غلاتك من غلا روحي - الصفحة 28

الهمسه · #1 02-15-2009, 02:09 AM

مرحبا الساع
شحالكم عساكم بخير وعافية

هذي اول رواية لي

واتمنى الاقي تشجيع منكم عسب اكملها

احم احم

اليده : غبيشة وريلها احمد متوفي،، عندها ثلاثة اكبر واحد سالم (بو احمد) وبعدين حامد (بو سعيد) وبعدين محمد (بو حمدان) وبعدين جاسم (بو سيف)

ملاحظة : سالم و حامد و محمد وجاسم متزوجين خوات

عايلة بو احمد :
بو احمد (سالم بن احمد الخيلي) 55 سنة
ام احمد (بشاير بنت ناصر الكعبي) 54 سنة
احمد 28 سنة متزوج علياء 26 سنة اخت ربيعه وعندهم فاطمة اول ابتدائي وسالم 4 سنوات
خديجة 26 سنة متزوجة مبارك وهو واحد من معارفهم وعندها بنت وحدة بيان 3سنوات
ميثا 25 سنة متزوجة ولد عمها حمدان
هزاع 21 سنة في الجامعة (اخر سنة)
موزة 18 سنة في المدرسة ثالث ثانوي

عايلة بو سعيد :
بو سعيد (حامد بن احمد الخيلي) 49 سنة
ام سعيد (وديمة بنت ناصر الكعبي) 46 سنة
سعيد 21 سنة في الجامعة (اخر سنة)
سلامة 18 سنة في المدرسة ثالث ثانوي

عايلة بو حمدان :
بو حمدان (محمد) 45 سنة
ام حمدان (اليازية بنت ناصر الكعبي) 36 سنة
حمدان 25 سنة متزوج بنت عمه سالم ميثا 25 سنة وللحين الله ما رزقهم بعيال
مايد 21 سنة في جامعة (اخر سنة)
آمنه 18 في المدرسة ثالث ثانوي

عايلة بو سيف :
بو سيف (جاسم بن احمد الخيلي)
43 سنة
ام سيف (ميرة بنت ناصر الكعبي)42
سيف 21 سنة يدرس في الجامعة (اخر سنة) في بريطانيا

البارت 1
في بيت بو حمدان
آمنة ناشة من غبشة ويالسة تراجع لان اليوم اخر امتحان لها ،، سمعت دقة خفيفة على الباب
امون : منوو ؟
بو حمدان : انا
امون : اقرب ابويه
بوحمدان : صبحج الله بالخير

امون : صبحك الله بالنور والسرور ،، شحالك ابويه
بوحمدان : بخير دام امصبح بهالويه الحلو
امون : وااايه فديت باباتي
بوحمدان : ان شاء درستي زين
امون : انا درست زين بس والله خايفة
بوحمدان : لا فديتج لا تخافين حطي الرحمن في صدرج وتوكلي على الله ،، يالله امون انسير نتريق متنا يوع
امون : ان شاء الله بابا
سار بوحمدان وباس امون فوق راسها وطلع (بوحمدان وااايد حنوون على عياله وخاصة امون مدلعنها اخر دلع وما يرضى حد يزعلها)
لبست امون مريول المدرسة ونزلت تحت تريقت بسرعة وسارت مع الدريول المدرسة .
في البيت العود (بيت اليده)
اليده : ميري ميري
ميري : نعم ماما
اليده : ونعامة ترفسج قولي امين
ميري : ليش ماما انا ما في سوي شي
اليده : انا ازقرج شعنه ما تردين صمخة عساج الصمخ
ميري : سوري ماما
اليده : انا جم مرة قلت لج لا تعوين لسانج اذا انا ارمسج ،، هاتي لي العصا هاتيها
ميري : اسف ماما والله اسف تبيني ابوس ايد ما انتي

اليده : لا ابويه لا تبوسينها ولا شي
ميري : انتي واايد طيب ماما
اليده : صه صه ياحبج للهذرة سيري هاتي التلفون ما تسمعينه يصيح صاحوا عليج ميته
ميري : انشاء الله ماما
اليده : الووو
بو سيف : صبحج الله بالخير امايه
اليده : صباااح ،، ابويه ساعات بيتكم خربانة ؟
بو سيف : لا اماية الساعة الحين ثمان ونص
اليده : انت قلتها ثمان ونص شو من صباحة الحين
بو سيف : ههههههه السموحة امايه
اليده : ضحكت بلا ضروس قول امين شعنه تضحك علي
بوسيف : افا افا تدعين على ياام سالم من صباح الله خير
اليده : رد قال صباح والله لو انت جدامي الحين لاكسر عصاتي فوق ظهرك يالس تتمصخر علي انت
بو سيف : لا امايه كله ولا العصا ،، انزين امييه يايب لج بشاره
اليده : عساها بشارة خير
بوسيف : لا خير ان شاء الله ،، ولدي سيف بيوصل باجر الفجر
اليده : الحمدلله الحمدلله خلاص باجر غدا العايلة كلها عندي
بوسيف : ان شاء الله اماية
سكرت اليده التلفون وسوت تلفون لعيالها وعزمتهم ، ولاختها مصيفة و وعزمتها بعد وقالت لها اتخبر بنتها مريم وعيالها الي في بوظبي، وللعزبة عسب ازهبون الذبايح لباجر وهذا غير الييران بعد
في بيت بو سعيد
ام سعيد يالسة في الصالة مع الييران وتذكرت ان سلامة تبا سعيد اييبها اليوم من المدرسة الساعة عشر ونص والحين الساعة تسع ونص فستأذنت منهم وسارت اتوعي سعيد عقب ربع ساعة نش سعيد وتسبح ولبس بدلة سبورت بانطلون رصاصي وبدي اسود كت وربط جاكيت على خصرة ولبس نظارته مع كابس وبعدين سوى رنة لهزاع و مايد (على انه خلص لبس)
(سعيد اقصر شوي من مايد و حنطاوي وجسمه حلوو شعره بني غامج وناعم طويل شوي يعني يوصل لرقبته وعيونه سود وشخصيته قوية وراعي حركات واربعة وعشرين ساعة يحوط في المولات مع مايد وهزاع وربعه)
في بيت بوحمدان :
طلع مايد من غرفته وهو لابس شرات سعيد سلم على امه وركب سيارته الرنج الرصاصي وهي مخفي شامل مر على سعيد وعقبه هزاع وكانوا ثلاثتهم اعقون الطير من السما ولابسين شرات بعض
في السيارة
مايد اسوق وسعيد يالس جدام وهزاع يالس ورى ومطولين على الاغاني ،، ويوم وصلوا المدرسة نزل مايد وفتح باب السيارة لأمون طالعت سلامة وموزة بنظرة غرور وركبت وبعدها ركبوا موزة وسلامة
سلامة : سعيد شوف مايد شقايل يعامل امون تعلم منه انت وهزاع
موزة : هيه والله
سعيد وهزاع : خلوا ريالكم باجر يفتحون لكم باب السيارة
امون : هههههه يا ويل حالي على المحترين
سلامة قرصت امون على ريلها
امون : آآآآآآآآآآي
مايد : بلاج امون
امون : سلاموو الزفتة عورتيني
مايد : فديتج امون يعل الالم فيني ولا فيج
سكتوا كل الي في السيارة ثواني
امون : واااااااو ميودي طالع احلى
واحد فيهم
سعيد وهزاع مع بعض : اخسي الا هو احلى واحد
ضحكوا كامل
مايد : ما عليج منهم صج احلى واحد ولا لاني انا اخوج
امون : لا والله صج ،، بس حلو لابسين شرات بعض(مايد طويل ابيضاني رشيق فيه عضلات وعيونه سود ،، شعره اسود يوصل لرقبته وناعم وخشمه حلوو وراعي حركات واايد حنون ورحيم ويحب اخته اموون بجنون ويعتبرها ربيعته مو بس اخته منطوقه حلو ولسانه ينقط عسل يعني لما تكلمينه تعيشين في عالم ثاني شخصيته قوية)
سعيد : شباب باجر كلنا معزومين في بيت العود على سلامة سيف ولد عميه
سلامة : واااااااو باجر بيي سيف
مايد طالعها بنص عين استحت سلامة : هيه واخيرا خلص دراسته وبرد من هو صغير وهو في بريطانيا
موزة : بيون بيت خالوا مريم
هزاع : هي بيون
وصل مايد موزة وسلامة على بيتهم ونزل امون البيت وساروا الشباب طبعا يحوطون ،، والبنات كلهن فرحانين لان خلصوا الامتحانات
في بيت بو سيف
ام سيف مرتبشة وكل شوي ترتب البيت وغير الدخون الي واصل اخر الشارع وما خلت حد من معارفهم الا خبرتهم و ابو سيف سار يشتري الفوالة

في بيت بواحمد
احمد وعليا يالسين مع بعض (عندهم قسم فوق خاص لهم )
احمد :حبيبتي
عليا : عيوني
احمد : شرايج هالسنة نسافر احنا مع العيال النمسا
عليا : فديتك شدراك اني خاطري اسير النمسا
احمد : نسيتي ان انا وانتي روح في جسدين
استحت عليا ونزلت راسها
احمد : فديت الي يستحون
عليا : تفدتك العافية
تبطل باب صالتهم بدفاشة ودخل سالم
سالم : مرحبا الساع
احمد : مرحبتين شو يايبنك انت ها
عليا : حمودي بلاك عالياهل
سالم : شوووووووو حمودي ماما عيب بابا ريال شو ها حمودي بابا اسمه احمد الطفس
احمد : انت الطفس يالثور انا براويك تعال
وركض سالم برى وسكر الباب بالقو
ونزل تحت
في الصالة
ابو احمد وام احمد وموزة وخديجة وميثا توهم واصلين
ابو احمد: بشاير (ام احمد)
ام احمد: لبيه
ابو احمد: لبيتي في منى قولي امين
ام احمد: امين
ابو احمد: وينه هزاع
الا بدخلة هزاع
هزاع : شفيه هزاع
ابو احمد: شفيه بعد اربعة وعشرين ساعة في المولات عنبوك قر في البيت شوي
هزاع : يحليلي انا اصلا ما اطلع كله يالس في البيت
خديجة : حل حلولك منو ما يطلع ؟ وطالعته بنص عين
ميثا : ههههههههه عاد انت ومايد وسعيد ابد ما اطلعون
سالم : عمي هزاع جم وحدة رقمت اليوم
هزاع : سلووووووووووام اسكت وانطم لا ابلعك دلة القهوة (هزاع حنطاوي وتقريبا طول مايد جسمه حلوو وفيه عضلات عيونه عسلية ووساع شعره اسود يوصل لرقبته وناعم وخشمة طويل ،، وراعي حركات عصبي بس حنون وعنيد والي في راسه يسويه)
الكل :ههههههههههههههههههه
في بيت بو سعيد
سلامة يالسة تتصل لامون
سلامة : مرحبا الساع
مايد : مرحبا ملايين ولا يسدهن وان زادن لاباس
سلامة : شحالك مايد عساك بخير
مايد : اكيد بخير دامني سمعت هالصوت
استحت سلامة
سلامة : م م مايد عطني امون
مايد : جي على طول ما سالتج اخبارج
سلامة : اانا بخير يالله عطني امون
مايد : من عيوني يالله فوداعة الله
سلامة : فوداعة الرحمن
امون : هلا سلامي شحالج
سلامة : آآآآآه اكيد بخير دامني سمعت هالصوت واايه يعلني افداه هالصوت
امون :ههههههههههههه سلامي التلفون سبيكر ومايد يسمعج
قفطت سلامي وسكرت التلفون بسرعة وتوعدت لامون

شبتسوي سلامي لامون ؟
وفي العزيمة شراح اصير ؟
هل بغير سيف حياة العايلة ؟
واذا بغير لمنو وهلا بغيرها للاحسن او للاسوا ؟
__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
كيف تعرف غلاتك؟؟؟	غالية الثمن	الإستراحه العامة	9	09-18-2009 01:35 AM
يا غلاتك بقلبي...	بنوته كول وين ما تكون	قصص و روايات	12	03-11-2009 09:33 PM
قسم بالله (( ما تنزل ... غلاتك من شرااييني..}	شيطونة الـ ع ـين	هواتف , مسجات , وسائط , برامج , ثيمات , نغمات , بلوتوث	18	03-11-2009 06:48 PM
غلاتك بقلبي يا نصيب الغير...	بنوته كول وين ما تكون	قصص و روايات	6	03-10-2009 06:35 PM
غلاتك	••{ ظبية	الإستراحه العامة	13	07-13-2008 03:08 PM