السلام عليكم ورحمة الله وبركاته
اخواني الاعزاء..مسيكم بالخير جميعا ..شالكم يالربع عساكم طيبين
تقبل الله طاعتكم

هذي القصيدة كتبه الشاعر حميد مسلم البحيري وهي محاوره بينه وبين طير حر شافه عند رجال ما يعرف للطيور وبعد ايام شاف الطير في حالة اخرى

شاعرنه يقول

ياطير انا بسألك بالله قلي = وش فيك ضايق حالك اليوم تعبان
حالتك هذي في ضميري تعلي = بينلي الموضوع من دون نقصان

قال الطير



والله يابو حامد شقول وشخلي = من دون لشكي حالي اليوم برهان
ضايق من اللي يابو حامد حصلي = شيءٍ جرالي ليته اليوم ماكان
من بعد ماني بالجبال متعلي = رزقي علي اللي خالق الكون سبحان

اطير في جرد الفيافي وافلي = صيدي طري ماهو من الثلج مليان
واليوم سبقي في كفوفي يتلي = اكفخ من الحره وانا بين جدران
اصبحت عند اللي لحالي يذلي = ماهو بصقارٍ ولاهو بفهمان
أن صحت من جوعي ولو هو فطلي = زودٍ علي ظلمه جزاني بحقران
جاهل ولع بس حطني للتسلي = ماله سنع يالقرم بالطير خسران
ياليت لي عندك نصيب ومحلي = عندك وعند اللي علي الطير شفقان
اللي ليا شاف النداوي يهلي = تعطون حق الطير والطير له شان
وطالبك شفلي يافتى الجود حلي = عجل علي الله يجازيك بأحسان

قال الشاعر


ياطير يومك بالفيافي تدلي = تقطع عل كيفك اراضي وبلدان
لاصاح بالملواح خله يولي = خل الغشيم اللي معه كنت بلشان
خله ورزقك يالنداوي علي اللي = الواحد اللي عالمٍ كل ما كان

قال الطير

حلك ترى هو يابو حامد وصلي = واما ضربت الحوم ماكون سلمان

وسلامتكم

بصراحه يا اخواني انا اشوف هالمنظر كثير ..اشوفلي ناس والله ما تعرف للطير ..اللهم عنده طير وجيب كانه يقول شوفوني انا صقار ولا مرض الطير باعه او لا سمح الله بعض المرات يموت الطير عنده والعياذ بالله ..الله يهديهم ويرزق كل مسلم من واسع فضله

والسلام عليكم ورحمة الله وبركاته

اخوكم
فالكن 1