من سواليف (سيارتي البيجو والجيران)

محروم.كوم · #1 09-12-2011, 01:50 PM

السلام علاكم ورحمة الله وبركاته
اولا قبل ان ابدا لكم بالقصه تسلم علاكم عمتي منيفه
اليكم سالفة البيجو والجيران
في عام 1394 تقريبا كان معي سياره نوع بيجو اللي قنصنا عليها بدون سلف
المهم البيجو مافيه جنلط الواير لست مقطوع يتدودل تحت السياره اليا شفته تقول سبحة بيد شايب
المهم كان الوقت بالشتاء والشمس توها طالعه علينه بصبح جميل قلت ياولد خلني احمي السياره ركبت بالسياره وشغلت وخليتها تحتمي والبيت كان في طلعه رفعت رجلي عن الفرامل ولا السياره ثابته مادحدرت هزيت السياره شوي وانا فيها ماقالت شي مثل اللي تقول تطمن رح افطر وعين من الله خار وانا ماراح اتحرك من مكاني
بالصراحه استغربت من ثباته نزلت عنها لقيت الكفر الخلفي الايمن مدقر في حافة عتبه الباب على جنب هزيت السياره ماتحركت قلت كل ايوم اجل ابسوي هالحركه
دخلت وكملت الفطور وغسلت وطلعت ابي السياره

يوم طلعت ولا السياره ماهي فيه قلت وكاد واحد من الربع اخذها يمزح وذاك الوقت لو تخلي سيارك شغاله اسبوع ماتسرق
يوم التفت قبل اخر الشارع ولا سيارتي ماشوف منها الا شوي من الكبوت والباقي داخل في بيت الجيران ريوس الدركسون لاف ايسار والبيت تقريبا قبل نهايه الشارع مع البيوت المقابله لبيتنا
البيت طين والجيران عندهم بايكه قراش وملغينها وبانينها ببلك وحاطينها لهم ديوانيه يجلسون فيها اكثر وقتهم ماغر شايب وعجوز ودخلت علاهم السياره وهم يفطرون
الرجال اغماء عليه من الروعه ولكن سلم من البلك والسياره والحرمه اركبها تتصافق مع بعضها تقول سست فرت مهرب ضارب له وعر ومطرود
المهم ان فطورهم خبزه وشاهي مع حليب طلع من الروعه صينيه مقدنوس بالخلطه السريه والبشمل
ماكنت افكر وش جاهم او ماجاهم كنت افكر وشلون اقول عطوني سيارتي عندي شغل ومستعجل
الرجال صحا ووقف على رجليه وطلع عند الباب يصارخ بعلى صوته والحريمه هالعجيز
تصيح وتصوت للشايب يدخل لايجيه شي اما يرتفع ضغطه والا ينقطع قلبه ويموت
ماعليها عباة ولا غدفه (شيله) شعرها تقل جاعد حوار اوضح لا وفالته على رقبتها ماوصل اكتوفها تقول نسافه ددتسن بريغا يامل الجنه
المهم وقفت ماقلت هذي سيارتي حتى شفه هدى شوي واجتمعو الناس وانا القاء واحد من جيراني كبير بالسن وغالي عند ابوي ويعرف ان ابوي ماهو موجود مسافر ويكلم الشايب
والحمد لله ان ماصابك مكروه وجت سلامات والمزين ذاك الوقت مافيه تلفون والا كان كلم
ماهو على الشرطه وبس يمكن لوكان عتده تلفون كلم هيئه الامم المتحده وحقوق الانسان
المهم اقتنع الشايب وقال بس بشرط يصلح اجداري اللي طاح قال ابشر انا ازينه لك احسن من اول
المهم طلعت سيارتي ولا الشنطه عند المرتبه الخلفيه والبلك فوق التنده والقزاز مكسر
المهم انها تمشي قدام مجاها شي بس السياره صايره مثل الدجاجه الجبعا اللي مالها ريش في الذنيبا
انته السالفه من اخيكم راعي العجراء وارجوا ان اكون وفقت في اسعادكم بهذه القصه
وفي النهايه
سبحانك اللهم وبحمدك لا اله الا انت استغفرك واتوب اليك
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سالفة البيجو والكراوين	محروم.كوم	منتدى أخبار المواقع والمنتديات العربية والأجنبية	0	08-25-2011 06:10 AM
من سواليف ام قعيد	محروم.كوم	منتدى أخبار المواقع والمنتديات العربية والأجنبية	0	01-06-2010 10:40 PM
حزبية التدين لدى قناة الأنوار	محروم.كوم	منتدى أخبار المواقع والمنتديات العربية والأجنبية	0	05-20-2009 06:30 PM
حزبية التدين لدى قناة الأنوار	محروم.كوم	منتدى أخبار المواقع والمنتديات العربية والأجنبية	0	05-20-2009 06:23 PM
آحـب آلـبــر وآلمزيوون واحبك قبل لا يدروون اهلي واهلك والجيران..~	[][] ميآه غير صألحه للآكل	عدسة الاعضاء , كاميرا الاعضاء	27	07-13-2008 10:03 PM