ليشّ تتعّمـد تعّـذبنّي ؟..}~* .. - الصفحة 59

miss_pink · 01-10-2009, 10:38 AM

يسلمووو على البارت القصه واايد حلوه

و نحن في انتظار البارت الثاني وشكرا __DEFINE_LIKE_SHARE__

Grshoob Albdoo · 01-11-2009, 07:12 PM

البارت الثالث والثلاثون

جــان مره وحده يسمع صوت صيــااح ظبيه ربع صوبهاا
ظبيه : عبدالله يمعــه يمعــه
عبدالله : بلاااه يمعه
ظبيه انهارت ويلست تصيــح بهستيريه
عبدالله : ظبيه بلااج رمسي
ظبيه وهيه ميته من الصياح : يـ.....ـمـ.......ـعـ.......ـه

وتمت تقول شي بس عبدالله مافهم من كثر ماهي تصييح تم يحاول يفهم عليها بس مارام استسلم وحاول يخليها ترتااح بس هيه مب طايعه حاول يهديها بس ما هدت تم يحاول ويحاول ويحاول إلين ماهدت عالآخر
عقب سـألها شو السالفه
ظبيه : حلمت بيمعه عبدالله يمعه زعلاان مني لأني جي اسوي بروحي قالي وافقي على خـ ... ( جان تسكت وتفكر شوي ) عبدالله الي متقدم لي خميس ( ويلست تصييح )
عبدالله تم يمسح دموعهاا : هيه خميس ولد خالوه مريم ظبيه خميس شاريج وشكله يحبج
ظبيه : يمعه يباني اخذه واذا ماخذته بيزعل مني طول عمره عبدالله انا مابي يمعه يزعل ( وصــااحت ) ومابي اخذ خميس بعــد
عبدالله : خلاص ظبوي ريحي ألحيين اهم شي راحتج لا تصيحين واايد مب زيين عقب فكري بكل هااه
ظبيه : مـــااارووم مــــاارووم انــاا تعبت
عبدالله حضنهاا ويلس يرمسهاا وينصحهاا وحست روحها ارتااحت عقب حاول وياها تنزل وتتغدى بس ماطاعت سوى روحه زعل منهاا وسار ، لحقته وسارت تغدت عشان خاطره وصارت شوي احسن عن قبل بس كله اتم فـ حجرتها وتفكر بـ زعل يمعه و بإرطباتهاا بـ خميس
خميـــــــــس عمرهاا ماتوقعت هالشخص يتقدم إلهاا تمت تفكر بت كل المواقف الي جمعتهاا مع خميس عسب تحلل شخصيته طيب ، حنون ، ماعنده حركات البنات ، جاان تذكر الموقف الي صادفهاا يوم كان يوعان وحرج عليهاا عرفت انه عصبي بعـد ويعق الرمسه بدون لا يعرف ضربت عراسها بالخفيف وجنها ماتبى تفكر بـ هالاشيااء وانسدحت عالشبريه تحاول ترقد بس ماتروم تمت تتجلب يمين يسار بس وماشي فايده نشت من عالشبريه وهيه تتأفف سارت صوب حجرة عبدالله دقت الباب بطللها الباب وطبعا رحب فيهاا
يلست تسولف معااه جان اتيب طاري الحلم وطاري خميس وتمت تناقشه بس هالمره وهيه شوي حالتهاا احسن وهيه هاديه ، عبدالله تم يرمسهاا ويحاول يقنعها وينصحهاا ومني مناك

عقب 4 ايام من التفكير
4 ايام من المعاناه
4 ايام من الصيـاح والعذاب

قررت ظبيه قرار وهيه متوتره تخبر حد بس خلاص بس عشان يمعه وعشان الحلم بتوافق
خبرت عبدالله انها وافقت ويوم ردت حجرتها ندمت وتمت تصييح
عبدالله ماقصر خبر امه وابوه واستانسوا واااااااااايد والي صدق استانس من خاطر سعيــد ارتبش نش وتم يغني وايول وعبدالله تم يظحك عليه وعلى خباله
ام عبدالله اتصلت فـ مريم وخبرتهاا ومريم وااايد استانست وخبرت خميس إلي ماصدق وطــااار من الفرحه

والكل عرف بـ موافقه ظبيه وحددوا الملجه والعرس الملجه عقب اسبوعين والعرس عقب الملجه بأسبوع
ظبيه انصدمت لانه قرروا كل شي وكـانت ندمانه لأنهاا تسرعت وقالت لهم انها موافقه ماكانت تحس روحها عروس ماكـانت مستانسه كثر ماكانت مستانسه مع يمعه
يمعه يمعـه يمعــه هالشخص كل يوم عن يوم تعشقه أكثـر واكثــرر وهيه هب عارفه كيف راح تعيش مع واحد غير يمعـه
يمعــه إلي ملك قلبها وكل شي فيها
يمعــه إلي ودرها مره وحده
يمعــه إلي راح بدون رجعـه للأبد
تمت ظبيه غارقه بـ هاي الأفكــاار

صوب ميره وساره كانوا سايرين المول ويا حصه طبعا احمد إلي موديهم كانوا يدورون من محل لـ محل يدورون شي لـ ملجه ظبيه وللعرس قالوا بيفصلون
حصه : افف خلاص تعبت والله
ميره : اييه عن تولديين عليناا
ساره : هههههههههه ميروه تخيلي شييت قفطه والله
حصه : جب جب تطنزون علييه هااه
ساره : يلسي يلسي ويا كرشتج
حصه : ساروه اصطلبي
ساره : باقيلج شهرين وتولدين لااه ؟
حصه : تقريبــاا
ميره : تعــااالوااا
ساره + حصه : شــووو ؟

ميره : تدرون ان عموو شيخه يايه عقب كمن يوم
حصه : هيه ادري
ساره : اوووونــه وانا آخــرر من يعلم !!
حصه : والله انتي هب عايشه فالبيت 24 فـ حجرتج
ساره : حرااام علييج
ميره : حصه حصه تعالي نجوف هالمحل
حصه : سيروا سيروا انا بيلس هنيه تعبت
ساره : بتيلسين روحج مايصيير
حصه : افففففف سيري اقلج
ساره : وابويه حرجت خلاص ، ميروه تريي بي معــااج
وسارت ساره ويا ميره للمحل وتموا يشوفون الفساتين ويدورون

صوب حصه إلي كـانت يالسه روحها ياها تلفون من أحمد ردت وقالهاا ان امه اتصلت وقالت ان عبيد طايـح ومتعور وسار يودييه المستشفى وان سلطان بيمر وبياخذهم
حصه تمت زاايغه على ولدهــاا ظهرت البنات واتصلت فـ سلطـان قالها 5 دقايق ويكون فالمول ، عقب ماوصلهم سلطـان ساروا وركبوا ويااه حصه تمت تحن علييه عسب يوديها لـ ولدها عسب تطمن علييه

سلطـان سـأل احمد هو فـ اي مستشفى عقب توجه للمستشفى نزلت حصه وكلهم نزلوا معــااها
تطمنوا على عبيـد بس كـان طــاايح والحمدالله بس خدوش مافي لا كسـر ولا شي هيه قالت بتم عند عبيد واحمد ، وسلطـان قال بيرد البنـات البيت
وهم فـ السياره
ميره : سارونه شرايج نسير بيت عند ظبوي فـ بيتهم
ساره : والله حلــووو
ميره : سلطـان فديت خشمك
سلطـان قاطعهاا : ميره فديت خشمج مب دريولج انــاا
ساره : سلطــااان بلييييز
سلطـان : اوكي خلااص وافقت
ميره : مـــاالت
سلطـان : جب لا اغير رايي
ميره : زين زين خلااص
سلطـان : اشعنه ماتسيرون بيت خالوتي ام امـل
ميره تبى تغايض ساره : ليش مشتــااق لجوفه اموله ؟
سلطـان : ههههههههه هيه تصدقين وايد وايد
وتم يطالع ساره من المنظره جافها صدت ويها صوب الجامه وسرحت جان مره وحده ايود بريك بالقوو
ميره : مينووون انت تبى تذبحنــااا ؟
سلطـان : بلاهاا بنت عمي ؟
ساره : مــااشي ليش ؟
سلطـان : متأكده ؟
ساره : هيه
عقب حرك وتوجهوا لبيت قوم ظبيه
عقب نص ساعه تقريبا وصلوا لبيت قوم ظبيه
نزلن البنات وسلطـان بعد نزل سار ييلس ويا عبدالله شوي
ظبيه استانست لنا شاقت ميره وساره ياينهاا
يلسوا يسولفون فـ عدة مواضيع لين ماميره فتحت موضوع ماكان وقته
ميره : تدرين عــااد تونــا كنا فـ إمارات مول سرنا اندور فستان بسيط لملجتج ، خذتي شي للملجه ؟
ظبيه : انا مابا اسوي ملجه
ميره + ساره : شــووو ؟
ظبيه : شو إلي شوو مب ناويه اسوي ملجه بس عزيمه بسيطه
ساره : وامج وافقت ؟
ظبيه : اميه لين ألحين ماتعرف عقب بخبرهاا
ميره : بس مايصيير جي لازم تفرحيين
ظبيه :....
ساره حبت تغير الموضوع : انزين فصلتي فستان للعرس نحن باجر بنسير
ظبيه : لااا
ميره : ظبيه عن الاستهبال عرسج وهب مهتمه نحن المعزومين قاعدين نسوي كل شي قبلج
ظبيه : ليش مستعيليين ؟
ميره : هب مستعيليين ولا شيي انتي إلي هب مهتمه
عقب ردت ساره وغيرت الموضوع وتموا يرمسون عن عمتهم شيخه وهزااع
ساره : هيه البارحه عموو اتصلت وتقول الجو عندهم جنــاان
ظبيه : صدق ؟
ساره : هيه
وتموا يسولفوون إلين ماسلطان زقر البنات وعقب ردوا للبيت طبعا ساره ردت معاهم البيت
ساره : يالنحســه ابا اسير بيتناا
ميره : ماشي ماشي رقدي اليوم عندناا

ساره : نعم نعم يلااا منـــااك
ميره : ساروه عشــااني والله انا رقدت فـ بيتكم يمكن اسبوع
ساره : زين زين عن تصيحين علينا برمس امايه بجوفها بتوافق
ميره : يلايلايلا بســـرعه
عقب اتصلت ساره بـ أمهاا وخبرتها انها بترقد عند ميره بالأول مارضت بس بعـد ما ميره رمست امهاا وحنت عليهاا حن وافقت
عـاد فـ هاليوم سلطـان موول ما ظهر من البيت
ميره وساره كانوا يالسين فالصاله حدر عليهم سلطـان
سلطـان : السلااام عليكم
ساره + ميره : وعليكم السلااام
سلطـان : ماذا تفعلون ؟
ميره : نرى فلم ، لماذا ؟
سلطأن : لا شئ فقط اسـأل
ساره : هههههههههههههههههههه امحق لغة عربيه فصحى
ميره : شو تغاريين
ساره : ماغاار
ميره : اعترفي اعترفي انج تغاريين
ساره : جب ترى ارد بيتناا
ميره : يلعــن ابو المذله بس عـااد والله ذليتيني
ساره : هههههههه تستاهليين
سلطـان : شو اليوم بترقدين عندناا ؟
ميره : لا عندي
سلطـان : تستهبلين
الكل : ههههههههههههههههههههههههههههههههههه
ساره : انـــاا يوعـــاااانه حدي
ميره : انـــاا بعــد
سلطـان : سيروا المطبخ سوولكم شي تاكلونه صعبه يعني ؟
ميره : مالت عليك ثم مالت عليك من اخوو تحريناك كريم بتقول افـاا عليكم ألحيين بطلبلكم ولا بوديكم المطعم إلي تبونه بس ويين ياحسره
سلطـان : خيبه ثم خيبه كلتيني بـ قشوري مايسوى علييه والله انـــاا سلطـان هب كريم
الكل : ههههههههههههههههههههههههههههههههههه
ميره : سخيييف سخييييف
سلطـان : جب يلا جب زيين شو تبون اطلبلكم ؟ والله انتوا ماوراكم غير الخساير
ساره : شو انت ولد عم عالفاضي ؟
سلطـان اطالعهاا بنظره سكتت
ميره : ههههههههاااااي ههههههههههههااااي طاعوا اشكالكم قسم بالله تظحكوون هههههههههههااي
سلطـان وهو يقلد ميره : ههههههههاااااي ههههههههههههااااي طاعوا اشكالكم قسم بالله تظحكوون هههههههههههااي جايفه شكلج انتي ؟
ساره : هههههههههههههههههههههههههههههههههههه
ميره فرت المخده ع ويه ساره وساره تمت ناقعه من الظحك عليهاا وسلطـان سار عنهم ودرهم يتضاربون روحهم

فـ العين
فـ بيت مريم

كانت ميثه يالسه ويا فاطمه وامهاا
ميثه : اماايه انا هالمره خاطريه بـ فستان بنفسجي
فاطمه : لالالالا لبسي خذيلج فستان ليموني والله طرر
ميثه : هيه ليموني حلوو بعــد
فاطمه : انــاا باخذ فستان اخضريكــاا
مريم : اقلكم مايد وينه ؟
ميثه : قالي بيسير النــاادي
مريم : وخميس ؟
فاطمه : خموس سار يتسبح
مريم : سيري خبري اخوج ان اليوم بنسير صوب دبي
عسب تتشرون اغراض للعرس
فاطمه : انشالله امييه
وهيه سايره حجرة خميس كان مبايلهاا فـ مخباهاا وصلها مسج بطلته كـان راشد : __DEFINE_LIKE_SHARE__

Grshoob Albdoo · 01-11-2009, 07:16 PM

( ألحيين اخوج خموس هالمفعوس يعرس قبلنـااا
وانــاا إلي اترياا من متى تقولين لي اتريــاا اخلص دراستي )

ظحكت فاطمه وردت علييه

( لاحقين عالعرس ليش مستعيل ؟
بعدين انــاا لين ألحيين ماتجهزت )

عقب دقت الباب على خميس وقالتله انهم يبون يسيرون صوب دبي عسب يتشرون اغرااض
وهيه نازله بعد وصلهاا مسـج

( ليش مستعيل هـااه ؟
انتي دوم تقولين لين ألحين ماتجهزت
يعني متى بتتجهزين ؟
متى بتخلصين زهبتج ؟
انــاا تعبت نفسياا )

نزلت فاطمه وهيه تظحك من مسج راشد
ميثه : خيــرر اجوفج شاقه الحلج ؟
فاطمه : مشكله الياهال يوم يرزون فيسهم فـ اشياا ماتخصهم
ميثا : اففففف كم مره بقلكم اني مب ياااهل ماتفهمون انتوو ؟
فاطمه : اعصابج اعصابج عن تنقعين عليينــاا
مريم : خلاص فاطمه انتي العوده تحطين راسج براس اختج
فاطمه : امايه ماتجوفينها هيه رزه فكل شي تتدخل
ميثا : بس سألتج زييين
مريم : خـــلاااص
جــاان يوصل لـ فاطمه مسج بطلته وييهــاا احمـــــررر
ميثا : هههههههههههههه طاعي ويهج ياخي كيف غدى جنج طمااطه
فاطمه : جب جب
راشـد كان مطرش لـ فاطمه صورته وهوو كـااشخ
وكـاتب تحته

( شرايج فيني ؟
فـ ذمتج مب حرام هالغرشوب يتم بدون حبيبته !! )

مريم : من إلي مطرشلج مسج ؟
فاطمـه توهقت : هــااه.. هاي .. اقصد .. هـا راشد
ميثا : ههههههههههههههههه عسب جيييييييييي
فاطمه حرجت : اففف انتي ليش جي رزه
وسارت حجرتهاا
وتمتو ميثا و مريم يظحكوون على فاطمه

عقب قوم فـاطمه ساروا لـ دبي
فاطمه تمت تشتري اغراض لزهبتهاا بعـد هب بس كانت سايره للفستان وطبعـا امها مريم كـانت تساعدهاا

ميثا سارت صوب خميس
ميثا : خموس يوعــااانه بمووت من اليووع
خميس : شو تبين ؟
ميثا : تدري فـ خاطريه فرابتجينو
خميس : ألحين تقولين يوعانه وماعرف شوو ها بيشبعج يعني ؟
ميثا : الله يخلييك والله فـ خاطريه
خميس : زيــن
ميثا : ابااه من ستار بكـس هب مال اي كوفي شوب
خميس : تتأمر بعــد انشالله الشيخه جوفي فطيم وامايه مايبون شي ؟
ميثا : اوكي وييت
سارت ميثه وسـألت فاطمه وامهاا فطيم قالت تبى فرابو بس امها ماتبى شي

عقب ردت صوب خميس وخبرته سار خميس ستار بكس وخذ 3 فرابتجينوو ورد صوبهم اول ماميثه جافته سارت صوبه وخذت الفرابوو وهو صد عسب يسير ويلس بس أول ماصد دعم وحـده أول ماجافهاا قلبه طـاااح من مكــاانه وهيه ارتبكــــــت وااااااااايد موول ماتوقعت تجوفه وهنيه بالذات
ميثا : ظبـــووووووي
خميس : شحالج ظبيه ؟
ظبيه : الحمدالله شحالك انت ؟
خميس : بخير بشوفتكم
ميثا : اكيـــد يايه تشتريين للزهبه صـــح ؟
هنيه ظبيه قفطــــــت وييههااا احمـر نزلت راسها وما نطقت بحرف وااحد وكــان قلبها يدق بالقـوو
وخميس ابتسم لما جـافها استحت
خميس : عبدالله اخوج هنيه ؟
ظبيه : هيه يالس فـ الكوفي
خميس : خلاص ألحيين بسيرله عـااد أي شي تحتاجونه ماوصيكم مسكول واحد بس واكون صوبكم
ميثا : احــم لاااازم
خميس : وانتي ظبيه لاتدورين روحج تمي ويا خواتي
ظبيه فـ خاطرهاا ( مــاالت عليك مسوي روحك تخـااف عليه اكرهك اكرهك ماعرف شقايل بتحمل اعيش معــااك ما احبك انــاا احب يمعـه آآه يايمعه )
خميس على صوته وقطع حبل افكارهاا : انزييين ؟
ظبيه : انزين (وســاارت)
ميثا : هههههههه وحليلهااا تستحي
خميس : بس جب عن الهذره الزايده لحقيهاا لا تودرينهاا دقيقه
ميثه : من عيوني
عقب سار خميس صوب عبدالله
وميثا ماقصرت ماودرت ظبيه دقيقه وكل شوي تخليها تشتري شي غصب وظبيه موول مالها نفس لشي ولا إلهاا خاطر
وميثا كل شوي ترمس عن خميس وتمدحه وظبيه فـ خاطرها تسكت ميثا وتكفها تكفييخ عسب تسكت عورت راسهاا
ظبيه : انــاا تعبت خلااص
ميثه : بعدج ماخذتي شيي
ظبيه : بسي خذت واايد اشياا
ميثا : ترى خموس يحب وحده كشيخه
ظبيه ( يلتعن يعني واايد يهمني ) اكتفت بإبتسامه مسطنعه
ميثا : يا ويلي على الي يستحون تدريين احس ان خميس يموت فييج
ظبيه ( اي مستحى واي خرابيط ، واي يموت فيني حبي ليمعه اكبر من حب خميس لي ) تنهدت تنهيده خفيفه ونزلت راسهاا
ميثا : ظبيه بلااج ؟
ظبيه : انــاا تعبت بسير ارييح
ميثا : ايــوااا قولي جي من الصبح كاشفه حركاتج انــاا تبين تسيرين الكوفي عسب تجوفين خميس هنــااك
ظبيه ( غبيه وطول عمرج بتظلين غبيه من زين اخوج ألحيين ) : لاحبيبي بيلس هنييه تطمني
ميثا : بلااج حرجتي امزح معاج انــاا
ظبيه ( خلاااص ما اقدر استحمل تعبــت ) : ميثا وإلي يعافييج راسي يعورني سكتي شوي
ميثا : ظبوووي بلااج جي تغيرتي
ظبيه ( اففففففففف )
ميثا : برايج برايج بسير عند قوم فطيم وبييج
ظبيه ( واخيــراا ) : اوكي حبيبتي

أول ماسارت ميثـه ظبيه ارتــااحت ونزلت راسهاا وغاصت بـ افكارهااا يلست تفكر فـ يمعه خميس ويلست تقارن بينهم بس حسب نظرها هيه يمعــه احسن بخميس بواااايد عمرها مافكرت بـ خميس بين يوم وليله يقولون انها راح تاخذه انها وافقت عليه بس هيه وبنظرها وافقت عليه عسب يمعه لا يزعل منهاا هيه يمعه حب حياتهاا يمعه الانسان الوحيد إلي صــدق ملك قلبها وكل شي فيها يمعه الانسان إلي ملك قلبهاا وعقلهاا كله بس قطع حبل افكارها صوت رجولي خشن تقريباا
رفعت راسهاا انصدمت
قالت فـ خاطرهاا ( ها ياي شو يسوي هنيه )
: ليش يالسه روحج ؟

صوب قوم فاطمه
ميثا : فطييم فطيم قولي منوو هنيه ؟
فاطمه : منوو ؟
ميثا : ظبووي
فاطمه : حلفيي !!
ميثاا : والله العظييم حتى كنت اتمشى معاهاا
فاطمه : هيه وينهاا ألحيين ؟
ميثا : خليتهاا تيلس مادري بلااهاا شكلها مالها نفس لـ حد
فاطمه : وديني إلهاا
ميثا : هب متفيجه
فاطمه : ميثووه الله يخلييج
ميثا : راويني المسج إلي مساعه وصلج بعديين
فاطمه ضربتها عراسها بالخفيف : عييب علييج شو هاللقاافه
ميثا : هههههههههههههه اتمصخر عن تموتيين يلاا نسير إلهاا اكييد ملت وحليلهااا
مره وحده ميثا شهقت : فطوم فطوم فطوم يالسه تجوفين إلي انا اجوفه ؟
فاطمه وهيه منصدمه : هيه
ميثا : تعاالي بنسيرلهم
فاطمه سحبتهاا : غبيه انتي ابا أعرف اللقافه إلي فيج من وين يايبتنهاا ؟
ميثا : منــج

صوب ظبيه
: ليش يالسه روحج ؟
ظبيه ( ياربي يا ميثوو ليش ودرتيني ألحييين اففف )
: شو صمخه انــاا قاعد ارمسج ؟
ظبيه : خميس لو سمحت عمري مايلست ويا واحد روحناا
خميس يودهاا : حتى يمعــه ؟
سحبت ايدهاا بس خميس كان ميودهاا بالقوو
ظبيه : خميس نحن فـ مكان عاام الناس تجوفنــاا
خميس تقرب منهاا : عــاادي عقب كمن يوم بتسيرين حرمتي وبراويج عقب
ظبيه بدون لاتحس : انت واحد حقيــرر ( سحبت ايدها هالمره بالقوو وسارت )
تمت تمشي وقلبهاا شوي وبيوقف يالسه تتنفس بسرعه ودموعها فـ عينها تنتظر بس اشااره عسب تتساقط

خميس لحقهاا رد ويودهاا وتقرب منهاا زياده
خميس : انــاا **** ؟
ظبيه :.....
خميس دزها : ارمس انــاا شو منو بلع لسانج ألحيين ؟
ظبيه دمعه من عينهاا نزلت مسحتهاا بسرعه عسب خميس لا يجوفهاا : خميس الله يخلييك ودرني اباا اسير
خميس : فدييتج انـــااا والله احبــج
(وتقرب منهاا خطوتين بس هيه ابتعدت عشر خطوات )
خميس : والله ترى ماباكلج ما اكل انــاا
ظبيه : خميس نحن فـ مكان عاام بعدين انت بعدك ما صرت .... ( وسكتت )
خميس : كملي ليش سكتي ؟ماصرت ريلج ؟ قريييب انشالله
ظبيه كرهت عمرهاا كرهت الساعه إلي خبرت اهلهاا انها وافقت شقايل بتقلهم انها غيرت رايهاا يمعه يمعه راح يزعل
ليس يا يمعه ليش تباني آخذه خميس واااحد حقيـــرر
خميس : شو ويين رحتي ؟
ظبيه : ولا مكــاان بس انا بسير
خميس : وين ؟
ظبيه : بسير صوب اخوي عبدالله ابا ارد البيت
خميس : انــااا بوصلج
ظبيه تقاطعه : لاااا
خميس : ههههههههه لهالدرجه تخافين مني ؟
ظبيه ( مالت عليك وايد مصدق روحك كل شوي كرهي لك يزداد )
خميس : اباا اعرف بلااج انتي ؟
ظبيه ما استحملت دموعهاا خانتهاا ونزلت
خميس أول ماجاف دموعهاا انصدم هو بس كان يبا يغايضهاا مسح دموعهاا بإيده ظبيه انصدمت من حركته وتجرب منهاا وقال : دموعج غاليه لا تنزلينهاا
وســاار عنهااا أول ماسار ميثا وفاطمه سارولهاا
ميثا : هااه كشفناكم شو كنتوا تسوون ؟
فاطمه : ميثوو عيب
ظبيه : ليش تأخرتواا ؟
فاطمه : يالسه تصيحيين ؟
ظبيه : لاا بس عيوني مادري بلاهاا تحرقني ؟
ميثا : خراااااااااطه
فاطمه : ميثوووه اصطلبي
ظبيه : ماعلييه خليهاا ، زين ليش تأخرتواا
ميثا : ما تأخرنا ولا شي بس كنا ياينج بس جفناا خميس ويااج فطوم ماخلتني ايي

ظبيه اطالعت فاطمه فاطمه ابتسمتلهاا
فاطمه : ماعلييج من هاليااهل ، شحالج انتي ؟
ظبيه : بخيــرر ، يلا عيل انا بسير لعبدالله ابا ارد البيت تعبت
فاطمه : افــاا تمي بناخذ اغراض شرى بعــض
ظبيه : مره ثانيه انشالله
فاطمه : انشالله ، بس اتريي نحن بنوصلج لعبدالله
ظبيه : ماله داعي كملي شغلج
فاطمه : شو ماله داعي بتسيرين روحج لالالا مايصيير
ظبيه : خالوه مريم معاكم ؟
فاطمه : هيه اماايه هنييه
ظبيه : بسير اسلم عليهاا عيل ومره وحده اسير صوب عبدالله
وساروا رباعه صوب مريم
خميس كان واقف حذال امه ظبيه أول ماجافت خميس كرهت الساعه إلي قالت لـ فاطمه انها تبى تسلم ع امهاا
سلمت وتمت تسولف شوي وعقب قالتلهاا بتسير عند اخوهاا وطول هالوقت كله خميس ماشل عيونه عليهاا وهيه مقهــوووره تدري ان خميس يراقبها ويراقب حركاتهاا
عقب ساروا رباعه للكوفي ووصلوا ظبيه لـ عبدالله
عبدالله يلسهاا غصب اونه عازمهاا طلبت كوفي وكيك ويلسوا ياكلون عقب حركوا

وهم فالسيااره
عبدالله : اقول ظبووي بلاج فالمول كنتي منتفخه ؟ وعيونج حمر ليكون صايحه !!
ظبيه : لا بس عيوني كانت تحرقني
عبدالله : ايــوااا تدرين ان هل العين كانوا هناك
ظبيه : هيه جفت ميثه و فاطمه وعمو مريم
عبدالله : بـــس ؟!
ظبيه صوب الدريشه : وخميس بعــد
عبدالله : سلمتي علييه ؟
ظبيه : هيه
وسكتواا
وفـ هاللحظه ظبيه تذكرت الموقف كله يوم تم يزاعج عليهاا ويستهبل ويوم يود ايدهاا على طول طاحت عينهاا عـ ايدهاا وتمت تجوفهاا وسرحت عقب ردت وصدت صوب الدريشه وتذكرت لمـاا دموعهاا طاحت اشقايل شكل خميس انصدم وتحول 180 درجه وصـاار واحد طيب
واشقايل مسح دموعهاا وترددت الجمله فـ بالهاا : دموعج غاليه لا تنزلينهاا
حست هالجمله موول ماتفارقهاا وااايد أثرت فيها جان مره وحده تهز راسهاا وتضرب راسها بالخفيف عسب تشيل كل هالافكــاار وتنسى إلي صاار

عبدالله : ظبووي بلااج ؟
ظبيه : مــااشي بس راسي يعورني
عبدالله : زين شو ناويه ترقدين فالسياره يالله نزلي وصلنــاا

عقب نزلوا وحدروا البيت
ظبيه يلست تفكر وتفكر لو خميس من ألحيين جي يعاملهاا عقب شقايل بيعاملها وتمت غايصه بـ افكارهاا

فـ بيت محمد
ساره كانت يالسه تحت ويا يدتهاا موزه وحصه وعبيد
اليده موزه : هااه حصه يابنتي انتي فـ اي شهر ألحيين
حصه : فـ الشهر السابع
ساره : مادري متى بتربي وبتفكنــاا
حصه : افففف شغلت الشريط بس لوعتي جبدي بالحمل
ساره : هههههههه تستااهليين
حصه : إلا وين ملاك ما اجوفها من كمن يوم ؟
ساره : الله يسلمج هيه وخالوه شما وعمي يوسف ووجدان سايرين الشاليهاات
حصه : صدق ؟
ساره : هيه حتى عزموناا بس الظروف ماتسمح
خليناهم ياخذون راحتهم
حصه :اي ظروف ؟
ساره : الظروف الجويه بعد اي ظروف ؟
حصه تضرب ساره عالخفيف : هههههههههه الله يخس ابليسج ، زين وين امايه ؟
ساره : اميه ظهرت ويا خالوه ام عبدالله
اليده موزه : امج لو تقر فالبيت زيين بعــد
حصه : هههههههههههههههه
ساره : عبييييييييد قر مكــاان واحد لا تكسر شي
عبيد : مــاامــاا وين خالي سيف وخالي راشد ؟
حصه : خالك سيف ظهر ويا عمك سلطـان ، و راشد عنده شغل
ساره : هيه صح تعالي ، يقولون انج بتظهرين من بيت عميه بتسكنون روحكم ؟!!
حصه : هيه أحمد يباناا نظهر
اليده موزه : هيه زين البيت مافيه مكان
حصه : عقب مانظهر من البيت قسمنا بيكسرونه و قسم سلطان بعـد و بيبنون قسم واحد حق حقه
ساره : وميروه وين بيفرونهاا ؟
حصه : ميره بيتم قسمهاا بس بيغيرون الاثاث
ساره : حلــوو والله
حصه : هيه يدووه سمعتي ان سلطان وسيف بيشتغلون فـ شركتناا عقب بيفتحون شركه روحهم ؟
اليده موزه : هيه خبروني
حصه : انا اقول خل يتمون فـ شركتناا احسن
اليده موزه : انا فالبدايه قلتلهم جي بس جفتهم متحمسين للفكره ماحبيت احبطهم قمت اشجعهم
ساره : حصوووه تدرين ظبوي خبرتناا انها مابتسوي ملجه عوده بس عزيمه
حصه : لا ما اظن خالوه مابترضى
ساره : والله ظبوي قاالت
حصه : لا ما اظن بترضى
اليده موزه : ظبيه معاها حق ليش الخساير سوو عزيمه بس
ساره : بعد مب عزيمه عوده تقول انه بس نحن والعرس بتعزم الكل
اليده موزه : لا جي عيــب منقود يابنتي
ساره : يدوه شو يخصني انــاا قوليلهاا هيه
حصه : اممم تبون رايي خلوها ع راحتهاا احسن
فـ هاي اللحظه حدرن ام راشد و ام عبدالله
ام راشد +ام عبدالله : السلااام عليكم
الكل : وعليكم السلام والرحمه
ام راشد +ام عبدالله : شحالكن ؟
الكل : الحمدالله بخير
عوشه : ها حصه اجوفج هنيه اليوم ؟
ساره : هههههههههه اشكره تبى الفكه منج
حصه : شو تغاارين ادري امايه تحبني مستحيل تبى الفكه مني ، لا ماشي بس جي يايه شو ماتبيني ؟
عوشه : هههههههه لا فديتج ها بيت ابوج حياج الله بأي وقت
حصه : احم احم سمعتي
ساره : مـــاالت ، هيه صح خالوه ألحين بتسون ملجه ولا عزيمه بـس ؟
ام عبدالله : اكييد ملجه ليش منو قال بنسوي عزيمه ؟
ساره : ظبوي قالت فالملجه بتسوي عزيمه بس امبيناا اماا العرس بنعزم الكل
ام عبدالله : شو هااي على كيفهاا تخطط وترسم قلناا عرسها بس مب جيي
اليده موزه : خلوها على راحتهاا احسن
ام عبدالله : لا مب كيفهاا ، يلا انا بسير عبدالله ولدي واقف برع يتريااني
الكل : فمــاان الله

ردت ام عبدالله للبيت وهيه محرجه أول ماوصلت للصاله تمت تزاعج
ام عبدالله : ظبيـــه ظبيــــه ظبيــــــه وصمــخ
ظبيه تربع : نعم شو امايه شو صاير ؟
ام عبدالله : شو انتي على كيفج تقررين ملجتج بنسوي حفله عوده
ظبيه : بس امايه انا مــااباا
ام عبدالله : مب كيفــج
ظبيه : يمـه بس هاي ملجتي
ام عبدالله : لااا والله بتسوين حفله عوده يعني بتسويين
عبدالله كان توه ياي كان ساير يبركن السياره
عبدالله زاغ : شو صاير ؟ امايه ليش تزاعجين هدي
ام عبدالله : كيف اهدي واختك تبى تخبلني ؟
عبدالله اطالع ظبيه : ليش شو سوت ؟
ام عبدالله : اسألهاا خل هيه تقلك
عبدالله : ظبوي شو سويتي ؟
ظبيه : مــااشي والله ماسويت شي بس قلت مابا اسوي حفله للملجه بس عزيمه صغيره امبيناا مااباا اسوي حفله ليش تجبروووني ؟ ( وسارت حجرتهاا )
عبدالله : امــاايه فديتج خلاص هاي ملجتهاا خليها ع راحتهاا
ام عبدالله : انت تبى تخبلبي ؟! شو عزيمه امبيناا ؟
عبدالله : انزين عندج العرس عزمي إلي تبينه
ام عبدالله : لاا
عبدالله تم يرمسهاا ويحاول يقنعهاا إلين ما حس انه خلاص فقد الأمل بس انصدم لمــاا امه اقتنعت
استـــاانس واايد تم يالس شوي ويا امه عقب سار صوب ظبيه وجافهاا منسدحه عالشبريه يلس حذالهاا سولف شوي وعقب خبرهاا ان امه وافقت بس لاحظ ان ظبيه مول ما استانست
عبدالله : ظبووي بلااج ؟ مضايجه من شي ؟
ظبيه : عبدالله لو سمحت الله يخليك ودرني روحي ألحيين ابا ارقــد
عبدالله : خلاص برايج
وظهر عبدالله من عند ظبيه ويلس فـ الصاله يفكر فيها

قبل ملجه ظبيه بيوم
مرت هالايام بسرعه عالكل ، والكل كان يقضيها من مول لـ مول ، ومن سوق لـ سوق ، ومن محل لـ محل الكل كان متحمس لملجه وعرس ظبيه وخميس ، إلا ظبيه الوحيده إلي كـانت تفكر شقايل تخبر اهلها عن قرارهاا الاخير
إلي اتخذته من كمن يوم انها ماتبى خميس
انهــاا غيرت رايهاا خلااص

فـ بيت محمد
كانت ساره مشتطه فستانهاا إلي بتلبسه باجر لين ألحيين سيف مايابه إلهاا والدريول مشغول
كـانت صدق صدق مغيظه اتصلت فـ ميره بس ماردت
جـان تتصل ع بيتهم
: ألـــووو
ساره : وين مييرووه ؟
: هههههههه اعصابج الناس يسلمون زيين
ساره قفطـــــت : سووري والله بس ميروه عقدتني والله شحالك ؟
: بخير الحمدالله ، شحالج انتي ؟
ساره : الحمدالله بخير
: شو ما اشتقتيلي ؟
ساره : سلطــاان لو سمحت نحن شو اتفقناا
سلطـان : زين والله احبــج حسي فيه
ساره : اقلك عطني ميروه
سلطــاان : مااباا قوليلي احبــك بعدين
ساره : عيل احلم ( وسكرت التلفون فـ ويهه )

سلطــان : خييييبه محرجه بالقــوو
ام احمد : منوو هــااي الي محرجه بالقوو ؟
سلطـان توهق : هــااه .. ماعرف هاي وحده مغلطه

ام احمد : ليش شو قلتلهاا حرجت
سلطـان : ههههههه ماشي ماشي ( غير السالفه ) امييه شحال خالوه ام امل ؟
ام احمد استانست : والله بخير تسلم عليكم امسات مرمستنهااا ، هــااه ليكون حاط عينك على بنتهاا امــل ألحيين اسير اخطبلك ايااهاا
سلطـان انصدم : اميييه تدرين انــاا ابا منوو بس مطنشه لين ألحيين ماسرتي تحيرينهاا لي تقولين لي اشتغل بالاول وأمــل حتى مافكرت فيهاا تقولين ألحين بتسيرين تخطبينهااا لالالالا امــل اعتبرهاا شرات ميروه مستحيل افكر فيهاا
ام احمد حرجت : اففف منك انت يااهل ماتعرف مصلحتك عــدل ( وتمت محتشره وتعطيه محاضره )
سلطـان : امييه مستحيل اغيره رايي انــاا ابــاا ....
امه قاطعته : زين زين ميت عليها وهيه هب مسوتلك سالفه يعني شفيهاا امل ؟
سلطـان ( إنـاا لله وإنــاا إليه راجعون ) : اميــه انـــاا
ام احمد قاطعته مره ثانيه : اسكت اسكت رمستك ترفعلي ظغطي الرمسه ضايعه معــااك ( وسارت عنه )
سلطـان تم مضايج من رمسة امـه ومـاعرف يشكي لمنوو ولا لمنــوو هو موول مايفكر فـ امل هو يبى ســااره ساره وبــس وتم يفكر ليش يوم رمس امه وقالهاا عن ساره قالتله اشتغل عقب بس لما رمست عن امل قالت لو يباها بتخطبها اليوم قبل باجر كـان صدق مضايج هاليوم وحااط فـ خاطره

فـ بيت قوم ظبيه
ظبيه نزلت من حجرتهاا كـانت اتدور عبدالله عسب تخبره بـ قرارهاا الاخير عسب يوصله للكل لانها هيه ماتروم تخبرهم هم
سعيد : ويه ويه ويه طاعوا منو نازل اليوم شحالج يالعروس ؟
ظبيه حرجت ليش قالهاا عروس هيه ماتحس روحهاا عروس اصلا خلاص هيه بتنهي كل شي حقرته وماسوتله سالفه
سعيد : خيييبه قامت تخق عليناا بعــد
ظبيه : سعود هب متفيجتلك دخيلك يعني
سعيد : وابويه العروس مفوله
ظبيه : سعيــد
سعيد : ظبيـــه
ظبيه : اففففف وين عبدالله ؟
سعيد : ظهر مع امييه
قبل لا تركب ظبيه الدري انفتح باب الصاله وحدر عبدالله وشكله كـان تعباان
ظبيه : عبدالله ابــاا ...
عبدالله قاطعهاا : ظبوي والله تعبــااان حدري بعدين قولي إلي فخاطرج بسير ارقــد
وسار عنهم سعيد تم يظحك على ظبيه وعلى شكلهاا وهيه تمت محرجه بس طنشته لان لو علقت ولا قالت شي بيلسون يضاربوون اكتفت بالسكوت وردت لحجرتهاا بس قبل لا تحدر سمعت تعليق سعيد إلي صدق رفعلهاا الضغط
سعيد : هههههه العروس ردت لجحرهاا ههههههههههه

فـ بيت حميد
سلطـان كان يالس فالحوي روحه شكله كان سرحان
كان يالس يلعب بالرمل
ميره جافته من بعييد سارت عسب تزيغه بس على آخر لحظه كشفهااا
ميره : بلااه العاشق الولهاان يالس روحه سرحاان وحالته حاله ؟
سلطـان : امم مــااشي بس مضايج طشوونه
ميره : ممكن اعرف من شوو ؟
سلطـان تذكر : هيه صح ساروه اتصلت كانت تبااج ؟
ميره : احلــــف وييه ألحيين اكيييد مفوله عليه لأن مبايلي مغلق مافيه جارج
سلطأن : هههههههههههههه إلا مو مفووولـه
ميره : سلطــوووووون
سلطـان : ههههههههههههههههههههه سكتي دخيلج هههههههههههههههه
ميره : بردلك بعد شوي برمسهاا وبييك
عقب سارت ميره ورمست ساره وكانت ساره واايد محرجه منهاا تمت تتحرطم علييها وتهزبهاا بس عقب ميره عرفت تهدييهاا وتمت ترمسهااا بعدين ساره خبرتهاا عن سلطـان تمت ميره ناقعه من الظحــك وخبرتهاا انه مضايج ويالس روووحه وحالته حاله ساره تضايجت حست انه هيه السبب بس قالت دوااه عسب مايمصخهااا وتموا يسولفون شوي وخبرتهاا ساره عن الفستان وجيي وتمت تشكيلهاا الحال ومرت ساعتين على هالحال

فـ بيت قوم ظبيه تحديدا فـ حجرتهاا
كــاانت تمشي فـ حجرتهاا كانت سايره وراده
تفكر شقايل تفتح الموضوع ويا عبدالله
شو راح تكون رده فعل عبدالله
عقب امها وابوهاا وخميس والكل
بس قالت ان مايهمهاا اهم شي راحتهاا

فكرت تسير تجوف عبدالله يمكن نش من الرقااد
لااازم اليوم تنهي كل شي خلااص ماتروم تستحمل تبى ترتــااح هـ السالفه شرى الهم عندهاا

ظهرت من حجرتهاا وسارت لـ حجرة عبدالله دقت الباب
عبدالله : منوو ؟
هنيه ظبيه قلبهــاا تم يدق لدرجه حست ان يمكن قبلها يظهر من مكاانه
عبدالله : منووو ؟
ظبيه : انــاا ظبيه
عبدالله : حدري الباب مفتوح
حدرت ظبيه وقلبها يدق ويدق وكل ماتتقرب صوب عبدالله يدق زيـــاااده
عبدالله : ظبوي بلااج ؟ فيج شي ؟
ظبيه : لا بس
عبدالله قاطعهاا : انتي مريضه ؟ بلااه ويهج غادي اصفر ؟
ظبيه : مـاعرف مـاعرف
عبدالله : تبين اوديج الدختر ؟ تراج عروس شكلج مايوحي جنج وحده مظهرينهاا من القبــرر
ظبيه اطالعته بنظره خلته تسكت
عبدالله زااغ عـ ظبيه : ظبوي فديتج ارمسي بلااج
ظبيه بإرتبــااك شديد : عبدالله ابــاا ارمسك فـ موضوع مهم
عبدالله : ارمسي فديتج بلااج ساكته
ظبيه : عبدالله انـــااا ......

كـــاات
يتبع __DEFINE_LIKE_SHARE__

الغنــاهـ · 01-11-2009, 08:26 PM

مشكووره ياحبوبه على البارتات الروووعه ..

ونتريا منج التكمله .. __DEFINE_LIKE_SHARE__

غرنوجة · 01-11-2009, 10:03 PM

مشكورة خويتي على الباررت الباااااااارت

خبال شرات الي فوقي هههههههههههههههه

الله يوفجج ونتريا التكمله __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
بَڪٌلْ [ هُدۈَء ] أخَطۈآ خَطۈَآتيْ.ِ~	شذى الحب	تراحيب وتهاني	5	06-13-2010 11:41 AM
أمُوت مرّة لو أحسّڪ تضايقتْ ،/ و مليُـون مرّة لا إختنـق صُوتڪ بـ آه ،! [BB wallpapers	نظرة ودآع	برامج وصور وثيمات والعاب بلاك بيري و IPhone	22	04-19-2010 12:57 PM
ليشّ تتعّمـد تعّـذبنّي ؟..}~*	شوق الريم	قصص و روايات	9	10-07-2008 03:47 AM