~ .. الــ ق ــناعه x الــ م ـــوضه .. ~ - الصفحة 6

ઇ النورس ઇ · 08-16-2010, 04:56 AM

المشاركة الأصلية كتبت بواسطة آ۶ـشڨ ڎآڪ }›،.

آلسلآم عليكم ورحمة الله وبركآته .,*

يسعد مسآأـآك النـورس ،.

قبل لا أبدا بطرح رأيي الخاص ، كلامك فعلاً كله صح . . .

يمكن تكـون موضه أن الشخص يقتني الاشيآْء اللي ذكرتها سآبقاً ، لكن ماعتقد

أنه من بآـآب الموضه يمكن وصلت ‘‘ عشان الكل يتكلم عنه فلان عنده فلانه تملك ..الخ ’’

ومثل ماآقلت ‘ مايحس بالنعمه الآ اللي فاقدنهآـآ ’ ...

أنا أعرف شخص قريب مني ، يآـآه مرض جلدي بسيط ’ الصدفيه ’ الكل يعرفها

لكن هو خاف وسار وفحص <~ قالـوله يمكن يكون " سرطان " والعياذ بالله ..

لين طلعت النتايج بعد يـومين ، كانت حالته غريبه يصيح الليل ،.

المهم بالأخير ، طلع مب سرطان ولا فيه اصلن " الحمدالله " لكن تغير 180َ درجه

صآر همه الوحيد " صلاة الفير " وباقي الصلوات يقضيهن في المسيد وفي وقتهن

صار يرضي هله " هو راضنهم قبل " لكن قعدته بين امه وابوه صارت بزياده وبين عياله وحرمته

وبينا نحن هله ..

حس بنعمة الصحه اللي ممكن كان بيفقده في تقرير واحد يبرر صحته ..

آكبر نعمه نحن عايشينها نعمة الصحه أسال الله لا يحرمنا منها جميع ..

---

لين متى نريد نكون احسن شي فالمظهر ، بس مانريد نكون احسن العباد عندالرحمن ..

فعلاً صارت امور الحياه الاوليه هي اساسيه ، والشي الاساسي مانحس بقيمته لين يتحرك للفقدان ...

نحن نريد نكون الافضل ، لكن ماننسى أمور وـآيد مثل العباده ، وأنك تحافظ وتحمد الله ع الصحه

وبالاخير نحن مازلنا نهتم فالمظهر <~ وشي جميل الواحد يكون مرتب ولكن مب شرط يكون

مقتني أفضل الماركات والسياير ....والخ

.{ أتمنى ماطلعت عن إطار الموضوع ، كما أتمنى أني اعطيت رآـآيي بكل مصدآـآقيه }.

مرحبا ختيه أعشق ذاك ,,

الله يعافينا من كل شر ان شا الله

والحمد لله على نعمة الصحه

بل على جميع النعم سواء كنا نعرفها أو كنا نجهلها

والله يا ختيه لو الواحد فقد نعمه .. بيتمنى انها لو ترجع بس وبيحمد ربه عليها

طول عمره ,,

الانسان بطبيعته طماع وجشع ><

الله يبعد عنا صفاة السوء ,,

عيبني كلامج الصراحه

لين متى نبا نكون أفضل شي فالمظهر وأفضل شي أمام الناس

وما نبا نكون أحسن عباد الرحمن

يليييتنا لو كنا صدق نتسابق على هالشي ., جان الأمه الاسلاميه كلها بخير

كلامج عين الصواب .. وتستحقين تقييم عليه الصراحه ^ـ^

صار التحدي على من يكون أفضل واحد فالكشخه

ونسوا انه لازم نتسابق على طاعة الله وكسب رضاه

مثل ما قلت ,, مب عيب انه الواحد يكون حسن المظهر وجميل الوجه

لكن كل شي بحدود

مب أروح أفصل لي كندوره بخمسميه مثلا

و في كنادير بميتين أو ثلاثميه أحسن وأفضل وأجمل من اللي بخمسميه

هذا فعلا ما يسمى ( بطره ) ^ـ^

ولا توجد قناعه هنا

الله يهدينا جمييعا ان شا الله

..

شاكر لج ردج وتواجدج المميز يا ختيه أعشق ذاك

لا خليت من هالحضور الجميل ^ـ^

النورس __DEFINE_LIKE_SHARE__

ضيّ الحروف · 08-17-2010, 07:38 PM

[align=center]
و عليكم السلام ورحمة الله وبركاته ..

انا شخصيا ما أعتقد ان مجاراة الموضه يايه من "غياب" القناعه ... الواحد بيلبس و بيشتري لنه يبه يكون بمستوى الناس .. و بالتالي يكون مرتاح .. يحب ان الناس تشوفه بأحلى حله ..يحب يحس انه مندمج معاهم .. و نحن في زمن يسمونه "زمن المظاهر" ماعتقد شي ناس بترضى تكون دون غيرها من الناس.. كلنا نحب الأفضل لأنفسنا و الأحسن ..... مانحب نحس إن نحن منبوذين ...

و لكن إذا هالشي ياي من غياب القناعه فـ ما بقول غير ...

" القناعة ليست مجرد حروف ترصف.. و إنما هي شعور بالراحة.. فالإنسان في نهاية المطاف يبقى مجرد كتلة من المشاعر يحتاج إلى الشعور بالراحة و المرونة"

هي بتظل مسألة وقت لا أكثر .. خلوه يدفع و يلبس و يغتر .. لكنه بيعرف عقب كل ها ان القناعه راحه فعلا ....

يعطيك العافيه ع الموضوع الكشخه ...
لاهنت.. نرقب اليديد.!
[/align] __DEFINE_LIKE_SHARE__

‏جرؤح آنسآنـِہَ · 08-20-2010, 06:41 AM

السلام عليكم ورحمه الله وبركاته ..

فالبدايه اشجعك على كتابتك لهالموضوع ..

صراحه موضوع يستاهل حد يتناقش فيه عسبت حد غيرنا ياخذ العبره يعرف انه هالشي غلظ .. لانه في وايد ناس مب قادرين يحصلون هالاشياء اللي نحن انحصلها
يعني الحين الواحد يوم يكون مقتنع باللي عنده مثلا اللي عنده الحين سياره يعني اي سياره بسيطه على حاله اهم شي انه توصله وترده ويجوف الناس او يجوف ربعه عندهم اغلا السيارير اكيد بينقهر وبيسلك سلوك ربعه وهالناس .. بس ليش لانه مب مقتنع في اللي عنده اللي همه يواكب الموضه ويلحقها الناس تحمد ربها انه عندها هالشي يعني هالشخص المفروض يحمد ربه لانه غيره يمشون مشي ويركبون التكاسي ومتلعوزين واهوه عنده سياره بساعه يقدر يخلص اموره .. لكن شو نقول غير انه الناس مظااهر يعني يقولون لغيرهم نحن عندنا وعندنا وبناخذ و انا خذيت واخر شي ديون بالبنك شكثرها انزين ليش هاه كله مب انته اللي اخر شي بتضيع حتى البنات ما اخص الشباب فقط البنات بعد نفس الشي حد لو اهلها على قد حالهم ويالله يالله يعيشون اعمارهم لازم اللي تجوفه عند اربيعتها تباه مب شرط يعني انتي واهلج على قد حالكم ليش جي يعني اربيعتي عندها وانا ابي ومادري شو ..

يعني الحين في مثل يقول " مد اريولك على قد الحافك " يعني لا تزيد عن طاقتك وتروح تتسلف عشان بس مظهر واخر شي تكسر ظهرك هالديون اللي عليك ..

يعني انا عندي مثال مب واحد عده امثله وهاه صج .. واحد من هلي عنده سياره مادري شو نوعها بصراحه ..
ويوم من الايم جفته انه مغير سيارته مع انه سياره كانت يديده انزين ليش ..؟
وصلني من اخواني انه اصلا هالسياره الثانيه مب ماخذنها مأجرنها .. صراحه مادري شو نوعها بعد لاني ما اهتم بهالسوالف .. يعني قولوا تقريبا كان اجارها 13 الف يمكن .. يعني اوك اهيه حلوه ماقول شي بس ليش الخساير يوم ماعندك بيزات وعندك سياره بس جي اسراف ويحلقون الموضه مافكروا انه هالشي حرام .. لحقوا الموضه لكن على قد اللي عندكم على قد اللي بجيبكم يعني حرام الواحد يضيع عمره .. يعني مع الايام بعرس وبكون اسره وبيت .. مدامه اهوه من البدايه الديون فوق راسه عيل عقب كيف بعيش اهل بيته ..

وعندي بعد مثال ثاني وهذه بعد صج ..هذه نفس الحاله .. يعني يوم بياخذ له ملابس وله بياخذ له او عطور او جواتي (عزكم الله ) او تلفونات ..

يعني الحين اوك بيحصل نفس الملابس بمحل رخيص بس مايروح للرخيص يروح للغالي .. عنده 5 مادري 6 تلفونات انزين حق شو الناس بس تلفون واحد والحمدالله .. يعني مره اذكر قال جدامنا انه ماخذ لبسه بألف انزين ليش هالاسراف الا هالشي اكيد يوم واحد وتبدله واخر شي بتعقه ..

لكن شو اقول غير الله يهديهم ..

شو يعني هالناس ماتفكر وتقول انه انا باخلاقي اكون احسن من مظاهري اللي اظهر فيها .. على فكره في ناس من مظهرهم يبين انهم مهمومين والديون مكسره ظهروهم .. بس شو يحاتون المظهر للحين ماعرفوا لوين بيوصلون بهالتفكير اصلا هذه اذا كان عندهم تفكير يفكرون فيه ..

كلامك ياخوي النورس مليون بالميه صح ..
لانه انا احسااسي يوم اجوف هالناس راكبين هالمواتر ومتكشخين اخر كشخة انهم بس مظهر يبون الناس يشوفونهم وبس .. واحس هالنوع من الناس تجريهم الموضه بدون اقناع يعني بس حب تملك واسراف ..

مب شرط الكل البعض..
والسموحه طولت .. __DEFINE_LIKE_SHARE__

الأمـ الوطني ـن · 08-20-2010, 03:02 PM

المشاركة الأصلية كتبت بواسطة ઇ النورس ઇ

ما هو الحل من وجهة نظركم .. ؟ وهل غابت القناعه من عقولنا .. وهل تفوقت الموضه على القناعه ؟؟

القناعة كنز لا يفنى
ما راح اقولك حرام أو حلال
لأنه الحلال بين والحرام بين ... وما بينهما مشتبهات
لكـــن !!
بناقش الموضوع استنادا إلى موضوع الموضة، وما الحاجة إليها ؟؟

في البداية هي ليست مشكلة حتى أجد لها الحل !!
وهي ليست بظاهرة حتى أجد لها حد !!
وأيضا هي ليست بنفق حتى أجد لها مخرجا !!

هــي ومثلما قلت ..... قناعة

هي بصريح العبارة .. أفكار ومعتقدات وتوجهات تشكلت بفعل عدة عوامل منها :

1. التقليد: فأنا لست أقل من غيري ممن يلبس ساعة الألماس أو السيارة وما إلى ذلك
2. أظهر نعمة الله علي: أنعم الله علي بالمال الوفير .. ليش اخزن المال !! لا اسرف ولكن استمتع بالمال
3. لا تبخل: اصرف مافي الجيب .. يأتيك مافي الغيب
4. الواقع: الذي لا تستطيع أن تعيس بمناى عن الآخرين، فالإنسان يتاثر ويؤثر بالأخرين
5. طبقات المجتمع: اختلافها يجعل من الموضة والأناقة شرط عند البعض

تساؤلات بسيطة تدور في بال كل شخص يعمل في وظيفة أو في اعمال حرة

"ليش أشتغل ؟ وإذا كان للشغل فائدة مادية، ليش أحرم نفسي من الصرف؟ وليش ما أتمتع بحياتي، وانا شاب؟"

اصرف وتمتع بحياتك ولكن بحدود إنك ما تصبح من المبذرين

المشاركة الأصلية كتبت بواسطة ઇ النورس ઇ

أم أن هذه الأشياء هي مجرد مواكبة لهذه التطوارت ؟

المشاركة الأصلية كتبت بواسطة ઇ النورس ઇ

مثل ما قلت لك .. مش مواكبة للتطورات فقط .. هي قناعات شخصية تتشكل بعدة عوامل سبق لي ذكرها ..
فالإنسان دائما يسعى للتقدم والرقي، ولكن لا تنسى أن لكل شيء أمور تحكمه

على سبيل المثال:

طبقات المجتمع مختلفة، منها الفقير ومنها الغني وفيها الموظف وفيها المدير وفيها الوزير
وكل واحد منهم له منصب وعنده علاقات ... فلباس الموظف غير عن لباس المدير غير عن لباس الوزير
وحتى سياراتهم غير ... الموظف بإمكانه يكون بسيط في لبسه حتى لو كان غني
ولكن المدير بحكم علاقاته ومنصبه فإن الناس يتوقعون منه إنه يكون في كامل زينته والكمال لله عزل وجل.

مشكور أخويه النورس على طرحك الجميل __DEFINE_LIKE_SHARE__

ઇ النورس ઇ · 08-21-2010, 04:46 AM

المشاركة الأصلية كتبت بواسطة نبض روحي

تسلم اخوي ع طرحك ..
فعلآ .. اقتناء الآشيآء الثمنية والتبآهي بهاآ صآرت موضه في هذه الآيآم
الواااحد المفروض يمد ريوله ع قد لحآفه .. بس للآسف هالشي فقدناه بينا بسبب مرض التبآهي والتفآخر ..فتلقى شبآبنآ على وشك الانجراف في طريق السجون بسبب " سيآره " او " السفرآت "
وها كلهـ عشآن الناس ترمس وتقول ولد فلآن عنده هالموتر و سآر المكان الفلآني .. ..الخ
والل لهم مصلحه في هالامور آقصد التجآر يبآلغون في ردة فعلهم حيآل انجرآف هالجيل للمظآهر .. بتنصدمون اذا قلت لكم في بنات عندنا في الجامعه كل عبآه يسونهآ ب5000 درهم ..!
ليش كل ها ..ّ! ما سالو نفسهم ولآ ذكروآ عمآرهم انهم مسؤولين عن النعمه لي هم فيها .. في اماكن تسوي العبي ب 200 والبآقي اتصدقي فيها اذا اتحسين ان البيزآت يآلسه ع جبدج لآنج مسؤوله عنهآ .. الوضوع مب بس موضوع عبي .. في امور كثيره غآليه والكثير من الناس تشتريها للاسف مب حاجهـ فيها لآ بس للتفآخر والتبآهي بين الربع والآهل
آعجبني رد اختي " آعشق ذآتك، "

"
لين متى نريد نكون احسن شي فالمظهر ، بس مانريد نكون احسن العباد عندالرحمن ..

فعلاً صارت امور الحياه الاوليه هي اساسيه ، والشي الاساسي مانحس بقيمته لين يتحرك للفقدان ...

نحن نريد نكون الافضل ، لكن ماننسى أمور وـآيد مثل العباده ، وأنك تحافظ وتحمد الله ع الصحه

وبالاخير نحن مازلنا نهتم فالمظهر <~ وشي جميل الواحد يكون مرتب ولكن مب شرط يكون

مقتني أفضل الماركات والسياير ....والخ "

تسلم اخويه مره 2 ع طرحك ..
لآهنت

ما عليج زود يا ختيه

وصدقتي في وصفج

مرض التباهي <<

صار مرض هالشي الصراحه ..

الله يعافينا ان شا الله

والله يعين الأجيال القادمه

يمكن نحن اذا شفنا اللي بيصير جدام

بنحمد ربنا على حالنا ^ـ^

..

شاكر لج تواجدج الطيب يا ختيه

لاعدمتج أبد __DEFINE_LIKE_SHARE__