لحن الاغنيه في اذنها تمت ع حالها هذا تقريبا خمس دقايق ...

عقب اتربعت فوق الشبريه وحطت في الاب توب اغنية عبدالكريم بعد بالعود .. " ردي الزياره .." تحب لحن ها الاغنيه واايد وفتحت على منتدى الم الامارات ويلست اتجيك ع قصتها وتشوف ردوودكم الحلوه .. (( تراها قصتي اصلا لول مب قصة عليوه انا تعبانه عليها لول )) .. وهي تتذكر سعيد وتدندن ويا عبد الكريم ها لمقطع الرهيب ..

من يوم وادعت زولك
والقلب ملتاع
الحب سلطان
امره مقضي ومسموع
لايشغلك قول الواشين
فالقول خداع ..
مافيه دروب المحبه حاجز وممنوع

ها المره الوحيده من بين كل المرات اللي تذكر فيها سعيد وحمد مصدر عذابها .. ماتصيح .. اصلا الصياح استوى لها روتين .. ردت تبتسم ع الجرح الكبير ..؟؟ وتجامل ها الجرح في قلبها

مد الخطاوي وعاود ياخلي بساع
في خافقي صار .. حبك يالزين مطبوع
الحب بيني وبينك مكشوف لقناع ..
يعطي البراهين مابين اهات ودمووع ..

ردت سحبت البطاقه وهي تشوف حركتها الخطيره اللي سوتها في بطاقة حمد وغايه .. كتبت شعارها بخط رفيع وايد ومايبين وايد الا للي يدقق فيها ... مكتوب في البطاقه بالخط الابيض الشفاف اللي مابينتبه له الا اللي بيدقق .. كاتبه [ مع خالص احتقاري .. محبوبتك لعام 2007 ]

دشت علايه ايميلها وتشوف ايميل سعيد اون لاين وهي اصلا بس عاطتنه بلوك بدون ديليت .. ع طول شلت البلوك ..

علايه دشت عليه ..

علايه : السلام عليكم

ايميل سعيد : وعليكم السلام

علايه : شحالك ؟

ايميل سعيد : بخير وسهاله وانتي شحالج ؟

علايه : تمام .. منو ؟؟

ايميل سعيد : انا عبود ..

علايه ابتسمت لانه مب سعيد .: هلا عبود

عبود : وينج ياحرمه ... كم مره دشيت وماريتج

علايه : مشغوله ..

عبود : يالله يالدنيا عليا تنشغل

علايه : جفت عاد

عبود : عليا صح الحمدلله ع السلامه

علايه حطت الفيس الحزين : الله يسلمك .. اممم

عبود : ادري تبين تسالين عنه ؟

علايه : هيه

عبود : لاتحاتينه سار بريطانيا يدرس هناك

علايه حطت الفيس المصدوم : صدق

عبود : هيه والله

علايه : الله يوفجه ..

عبود : الجميع ان شالله

علايه : شو كنت تبا تقول لي عبود لين اللحين اتذكر

عبود : عليووووووووووووووه ..

علايه : اميه بسم الله عليك شو ياك ؟

عبود : ههههههه اتصدقين بقولج شي بس متلوم

علايه : قول

عبود : طلعتي حلوووه ماكنت حاط ببالي انج جي

علايه : ههههههههههه بس ها الشي

عبود : لا بس عليوه والله بقولج تراه سعيد يحبج وايد والله .. انتي ماتعرفين كيف يحبج ...

علايه : هيه صح عشان جي عرسه عقب شهر ...

عبود حط الويه المصدوم : انتي شدراج

علايه : اليوم حرمته يت المحل مالي

عبود استغرب : المحل مالج ..؟؟ اي محل ؟

علايه : هههههه يقولك فتحت محل تصميم بطاقات اعراس

عبود : اوووووب اووب قومو عنها منو قدج .. يستوي اي واسلم عليج ..

عليا : تهبي بخبر ابويه

عبود : هههههههه خلاص اسف .. بس والله اني استغربت يالله بالتوفيج ان شالله يوم عرسي بيي عندج بس سوي لي ديسكاونت

عليا : هههه ان شالله ..

عبود : تعالي تعالي .. ممكن اسالج ..

عليا : هيه اسال

عبود حط الويه المعصب : ليش حمد الحيوان هاك اليوم يضربج ويقولج انتي ترمسين واحد ؟؟ ممكن اعرف شو السالفه ؟؟

عليا حطت الويه المبتسم وهي تتذكر وكتبت له السالفه بس بالمختصر المفيد يعني ..

عبود معصب موول : بلعن اصله الحقير ... مستقوي عليج وانتي هبلا ماتخبرين ابوج والله بادبه لج

عليا اتدافع عن عنه : لا خلاص خله كل شي انتهى باجر عرسه

عبود حط الويه المصدوم : ماسرع مابيعرس ؟؟

عليا : هههه الدنيا اتدور .. والايام اتخطف بسرعه

عبود : هيه والله ...

عليا تشوف الساعه استوت 1 ونص .. : خلاص عبود فرصه سعيده انا بظهر بسير ارقد
__DEFINE_LIKE_SHARE__

! ĐįƠЯ ƒάṦђịǑη ! · 12-19-2011, 10:22 AM

عبود : بشوفج بعدين ؟

عليا : ان شالله اذا فضيت

عبود : هيه خلاص كبر راسج يا راعية البزنس .. ههههه

عليا : لووول تيك كير

عبود : فديتج

عليا حطت الويه المصدوم : اييه

عبود : ههههههه حشى محد يسولف تبين اوصل لسعود شي ..

عليا بدون تردد : هيه

عبود : شوو ؟

عليا : قوله . رد قلبي.. ورد لي عمري .. لايغني الحزن مواله باي

وطلعت اوف لاين بسرعه ومسحت ويها بسرعه وسكرت لااب توب بسرعه ونشت بسرعه وهي متضايجه .. جان تسمع دق ع الباب استغربت سارت فتحت الباب وشافت عمها احمد واقف ...

علايه بصدمه : احمدوووه

احمد يدز الباب ويدش داخل ويطيح ع شبريتها : اااااااخ تعباااااان برقد اليوم هني

علايه تبتسم لعمها : حياك الله ..

احمد ينجلب ع بطنه ويجابل علايه اللي واقفه بعدها عند الباب : عليوه بنطلب من الكافتيريا شو رايج والله يوعان

علايه : اوكي يالله ..

احمد وهو طايح طلع تيلفونه : انتي شو تبين ؟

علايه : اممم اي شي ؟؟ نفسك ..

احمد : اوكي

واتصل احمد للمطعم وطلب له وعلايه تشوف عمها ..

احمد يشوفها سرحانه : بلاج معجبه ؟

علايه : عندي فكره ..

احمد : شووو ؟؟

علايه : بنسوي شي ..

سارت فتحت سده التواليت الاخيره وطلعت بوكس كبير شوي ومتروس شموع وتفتح الكفر ( الغلاف مال البوكس ) وتحط الصندوق ع الشبريه .. احمد يوايج داخل الصندوق

احمد : خيبه شو ها مصنع شمع

علايه تيود عمها من ايده وتسحبه بايد وميوده البوكس بايد : يالله قوم ويايه

احمد ابتسم لها ونش وياها وطلعو برع في الحوي .. بس احمد وقف .. : حو وين بتسيرين

علايه : تعال انته وبس ..

احمد مشى وراها وسارو ورا البيت فيه دري حديدي يودي لفوق البيت وملتف بشكل حلزوني احمد وقف يطالع طول الدري .. وعلايه تبتسم وتجدمته تركب ع الدري .. وسار وراها احمد لين ماركبو فوق نزلت علايه الصندوق ع الارض ومدت ايدها لعمها اللي كان توه واصل ويبتسم لها في ها الليل .. احمد اتساند على طرف اليدار ويطالع بنت اخوه اللي انشغلت بالشموع اللي داخل البوكس وتطلع شمعه .. شمعه وتصفهن بطريقه دائريه على الارض .. وسار صوبها احمد وقام يشل وياها ويساعدها ...

وسحبت الولاعه من البوكس كانت ولاعه حديديه فوشيه وعليها حرفها ويتداخل ويا الحرف قلوب بالحفر .. كان شكل الولاعه راقي وايد ..

علايه وهي تولع الولاعه وترفع راسها تشوف عمها : اليوم يومي ويومك ..

احمد مافهم لها بس اكتفى بابتسامه يريحها فيها وجنه يقولها " كملي وبنشوف شو تحت راسج "

بدت علايه تولع شمعه .. شمعه ونور المكان من ضوء الشموع ... وبانت ملامحهم وقفت علايه في نص الدائره وسار لها احمد وهي تطالع نسخه سعيد الثانيه واقف جدامها .. اللي يحببها في عمها هو الشبه الكبير بينه وبين سعيد يعني اللي يشوفهم يقول هاذيل توام ... من كثر الشبه ..

احمد يضحك : وبعدين عليوه على شو ناويه ... نرقص مثلا في ها الحر

علايه : لا قلت لك اليوم يومي ويومك ..

احمد : وقسم بالله مب فاهملج علايه

علايه : افهمني احمد .. اليوم خلنا ننسى كل شي .. انته تنسى حبيبتك .. وانا ابدى حياه يديده

احمد مب فاهم شي : ليش تذكرينها ؟

علايه : ليش انته تحبها لين اللحين ؟

احمد بحزن : اكيد ...

علايه : خلاص اوكي .. خلنا نعيش حياتنا لحظه بلحظه ( وتصد صوب ليتات الشارع لي مجابل بيتهم ) بدون حزن ...

احمد سكت ها اللحظات الغريبه اللي تخلقها بنت اخوه يحس بها عظيمه في نفسه تريحه .. وتهديه ..

علايه يودته من ايده وتطالع عيون عمها الحزينه وتقول خاطره : هل تعلم قبلك كنت أحلم باشياء كثيره .. معك كنت لا احلم الا بك ( وتبتسم ).. بعدك .. اصبحت لا احلم ابدا ..

وهل تعلم ؟؟ قبل ان التقيك كنت اتمنى ان التقيك ... وبعد ان التقيتك تمنيت ان لا اافارقك ابدا ... وبعد ان فارقتك فقدت شهية التمني للابد ..

(( سكتت علايه وهي تحس بدموعها تخرس اهدابها .. ابتسم عمها لها ووهو يتذكر حبيبته اللي توفت بالسرطان من سنه بالظبط ... اليوم كملت سنه بالظبط وهو يعرف ليش علايه سوت ها كله عشان تنسيه الحزن اللي انولد في نفس عمها من يوم فراقها .

احمد : وهل تعلمين ؟؟ ان رحيلكي ارعبني .. وأختصر مراحل عمري .. وقذف بي في الصفحه الاخيره من كتاب عمري ..

وهل تعلمين ؟؟ انكي كنتي كل خاتمة الاشياء في حياتي .. لذلك لن احاول البدء بعدك من جديد

سكت احمد وهو يحس بانه مخنوق ...ها الخاطره اللي كانو دوم هو وعلايه يقوولونها ... تسوي له ازمه تذكره بحبيته ..

علايه ابتسمت وردت تقول : هل تعلم ؟؟ اني الى الان لا اعرف ان كنت في حياتي حقيقه ... استكثرتها الظروف علي ام انك كنت حلما جميل في حياتي .. ( بحزن وتنزل راسها ) مجرد حلم جميل .. واستيقظت ليلة البارحه منه
( وهي تتذكر حرمة سعيد يوم يتها المحل )

وهل تعلم ؟؟ اني في كل ليلة اتسلق جبال النسيان .. والقي بذاكرتي من اعلى قمة الجبل .. ومع هذا مازالت ذاكرتي بك .. في كامل قواها العقليه والعاطفيه ..

جان يقول احمد .. : علم أخر انه الحياه انتهت في تلك الليله

علايه تهز راسها بانه " لا " ... وتحط ايدها ع ثم عمها : لا .... عفوا .. انهم يثيرون احتقارك فماذا تنتظر .. اقلب صفحتهم من حياتك وابدا من جديد او مزقها نهائيا .. فكتاب حياتك يجب ان لايحوي سوى تاريخك الجميل وصفحتك المضيئه ..

سكت احمد اول مره علايه تقول ها الكلام .. كان كلامها غير .. كلام علايه اثار الشكوك في نفس عمها ...

فوق سطح بيت قوم علايه كانت نهاية لقصتين حب .. تقلص في عدد العشاق في هذي الليله شخصين .. وانضم لعداد الفراق .. بعد شخصين ... هم علايه وعمها ...

كلمتي لهم .. ولكم مني انا فواغي ..

[ ومضى ومضت وطويت خلفها حكايه تتكرر في كل الازمنه والامكنه .. فالاحزان تتشابه والاالام تتشابه .. والنهايات وحدها هي التي تختلف .. ]

ابتسم احمد عمها بحزن ونزل راسه .. وعلايه اليوم ذرفت اخر دموع على فراق سعيد ... طالعت عمها بويه خرسته دموعها الهاديه ... فتح احمد ايده لعلايه ... علايه ماترددت و لمت عمها باسى وكل حد منهم يحاول يحمل بقايا الذكريات ويركنها في زوايا ها القلب .. علايه هدت شويه من عقب حضن عمها وهي في الاساس ماتباه يشك فيها فرفعت راسها وشافته وابتسمت وسارت عنه ويابت كيمرتها الكانون اللي كانت حاطتنها بعد في البوكس .. وردت تدش داثرة الضوو .. وناولت عمها الكيمرا وصورته ورد هو صورها وعقب سارت حطت الكيمرا ع حد اليدار .. وركضت لعمها وحضنها وهي تضحك ولبق الفلاش في السما وهم يضحكون من عقب معاناه ودموع وخذت لهم احلى صوره .. وفجاه يسمعون هرن .. عاد احمد من الزيغه يركض وينزل تحت ناسي علايه بروحها فوق علايه حطت ايدها ع قلبها من الزيغه وشلت كيمرتها وخلت الشموع ونزلت ورا عمها عقب عرفت انه راعي الكفتيريا هو اللي ياي ..
__DEFINE_LIKE_SHARE__

! ĐįƠЯ ƒάṦђịǑη ! · 12-19-2011, 10:22 AM

احمد شال الكيس ومنطر من الضحك ..: ها عليوه تزيغين تركضين

علايه ناقمتنه : هيه صح حتى تبادلنا الادوار استويت انا الريال وانته البنت تخليني بروحي فوق

احمد : هههههه هيه انا بعدني ابا عمري مسوليتنا جو السحر مالج وبعد ماتبيني ازيغ

علايه بهدوء : بس صدق ماا ارتحت

احمد يوقف صوبها : امبلا ارتحت ... لانج انتي ياعليوه يا بنت اخويه عليج افكار ...تخلي الواحد يستانس عليها .. يعني باختصار تسوين لج اكتفيتي وتونسين عمرج ... وعندج طقوس غريبه ها الشي اللي يحبنني فيج .. غموضج ..

علايه ابتسمت بهدوء ومشو صوب الصاله عشان ياكلون وعقب يرقدوون ..

.................................................. .................................................. ............................................

يوم العرس .. ع المغرب ...

كل الاستعدادت جاهزه .. وكل شي تمام التمام .. باستثناء المعرس والعروس ... اللي كل حد منهم رافض الثاني ... ومب متخيلين كيف بيتاقلمون ؟؟ غايه من عقب صد فيصل عنها .. ماعاد شي يهمها تعرس اليوم .. ماتعرس ابدا .. استوى كله واحد عندها ...

يالسه غايه بهدووء وتحط راعية المكياج لماستها الاخيره على غايه والهدوء يلف المكان باستثناء صوت الاغاني اللي برع ... وقامت تثبت الطرحه في تسريحة غايه ... نشت غايه جدام المنظره الطويله وطالعت عمرها .. كانت لابسه جلابيه حرير ورديه ناعمه وايدها كت وخفيفه عشان يوم تفصخها ماتخرب المكياج والتسريحه .. وتطالع عمرها باعجاب .. بالرغم من احساسها الجامد اليوم الا انه ها الشي مايمنع انها تكون مرتبكه ... ومعجبه بعمرها .. كانت طالعه غايه ملاك من حلاتها ... مكياج عيونها اللي ابرز جمالها .. وتسريحتها زادتها حلاه فوق الحلا .. دشت روضه وام حمد وهم مستانسين ... روضه كانت طالعه وايد نعومه ... رغم ضالة جسم روضه لكن كانت طالعه حلوه بعد اليوم ... ولابسه فستان فوشي حرير ووايد بسيط بس مايمنع فخامته .. ومسويه بشعرهاالبني الخفيف اللي يوصل لنص ظهرها كيرلي ... ورافعه قصتها ع فوق .. ع قولتهم مسويه حركة " البف " لووول وسلمت على غايه وهي مستانسه وناسيه انه غايه اليوم متحطمه معنويا ... وام حمد بعد سارت تسلم على غايه ..

روضه بروح مرحه : يالبي فديت مرت اخويه ما حلاها

غصبا عن غايه ابتسمت لروضه : ههههههه حبيبتي والله

ام حمد تطالع غايه شويه وبتصيح .. : فديتكم ياربي ...

روضه تحط ايدها على جتف غايه : هاا امايه مب تصيحين اليوم مانبا حد يصيح ..

غايه رفعت راسها صوب روضه اللي وراها وحاطه ايدها على جتفها وباستسلام : وانا ؟؟

روضه فتحت عينها على وسعهن جنه تحذر غايه وتقولها " مب وقته " ...

ام حمد : يالله فديتج غايه اللحين بنسير وبنرد لج اخلاف بنجابل المعازيم ..

غايه : اوكي خذو راحتكم ..

طلعت ام حمد وسارت روضه صوب المنظره الطويله .. ويلست تعدل نعالها الكعب لانها مب متعوده عليه .. وتشوف انعكاس غايه في المنظره وهي سرحانه ..

روضه صدت عليها : متى بتلبسين الفستان ؟؟

غايه بصوت هادي : اللحين ..

روضه : اساعدج ..

غايه : هههههه لو ممكن يعني

روضه من شافت غايه تضحك استانست من خاطرها ... وبدلت غايه بمساعدة روضه ولبست فستانها الابيض وتحس بعمرها متوهقه الفستان اثجل مما تتوقعه وتحس بانه لابسه مدرعات مب فستان عرس ... وسارت روضه تناولها الباقه غايه ابتسمت لها ... خلاص غايه رضت بالواقع عقب كل المحاولات اليائسه عشان ترد ها اليوم .. لكن خلاص ماشي فايده ع قولتهم " طاح الفاس بالراس .. "

في نفس الوقت وصلو قوم علايه عند البوابه بس ها المرت وصلت علايه ونفسيتها مرتاحه وداشه وهي تدعي لهم بالسعاده .. صح انها ماشافت منهم الشي الزين .. بس بعد مب حلوه انها تدعي عليهم و اقل شي تسويه انها تتمنى لهم حياه حلوه ويا بعض ... سلمت على الحريم في الاستقبال ..بس استغربت استقبال ام حمد لها اول ماشافت عليا .. حضنتها ... تمت حاضنتنها ... وعليا مستغربه من ام حمد .. حتى انه ام علايه ويدتها مستغربات ... خوزت ام حمد علايه من حضنها وتمت تشوفها ... وعلايه مستحيه ومب عارفه شو تسوي ...

علايه بحزن وهي ماتدري شو السالفه : مبروك خالتي ...

ام حمد : الله يبارك فيج فديتج ...

يت روضه من بعيد وهي تبتسم لعلايه التفت علايه لروضه وخازت عن الدرب عشان الحريم يطوفن .. سارت روضه سلمت على ام عليا ويدتها وعقب تمت واقفه ويا علايه ..

روضه تطالع علايه : قومو عنها طالعه حلوه ..

علايه : ههههه والله انتي الاحلى .. طالعه عروس ..

روضه اونها استحت : احم احم .. ( وتتقرب من اذن علايه ) يعني بنخطب ..

علايه تضحك وتحط ايدها على ثمها : ههههههههه هيه ان شالله ..

روضه : طوفي نسير نيلس جدام حاجزتلنا طاوله جدام امره مجابلين الكوشه

علايه : اوكي ...

مشت علايه ويا روضه وهي تشوف نظرات الحريم .. طبعا بيسالون منو هاي اللي ويا اخت المعرس .. !! وتمت تنقل علايه نظرها في القاعه العوده وتشوف الموجودين .. تحس بهم ناس وايد ... والقاعه فيها اضاءه حلوه والترتيب وايد حلو .. والخدمه خدمة المركز التجاري .. يعني مدلعين المعازيم دلع ... وصلت علايه وروضه للطاوله وسحبت علايه الكرسي ورفعت طرف عباتها ويلست ع الكرسي بحيث انها مجابله الكوشه امره ... حطت صبوعها بين شعرها وردت قصتها على ورا .. كانت وايد بسيطه .. بس ها البساطه خلتها تطلع حلوه .. مكياجها اللي بارز عيونها وفستانها الاصفر اللي كان فيه شج وايد ويبين انه فخم من الخاطر ... روضه يلست حذالها وهي تبتسم ...

روضه اتقربت من راس علايه عشان ترمسها لانه صوت الاغاني حشره : عليوه افصخي العباه

علايه صدت عليها بعيون مصدومه : انتي تبين يدتي تنحرني ..

روضه : هههههه اسمعي تراج بتفصخين العباه وبترقصين بعد ..

علايه : لا والله .. اسمعي انا ماعندي اخلاف برقص بس سو لي اضاءه ديسكو .. اول

روضه تغمز لها : ههههههه افا عليج ... ( بجديه ) بس بترقصين

علايه : لا يامايه بعدني ماتخبلت .. تبين يدتي تنحرني ..

روضه : انا برمسها ..

علايه : اكوه الدرب سيري رمسيها بس لو هزبتج انا مالي خص

روضه تطلع لسانها : هههههه ياويلي ..

علايه : ههههههههههههه

روضه : انزين عطيني عباتج وشنطتج بوديها داخل وبخبر يدتج انج بترقصين ويايه .. وانا بروحي بعطي يدتج 500 يورو اذا وافقت

علايه وهي تتذكر يوم الثلج : ههههههههههه اوكي

نشت علايه ونشت وياها غايه وفصخت علايه عباتها وكل الحريم يطالعونهم شلت روضه العباه والشيله وحطتهن على ايدها بحذر عن تتجسف وجي .. وهي في الدرب تتدور يدة علايه ومن شافتها نقعت من الضحك وسارت صوبها وباست راسها اول ..

روضه : امايه

يدة علايه تصد على روضه : عونج امايه

روضه : طلبتج

يدة روضه : ومارديتج

روضه : اباا علايه ترقص ويايه اليوم

يدة علايه تضحك : هههههههه امره هاك الدرب على هواها ..

روضه وهي مستانسه : صدق

يدة علايه : هيه اليوم عرس ولدنا حمد برايها خل ترقص لين ماتقول بس

روضه تضحك : مشكووره فديتج ( وطالعت ام علايه اللي تبتسم وغمزت لها جان تضحك ام علايه )

ومشت عنهم روضه وسارت ووطت عباه علايه وشيلتها وردت تظهر لانه غايه كانت يالسه ويا ربيعاتها مال ايام الدراسه ..

ولمحت عنود تمشي صوبها وكانت طالعه حلوه وايد .. وسلمت عليها ..

روضه : طوفي عنوده بوديج عند عليوه جدام ..

عنود تغمز لها : الغاويه راعية الفستان الحمر

روضه تضحك على سوالف عنود : انتي ما اتوبين من ايام المدارس وانتي ماعندج الا سوالف التقردين

عنود : هههههه نقزر وقت وحياتج ...بعدين ويا ها الراس محد يسولف

روضه تيودها من ايدها : انزين تعالي ويايه ..

وصلو للطاوله وكانت علايه يالسه تاكل " لوول " ومن شافتهم ياييين صوبها ع طول حطت الشوكه في الصحن ونشت لهم ..

علايه : هلا والله

عنود وهي مستانسه : اهليين

روضه : احم عنود هاي علايه ( وتاشر على علايه ) ... علايه هاي عنوده ( وتاشر على عنود )

جان يضحكن ..

علايه : اسميج اليوم شي فيج

روضه : هيه شاورت يدتج وقالت برايها خل ترقص امره لين باجر

علايه : اوووووووونه غريبه

روضه : ماعليج من العيايز تراهن الا هفات ..

علايه فجاه صدت لعنود اللي تطالعها .. وابتسمت لها عنود وردو ييلسون ع الطاوله ويسولفون شويه لين ماقالو انه العروس بتطلع بندو كل ليتات القاعه وتوجهت الاضواء بس صوب البوابه الكبيره ... كل انظار الحريم صوب البوابه ... روضه استاذنت عن علايه وعنود وسارت صوبهم ... انفتح الباب بشوي شوي .. وطلعت غايه بفستانها الابيض الكبير وهي تطالع الكوشه وتبتسم باستهزاء ... وتسمع زغاريط الحريم ولحن زفتها تحس به صام له اذنيها ومب رايمه تتحكم في دقات قلبها ... وهي تهدي عمرها ..

" مايهمج شي ياغايه .. لافستان ابيض .. ولامعازيم ولاناس .. ولاكوشه .. ولامعرس .... انتي اليوم خسرتي اللي غيابه عن كل غياب .. انتي اليوم غفرتي لناس عمرها ماتستحق المغفره ... في ها القاعه دفنت حبك يافيصل ... انا يافيصل نسيت الناس ولكن مانسيتك عجزت انساك حتى لو ثواني ... !! عطيتك شي ماهو عند غيرك ولاقصرت ولكنك اناني ... ( وخانتها دمعه على خدها وابتسمت للكيمره اللي فضحت تفاصيل حزنها ودموعها على الشاشه الكبيره ) حبيبي لاتواخذني ولكن ابيك اتحط نفسك في مكاني .. !! "

مشت غايه وهي تفكيرها ماخذنها لعالم بعيد .. بعيد عن نظرات الحريم .. عن صوت امها وصوت مرت عمها .. وصوت زفتها ... حست بالدرب قصير كيف وصلت للكوشه .. والدرب كان طويل .. شو سوت في ها الكمن دقيقه .. وقفت جدام الكرسي اللي بيجمعها من عقب ها الكرسي .. بيت واحد بحمد ... غمضت عينها وهي تشوف الكرسي اللي كان ممكن في يوم يجمعها بفيصل .. مب بحمد .. التفت بالحركه البطيئه وواجهت الناس ..بدفن حبها اليوم .. لانه من عقب ها اليوم يحرم عليها ... ذكرى فيصل ..

يلست غايه وانفتحت الاضواء وجو الظلام اللي حست به غايه والوحشه في ها القاعه الكبيره اللي حستها قبل اشوي اختفت .. حتى لحن زفتها كان حزين .. وجنه اللحن كان حاس بمعاناتها .. بدو الحريم يسيرون فوق يسلمون على غايه وهي تقهر الحزن وتجاملهم بابتسامه باهته مالها اي معنى ... ويوم خفت الزحمه .. بدى قلب علايه يدق بسرعه ... الهدوء اللي اتحلت به اول مادشت القاعه بدت تفقده ... شو صابها من دخلت غايه ... ماتعرف ...

نزلت علايه راسها وتحس بقلبها يحطمها ... ونزلت راسها وحطت ايدها على قلبها عشان تهدي عمرها انتبهت عنود لها الحركه ...

عنود بخوف : شو فيج ..

علايه رفعت راسها : هااه .. لاماشي ..

روضه : طوفو بتسلمون عليها ..
__DEFINE_LIKE_SHARE__

! ĐįƠЯ ƒάṦђịǑη ! · 12-19-2011, 10:23 AM

علايه عيونها بدت تحرجها .. تحس بدموعها بتفضحها ... عنود بروحها موقفها ماكان احسن من موقف علايه كيف بتجابل حبيبة اخوها .. شو بتكون نظرة غايه لها ...؟؟ بس عشان تهدي عمرها يودت ايد علايه وبصوت قريب للهمس : يالله عليا

علايه نشت على حيلها وهي تحس لولا ايد عنود اللي قابضتنها جان ريلها ماشلتها ..صوب غايه ..

كل الناس تطالع علايه وعنود اللي ميودات ايد بعض ويرقون الدري اللي يودي لغايه وغايه عينها مافارقت راعية الفستان الاصفر .. شافت وحده من بعيد ملامحها هاديه جمالها هادي ... عرفت انها علايه قلب غايه تم يدق بسرعه من شافت علايه وتم يدق ضعف دقاته من شافت عنود ميوده ايد علايه ... نزلت نظراتها للباقه اللي جدامها وهي تعد كم ورده في الباقه عشان تبعدهم عن تفكيرها وهم اصلا على بعد كم متر منها ...!!

علايه وهي تركب انجسفت ريلها ع الدري .. ويودتها عنود وهي تبتسم : بسم الله عليج شو ياج ؟

علايه تخفف التوتر عنها بضحكه صفراء : ههههه دوم متعوده

عنود ابتسمت لها وكملو دربهم لغايه .. وصلت عنود وسلمت عليها وهي مب شاله في خاطرها مول : مبروك غايه ..

غايه رفعت عيونها اللي امتلت دموع وهي تشوف فيصل جدامها : الله يبارك فيج ..

علايه واقفه شوي بعيد وشافتها غايه .. وابتسمت لها : شو مابتسلمين عليه علايه ..

علايه منزله راسها وبصوت خفيف وشوي وبتصيح : امبلا ...

اتجدمت علايه لغايه وهي تحس بعمرها خلاص منتهيه .. هاي حرمت حمد جدامها ... اللي غيرت حياتها جدامها .. طبعا غيرت حياتها للاسوء ... معاناتها ... كانت هي سببها ... بس بالرغم من كل الذكريات الحزينه اللي طرت لها مامنعت عمرها من انها تلم غايه بحنان ... غايه ماعرفت شو تسوي حزتها .. كيف ظلمت انسانه مالها ذنب ..؟؟ كيف فضلت سعادتها على تعاسة ها البنت الصغيره ..؟؟ علايه ابتعدت عن غايه وهي تمرر صبعها على رموشها اللي تحت لانها دمعت ...

علايه بصوت حزين : مبروووك غايه .. والله يهنيج ...

روضه من شافتهم جي ... قالت لازم اتغير الجو وسارت للدي جي وقالت لهم يحطون لهم اغنيه ربشه .. وحطو لهم اغنيه ربشه .. روضه وقفت في نص الممر مال الكوشه وتمت ترقص بدلع وهي مجابله علايه اللي كانت بتنزل .. علايه كانت بتتخطى روضه .. بس روضه لفت ووقفت جدامها

روضه : يالله عليوه عشان خاطري

علايه ترفع ايدها بانه لا ماتروم : لا روضه والله ماروم ..

عنود ورا علايه : يالله عليوه عشان خاطرنا ..

علايه تبتسم : ههههه اول شي حطو لي اضاءة الديسكو ..

روضه اشرت لفلبينه بانه تحط لهم اضاءه غير شوي .. سارت الفلبينه وغيرت الاضاءه واتلونت القاعه بكل الالوان .. ..

عنود : يالله بنزل بصفق لكم تحت ..

روضه قالت لهم يغيرون الاغنيه وحطو اغنية " العمر ايام " لحسين الجسمي .. ..... وطولن ع الصوت واتحمسو ... كانت القاعه في كل صوب السماعات ... تمت علايه واقفه متلومه وروضه كانت ترقص بدلع ... جدام علايه وتغني وياهم : العمر ايام وايامي ثواني .. وعشت عمري بلذة عمرها .. مابلاني غير ذاك اللي بلاني .. وقمت احسب ايامها وانسى شهرها

علايه صدت على غايه .. غايه ابتسمت لها وتقول لها " يالله عشاني ارقصي "

وعشانهم كلهم ... قامت ترقص ويا روضه .. وهي تحس بالحيا .. بس شويه واتعودت عالجو كانت حركاتها حلوه ورقصها هادي كل البنات اتيمعو تحت عند الكوشه ويصفقن ..

جان تغني روضه وتشار علي علايه : غانيه تحسب في مفانتها الغواني .. ثغرها الصبح دجى الليل بشعرها .. ( وتغمز لها ) عتقت في ثغرها كرب ودماني .. يعل كل الحسن فدوه عن ثغرها ..

وعنود مرتبشه وتصفق لهم وربع غايه كلهم تمو يصفقون لهم ... ويوم خلصت الاغنيه .. تمن البنات يصفقن ويصافرن ... علايه يايه بتنزل وهي متلومه مارقصت الا عشان خاطر روضه اولا .. وغايه ثانيا ..

وتلقفتها عنود تحت .. : ياخطيره انتي ..

علايه تبتسم بحيا .. : ههههههههه ... يالله نسير نيلس احس كلهم يشوفوني ..

روضه تمت ترقص ويا ربيعة غايه فوق .. وهي مستانسه ع الجو ... روضه كانت مستانسه من وناسة اخوها .. شويه وقالو بيدخلون المعرس .. سارو يلبسون عبيهم كلهم .. يت روضه صوب علايه ..

روضه : عليوه اللحين بيدش المعرس ..

علايه : ويه غربلا ابليسج .. وعباتي

روضه : سيري داخل حجرة اللي صوب المدخل بسرعه عن يدش ..

علايه نشت بسرعه وتركض شويه وتمشي بسرعه وهي سايره صوب المدخل شافت رياييل داشين ... وماعرفت شو تسوي وهي مجابله الرياييل .. حمد رفع عينه وقبل لاتطيح عينه على عروسه .. طاحت عينه على حبيبته .. وحتى انه وقف في نص الدرب .. وعلايه ركضت داخل الممر اللي فيه الحجر ...

حمدان : ايه دش بلاك ؟

حمد يصد عليه ويبتسم : ان شالله ..

دشو داخل وكل الحريم طبعا يشوفون بس مالحقو على حمد يوم يشوف علايه لانه ااستوى الموقف في المدخل واللي شهدو الموقف ينعدون ع الاصابع ..

علايه من دشت الحجره سكرت الباب وراها وهي تتنفس بسرعه لانها ركضت ومن غير الموقف اللي اربكها .. بس خذت شيلتها وعباتها .. ولبست عباتها ودخلت شعرها داخل .. وحطت الشيله ع راسها وتحجبت .. وابتسمت لعمرها في المنظره .. وقالت في خاطرها " الله يهنيهم .."وسارت صوب شنطتها وطلعت الظرف البني اللي تم اقل من شهر عندها وتمت تطالعه وهو بين ايدها وقلبها يحذرها من ها الشي ..!! بس قوت قلبها

اما فيصل كان واقف برع وهو يطالع حمد وهو يحدر داخل .. يعني يحدر عند حبيبته .. وحرمت حمد حاليا وقلبه يتقطع وهويدعي ربه انه يهنيها .. ومن كثر ماهو مب متحمل انه ييلس اتصل لتيلفون عنود اخته

طلعت علايه برع وسارت يلست مكانها ... وهي تيلس يالسه تعدل عباتها وترمس عنود ... ومن اعتدلت رفعت عينها صوبهم .. ابتسامة شفاتها اختفت من شافت حمد يطالعها ... علايه ارتبكت وتبغي تلمح له " لاتطالعني .. طالع حرمتك " ... بس لاحياة لمن تنادي ... عنود انتبهت لها الشي ..

عنود : بلاه يطالعنا ؟

علايه تصد الصوب الثاني : ماعرف ...

حمدان وهو نازل انتبه لعلايه وهي يالسه وسوى لها بايده حركة بيبااي .. هههههههه جنهم يهال .. علايه ردت رفعت ايدها وسوت لها بيبااي بس سوتها من تحت الطاوله عشان محد ينتبه وهي تضحك لكن حمد انتبه لهم وتم يحرق في عمره ومب متخيل انه علايه ممكن في يوم تكون من نصيب حمدان ..

عنود كانت ترمس اخوها .. ويوم خلصت صدت على علايه ..

عنود : يالله فديتج بترخص اخويه يتريانا خاري .. تامريني بشي

علايه تعدل شيلتها : لافديتج سلامتج وشوفتج

عنود تغمز لها : 050 ******* .. اتصلي يالقمر اترياج عقب الساعه 12

علايه تضحك وتحط ايدها ع ثمها : ههههههههههههههههههههههههههه وياها الراس ... لاترقمين عيب .. بخبر امايه ليج

عنود تلف عنها : ارمس جد مااوصيج لاتقطعينا..

علايه : ردي قولي لي كم رقمج ..

وردت تقولها الرقم وتخزن علايه الرقم في التيلفون وهي تبتسم ومن رفعت راسها صوب الكوشه انتبهت لحمد اللي مويم .. وموخي ... وشكله موول تعبان من الخاطر .. __DEFINE_LIKE_SHARE__

! ĐįƠЯ ƒάṦђịǑη ! · 12-19-2011, 10:24 AM

عنود اختفت بين الحريم اللي يطلعن بس من يوصل المعرس .. ويت يدت علايه عند عليا ..

يدة علايه : طوفي عليوه بنش اسلم عليهم

علايه : لا اتلوم ماروم

يدى علايه : نشي وعن البزا

علايه : تعالي سملي عليهم من تحت

يدة علايه : اخ عليج من بنت تردين يدتج

علايه " هيه اسمحيلي في ها الشي بردج ... "

يدة علايه مشت لطرف الكوشه ويتها روضه ويلست على ركبها مجابله يدت علايه وترمسها شويه واشرت روضه لحمد وغايه على يدة علايه انها تسلم عليهم

بس حمد نش من مكانه واتجدم صوب يدة علايه ويلس ع ركبه حذال روضه وتمو يرمسونها ويضحكون

يدة علايه : هههههههه اللحين الغوي بتنقمنا ننشناك من مكانك وهي اليوم عروس

حمد : افا عليج كله ولا ام خليفه ... ولا العروس لاحقين عليها .. ( وابتسم ورفع عينه صوب علايه اللي يالسه ع الكرسي وتطالعهم وعيونها تلمع بدموع الحزن وهي تتذكر موقفها الاخير ويا حمد )

حمد يقول بصوت عالي : وانتي علايه مابتسلمين ..

علايه طالعته بعيون مذهوله " هذا تخبل جدام الناس اسلم عليه ؟؟ وين ابا ..!! "

يدة علايه : تعالي عليوه سلمي على معرسنا ويالله انتي ياينج الدور

علايه وصلت صوب الكوشه وكانت واقفه شوي ورا يدتها ..

علايه بصوت هادي وماينسمع من حشرة الاغاني : مبروك حمد

حمد ابتسم كيف يفرح من يشوفها وهي مجابلتنه .. في قربها يحس بالراحه ..: الله يبارك فيج .. (وقالها بالم ) عقبالج

علايه ماتحملت ولفت بوييها الصوب الثاني ومشت عنهم ...

يدة علايه : وييه حسبي الله على ابليسج ياعليوه امره هاي البنت فيها شي جنها الا ماتداني العرس .. اكيد عين ... هيه عين وماصلت ع النبي .. امره مادري شو ياها باغضه طاري العرس عافانا الله ..

حمد : هههههههههه ان شالله بييها نصيبها ..

وسملت يدة علايه على حمد وعلى غايه اللي يالسه تشوفهم بهدوء ... وسارت عنهم يدة علايه وركبت موتر علايه .. علايه كانت تجلب الاف ام تتريا يدتها ... ومن ركبت اليده .. تمت تحتشر على علايه عشان العرس .. وانها ماتبا تعرس وعلايه تسوق وهي تضحك في خاطرها على يدتها . ...

.................................................. .................................................. ............................................

طافت الايام وكل حد انشغل بدوامه .. علايه من اول ماداومت وهي شاده حيلها لانها زايغه انه مستواها ينزل في الدراسه وهي كلها طموح انها تكمل دراستها وخاصه من عقب مرضها اللي لعوزها ... ومازالت على هاك الموال .. دوم تسير المراجعات في المستشفى وطبعا مقسمه وقتها كله بين الجامعه والمذاكره والمستشفى والمحل .. يعني كانت ماتروم اتفكر في شي زياده ...

اما المعاريس .. وحسب طلب المدام " غايه " .. مابغت انها تسافر وحبت تيلس في البيت بين اهل حمد .. الي هم قوم عمها ... هاا لشي يريحها اكثر من وجودها هي وحمد بروحها ولاثالث لهم .. !

وكل حد عايش يومه بيومه .. كالروتين المعتاد ..

في يوم ... علايه من عقب مايت من الجامعه سارت المحل ويلست وياهم تطالع طلبية بطايق سعيد ... وهي حرصت كل الحرص انه تطبق حركتها الخطيره اللي هو شعارها .. [ مع خالص احتقاري محبوبتك لعام 2003 ] .. طبعا ماترددت في لحظه انها اتحط الشعار بشكل خفيف وهادي مايزعج لا العروس ولا المعرس ولا اي حد من المعازيم ... وعشان ماتخسر زباينها بحركه ممكن توديها في 60 داهيه ...

يالسه تطالع الكرتون اللي استوى جاهز والعدد كامل .. ودش حمدان ..

حمدان : هلا والله ... براعية المحل

علايه صدت صوبه : اهلين ... شحالك يالدب ؟

حمدان ييلس ع الكرسي اللي مجابل المكتب : ااااااخ متكسر ..

علايه ابتسمت له ..: سلامتك

حمدان يعتدل في يلسته : الله يسلمج ماشالله اشوفج اليوم هني

علايه : هيه اليوم تسليم طلبية قوم سعيد بطي الـ... وييت ااتاكد

حمدان : الله يعطيج العافيه شاله الشغل ع راسج ..

علايه : هههههههههه ولو ...

حمدان : اسمحيلي انا ما امر هني دووم بس تعرفين ظروف شغلي ماتسمح لي

علايه : لا انا يوم اكون فاضيه تحصلني دوم هني ..

حمدان يبتسم لها ويطلع تيلفونه من مخباه ويقر المسج اللي واصلنه .... علايه حست بانه قلبها يدق بسرعه من شافت السياره اللي خطفت جدام المحل ...

علايه : امم حمدان انا بسير شويه وبرجع مشوار ساعه

حمدان يرفع راسه : وين ؟

علايه : احيد امايه قالت لي اييب المخاوير مالها ونسيت

حمدان : اها اوكي خلاص برايج

علايه : المهم لو وصلو قوم الـ ... تراه كل شي زاهب ومثل مايبون ( وتضحك بخبث )

" ههههههه اونه مثل مايبون مب جني انا تنذلت وحطيت لمستي الخاصه ع البطاقه .. اسفه سعيد .. اسفه حمده .. بس مجبوره .. "

شلت علايه السويج والموبايل وطلعت وهي طالعه انتبهت لسعيد اللي يمشي بيدش المحل ... ظنونها ماخابت واحساسها ماخانها .. اللي توقعته كان صح ... من شافته اتغشت .. انتبه لها سعيد ... ونزل راسه .. عرسه عقب اسبوع وشوي وهو نازل اجازه عشان العرس ... وقلبه تم يدق بسرعه من شافها واتاكد انها هي يوم تغشت لانه عبود خبره انها فتحت محل وحرمته يت هني ... كان خاطره يشوفها ويرمسها بس مايروم ... مايبا احساسه يخونه صوبها ويرد ويضعف ويقول انه يحبها ويباها .. ويسوي له في السما دروب .. علايه حمدت ربها انها طلعت قبل لايدش لانه لو تمت وياه في نفس المكان تدري انها بتضعف وبتعترف انها تحبه لين اللحين ومب رايمه تنساه ... ها المره ماصاحت تعبت من كثر ماتصيح .. وياريت لو انها اتصيح وينفع .. المشكله انها بس تزيد عواار راسها اتصلت ع تيلفون فطوم بنت عمها وقالت لها تطلع بتحوطها شوي لانها ملانه ... ووصلت بيت عمها ودقت هرنات وحشرت الفريج كامل لين ماطلعت فطيم وهي محتشره ... كانت فطيم لابسه عباه اسلاميه يعني ع الطرف مفتوحه .ولابسه تحتها تي شيرت لين الركب لونه اصفر وعليه دبدوب كبير وتحت شلحه ولابسه زنوبه عليها ليدي بيرد يعني كانت عنقاش ومال اي شي .. علايه من شافتها ضحكت ...

ركبت فطوم السياره : خسج الله ياعليوه ... حد يدق هرنات جي عوذ بالله طيرتي حمامة فوادي

علايه : هههههههه والله ملانه يافطوم بس خليني اتصل ع اميه

علايه اتصلت لامها وقالت انها بيت عمها وبتاخذ فطوم وعقب بتسير المحل ..

فطوم تطالع عمرها في المنظره وتتعدل .. : اقولج وين بتوديني ..

علايه : بس جي نقزر وقت ...

فطوم تطلع فاتوره من شنطتها : انا احيد انه عباتي مخلصه طوفي نسير بو هيل اييب عباتي دام انه فاضيات ..

علايه : اوكي ماعندي اخلاف

علايه شغلت الاف ام وتمت تتذكر سعيد وتامه سرحانه في الدرب .. وفطوم ساكته بعد ... وصلو صوب بو هيل وتمو يدورون باركن وبدت فطوم تكفش ... __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
بلاك بيري تورش 9860 فل تتش مع بن ممير """"""""""""""""""""""	محروم.كوم	منتدى أخبار المواقع والمنتديات العربية والأجنبية	0	10-28-2011 11:00 AM
""""""""مطلوب لكزس lx570 الدفع كاااش """"""""""	محروم.كوم	منتدى أخبار المواقع والمنتديات العربية والأجنبية	0	07-19-2010 03:50 AM
"""""""""""""""""""""""""""فساتين زفاف راقية ومميزة """"""""""&am	محروم.كوم	منتدى أخبار المواقع والمنتديات العربية والأجنبية	0	07-13-2010 12:00 AM
"سيتي" يصدر تصنيفات إيجابية لـ "إعمار" و"الدار" و"العربية" و"الخليج الأول"	محروم.كوم	منتدى أخبار المواقع والمنتديات العربية والأجنبية	0	09-29-2009 01:20 PM
"""""للبيع باترول سوبر سفاري موديل 99 ديزل """""""""	محروم.كوم	منتدى أخبار المواقع والمنتديات العربية والأجنبية	0	04-28-2009 02:40 PM