قنصـة شيبـان ..2010..راحـوا الشيبـان***

محروم.كوم · #1 09-11-2010, 05:20 AM

عيدكم مبارك وكل عام وانتم بخير..
بدأ الصيد وبدأت الأودية تفقد سكونها..وبدأت الوفود تتوافد ماني قايل القناصة خلونا نسميها الوفود وبعض القناصة..
يوجد بين هذه الوفود قناصة بالفعل ورجال معرفتهم تشرف شرواكم..

أما البقية أي الوافدين للصيد فهم فئة (إمعات)حضروا لاستفزاز الناس بقلة أدبهم وثقافاتهم الغير رجولية وهذه الفئة من مختلف الأعمار فيهم الشايب وفيهم الشاب تجمعهم بثارة التصرفات كصفة موحدة فيهم..

قصة لأحدهم
كنت في أحد الأيام واقف بسيارتي تحت طلحة في وقت الصيد وكان الغرض من وقوفي أصور بعض الطيور المهاجرة(الدخل)...
والطلحة اللي أصور فيها طلحة عادية جداً مثلها مثل مئات الطلح اللي حولها..المهم اتجهت لي سيارة نوع ميتسوبيشي رصاصي صالون ركابها رجال اثنين(شيبان)ومعهم أربعة شباب.
وقفوا سيارتهم تحت الطلحة اللي أنا تحتها ولا حتى قالوا السلام عليكم ..
وبكل بثارة صاروا يناظرون في أعلى الشجرة يدورون طيور..قلت لهم وعليكم السلام مع انهم ماسلموا ..
وقلت لهم ياجماعة الخير أنا جالس أصور تكفون الرمي بيجفل الدخل وأنا جالس من اليوم يالله ركد الدخل ..
وقلت تكفون ماني متأخر ساعة بالكثير وأتوكل على الله..طالعوا في بعضهم فحركوا سيارتهم لشجرة قريبة مني 30متر تقريباً ونزلوا وصاروا يرمون لأن الدخل في كل الطلح..
قلت الحمدلله فكة..
المهم سمعت صوت قريب مني وأناظر ألا واحد من الشيبان جاي لمي يمشي ومعه هوائية..جاء لين وقف تحت الطلحة جنب سيارتي ولا حتى قال السلام عليكم..فبكل بثارة وجه هوائيته للشجرة بيرمي فيها.. قلت له ياشيخ الله يحفظك قبل شوي جيتوا وشرحت لكم إني أصور وأنت عارف الرمي يجفل الدخل تكفى أنا ماني متأخر شوي بس وأمشي من هنا وتعال وارم الى بكرة إذا أنت ملزوم بالرمي في ذالطلحة..
تخيلوا يا إخوان وش كان رد هذا الكهل المتهالك الغبي..

يقول..صحيح أنت قلت انك تصور ولا رمينا لكن الحين أنا بس جاي أتبع طيور لنا كانت في شجرتنا وطارت ونزلت في شجرتك أنا أبي طيورنا بس..وبكل تفاهة قالها ..ماشاء الله تقول جاي بيرد حلاله كأن الطيور عليها وسمه..!
أنا من يوم سمعت عذره هذا غسلت يدي ودريت أني أمام ما يسمون بأشباه الرجال من الصعب تسمية هذا الكهل برجل هذا كهل لايمتلك من علوم الرجال شيء يتصرف بتصرفات حتى السفهاء يترفعون عنها..
أعطيته درس كلامي في علوم الرجال فمن شكله وتعبيراته كأنه لأول مره يسمع فيها ..أوكمن سمع بها وفشل في تطبيقها فصار يدور الدخل وأنا أدرس عليه بأن طريقته هذه عيب عيب..
ولاكن لاحياة لمن تنادي..كان غبي جداً..
صوت له الشايب الثاني صار يناديه وبكل برود ليعود..
يقول له يابو راكان تعال تعال..قلت له ابو راكان والله الاسم كبير يابو راكان والعمر كبير..!!
لكن بصير في العقل أنا الكبير وحلال عليك الطلحة وحلال عليك الوادي كله بتركه لك ياشيخ لكن بقولك نصيحة..
ترى طريقتك ذي طريقة استفزازية وإذا أنا مررتها لك تجنباً للمشاكل مع بثر مثلك ..ترى غيري ماراح يقدر هذه البثارة فيك ومهو عارف أنك مجرد سفيه في هيئة شايب..
وراح يملئ فمك من التراب أو تدخل نفسك في متاهات عسيرة..
وتذكر كلامي بعدها مشيت بسرعة وتركت الدأب وشجرته فانطلقت بسرعة بعيداً عن أبو راكان الله لايبيض وجهه الشايب السفيه!
إخواني المواقع الألكترونية أتاحت لكل فصائل المجتمع بالتعرف على أشياء جديدة فينجذبون لها بكل عفوية ويمارسونها على حد ثقافتهم دون مراعاة لثقافات من سبقوهم في هذا المجال والطرق المتبعة بينهم..
فصار هناك تداخل في الثقافات سينتج عنها عواقب وخيمة.

فإلى وقت قريب كانت هواية البر والقنص تقتصر على من لديه الخبرة في القنص ومجارات الرجال وهذا عنصر أساسي فالقناصة القدماء كل معاني الرجولة متأصلة فيهم..
من المستحيل أن يكون بينهم زي النقص أبو راكان الشايب السفيه.
لذلك أنبه إخواني أن ما كل من حمل البند قية وصار يقنص هو رجال..
ترى فيه ذكور صعب أقول رجال إذا شفتهم تحسبهم رجال وهم ذكور فقط ما جلسوا في يوم من الأيام في مجالس رجال ..
يتصرف فيهم الشايب كصرفات السفهاء...
لذلك حاول دائماً تجاوزهم وعدم التدقيق في قبح تصرفاتهم وما يصدر من قلة أدب منهم ..
انصحهم دائماً فهم بحاجة لنصحك وقدم لهم درس في سلم الرجال..
فربما يوقظ ضمائرهم ألميتة..
في أمان الله

الروقي
__DEFINE_LIKE_SHARE__