|
إنضمامك إلي منتديات استراحات زايد يحقق لك معرفة كل ماهو جديد في عالم الانترنت ...
انضم الينا
#1
| ||
| ||
السلام علاكم ورحمة الله وبركاته
__DEFINE_LIKE_SHARE__
اليكم هذه السالفه وعنوانها في داخل السالفه قبل كم سنه مدري كم عددها بس هن واجد اكثر من عشرين سنه الى ثلاثين سنه سمعت بهذه السالفه من شخص لا اتذكره ولكن فيها شوي من الغرابه يقول فيه ان فيه رجال عنده ابل والراعي من افريقا لاا اعلم من اي جنسيه بالضبظ يقول في يوم من الايام فقدت سبع من ابلي وبحثت عنها ولم اجدها وكان معي سياره هايلوكس غماره بحثت في كل مكان ولم اجدها قال الراعي ياعم ابروح معك ادور علاها يقول قلت اركب بعد ما ايئست منها ان اجدها يقول ارض اللي نبحث بها كلها اثر ابل وكل راعي نسأله يقول ماشفتها وحنا نبحث اشوي الا يوم قال الراعي اوقف ياعم هذه اثر ابلك هذا اثر فلانه وهذا اثر فلانه قلت يابن الحلال اركب الارض كلها اثر كيف عرفت بهذا الاثر قال ياعم انا ماقول الاهذا اثرها انا اعرفه زين قلت بس يبن الحل تلفت يمين وشمال واترك عنك الاثر لوكان من البدايه قاصينها يمكن اصدق بس المسافه بعيده واثر البل كثير يقول مشيت مسافه وانا ادور علاها قال ياعم لو خليتنا نقص اثرها افضل والله ياعم ان اللي شفت هو اثرها يقول اخذ يكرر ويلح علي بالرجوع قلت خلني اسكته قلت خلاص ابرجع يم المكان اللي فيه الاثر يقول اشوي الايوم قال وقف هذا اثر فلانه وفلانه قلت ايه مايخالف اقضب الاثر ابيه يسكت اخذنا فتره وحنا على هذا الاثر يوم صار شوي الا ونشوف البل من بعيد بس مدري هي ولا لا قلت اقضب الاثر زين شوي الا وهذه ابلي قلت تعال هذا اثر اي الابل قال فلانه قلت انا ابقصه واشوف هو يكذب والا لا وانا احط عيني على جره مافكيتها الا وجرة افلانه كما قال استغربت من معرفة هذا الراعي بالاثر يقول اسكت ولم اقل له شي يقول ردينا البل يقول وحنا نمشي شفت ضب قلت ياليت من صاد هذا الضب بس مامعي بندق قال ياعم انت تبي الضب قلت ايه بس مامعي بندق نصيده قال بسيطه قلت وشلون بسيطه تبينا نحفر جحره قال لا انت ياعم كم تبي من ضب قلت عشره امزح معه لاني عارف ماهو حاصل ولا واحد قال اوقف يقول وانا اوقف ويحول ويجيب عشر حصى منقيهن نقوه ويحطهن على المرتبه قلت امحق اسلاح مشينا شوي الا وذاك الضب عند جحره يتبرد قلت هه هذا ضب وش تبيي اتسوي يقول وهو يحول من السياره والضب ماهو قريب بعيد عنا يقول وياخذ وحده من الحصى ماحول غيرها وهو يسفها على الضب ولا تاقع الا بالراس وهو يركض يمه ويمسكه ويذبحه بالرداديه اللي معه ويجدعه بالصندوق يقول مشينا الا والثاني وهو يحول ويسف عليه مثل الاول يقول ولا تاقع الا بالراس يقول تهولت من فعله بدقه الاصابه بالهدف المهم مشينا والثالث والرابع حتى صدنا عشره حسب طلبي بالعشر حصى قلت علمني وشلون دقة رمييك بالحصى وشلون تقدر تصيب الهدف بهذه الدقه قال ابعلمك ياعم قلت ايبله علمني يقول حنا في بلدنا ماعندنا سلاح من الفقر وخاصه قريتنا وحنا صغار يعلمون اهلنا دقة التصويب بالحجر يخلوننا نرمي على برميل من مسافه كل يوم نتعلم عليه واذا شافونا اجدنا ذلك حولنا الى الرمي على تنكه من نفس المكان ثم اصغر واصغر حتى نصل على اصابه الابره او الشوكه بالدقه ثم نتعود على ذلك هذا كل مافي الامر وبعدين راس الضب كبير عن الابره ومن السهل اصابته يقول بالصراحه تهولت من ذلك وبعد فتره كل مابغيت ضب اخذته معي وقال كم تبي من ضب حتى يجيب عددها بالحصى انتهت السالفه ولا اعلم عن صحتها بس على كلام الرجال ماجبت شي من عندي وقبل الختام سبحانك اللهم وبحمدك لااله الا انت استغفرك واتوب اليك تقبلوا تحياتي اخيكم \ راعي العجراء |
مواقع النشر (المفضلة) |
| |
المواضيع المتشابهه | ||||
الموضوع | كاتب الموضوع | المنتدى | مشاركات | آخر مشاركة |
حافظة الابر. | محروم.كوم | منتدى أخبار المواقع والمنتديات العربية والأجنبية | 0 | 07-03-2010 07:40 PM |
ضروري بخصوص الابر | محروم.كوم | منتدى أخبار المواقع والمنتديات العربية والأجنبية | 0 | 06-30-2010 10:50 PM |
الضبان$$الضبان...سارح، معاكي،رمي،شوي، طبخ....الى اخر..) بعدسه ((راع الشماليه)) | محروم.كوم | منتدى أخبار المواقع والمنتديات العربية والأجنبية | 0 | 05-22-2010 09:40 PM |
اجهزة النوفي وخط الاثر | محروم.كوم | منتدى أخبار المواقع والمنتديات العربية والأجنبية | 0 | 12-30-2009 11:00 PM |
ريم البراري تشتري الضبان لتطلق الضبان خبايا فتاة جامعية افتتحت اول موقع للمحافظة.... | محروم.كوم | منتدى أخبار المواقع والمنتديات العربية والأجنبية | 0 | 06-25-2009 08:30 PM |